رواية وضاقت الأرض بي الفصل السادس والأربعون 46 - بقلم لبنى الموسوي

اكبر غلطة من تحب على الفطرة، الناس تريد واحد بالدغش خبرة. بوكتنه الاهتمام الزايد يأذيك، من تهمله حيل ابن آدم تخسره. الما نعرف نميز وجهه من مگفاه، مستمتع وعايش عيشة الشجرة. بس اليقضي عمره بعزلة حتى يطيب، يفرطوا مثل ما تتفرط الذرة. الله على الما يهتم للي يروحون، لا يحير بدمعته ولا بجي يكسره. بس العاشق البي غيرة من يموت، ما تقبل غلط كتالته الذكرة. ولك يا ملح ضم گصتك وماصخ صير، الحل والربط بيد الخاين العشرة.

ما يهضمني اليشوه أعراض الناس، انه اليهضمني ليبررله ويعذره. ريحان: باوعتله بنظرات عتب، نظرات تشرح الألم الزرعه بگلبي بعد ما حبه وغدر بيه. نظرات كلها ندم أحاول أوصف بيها شعور الحقد الجاي أحسه اتجاه هذا الإنسان. الإنسان التحول بين ليلة ويوم من روح تسكن جسمي، السم يسري بدمي ويسحب مني العافية شي ورى شي. حسيت على إسحاق سحبني من ايدي، جمار بعده واقف يباوع عليه. مشينا من يمه ضربه حنظل چتف بچتف حيل.

طلعنا من المحكمة وآنه أنازع الموت، ما أعرف بشني چنت أحس بالضبط ويا إحساس منهن الأصح. من جهة أگولن ريحان قوية وراح تعديها، ومن جهة ثانية أگولن آنه اليوم وقعت على موتي موش بس ورقة طلاگي. تعبت كلش، الغصة تارسة زردومي وضلوعي قابضة على گلبي تحاول تسيطر عليَّ قبل لا ينط من مكانه. وصلنا للسيارة صعدت ليوره، حطيت راسي ع الجامه وأطلقت سراح دموعي. أبكي ريحان يمكن هالدموع تخفف من وجعچ ولو شوي.

باوعت لجمار طلع من المحكمة، قبل غمضت عيوني وعدلت گعدتي ع السريع. خذلتني اي، وجعتني همينه اي، بس مستحيل تكسرني يا چذبة عمري وغلطة حياتي الأولى والأخيرة. تحركت السيارة واني دايرة وجهي عنه، خلي بس نظرات الكره والحقد تبقى مطبوعة بعقلي وگلبي. ما أريد غيرهن ذكرى منك، لهنا وكافي محيتك يا جمار مثل ما تنمحي المواقف من عقل الطفل الصغير برمشه عين.

غسق: الضحويات چنت بالصالة أوكل ود، طبت ريحان سلمت وراحت بوجهها للغرفة. صاحتها الحجية بس ما ردت، مبين عليها تعبانة وحقها لأن الصار وياها الجبل ميحمله. گمت وديتها يم الجهال ورجعت، صاروا الولد بوجهي توهم طابين للصالة. إجه إسحاق سحبني من ايدي للزاوية. إسحاق: ريحان وين؟ غسق: طبت الغرفتها. إسحاق: خليچ جارها غسق، عبن ما عدها غيرچ وتدرين الصار وياها مو شوي.

غسق: ميحتاج توصيني، بس اني تقصدت ما أروح وراها هسه، لأن شفتها ضايجة وشكلها حابة تظل وحدها حتى على أمي ما ردت من حچت وياها. إسحاق: المهم خلي عينچ عليها دايماً، آنه صعب أحچي وياها لكت انتِ حرمة مثلها واليوجعها يوجعچ. غسق: اي إن شاء الله تتدلل. ابتسم بوجهي وراح للحجية، ظلت تسأله شصار وياهم وشسوه جمار ومنو جاي ويا ومن هالسوالف مال النسوان الي لازم بمثل هالمواقف يعرفن الصغيرة قبل الچبيرة.

شوية وصعد بدل وراها طلعوا هم والشيخ، ظليت أشتغل ويا البنات للظهر. گالت الحجية شوفي ريحان وين صارت ظل بالي وياها. طبيت لگيتها دتصلي، ظليت انتظرها تكمل. أول ما سلمت گلتلها تقبل الله، هزت راسها بدون متباوع عليه. تقربت منها گعدت يم رجلها. غسق: ريحان قوي نفسچ ترى ميستاهل تضوجين علموده. ريحان: ما ضايجة. غسق: لا ضايجة، وحقچ ما ألومچ والله العظيم. بس كلما تحنين تذكري السوا بيچ هو وأهله حتى ينمحي هالشعور من گلبچ بنفس اللحظة.

ريحان: ما أحنن غسق، بس مقهورة على سنين عمري الضيعتها وياه. على شبابي الذبل بسببه، وابني الخسرته بعد كل التعب التحملته لأجله. ومن تالي يروح بحقد وضغينة ناس ما تخاف ربها ولا بگلبه ذرة رحمة. آنه مقهورة على روحي، زعلانة من نفسي عبن حبيته وسلمته گلبي الخالي من اي مشاعر لأي بشر گبله وتالي داس عليه ومشى. غسق: هو الخسران، وداعتچ هو الخسران ولو يفتر كل الدنيا مراح يلگه التعوضه مكانچ ولو مقدار شعره.

ريحان: الله كريم، الجرح ما يلتأم بيوم والأثر ما يختفي بسنة. وكلمن يتجازه على مقدار وجعه، الحمد لله على كل حال. غسق: الله يصبرچ ويقوي إيمانچ إن شاء الله. يلا إذا كملتي صلاة گومي أمچ تريد تحچي وياچ ظل بالها عليچ. ريحان: محتاجة أظل وحدي غسق، گليلها ما بيها شي بس تريد ترتاح وهي راح تعرف علتي شني عبن حافظتني عدل. غسق: ماشي مثل ما تحبين، حاولي تقرين قرآن ترتاح نفسيتچ واني بس يصير الغدة أجيبه الچ لهنا.

هزت راسها بابتسامة مليانة حزن، مسحت على خدها وگمت من يمها مخنوگه. أحس الدمعة واگفة بطرف عيني، الله يساعد گلبها لعد شقاعد تحس حالياً. طلعت للحجية چانت تقرا قرآن، من شافتني صدقت ورفعت راسها. الحجية: ها چا وين ريحان عليش ما اجت وياچ؟ غسق: ما بيها شي يمة بس محتاجة تظل وحدها. الحجية: شني چانت تسوي من طبتي عليها؟ غسق: تصلي. الحجية: چا امشي جهزي الغدة وبس يصير أخذي الحجرتها. غسق: اي صار تتدللين.

رحت للمطبخ البنات يشتغلن، سألتني شمس عن ريحان گلتلها مثل وضعها ماكو شي جديد. أيام مرت وريحان معتكفة بغرفتها، لا تضحك لا تسولف لا تگعد ويانه. ومن نروح الها اني لو البنات تگول محتاجة أظل الوحيدي عوفني وطلعن. وضعها مأثر على كل الي بالبيت، مو بس إسحاق تعبان كل أخوانه مثل حالته. وخو الحجية روحها صايرة بخشمها تريد بس واحد يزل وياها حتى تطلع حرگتها بي.

اليوم هناء رادت تروح لأمها، ولأن اني نفسيتي كلش تعبانة من جو البيت وأهله قررت أروح وياها. العصر صعدت لإسحاق چان ديبدل، لحد الآن من أريد أطلب مني شي أستحي ما أدري شوكت أتخلص من هالطبيعة المو حلوة. واقف ع المرايا يمشط ومركز بروحه، فجأة صارت عيونه عليه گاعدة ع الچرباية وأباوعله قبل دنگت مستحية. ذب المشط وإجه يمي رفع راسي بإيده. إسحاق: ها خير أحچي شني رايدة؟

غسق: هااا هاي اسمه هناء يعني، تريد تروح لخالة وحبيت أروح وياها إذا متمانع طبعاً. إسحاق: چا وريحان؟ غسق: إسحاق هي وين تقبل تحچي ويانه، شو كله بغرفتها وإذا رحنالها گالت خلوني وحدي. شيفرق يعني رحت ولا بقيت نفس الشي الله وكيلك. إسحاق: زين أُمشن آنه أوصلچن بدربي. غسق: لا لتعب نفسك صهيب موجود هو يوصلنه. حچيتها وگمت للكنتور، طلعت ملابسي وظليت انتظره يطلع من الغرفة بس تأخر كلش.

باوعتله بملل، شكله مناوي يطلع مدري شديسوي بالأوراق. سحبت الملابس من الچرباية ومشيت للحمام داروح أبدل قطع طريقي بوقفته گدامي. رفعت عيني مستغربة تصرفه، باوعلي هزيت راسي شكو رفع حاجبة وگال: غيري هنا. حسيت دمي نشف ما ظلت بجسمي ولا قطرة، گتله: ليش؟ شو هذا دار وجهه وطلع من الغرفة بدون ميجاوبني. ما أدري شنو قصده من هالكلام، چان يگدر يطلع قبل لا أروح للحمام ويخليني أبدل ليش حچه هيچ وخوفني؟

نفضت راسي بتعب، غيرت ملابسي وسحبت الحجاب دالبس بي ع المرايا طب. من الخرعة نبت الدنبوس بإصبعي، حاولت أكتم وجعي وصدمتي بنفس الوقت. إجه يمي فتح المجر مالت الميز سحب سلاحه وطلع. تصرفاته غريبة كلش، مرات أحسه إنسان طبيعي حاله حال الكل، ومرات لا والله اني المريضة نفسياً أتصرف أحسن منه. نزلت جوه بدلت الود وظليت أنتظر هناء، شوية وطلعت هي وصهيب. وصلنا بيت خالة وراح.

سلمنا عليها وگعدنا، ما أدري ليش حسيت اكو شي صاير وياها تريد تحچي بس مترددة. خليت ود بالگاع ورحت يمها. غسق: خالة صاير شي گولي أحسچ مو طبيعية. الخالة: لا يمة قابل شني اليريد يصير. غسق: بروح عمو تحچين. الخالة: موش مهم يمة، آنه عبني استغربت السالفة ضجت وإلا هي ما تسوة. غسق: ميخالف أحچيها. الخالة: جيراني دگت منساع، گالت اكو زلمة جاي للمنطقة سائل علينه وما يعرفوا ياهو. غسق: يعني شنو قصدچ واحد من أهلي؟

الخالة: يجوز مو أكيدن. غسق: زين خلي نگول هم، بس شلون وصلوا لبيتكم وشعرفهم اني هنا، معقولة الدكتور حب ينتقم لنفسه بهاي الطريقة؟ الخالة: لا ما أظنن، الرجال بالسجن يمة شيودي لأهلچ. حتى يجوز مو يمهم السالفة وأحنه فتنه زايد بيها. غسق: خالة تعبت، لشوكت أظل خايفة منهم ومن الماضي الملازمني مثل ظلي بس جاوبيني لشوكت؟ الخالة: يمة گولي يا الله، بعدين فرضي وصلوا ليچ صگد، اكو رجال بيهم يتجرأ ويمس شعرة من راسچ وإسحاق وضاري موجودين؟

أكيدن لا له، ابن أمه وأبو اليگرب صوبچ وكل هالزلم بظهرچ. من هيچ خليچ مرتاحة ولا تفكرين بشي مادامچ بدار الشيخ وتحت حمايته. غسق: انتِ متعرفيهم خالة، هذولة ناس ميخافون الله خصوصاً مهيمن وجماعته. تخيلي لو گدروا يوصلون لهنا، شنو راح تكون النتيجة بعد ميعرف إسحاق بكل الحقيقة؟ الخالة: انتِ موش گلتلي مرة، شفتي هذا المصخم بالسيطرة مال بغداد؟ غسق: اي. الخالة: وموش آنه گلتلچ، ما يگدر يسوي شي عبنه جبان ومو گد الشيخ ومواجهته؟

غسق: صح گلتلي. الخالة: وهاي تنوعي، شكثر مرت أشهر سوى شي گرب صوبچ؟ غسق: لا. الخالة: چا خلص يمة لا تخافين، هذول نسوان بهيئة زلم ما براسهم حظ، خاطر يوگفون بوجه الشيخ وابنه وياخذوچ منهم. غسق: ما أدري والله، نگول إن شاء الله مو هم السألوا عنكم، وحتى لو طلعوا هم محد من المنطقة يعرف بيكم اجيتوا للبصرة مو صح؟ -أي آنه گلت ماشية لأهلي، لكن ما گلت لوين.

-أي هاي هي لعد ميگدرون يوصلولي. وعلى گولتچ ذاك حسن العار عرف بيَّ بالبصرة صارله أكثر من سبع أشهر، ومع ذالك ما سوى شي. -أي يمه، آنه أصلاً ما ردت أگلچ عبن السالفة ما تسوى، بس انتِ آخ منچ حلفتيني بروح الغالي وما گدرت اسكت بعد. -لا عادي ما تفرق عندي. محد يگدر يوصلي، واني هنا متأكدة من هالشي. حچيت هيچ أحاول أقنع روحي قبل لا أقنعها، بس مع ذالك ما گدرت أتخلص من الخوف الظل ملازمني من ساعة ما عرفت اكو أحد سائل عنهم بالمنطقة.

مرت أكثر من 3 أشهر وما صار شي جديد. خلصت العطلة واجه وقت الدوام، ريحان چانت لازمة عِدة لذالك ما گدرت تداوم بالبداية. واني هم ضربت الدوام وياها، خصوصًا ماكو امتحانات بهالفترة، والمحاضرات صرت أتصل من إسحاق على صديقتي وآخذهن منها. اليوم خلصت عِدة ريحان. گعدت الصبح على صوت المنبه گمت ع السريع، عندي امتحان غسلت وگعدت إسحاق علمود أنزل أسوي الريوگ. رحت لغرفة ريحان، دگيت الباب صاحت تفضل لگيتها گاعدة ومبدلة.

-ها زين عبالي بعدچ نايمة واجيت أگعدچ. -لا خية گاعدة من زمان. امشي غيري هدومچ وآنه أجهز الريوگ. صعدت فرحانة، ممصدگة ريحان راح تطلع من غرفتها وتشتغل، لأن طول فترة عدتها ما طلعت من الغرفة إلا للحمام وبس. طبيت إسحاق چان بالحمام. استغليت عدم وجوده وبدلت ع السريع، لبسي چان مستور بس ألوانه تجذب. باوعت لروحي بالمرايا، خاف يشوفني بهاللبس ويحچي؟ لا وليش ديحچي؟ هو فستان لون بيجي قابل شلابسة.

رجعت باوعت، مو أني ما ألبس فساتين كله جبب. هاي أول مرة أسويها، خاف يضوج لأن بدلت لبسي. لا يلا، شو هو حاله حال الجبب. صح حلو وألوانه تفتح النفس، بس المهم بالأخير هاللبس مستور. وگفت ألف بحجابي، دا أعدل بي طلع إسحاق مبدل. ظليت على وگفتي أراقبه بالمرايا، عيونه علية يباوع من فوگ ليجوة. تقرب سحب المشط ووگف ورايه. لو عندي امتحان هم ما أخاف هيچ، أحس الدم يبس بعروگي.

يمشط ويباوعلي صفح، حاولت أشتت نظري وسويت روحي مو يمه. ظليت أخربط بحجابي وأرجع أعدله، أخاف أتحرك وأحصلي رزالة منه. شمر المشط ودار وجها، راد يروح رجع التفت عليه تقرب مني وهمس بصوت هادئ: -عليش غيرتي لبسچ؟ -هاااا لا والله ما غيرته، بعدني ع الجبب، بس من طلعت أشتري ملابس للجامعة شفت هالفستان وعجبني. وطبعًا ما چان اشتريته لو ما مستور، حتى شوف طوله وعرضه زين ما مخصر عليه حاله حال الجبب. تقرب أكثر صار يمي كلش وهمس:

-بس مطلعچ حلوة، وآنه ما أحبن أحد يتنوع لجمالچ غيري. تلعثمت بخجل: -ااا أي، هسه أغيره عادي والله. ردت أروح للكنتور سحب أيدي: -خليچ لا تبدلينه، تهني بي ما طول عجبچ، لكن أحسبي حساب هاي آخر مرة أشوفنه عليچ. -أي صار تتدلل. باسني من خدي ونزل. باوعت لنفسي بالمرايا، شديصير وياچ غسق ليش حتى كلامه العادي يفرحچ لهالدرجة؟ ابتسمت ويا روحي، لأن تحبي يا ذكية ولو شما تحاولين ما تگدرين تغيرين من هالحقيقة شي.

أخذت ملازمي ونزلت. لگيته گاعد بالمطبخ وريحان تصب بالچاي. خليت الغراض ورحت ساعدتها حميت الخبز وگعدت بصفه. چان ياكل ويباوعلها، شايل بگلبه حنية تعادل حنية الأب على بنته. تمنيت لو واحد من إخواني حنين عليه لهالدرجة ما چان صار ويايه كل هذا. -ريحان خوية. -نعم خوية. -بسچ عاد، خليچ من جو النكد هذا وارجعي ريحان النعرفها، ما أحب أشوفنچ هيچي. -إن شاء الله خوية، آنه بخير لا تشيل همي، مسألة وقت موش أكثر.

-أدريچ سباعية يبعد أخوچ ما ينخاف عليچ. حچاها وگام باس راسها. راح يغسل واني لملمت المكان ع السريع سمعنا أيوب دگ هورن. طلع إسحاق قبلنا. راحت ريحان جابت ملازمها من الغرفة وطلعنا لگيناهم يسولفون بالباب. من شافونا تسالموا وصعدنا. تحرك بس طلع من البستان گال وبدون ما يباوع بالمرايا: -شلونچن خوية؟ استغربت أول مرة يحچي ويانه. باوعت لريحان ما جاوبت، رديت بمكانها: -بخير خوية رحم الله والديك. -وأنتِ ريحان شلون صرتي؟ رفعت راسها

باوعتله عيونه ع الطريق: -الحمد لله على كل حال أحسن إن شاء الله. سكت بعد ما گال شي. وصلنا للجامعة وراح. التهيت طول اليوم بالمحاضرات لـ 12 ونص خلصت. رحت للحديقة لگيت ريحان هم موجودة. صدفت ثنيناتنا ما جاي دكتور آخر محاضرة لذالك طلعنا من وكت. دگت على إسحاق مغلق. صخر أكثر من مرة ما جاوب. باوعتلي بملل: -شلون تالي ويا هالسالفة العوجة؟ -أگول ما تاخذين رقمه؟ أكيد إسحاق ما يگول شي لأن يحب أيوب ويثق بي.

-أي هو اليوم راح أحچي وياه. دا نسولف دگ جهازها، إسحاق ديتصل. ردت گالتله: -طلعنا اتصل على أيوب خلي يجينا إذا ما عنده شي. أكثر من نص ساعة رجع خابرنا گال وصل بالباب. طلعنا لگينا ينتظرنا بالسيارة سلمنا وصعدنا وياه. ظلت عيوني عليه ما أدري ليش أحس بي شي متغير عن قبل. نص الطريق خابرته أخته هم خلصت. وصلنا ع السريع وراح. لليل واگفة أشتغل بالمطبخ ويا البنات باوعت الشمس دايخة. تقربت منها بهمس: -شبيچ شمس شدتحسين؟ -ضغطي نازل.

-لعد روحي ارتاحي أني أكمل عنچ. -لا خليني أتهي وياكم أحسن. -أحچي شبيچ اكو شي؟ التفتت ع البنات ملتهيات يشتغلن: -ليش ما ديصير حمل عدنه؟ معقولة السبب بالولد؟ لأن كلنا هيچ. -هههههه وجعه أي والله! لعد ود منين اجت وهذا حنظل عنده خير من الله وإلياس هم. -بس أني وأنتِ وهناء صارلنا شگد متزوجات وماكو.

-أني ما عليچ بيه ما نريد أطفال هسه. بس أنتِ صار من البداية والله ما قسملچ وطرحتي معناها يصير أول وتالي بس اصبري. أما هناء بعدها ما صارلها هواي من تزوجت، خلي تعدي السنه ع الأقل وبعدين تفكر بالخلفة. -أي بس إذا ماكو خلل، المفروض نحبل بسرعة لأن التأخير هذا بالطب يعتبر مو طبيعي. -وليش ما تراجعين لعد إذا هيج خايفة؟ -صخر ما يقبل، كلما أجيب سيرة الجهال يگول خليها ورى رب العالمين شوكت ما تصير تصير على شنو مستعجلة. -بعد شكو؟

المفروض تفرحين ما مهتم غير واحد هو الينق مو أنتِ. -لا تشوفيه يحچي هيچ، والله هو يريد أكثر مني بس ما يجيب سيرة الموضوع حتى لا يضوجني. -الله يرزقكم حبيبتي، ومادام صار مرة يصير مرتين وأربعة. بس خلي عينچ بعين رب العالمين ولا تيأسين من رحمته. -ونعم بالله. ظلينا نشتغل ونسولف بهالموضوع، وكل شوية تسأل ليش أني وإسحاق ما نريد أطفال. تحججت بدراستي لأن ما عندي غير حجة حتى أنطي عذر مقنع الها ولغيرها.

گاعدين ع العشى دگ جهاز إسحاق. چنت بصفه شفت مكتوب الضبع رفض الاتصال وضم الموبايل بجيبه رجع دگ مرة ثانية. صاح الشيخ: -خير وليدي ياهو اليدگ هساع؟ -الضبع يابة. -چا ما ترد بلكن شي ضروري؟ فتح الخط بس گال ألووو تغيرت ملامحه. عاف العشى وگام للممر خفت ليكون صاير شي شكله ما يبشر بخير. دقيقة ورجع، صاح من الباب: -صخر تعال خوية. باوعله الشيخ: -خير عليش عفت عشاك وليدي؟ -يابة صايرة سالفة ويا الضبع ومحتاجني. حنظل:

-خير خوية تريد نمشي وياك؟ -لا لا، خليك گاعد إذا احتجناك عودن أتصل بيك. گام صخر راد يغير ملابسه ما قبل إسحاق. أخذه ع السريع وطلعوا، قريب الساعة ما حد منهم بين. الشيخ ظل باله يتصل عليهم وماكو رد. صاح بحنظل: -گوم أمشينا نشوف شني الجاي يصير وياهم. طلعوا كلهم لـ 12 وما حد منهم رجع. الحجية ظلت تلوب تتصل عليهم وماكو. قريب الربع ساعة سمعنا صوت الباب.

گامت تركض قبلنا، شفنا الولد طبوا مصخمين من فوگ ليجوة. منظرهم رعبنا كلش، نريد نعرف شصار وياهم ما حد يحچي. گعد الشيخ بالصالة مدنگ. تقربت الحجية من إسحاق وحنظل چانوا واگفين سوة وگالت بصوت هادئ: -يمة شصايبكم؟ أحد يحچيله شي يريح گلبي بي. إسحاق: -العمارة احترگت يمة. حچاها دگت على صدرها حيل: -صخام بوجهك حميد! شني الحرگها واليمته صار هالشي؟ -ما عرفنه عبن الدنيا ليل، خلي يطر الفجر وعودن نعرف السالفة ياهو الوراها.

-خوبن ما مش بشر تأذى؟ -أي، خالد أخو الضبع، بس لا تخافين هو بخير كلها حروگ فوگانية. -يعني رجع لأهله؟ -لا باچر الصبح نطلعه. -چا لون رحت ليهم أخذني بدربك فشلة من أميمته. -صار تتدللين. حچاها وصعد فوگ. باوعت الولد كلمن راح لغرفته. بس الشيخ ظل گاعد بالصالة مدنگ وأيده على راسه. تقربت گعدت بصفه: -بوية أنت بخير؟ راسك يوجعك لو شنو شتحس بالضبط؟ -لا بنيتي ما بيه شي، أمشي لزلمتچ تنوعي خافن يعتاز الحاجة وأنتِ موش چارة.

-تريد أخذ ضغطك؟ يمكن صاعد لأن وجهك أحمر. ريحان: -آنه أشوفنه أمشي لأخوي أنتِ. بست راسه وصعدت. طبيت لگيت إسحاق بس بالسروال والفانيلة الداخلية ومدري شديسوي بأيده. سديت الباب ورحت يمه. أول ما وصلت شاغت روحي من المنظر، أيده من فوگ ليجوة حمرة ومن جهة چتفه اكو حرگ قوي طالع من عنده دم. رفع راسه گال: -لا تتنوعين. ما اهتميت لكلامه، نزعت حجابي ع السريع ولزمت چتفه بأيدي.

ظليت أباوع للحرگ، مدري منين اجتني الجرأة أشوف هيچ شي گدامي. بالعادة نفسي تجز وما أتحمل هيچ مناظر صعبة، بس هسه الوضع اختلف، أحس هالألم بيه ومجبورة أتحمله حتى يطيب. رفعت راسي شفته يباوعلي بتعجب: -ليش هيچ إسحاق؟ مو چنت بالمستشفى، ليش ما خليتهم يعالجوك؟ -ما بيها شي. هاي جبت مرهم وياي، هساع ادهنها وللصبح تصير أحسن. -أدري شنو من گلب عندك! دخيلك ربك شلون متحمل هالالم، ترى هذا حرگ، تعرف شنو يعني حرگ؟

حچيتها وسحبت چيس الدوا من الميز. باوعت مرهم ويا حب يمكن مسكن. فتحت الكارتونة وطلعت العصارة منها. گتله: اگعد. باوعلي بطرف عينه. -ليش تباوع؟ اگعد خلي أدهنها الك يهدأ الألم شوية. -ناوليني، آنه أسويها. راد يسحب العصارة، رجعت ايدي ليورا. -لا، آني. وين تسيطر؟ شوف ايدك شصاير بيها. -يحتاجلها تنظيف، صعبة عليچ السالفة. -لا مو صعبة، علمني واني أسويها. رحت جبت الگطن والديتول ورجعت. لگيته گاعد ع الچرباية.

گعدت بصفه گال: مسحي عليها بهدوء خاطر تتنظف زين. عقمت الگطن وبديت أنظف بيها. المنظر چان يسحب الروح، بس لزمت نفسي وحاولت ما أخلي الخوف يبين بعيوني. طول ما اني أشتغل هو يلوب. صح كاتم على نفسه بس گاعد أحس بي، بحيث أحاول على گد ما أگدر ما أضغط على ايده حتى ليتأذى أزيد. كملت تنظيفها وسحبت العصارة. بديت أدهن ع الحرگ وعيوني تتأمل تفاصيله. چان داير وجهه عني يحاول يخفي وجعه. لزمت چف ايده گبل باوعلي.

-ترى عادي تتوجع گدامي، آني مو غريبة. -وياهو الگالچ آنه متوجع؟ -گلبي گلي قبل عيوني. بس حچيتها ابتسم. رجعت أدهن اله وأسأله شصار حتى يشغل نفسه عن التفكير بالألم.

گال: أيوب اتصل علي وبلغه العمارة دتحترگ، وهاي العمارة هستوهم مكملين بنائها، وچان الشيخ مقرر يسويها مجمع سكني بإيجارات بسيطة للناس المحتاجة. وأخو الضبع هو الاكتشف الموضوع، ولمن حاول يسيطر على الحريق أخذ نصيبه من هالنار لو ما أيوب إجه وتلاحگ علي چان راح بيها المسكين. خلصت ايده وهو يسولف. لفيتها اله علمود لا تتجرثم وجبت المي حتى يبلع الحباية وينام. سحب الگلاص مني، حطه ع الميز. أخذ ايدي بـ ايده ورفع عيونه عليه.

باوعلي بنظرات غريبة وياها ابتسامة. ما أحس إلا دنگ عليها وباسها من الباطن أكثر من مرة. صفنت علي مصدومة. ما أدري ليش أقل حركة منه تأثر بيه وتجبر نبضات گلبي تخرج عن المألوف بدگاتها. گام طفى الضوا ورجع. باوعت علي: شو هذا نام بمكاني. ما حچيت شي، رحت غسلت ايدي ورجعت تمددت بالجهة الثانية. أشرلي على ايده: تعالي. رفعت نظري صافنة علي يمكن غير مكانه بس علمود ينومني بحضنه.

خليت راسي على صدره بهدوء. مچنت مرتاحة، أدري بي متوجع بس ميحچي، وأكيد نومتي بحضنه تأذي أكثر. حچيت بتردد: إسحاق. -نعم بويه. -خليني أوخر أحسك ممرتاح هيچ. -لا مرتاح، لا تشغلين بالچ وياي. -شلون مرتاح بلا؟ يعني فوگ ايدك ووجعها تتحمل ثگل راسي عليك؟ -على گلبي مثل العسل عبن أنتِ راحتي. رفعت راسي باوعتله. چان الضوا خفيف بالغرفة يادوب أشوف تعابير وجهه المبتسم. سحبني علي باسني من رگبتي وأذني،

وراها رجعني الحضنه وگال: نامي بويه بلاية حچي، وراي گعدة من صباحيات رب العالمين. أريد أسيطر على دگات گلبي ماكو. يمكن حتى هو حس بيها لأن النبض بذيج اللحظات تجاوز حدود صدري وسرى بكل أنحاء جسمي حتى عقلي سيطر علي. ما گدرت أنام بسهولة. منا أفكر بي لأن أدري كلش زين ديتوجع وشفتة شلون ما نام بسرعة. ومنا فرحانة بشكل لأن التفاصيل البسيطة العشتها ويا بهالليلة سيطرت على ذاكرتي ودتطرد النوم من عيني كلما يجيلها.

حسيت الصبح على صوت المنبه. فتحت ما شفته موجود. گمت ع السريع دگيت باب الحمام ماكو. غسلت ونزلت جوا، چانت ريحان دتجهز بالريوگ. -صباح الخير. -هلا خية صباح النور. -إسحاق طلع؟ -اي من يمته. ودگ عليّ گال لون ما عدچن امتحان غيبن اليوم. -بس آني عندي. -اي وآنه همينه عندي. تالي گال راح أدزن حبيب يوصلچن عبن الضبع مشغول وياهم. -اي زين لعد. راح أصعد أبدل ع السريع قبل لا يجي أخوچ. -وآنه أجهز الريوگ بين ما تخلصين تلگيه حاضر.

ابتسمت الها وصعدت ع السريع. بدلت وتريگنا، تونه مخلصين دگ حبيب على ريحان گال: آني بالباب استعجلن شوية. وصلنا للجامعة وراح. طول الدوام بالي يم إسحاق، ما أدري شلون صار ولا عندي موبايل حتى أتصل وأطمن عليه. خلص الدوام تمشيت الريحان. چانت گاعدة تنتظرني، بس شافتني صاحت: وأخيرًا. -ههههههه. ها شنو مبين ما عندچ محاضرات اليوم. -اي خية. الي أكثر من ساعة گاعدة أنطر الفرج وتوّه يلا شرف. -هههههه. يلا إجه الفرج ولا يهمچ.

-صارت زحمة حبيبة، إجيت أنام إنّا شوي. -ههههههه. اتصلي وفضيني لا أنام وراچ. -هههههه. يلا راح أدگن على حبيب خاطر يجينا. -ليش وأيوب لعد وينه؟ -لساعهم مشغولين ما أعرف شجاي يصير وياهم. حچتها وطلعت الموبايل. دتتصل إجت بنية أول مرة أشوفها، وگفت گبال ريحان وگالت الها: أنتِ ريحان؟ ردت: نعم. أنطتها ظرف وگالت: هذا أمانة وصوني أوصلها الچ. رادت تعرف منو هي، ما أنطت مجال گبل خلت وراحت. باوعت ع الظرف بـ استغراب وفتحته ع السريع.

ظليت واگفة بمكاني، يجوز شي خاص ميصير أتطفل عليها. طلعت منه مدري شنو وبدت تقرا، شوية وصارت ايدها ترجف بوضوح. خليت الملازم ع المصطبة ورحتلها. بعدني ما واصلة ما أحس إلا ريحان تكومت من طولها بالگاع.