رواية وضاقت الأرض بي الفصل السادس والثلاثون 36 - بقلم لبنى الموسوي

#وضاقت_الأرض_بي

للكاتبة #لبنى_الموسوي

اباوع داير مدايري بلكت الگا
هناك ولمحتة واگف يم جماعتة اشرتلة وين يلا شافني استأذن منهم واجة باتجاهي

ما تحملت بعد اكثر
احس نفسي داموت لو شما احچي ما اگدر اوصف ذرة من الوجع الحسيت بي وقتها

باوعت الحبيب من بعيد
حسيت شي دينزل مني لزمت بطني وصرخت بوجع مينوصف حبيييب

اجة يركض سندني قبل لا اوگع
باوعت النفسي تنورتي انترست دم واني بذيچ الحالة خجلت من عندة

بعدت نظري عنة
گال تگدرين تمشين هزيت راسي بلا
گعدني ع الصبة وعافني وراح شوية واجة هو وصديقاتي نرجس وسرى

اني الوجع دياكلني
بس شفتهن بچيت ساعدني عفية والله راح اموووت

نرجس.. عزة هاي شصاير بيچ
گومي گومي خلي نوصلچ للسيارة يمعودة الطفل راح

شمس.. ما اگدر اتحرك الوجع يموت والله يموووت

سرى.. لازم تساعدينا
هسه لو بيها مجال چان شلناچ بس مترهم

باوعت الحبيب راح يركض
دقيقة ورجع سترتة طويلة شمرها علية وگال للبنات لبسنها وآنه راح احاول اقدم سيارتي لهنا

لبست السترة وبقيت واگفة
البنات سانداتني واني اتلوة بـ ايدهن مثل الطير المذبوح احس الوجع صعد حتى الراسي وفقدت التركيز تماماً

جاب حبيب السيارة ونزل يركض
ساعدني اصعد وگال للبنات لا تجن آنه اتصل بخالتها تجي تعينها

صعد سريع حرك السيارة وگبل اتصل بصخر
- ها خوية شلونك

مرتك حالتها كلش ويمكن تذب الطفل
حاول تجي تراني ما اگدر اتصرف الوحيدي

اي هاي جاري لا تخاف
بس دزلي رقم خالتها اتصل بيها تجيني للمستشفى اكيدن نحتاجها هناك

لا توصيني خوية بوسط عيني
انت هم حاول لا تتعطل وبذات الوكت انتبه للدرب ما ناقصنا طلابة جديدة

سد الخط منة واتصل بخالتي
گمت ما اركز بكلامة عقلي تعب وكل فكري صار يم الوجع وبس

اريد بس نوصل للمستشفى
للحظة حسيت روحي راح تطلع وهاي اخر دقايق الي بالحياة

غمضت عيني ابچي
تراولي اهلي واگفين گبالي يباوعلي بنظرات تعب
رفعت ايدي حتى الزمهم كلهم ابتعدوا عني بحركة وحدة

هاي اللحظات چانت بين الوعي واللا وعي
فتحت عيني على صوت حبيب
شفت نفسي گبال المستشفى اجت الممرضة بـ ايدها الكرسي صعدتني ودخلوني للصالة

واني بين ايد الدكتورة
حسيت الألم بدا يختفى شي ورى شي
باوعت عليها ابچي شنو دكتورة طرحت شو ماكو وجع

- الله يعوضچ ماما

- لا عفية گولي غيرها
شنو ليش يروح اني حتى ممتعبة نفسي

ما جاوبتني
بقت تشتغل بالسونار واني اناشغ من البچي لحد ما عافتني وراحت

شوية واجت خالتي
ظلت تصبر بية هذا امر ربچ وبعدكم صغار وتعوضوا ومن هالحچي

وراها عافتني وراحت للدكتور
عشر دقايق ورجعت چنت مغمضة عيوني بس گاعدة سمعتها صاحت شمس نايمة

جاوبتها واني مغمضة
لا خالة گاعدة لزمت ايدي گومتني وچانت جايبتلي هدوم من بناتها لبستني وطلعنا من الصالة

صار حبيب گبالنا
چانت نظراتة ابداً مو طبيعة
حتى الحمد لله ع السلامة ما گالي بحيث بقيت صافنة بوجها من الصدمة

اخذ الراچيتة من خالتي ومشى قبلنا
باوعتلة بـاستغراب خالة شبي حبيب صاير شي على صخر وما حاچيلي ؟!!

- لا يمة ما بي إلا العافية

- لعد شبي ليش ضايج احچي الله يخليچ

- ما بي شي يمة تلگي تعب من الوگفة

ما اقتنعت بكلامها بس ما ناقشت اكثر
ويني وين هالسوالف خلي احتار بوجع گلبي اول عود بعدين افكر بالغير

وصلنا البيت خالتي
فرشتلي ع السرير وراح حبيب يجيب العلاج
نص ساعة ورجع جايب مشاوي ويا سلمهن بـ ايد خالتي وعافنا وراح

تعبت كلش
ما اريد افكر بشي اريد بس انام وارتاح
غمضت عيني ودموعي صارت تتسابق على خدي امسح دمعة تنزل عشرة بمكانها

اجت خالتي گالت گومي اكلي
درت وجهي ع الحايط ورديت بتعب
بعدين خالة من اگعد لأن هسه تعبانة واريد انام

بس حچيتها طلعت وعافتني
لحظات صعبة مرت علية حسيت بيها اني شگد منحوسة بحيث اي فرحة بالدنيا متدوملي

بعد ما نشفت دموعي گدرت انام شوية
صحيت المغرب على صوت صخر يحچي ويا خالتي

ردت اگوم افرغ گلبي بحضنة طب هو
باوعتلة بـ ابتسامة حزن ردها بـ نظرة عتب گبل گمت من مكاني ورحت يمة

- شبيك صخر ؟!!
اكيد ضايج على طفلنا الراح مو صح
بس ميخالف رب العالمين راح يعوض گدامنا عمر طويل نعيشة سوة ونجيب بدل الواحد اربعة

- هه لا قنعتيني والله

- شنو قصدك ؟!!

- لا تستعبطين برااااااسي
يعني كل ظنچ ما يوصلني الخبر لمن تكتلين ابني وراح تندفن السالفة بمچانها

- اكتلة شنو شبيك صخر !!!!

- تغابي تغابي
بس مو اعلة صخر شمس
آنه خلص صرت حافظچ حتى اكثر من نفسي

حاولت هواي خاطر اغيرنچ بس للأسف
تبين الي بالتالي آنه چنت اضحك اعلة روحي موش اكثر

عبن انتِ راح تظلين مثل ما انتِ
ما يغير منچ شي غير الچفن وهالشي ما يصرفلي ابد

- لحظة بس فهمني
انت عبالك اني سقطت الطفل متعمدة ؟!!

- لچ جوززززززي عاااااااد

حچاها وكفخني على راسي حيل
جوزي ملييييت وآنه اتحمل انانيتچ وتفكيرچ المحصور بروحچ وبسسسسسس

من تزوجتچ وآنه ادوسن اعلة نفسي الاجلچ
من اول ليلة جمعتنا سمعت منچ كلام ما مش رجال بكل هالدنيا يتحمل يسمعة ويظلة ساكت

لا والله من اجيت اخطبچ همينة
ورغم كل شي گلت ويا نفسي اصبر صخر اليحب الحلو مجبور يتجرع مرة

ومشيت وياچ اعلة حسابي
طاوعتچ بكل شي لما الله فرجها وصرتي تحبيني هه او ظنيتچ حبيتيني

بس توصل بيچ الانانية تطيحين ابني
تشربين اعشاب خاطر تتخلصين منة بس عبنچ ما رايده تصيري ام الجهالي آنه بالذات

فتحت عيوني علي بصدمة
- شگاعد تحچي صخر اكيد اني ما اسوي هيچ شي

- لا شمس سويتيها
وبسوايتچ هاي اكدتيلي زواجنا چان غلطة وصار الوكت خاطر نصلحها

كلها سنة تخلص شلون ما چان
بعدها تگدرين تعتمدين اعلة روحچ وكلمن يروح بدربة

امشي شوفي حياتچ بعيد عني
وان شاء الله تلگين الرجال الي يكون گد المقام
خاطر لا تستعرين منة ومن اصلة وبيئتة مثل ما عملتي وياي

- لا صخر والله لا
اني ما مستعرة منك بالعكس انت عندي تسوة الدنيا وما بيها

وروح اهلي ما اعرف على شنو دتحچي
يعني شلون تعقلها اگدر اسوي هيچ شي بابني
معقولة تشوفني ما عندي گلب حتى اتجرأ اكتل روح بهالسهولة

بس حچيتها لزم فچي نبت اصابيعة بي
- بسچ من هالحچي بسسسس
لا تظنين انسى ضوجتچ لمن عرفتي بخبر حملچ عبن كالعادة تفضلين دراستچ اعلة كل شي مو بس اعلية

اسمعيني عدل
رايح آنه هساع بس اياچ ثم اياچ تعتبين الاطراف البصرة

عبن ساعتها ما ارحمنچ شمس
وروح كل غالي رجلينچ هاي تنكسر مجرد ما المح خيالچ واگف گبال عيني من هيچ حافظي اعلة رويحتچ وخليچ بمچانچ افضل

- صخر لا
فدوة لتصير جرح ثاني بحياتي
مو كافي علية اهلي راحوا وعافوني وحدي بـ هالدنيا

رفع ايدة حطها على شفتي
- بسچ لا تكملين آنه وانتِ خلص مامش شي يجمعنا بعد اليوم

- المن دتعوفني صخر
مو تدري كلش زين ما عندي غيرك بالدنيا
شلون ينطيك گلبك تخليني وحدي وانت تعرف محد راح يرحمني ساعتها واولهم عمامي

راد يطلع لزمت بقميصة
- زين احچي شي قبل لتروح الله يخليك
صيح علية اغلط سب اضرب سوي اي شي علمود اكرهك واگدر اطلع حبك من گلبي وارتاح

دار وجها علية بعتب
- ديري بالچ اعلة رويحتچ بوية
واي شي تعتازي حبيب موجود جارچ بس اطلبي وهو يلبي

حچاها وطلع ع السريع
وگعت بالگاع منهارة خلص شمس خسرتي الضوة الچان منور طريقچ وراح ترجع حياتچ تظلم من جدة وجديد

طبت خالتي شافتني واگعة اجت گومتني
قبل لا يجي صخر چان اكو وجع قوي ببطني بس هسه مگاعد احس غير بوجع گلبي وبس

تمددت ع السرير وغطتني
لميت روحي بـ ايدي وغمضت عيوني حيل

ما اريد افكر بشي
لأن هالتفكير هو بمثابة الموت البطيء بالنسبة الي واني خلص تعبت اموت باليوم ألف موتة ومحد يحس بية

غسق.. سمعت من ثناء شمس طرحت طفلها
حيل انقهرت عليها خصوصاً هي چانت فرحانة بالحمل من اتصلت وبلغتني رغم حالتها الصحية التعبانة

دگيت عليها اكثر من مرة مجاوبتني
اكيد هسه تعبانة ومالها مزاج تحچي بالموضوع عفتها ترتاح الثاني يوم الصبح

نزلت اسوي ريوگ الإسحاق
لگيت صخر واگف ع المغسلة يحچي ويا حبيب
كلامة كلش شدني وكأنو صاير بيناتهم زعل حتى رجعتة من بغداد بهاي سرعة اكدت شكوكي

- بعد ما اوصيك اعليها حبيب
خلها ترتاح فرد اسبوع وردها يم البنات
وخل عينك تظل اعليها اخافن تعتاز الشي وتخجل تطلب منك

لا خوية لا
ابد لا تفتحلي الموضوع هساع عبن روحي لعبانة منة

سوي الگتلك اعلي وخليك من هالسوالف
ولون اعتازت الشي دگ اعلية لا تتصرف من يمك خاطر لا نتخارب تسمعني عدل

رحم الله والديك
انتظر بلليل ادزنلك رسالة من رقمي الجديد واياك تعلمها بي جاي تفهم اعلية لو لاااا

سلم علي وسد الخط
رحت يمة چان ديغسل گتلة صباح الخير جاوبني وهو مدنگ هلا خوية صباح النور

- البارحة هواي اتصلت بشمس بس ما ردت

- اكيدن تعبانة
ارجعي اتصلي اعليها بعد ساعة وتجاوبچ

- لا من ارجع من الدوام عود اخابرها
صدگ هسه راح اسوي ريوگ تحب تتريگ ويانة

- لا عاشت ايدينچ مالي نفس

حچاها وراح الغرفتة
رجعت للمطبخ وفكري كلة يم شمس والله صعبة
هم خسرت الطفل وهم صخر زعلان عليها بنفس الوقت

تريگت ويا إسحاق ووصلنة ايوب للدوام
سولفت الريحان واخذت جهازها دگيت على شمس اكثر من عشر مكالمات بس ما ردت

باوعت الريحان بقلق
- ولچ خاف صاير وياها شي وما عدنة علم

- لا ما اظن
بس تلگينها تعبانة وما بيها ترد اعلينة

- عفية اتصلي على اخوچ
ع الاقل خلي يشوفوها وين ترى والله گلبي ممرتاح

- هساع ادگن اعلي
وعتبيني لون طلع بيها شي
آنه اعرف بشمس عدها طبع من طبعي لمن تزعل او تنغث تاخذ زاوية تبعد بيها عن الكل 

- ميخالف خابري مخسارنة شي

اتصلت على صخر ورفعت السبيكر
مكالمتين مارد بالثالثة جاوب صوت هوسة يمة الظاهر مشغول

- ها خوية اسفة عطلتك عن شغلك

- لا خيتي عادي
احچي خير خوبن ما بيچ شي

- لا آنه زينه
بس هواي اتصلت اعلة شمس ولا ردت خافن بيها شي وانت ما تدري

- هساع ادگن اعلة خالتها واردنلچ خبر

- اي فدوة خوية عبن ظل بالنة اعليها

سلم وسد الخط
بقينة ننتظر اتصال منه خمس دقايق ورجع دگ
اخذتة من ريحان فتحت الخط ورفعت السبيكر ع السريع اشرتلها تحچي

- ها خوية بشر

- ما بيها شي لا تخافين
خالتها تگول نايمة ولساعها تعبانة من هيچ ما بيها ترد اعلة اتصالاتكم

- اي الحمد لله
لتضوج خوية الله يعوضكم ان شاء الله بتوم يملون اعليكم دنياتكم

- الله كريم
محتاجه شي گبل لا اروحن

- لا سلامتك

درت وجهي ع الحديقة صافنة
شوية ورجعت باوعت الريحان شتگولين صخر ليش زعل عليها معقولة حملها مسؤولية موت الطفل

- لا ما اظن صخر اكبر من هالشي
بس بيني وبينچ آنه هم جاي اتسأل ويا روحي شني الصاير بيناتهم

عبن ضايجة اعليها خطاية
شتتحمل خسارة ابنها لو زعل رجلها والله كلش صعبة السالفة

- اي لعد اني ليش دافكر
يعني هي هسه متحتاج غير وجود صخر يمها
لأن هو الوحيد اليگدر يخفف من قهرها تالي يجي يزودة عليها بالزعل

- اولها وتاليها تبين السالفة
هساع ترد اعلينة شمس ونعرف منها كل شي لا تستعجلين

- اگول صدگ
عرفتي باچر اكو ذبيحة ببيت اهلچ لو لا

- اي
هو كل سنة ابوي متعود
يذبح ذبايح لوجه الله نهاية العام ويوزع اعلة المحتاجين

ومنها يسوي غدة
يجمع بي كل الگرايب خاطر لا تنگطع صلة الرحم بيناتهم 

- تدرين شگد احب ابوچ

- ههههه
خايبة وهو بعد يحبچ يمكن حتى اكثر مني

- هههههه
لا عاد منو يوصل المكان ريحان بگلب الشيخ

- فدوة الگلبة

- الله يخلي الچ ماكو بحنيتة
ياريت ابوية عندة ولو ذرة من طيبة الشيخ مچان حالي هذا هسه

- انسي كل شي
انتِ هساع ما عندچ ابو غير الشيخ ضاري
ويلا دگومي امشينا عبن المحاضرة راح تبدي شوي بعد

ابتسمت بوجها وگمت
لليل وشمس متجاوب على مكالماتي

جزعت واني اتصل بيها بدون فائدة
بس مع كل هذا ما چنت خايفة لأن ادري هي بخير بس الموضوع وما بي نفسيتها تعبانة لذالك مدترد علية

ثاني يوم ما رحنا للدوام
گعدنا من الصبح على شغل البيت والهوسة صارت للضاللين

الاقارب كلهم اجتمتوا عدنة
حتى اكو ناس مشايفتهم ابد واليوم شفتهم لأول مرة

انخبصنا لحد الضهر
رغم البنات كلهن ديساعدنة بس التعب هو هو
لأن الذبيحة چانت شي خيالي بحيث باوعت من الشباك الشارع متروس بالزلم والبيت مابي مجال للنسوان بعد

واگفين بالمطبخ نغسل المواعين طب صخر
صاح وحدة تجيني ركضت الة نهلة ظلت عيوني عليهم

طلع ورقة كتب بيها شي وانطاهيا
طبت جوة شوية ورجعت گالتلة هسه راح تتصل بيك

باوعلها بـ ابتسامة وطلع
ظلت عيونها علي لحد ما ابتعد كلش وهي بعدها تباوع ورى

تقربت من ريحان چانت دتفرغ بالتمن
- ريحاااان

- ها ها شمالچ

- نهلة شنو فلمها ويا صخر

- فلميش خية گولي يا الله

- حقچ ما شفتيها شلون تباوعلة

- اي عادي هم علاقتهم طيبة من اول ما ردت للبصرة

سكينة.. يلا بنات شدن الهمة الزلم تريد الچاي

نجاة.. آنه اسوي عمة ولا يهمچ

نجيبة.. عودن ندهي اعلة إسحاق يجي ياخذة فرد نص ساعة

سكينة.. اي بس فضنها لا تسونها قصة عنتر
فشلة من الوادم من ربع ساعة وإسحاق گال جهزوا الچايات

نجاة.. لا عمة شني السالفة
خليها اعلينة وتامرين امر انتِ والميزان

باوعتلها بعصبية
فجأة سحبتني ثناء وحچت يم اذني بهمس

- ولچ الحياية بدن يشتغلن
فوتي سوي الچاي انتِ ولتخلين وحدة منهم تتقرب الرجلچ

- شفتيها شلون تحچي الصلفة

- هه بعدچ ما شايفة شي
نجيبة صارلها سنين راسمة تزوج اختها الإسحاق حتى من قبل لا تموت صابرين الله يرحمها

عفتها ورحت
داشيل القوري سحبتة نجاة من ايدي باوعتلة بخزرة جيبي شبيچ

- آنه اسوي

- لا اني ارتاحي عيوني

- هو انتِ وين تعرفين
يلا احچي شكثر تخلين چاي وشلون توزعي بـ الاستكاين

ظليت ساكتة چان تضحك وتدور وجها
ترست القوي ماي وشغلت الطباخ صاحت ريحان جهزي الصواني گبل لا يجي الميزان

حسيت روحي انسحنت من القهر
ردت اگعد ع الكرسي گالت نجيبة وين عيني امشي كملي المواعين ويانة

رحت اشتغل وعيوني عليها
واگفة ع الطباخ وشارگة حلگها من الفرحة
شوية واجت عمة سكينة گالت يلا خلصتن الميزان جاي بالدرب

باوعتلها نصت النار وراحت تركض
ثواني ورجعت الحمرة وردية والشال معدلة لفتة هاي من غير الكحلة الخاطتها على طول العين

هنا اني بعد ما تحملت
گمت ع السريع وگفت يم باب المطبخ انتظرة يجي
هي تباوعلي بنظرات عدم رضا واني مبتسمة بوجها استهزاء

دقيقة تقريباً واجة
گامت تركض شالت الصينية رادت تنطيهيا وگفت گبالها جيبي عنچ اني اناوشة

- لا آنه

- گتلچ اني شنو هي الشغلة عناااد

حچيتها وجريت الصينية من ايدها
گبل وگعت هي والچاي والامة الدنيا احترگت حتى البنات انسمطن بي

- ثووول ان شاء الله شمالچ غبييية

عاط بيها إسحاق
- ثمني حچاياتچ نجاااة

- ابن عمي ما تنوعت بعينك شعملت بينة

- ما صار إلا الخير
رايح آنه عشر دقايق واريدن الگة الچاي جاهز مفهوووم

- صار تامرني امر من عيوني الثنتين

- ما يامر اعليچ ظالم بت عمي

هو حچاها لو هي شرگت حلگها من الفرحة
طلع من المطبخ باوعتلي وابتسمت صفح دخنت لا شنو دخنت وجيت وماكو من يطفيني

وفعلاً عشر دقايق اجة إسحاق
باوعت الصلافتها مو طبيعية عينك عينك تحط الحمرة گدامي وتتمايل بمشيتها

وگف بالباب صاح الچاي نجاة
ردت جايتك تاج راسي گبل باوعلي اكيد حس اكو شي غلط بالموضوع

راد ياخذ الصينية تعمدت تطخ بـ ايدة
سحبها ع السريع باوعتلة بـ ابتسامة العفو ما انتبهت اعليك

- عادي بوية مصار شي

اخذ الجاي وراح
ما تحملت اظل بعد بالمصبخ اكثر من هالحد حتى لو يحچون يطبهم وجع

اخذت ود وصعدت الغرفتي
چانت تعبانة من اللعب ويا الجهال شغلت نفسي وياها لحد ما غفت

گمت افتر بالمكان رايحة جاية
فجأة انفتحت الباب وطب إسحاق للغرفة
چنت مخنوگة كلش بس شفتة گبالي خانتني دموعي

درت وجهي امسح بيها
حسيت ايدة صارت على چتفي رفعت راسي اقوي بنفسي شوية وباوعتلة

- شمالچ احد غثچ بشي

- لا

- احچي بوية احچي

- لتگولي بوووية
مو ياهو التجي وگلتلها بوية
اذا تعتبر هالكلمة عندك عادية وتگولها للرايح والجاي فبلاها احسن

حسيتة راد يضحك بس لزم نفسة
- عليش جاية تصيحين انتبهي الروحچ غسق

- روح إسحاق روحك
شعندك جاي الهنا اصلاً والزلم تارسة الشارع

- شمالچ هاي كلة عبن نجاة....

قاطعتة بعصبية
- لتجيب اسمها على لسااانك
ما شفتها الصفلة شلون تتحضرلك وتعدل بروحها قبل لتجي بثواني

انتبهت على نفسي هاي اني شسويت
درت وجهي خجلانة حسيتة حضني من ظهري وحط حلگة يم اذني حچة بمكر

- يعني تغارين

- لا شنو اغار
بس يعني تصرفاتها بصلافة ماكو واحد يسكت عليها

- شو انداري شوي

بقيت واگفة سحبني هو دار وجهي علي
- يلا هساع احچي

- شنو احچي

- الحچيتي گبل شوي

- إسحاق شبيك

- بوية هساع آنه شگلت
كل الموضوع اريدنچ تعديدين ذات الحچي الگلتي وانتِ دايرتلي ظهرچ

باوعتلة بتردد
- اي هي صلفة ما شفتها شلون تحط حمرة وتتمايل بمشيتها اول ما عرفتك جاي

- وانتِ شنهو الغاثچ بالموضوع

- غير رجلي
بعدين شنو شو حضرتك ما مهتم بس لا عاجبك الوضع

- اي عاجبني

- هاي انت تحچي هيچ !!!

- اي چا خيالي

- روح امشي روح
ذيچ وينها بالمطبخ شبع عينك بطولها الحلو لويش واگف يمي

- هههههههه

- ادري ليش تضحك ليييش

تقرب مني قيدني بـ ايدة ودار ظهري الحضنة
- وتگولين ما اغارن اعليك

بقيت ساكتة
رفع راسة من چتفي باس خدي وگال انزلي عاونيهم ما اريدن اسمع حچاية اعليچ

- اي هو بس نومت ود وردت انزل

سحبني من ايدي وفتح الباب
نزلنا جوة اخذني للمطبخ البنات بعدهن يشتغلن
گال بصوت عالي غسق امشي سويلي چاي عبن گبل شوي چان محروگ وما گدرت اشربنة

- لا ابن عمي
آنه سويتة بـ ايديني اصلاً يخبل

- شني اتبلى اعليچ مثلاً
المهم آنه عاجبني اشرب الچاي من ايدين حرمتي عندچ مانع

- لا قابل شلي غرض بالعافية اعليك

حچتها وطلعت من المطبخ ضايجة
ردت اروح اسويلة چاي تقرب مني حچة بهمس عوفي ما اريدن ماشي آنه

باوعتلة وابتسمت
ما ادري ليش سوة هيچ بس المهم برد ولو شوية من نار گلبي بنجاة الصلفة

لليل تمددت انام هلكت من التعب
طب إسحاق گبل گلي خليچ مرتاحة تعشيت برة

بدل واجة تمدد بصفي
توني مشكلة عيني اريد انام سحبني الحضنة وگال اكو احد غثچ ورى ما مشيت 

- لا
وصدگ شكراً على السويتة اليوم

باسني من راسي وسحبة على صدرة
اني هم حضنتة حيل شي ورى شي گاعد احس الخجل بدا يختفي ويا وما ظل بداخلي غير الخوف وبس

ريحان.. رجعت من عزيمة اهلي ميتة تعب
غيرت ملابسي وظليت متمددة بغرفتي مابية انزل بعد واساساً تأخر الوكت

نص ساعة وطب جمار وجها ما يتفسر
گتلة شمالك رد ما بية شي ولتحچين ولا كلمة ريحان

تفاجأت من اسلوبة
گمت على حيلي لزمت ايدة هدي حبيبي عليش هيچ صاير اعصاب

بس حچيتها ابتسم
سحبني للچرباية نام وخلة راسي على صدرة

- احبچ

- وآنه اموتن اعليك
بس عليش ساكت هيچي اذا ما شاركت همك وياي چا ويامن تشاركة

- حياتي ضغط شغل
ليش دتدوخين راسچ بسوالف فارغة

- همك وضيمك موش فارغ
طول ما انت تعبان آنه ما راح اهدا ابداً

- الله يخليچ الي يا راحتي وحياتي كلها

- يعني مُصر ما تحچي استاذ جمار ماشي....

بعدني ما كملت كلامي
دنگ علية باسني من شفتي حيل
حاولت ابعدة عبن ادري بي يريد يسكتني بـ هالطريقة بس ما گدرت

الليل كلة وآنه ازن براسة بلاية نتيجة
نمت وهو ما حاچيلي نص كلمة ثاني يوم اجة ايوب اخذني للدوام

هواي امور شاغلة فكري
حتى دراستي مجاي اركز بيها خلصت دوامي وتمشيت الغسق

چانت گاعدة تنتظرني
حطيت الملزمة جواية وگعدت جارها باوعتلي مستغربة خير مبين من شكلچ اكو شي صاير وياچ

- لا بس تعبانة يمتة يجي ايوب ويفضني

- ليش متاخذين رقمة
ع الاقل نتصل بي اول منخلص احسن ما نظل ننتظرة بالنص ساعة

- جمار ما يرضى
شكثر تمنيت لو فاطمة قبولها صار وياي اقلها هي التتصل اعلي

- فاطمة صديقتچ ؟!!

- اي من الابتدائية
وهو چان يوصلنة مشي تالي اشترى سيارة وصار يوصلنة بيها

ردت اسألها عن ايوب تراجعت
شفتها ذبلانة كلش فـ گلت اسألها عن حالها احسن

- شبيچ ريحان
احس اكو شي مدتحچي الية گولي ترى احنة مثل الخوات

- شحچيلچ غسق

- احچي اسمعچ قابل اني غريبة

- ما ادري منين ابدي
من جمار الجاي احس اكو شي مكدر خاطرة وما يرضى يحچيلي بي

لو من نفسي
اليمكن اطلع حامل وسكري هالأيام كلة صاعد ولا يرضى ينزل شوي....

يتبع

لتنسووون ⭐⭐⭐⭐⭐