رواية وضاقت الأرض بي الفصل التاسع والعشرون 29 - بقلم لبنى الموسوي

#وضاقت_الأرض_بي

للكاتبة #لبنى_الموسوي

نزلت الشال على وجهي وفتحت الباب
دگ جهازي خالتي دتتصل رديت بـ ابتسامة سرعان ما اختفت من سمعت صوتها تبچي

- خالة شبيچ !!!

- وچ يمة شمس وينچ لحگي شوفي شصااار

- شصار خالة احچي وگعتي گلبي

- بيت اهلچ حرگوا
يمة حرگوا وحرگوا ويا ذكرياتهم الحلوة وچ يييمة

من حچتها بقيت صافنة بصدمة
شنو بيت اهلي حرگوا يعني خلاص ما خلولي شي منهم بعد

- وينچ بنيتي شمس

- منو حرگة

- مندري يمة
بلليل حارگي بس اني هسه يلا وصلني الخبر

- كله احترگ ؟!!

- اي يبنيتي ظال بس هيكل

- سدي الخط خالة
بس تصيريلي فرصة اتصل بيچ

حچيتها وفصلت الخط بسرعة
رجعت الغرفتي لگيت صخر ديروح للحمام يسبح

بس شافني تفاجأ لأن رجعت
واني هم ما گدرت الزم نفسي گدامة بچيت

باوعلي واجة ع السريع
سحبني من ايدي الحضنة وسد الباب
عليش تبچين شمس ياهو الضوجچ اااحچي

هزيت راسي محد
رفع وجهي بهدوء وصار يمسح دموعي بـ اطراف اصابيعة

- بسچ يبوي لا تبچين
يلا احچي شني الصار توچ چنتي تضحكين وعين الله اعليچ

- خالتي خابرتني
حارگين بيت اهلي صخر كل شي ما ظال بي

- وياهو السواها !!!!

- ميدرون
الله يخليك فدوة اخذني البغداد لازم اروح اشوف شديصير هناك

- تامرين بوية
باچر من الفجر نطلع بس لا تكدرين خاطرچ

باوعتلة ومسحت دموعي چان يبتسم
گتلة شبيك اشر على عيوني رحت للمرايا ويبوو ع المنظر الشفتة گدامي

الوجه صاير خريطة من الدموع والكحلة
اجة يمة سحب الكلنس المرطب ومسح جوة عيوني لحد ما اختفى الاثر كله

- يلا عدلي مكياجچ خاطر تمشين ما ظل وكت

- شكراً صخر...
حط ايدة على حلگي سكتني

- انتِ حرمتي
يعني الجاي اسوي وياچ واجب موش فضل من هيچ ما احبن اسمع چلمة الشكراً اعلة لسانچ

حچاها وطب للحمام
عدلت مكياجي شلون ما چان لأن واهسي خرب بعد الشي السمعتة وطلعت لگيت الكل جاهزين وگاعدين بالصالة ينتظروني

هناء.. بيوم العقد اجن خواتي من الصبح
احتارن شيسون بية وحدة تريد تمكيج والثانية تحف والثالثة تشسور وعاد اني شلون الي خلگ الـ هالسوالف

امي وگفت فوگ راسي
حچاية والثانية صاحت بروح ابوچ لا تعارضين حتى تجبرني انفذ اليردوا مني واني ساكتة

اخر شي استسلمت الهم
العناد مراح يجيب نتيجة بس آنه اعرف شلون اجيب حقي بغير طريقة

بس خلصنا الغدة بلشن يشتغلن بية
للعصر خلصني راحت اختي الچبيرة جابت المرايا حطتها گبالي

باوعت الروحي ياهي هاي ؟!!
لاعبات بية جولة لدرجة ما عرفت نفسي بس شغلهن حلو لأن الچبيرة حماتها عدها صالون وهي تشتغل وياها فتعرف بـ هالسوالف عدل

وراها لبسوني الفستان
عمة سكينة هي الي اختارتة الي
چان لون بيجي بس مو يم الستر بشي ولمن گلتلها ليش الفستان هيچ فاضح جاوبتني خلي الولد يتنوع چا غير حلالة

اخذني للصالة
گعدني وراحن يجهزن نفسهن شوية واندگت الباب
دخلوا بيت عمي بس مرتة هلهلت مرة وحدة عبن گالت ما يصح هيچ سكتة چنة جاي نطرد الفرح من البيت

اجن غسق والبنات يباركن الي
شوية واجة الشيخ عقدلنة بعدها بعشر دقايق گالوا راح يدخل الولد يلبسها الذهب

مچنت طايقة اشوفة
صرت افكر ويا نفسي هاي شسويت بروحي ؟!!
شلون رضيت بصهيب وآنه ما طايقتة قابل الشغلة لعب جهال

بقيت مدنگة بس گلبي يريد يوگف
مو خوف لا قهر عبن محد من الموجودين يعرف شجاي يصير بية بهاي اللحظات

حسيت علي طب
گعد يمي وبدن النسوان يهوسن النة بس بهدوء احتراماً الابوية الما صارلة شهرين من مات

شوية وجابت مرت عمي الذهب
اخذة منها وصار يلبسني وآنه عيني بالگاع
بس من وصل للتراچي وجعني حيل حسيتة تقصد يسوي هيچي خاطر يغثني

رفعت عيني باوعتلة بخزرة
ابتسم بخباثة وعافني واگفة وگعد
هنا آنه الشياطين صارت تتطافر گدامي بحيث اجتي افكار ببالي ما اگدر حتى احچيها

عادي تظاهرت باللا مبالاة وگعدت بصفة
اجت ريحان جايبة الكيك وشمس بـ ايدها العصير باوعت علي ااااي اجيت والله جابك

حطوهن گدامنة وبدوا يصورن بينة
شلت العصير وباوعت الشمس اشرت الها صوري هزت راسها بـ اي وشغلت الكاميرا

تقرب خاطر يشربني آنه هم سويت مثلة
رفعت الگلاص يم حلگة واول ما فتحة هديته علي
گبل گمز گمزة عبن ما توقع هالحركة مني بحيث كل حياتي ما انسى منظرة شلون چان بذيچ اللحظة

باوعلي بعصبية
رجعتلة النظرة بـ ابتسامة وهمست
- اي آنه ثولة ادري بروحي لا تتعب نفسك وتحچيها

دار وجهي عني يستغفر
والنسوان كلها گامت تصيح ما صار إلا خير الحلو زين من ينچفي اعلة العرسان

ملابسة كلها تدمرت ومزاجة انگلب 180 درجة
مي بارد ونزل على گلبي آنه چنت لاهية بضيمي بس هو مثل العادة ما گدر إلا ما يغثني فيستاهل الصار والي راح يصير بي مستقبلاً

اجت ريحان ع السريع
رادت تمسح ملابسة صاح سويلي طريق اردن اولي
ظلت عمة سكينة تحاول تقنعة يبقى بس قفل لحد ما جبرهم يسكتون وخلة وراح

غسق.. اباوع على هناء مبتسمة
ادري بيها تقصدت تسوي هيچ بس الى متى؟!!
عود عبالها بهالحركات صهيب راح يضوج ويفسخ الخطوبة هه مسكينة متدري بولد الشيخ ضاري يجزعون وميجزعون

ظلينة يمهم لحد اذان المغرب
رجعنا للبيت محد اكو،، غيرنة ملابسنة وصلينة وبدينة نجهز للعشى

انتبهت على شمس چانت مو طبيعية
ما حبيت اسألها والبنات يمنة بالمطبخ انتظرت خلصنة العشى واخذتها وصعدت الغرفتي

بلغتني بالخبر الوصل الها اليوم
ودموع عينها ما وگفت ولا لحظة وحدة
كلش انقهرت عليها شگد صعبة لمن تنحرم من اغلى الناس على گلبك وتصبر روحك بذكرياتهم وتالي حتى هالذكريات تنسلب منك

بقيت احاول اصبر بيها
بس ادري بكلامي مراح يسوي شي الها لأن الدتحسة حالياً وحدة رب العالمين اليعرف بي مو غيرة

من گد ما بچت تعبت خطية
استأذنت مني ونزلت تنام اني هم گاعدة من الصبح وهوسة العقد سطرتني نومت ود ونمت قبل لا يجي إسحاق

شمس.. دخلت الغرفتي تعبانة كلش
مو بس جسدياً لا حتى نفسيتي احسها تدمرت وما بية احمل قهر اكثر من هذا بعد

تمددت بفراشي ابچي
كلش محتاجة الامي بـ هاللحضات
محتاجة اشمر نفسي بحضنها واسمعها تگول بنيتي ميصير تبچي وامها عايشة بـ الوجود

مچانت تقبل تنزل الدمعة من عين واحد بينة
وحتى ما اذكر فد يوم بچيت غير بسبب الدلال الزايد الچنت عايشة بي بجالهم

وهاي هم راحوا وعافوني
يوميا اگول راح اتعود على غيابهم بس مداگدر
والله صعبة لا واحد ولا اثنين فجأة اغمض عيني وافتحها الگة كل اهلي اختفوا من حياتي وخلوني وحدي

وين راحت احلامي ؟!!
شگد چنت راسمة بعقلي احلام وردية وياهم بالتحديد ومن بعد روحتهم تحولت هالاحلام الكوابيس تعيش وياية حتى واني صاحية

اختنگت كلش
احس غصة شكبرها بصدري دتمنع النفس ينزل ويصعد بي

حضنت مخدة صخر وصرت اناشغ من البچي
ياربي لو تاخذ روحي هم هواي ارحم من هالعذاب الگاعدة احس بي حالياً

فجأة انفتحت الباب
عرفتة هو سحبت المخدة غطيت وجهي بيها ما اريد يشوفني ابچي

حسيت علي غير ملابسة
شوية وتمدد بالفراش چنت اتنفس بصعوبة لذالك صدري ينزل ويصعد بوضوح من غير الشهگة اللازمتني غصباً علية

سحب المخدة من وجهي يباوع بـ استغراب
دفنت راسي بالفراش وصرت اناشع گبل رفعني الحضنة وطوقني بـ ايدة حيل

- اششش
لا تبچين بوية الخاطري

والله العظيم بسابع سما
لون يكونون عمامچ الهم يد بالموضوع ما راح ارحمهم ساعتها

- اريد اروح البغداد عفية

- موش آنه انطيتچ وعد باچر اخذچ ونمشي
وهاي اليوم اتصلت بالشغل خاطر اخذ اجازة لاجل هالموضوع ومن الفجر ماشين ان شاء الله بس هدي

- شيجيب الصبح

- يجي بوية يجي
بس غمضي عيونچ هساع وما تشوفين إلا شمس ربچ طالعة

يحچي وهو حاضني
حسيت براحة مو طبيعية واني بين ايدة
لذالك ما گدرت اسحب نفسي لأن محتاجة الهيچ راحة انسى بيها كل همومي

بقيت بحضنة شوية وتمدد
حط راسي على صدرة وصار يمرر ايدة على شعري لا ارادياً هدأت وغمضت عيوني براحة

گعدت الفجر على صوتة
رفعت راسي شفتة گبالي لازم ملابسة ويريد يطب للحمام

- صباح الخير

- صباح النور بوية
يلا گومي صحصحي وجهزي روحچ خاطر نمشي اعلة وكت شوي

- تتريگ

- لا بالدرب ناكل اذا مو جوعانة

- لا مو جوعانة هسه

- چا يلا گومي بساع

- اريد اسبح شلون انتظرك لو اطلع برة

- لا آنه طالع وانتِ سبحي هنانة

حچاها وطلع من الغرفة
سبحت ع السريع وجهزت الجنط
ما ادري شگد راح نبقى هناك بس حضرت مال اسبوع احتياط

وصلنا البغداد بعد طريق مليان تعب وانتظار
مفتاح بيتنا عندي گلت الصخر خلي نروح بوجهنا لهناك وبعدين عود نمر على خالتي

اول ما دخلنة للفرع اختنگت
انعاد شريط الذكريات گبالي عيني غمضت حيل علمود لا ابچي لأن مو وكت الدموع هسه

سمعت صخر صاح يلا وصلنة
فتحت عيوني وانصدمت مثل ما گالت خالتي بالضبط البيت صاير عبارة عن هيكل معناها ما ظلت اي ذكرى من اهلي داخلة

تقربت من الباب چانت مفتوحة
طبيت اباوع بخوف حتى سيارة بابا حارگيها
لحظات مستحيل اگدر اوصفها واني اشوف بيتنا صاير رماد مثل گلبي تماماً

دخلت بوجهي الغرفة ماما
ما ظال بيها غير الأنقاض صرت ادور بيناتهن على اي ذكرى منها حتى لو صورة محترگة المهم شي من ريحتهم

دموعي خانتني فجأة
شگد حاولت اقوي نفسي بس بالاخير فشلت
گومني صخر من زندي مسح ايدي بچفيتة واخذني الحضنة

عشر دقايق واحنة واگفين
هدوء قاتل وسط خراب شامل تجاوز حتى حدود روحي العمرها ما عرفت شنو معنى الذلة إلا من تركوها اصحابها

اخذني وطلعنا من البيت بعد ما انهاريت بـ احضانة
اول ما صعدنا للسيارة گتلة اخذني البيت عمي احسان گبل باوعلي متفاجأ

- صخر تسمع لو لا
اخذني البيت عمي احسان هسه هسه

- عليش بوية فهميني

- هذا الشي الشفتة بعيونك ورى فرات العار
اني اكثر وحدة تعرف قذارة هالشخص والله علمود الفلوس مستعد يسوي اي شي صخر اي شي

حرگ بيت اهلي
سممك بيوم مشيتنا
وقبلها راد يعتدي علية حتى يجبرني...

- بسچ لا تكملين

- اخذني لعد
اخذني مادام هسه هو بالبيت اريد اروح ابرد گلبي بي هالحقيررر

دار وجها بدون ميجاوب
شغل السيارة وتحركنا بقيت اراقب الطريق وداخلي يغلي والله لو ما وداني البيت عمي إلا اشمر نفسي من سيارتة وارتاح من هالعيشة

شوية ودخلنا لمنطقتهم
احس السيارة صارت تمشي مثل السلحفاة ما عاولي وصلنا البيت عمي گبل فتحت الباب ونزلت ع السريع

حطيت ايدي ع الجرس وما رفعتها بعد
ثواني وطلع ابن عمي يركض بس شافني گال هاي انتِ شمس ليش تدگين الجرس هيچ دفعتة وطبيت ع السريع

محد چان بالصالة الظاهر نايمين
صحت عممممي فرااااات تعالوو بسرررعة
كلهم طلعوا على صوتي يركضون واولهم عمي سمعت ابنة صاح رجل شمس بالباب لبسن حجابچن

احسان.. خير عمي على شنو جاية هدادة

شمس.. هه خير
ليش من وين يجي الخير وانت مخلف هذا العار الواگف بصفك

فرات.. احترمي نفسچ هيوووو

شمس.. واذا ما احترمها شتسوي هاا
حچيتها وتقدمت صرت گبالة

احچي شتسوي اريد اشوف بطولاتك
مو بس فالح تخرب من جوة الجوة مثل الحرامية

فرات.. لا تشمرين مصايبچ علينة
وامشي يلا طلعي من البيت قبل لا اطلعچ سحل

شمس.. لا والله رجال
دتجرأ انت ومد ايدك علية وشوف شراح يصير بيك يا عاااااار

احسان.. هسه غير نفتهم شبيكم

شمس.. گول الابنك النذل
خلي يچفيني شرة احسن ما ابهذلكم بالمحاكم

قبل هو ومرتك الهيبة
خططوا شلون يعتدي علية علمود الورث

وبفضل رب العالمين ووگفت صخر وياية
ما گدروا ينفذون خطتهم فـ بلشوا بالخطة الثانية

رادوا يكتلون صخر
بعدين يشمروها براس بيت عمي توفيق حتى يضربون عصفورين بحجر واحد ويخلالهم الجو علمود يتمتعون بورثي مثل ما يحلالهم

ولمن كل هالخطط فشلت وطارت احلامهم بالورث
شسوة ابنك العااااار
حرگ گلبي بحرگت بيت اهلي لأن حضرتة ما تحمل يضيع كل شي من ايدة ويوگف يتفرج

فرات.. اني ما لي علاقة لتظلين تحچين حچي زايد

شمس.. لك اااانت سبب كل شي
اول وجع اكلته بعد موت اهلي چان منك
اول واحد تسبب بالمشاكل بين الاخوان هو ااانت
وحتى روحتي للبصرة وغربتي واذيتي كلها ااانت السبب بيها مو غيررررك

فرات.. كافي لتصيحين
عندچ شي روحي اشتكي مو متسبعة برجلچ وجايتنة هدادة

شمس.. لا شو اصيح
وراح اشتكي وما اطلع اني شمس اذا ما خليتك تعفن بالسجون يا نذذذل

- كااافي هوااااي سكتتلچ

حچاها ورفع ايدة راد يدفعني
ما احس إلا صخر صار حاجز بيناتنا حط ايدة على صدرة ودفعة كل قوتة

- ايدك تنسكر لون فكرت ترفعها اعلة حرمتي مرت الاخرى

- هاي عود انت ابن العشاير وهيچ تتجاوز

- والله ويا ولد الشوارع اضطر انزع ثوبي واصيرن مثلهم

احسان.. كافي يابة احترموا الچبير

- عودن من ابنك يحترمك افكر احترم آنه
اسمعوني عدل والله العظيم بسابع سما لون اعرف الكم يد بهذا الموضوع موتكم ما يكفيني ساعتها

لا تظنون شمس الوحيدها
من يوم ما صارت اعلة اسمي كل شي يخصها صار يخصني واليمد ايدينة اعلة املاكي تنگطع وتتعلگ فوگ من رگبته من گبل لا توصل اليمها

فرات.. هههه
هو انت لو بيك خير متاخذ وحدة ملعبة مثلها

بس حچاها طفر صخر شبعة بوكسيات
عمامي وولدة كلهم يجرون بي ومحد گدر يفكة منة اخير شي جنزة بالگاع وسحبني وطلع

صعدنة بالسيارة ما گدر يسوق
اباوع علي يتنفس سريع ويسد ويفتح بـ قبضة ايدة الظاهر اذتة من گد ما ضرب بيها ابو راس المربع

- صخر

- ها

- خليني اسوق بمكانك

- لا هساع ارتاح ونمشي

- ليش

- اخافن اعليچ

- بس انت تدري اني اعرف اسوق ومن زمان

باوعلي وسكت
ظليت احچي ويا وهو متجاهلني اخير شي ما گدرت علي سوا البراسة وما خلاني اسوق

رحنة الخالتي سلمنا عليها وطلعنة
هواي لزمت بينة بس صخر ما قبل نظل لأن يعرف بنفسية رجلها وحجز بالفندق ليلتين

بيومها نمت على وجهي من التعب
صحيت الصبح ما لگيت صخر توني مغسلة دگ علية گال جهزي نفسچ شوي وجاي اخذچ

ما سألتة وين لأن ما انطاني مجال
بدلت وبقيت انتظرة فوگ النص ساعة يلا وصل گبل اخذني وطلعنة

تفاجأت بـ إسحاق ينتظرنة جوة
طلعت وياهم واول ما صعدنا بالسيارة طلب مني إسحاق اسوي الصخر وكالة علمود يبيع املاك اهلي قبل لا يتلاعبون بيهن بيت عمي

طبعاً گبل وافقت لأن عندي ثقة عمياء بيهم
تحديداً إسحاق الصداقة الجمعتة بـ ابوية رغم فارق السن البيناتهم تستحق انطي هاي الثقة

سويتلهم الوكالة
وصخر گال خلص شغلچ عوفي الباقي علية
ثاني يوم رجعنا للبصرة بس إسحاق ظل لأن عندة شغل هناك

دخلنا للبيت چانوا بيت عمهم يمهم
هو اني شفت نهلة لو مدري شصارلي رغم هي حبابة بس ما اعرف ليش الموقف الصار قبل فترة خلق هالحاجز بيناتنا

شگد چنت تعبانة بس ما گدرت اعوفهم واروح
ظليت گاعدة بالصالة وعيوني على صخر اراقب كل حركة ونظرة من عندة رغم هو چان يتصرف بشكل طبيعي كلش

شوية واشرتلة گوم
استأذن منهم ورحنة للغرفة گبل باوعلي وگال عليش گومتيني

- شنو ليش ؟!!
غير جايين من السفر ولازم نرتاح

- لا آنه راح اطلع عندي شغل

- صدگ تحچي مو توك طبيت للبيت

- صارلي يومين غايب لازم اشوفن اشغالي

- متعبان

- اكيدن تعبان بس اردن بلليل وارتاح

- شوكت تطلع هسه

- اي

حچاها وراح للكنتور
غير ملابسة واخذ الأوراق وطلع مشيت ورى وما رجعت للغرفة إلا ما شفتة بعيوني طلع من البيت

ريحان.. گاعدة ويا بيت عمي بالصالة
سحبتني نهلة للغرفة وصارت تقنع بية خاطر اوافق على جمار وآنه اسمعلها ساكتة عبن ما عندي شي احچي

لليل واگفة اسوي بالعشى
اجاني ابن حنظل الصغير گال عمة ابوي يريدچ برة
تفاجأت شني الجاب حنظل بهيچ وكت موش عوايدة

شمرت حجابي على راسي وطلعت
باوعت داير مداير الحديقة محد اكو درت وجهي جاي ارجع وانصدمت بجمار واگف گبالي يضحك

- هذا انت

- لعد منو هههه

- شني الرايدة مني جمار

- اريدچ
كافي ريحان وافقي وخلي نتزوج قبل لا يبدي الدوام اترجاچ

- جمار آنه رديت اعليك من زمان

- واني مراح استسلم
انتِ الي ريحان تعرفين شنو يعني الي مستحيل اتنازل عنچ وعن حبچ إلا اذا اموت

- اسم الله لا تحچي هيچ

- خايفة علية

- اكيدن اخاف اعليك چا غير انت ابن عمي

- وبس

- جمار وتالي

- ماشي سكتت بس انطيني امل
مو إلا توافقين ريحان قابل حتى لو بكلمة الافكر هم رحمة احسن من الماكو

باوعتلة وسكتت
گال ريحان احچيها دنگت راسي وگتلة ماشي افكر
هو آنه حچيتها لو هذا تخبل حتى صياح صيح والجهال ظلوا يتنوعولة متعجبين

- بسك عفية اهلي راح يجون

- ولچ احبچ
والله العظيم احبچ واموت عليچ

- بس عاد جمار

- يلا يلا سكتت
هسه اني رايح بس راح اظل انتظر منچ الموافقة بفارغ الصبر

- وين ما تتعشى ويانة

- لا اني وحبيب معزومين ويا جماعتنة ومن نرجع اجي على اهلي اخذهم

- براحتك

- تردين شي قبل لا اروح

- لا سلامتك

ابتسم بوجهي وراح
طبيت جوة اتلفت خاف احد موجود وشافني ويا
صح ما سويت شي غلط بس موش بـ ايدي هيچ آنه تربيت وما اگدر اغير تربيتي

غسق.. هالمرة إسحاق طول بالسفر اكثر من اسبوعين
مشكلتي بديت اتعلق بي بحيث الايام الميكون بيها يمي احسها باردة ومالها اي طعم او لون

بس مع ذالك بعدني ما اتجرأ ابين الة هالشي
حتى من يتصل بالگوة اجمع كلمتين على بعضهم علمود احچيهن ويا

ما اعرف وين الخلل بالضبط
بشخصيتي لو بلي صار وياية من مواقف قذرة خلتني اخاف الهاي الدرجة من ابسط الاشياء

فد يوم گاعدة بلليل ارتب بالملابس من الضوجة
حسيت الباب انفتحت اني بنص الكنتور ما اشوف منو توقتها ريحان لأن طول سفر إسحاق تصعدلي بلليل ونظل نسولف لحد ما ننعس وننام

- شو تأخرتي شعجب
ما جاوبت رجعت كررت كلامي هم ما ردت

سحبت باب الكنتور واني اصيح
ثول متجاوبين
هو اني شفت إسحاق لو طفرت من مكاني طفرة بحيث انضربت رجلي بطرف الكنتور

واگف يضحك علية
بس من شافني تأذيت اجة سحبني من ايدي گعدني ع الچرباية وگعد على ركباتة يشوف رجلي

- شبلاچ بوية غير تنتبهين

- شوكت اجيت

- هاي طبتي بس شفت امي وابوي وصعدت

- لعد ليش ما انطيتني خبر دتجي
على الأقل مچان سويت كل هـ الهوسة بالغرفة

- ما صار شي
لبين ما اسبح واطلع انتِ معدتلها

- اي تتدلل

گمت من گدامة
جهزتلة الملابس ورجعت الملم بالكنتور
شوية ودرت وجهي چان شامر قميصة ع الچرباية ورايح

تقربت منة وعيوني ع الحمام
ما اعرف شداسوي كل الاعرفة اكو شي ديسيرني خارج عن ارادتي

سحبت القميص قربتة من خشمي وغمضت
شگد مشتاقة الريحتة من يحضني وينام صارلة فوگ الأسبوعين غايب وحارمني من عطرة

صحيت على نفسي هاي اني شداسوي ؟!!
شمرت القميص من ايدي ورحت للكنتور اركض واني ارزل بروحي

بلا طلع وشافچ شچان سويتي ست غسق
والله عيب عليچ اول تالي تتصرفين هيچ تصرفات طايشة

صفنت شوية
عادي شكو بيها غير هو رجلي يعني السويتة حلال مو حرام بس اكيد عيب

اي اي عيب
الرجال حتى ما سائل عنچ وانتِ حايرة بقميصة وعطرة والله يربي

نفضت الافكار من راسي ورجعت ارتب بالملابس
اول ما خلصت طلع من الحمام نزلت سويتلة چاي ورجعت لگيتة ديخابر بس كل شي ما فهمت من كلامه

- اي يم ابو علي
لازم تودونة گبل اول الشهر خاطر نقلكم يصير بساع ما يتأجل اعلة شهر الاخر

عودن من توصلون لهناك خابروني
شني هي شبع خوما شبع يا هذا يا ذاك ارسوا اعلة واحد وفضوني

حچاها وسد الخط بعصبية
انطيتة الچاي وگعدت ع الچرباية شربة بثانيتين وراح طفى الضوة

ظليت گاعدة ما نمت
اجة هو تمدد وسحبني من خصري صار راسي على ايدة

بالعادة من يحضني ظهري يكون علي
هالمرة خالف القاعدة دارني الة وحط عينة بعيوني

الهدوء عم بارجاء الغرفة
فقط انفاسي المضطربة تنسمع اما هو فچان صلب بصلابة الجليد ما بدر منة اي تصرف يدل على التوتر

رغم المكان اظلم
بس ضوة البستان ديضرب من الشباك ع الغرفة
عيوني بعيونة وايدة محاوطة خصري فجأة گال اشتاگيتلچ

من حچاها حسيت گلبي راد يوگف
ما ادري فرحة لو خوف بس المهم ما گدرت ارد وغمضت بسرعة حتى اخلص من الموقف

حسيت علي سحبني اكثر لحد ما دخلني الحضنة
صار راسي على صدرة وايدة محاوطة خاصرتي
هنا اجتي الفرصة الچنت انتظرها

مشتاقة العطرة كلش
وكأنة بـ هالتصرف حس بية وحب يسوي الشي الما تجرأت اني اسوي

دفو صدرة چان بي شي مو طبيعي
نفس الدفو الچنت احس بي واني بحضن امي والي ما حسيتة غير وياها وبس

غمضت عيوني مرتاحة
ظل يلعب بشعري ويمرر ايدة الثانية على ظهري لحد ما غفيت

گعدت الصبح على صوتة ديحچي بالموبايل
ركزت ويا چان يگول الاوراق يمي من تصيرلي جية اجيبهن

انتظرتة يخلص
اول ما سد الخط گال جهزيلي الريوگ ونزل جوة

گمت ع السريع فتحت الميز
ما ادري ليش حسيت الديحچي وياها بنية وما عندي غير هـ الطريقة حتى اعرف منو هي

اوارقة البارحة ضمهن گدامي هنا
طلعتهن من الميز اگلبهن ع السريع قبل لا يصعد

چانن اشكال
شي عقارات وشي يخصن شغلة
بعدني اگلب بيهن مخبوصة فجأة انصدمت....

يتبع

لتنسووون ⭐⭐⭐⭐⭐