رواية وضاقت الأرض بي الفصل الثامن والعشرون 28 - بقلم لبنى الموسوي

#وضاقت_الأرض_بي

للكاتبة #لبنى_الموسوي

الحجية هيلة.. وينك تعطلت كلش ظل فكري وياك

- چان عندي شغل گضيته واجيت
هساع ما طول مجمتمعين اسمعوا مني هالسالفتين

- خير ان شاء الله

گبل وبدون مقدمات گال
جمار ابن اخوي طلب يد ريحان اليوم
وصهيب صار لازم يتزوج حالة حال كل اخوتة
وهناء العروس عبن مامش حرمة تناسبة اكثر منها
بس حچاها
باوعت الصهيب وجها انگلب من الصدمة

ظل صافن ما حچة شي
اما الشيخ صارت عيونة تتنقل بين صهيب وريحان ينتظر رد واحد منهم بس اثنينهم دخلوا بحالة صدمة وصمت رهيب

الشيخ ضاري.. سمعوني حسكم عليش ساكتين

ريحان.. لا بوية آنه ما اريدن اتزوج

- ليش بنيتي ترى جمار خوش جمار

- اكيدن خوش چا هو غير ابن عمي
لكت آنه ما مفكرة بالزواج هالساع خليني اتخرج والله كريم البعدين

الحجية هيلة.. اترك البت يضاري
لا تضغط اعليها وانت اعرف الناس بوجعها

الشيخ ضاري.. اعلة راحتچ بوية ما اجبرچ

دار على صهيب باوعلة يهز بسبحتة
- وانت شني رايك ما سمعتنا صوتك يعني

- آنه بعد ما اريد اتزوج

- لا عاد موش بكيفك آنه قررت وانت تنفذ
ما اريدن اي اعتراض بـ هالموضوع بالذات تسممع

- چا هي شني بوية
انگلبت الدنيا البت ما تنجبر والرجال ينجبر

- والله البت ما سوت سوايتك
مثل ما صخمت الدنيا وخربتها مجبور تصلحها ورجلك فوگ راسك

- بالزواج ؟!

- چا بالسلاح والله حلوة هاي

بعدين هناء بت عمتك ومالها غير امها بالدنيا
وهالتشوفها مرة چبيرة اعلة ساعة تودعها وتمشي المن تظل البت ساعتها

- اي عادي تتزوج بوية ما تظل عزابية

- چا من كونه الحچي هيچي
انت اولى بيها من الغريب الما نعرف ان چان خوش لو لالة

- يابة آنه...

- بسك لا تكمل
آنه گلت چلمة وما اتراجع عنها إلا اذا چنت ناوي تكسر چلمتي تالي عمرك

الحجية هيلة.. لا تجبر الولد يضاري
بعدين تعال گلي شمالك مُصر اعليها هيچي وانت تتنوع الابنك شلون ما هاويها

الشيخ ضاري.. ومن يمتة انتِ تتدخلين بقرار آنه اتخذة

- اكيدن ما مسويتها
لكت هساع بالذات واجب اتدخل عبن محد يعرف البيك كثري

- لا گبل ولا هالساع ولا بعدين
الچلمة الأحچيها ما تتثنى من هيچ رجعي الحچي الزردومچ گبل لا يعبرة

صهيب.. بسكم لا تسوها طلابة
آنه موافق انهوا الموضوع تراه ما يسوة خاطر تتجادلون بسببة

الحجية هيلة.. لا وليدي
انت ما مجبور توافق اعلة بت نجمة بس لأن ابوك قرر هالشي

الشيخ ضاري.. وتالي وياچ يهيلة
مو ولدچ گاعدين عليش تجبريني احچي حچي ما يعجبچ

إسحاق.. صلوا اعلة النبي شني سالفتكم

الحجية هيلة.. ما تتنوع ابوك يالميزان
اعلة تالي العمر يريد يسمعني چلام ما يعجبني الاجل بت عمة...

الشيخ ضاري.. هييييييلة
ثمني حچاياتچ ترى وصلت حدها ويااچ هااااا

صهيب.. بسكم عاد
گلت آنه موافق عليش هـ الكولبة (الهوسة) بعد

رادت تحچي الحجية گاملها حنظل
حط ايدة على چتفها وگعد على طرف التخم

- بسچ يمة
عليش تغثين رويحتچ حياتة وهو حر بيها

إلياس.. حنظل يحچي عدل
بعدين هناء خوش هناء مرباية ودارسة والأهم من كل هذا هي بت عمتنة موش غريبة

الحجية هيلة.. واحنة شني الحصلنا من اهل ابوكم
هاي نجيبة شوفت الويل الاخوك لو ذيچ صابرين من كون الله لا يرحمها خلت الرجال....

الشيخ ضاري.. هيلة بسسسسسچ
شني نسيتي وين جالسة ؟! اليوم وتاالي ويااااچ

باوعت الـ إسحاق انگلب وجها من العصبية
اني ادري مرتة اسمها صابرين بس شمسوية الهيچ ضايجين منها وهو انعقچ اول ما جابوا طاريها گدامة

بعد ما صيح الشيخ عليهم الكل سكت
گامت ريحان الغرفتها رحنا وراها اني والبنات طبينة لگيناها تنفض الفرشة بعصبية

شمس.. اعصابك عمي

ثناء.. هههه دسكتي لا تنفجر بيچ

شمس.. والله هسه بس اسويلها بززز تبچي

غسق.. كافي خطية لتلعبون بـ اعصابها

ثناء.. علمودها والله
يعني ليش ترفض جمار شنو البي يتعيب وترفضة

ريحان.. مابي بس آنه بية

شمس.. يعني لأن مريضة ؟!!
ترى عادي شنو يعني ماما الله يرحمها چان بيها سكر وجابتني اني واختي

باوعت الشمس
صح تحچي علمود تقوي ريحان بس الغصة واضحة بنبرة صوتها بحيث عيونها صارت تلالي بالدموع وهي تحاول تداريهن عنة

تقربت من عدها
حطيت ايدي على زندها وباوعت الريحان

- حچي شموسة صح
انتِ لا اول ولا اخر وحدة بيها سكر وتتزوج لتكبرين السالفة عاد

- انتن تعرفن سكري شني
آنه عايشة اعلة الابر شلون تردني اعيش جاهل وياي وآنه هذا حالي

سكري بالايام العادية يوصل 400 وفوگ
چا معناها بالحمل ادخل بغيبوبة آنه والجاهل الي ببطني

شمس.. ماكو شي مالة حل
الطب تطور واكيد تظلين تتابعين حالتچ ويا الدكتورة لحد متجيبين بالسلامة

ريحان.. وآنه اظلن هيچ كلما احبل

ثناء.. لعد شنو ناوية تبقين بلا زواج؟!!

ريحان.. الله كريم

غسق.. ريحان اسمعي

ريحان.. عفية مالي خلگ كلش عوفوني هساع

شمس.. ليش دتأذين روحچ هالشكل ؟!
ترى والله متسوة السالفة بس انتِ متحسسة منها زيادة عن اللزوم

بس حچتها گعدت ريحان ع السرير
اشرت للبنات وطلعنة الحچي وياها ميفيد محتاجة تگعد وحدها حتى تفكر زين علمود توصل للقرار الصح

چان ابن ثناء ديبچي
عافتنة وراحت تسكتة اخذتني شمس الغرفتها ورجعت فتحت موضوع ريحان وياية

بقينة نحچي بالنص ساعة
بس للأسف ما گدرنة نتوصل الحل
لأن ريحان صايره عدها حالة نفسية من مرضها يعني متفرق عني وعن شمس بشي بس بنوع العقدة

شوية واندگت الباب
طب صخر للغرفة گبل گمت
گال اسف خوية ما عرف بيچ هنانة

- لا خوية عادي
اني اصلاً رايحة تصبحون على خير

- وانتِ من اهل الخير حبيبتي

بس حچيتها عافتنة وطلعت
باوعت الصخر مدري ليش حبيت اسمع رأية بموضوع جمار

- اگول

- نعم

- شنو رأيك بالي صار قبل شوية

- هناء خوش بت
واكيدن ابوي ما يقرر شي إلا بي صالح للكل

- مو قصدي على صهيب
اقصد موضوع ابن عمك واختك

- شمالهم

- يعني شنو رأيك
مقتنع برفض ريحان لو تريدها تصير الجمار

- حياتها وهي حرة بيها

- اي بس ابن عمك خوش قسمة مو صح
اصلاً هم بيت عمك كلهم حبابين امهم جمار نهلة

بس حچيتها باوعلي صفح
- لوين تردين توصلين شمس گولي بوية

- ليش ما تزوجت نهلة

- شني هالسؤال العجيب

- ما ادري
بس حسيتها معجبة بيك
وهي هم حلوة يعني ما ادري شلون تفوتوها وهي گبال عينكم

- ياهو قصدچ

- انت واخوانك صهيب حبيب

- موش قسمتة وتدرين الزواج قسمة ونصيب

- لا غلطان الزواج اختيار قبل ليكون قسمة

- يابة اختيار اختيار ولا يهمچ

- زين لعد ليش اختاريتني اني بالذات

- حظي غير

- وشبي حظك

- مابي شي ابيض بلون وجهچ

- صخر احچي عدل

- احد گلچ جاي احچي اعوج
بعدين آنه تعبان لا تدوهنيني بأسئلتچ الغريبة

- شبيك ليش متطيق الكلمة مني

باوعلي وهز ايدة
راح للكنتور سحب ملابسة بدل وطفى الضوة
ما ادري شنو سالفتة ووين يريد يوصل من هالتصرفات لا هو اليقبل اعتذاري ولا هو المتعايش ويا الواقع ومتقبلة مثل ما هو

غسق.. طلعت من يم شمس
لگيت ود دتبچي لأن صار وقت نومتها وتنحست

اخذتها وصعدت للغرفة
نص ساعة يلا نامت رجعت الغرفتي إسحاق بعدة ماكو تعجبت !!

فوگ الساعة وهو ما جاي
تعبت كلش توها عيني شكلت اريد انام فتح الباب وطب ضايج

ما حچة اي شي
بس يا دوب بدل ملابسة واجة نام گبل
چانت ريحتة عبارة عن جگاير معناها چان يدخن جوة بس ليش هالگد شارب ؟!!

ثاني يوم گعدت ما لگيتة
نزلت جوة ساعة ثمانية ونص بس شافتني الحجية استلمتني رزايل

بيومها چانت عصبية كلش
ما خلت واحد بالبيت ما تعاركت ويا
وصلت مرحلة تتعارك حتى ويا ذبان وجها بحيث ما سلم منها لا صغير ولا چبير

للضهر اجة إسحاق
بس تغدة صاح بالجهال ما اريدن حسكم يعلى صاعد انام واذا اسمع منكم نفس معناتها هاي الـ الله كتبها اعليكم

بس حچاها انخلسوا الجهال
ظليت صافنة شبيهم اليوم شو كلهم اعصابهم طافرة

تقصدت ما اصعد ورى
بقيت بغرفة ريحان نمت هناك ساعة وگعدت لگيتة طالع

واگفة امسح بالطباخ سمعت الشيخ صاحني
غسلت ايدي ورحتلة ع السريع چان واگف يم باب المضيف باوعلي وابتسم

- بوية فوتي غيري هديماتچ وتعاي وياي

- وين ؟!!

- العمتچ نجمة

- لعد بس خليني اتصل بـ إسحاق

- اگلچ مشي وياي تگلين اخبر إسحاق صاحية انتِ

- يابة مو...

- بسچ عاد
امشي جهزي رويحتچ وآنه ناطرچ بالصالة

- عادي اخذ ود ويانة

- اي بوية عادي

بس حچاها اخذت ود وصعدت
بدلت الها ولبست حجابي من نزلت لگيت الحجية بالصالة احسها تريد تنفجر من العصبية

طلع الشيخ قبلي
رحت الريحان ع السريع بلغتها اني وين رايحة خاف يتصل إسحاق يسأل عني وطلعت ورى

مسافة بسيطة بين بيتنا وبيت خالة
دگ الباب الشيخ ثواني وطلعت هناء من شافتنة تفاجأت

- ها بوية شني ما راح تضيفونا

- لا عمي العفو تفضل تفضل

وگف بالباب صاح يا الله طلعت خالة مغطية وجها
- هلا بشيخنا زارتنا البركة

- انتِ البركة كلها
شني گالوا زعلانة اعلينة وناوية تردين للحلة

- تفضل جوة نحچي

هناء.. اول ما دخلوا رحت للمطبخ ع السريع
جهزت التقديم ورجعت للصالة بس قدمتلهم وگعدت سمعت الشيخ گال ماكو ردة لا تحاولين ينجمة

- شيخنا آنه قررت وانتهت السالفة

- وآنه بعد قررت

- شني قررت ؟!!

- جايچ اليوم آنه ومرت الميزان
خاطر نطلب ايد بنيتچ الوليدي صهيب

بس حچاها فتحت عيوني علي
شجاي يگول الشيخ يربي مجاي اصدگ ؟!!
آنه ارضى اتزوج هذا المجعوص شبية إلا تسودنت

ام هناء.. شيخنا صگد چذب
هاي عودن انت الفاهم وتريد تگرب النار من البانزين

- اي شني البيها
گربيهم وياي وعوفيهم يحترگون بخشمهم اليابس

- لا اعذرني...

- بسچ لا تكملين
اخذي وكتچ بالتفكير انتِ وبنيتي ولا تنسين
اجيت الدارچ براسي وكلش عيب ترديني بعد جيتي هاي

- ما عاش اليردلك طلب
لكت انت تعرف بوليدك ما هاوي البت

- ياهو الگال هيچ
هاي وينها غسق جدامچ وسأليها وافق يتزوجها لو لالة

احچي بوية غسق
امس شني رد صهيب من بلغتكم بقرار زواجه من هناء

- وافق

- ها سمعتي عدل
لا تتحججين نجمة واتمنى ما ترديني
ومثل ما اجيتي ونشدتيني گبل الچم شهر آنه اليوم اجيت انشدنچ بنص دارچ وعشمي ما تخيبين ظني بيچ

- الامر يم البت آنه شلي غرض

- يعني افهم من كلامچ انت موافقة

- اذا هي توافق آنه اوافق

- چا اعتبريها وافقت

حچاها وباوعلي مبتسم
دنگت راسي بدون ما احچي شوية وگام استأذن

- آنه ماشي
فكري بنيتي زين وباچر جاي اخذ الرد منچ

- ان شاء الله عمي

- غسق بوية
ظلي غيري جو اليم عمتچ وآنه بلليل امرن اعليچ

- اي والله ياريت

بس حچتها سلم وطلع
راحت امي وصلتة للباب بقيت گاعدة يم غسق وگوة لازمة الدمعة بعيني

شوي وطبت مبتسمة
اكيد فرحانة بنسب الشيخ بس لا هي ولا هو فكروا بية المهم نفسهم وبس

- ها يمة هنيوة شني رايچ

- بلاية سؤال اكيدن ما موافقة

- ليش بلا

- شني ليش !!
ما لگيتوا غير هالمجعوص تزوجوني الة
والله لو يبقى اخر رجال بالعالم هم ما افكر اتنوعلة حتى

- عليش تحچين اعلة الزلمة
بعدين لا تنسين هذا ابن ضاري مو حي الله يعني تحفين وما تحصلين ولو شوي منة

- هههههه
هو شني الكبر راسة غير حچيكم هذا

- اسمعيني يمة
الزلمة موافق اعليچ يعني لو ترفضي اطلع آنه بالوجه الاسود

- اي عادي شني يعني
آنه لا اول ولا اخر وحدة ترفض عريس تقدملها

- تنوعيلي عدل
والله العظيم بعرشة اذا رفضتي اخلي واردن للحلة حتى لو اعرف اشتغل بالشوارع خاطر نعيش

- يمة شني الشغلة جبر

- لا مو جبر
لكت مالچ غير هالخيارين يا توافقين يا نرد للحلة وانتهى الكلام

حچتها وطلعت من الصالة
گعدت ع التخم ابچي وغسق يمي تحاول تهدي بية شوي وباوعتلة امسح بدموعي

- عليش وافق هاااا
عليش يقبل يتزوج وحدة ما طايقها بس فهميني

- هاي شبيچ
ترى والله صهيب حباب بس هو يحب يستفزچ انتِ بالذات ما اعرف ليش

- وموافقتة هاي شني
هم نوع من انواع الاستفزاز وعادي عندة يتورط بية ويورطني ويا خاطر بس يضوجني

- اكيد لا
ليش تفكرين هيچ يجوز عاجبتة ومقتنع بيچ لذالك وافق ويجوز ميگدر يكسر كلمة الشيخ

- اسكتي خايبة
هو المثلة هم عندة گلب يحب وينحب بي

بس آنه الة
اذا ما اندمة ع اليوم الوافق يتزوجني بي ما اطلع آنه هناء وگولي گالت وسوتها

- الله يهديچ ان شاء الله
خو ارفضي وفضيها على شنو هالدوخة بعد

- ما سمعتي امي شني گالت
عبالچ ترجع بكلامها لا والله فلا ترجع وبس ارفض تاخذني وتمشي للحلة

آنه احب على گلبي نرجع اليوم گبل باچر
بس ما اريدنها تتبهذل وياي عبن ما نگدر نعيش واحنة بلاية رجال

ولو هو ابوي شلون مات
مو من قهر العيشة الصعبة وامي هم خلصتها مريضة من كثر التفكير وهساع ما عولت ترتاح شوي اجي آنه ارجعها للفگر وضيمة

- لعد شراح تسوين

- المفروض هو يسوي موش آنه
بس ماطولة عاند وياي وركب راسة بس علمود يأذيني راح اسوي مثلة واكرها بعيشتة عبن هو البدا والبادي اظلم

- وشتستفادين من هالشي

- استفاد هواي
اولها احرگ اعصابة واخرها اخلي هو الينسحب ويصير اللوم عليهم مو علينة

- هناء اگعدي راحة

- خية بس عوفچ من هالحچي
هي اصلاً السالفة مطولة عبن ابوي توة ميت حتى لو وافقت مراح يصير شي هالساع

- براحتچ والله

حچيتها وگمت اشوف خالة
خطية مبين عليها ضاجت بسبب موقف هناء بس هي هم حقها اذا متريد الولد ميصير يجبروها علي

بقيت يمهم لليل
تعشينا وظليت اسولف وياهم قريب العشرة اندگت الباب

طلعت هناء تشوف منو
شوية ورجعت گالت إسحاق ينتظرچ برة
تفاجأت كلش لأن الشيخ گال اني اجي عليچ معقولة ضاج لان طلعت بدون علمة وجاي حتى يحاسبني

گمت ع السريع
لميت الغراض وخالة غطت وجها وطلعتلة علمود تضيفة بس ما قبل يطب

طلعت شايلة ود لگيتة ديسولف وياها
بس شافني اجة اخذها من ايدي ورجع سلم على خالة

طلعنة سوية
چان ساكت ما حچة ولا كلمة وحدة
بقيت مترددة احچي ويا لو لا اخير شي گلت هسه اني على شنو خايفة قابل سويت شي غلط وما ادري بروحي

استجمعت قوتي وصحت ابو ود
باوعلي وگال ها بوية
جريت نفس براحة مادام گال بوية معناها مزعلان

- احچي شمالچ

- اني اجيت البيت خالة بطلب من الشيخ

- اي عندي علم وما حاسبتچ آنه

- ادري بس حبيت اوضحلك

- تعشيتي

- اي الحمد لله وانت ؟؟

- لا بعدني

ردت اجاوبة دگ جهازة
طلعة من جيبة جاوب بس گال ها ضبع عرفتة ايوب

- لا خوية بعد هاي رجعتي
تعال هلا بيك
ليش خوبن بالبيت
ماشي اعلة راحتك ما اضغط اعليك

سد الخط ويا ما وصلنة
انطاني ود وگال رايح ساعتين واردن
باوعتلة بتعجب وين مو توك اجيت

- اتعشى ويا صاحبي

- خو تعالوا اني اسويلكم العشة هنا

- لا يريد بالمطعم

- براحتكم

- يلا فوتي جوة وسدي الباب

عفتة وطبيت
چانوا كلهم گاعدين بالصالة سلمت وعيوني ع الحجية من دون الكل ما ردت علية السلام

بقيت صافنة عليها
اموت واعرف اليوم شبيها صح هي من گاعها ضايجة بس اني بالتحديد احسها گوة جارعتني

ثاني يوم اتصل الشيخ بخالة وردت موافقة هناء
هواي حاولت ويا علمود يأجل عقدهم بعد سنة ابوها بس ما قبل گال الها نعقدلهم بعد الاربعين وعودن الزواج من تطلع سنوية المرحوم

ريحان.. من عرفت جمار متقدملي انصدمت كلش
ما چان عندي خيار غير الرفض من جهة احسن ما مستعدة للزواج ومن جهة ثانية مرضي واگف عثرة بطريقي وصعب اتجاوزه ولا كأنه موجود بحياتي

بعد ما رفضتة بيوم
چنت گاعدة ويا شمس لأن غسق راحت هي وابوي البيت عمتي نجمة دگ جهازي رسالة

باوعت رقم جمار
صح ما خازنتة بالجهاز بس حافظة ارقامة
چان كاتب ليش ترفضيني بية عيب لو متحبيني لو شنو بالضبط

انكسر خاطري علي
ردت اجاوبة تراجعت خليني هيچ ماكو داعي اعشم الرجال وآنه ادري بنفسي مراح ارضى بي بيوم من الايام

ثاني يوم بلليل هم دز رسالة
ريحان لتأذيني والله العظيم احبچ
مداتحمل فكرة رفضچ الي اقلها بس گولي السبب حتى تريحيني من التفكير

رديت علي
مامش سبب ومابيك عيب بس آنه ما اريدن اتزوج

دزيت الرسالة وشمرت الجهاز ع الميز
ثواني واتصل مكالمتين يلا رديت علي خاطر احسم الموضوع عبن لو اظلن ساكتة مراح يتركني بحالي

- الوو

- واخيراً رديتي

- ها جمار خيرك

- ريحان احبچ
اترجاچ فكري زين واني قابل بكل شروطچ

اذا على دراستچ
اخليچ تكمليها واني بنفسي اوصلچ للجامعة وارجعچ منها

واذا تفكرين بالمرض ترى اخر همي
اني احبچ مثل ما انتِ بمرضچ بعفويتچ بلسانچ الطويل بعصبيتچ ما اريد تغيرين شي بيچ علمودي

- جمار

- اششش لتحچين
فكري زين ما اريد جواب منچ هسه
وصدگيني مراح تلگين شخص يحبچ بگدي لو افتريتي كل هالدنيا

ظليت ساكتة چان يگول
احبچ واحب سكوتچ واحب حتى هاي انفاسچ الهادئة الاتمنى بيوم من الايام انام واصحى عليها

- بسك جمار

- واحب اسمي لمن اسمعة منچ للعلم اني بالواقع مو كلش احبة

- ليش بالعكس حلو

- الأسم بس لو غير شي

- جمااااار

- روح وحياة وگلب جمار انتِ

- راح اسد الخط

- اموت عليچ

بس حچاها فصلتة
باوعت للرقم ميصير اظل احچي ويا بلاية علم اهلي
غمضت عيني شوي بعدها خليت رقمة بقائمة الرفض خاطر اخلص من هالضغط النفسي

غسق.. ايام مرات والوضع مثل ما هو بلا اي جديد
رفض ريحان الجمار ظل قائم وموقف صخر من شمس مثل ما هو اما حياتي ويا إسحاق مستمرة بين مد وجزر يوم مستقرة ويوم مضطربة بدون سبب معلوم

فترة وطلع اربعين عمو ابو هناء
راحوا بيومها للنجف من الصبح
چنت ناوية اروح وياهم علمود ازور امي وشجن بس صبحت ود كلش مريضة وما گدرت اعوفها

بعد اسبوع صار وقت عقد هناء وصهيب
علمود وفاة ابوها سووا العقد بيناتنا ومن الاقارب محد حضر غير بس عمة سكينة

غيرت الود ونزلتها يم ريحان
رجعت فوگ لبست فستان عدل لون فضي وبي فتحات من الجوانب

وبما انو العقد سكتاوي
ما سويت شي مجرد مكياج خفيف وشلت شعري عالي وبرمت اطرافة

باوعت الروحي بالمرايا طالعة حلوة
فجأة دمعت عيوني تذكرت شجن چانت دوم تگول بس ضعفي واوگفي گدام المرايا راح تنصدمين بشكلچ شلون يتغير

اااخ يا شجن اااخ
والله العظيم روحتچ انتِ وامي راح تظل غصة بصدري الاخر يوم اعيشة بـ هالدنيا

لزمت نفسي بالگوة
مو مال تبچين غسق قوي نفسچ شوية كافي ضعف

مسحت جوة عيوني ورحت للكنتور
داسحب عباتي طب إسحاق باوعلي من فوگ ليجوة بس بنظرات غريبة مثل الما عاجبة الوضع

بدون ميحچي راح للحمام
راد يطب رجع باوعلي وگال هيچ تمشين للوادم

- اي غير عقد

- والزلم ما فكرتي بيها

- وين اكو زلم
غير هو بس اخوك ومن يجي البس حجابي

- وهساع من تنزلين شلون

باوعتلة وسكتت
چان يگول شمري شي على وجهچ ما اريدن تطلعين بالمكياج

درت وجهي بدون ما اجاوبة
چان عندي شال اسود سحبتة وخليتة على وجهي وراها لبست العباية

ظل واگف يباوعلي لحد ما طلعت من الغرفة
من وصلت للدرج رفعتة شلون انزل وهو عاميني غير اوگع على وجهي عدل من اول باية

نزلت جوة چانوا اخوانة بالصالة
گبل رحت الغرفة ريحان ظليت يمها انتظر البنات يكملن حتى نروح

شمس.. چنت قافلة الباب
داغير ملابسي علمود عقد صهيب سمعتها اندگت حيل عرفتة صخر

كملت ع السريع وفتحتها
طب بدون ميباوع راح بوجها للحمام
اخذت حجابي لبستة ردت اطلع فكرت ويا نفسي لا شمس خليچ شوية اليوم فرصتچ علمود تحركين الجبل الصامد

نزعت حجابي بسرعة ووگفت گدام المرايا
شعري تخربط من الحجاب عدلتة شوية وراها طوخت الحمرة بعدني اشتغل بيها طلع صخر من الحمام

بقيت واگفة بمكاني
صح مسوية نفسي مشغولة بالمكياج بس عيوني تراقب كل حركة منة

چان يطلع بملابسة وكل شوية يلتفت علية
تعمدت اروح يمة طخيت بي ومديت ايدي ع الكنتور اطلع الحجاب گبل وخر عني

- امشي يلا ناطريچ عطلتيهم

- ههههه
لا عادي عروسة ويحقلي التأخير

باوعلي بطرف عينة لأن حچيتها بـ استهزاء
شوية وگال شمالچ عليش تسوين هالحركات مجاي افهم

- يا حركات

- لبسچ مكياجچ كل شي بيچ

- غير عرس شتريد لعد اروحلهم بهدوم البيت

- شمس وين تردين توصلين

- الگلبك

بس حچيتها باوعلي صافن
شوية وگال مو مهم گلبي المهم گلبچ انتِ

- اي هو مثل متگول
تقربت منة حطيت ايدي على صدرة
هنا اريد اوصل ولهنا اريدك توصل واشرت على گلبي

صخر اني ما عندي غيرك بالدنيا
يعني هسه گلبي فارغ مابي غير ذكريات اهلي واريدك انت تملي بحبك الأخر دگة

لتصدگ اني مرتاحة للي ديصير
والله يمكن مقهورة حتى اكثر منك بس مو بـ ايدي
موت اهلي والشي المريت بي اثر بية بشكل

فوگاها تزوجنا بسرعة
حتى بدون خطوبة مثل العالم والناس
كل هالشي وتريدني اتقبلك عادي من اول ليلة

- امشي الودام جاي ينطروچ اجلي هالحچي البعدين

- توعدني تسمعني من ارجع

هز راسة بدون ميجاوب
سحبت ايدي من صدرة ولبست حجابي داطلع گال غطي اعلة وجهچ اخواني برة

نزلت الشال على وجهي وفتحت الباب
دگ جهازي خالتي دتتصل رديت بـ ابتسامة سرعان ما اختفت من سمعت صوتها تبچي

- خالة شبيچ !!!

- وچ يمة شمس وينچ لحگي شوفي شصااار...

يتبع

لتنسووون ⭐⭐⭐⭐⭐