رواية وضاقت الأرض بي الفصل الثاني 2 - بقلم لبنى الموسوي

#وضاقت_الأرض_بي

للكاتبه #لبنى_الموسوي

.........

انهضي
ثوري
لا تسقطي
اصنعي من نفسك شيء يستحيل كسره كـ الحديد مثلاً

نعم يا حواء
انت التي اخرجتِ آدم من جنتهِ
هل من المعقول ان تسمحي له ان يدخلكِ الى جحيمه

كلا يا آدم ،، حواء لم ولن تُهزم
سـ تقف بشموخ
سـ تحارب كما يحارب الشجاع
سـ تاخذ الحق من فم السبع ثم تقتله لتغتسل بدمائه

سـ تقول دائماً وابداً
في كل مكان وزمان
انا حواء
انا نصفك بل كلك كما اُعد كل المجتمع ولست بنصفه
انا اما اكون او لا تكون انت...

.......

المشهد الأول..

صوت الصياح عبه المكان
اباوع الابويه مثل المصدگ بكلامهم بس ميريد يعترف

بقيت بمكاني اراقب شراح يصير
كلهم يصيحون تتزوجها ورجلك فوگ راسك إلا سيف

واگف بحيل صدر ويصيح بيهم
روحوا شوفوا شرفكم منو لعب بي قبل لتذبون مصايبكم على راسي

اني ادري هو الغلطان
اي ادري ومصدگه كل كلام شجن بس منو راح يسمعني او يسمعها على الاقل

ظل الكلام بين اخذ وعطا
حاولوا ويا هواي بس بدون نتيجه لأن ما عدهم دليل علي غير كلامها

كلام حواء اليعتبروا اضعف شي بالدنيا
منو راح يصدگ بيها بوجود ادم وجبروته المينتهي

طلعوا من يمنه بعد التهديد والوعيد
عفت بابا يرزل بسيف وصعدت الغرفتي حتى اتصل بيها

رن اكثر من مره ما ردت
قريب العشر دقايق رجعت اتصلت بس فتحت الخط سمعتها تبچي

- ها ولچ شبيچ

- حاچيني شصار
بس الله يخليچ گولي شي يبرد گلبي

- ما اعترف للأسف

- الله ينتقم منه
الله يطلع حقي من بين عيوني حسبي الله ونعم الوكيل بي

بقيت ساكته
ما عندي كلام اگوله بمثل هيچ موقف
فجأه هدأ بچيها صحت شجن تسمعيني شو هاي عاطت بصوت طالع من اعماق گلبها وراها فصل الخط....

المشهد الثاني...

من يموت شخص عزيز على گلبك
تسود الدنيا بعينك

تصير تتمنى الموت حتى تخلص من ألم الفقدان
فـ كيف اذا كان الميت هو اخوك ابن امك وابوك

هنا راح ينكسرلك ظهر
ينهدملك عامود
توگع خيمتك عليك بعد ما چنت تحتمي بيها من شر الدنيا ومصايبها

صبيحه.. خايبات وين باقر
يا يا ولچن الفرخ طلع للحديقه وحده منچن تگوم تجيبه ليصيبه مكروه

باوعت المرت اخويه منتهيه
فاقده ومو بحاله تسمحلها تدور ابنها وين

سحبت شالي على راسي وطلعت
باوعت منا ومنا ما هو ياربي وين راح هالطفل

خفت كلش
ركضت بكل حيلي ادور علي
رحت اشوف ورى البيت وچان انصدم شجابه هذا لهنا

- البقيه بحياتچ

ما جاوبته
سحبت باقر من حضنه لزم زندي جريته حيل

- دير بالك تكمشني مره ثانيه

- بعدچ شايله بگلبچ عليه

- لا
وياهو انت حتى اشيلك مشاعر بصدري اصلاً

- عشرة عمرچ
حبيبچ الفتحتي عينچ بالدنيا على عيونه وصرتي مريته

- ساعة السوده اي والله
لو ادري بيك حقير ووسخ ومو رجال فلا چان ضيعت يوم من عمري ويا شخص مثلك

- لتتجاوزين ولچ
لا عبالچ متسبعه بأخوتچ وابوچ ترى كلكم ادوسكم بقندرتي اذا طخت براسي

توني اريد اجاوبه سمعت احد صاح حيل
درت وجهي..

...........

المشهد الثالث...

ظليت رايحه جايه الوب
اريد اعرف السمعته صح لو بس هدفهم يحرگوا الگلبي

نص ساعه وطب للغرفه
باوعلي وگال شبيچ
مسحت دموعي وگمت بأتجاها

- راح تتزوج
باوعلي مصدوم بدون ميجاوب
احچي لتسكت صدگ راح تتزوج لو لاااا

- هدي يبوي بس خلني افهمچ

- شنو يعني اااااهدي
فهمني شلون تريدني اهدأ واني تبشرت اليوم بخبر زواجك

- السالفه مو مثل ما فهمتيها
اني الچ وراح اظل الچ لتصدگين مره تاخذ مكانچ بگلبي

حاولي تهدين وتسمعيني
اني ما گتلچ بالموضوع ع التلفون لاجلچ

لأجل ابني البطنچ
ما اريد الشي الصار يأثر عليكم او يمسكم بأذيه تراكم متهونون عندي قسم بالله

باوعت علي وضحكت بهستريه
درت وجهي عنه
گلبي محروگ ما اعرف شسوي حتى ارتاح واطفي ناري بي

گمت اشيل واشمر بالغراض
شكو شغله صارت گدامي شمرتها علي وهو واگف يتفرج بدون ميحرك ساكن

اخير شي صعدت ع الچربايه
چنت رايده اروح للطرف الثاني علمود الغراض الي عالميز بس هو عباله اريد اشمر نفسي من فوگاها

ركض لزمني
شتردين تسوين تسودنتي ولچ خو ما تسودنتي

- وخررررررر
اياني واياك تلمسني بعد اليوم تسمع لو لااااا

- ماشي بويه
مراح اكضچ بعد بس هدي اترجاچ هدي

توني اريد احچي حسيت بحراره نزلت مني
عفته ورحت للحمام اركض
اجه ورايه يدگ ع الباب حيل حتى ما جاوبته

باوعت النفسي
لا يربي دا انزززززززززف....

٠٠٠٠٠٠٠٠٠

ثلاث فتيات
كل منهن من عالم مختلف
جمعهم القدر كي يواجهن مصير واحد لتصبح حياتهم حكاية تروى

مساء الــ🥀ـورد متابعيني الكرام ♥

هاي المشاهد نزلتها الكم حسب طلباتكم المكرره
ادري مراح تفهمون منها شي بس هو هذا المطلوب

هالقصه اكثر قصه تعبتني
يوميه اگول ابدي بيها وابطل بسبب صعوبتها + الواهس

ما اعرف شوكت ابدي بيها
يمكن نهاية محرم او بعد اربعينة الأمام الحسين عليه السلام واحتمال اكثر 🤭

هالشي راجع الكم
شجعوني حتى ابدي بيها ساعه قبل لأن النفسيه والواهس صفر الله وكيلكم
يعني بأختصار لحوا عليه حتى تجبروني ابدي بكتابتها واني راضيه بالملحه بس بدون تهجم الله عليكم 🌚

ادعموا القصه بالمشاهده والتصويت شگد متگدرون لأن القصه تستاهل الدعم صدقاً

احبكم ♥🥀