رواية وضاقت الأرض بي الفصل الثاني والعشرون 22 - بقلم لبنى الموسوي

#وضاقت_الأرض_بي

للكاتبة #لبنى_الموسوي

گعدت بالگاع ابچي
لو يصيرلها شي مراح اسامح روحي
ما إحس إلا وإسحاق رفعني من رگبتي وشد قبضتة علية بحيث انگطع النفس عن صدري نهائياً

گمزت خالة ام هناء علي
لزمت ايدة تتوسل يمة عوفها الصوچ موش يمها يمي السالفة

دفعني ع الحايط كل قوتة ورجع ليورة يصيح
- ارررررريد بتي
جيبوا بتي لا احرگگم هنانة واحد ورى الاخر

ام هناء.. اخافن طلعت للعگد

إسحاق.. شلون تطلع والباب مقفول من الزرف مثلاً

الحجية هيلة.. ولچ نجيبة المعزاية وين وديتي الفرخة

إسحاق.. نجيبة شلها غرض ؟!!

الحجية هيلة.. هي اخذتها من عمتك نجمة خاطر تغسل ليها وما ردتها بعد

إسحاق.. حنننننننننظل

چانوا الولد ويا الشيخ بالمضيف
بس صيح طلعوا يركضون گال إسحاق تعال شوفلك صرفة ويا حرمتك

حنظل.. ياهي منهن وشمالها

الحجية هيلة.. نجيبة
اخذت بنية إسحاق خاطر تغسل ليها وسلحتها ماعرف وين

حنظل.. نجيبة احچي شعاملة بالفرخة

نجيبة.. والله موش آنه
بس غسلت ايديناتها وتالي عفتها تلعب ويا الفروخ بنص الحوش

إسحاق.. لا اله إلا الله
البت ووووووووين احد يجاوبني گبل لا اجن اعليكم وما تشوفون مني رحمة

الشيخ ضاري.. امشوا للعگد دورولي اعليها
خافن احد تارك الباب مفتوح والفرخة طلعت بلاية وعي

باوعت ع الولد طلعوا يركضون
ظل إسحاق يفرك براسة شوية وتقرب الشيخ منة اخذة وطلعوا وراهم

شمس.. چنت توني گاعدة من النوم وبعدني بفراشي
الغرفة بيها شباك چبير يطل ع البستان سمعت صوت الچلاب تنبح بصوت عالي

اول شي ما اهتميت
يعني بستان وطبيعي يكون بي اشكال الحيوانات بس شوية والصوت بدا يقوة اكثر

گمت من مكاني بفضول اريد اعرف شنو ديصير
فتحت الشباك وانرعبت حيل من المنظر الصار گدامي
طفلة صغيرة واگفة يم الشجرة والچلاب دتركض بـ اتجاها

طفرت من مكاني حافية
حتى حجاب ما ذبيت على راسي
ورغم ادري بنفسي جبانة وارجف من ابسط الحيوانات بس ما اهتميت غير للطفلة بوقتها

چانوا الكل بعدهم نايمين
اضطريت اطلع وحدي حتى اساعدها فتحت الباب وركضت كل سرعتي

شفت البنية تركض بالگوة وتصرخ من البچي
وهذولة مسوين سباق عليها ياهو اليوصل الها اول ويفوز بغنيمتة

المسافة طويلة من البيت للبستان
بعدني ما واصلة للمكان واحد منهم لزمها من تشيرتها وصار يركض بيها وجماعتة يركضون ورى

انسحت روحي سحن
صرت الم حجار من الگاع مثل المخبلة بحيث ايدي انترست من الدم على گد ما طب بيها اشكال الشوك والكزاز

شمرت الحجار عليهم واني اصرخ
اشوف الطفلة صارت عجينة بين انيابة ياخذها منا ويرجعها منا

تقربت اكثر واني اضرب بيهم
ما إشوف إلا واحد منهم ركض بـ اتجاهي
ما اهتميت لأن مداحس بخوف غير خوفي ع الطفلة وبس

ركضت بكل سرعتي قبل لا يلزمني
وصلت يمهم ودخلت بالنص حتى اوصل للطفلة ما احس إلا هجموا علية بوكت واحد

رغم الموقف مرعب بشكل
بس مي بارد ونزل على گلبي من شفت الچلب هد الطفلة وركض علية

ما اعرف شسوي بعد
ولا اتصور اگدر افلت منهم لذالك قررت استسلم
صرخت ع الطفلة الواگفة تباوع ومنتهية من البچي روووحي منااااا

جروني من تراكي بنفس اللحظة
صاروا يسحلون بية بالگاع وواحد من عدهم عضني من رجلي بحيث شاغت روحي

غمضت داتشاهد
سمعت صوت إسحاق يصرخ بيهم بكل صوتة
وراها رمى بالهوى اكثر من مرة من الخوف راحن يركضن

فتحت عيني شفت إسحاق والشيخ ديجون علينة
بعدهم يمشون سريع اجو اخوانة الباقين
واني عاد شلون حالي بهاي اللحظات حتى سحابة التراك مفتوحة وقراصتي من السحل الي انسحلتة انكسرت بحيث الكفشة صارت حدث ولا حرج

ركض صخر قبل الكل
جر الغترة من راسة خلاها على شعري وسد سحابتي ع السريع

- گومي شو گووومي

بالگوة گدرت اسند نفسي علي واگوم
احس كل جسمي يوجعني ومنا رجلي تجري دم بسبب العضة الاكلتها منهم

اول ما وگفت
نزع الشيخ عبايتة وذبها على جسمي

حسيت نفسي صرت رجال
الغترة ع الراس والعباية ع الجسم ما ناقصني بعد غير بس العگال واصير الشيخ شمس على سن ورمح

باوعت الإسحاق شال الطفلة يبوس بيها
انصدمت من سمعتة يگول الها اسم الله بنيتي
شنو يعني هاي الطفلة هي نفسها بت إسحاق !!!

إسحاق.. شني الصار خوية احچيلي

شمس.. چنت نايمة وسمعت صوت نباحهن عالي
باوعت من الشباك لگيتهن ديركضن ورى الطفلة وهي تصرخ من الخوف

مچان ماكو احد يساعدها لأن الكل نايمين
عاد اني طلعت ع السريع علمود اخلصها منهن وصار الي صار

الشيخ ضاري.. رحم الله والديچ بوية
لو ما انتِ وحدة الله اليعلم حالنة شلون صاير هساع

صخر.. شني عضنچ

شمس.. اي

بس حچيتها عافوني ويا صخر وراحوا
تقرب مني همس تگدرين تمشين لو اشيلچ باوعتلة بضحكة

- لا اگدر

- چا گومي يبوي
امشي وياي خاطر تاخذين علاج العضة هاي خطرة

- وين ؟!!

- الدارنا

سند ايدي وگال يلا
مشيت ويا والطريق صار شطولة لأن بالگوة داتحرك إلا شوية واگولة شيليني من الألم الچنت احس بي بوقتها

غسق.. بعدني بالصالة
گاعدة بالگاع حاضنة نفسي بـ ايدي وابچي بحرگة سمعت ابن حنظل طب يركض ويصيح

- لگوا ود حبوبة لگووووها

گمزت من مكاني
كل شي نسيت برجعتها حتى الفشلة الحسيت بيها من تصرف إسحاق گدام كل الموجودين بالبيت

وگفت يم الشباك
اباوع ع الباب ودموعي تجري
هو اني شفت إسحاق طب شايلها لو مدري شصارلي

طلعت اركض بدون وعي
سحبتها من ايدة الحضني ابوس بيها وابچي ممصدگة هاي هي گدامي رجعت سالمة وما بيها شي

سمعت إسحاق گال دخلي جوة
اخذتها وطبيت تلگني الحجية وريحان اخذنها من ايدي يجرن بالصلوات

گعدت ع التخم اجر النفس بالگوة
من الخوف العشت بي ما احس حتى بدگات گلبي بعد

فجأة طبت خطيبة صخر
الكل انصدم بجيتها خصوصاً المنظر الچانت بي مينوصف بعدين عرفنة هي المساعدة ود

عالجوها ورحت تشكرت منها حالي حالي الباقين
وراها اخذها صخر للبيت حتى تجهز روحها وتجي ويا اهلها بالعشرة يشتغلوها الصالون

انسدت السالفة علمود العرس
بس شكل إسحاق مراح يعدي هالموضوع على خير

بعد ما شبعوا من الطفلة اخذتها غسلت وجها
چانت تناشغ على گد ما باچية وبس گلتلها شبيچ ماما رجعت تبچي من الخوف

اخذتها وصعدت فوگ
توني سادة الباب طب إسحاق
اخذها مني بدون ميحچي ظل يفتر بيها بلكت تهدأ

عفتة ونزلت
رحت للمطبخ جبتلها ملح لأن الحجية وصتني احط بحلگها شوية علمود الهبطة

رجعت صعدت لگيتها ساكتة بـ ايد ابوها
حطيت الملح بحلگها ورحت للحمام غسلت وجهي ورگبتي حتى اگدر اتنفس وطلعت

تقرب مني إسحاق انطاني ود
دار وجها ديطلع رجع باوعلي سويت نفسي مو يمة صح بنتة هاي وحقة لو شميسوي بس مو گدام الناس

ظليت اباوع الود چان اسمعة يگول
خلي بالچ وياها ولون هالمرة سلمت الجرة المرة الخ تتفلش اعلة راسچ

حچاها ورگع الباب ورى
رفعت راسي مصدومة ابد ممعقول هالرجال !!!
يعني ما ادري شلون يفكر وليش ديذب اللوم علية اني من دون الكل والله راح اتخبل

بقيت بالغرفة قريب النص ساعة
المسكينة من الهبطة الاكلتها نامت وهي تناشغ
غطيتها وطفيت الضوة ونزلت علمود اساعدهم بالشغل لأن الدنيا مخبوصة جوة

چان البيت عبارة عن نسوان
شوية واجتي شمس اخذوها الغرفة ريحان وبدت ام الصالون تشتغل بيها

ظليت اني بالمطبخ
صح جايبين اكثر من طباخ للغدة بس مع ذالك الصب وحدة يحتاجلة ظهر من حديد

- ريحان شنو سالفتهن
ميجن يساعدنة وكت مكياج هسه !!!

- چا شبيدي
ما تنوعتي چم مرة صحت اعليهن

نهلة.. يلا اني اجيت اساعدچن

غسق.. صيحي هناء عفية

ابتسمت وراحت تصيح الها
بعدنة دنصب طب جمار بـ ايدة گدر ثاني
گامت ريحان دتاخذة منة فلت من ايدها وانسمطوا ثنينهم بالتشريب من يمي روحي شاغت

غسق.. الله الله شجاكم يمعودين

جمار.. خو ما احترگتي

ريحان.. اسفة انزلگ من ايدي

جمار.. هسه وكت اعتذار
فوتي دهني المنطقة حتى لا تأذيچ بعدين

ريحان.. عفتهم ورحت لغرفة حبيب
روحي شاغت من الوجع كل ايدي ورجلي انسمطت بالتشريب

دورت بالمجرات وين يلا لگيت المرهم
دهنت الروحي ورجعت يمهم لگيت جمار وحبيب جاي يعزلون بالگدورة خاطر ننظف هوسة المطبخ

تقربت من جمار انطيتة المرهم
- اخذ ادهن الروحك

- شلون صرتي ؟؟

- الحمد لله احسن

غسق.. باوعت الجمار عيونة تتحرك ورى ريحان
عرفتة يحبها من أول بس هي مدتحس بي ولو شلون تحس وهم كلما يلتقون تصير مصيبة

اخذت الوصلة بعد ما فرغ المطبخ
مسحت الگاع من التشريب وظلوا جمار وحبيب يساعدونة بالصب

خلصنا هوسة الغدة بعد ساعة من الوگفة
طلعت من المطبخ واخذت البنات وياية لأن انتهينا من التعب

راحت ريحان تشكي للحجية
لأن محد اشتغل ويانة غير هناء ونهلة
اما الباقيات حايرات بروحهن اليگول هن العرايس ما عدى ثناء ابنها مريض وحايرة بي

گامت الحجية نزلت بيهن رزايل
وراها گالت روحن شوفن شغلچن وعوفن الظال من المطبخ اعليهن بعد

اتطمنت على ود يم عمة سكينة
وصيتها تنتبة عليها وراها صعدت فوگ سبحت واخذت ملابسي ونزلت الغرفة ريحان

چانوا ديشتغلون بشمس
باوعت الأمل صايرة يمها كتل على ابو الحلاوة هزيت ايدي وطلعت

رجعت الغرفتي توني طابة اندگت الباب
فتحتها چانت ريحان جاية علمود تبدل يمي لأن الكل موجودين بغرفتها

اخذت ملابسي ورحت للحمام
بدلت وطلعت لگيتها هي هم مكملة
چانت لابسة فستان طويل ومستور على عكس فستاني كل فتحة بي تگول للثانية اني اكبر منچ

- ريحان اني راح اغير ملابسي

- ليش خية والله يكتل اعليچ

- ما ادري احسة اوڤر

- خايبة غير انتِ متزوجة
خليچ بي والله لتطيرين عگول ذولاك الوادم

- منو تقصدين ؟!

- موش وكتچ
امشي وياية ننزل المرت إلياس تعدل چهرتنا

- لا اني امكيج نفسي ما شفتي الهوسة اليمها

- امشي خايبة احنة اولى من الغريب

اخذتني ونزلت
طبينة للغرفة نفس الهوسة بعد
صفگت ريحان بكل قوتها وصاحت اخلاء اخلااااء

باوعت عليها وضحكت
صدگ سينما هالبنية بحيث عدها قدرة رهيبة تضحك المقابل لو بعز ضوجتة

رؤى.. عمة مو جاي نعدل

ريحان.. بحجرتچ عمة يلا يلا

نجيبة.. شمالچ خايبة تطردين بينة
صارلنة ساعة ناطرين امل تفرغ خاطر تمكيجنا

ريحان.. ما يحتاج تتمكيجين كبرتي بعد

نجيبة.. شني قصدچ آنه عجوز

ريحان.. لا آنه العجوز بس اطلعي

ظلت تجادل وياهن اخر شي سوت البراسها وطلعتهن
رادن هناء ونهلة هم يطلعن وراهن ما قبلت ريحان وگالت ما قصدت اعليچن

بقت امل تشتغل بينة للعصر
ريحان ونهلة وهناء اشتغلتهن مكياج خفيف لأن بعدهن بنات

وصلت الية گامت تجيب وتخلي
كل شوية اوصي بيها امل لتطوخين وهي تگول لا خايبة لمسات لمسات اخر شي گلتلها الله يستر من لمساتچ لأن جبرناهن وشفنا

خلصت مني عفتها وگمت للمرايا
باوعت النفسي بصدمة
اي صح طالعة حلوة لأن شغلها كلش مرتب بس المكياج مو طبيعي يعني مال عرايس

- هاي شسويتي يمعودة ؟!!

- ليش خايبة ما عجبچ

- لا عفية امل شنو هاي خففي الي

شمس.. بس والله حلو

غسق.. هو حلو بس طوخ زيادة عبالك مال عرايس

ريحان.. چا خية هو انت عروس

فاتن.. ها يبنات خلصتن

نهلة.. ماما تعالي شوفي غسق تريد تخفف مكياجها

فاتن.. لا خالة ليش تخففي
ترى حلو وحتى موالمچ لأن توچ متزوجة

ريحان.. اي والله آنه هماتين گلت هيچي

فاتن.. يمة العرايس يمة شطالعات عين الباردة عليچن

ريحان.. هههه
شكراً عمة رفعتي معنوياتنا

نهلة.. ديلا ام حلگ
هو انتِ الثقة عندچ تقرا ألف

ريحان.. چا غير آنه اخت العريس

نهلة.. ادري واذا اخت العريس
قابل راح تشتغلين بمكانة اليوم واني ما ادري هههه

فاتن.. كافي ولچن
الي خلصت تطلع للمطبخ محد بي ترى والناس دتجي

غسق.. اي هسه اني رايحة

عفتهن وطلعت للمطبخ
بديت ارتب بالتقديم بعدني اشتغل طبت ريحان بـ ايدها الموبايل

- اخوي اعلة الخط

اخذت الموبايل منها حطيتة على اذني چان يصيح
- الووو

- نعم

- جهزيلي الملابس شوي وجاي اسبح

- ان شاء الله

- ود شلونها

- زينه
نامت بالبداية وراها ظلت يم عمة سكينة لأن اني عندي شغل

بس حچيتها سد الخط بوجهي
شمرت الموبايل ع الميز بعصبية وصعدت فوگ
هو الي حظة اعوج يظل كل عمرة اعوج قابل يتعدل گوة خو ما گوة

دخلت للغرفة طلعت ملابسة ورگعت باب الكنتور
باوعت الروحي بالمرايا بس لو اعرف امچ شمتنسية بيچ ضيم لو مر لو قهر لو كلهم سوة واجيتي للدنيا !!

اخذت نفس احاول ابرد اعصابي
ميخالف غسق اهدي مو زين لگيتي مكان يلمچ بعد ما صفيتي بالشوارع هم خلف الله علي من تزوجچ وانت....

نزلت دموعي لا ارادياً
رحت للميز سحبت الكلينس امسح بيها على كيف قبل لا يخرب المكياج

اخذت قلم الكحلة اعدل عيوني
بعدني داخط بيها طب إسحاق من الهبطة عميت عيني بالكحل خاف اني عايزة

درت وجهي اهفي الروحي حيل
ما ادري احير بالفضيحة اللابستها لو بالوجع الداحس ينخر بگلبي مو بعيني

اريد اشوف دربي حتى اطلع من الغرفة ماكو
حسيت ايدة انحطت على چتفي
شوية ودارني علي رفع وجهي بهدوء وصار ينفخ بعيوني

بقيت ساكنة بمكاني
ما اتجرأ احط عيني بعينة مغمضة ودموعي تجري چان يسحبني للچرباية

گعدني عليها وطلع
صفنت ورى هذا وين راح شوية ورجع بـ ايدة الگطن وقطرة مال عين

- نامي

- ليش ؟!!

- اعقم عيونچ غير

رجعت ليورة تمددت وسحبت الغطا على جسمي
تقرب مني فتح عيني على وسعهن حط قطرتين وسدها حيل

- لا تفتحين

- تحرگني كلش

- اي هساع تتحسن

حچاها وطبع بوسة على خدي
من الصدمة گبل فتحت عيوني ضحك ورجع غمضهن بـ ايدة

حسيت على انفاسة لفحت بوجهي
صار گلبي يدگ سريع
كلش اخاف من قربة واكره اللحظة اليتودد بيها الي

العقدة الصارت بحياتي
وصلتني الحالة ما اتجرأ اتخيل روحي ويا او ويا اي رجال ثاني بيوم من الأيام

فجأة همس بـ اذني
- طالعة مثل الفستقة من برة مالحة وتغزر ومن جوة الذ واشهى من العسل

حسيت علي ابتعد
فتحت شفتة ديطب للحمام گمت من مكاني ركض ونزلت جوة

واگفة بالمطبخ اشتغل ويا ريحان والبنات
سمعتة صاح يا الله سون طريق
ما اهتميت بقيت بمكاني چان اسمعة يصيح يم باب المطبخ غسق وينچ بوية

سحبت الشال ذبيتة على صدري وطلعت
چان منطي ظهرة للمطبخ حتى من تنفتح الباب ليصيرن البنات گدامة

- نعم

- من تصير الزفة خليچ ناطرتني
وود ما تنطيها لأي بشر تجي ويانة تسمعين

- صار

- وعودن ما اوصيچ
لبسي شي مستور جوة العباية لا تظلين بـ هالفضايح

- ان شاء الله
تريد شي بعد لو ارجع للبنات

- لا بوية اخذي راحتچ

درت وجهي ادردم ويا نفسي
شنو من بشر هذا والله راح اتخبل يتصرف وكأنو ما صار شي بس لو اعرف شديحس چان ارتاحيت

رجعت للبنات بقينا نشتغل للمغرب
طلعت وياهن لگيت العروسة گاعدة بالصالة ورغم التعب المسيطر عليها بس چانت طالعة كلش حلوة

شمس.. گاعدة بيناتهم مثل الغريبة
رغم العرس عرسي بس يمكن ابعد واحد بيهم چان فرحان اكثر مني

عمري ما تخيلت عرسي راح يكون بـ هالشكل
وين ابوية الدوم يدعي الله يطول بعمري حتى ازفچ للأنسان اليستاهلچ بـ ايدي ؟؟

وين امي الچانت تگول
ما انطيچ إلا الأحسن الزلم واوگف بالباب اگولة اخذت روحي وانت تدري الروح امانة عند البشر وحرام اذا يفرطون بيها

زين وين اخوتي !!
ذولة الچنت مجرد اتخيل اودعهم واروح البيت ثاني يوجعني گلبي

وجوهرة وين عافتني
مو چانت تگول انتظريني اكبر حتى نتزوج سوة ليش اني تزوجت وهي نامت جوة التراب !!

حتى الأنسان الحلمت بي غير عن الواقع
چنت طول عمري اگول ما اتزوج إلا شخص اني اختارة واقتنع بي تالي بسبب الظروف وافقت غصباً عني على شخص ما انجمعت بي غير ساعات معدودة

حتى خطوبة مثل العالم مصارتلي
فجأة وبدون مقدمات راح اصير اليوم مرتة واني حتى بعدني ممتقبلتة

حسيت على احد ديمسح دموعي
رفعت راسي شفتها غسق ابتسمت الها بحزن
ما ادري ليش احس هالبنية بيها شبه مني ع الاقل من ناحية الظلم الشفنا بحياتنا

- لتبچين حبيبتي
الله يرحم اهلچ برحمتة الواسعة بس اكيد هم اليوم روحهم وياچ وفرحانين الچ

- متدرين شگد فراگهم يوجع

- لا والله ادري
اني هم مثلچ فقدت امي وتزوجت ورى موتها مباشرتاً وما شفتها حاضرة بعرسي

بس مع ذالك صبرت نفسي
لأن دوم احس بروحها دايري مدايري وما اريدها تنوجع بسبب دموعي عليها

ديلا مسحي دموعچ وگولي يا الله
هي هاي الدنيا قابل شگد نريد نعيش بيها
اول وتالي كلنا خطار هنا لو شگد ما طال العمر بينة

- يا الله

- خو ما خايفة

- كلش

- سودة علية
خلي اروح اصيحلچ خالة ام هناء الله خالقها مخصوص لهاي السوالف

- منو هاي

- ام المهمات الصعبة سكر محلول بالگلب

- ههههههه

گرصت خدها ورحت صحت خالة ام هناء
فهمتها على وضع شمس واخذتها ورجعنا يمها
ظلت تسولف وياها واني واگفة بصفهم اسمع الكلامها

- ها يمة گالوا خايفة

- اي خالة لأن ما لحگت اتعود على صخر

- بنيتي هذا رجلچ وابو بيتچ
اذا اليوم ما متقبلتة عبن ما معاشرتة باچر تعاشري ويتربع بگلبچ مثل النبض

مو عبنهم گرايبي
لكت الحگ ينگال ما مش خير بهاي الدنيا ما ذبة ربچ بشيخ ضاري وولدة من چبيرهم الصغيرهم

يعني غمضي عيونچ ونامي رغد
انتِ بـ ايدين امينة وصخر زلمة معدل راح يحافظ اعليچ ويحطچ وسط عيونة

شلون اگلچ هيچي مثل الدمعة
ما تطحين منها إلا ما تطيح دمعتة گبلچ وعاد انتِ تعرفين بدمعة الرجال غالية وصعب اتطيح

هي تحچي واني من يمي احس ارتاحيت
هالمرة سرها غريب عجيب
مرات اشك بيها ملاك مو بشر لأن ماكو انسان ولا غلطة وهي كاملة والكمال لله

چانت الحفلة حلوة بشكل
ما ادري عرسي هم هيچ چان بس هسه يلا گدرت انتبه الاجواء اعراسهم الغريبة

لثمانية صاحوا راح يجي العريس
ركضت الغرفتي ع السريع لبست بنطرون وقميص طويل فوگا

ردت انزل باوعت الروحي بالمرايا
خلي امسح المكياج لأن مستحيل إسحاق يقبل اطلع بهيچ منظر حفظت اطباعة مثل اسمي

دخلت للحمام نظفت وجهي وراها غسلتة
نزلت جوة لگيت صخر توة ديطب للصالة وگفت اباوعلهم بفرحة مثل ايام زمان هيچ چنت افرح على فقرة دخول العريس مثل الجهال

شمس.. من طب صخر ما گدرت اباوعلة
ظليت مدنگة وافرك بـ ايدي شگد صعبة لمن الظروف توصل البنية الهيچ وضع

گعد يمي والنسوان يهوسن النة
ما حچة شي يمكن حس بية مرتبكة ومراد يحرجني ويا

شوية واجت عمتة
انطتة الذهب لبسني بمساعدة ريحان وراها قطع الكيك وراح

غسق.. انخبصن النسوان لأن صارت الزفة
بقيت حايرة اطلع وياهن لو انتظر خبر من إسحاق

اخذت ود من الحجية ورحت الغرفة ريحان
دورت على موبايلها ماكو داطلع طبت هي صحت همزين اجيتي

- خير خية

- اريد اتصل بـ اخوچ ضروري

- اي تامرين

راحت للكنتور فتحتة وطلعت الموبايل
دگت على إسحاق شوية واجاني صوتة ها خوية خير

- ها اني غسق

- خيرچ

- اروح للزفة ويا النسوان لو شنو

- لا مو گلت انطري

- شلون اعرف اذا اجيت

- آنه اجي ليچ

- ماشي

- غسق
المكياج ما اريدن اشوفنة اعلة وجهچ

- اي غسلتة

بس حچيتها سد الخط
طلعت ويا ريحان خمس دقايق وطبوا عمام شمس سلموها الصخر ويا الشيخ وطلعوا

طلبت مني ريحان اجي وياهم بس رفضت
الكل راح تقريباً گلت هاي هي معناها مراح احضر الزفة

بعدني ما حاچية طب إسحاق
اشرلي من بعيد ما صدگت شفتة گبالي
شلت ود ورحتلة ع السريع طلعنة سوة چانت الزفة بعدها ممتحركة

دنمشي صاح من بعيد
- ايوووووب

التفتت بفضول
اريد اشوف ايوب هذا منو ؟!!
باوعت علي واحد من گصت إسحاق تقريباً واگف يم سيارة العريس

ايوب.. ها ميزان

إسحاق.. يلا نتحرك

بس حچاها صعد بالسيارة
معناها ايوب هو الراح يزفهم
ركبت ويا إسحاق وتحركت الزفة فوگ الساعتين

بيومها صدگ تونست
يعني من بعد اشهر من الحزن والهم والدموع
واخيراً گدرت اضحك من گلبي حتى وان چنت ادري هالضحكة مراح تدوملي

خلصت الزفة ورجعنا للبيت
عفت العروس بالصالة وصعدت فوگ ابدل الود لأن تبهذلت بالطريق والدنيا كلش حارة

غيرت ملابسها وطلعت
لگيت باب غرفتي مفتوحة استغربت معقولة إسحاق طب ويا هالهوسة ؟!!

مديت راسي ماكو احد بيها
طبيت للغرفة باوعت داير مدايري يعني لو جهال چان لعبوا بيها مو يظل هيچ كل شي على حالة

طلعت منها بس هالمرة قفلتها ونزلت
چانوا ديگومون شمس الغرفتها انطيت ود للحجية ووصيت عليها ألف مرة يلا رحت وياهم

شمس.. دخلت الغرفتي وهاي چانت اول مرة اشوفها
كلش حلوة واللون بعد احلى بنفسجي فاتح مثل ما طلبت بالضبط

ماكو يمي غير البنات
ظلن شقى وضحك بس مچنت اعرف منهم غير ريحان وغسق والباقيات اليوم الي اول يوم اتقابل وياهم

هناء.. هنيالچ عيوني
وگعتي بالشگاية الزينة الله يعين الراح تاخذ تكه الثاني

ريحان.. تكه شني ادري هو نعال
بعدين آنه ما اقبل تحچين اعلة اخوي يمة شحلاتة صهيب

هناء.. چا غير اخوچ طبعاً تمدحي

غسق.. ههههه
هناء وتالي وياچ ادري شمسويلچ وهيچ حاقدة علي

هناء.. نسيتي شلون استقبلنا بالصياح

نهلة.. مو هو حبيب الاستقبلكم

هناء.. اي تالي اجة هو
حتى استغربتهم هم اخوان حبيب وين وهذا وين

غسق.. خالة تعالي اخذي بتچ منا

ثناء.. ههههه
يلا كافي خلي نعوف العروسة ترتاح

امل.. اي ويجي صخر
اليوم يومك يا بطل اليوم تلعب جولة

ثناء.. ههههه ولچ عيب

امل.. چا چذبت
اليوم راح يسويها فشگ طگة واشرد ههههه

ثناء.. هههههه
عزة بعينچ ان شاء الله مو ذني ممتزوجات

بعدهن يحچن صاح صخر يا الله
طبت الحجية ورفعت عصاها يلا الكل لبررررة
طلعن يركضن شوية ودخل هو قفل الباب وتقرب مني

چنت متوترة بشكل
گاعدة ع الچرباية اريد اگوم ما اگدر رجلي متحملني
باوع علية حسيتة مو طبيعي

هزيت راسي بمعنى شكو
چان يگول ما جابتها امها لساع التضحك اعلة صخر وانتِ استغفلتيني وضحكتي اعلي يبت احمد....

يتبع

لتنسووون ⭐⭐⭐⭐⭐⭐