رواية وضاقت الأرض بي الفصل الثاني والأربعون 42 - بقلم لبنى الموسوي

فرغت الغرفة من الكل. طب صهيب وعمة ورى وصته علي وسدت الباب وراحت. ما رفعت راسي ولا باوعت له. أجه گومني من ايدي ورفع وجهي علي. شكله چان گالبها جد حتى ابتسامة ما شفت منه. بعدت نظري عنه، صاح: "تنوعيلي! رجعت باوعت له، صفن بوجهي شوي وراها گال: "أظن هساع صار لازم نحچي." -بخصوص شني؟! -كل شي. زواجنا، البت اللي اتصلت اعليچ، كلامچ ويا أبوي والطلابة اللي صارت بسببه. -لو عندك شي چان حچيته گدام عمي بيومها مو هنا.

-ويا هو الگالچ ما حچيت!!! حچيت هواي من گبل لا أخطبچ وآنه أحچي. -يعني تقصد گلت لعمي آنه أحب بت غير هناء ومع ذلك جبرك عليه مو صح؟! -اگعدي خلنا نحچي. -لا عوفني هيچ مرتاحة. -هناء لا تعاندين من أولها. حچاها وسحبني للچرباية. گعدني وراح جاب الطبلة خلاها گبالي مسافة وگعد عليها. -هاي البت موظفة وياي بالدوام. مطلقة وعدها ثنين جهال، لا أهلها ولا رجلها ناس يخافون الله. هو شوفها الويل.

خيانة، ضرب، مكسرات، حتى جهاله ما سلموا من شره لحد ما وصلت حدها ويا وطلبت الطلاگ. أما أهلها. من عرفوا بيها تريد تتطلگ گالولها: "تريدين ترجعين الوحيدچ ما نگدر نستقبل الجهال وياچ عوفيهم يم أبوهم وردي." وأكيد هي كـ أي أم رفضت هالشي. من هيچ تطلگت وباعت ذهبها، أجرت بي بيت خاطر تعيش بي هي وفروخها. بس فترة وبدت تتعب. عبن صعبة اعلى الحرمة تاخذ دور الرجال. وتشيل مسؤولية بيت كامل وتصير لجهالها أب وأم بذات الوقت.

بدت تدور اعلى شغل خاطر تسند نفسها اعلي. فجأة تعرفت اعلى ذكر ما اگدر أگول عنه رجال عبن ما يستاهل هالچلمة. گاللها: "آنه راح أعينچ وبشهادتچ." بس أكيدن اكو مقابل لـ هالشي والمقابل هو: "أريدن منچ زواج بالسر." بالأول رفضت ورزلتة. وراها ردت لأهلها توسلت بيهم بلكي يدفعون الإيجار اعلى القليل خاطر يخففون عنها شوي من الحمل. بس ما مش بشر منهم بگلبه رحمة.

كلهم گالولها: "هذا اختيارچ وتتحملين، ولو تشوفين روحچ مو حمل المسؤولية ردي جهالچ لرجُلچ وتعاي الوحيدچ." رغم هالشي ما يئست. مشت لطليقها وطلبت منه ذات الطلب. وأكيد هو هم حاله من حالهم صدها وحتى جهاله تبرأ منهم. هنا هي ما ظل الها حل. انجبرت توافق اعلى طلب ذاك الذكر وتزوجته بالسر بعد ما عينها ويانا بالشركة. تحسنت أمورها بعد التعيين. وگدرت توگف اعلى رجليناتها وحتى جهالها جابتلهم بت تگعد وياهم لمن تمشي للدوام.

بس مدة بسيطة ونگلبت الموازين. بدا هالحقير يظهر اعلى حقيقته القذرة وصار يطلب منها شغلات خارج حدود الدين. ما اگدر أحچي بيهن. بس اگدر أگولن هالذكر مريض نفسي وعنده ميول غريبة ما يتقبلها العگل. وخلال هالفترة. تعرفت آنه اعليها عبن هي وياي بنفس الغرفة ثنينه نشتغل اعلى الحسابات. مو بسهولة حچتلي همها. بس صارت هواي شغلات خلتني أشك بيها. من هيچ اضطرت تحچيلي كل شي خاطر تبرر موقفها وما أخذ عنها نظرة غلط.

سويت المستحيل خاطر أخلصها من هالنذل. ونجحت بالاخير انجبر يطلقها بعد مشاكل ما تنحچى ولا تنگال. وبمرور الأيام بدت البت تتعلق بيه. وآنه همينة صرت أميلن ليها بس موش حب مجرد إعجاب وعشرة طويلة تجاوزت السنة ونص. إلى ان بيوم من الأيام. أجتني بنفسها وطلبت نتزوج. ما گلتش ما استغربت، لا استغربت وهواي همينة عبن كلش صعبة لمن البت تطلب الزواج بلسانها. بس تجاوزتها. گلت أكيدن من باب العلاقة القوية اللي تربطني بيها تجرأت وحچت هيچي.

بصراحة آنه ما يهمني. لا طلاگها ولا كونها أم لثنين جهال. المهم عندي هي بت مظلومة وتحتاج زلمة فوگ راسها يدافع اعليها من طمع بني آدم وجشعهم. فتحت ويا أبوي الموضوع. بس گبلها حچيتله كل شي صار وياها. أحسن ما يسأل تالي ويعرف تفاصيل حياتها من الغرب. وهنا چانت الصدمة. أبوي رفض رفض قاطع وگالالي: "لو تنصب ذهب هالبت ما تصير مرة لابن الشيخ." ما خليت شي ما سويته.

حتى إسحاق ترجيته خاطر يحچي ويا عبن هو أقرب إخواني لأبوي بس بلا نتيجة. عجزت تقريبًا وگطعت أملي من السالفة. رديت للبت وگلتلها: "شوفي حياتچ أبوي ما يرضى بزواجنا وآنه كلمة أبوي ما اگدر أثنيها." بس هي ما عجزت. ظلت يوميًا تترجاني أقنع بي لحد ما وصلت بيها طلبت مني نتزوج بالسر. -وتزوجتها؟!!! -أكيدن لا. شني شايفتني ناقص خاطر أسويها. بعدين أبوي ما رضاها لي مرة بالنور يرضاها بالظلمة. -وبعدين؟؟ -بعدين أجيتي أنتِ للبصرة.

وفرد يوم أبوي فتح موضوعچ وياي وگالالي: "رايدك تتزوجها." آنه ما راغبلچ كلش. وبذات الوقت گلبي ويا ذيچ البت وما ردت أظلمكم وياي من هيچ رفضت. أبوي أصر اعلى الموضوع. وحتى يجبرني أوافق ما خلى شي ما سوا. يوميًا دازلي واحد من إخوتي خاطر يقنعني أقبل بيچ بلا مشاكل. ولأن شفته مصر اعلى السالفة. تصرفت من كيفي وصرت أتعمد أغثنچ وأكرهنچ بيه بلكي هيچ تنفرين مني وترفضيني من كيفچ. وحتى يوم الطردتچ من البيت چنت قاصدها.

بس أبوي افتهم السالفة لمن أجيتي وشكيتيني إله من هيچ سواها شغلة عناد وخطبچ إلي غصبًا عني. هساع يمكن تگولين ويا نفسچ. هذا غير رجال اللي ما عنده چلمة وشورة بيدين أبوه حتى بموضوع الزواج. بس مو هيچ الشغلة هناء. آنه وإخواني ربينا اعلى احترام أبوي وما مرة سوى شي ما بي صالح إلنا من هيچ ما مش واحد من عدنا يگدر يردله طلب. حتى إسحاق من تزوج غسق. همينة انجبر اعليها بس ما گدر يرد طلب أبوي.

عبنه يعرف كلش زين هالقرار ما جاي من فراغ بس لأنه صدر من الشيخ ضاري. وزواجي منچ همينة ما أجه من فراغ. عبن بعد ما خطبتچ وويا الأيام شفت بيچ الحرمة اللي تناسبني بكل شي حتى بفيوزاتچ الضاربة. -ورغم خطوبتنا استمريت ويا البت!!! -ما اگدر أعوفنها هناء. البت مالها غيري هساع بس أكيدن مو مثل ما وصلچ. آنه حاسبتها اعلى المكالمة. ومن يومها آنه گاطع وياها حتى يصيرلها درس.

بس مو معناتها أتخلى عنها كلش وأخليها لطمع اللي ما يخافون الله. كل همي أوقف وياها وويا فروخها. لبين ما تلگة ابن الحلال اللي تسند روحها اعلي وراها الله ومحمد وعلي وياها. هذاك ابن الحرام لساع يحوم حواليها. ولو ما آنه ما تفتك منه فـ تخيلي إذا عفتها هساع شراح يسوي حتى يرد يذلها من جديد. -بس هي گالت راح نتزوج آنه وصهيب. -تحچي من كيفها. موش صهيب اللي يكسر بت عمته ومريته بحرمة ثانية. وإذا اعلى وگفتي وياها لهذا اليوم.

فـ كله لوجه رب العالمين ولخاطر بزرتها همينة حتى لا يأذونها بيهم. ولونچ ما مصدگتني. اگدر أنطيچ كلمة رجال وابن رجال. كل شي بيني وبين سحر بالجاي من حياتنا راح يكون گدام عيونچ مثل الكتاب المفتوح. -بس هي تحبك صهيب. شلون تريدني أتحمل أشوفك وياها وآنه أدري بمشاعرها إلك. -هههههه. بوية المهم ما ظل الها مشاعر بگلبي وهذا كافي. -چا ليش هي تحچي بزودها وتگول نتزوج أول وتالي؟ -رادت تخرب بيناتنا.

عبنها تحبني ونجحت بـ هالشي لو ما وگعت أمچ. وطبعًا الفضل الچ. من غير ما تسأليني رحتي شمرتي الحچاية بحلگ أبوي وشعلتي الدنيا. -غرفة الحسابات صهيييب. شكلك نسيت وتحتاج أذكرك من جديد. مو دگت عليك گدامي وگتلك جاوب. وگبلها سمعتك تحچي وياها بغرفتك وأنت حتى ما كلفت نفسك تشرحلي الموضوع. بعدين شلون تريد ما أصدگها. هو آنه ششفت منك بفترة الخطوبة شو بس المشاكل. -عليش تنكرين بوية. يعني هساع ما شفتي شي غير الطلايب مووو.

ارتبكت وگبل غيرت الموضوع. -صدگ هي شلون حصلت رقمي ممكن تفهمني؟ -طلبت جهازي خاطر تخابر للبيت. والظاهر أخذته بـ هالأثناء بس آنه والله ما سكتت وحاسبتها اعلى هالشي. -يعني عندك رقمي؟!!! -أي أكيدن عندي ومن أول يوم خطبتچ. -منين أخذته؟ -ريحان. -هاااا. بس حچيتها گام بـ اتجاهي. سحبني من ايدي گومني لحضنه وحاوط خصري. -أكيدن جاي تسألين عليش ما چنت أتصل بيچ. -لا لأن ما يهمني. -بسچ من المكابرة.

ترى غيرتچ واهتمامچ جاي أشوفنهن بعيونچ يعني ما يحتاج تحچين. -هاي شمالك والله ما تدري شكثر چنت أكرهك. -أي وآنه همينة. چنت ما أطيق أسمع اسمچ خصوصي بـ لسانچ الطويل هذا. -شعور متبادل. -بس آنه تالي حبيتچ. صفنت بوجهه مصدومة. ضحك وباس خدي: "شني ما راح تگولين آنه همينة أحبنك؟ -ليش أگولها وهالشي ما موجود أصلًا. -ما موجود شني هي بمزاجچ بوية؟ -أي بمزاجي. يلا وخّر أريد أبدل وأصلي. بس حچيتها طگها بضحكة يمكن وصلت للصالة. باوعت علي:

"هاي شمالك عليش جاي تضحك؟ غمزلي وگال: "هساع راح تعرفين." دنگ علي ورجع باس خدي. ابتعدت عنه: "صهيب اصبر شوي يعني عرفت ما أحبك وعندك عادي تتقرب مني؟ -هساع آنه أخليچ تحبيني. -لا والله. -أي وحگ ربچ. -بس آنه مجبورة عليك. -أي عادي وآنه همينة مجبور. -لا آنه حتى ما طايقتك مو بس مجبورة. -هساع كل هالمشاعر تختفي من گلبچ وما يظل بس الحب. -شني أنت ليش ما تزعل والله عجيب. -تظنين دروبچ هاي تعبر اعلى صهيب؟

حفظتهن حياتي لا تحاولين وأعرف كل شي موجود داخل هذا.... أشر على گلبي. -صهيب. -بس تراچ دوختيني. حچاها وسحبني لحضنه. يعني بعد كل شي صار ما توقعت هالليلة راح تتم على خير. وآنه همينة چنت ناوية أغثه بالرفض. بس صدمني بكلامه وگلب كل الموازين الصالحة. غمضت عيني بـ استسلام. حسيت علي حضني شوي وأجاني صوته بهمس: "أحبنج يهنائي وحياتي كلها." چنت خايفة كلش.

يعني قبل دقايق چنت أگول هذا أسوأ يوم بحياتي فجأة كل شي تغير وبديت أحس بالسعادة. وفعلًا چانت كلمة الأحبنچ طالعة من كل گلبه. لأن حسيت بـ هالحب ويا كل لمسة من عنده لحد ما أخذني وصرت مرته بكل ما بيه. ابتعد مبتسم گال: "مبروك." دنگت خجلانة بلا ما أرد وگمت ع السريع للحمام. سبحت ورديت للغرفة. لگيت عمتي وأمي واگفات على أعصابهن بس شافني صاحن: "هاي وين صرتي؟ -ههههه. بالحمام غير. سكينة: "بشري ولچ وجت النار لالة؟ -هههههه. سكينة:

"اكتبي في جوجل" تضحك الفطيرة تضحك. -عمة، كل شي تمام لا يظل بالكم. حچيتها ودرت للمرايا أمشط. أدري بيهم چانوا خايفين من ليلتنة بسبب المشاكل الصارت بالفترة الأخيرة، بس حقهم ما يدرون بصهيب شسوة وشلون خلاني أستسلم أله وأنا مغمضة. ظلّن يسولفن وياي لحد ما طب صهيب للغرفة. گبل طلعن، جابت ثناء العشا، سد الباب وسحبني من أيدي. گعدنا تعشينا وراها گمت صليت.

أريد أروح أنام، أستحي. فجأة گام صهيب أخذني من أيدي للچرباية، الظاهر حس عليه. -عليش خجلانة حبيبتي؟ -صهيب، هذا أنت لو مبدليك؟ -ههههه، لا أنا بشحمي وبلحمي. -چا وين چان هالكلام بالخطوبة؟ -حصان هايج ويحتاج ترويض، ما عندي غير هالطريقة خاطر أروّضنه بيها. -ههههه، ترى يگولون مهرة موش حصان. -يابة مهرة ولا يهمچ، بس أحچيلي لساعچ ما طايقتني؟ ابتسمت ودنگت منه. رفع راسي بأطراف أصابيعة: أحچي لا تخجلين. -كافي صهيب والله جاي تخجلني.

-ليش؟ -شني ليش؟ أنت ما معودني عليك هيچ، كل ظني اليوم ليلتنة تخلص ممالخ من الروس. -ههههه، هي هم صارت ممالخ بس بغير طريقة. -ياااا، بس عاد نام والله ما أدري بيك هيچ سرسري. -يابة حرمتي، قابل جاي أحچي ويا صاحبتي حتى تگولين سرسري. باوعتله وابتسمت. توني أريد أنام سحبني لصدره: تعاي لوين شاردة؟ -چا لا تحچي بانحراف. -ههههه، لا يلا راح أگعد عاقل. -زين گلي ليمتة حبيتني؟ -من دخلت بحفلة العقد ولگيتچ مصلخة گدامي.

-ياااا، مصلخة شني والله عيب غير لابسة فستان. -وهو هذا هم تسميه فستان؟ -هاي عمتك أنا شلي غرض. -أي عاشت إيدينها ههههه. -لا صدگ جاوب، ليمتة حبيتني؟ -والله من الحفلة، حتى بيومها تحارشت بيچ مو خباثة بس لأن عجبتيني. -والأوراق الخليتني أرتبهن هم مو خباثة؟ -چا بس أنتِ تتمكيجين وتتعولچين وتربدين باب سيارتي، أنا همينة عندي أسلوبي الخاص. -خبيث والله. -ههههه، الخباثة وياچ حلوة كلش. -ووياك أحلى. -أحبچ. باوعتله ودنگت مبتسمة.

رفع راسي: گوليها عاد. خفيت ابتسامتي وگتله: هي گوة، ما جاي أحس بيها. -والله! -شمالك صهيب؟ شني هي دگمة أشعلها أكرهك، أطفيها أحبك؟ -لا تچذبين، لون ما تحبيني ما چان غرتي عليه. -لا، الغيرة غريزة بالنسوان مالها غرض بالحب. -يعني شني هساع؟ -يعني انطيني مجال، يجوز أحبك بعدين بس هسة مستحيل. بس حچيتها گال: على راحتچ ودار وجهه. تقربت منه أضحك وحطيت راسي على زندة: هاي أنا رجعتلك شوي من خباثتك أستاذ صهيب.

گبل دار وجهه شمرني على الچرباية. قيدني وصار يدغدغ ببطني، إلا شوي أجة گلبي يوگف من الضحك. -كافي الله عليك. -لا تعيدينها بعد. -لا والله توبة، حرمت بس عوفني. ضحك ودنگ باسني من شفتي حيل. رجع تمدد وسحبني على حضنه حتى يكمل مشوار خباثته الچان مشتغلي بيها طول الفترة الراحت. شمس.. دخلت للغرفة بعد ما رجعت من يم هناء. عدلت مكياجي وظليت أنتظر صخر قريب الـ 12 يلا أجه. باوعلي مبتسم. قفل الباب وتقرب عليه،

حاوطني بين أيده: هاي شطالعة شمس دنياي. -صخر. -عيون وگلب ورويحة صخر أنتِ. -أوعدني بعد ما تشك بيه لو مدري شيصير. -لا بوية إلا إذا تسودنت. -ههههه، يعني توبة توبة؟ -توبة وعيونچ منا لآخر يوم بعمري. -اسم الله على عمرك يعمري أنت. -يا الله، يعني أفهم من كلامچ خلص الحصار؟ -أي لأن اشتاقيتلك موت. -أويلي عليك يا صخر يا ابن هيلة، اشتعلووووو. -ههههه، أششش لا تصيح ليسمعوك يمعود. -خلهم يسمعون، ولچ غير أنا عريس جديد واليوم يومي.

-أممم، يعني اشتاقيتلي؟ -آآآخ، بس اشتاقيت، گولي متت من شوگي وحگ ربچ الخلگ هالجمال وسبانة بيه. -أنت ليش لسانك عسل؟ -عبن أنتِ عسل وما يلوگلچ غير الكلام العسل. تقربت بسته من شفته. ما صدگ سحبني عليه بلهفة وفعلاً چان اشتياقه إلي يفوق اشتياقي بألف مرة. غسق.. مليت وأنا أنتظر إسحاق. باوعت للساعة صارت بالوحدة وهو ماكو. ضجت كلش هم من المكياج وهم من الملابس، بس ما ينطيني گلبي أبدل وهو طلب أنتظره بلسانه.

تمددت بيهن أريح راسي من التعب. ما أعرف شلون غفيت ما أحس إلا وإسحاق ديگعدني، فزيت مخروعة. -اسم الله شمالچ بوية؟ -هاي شوكت أجيت؟ -هساع. باوعت بالوحدة ونص. -ليش هيچ تأخرت ظل بالي وياك؟ -الزلم چانوا بالمضيف ما گدرت أعوفنهم وأمشي. باوعتله وسكتت. چان يگول: ليش نايمة بهدومچ؟ -صدگ تحچي؟ -ههههه، لا أكيدن أتشاقى وياچ أدريچ ناطرتني. حچاها وتقرب باسني من رگبتي.

رجع باسني من شفتي، بادلتة المشاعر، گبل رفعني عليه. توها بدت أعراض النفور تظهر عندي دگ جهازه. لگيتها حجة حتى أبعده عني. طلعه من جيبه شفت الاسم "مرو 30"، باوعلي وگام: اطلعي من الغرفة. انسحنت روحي من القهر. دفرت المخدة برجلي وركضت للحمام. مو صوچك صوچي أنا الثولة الگاعدة أنتظرك أستاذ إسحاق. سبحت وطلعت لگيته بالغرفة. نشفت شعري شلون ما چان وتمددت منطيتة ظهري، گبل حضني. -أريد أنام إسحاق. -شمالچ بوية؟

-ماكو شي بس تعبانة، إذا ممكن تعوفني. -أي على راحتچ. حچاها وأنطاني ظهره. ثاني يوم تصرفت وياه عادي وكأنو ما صار شي. عود من أكون طبيعية ومثل كل النسوان. ساعتها إلي حق أغار وأحاسب، مو فوگ عيوبي أصير أنا أم الراهي. ريحان.. صار آخر الشهر وفتحت الموضوع ويا أبوي. يومين ورد جمار الظهر أعصابه طافرة براسه، بس طب للغرفة نزل بيه رزايل. كلش ضاج عبن بلغت أبوي بالموضوع.

وحذرني أتصرف من كيفي المرة الأخرى خصوصاً بالشغلات التتعلق بيه هو وأهله. ما چنت أعرف هيچ نفسه عزيزة. حتى مرت عمي حچت عليه وگالت: هذا عمك شكو بيها لو ساعدك، بس ما أنطانا مجال وسد الموضوع. أيام وهو محتار بهمه. كل شوي متصلين بيه يردون فلوسهم. ويظل يتوسل خاطر يمهلوا البين ما يدبرلهم المبلغ. مرت عمي ونهلة. قررن يبيعن الظال من ذهبهن ويساعدن جمار، ردت أنا همينة أساعدهن بس ما رضى. كلش ضجت. يومين وإحنا متزاعلين على هالسالوفة.

عجزت كثر ما حاولت أقنعه أبيع ذهبي حالي حالهن خاطر أوگف وياه بهالمحنة بس ولا اقتنع. اليوم نزلت جوة بعد ما مشى للدوام. نظفت البيت وظليت گاعدة بالصالة، بس طلعت مرت عمي من غرفتها گمتلها على السريع. -ها يمة صباح الخير. -هلا بنيتي صباح النور. -أريدنچ بموضوع ضروري. -خير إن شاء الله. -إن شاء الله خير، أنتِ تدرين بجمار ما يرضى أبيع ذهبي وأساعده. -أي أدري بيه أبو الراس اليابس.

-وأنا لازم أعينه، ما أتحمل أشوفه حاير وأظل ساكتة هيچ، والله حتى نوم بالگوة أنام. -والنعم من أصلچ ماما، بس شنسوي؟ دتشوفين شلون قافل وميقبل يأخذ منچ شي. -أي أدري، بس اكو حل أساعده بيه بلاية ما يعرف. -شلون؟ -أبيعن حتى لو جزء من ذهبي، وأنطيچ الفلوس تجمعيهن ويا فلوسكم وتنطيهن لجمار. -يوم خاف يعرف وشيخلصنا؟ -لا يمة شي عرفه؟ أنا عندي ذهب خير من الله مستحيل راح ينتبه عليهن. -زين شلون؟

هو يدري أنا ما عندي هواي ذهب ميگول منين جبتي كل هالفلوس؟ -گولي له چان عندي بتوت ضامتهن للزمن، والفلوس همينة قسميهن بينچ وبين نهلة حتى ما يشك زيادة، المهم نساعده. -بنيتي لا تورطيني ويا جمار مالي خلگه. -الله يخليچ يمة فدوة أروحنلچ وافقي. حچيتها ورحت بست راسها. ظليت أقنع بيها أكثر من نص ساعة يلا رضت. وفعلاً بعت ربع ذهبي. صار تقريباً 9 ملايين ونص، أنطت لنهلة مليونين وأخذت الباقي إلها. چنت گاعدة بالصالة.

راحت مرت عمي طلعت الفلوس وسلمتهن لجمار. باوع عليهن صافن. رفع راسه بشك: شنو هاي يمة منيلچ كل هالفلوس؟ -چان عندي 6 بتوت ضامتهن للعازة، وهسة أجة وقتهن. -ريحان إلها إيد بالموضوع؟ -لا أنا شلي غرض، ياريت ترضى أساعدك. -ريحااااان، أحچي الحقيقة بعتي الذهب؟ -لا والله هذاك وينه بالحجرة موجود. -گولي وداعة ابني. باوعتله مرتبكة صاحت مرت عمي: -لا تحلفيها بابنك جمار، وروح أبويه هذني فلوسي وريحان مالها علاقة.

گام صعد للغرفة أشرتلي: الحگيه. صعدت وراه لگيته واگف يگلب بذهبي. أنا تقصدت أبيع الشغلات القديمة الما شايفهن، إما ذهب عرسي ما لعبت بيه أبد. -ها تنوعت؟ هذا وينه الذهب گدامك. يعني همينة ما ترضى أساعدك وهمينة تشك بيه وترزل. -آسف حياتي مو قصدي. -لا تحچي وياي بعد، زعلت. -هههههه، أرجع وأراضيتچ عمري أنتِ. تقرب باس شفتي وطلع. جريت نفس براحة، هم زين عاد عبرت عليه وإلا چان شيخلصني منه. مشت الأيام بهدوء ورجع الدوام.

الحمل تعبني كلش، صرت أغلب الأوقات أغيب. وجمار يجيبلي المحاضرات للبيت أقراهن وأنا نايمة. وصلت للشهر الخامس. أخذني جمار ورحنا نسوي سونار. صعدت على السرير خايفة، مرضي سببلي عقدة كلما أخذ سونار أظل لازمة گلبي خاف يطلع بالجاهل شي مو زين لا سامح الله. ظليت أردد آيات. لحد ما سمعت الدكتورة گالت: -ألف مبروك ماما ولد، والحمد لله صحته عال العال. فتحت عيني بفرحة. ما أدري شلون طلعت لجمار شافني أضحك ركض تلگاني. -ها حبيبتي بشري.

-الحمد لله صحته كلش زينة. -ألف الحمد لله، شوفي حتى بعد لا تخافين بالخالي بلاش. -وولد همينة. -ولد بنية، ما طول أنتِ أمهم أحمد الله وأشكره ألف مرة. -أحبنك جمار وأموتن عليك والله. -مو بگدي يا مريتي الحلوة. رحنا لبيت أهلي بشرناهم. وراها رجعنا للبيت ومرت عمي حارت شتسوي من الفرحة. نايمة بحضن جمار. والدنيا ما شايلتني من السعادة. حاط أيده على بطني يحركها بهدوء ويبوس براسي. -شوكت يجي؟ شو طول هواي.

-هههههه، لساحنا بسم الله يمعود. -كلش متلهف أشوفه وأخذه لحظني. -وأنا همينة، جاي أحسب الساعات مو بس الأيام حتى أشيله بحضني. -أحبچ يا سعادتي وراحتي وكل شي حلو بالدنيا. -وأنا أحبنك يا عشرة عمري أنت. -هههههه، عشرة عمرچ وإحنا ما صارلنا سنة متزوجين. -أي لأن كل يوم وياك بسنة، من هيچ صرت عشرة عمري وأحلى عشرة همينة، كافي فتحت عيوني عليك وعرفت الحب وياك شريد أكثر بعد يا حبيبي. -شو عديها. -هههه شني حبيبي.

-آآآي، وهسة جعت، ديري بالچ تمنعيني أموتچ والله. -ههههه لا ما أمنعنك. ثاني يوم گعدت دايخة كلش. نزلت جوة چانوا گاعدين گبلي عبن تأخرت بالنوم من التعب. تلگتني مرت عمي: -خيرچ يمة شو متأخرة اليوم مو عوايدچ. -ما أدري شو تعبانة ودايخة أحسن راسي راح يطگ. نهلة.. يا عزة أخاف ضغطك. -بس أنا ما عندي ضغط. -شبيك ريحان هو بالحمل يشكل مرات. خلي أقوم أجيب الجهاز أشوفه لك وإن شاء الله يكون طبيعي.

حجتها وراحت جابت جهاز الضغط. قاست لي طلع صاعد كلش العالي واصل عشرين، قبل شهقت. -عزة العزاني! ولك ريحان شلون متحملة هالضغط مو الطفل يتأذى! -لا اسم الله الله ليقولها. -ماما قولي لجمار يأخذها للدكتور اليوم. -أي أكيد لازم تراجع الضغط خطر. وفعلًا أول ما أجا جمار قالت له أمه. تخبل من عرف وما صدق يصير العصر حتى يأخذني. طلع مشكل عندي ضغط الحمل. وظليت باقي الأشهر على العلاج ورغم هيك ما يرضى ينزل لا هو ولا السكر.

أجت امتحانات آخر السنة وبالقوة خلصتها. بالعطلة وصلت شهر الثامن ضغطي وسكري مفولات ويا دكتورة أروح لها ما ترضى تجيبني عَبَن حالتي خطرة ومحد تتحمل المسؤولية. قرر جمار يأخذني لإيران. حجز يم دكتور معروف وقال إذا اضطر الأمر تجيبين هناك. مشيت لأهلي حتى أودعهم. وراها ظليت يم البنات بغرفتي نسولف على الولادة وتجهيزات الجاهل. غسق: شراح تسمي ريحان ما قلتي؟ ريحان: جمار يريد يسمي مصطفى. ثناء: أي كلش حلو هالاسم.

هناء: هم تحسين بحركته؟ ريحان: ههههه، چا شلون 24 ساعة يسبح ولا يهيد. أمل: اللهم صلِ على محمد وآل محمد. هناء: بلا خليني أشوف حبابة. ريحان: هههه تعالي. حركت بطني بأطراف أصابعي ألعب وياه. شوي وصار يتحرك لزمت أيدها حطيتها على مكان حركته صارت تجر بالصلوات. خطية تحب الجهال. بس هاي صار لها 6 أشهر من تزوجت وما الله رزقها بالجهال. هناء: الله يقومك بالسلامة أنتِ وصفاوي يا رب.

ريحان: وأنا راح أدعي لكن جماعي لمن أجيب الله يترس حضنكن بالفروخ. أمل: أنا طلعيني من هالدعاء دخيلك. ثناء: هههه وأنا هم. ريحان: ههههه، لا أنتن صرتن عتيقات أنا أقصد الجدد غسق وهناء وشمس. شمس: الله يسمع منك حياتي. بعدنا قاعدين نسولف. أجت بت إلياس قالت عمي حبيب يصيحك. سندت نفسي على غسق وقمت. طلعت بره لقيته جاي ينتظرني بالباب بس شافني قال لحقيني لحجرتي.

رحت وراه باوع لي بارتباك. حسيت اكو شي ومجاي يقدريحكي قلت له شمالك حبيب أحكي عاد. -أنا يعني معجب بنهلة أخت جمار. -ههههههه والله. -أي عليش استغربتي؟ -لا بس فرحت كلش. قول خويه بشنو تريدني أنا جاهزة. -أكيد ناوي أتقدم لها. بس قبل كل شي أريدك تجسين نبضها خاف البت ما راغبت لي وأتفشل. -والله أجا اليوم الراح أشوف آخر إخواني عريس. -ههههه على مهلك خويه بعدنا ما قايلين يا الله. -شنو آخذها مني. والله توافق ليش وين تلقى أحسن منك.

-الله يسمع منك. -ههههه. لا خويه أنت كلش واقع بالحب مو مجرد إعجاب. -هههه عاد لا تبلشين. تقرب لزم بطني يضحك شلونة حبيب خالة الوكيح. -يبوس أيدينك. دنحكي سمعت صوت جمار قبل طلعت. ظل قاعد يم أهلي بالنص ساعة وراها قام سلم عليهم وطلعنا. وصلت للبيت. لقيت مرت عمي ونهلة مجهزات كل شي حتى الجنط وملابس الجاهل. باوعت لهن بفرحة. -ما أعرف شلون أجازيكن يا أحلى عمة وحماة. -يمه شمسوين قابل أنتِ بنيتي ريحان. نهلة: وأحلى أخت ومرت أخو.

ضحكت ومشيت حضنتهن سوة. خلصت الليلة بحضن جمار خايفة كلش من الجاي. بس مع ذلك عندي ثقة جبيرة برب العالمين راح يوقف وياي ويقومني بالسلامة أنا وابني. ثاني يوم سافرنا. وصلنا للفندق بعد لي يومين وأطب بالتاسع وموعد الدكتور ظل أسبوع تقريبًا. أول يومين خلصتها نايمة من التعب. طبيت للتاسع ووضعي مثل ما هو السكر والضغط واحد يتسابق ويا الآخر ويقول أنا أعلى منك.

ثالث يوم جنت متمددة. قال جمار جهزي أوراقك آخذهن للمستشفى علمود أعرضهن على الدكتورة وأنتِ هم تحضري حتى تزورين ويا أمي. جهزت فحوصاتي وبدلت. تقرب مني يضحك حط أيده على بطني ها شلونة ابني الوكح. -والله يسلم على أبو. -شو ما يتحرك؟!! -أي هي حركة الجاهل تخف بالتاسع. ظل يلعب ببطني ويتحارش بيه. بالخمس دقايق وهو يحاول ويا لحد ما تحرك أخيرًا قبل ضحك وباس بطني. رجع باسني من شفتي حيل وحضني.

-ما ظل شي حبيبي وبعد لا تحبلين لأن أخاف عليك. -الله كريم بـ أيد ربك. -يلا أمشي. زوري واطلبي قومتك بالسلامة مراد من أبو محمد. -ما يقصر إن شاء الله. طلعنا سوة. وصلني لغرفتهم وراح. لقيت مرت عمي ترزل بنهلة لأن ما تقبل تجي ويانا. -ماما والله تعبانة. راسي يموتني ما أقدر أتحرك شلون ترديني أزور. -عوفيها يمه. أحنا شو ظالين إذا ما زارت اليوم تزور باچر أهم شي ترتاح. -شعدها هسة بس تطلع يختفى الوجع.

-هو شنو نملة حتى يختفي. المهم لا تضوجين عود جمار من يأخذ ريحان مرة ثانية أروح أزور وياهم. -بكيفك والله ما أظل أتوسل بك. راحت تبدل ونهلة تمددت على السرير. مشيت يمها حطيت أيدي على قصتها شمالك نهلة بشنو تحسين. -راسي ما نايمة زين. هسة بس أرتاح شوية يخف الوجع. -سلامتك حبيبة. -الله يسلمك حياتي. بين ما كملت مرت عمي نهلة نامت. طلعنا تمشينا مسافة بالعشر دقايق جان تصيح عمتي ياااا نسيت الجوزلان.

-يلا ما يخالف نرد نجيبه لساعنا قريبين. -أي لازم. الفلوس بيه شلون نصعد تكسي. رجعنا نتمشى. وصلنا يم باب الفندق قعدت مرت عمي على الصبة. -كافي بعد ما أقدر أتحرك تعبت. -ظلي هنا وأنا أجيبه. -تندلين؟ -أي شنو السالفة يمه هاي وينها الحجرة. -لعد هاك المفتاح. وفتحي الباب على كيف خطية نهلة نايمة لا تخليها تحس عليك. -أي يمه صار. -ما أوصيك بعد. طُبي على كيف جيبي الجوزلان وتعالي على السريع أنتظرك هنا أنا. -أي تآمرين أمر.

أخذت منها المفتاح ورحت. بالقوة أمشي دايخة من الضغط ومنا بطني صايرة شكبرها. وصلت للغرفة ومثل ما وصتني. فتحت الباب بهدوء كلش سمعت أصوات غريبة خلت الشك يدخل الرأسي. مشيت بلا ما أطلع صوت. ولاني أشوف ذاك المنظر اللي ما راح أنساه طول حياتي. منظر جمار ونهلة بوضع أي رجال ويا مرته نايمين سوة وماكو شي يسترهم غير هاي الباب.