رواية وضاقت الأرض بي الفصل الثالث والأربعون 43 - بقلم لبنى الموسوي

#وضاقت_الأرض_بي

للكاتبة #لبنى_الموسوي

اللهم انتَ حسبي
حين تضيق بي الحياة
وانتَ المنتصر
حين يغلبني الوجع
اللهم انتَ عوني ونجاتي
حين افقد الحيلة
ورجائي حيث لا رجاء لي قبلك ولا بعدك 💔

اخذت منها المفتاح ورحت
بالگوة امشي دايخة من الضغط ومنا بطني صايرة شكبرها

وصلت للغرفة ومثل ما وصتني
فتحت الباب بهدوء كلش سمعت اصوات غريبة خلت الشك يدخل الراسي

مشيت بلاية ما اطلع صوت
ولني اشوف ذاك المنظر الما راح انسى طول حياتي
منظر جمار وي نهلة بوضع اي رجال ويا مرتة نايمين سوة وماكو شي يسترهم غير هاي الباب

لحظات ما اگدر اوصفها
الشي الجاي اشوفنة بعيوني مايخش العقل والصدمة چانت اكبر من استيعابي

كضيت الحايط
احاول اظلن واگفة على طولي
حسوا علية سحبت نهلة الفرشة سترت بيها عارهم المالة ستر

گبل جمار صاح
ريحان اترجاچ خليني اشرحلچ لأن السالفة مو مثل متتصورين

تقربت منة وآنه اخوط برجلي خوط
لزمت ايدة احاول اوصلها الوجهي عبن ايدي ترجف ومالي طاقة بـ هاللحظة احمل الريشة من الگاع

نزلت دموعي ويا ما بستها
جمار گلي انتِ بحلم الله يخليك حاول تگعدني
صحيني ترى جاي اختنگ ولون ظليت هيچ تخسرني آنه وابنك بفرد ساعة

- اهدي حبيبتي
بس اهدي وخليني افهمچ ليصيرلچ شي

- ولك شيهديننننننننننننني
انت واختك يااااا عااااااار انت واختك يا ساااااقط

انسحبت من الغرفة بلاية وعي
سديت اذني بـ ايدي خاطر احجب صوتة النگس عن مسامعي وهو يصرخ وراي

ما گدرت امشي
كل شي بية خرج عن حدود الطبيعة
جسمي يرجف راسي يوجعني نفسي صارت تلعب عيوني ما اشوف بيها بعد وخشمي طگ دم طب بين سنوني

اكيدن هساع يلبس ويجي وراي
يعني مستحيل الحگ اطلع الباب الفندق
اكو ممر قريب على الغرفة بي زاوية تحجب النظر گعدت وراها

ثواني وطلع يركض
خليت ايدي على بطني احاول اصبر بـ ابني شوي خاطر يتحمل كل هالتعب عبن لو صارلة شي امووت

ما ادري شكثر مر وقت
ساندة ظهري ع الحايط ورافعة راسي ليفوگ احس روحي تريد تغيب عن الوعي بس لساعني صاحية

سمعت صوتة رد للفندق ويصيح ريحااان
مسحت خشمي بردن العباية ومديت راسي شفتة جاي يدور بالممرات

غمضت ودعيت يارب كون ما يلگاني
فجأة سمعت صوت مرت عمي جاي تصيحة رديت اتنوع عليهم اريدن اعرف السالفة شني

- شبيك جمار

- ريحان
ريحاااااان شرجعها للفندق مو طلعتن سوووووية

- ما ادري تيهتها بنص الطريق ورجعت حتى اشوفها

- عفية عليچ والله
مو حضرتچ اول مرة جاية الايران حتى تتيهين مرتي

- شصار احچي

- مو وكتچ ااااااابد مو وكتچ يمة

حچاها وراح يركض
باوعت المرت عمي ظلت تتلفت على الممرات شوي وردت للغرفة

سندت نفسي بطرف الزاوية وگمت
الحمامات قريبة رحت اغسل البين ما جمار يبعد عن المكان خاطر اگدر اطلع منا بسلامة

باوعت النفسي بالمرايا
وجهي احمر بشكل والشفايف زرگ والدم صابغ حتى ملابسي

حاولت اغسل شگد ما اگدر
خشمي جاي يطگ چبود مو مجرد دم عادي

سحبت الكلينس نصة وطلعت اتمشى
بس شني الدرب صار علي شطولة يمكن ربع ساعة يلا وصلت الباب الفندق

خطوات باردة بمشاعر اشبه بـ النار
مثل الحامل جبل على ظهرة ومضطر يمشي بي مسافة لحد ما يوصل البر الأمان يلا ينزاح هالحمل عنة

ضاگت بية الدنيا
ما ادري وين انطي وجهي والمن اشكي وجع صدري وياهو اليگدر يساعدني وينتشلني من هالضياع

بلاد غريبة وادم غرب
انسانة عليلة تحمل بجوفها روح بريئة حياتها هي ويا مهددة تنتهي على ساعة بلاية ذنب

باوعت داير مدايري
بسم الله الرحمن الرحيم
وايوب اذ نادى ربه أني مسني الضر وأنتَ ارحم الراحمين* فاستجبنا لهُ فكشفنا ما بهِ من ضر واتيناه اهلهُ ومثلهم معهم رحمة من عندنا وذكرى للعابدين

ربي أني مسني الضر وانتَ ارحم الراحمين
ربي أني مسني الضر وانتَ ارحم الراحمين
ربي أني مسني الضر وانتَ ارحم الراحمين

رفعت ايدي الترجف مسحت الدم عن خشمي
باوعت من بعيد تكسي جاي يجي بـ اتجاهي رفعت ايدي اشرتلة وآنه حتى ما عندي فلوس انطي

وگف يمي گبل صعدت ويا
تحرك وعيونة بالمرايا ما شالهن مني ابد
عبن شكلي يجيب الشك بالدم التارس وجهي وحتى ملابسي

حچة وياي بالأيراني ما فهمت علي
دار وجها اشر على خشمي هزيت راسي اي اعرف ما فهمت منة غير كلمة وحدة عراقي جاوبتة اي

اشر بـ ايدة وين ترحين
صفنت ما ادري شني اجاوبة اذا آنه نفسي ما اعرف وين اروحن

رجع سألني
گتلة اخذني للامام الرضا هز راسة اي يعني افتهم علية

ظليت صافنة ع الجامة والكلينس على خشمي
ما احس إلا السيارة وگفت باوعت المرقد صار گدامي زين هساع شلون وآنه ما عندي كروة انطي ؟!!

نزعت حلقتي قدمتها الة
صفن بوجهي شوي ودفعها علي يعني ميريد گتلة مو ماعندي فلوس اشرلي ما اريد

جاي انزل رد صاحني
درت وجهي شال باكيت الكلينس انطانيا گتلة شكراً ومشيت

اباوع للمكان اول مرة اجي لهنا
ما اعرف منين اروحن وشلون ادخل ليجوة ظليت اتبع النسوان لحد ما وصلت للباب

حفظت الطريق وتمشيت للمغاسل
غسلت زين وحتى ملابسي طبيت ليجوة شطفتهن خاطر اصلي وراها دخلت للصحن

ويا دخولي سمعت الاذن ارتفع
گبل صليت وآنه جاي اسجد رجع خشمي طگ دم

ما اعرف شلون صليت
وما ادري هالصلاة راح تنقبل لو لا لأن لا دموعي النشفت ولا خشمي الوگف

سحبت القرأن من الرف ورچيت ظهري ع الحايط
دموعي جاي تحرگني والخنگة حاجبة النفس عن صدري ومجاي افكر غير بـ ابني وبس

طلعت سورة التوبة وبديت اقرا
الطفل صار يتحرك حيل لزمت بطني اقرا وابچي بحرگة حتى ما اعرف شلون اروحن للمستشفى وهم ما بيهم واحد يحچي عربي

فكرت اتصل بـ اهلي
صح ما اعرف شلون بس بلكي الگة واحد يفتهم علية

صدقت ورديت القرأن المكانة
تمشيت مسافة دخت ومنا جسمي يرجف اجيت اوگع لو ما المرة كضتني فجأة

باوعتلها وبچيت
ظلت تحچي ايراني وآنه فاصلة عنها
اخير شي گعدتني وراحت صاحت زلم يمكن بالأمنية مال العتبة

كلهم يحچون ايراني
اريدن افهم عليهم كلمة ماكو اشرت ع الموبايل وحطيت ايدي على اذني

گال عراق
هزيت راسي بـ اي
كتب الرمز وانطانيا آنه حافظة رقم ابوي وامي وبس عبن الباقين دوم يغيرون ارقامهم

اريد اكتب رقم ابوي ماكو
يادوب اكتب رقمين وانسى الباقي معقولة صار بية زهايمر

حاولت ويا رقم امي نفس الحالة
رفعت راسي وبچيت مجاي اتذكر ارقامهم
ظلوا يحچون وياي بس ماافهم عليهم شوي وصاحوا الواحد عراقي

- ها خوية خيرچ

ما صدگت لگيت واحد من عدنة
- الله يخليك خوية
اريد ادگن اعلة هلي بس ما جاي اتذكر الرقم

- لعد شلون ؟!! 
زين انتِ ويامن جاية لهنا معقولة وحدچ

- لا مو وحدي
بس عفية ساعدني اريد اوصل الأهلي

- هاچ موبايلي حاولي تتذكرين رقم واحد منهم

لزمت الموبايل
بالعشر دقايق احاول وماكو جزعت باوعتلة امسح بدموعي ماكو ما اتذكر

- حامل !!

- اي

- عندچ ضغط مو

- وسكر همينة

- ولسه گاعدة هنا

دار وجها حچة بالايراني وياهم
بدت طاقتي تخلص بعد ما اگدر اوگف على رجلي وراسي عبالك يريد ينفجر حتى اذني صارت تصوفر

شوي وگومني
سندني النسوان وطلعنة لگيت الأسعاف بالباب

صعدوني واجة هذا العراقي ويانة
حطيت ايدي على بطني ابچي يمة فدوة تحمل ما ظل شي ونوصل

الي مطمني لساعني احسن بحركتة
رفعت راسي ليفوگ عيوني صارت تغوش فجأة صار منظر جمار ونهلة گدامي

الله ياخذك يا نگس
لك ويا ااااختك ما لگيت غيرها خاطر تفرغ نزواتك بيها

والله لو خايني ويا عشر نسوان
چان اهون بألف مرة من هالمنظر الشفتك بي يا عرة الزلم

ما اريدن اتذكر
ما اريدن صورتهم القذرة تصير بعيوني
اريدن بس اوصل للمستشفى واجيب گبل لا اموتن وآنه بحسرة ابني

ظلوا يشتغلون فوگ راسي
اشوفهم انخبصوا بعد ما قاسولي الضغط والسكر

اكيدن لگوهن معلگات
هن بالأيام العادية ما ينزلن هالنوب اكو طلابة مثل هاي

ما ادري شلون وصلنة
حالتي كلما جالها جاي تصير اسوء واسوء
بكل شي ما احس بعد لا عيوني لا اذني حتى جسمي نمل وخدرت اطرافي وكأنما انشليت

دخلوني للصالة واجة الدكتور يركض
رد طلع ما ادري شني حچة ويا العراقي شوي وطب يسألني ويامن جاية

- وحيدي

- شلون يعني وحدچ ؟!!
خوية ترى وضعچ خطر يعني ميگدرون يتصرفون من كيفهم لأن تصير عليهم مسؤولية لازم واحد من اهلچ يجي علمود يوقع

- ميصير آنه اوقع

- ما ادري اشوف
وضعچ صعب لازم يتخذون اجراء سريع وإلا تصير كارثة

- اهم شي ابني عايش مووو

- اي عايش الحمد لله

بس حچاها طلع
باوعت من بعيد شكلة جاي يقنع بالدكتور حتى هويتة طلعها وسلمها الهم

شوي ورد
سألني چم سؤال واخذ معلومات عني وراها انطاني الورقة وقعت

گبل اخذوني الصالة العمليات
ظلوا فوگ راسي مخبوصين يمكن جاي يحاولون ينزلون الضغط والسكر لأن حالتي ابد مو مال عملية

هنا آنه تعبت ع الاخر
ضعف تركيزي صارت آلام ببطني حسيت حرارتي ارتفعت گلبي گام يدگ سريع واخر شي صرت ما اشوف حاجة گدامي

خلص ريحان
قاومتي هواي وتأذيتي اكثر
صار لازم تعوفين هالعالم النگس وراچ وترحين العالمچ النقي العالم الخالي من غدر البشر ونگاستهم عالم ( الغيبوبة)

غسق.. ايام مرت وحياتنا نوعاً ما هادئة
بعد زواج صهيب صار بالبيت حس فكاهي بوجود هناء بيناتنا

خلصت العطلة ورجعنا للدوام
بعد شهر تقريباً صارت حفلة التخرج مالت شمس وحبيب

كل واحد منهم سوا دعوة لمجموعة
اني وصخر وإسحاق دعتنة شمس اما الشيخ وصهيب وهناء دعاهم حبيب والباقين ما قبلوا يجون

تونسنا كلش بيومها
ظلينة ببغداد يومين وراها رجعنا للبصرة
وبـ هاليومين ما خلينة مكان يعتب علينة ما رحنالة بحيث نرجع بلليل ننام على وجهنا من التعب

بعدها التهينا بـ الامتحانات
شمس چانت تمنع صخر يروح البغداد لأن تخاف علي من الطريق

وهو هم ما راد يشغلها عن دراستها
لذالك اكتفى بالاتصالات لحد متكمل هالسنة على خير وتتخرج

خلصت الأمتحانات واجت العطلة
صار وقت ولادة ريحان ولأن حالتها خطرة وماكو دكتورة تقبل تجيبها اخذها جمار الأيران منها تتعالج ومنها تجيب هناك

بـ 11 ونص گاعدة اعزل بالكنتور طب إسحاق
سلم وشمر شي ع الميز بقيت اباوع علي بفضول سمعتة يضحك

رفعت راسي شبيك تضحك
اشرلي بـ ايدة تعاي عفت كل شي وگمت اباوع للميز

ركزت هذا يمكن جواز ؟!!
باوعتلة مبتسم معناها يقبل اشوفة ركضت شلتة وانصدم بجوازي

- هاي شنو إسحاق !!!

- مو اجت العطلة گلت اخذچ ونسافر تغيرين جو

- صدگ والله

حچيتها وشمرت نفسي بحضنة
ضحك وباسني بگصتي رفعت راسي اي وين راح نسافر

- بكيفچ وين ما تردين آنه حاضر

- امممم
شنو رأيك نروح الأيران هم نزور وهم نكون يم ريحان ساعة ولادتها

- ايران ايران

- زين شوكت

- اسبوع ارتب اموري بالشغل ونسافر

- ياربي والله ممصدگة فرحانة فرحااااانة

- ههههههه
دومها ان شاء الله بوية
بس عليش هالفرحة شني اول مرة تسافرين

- اي
هو اني اصلاً ما چنت اطلع حدود الحلة تريدني اطلع خارج العراق

صفنت ويا نفسي
صدگ إسحاق شلون طلعت مستمسكاتي واني يمهم بحكم الميتة

- شلچ غرض ما يعصى اعلة الميزان شي

- لا صدگ
بس اريد اعرف مطلعيلي شهادة وفاة لو لا ؟!!

- لا بوية منين يطلعون من شيب الخلفوهم
الشغلة موش لعبة يحتاجلها مستشفى وعزة وصخام وين بيهم حظ هذولة

- لعد شنو
يعني هيچ مجرد گالوا للعالم ماتت وسووا گبر رمزي

- اي

باوعتلة وسكتت
هسه على شنو ادوخ راسي بهيچ اسئلة المهم راح اسافر وهذا كافي

بدل وتعشى وراها اتصلنة بريحان
حچة شوية وياها وانطاني الموبايل اخذتة  منة حتى ابشرها بجيتنة

- الوو ها ريحان

- هلا بمرت اخوي الغالية شلونچ

- اني زينة
المهم انت وصفاوي شلونكم ان شاء الله بخير

- بخير خية الحمد لله
اخر هالاسبوع موعد مراجعتي يم الدكتور

- تجيبين هناك مو

- اعلة الغالب اي

- لعد اسمعي هالبشارة
اني واخوچ راح نجي الايران هم نزور وهم نكون يمچ ساعة الولادة

- احلفي بربچ

- ههههه والله حتى اني انصدمت مثلچ

- واليمتة تجون بشريني

- اسبوع مو اكثر
يعني ان شاء الله قبل الولادة تلگينة يمچ

- الله يفرح گلبكم كثر ما فرحتوني

- يعمري ليش چم ريحان عدنة

- غسق گليلها تبلغ جمار يدزلي عنوانهم بمسج

- سمعتي

- اي سمعت هساع اگللة

بقيت احچي وياها دقيقتين وسديت الخط
بيومها من الفرحة حتى ما گدرت انام رغم بساطة هالشي بس بالنسبة الي چان حلم ما تصورتة يتحقق بيوم من الأيام ويا اهلي

هناء.. باچر غسق وإسحاق يسافرون الإيران
خلصت الليل يمها راح تمشي واكيد راح اشتاقلها عبن هي اقرب وحدة الية بـ هالبيت

صارت الـ 12 اجة إسحاق
سلمت عليهم ورجعت الغرفتي لگيت صهيب جاي يباوع فلم سحبت المخدة حطيتها بحضنة ونمت

- شو تعطلتي حبيبتي

- چنت يم غسق اودعها قبل لتسافر

- وما اشتاگيتيلي

- طبعاً اشتاقيت

دنگ باسني ورجع يباوع
ظل يلعب بشعري وآنه كل شوي اسأل هذا شنو وهذا منو لأن اجيت على نهاية الفلم

12 ونص دگ جهازة
طفرت من حضنة رحت الدشداشتة طلعت الموبايل سحر جاي تتصل

فتحت الخط وجاوبت مثل العادة
- ها سحر

- هلو هناء شلونچ

- الحمد لله بخير

- عفية ابني حرارتة مرتفعة كلش
بلكي صهيب يجي ياخذة للمستشفى ما اگدر اروح وحيدي

- ما عندة غير العافية
هاچ هذا صهيب وياچ... انطيتة التلفون

- الو نعم
خير سحر آنه مو گلت لا تنيمهم اعلة التبريد

خوية جهال وين يصمخون بالغطى
يلا ماشي هساع بس ابدل واجيچ مسافة الدرب

سد الخط وراح للحمام
گعدت ع الچرباية شوي ورجع يبدل هي صح حالة انسانية بس غيرتي شيقنعها

لبس محابسة واندار يمشط بشعرة
صارت صورتي گدامة بالمرايا باوعلي وابتسم درت وجهي عنة

شمر المشط واجة گعد يمي
- شمالچ حبيبتي عليش ضايجة فهميني

- روح الابنك صهيب شعندك گاعد يمي

- هههههه
آنه ما عندي ابن هساع بس ان شاء الله يصيرلي منچ بعدين

- لا تتأخر

- لا وعيونچ
بس اخذة للمستشفى ينطوا علاج واردن بوجهي لهنا

- ترى ما راح انام انتظرك

- صدقة للتنطر زلمتها

حچاها وباسني حيل
ابتسمت بوجها سلم وراح ظليت انتظرة قريب الساعة ونص يلا رد

غسق.. صارلنة يومين نتصل بريحان وتطلع نايمة
باچر موعد سفرتنا جهزت كل شي من الليل وتمددت يم إسحاق

گبل اخذني الحضنة
صار يسألني ع الغراض خاف ناسية شي
بس اكدت الة كل شي تمام ونمنة من وكت لأن ورانة گعدة من الصبح

ثاني يوم بالعشرة ونص موعد طيارتنا
صارت گعدتي يم الشباك خايفة كلش اول مرة اصعد بيها

شوية وانطلقت
اول ما بلشت تصعد لزمت ايد إسحاق وغمضت
حسيت گلبي راد يوگف من الخوف دقيقة واختفى هالشعور

فتحت عيني لگيتة يباوعلي ويضحك
دنگت بخجل لتباوع هيچ ترى ممتعودة ع الطيارة

- ههههههه
لا تخافين من شي وآنه جارچ

- اي اكيد بس هالشي صار لا ارادياً
انت متعود لأن دوم تسافر بس اني هاي اول مرة

- وان شاء الله موش الاخيرة

باوعتلة وابتسمت
خلص الطريق بسرعة حتى ما حسيت بي
يمكن لأن فرحانة بسفرتي وباجواء الطيران الاول مرة اعيش بيها

وصلنة للفندق
اخذ رقم غرفة جمار ورحنالهم
دگ الباب اكثر من مرة محد جاوب اتصل بي مغلق!!

رجع دگها حيل
انفتحت الباب البصفها وطلعت نهلة جريت نفس براحة عبالي صاير شي وياهم

- ها إسحاق الحمد لله على سلامتكم

- الله يسلمچ خوية
شني وين جمار ادگ وماكو حتى جهازة مقفول

- ريحان جابت صارلها يومين

- شلون يعني صارلها يومين ؟!!
چا ليش كلما ادگن اعلي يگلي نايمة شني معناتها حاچيننني

- ما ادري روح للمستشفى واسألة

- فوتي غسق وياها البين ما اشوفنهم واردن

- لا عفية اخذني وياك والله بالي يم ريحان

- ود تعبت تحتاج تنام شوي

- اي عادي اخليها يم نهلة تنومها

- اي بعيوني

- تسلم عيونچ بت عمي
چا يلا تناوليها منها وخلنة نمشي بالعجل

حچاها ودخل الجنط بالغرفة
وصلنة للمستشفى سأل على اسمها گالولة بالعناية

تخبل إسحاق
شني يعني بالعناية وهي الها يومين من جابت

راح يركض
اريد الحگ بي ماكو وصلنة الأول الممر شفنة جمار وامة گاعدين ع الكراسي

اول ما شافنة گام متفاجأ
بس شنو عيونة رايحة مبين علي ديبچي  وهالشي خلانة نخاف اكثر واكثر

- اختي شني صابها جمار

- ما بيها شي لتخاف وليدي

- مرت عمي اترجاچ
جاي اسأل جمار واريدنة هو اليجاوب

- ريحان جابت الها كم يوم

- چا عليش من ادگن اعليك تگلي نايمة ؟!!

- ما ردت اخوفكم ويانة

- من شني نخاف اذا هي جابت والحمد لله

- إسحاق ريحان دخلت بغيبوبة اثناء ولادتها

من گد الصدمة
إسحاق ما سيطر على توازنة ورجع استند ع الحايط

باوعت الجمار
گعد ع الكرسي وحط ايدة فوگ راسة
اقتربت منة بخوف احچي الطفل بي شي جمار

- لا
بس بالخدج حالتة هو الثاني خطرة

لحظات صعبة مرت علينة
شگد چنة خايفين على ريحان بس ابد متوقعنا هالشي راح يصير

راح إسحاق للدكتور
نص ساعة ورجع مثل البركان رفع جمار من ياختة ورگعة بالحايط

- ريحان جاية للمستشفى الوحيدها
لا وفوگاها موقعة العملية اعلة مسؤوليتها فسرلي هالشي گبل لا ابتلي بيك

- شبيك إسحاق ؟!!
طلعت ويا امي تزور وتهيت الطريق
اكيد لأن تخربطت نقلوها للمستشفى وبين ما وصلت الها لگيتها موقعة وداخلة للعمليات

- يعني شلون تيهت
ما جاي تخش العگلي احسن سالفتكم مو خالية

- والله هذا الي صار حتى روح اسأل امي

- ماشي جمار ماشي
تگعد اختي ويصير خير ان شاء الله

احتار إسحاق شلون يتصرف
يريد يگول للشيخ بس بنفس الوقت متردد
خايف علي من الصدمة لأن يدري بمعزتها بالنسبة للكل

ظلينة على هالحالة اكثر من اسبوع
كلما يتصلون إسحاق يجاوب ويتحجج بأي شي علمود ليخليهم يشكون ولأن كلهم واثقين من كلامة چانوا يصدگوا

ود ظلت يم ام جمار واختة
كل يوم العصر ياخذني الهم إسحاق اتطمن عليها وارجع للمستشفى

الطفل وضعة مو تمام
اليوم رحت شفتة من بعيد فدوة صح ناعم بس يشبه ريحان گبل نزلت دموعي

سودة علية ريحان
ما لحگتي تشوفين هاللحظات الحلوة رغم شگد چنتي متلهفة الها كلما تسولفين وياية

حتى جمار ما چان فرحان بي
مگابل الغرفة مالتها وگاعد يبچي انكسر خاطري علي لأن ادري بي شگد يحبها

إما إسحاق صار يروح ويجي ع الدكاترة
واگف يمي وموبايلة بـ ايدة ما اعرف عليمن ديتصل شوية وگال ها ضبع شلونك

- اسمع خوية
جاي ادگن اعلة صخر بس يطلع مقفول
اريدنك توصلني بي بلاية ماتخلي ابوي يحس اعليك

ايوب لا تسأل
اختي دخلت بغيبوبة وفرخها حالتها خطرة

اي والله هذا الي صار
استعجل خوية اريدن صخر ضروري ناطرك لا تشتلني

شمس.. رجع صخر من الدوام تعبان
تغدة وغلق جهازة حتى ينام للعصر اندگت الباب بهدوء

گمت لبست الحجاب وفتحتها
- ها حبيب

- صخر لساعة نايم

- اي خير تريد اگعدة

- اي والله ياريت عبن ايوب ناطرة بالباب

- صار تتدلل

رديت الباب ورحت يمة
- صخر حبيبي گوم ايوب بالباب ينتظرك

فتح عيونة
- خير ان شاء الله

- دگوم شوفة وان شاء الله خير

گام لبس ملابسة وطلع
شوية ورجع مخبوص صاح وين جهازي گتلة ذاك ع الميز

ركض فتحتة واتصل
- ها إسحاق
لا تگولها خوية فدوة رحتلك

هاي اليمتة وليش محد خبرنا
اي اي گول،، لا ما يحتاج آنه عندي واحاول ادبر حجز مستعجل

لا خوية ما اتعطل بلاية ما توصيني
اوگف اوگف الجاهل شلونة.. ألف الحمد لله يلا الله وياك

سد الخط وركض طلع جوازة
- صخر احچي شبيها ريحان

- دخلت غيبوبة

- عزززززززة

- اشششش
لا يسمعونچ ديري بالچ تخبرين احد بالسالفة

- اخذني وياك عفية

- وين يمعودة

- فدوة والله گلبي راح يوگف عليها

- هاچ تنوعي جوازچ ساقط يحتاجلة تجديد

حچاها وگام ديطلع
رجع باوعلي لا تحچين عن سفرتي الايران راح اگللهم سفرة تخص شغلي.. وخلة وطلع

غسق.. ثاني يوم اجة صخر
طول الوقت الدكاترة يم ريحان يحاولون ينزلون سكرها حتى تستجاب للعلاج وتفيق من الغيبوبة

بعدهم يحچون ويا الدكتور
درت وجهي متفاجأة هذا ايوب شجابة لهنا ؟!!

طخيت إسحاق بـ ايدة
- هاك باوع گدامك منو اجة

- ايووب هاي شجابك ؟!!

صخر.. اجة وياي نسيت اگلك

ايوب.. ما گدرت اعوفنكم بهيچ مصيبة

إسحاق.. ما تقصر يخوي
بس شني يطلع بـ ايدينة حتى احنة ما بينة نتصرف

ايوب.. الجاهل خوبن ما بي شي

إسحاق.. بالخدج وضعة تعبان مثل امة ادعيلهم

ايوب.. الله يگومهم بالسلامة يخوي

إسحاق.. امين يارب
جمار امشي وياي نروح للدكتور نشوفة شني يگول شكثر ونگدر نردهم للعراق

جمار.. يلا امشي

راحوا يسألون نص ساعة يلا رجعوا
سألة صخر ها بشر گاللهم اكو امل منا اليومين تفيق من هيچ لازم ننطر شوي

صار اكثر من عشر ايام على ولادتها
اليوم گاعدين يم الباب مثل العادة على امل اكو خبر يفرحنا بسلامتها طلعت الممرضة تركض

شوية واجة الدكتور
دخل يمها بالعشر دقايق وراها طلع يضحك

كلنة ركضنا علي ممصدگين هالابتسامة
حچة ويا إسحاق بالايراني والفرحة واضحة على ملامحة

فجأة اندار على صخر
گعدت اخيتنة يصخر گعدت شمعة البيت يخوووي
وحضنة يضحك....

يتبع

لتنسووون ⭐⭐⭐⭐⭐⭐