رواية وحوش بشريه الفصل الثالث عشر 13 - بقلم Rozaya1122

#البارت الرابع عشر
#وحوش بشريه
#روزايه

شعاتب والعمر ورگه بخريفك طاح
تهز عمري وتطيح سنين من عندي
ظلمه وخيط اسود وابره عد عميان
وعفتني بنصهم انزف زرفو چبدي
ياسگف البنيته من الشمس لشتاي
بحر تموز اجيتك شفتك مندي
وشگلك من شفت ظعنك مشه لبغداد
المسيح من انصلب ماصرخ بگدي
انأ شايل جنازه من ابجي عذري وياي
بجيت ارثي الشباب الراح من عندي
وهذن دمعاتي سالن وي بياض العين
حسبالك نوارس حطن بخدي

اريد ادفعه لزمته من قمصتله العسكريه
حسيته تعمق اكثر بالبوسه ولحيته الخفيفه وشواربه ادغدغني وهو على نفس المكان يبوس وانفاسه تلهب بركبتي...

بسرعه دفعته ويه دفعتي صارت سعاد امه بوجهي ...
شهكت على اثر صوتي التفت رافد..
الموقف محرج رافد نزل راسه ويمسح بشعره..

سعاد: ها بنت سناء مختليه بالرجال وتبوسين بي ياعيبه العيبه ابيت الشيخ وتمارسين الفاحشه

رافد: يمه شنو هالحجي
سعاد: يا ابن الشيخ يا الضابط شسميهه هاي يارافد ابن بطني شكول للشيخ ابنك وبنت اختك يمارسون الفاحشه يافضيحتج يا سعاد

رافد: شلزكتي بالفاحشه نصي صوتج وشمه اني احبهه وتدرين كلش زين مو اليوم باجر هي على ذمتي لا تصيحين ولاتعبين نفسج وهذا الموضوع ماينفتح سمعتي يمه ..

التفت عليه كال روحي لبيتكم شاف حالتي من الفشله ما اعرف  شحجي خدودي حمر ومفعول البوسه بعده بجسمي  ...

عفته وطلعت اركض شكد الجو بارد بس اريد اذب نفسي بالشط حته ابرد هم حصلت كتله من براء وهم رافد وبوسته الي جسمي احسه خدران وهم سالفه سعاد ياربي دخيلك بسلا تحجي لخالي ويصلخ جلدي

امشي وحالتي موطبيعيه كل اعظائي ترعش من اثر لمسه رافد من ارتباكي وسرعتي انظربت بالباب وما ادري

رجعت لكيت شهد تنتظرني تسالني شسويت وشبيج صافنه

واني بعالم ثاني شحجي رحت هداده على براء تالي انكتلت وتخزيت  لو اكلج مارست الفاحشه على كولت سعاد ...

خطيه شهد من شافت ما مني فائده عافتني وراحت
ركضت على المرايه اباوع لشكلي رغم السحله الس انسحلتهه بس شكلي صار حلو  خدودي حمره اتلمست مكان البوسه شكد حلوه

بس خفت من سعاد خاف تحجي لخالي وتصير كتلتي عمل شعبي ما ادري شلون اجه قيصر ابالي شلون سويت هيج وسمحت لرافد يتقرب من عندي

جنت بحاله فوضى عارمه ونزاع بين قلبي وعقلي
عقلي يريد رافد ويكول قيصر مو الي ومايفيدني وكلبي ينادي بأسم قيصر وبعده عايش بعالم الاوهام

ضليت كل ما يندك الباب افز اكول هسه يجي خالي سلمان ويعرف بالصار

صار الليل وكولشي ماكو هدوء ياشمه ياغبره شوكعتي نفسج بمصيبه فوكاهه شهد راحت وما اعرف شصار وياهه خاف براء اطلع حيفهه بشهد وهاي المسكينه توكع بيهه

تذكرت بوسه رافد جسمي كزبر سطرتني سطر انعل حظج ياغمه كلبج يدك لقيصر وعقلج يريد رافد ادري انقسم نصين

صار الليل  وجنه كاعدين وسمعت صوت خالي سلمان بالباب لو متت احتاجيت الحمام بلحظه يمه اكيد سعوده حجتله وراح يطيح حظي اريد انهزم من كدامهم بس خالي مايقبل واحد يكوم وهو جاي

دخل خالي ورافد بس جان طبيعي خالي حته سلم عليه ولاكأنما صاير شي حاله حال الايام البقيه

انتبهت على رافد غمزلي وابتسم يمكن شاف حالتي من الخوف والهلع هذا شبي رافد اليوم صاعده عنده المشاعر فول

طول ماكاعدين يسولفون واني عيني على رافد
اتفحصته شبر شبر...

لابس دشداشه كريمي وكاعد بالكاع وطابك المخده ومرتجي عليهه ملامحه تخبل كلساع تجي عيني بعينه واخجل تصرفاتي كلهه خارجه عن المعقول شجاني اليوم تخبلت مدري براء ضربتني على راسي وخلتني افقد خيط

انتبهت على نفسي امداج شمه هم تريدين تحبين وتنصدمين مو كلتي راح ادرس وانجح اشو من اول بوسه وكعتي...

كمت من يمهم لان راح افضح نفسي رغم هذا اليوم مملي بالمغامرات بس فرحانه بي كلما اتذكر نظره رافد وبوسته ابتسم واخجل...

حسيت على نفسي بهاي الايام افكر برافد هوايه واشتاقله من يروح عيني على الباب شوكت يرجع ..
وما ابطل سؤال عنه رغم هو ملتهي حته من يجي مااشوفه هوايه

شغله الولد المات تقريبا انسدت رافد عنده معارف واعتبروهه عداوه بس اهلهه ماسكتوا واخذوا فصل من خالي سلمان ومحد عرف منو السوه هيج بس خالي هواي شغل حراس على البيت والبستان...

مرت الايام طبيعيه مشاعري مخربطه بين قيصر وبين رافد بس اكثر وقتي افكر برافد والي خلاني انشغل بي اكثر كلام شهد

كالت اله كلمته بالبيت والكل تهابه حته امه ماتكدر تحجي ويا ومحاسب براء على الصار بهذاك اليوم وامه ابد ماجابت سيره للموضوع بس من تشوفني تخزرني بس ماتحجي تأكدت بوقتهه صدك رافد هيبه وشخصيه...

بيت عمي حسين ما اروحلهم هوايه لان اسماء تمتحن سادس علمي وضرغام يشتغل ببغداد بشركه واتجنب قيصر حته ما اشوفه ولا اعرف اخبارهم

خطيه ضرغام عاف القريه وسكن بغداد ويجي صدفه يشوف امه من اسأله يكول  شهد خانكتني كل يوم احبهه اكثر بس مابيدي شي ابتعد احسن ما اتعذب الف مره باليوم واني اشتم انفاسهه ويه الهوه
...

صادف شهر السادس وظهريه الجو حار وسمعنه طلقات من بيت عمي حسين بدت تركض الزلم ويصيحون شكو واحنه فزينه والكل لازم كلبه

بس سمعنه صوت هلاهل وهوسه معناتهه اكو فرحه
شويه وكالو اسماء بنت حسين ناجحه بمعدل 95
وهاي ابوهه حرك الجو اول ابنيه من القريه اطلع هيج معدل موبس قريتنه كل القرى المجاورتنه اسماء طلعت الاولى على المدرسه

شكد فرحتلهه بهذاك اليوم واشكد استحسفت نفسي شلون اسماء درست ونجحت وشلون اني مشيت بدرب عاثر من ورا حب قيصر تالي ماحصلت غير شلعان الكلب

ثاني يوم عمي سوه غدا جبير فرحان بيهه يكول رفعت راسي اكثر من قيصر لان هذاك ولد بس هاي بنت والكل جان يلومني ليش اخليهه تدرس ونفسهم الي لاموني هسه اجو باركولي ويكولون قره عينك........

فرحه عمي حسين بحد ذاتهه سعاده كلساع يجي يبوسهه ويكولهه ماضاع تعبي بيج وخليتي الكل تحمد بتربيتي ..

ادحك على اسماء الفرحه مرسومه رسم على وجهه
واخوتهه فرحانين بيهه وكلساع واحد يجي يبوسهه ويشاقيهه...

من هاي اللحظه قررت اعوض مافاتني وابدي اجد واجتهد حته اشوف هاي الفرحه والكل تباركلي بس ما اعتقد راح تصيريلي هيج فرحه لان اسماء عدهه ام واب واخوان وهيج فرحولهه شمه منو تفرحلهه علاهن لو امي...

بدت اسماء تحظر بنفسهه حته تنتقل لحياه ثانيه وهي الكليه طلع قبولهه صيدله جامعه الانبار واني بديت اداوم بصف الخامس مثل ماكال ضرغام صيري عاقله ابد ما الي علاقه باحد حته ماعندي صديقات مجرد سوالف ارجع من دوامي ابدي اقره الي تكفل بيه ضرغام هو المسؤؤل عن دوامي مرات هو ياخذني ومرات يدزلي السايق مالتهم

بس الفلوس والملابس هاي على رافد ابد ماخلاني احتاج شي شكد ارجعهن وما اخذ ويهددني يبطلني واخذ منه  دائما يكول من تتعينين اخذهن منج

شويه بدت حياتي تستقر حته كمت احب حياتي وعندي طموح وهدف لازم احققه
مرت هاي السنه حيل هادئه لاشفت امي ولا اخواتي لان امي كل سنه تجيب طفل وبالمناسبات دائما تصادف جايبه

رافد يبني بيت بصف اهله وتقريبا راح يكمله ودائما من يشوفني يكول ماظل شي بس يكمل البيت نتزوج

اما قيصر خطوبته طولت واسمع من اسماء دكول بلسم يوميه تخابر على امي دكولهه قيصر مايقبل نتزوج يكولهه بعد ما اعرف شبي قيصر وشنو يفكر

صرت صف سادس علمي ودراستي زينه بيهه اكثر واحد وكف بجانبي هو ضرغام ورافد لو ابقى طول عمري ما ارجع قطره من تعبهم عليه
...

سنه 2009 الشهر الثاني جنت كاعده بليل اقره سمعت صوت خالي سلمان بس ما طلعت لان عندي امتحان
شويه واجت شهد كالت ابوي الشيخ يناديج
شمه: طلعت سلمت لكيت الكل مجتمع اول ما اجت عيني على رافد ابتسم بوجهي ما عرفت هاي الجمعه على شنو؟؟

سلمان: بنيتي شمه انتي كبرتي ومايهون علينه خيرنه يروح للغريب واليوم اني بنفسي جاي اخطبج لرافد

شمه: ضليت متفاجئه ومرتبكه اتذكرت كلامه من كال ما اناسب علاهن وعدهه ولد عم ومرجعهه الهم ردت احجي بس اتذكرت تعب رافد عليه مايستاهل افشله كدام اهله ومبينه سعاد جايبيهه كوه

سلمان: ها بنيتي شكلتي ليش سكتي
شمه: موافقه خالي بس اضل على دراستي ماضل على امتحاناتي شي
من كلت هيج سعاد كامت تنفخ جنهه تنين وخالي سلمان ماعجبه الحجي بس مبينين يخافون من رافد

سلمان: بعد القرار لرافد مو النه
يمه دزي خبر لامهه الجمعه االخطبه خلي تفرح ببنيتهه

شمه: من كال امي ضجت ما اريد اشوفهه اصلا نسيتهه التفتت على رافد شفته ملتهي يحجي ويه خالي نعمان

رحت للغرفه واني ما اعرف السويته صح لو غلط ما انكر بعده حب قيصر معشعش بداخلي بس ياترى اكدر اسعد رافد واكون بس اله؟؟

دزو خبر لعمامي وبوقتهه صارت يوم القيامه علينه علاهن كالت اطلع بالسلاح اطشر بيت سلمان بنتي ما انطيهه الهم لو تنكلب الدنيا شكد ادخلت ناس ومافاد راح تجي الجمعه واحنه على هذا الوضع خالي

عمي حسين ادخل وكال اتوكلوا وعقدو باقرب وقت ترى امي ادور مشاكل بس كلبي ما مرتاح وخايفه علاهن ماتسكت وما اعرف شنو العداوه البناتهم

رافد التحق وكال الجمعه الصبح انزل حته نعقد العصر جنت متردده كلساع اريد ابطل واخاف احس استعجلت بهاي الخطوه بعدني احمل مشاعر لقيصر وخاف اضلم رافد وياي...

صليت ودعيت وسلمت امري لله هو حسبي وكفيلي الي بي صالح يقدمه دعيت اتخلص من حب قيصر ويطلع من بالي بعد ماجنت ادعي يصير من نصيبي

شكد تمنيت بهاي الايام امي لو اختي ويايه اشكيلهه حالي واسولفلهه بشنو افكر وتساعدني صعبه حيل ابنيه تتخذ قرار بدون نصيحه امهه

ادحك بالوجوه اريد وحده احجيلهه وتنطيني رايهه وتنصحني حايره المن احجي شهد نفس عمري واكيد تنحاز لاخوهه اسماء من يومهه وساعدتهه دكول قيصر مايفيدج

ردت انسانه جبيره ام اخت خاله عمه تنصحني واطمني بس مالكيت احد يفهمني غير سجادتي
ضليت يوميه اصلي وادعي الله يدليني الطريق الزين ...

بعد يومين عن خطوبتي صادف ثلاثاء اجه خالي سلمان صاير نار ويحجي على عمامي وحملني اللوم جان صوته عالي واسمعه صدك انقهرت بوقتهه اتمنيت رافد موجود حته يدافعلي...

سلمان: والله يايمه اني هالزواجه ماريدهه خطبت اجباري علمود وليدي والا اني من الاساس لا اريد شمه ولا اهلهه

الحجيه: حسك ياسلمان واتقي الله البنيه مايوم طلعت منهه عيبه تحملهه ذنب ابوهه وعلاهن ليش ترى هم عندك بنات ياسلمان وخاف ربك بيهه

سلمان: واليرحم والديج يمه زواج من نسل علاهن عسا لا تم شنو صار اسبوع اتوسل بعمامهه الهتليه حته يوافقون وهي كلهه فلسين ماتسوه

الحجيه: سلماااااان الزم السانك لا والله اغضب عليك هاي شمه تسوالهه الف مره ما مأذيتكم البنيه ليش هيج تكرهه ربيتهه انت وابنك على اديكم شلون هيج تطعن بيهه ياعيبه العيبه

سلمان: بنت علاهن ما اريدهه تعرفين شنو اكرهم احب حسين وولده بس ما اريد اناسبهم
دحكتي يا يمه حسين عنده 4 ولد مافكر يخطبهه لواحد من ولده لان هاي شمه ما ارتاحلهه علاهن النسخه الثانيه

الحجيه: الظاهر نسيت نفسك ياسلمان وماعرفت تسولف بعد حرامات يسموك شيخ وانت ماتوازن الحجي كوم ارجع لبيتك لو ما ادري بابنك يحبهه جان اني منعه هالزيجه لان انت ماتستاهل وحده مثل شمه تصير جنتك

شمه: سمعت كلامهم بالحرف الواحد شكد جنت مقهوره زاد الالم بداخلي الف مره

فكرت اروح لعلاهن واكلهه توكف هالخطبه بس اتذكر رافد وفرحتهه واتراجع تأذيت حيل ليش يشبهوني بعلاهن شمسويه اني

ما اتحملت الي سمعته بسرعه ركضت على بيت عمي حسين اريد افتهم شكو وليش عمامي مايقبلون

لكيت ضرغام يرش بالحديقه البرا سلمت علي واني عباره عن جبل من الهموم

ضرغام: مبروك شمه سمعت بخطبتج من رافد
شمه: ضرغام تعال احجيلك لان راح انفجر

ضرغام: انفجري وخلصيني صار اسنين تريدين تنفجرين وانتي كولشي ماكو

شمه: بديت احجيله كولشي حته عن كلام خالي وكلبي يعتصر من الالم...

ضرغام: شمه اكو عداوه بينج العمام وضحيتهه احنه بس اذا تريدين نصيحتي تمسكي برافد لان يحبج وقيصر راح انسي راح يكون حياه جديده ويستقر وانتي تبقين على حالج

لذلك وافقي برافد احنه بهذا الزمن اخذ الي يحبك ولاتاخذ التحبه
وبالنسبه لخالج هذا يخوط بصف الاستكان لو ما رافد اله كلمته ما اجه خطب وهو الممنون خلي يحجي ويسكت

اما علاهن اني اكولج مراح تسكت البارحه احنه يمهه وكابه عدهه للستار ماقابله وخالج يدز بهالشيوخ الهه لان يخاف من رافد

شمه انتي اشبه باليتيمه ووحيده وعايشه بغابه وحوش محد يوكف بجانبج اذا وكعتي
رافد رجال بمعنى الكلمه راح يكدر ينسيج قيصر وابو قيصر تمسكي بي يا شمه ..

رجعت من ضرغام مرتاحه هذا الانسان علاج بالنسبه الي كل مره اروح محمله هموم وارجع فارغه الله يكتبلك السعاده ياضرغام

صار العصر وشهد يمي والحجيه ضايجه من كلام خالي ضلينه نضحك بيهه ونتشاقه لان كلبهه طيب وتحبني

سمعنه صوت خرط مال طلقات وصياح الزلم شعلوه طلعنه نركض جان نشوفلك علاهن لازمه الرشاشه وتضرب بالجوا وهاي الزلم واكفه وراهه

طلعوا خوالي يركضون عيونهم براسهم وهم يشوفون علاهن واكفه جنهه اسد ولازمه السلاح بيد وحده والثانيه متروسه محابس وتهدد بيهه

اتجمعت علينه الناس والحراس يطردون وماكوا كلهه تباوع على قوه علاهن وصلابتهه ووكفتهه عبالك امر لواء

علاهن: ولك سلمان وحق من حق الحق اهدم بيتك على راسك اذا حجيت عليه
ولك ذاك اليوم صرت ابن البارحه ودكول علاهن مخرفه وما امشي بكلامهه
لاعبالك صرت شيخ ادوس على شيختك برجلي

سلمان: ام حسين اذكري الله ورجعي لبيتج ما يصير اتجاوز على حرمه مو من شيمنه
شيخ حسن اخذ امك عيب منا الوادم ادحك علينه

عمامي يسحبون بيهه ويريدون يرجعوهه وهي جنهه صل...

علاهن: اسمعوا كلكم هاي القريه تسمع وتشهد الي يمس شمه بنت ابني بمكروه ادفنه بمكانه وما اخليله كبر ولكم اذا نسيتوا اني الشيخه علاهن

وانت سلمان تلم السانك لا االمه الك بطلقه وحده احفظ شيباتك ولاتخلي مره تهينك بكاعك
ماتستحي وين ماتكعد تجيب طاريه ولك لا لبالك ما اعرف شتخطط وشتسولف عندي عيون حته بفراشك
سمعتني لولا....

سلمان: امشي يا ام حسين ردي لدارج والجابلج الحجي هذا جذاب ونمام ما احجي على حرمه اني...

شمه: اباوع لعلاهن لزمت السلاح وكامت تخرط بي خرط خلت الزلم ترعب وبعدهه توجه بالكلام وتهدد وخالي مثل الارنب كدامهه

بعدهه الناس مجموعه والفشله شكبرهه وعمامي صارو بنص هدومهم يجرون بامهم وهي واكفه تتعارك حته يخافون من تصرفهه خاف تفشلهم

النسوان واكفه ادحك نسوان بين علاهن من جهه واحنه من جهه والمنا ومنا يسجلون الاحداث

بلحظه اجانه صوت قبل مايفزز علاهن فزز كلبي..

اااي اعرفه هذا صوت قيصر لان رف كلبي من سمع صوته...

قيصر: ام حسين نزلي هذا الشايلته بيدح ورجعي للبيت لازم نسيتي نفسج وانتو عمامي الواكفين  حمايه الهه ما استحيتوا ...

علاهن: قيصر انت......
قيصر:  لادكولين قيصر وارجعي للبيت لاتخليني انزل من قدرج بين هاي الناس

شمه: معقوله هاي علاهن بسرعه نزلت السلاخ وبوجهه للبيت وعمامي الطليان حسن ومحسن يركضون وراهه

موبس اني تفاجأت كلهه ضلت صافنه شلون قيصر كدر لعلاهن وسمعت كلامه حته ملامحهه تغيرت مبين صكار علاهن قيصر بذاته

بدت الحراس اطرد بالناس وقيصؤ اشوفه يعتذر من خوالي واسمع النسوان الوراي يحجن بقيصر وهاي الي دكول سبع والثانيه دكول صدك رجال المفروض هو الشيخ

مندمجه اسمع وبعدني بحاله صدمه اجه نوفل كال  قيصر يناديج

اريد امشي عبالك رجليه مشدوده بحبال كلما ابدي اوكف على رجليه واتعافى من حبه يرجع يوكعني مره ثانيه

طلعت برا لكيته واكف هو وخالي نعمان من شافني استأذن من خالي واجه صار قريب عليه حته بدون سلام كال

شمه سؤال واحد وجاوبي بصراحه انتي.....

#يتبببببببع