رواية وحوش بشريه الفصل الرابع عشر 14 - بقلم Rozaya1122

#البارت الخامس عشر
#وحوش بشريه
#روزايه

على رموشك كحل ، من حزن ودموع
او على وركة خريفي افراح نديّت
ياعين التشيلك يا شمس آب
اشيلنّك جمر لو الك صديّت
فداك الراح كله ، او انذر الجاي
او عمت عينه اليكلك يوم ضحيّت
يا آخر ملاذ ابشحة الطيب
او بيت انته او فداك ايروح كل بيت
.....

قيصر: شمه سؤال واحد وجاوبي بصراحه انتي مقتنعه برافد محد جبرج على هذا الزواج؟؟

شمه: لا محد جبرني اني مقتنعه من ذاتي..

قيصر: علاهن ماتسكت وعبالهه انتي مجبوره لذلك سألتج حته اوكف بجانبج وتزوجين لان رافد خوش ولد ويستاهلج...

شمه: كولش قهرني وضجت منه ومن كلامه 
لا يا ابن عمي اني مقتنعه برافد وما الكه احسن منه وكف بجانبي طول هاي السنين ودائما يحميني ...

ومن شفتنه اخر مره كتله ابن عمي قيصر ما يقبل على كولتك نلتقي بالختلات وهاي وفه بوعده وخطبني وجان الي مأخره بناء البيت لان ميكعد ويه اهله...

قيصر: هاهي بيهه الخير ماكو احسن من رافد نأمن عليج يمه رجال ونعم منه..

شمه: عافني وراح ضوجني كلامه وجاي يسهل زواجي حضرته صدك ضجت منه شايف نفسه مغرور حته خشمه يابس امداك كلبي اشفت بي وحبيته ماخذ الناس بالعين الصغيره

ماشفت اي شي بعينه ولاحته مقهور واني مصدكه نفسي شكد ثوله ...

مال هسه انزع النعال ودك على راسي ياغبره ياثوله ياشمه ضيعتي كل هاي السنين وانتي متعلقه بحب من طرف واحد

اخذت نفس عالي وزفرته وغميت بيت علاهن وبدربي براء لان شباكهم كبالي غميتهم وطبيت جوه...

مر اليوم بين تهديد سلمان وتهديد علاهن واغلب الحجي يرجع عليه وسعوده لعبت لعب هي وبلاء بتهه وهذنيج الحيايه الكبار المتزوجات

كلساع اسمع حجي شكل شنو نذل نفسنه من ورا شمه وبس هاي بنيه وووووو....

كومه حجي سمعت لحدما صارت الجمعه موعد الي مقرر جان يوم الخطبه واني حته فستان مامشتريه
ولا ادري شلبس....

سمعت من شهد على اساس رافد منطي فلوس لامه وكايلهه خلي تشتري ملابس وهاي سعيده ماخذتهن

فوك القهر والظيم راحت جابتلهه خيط اخذت قياس اصبعي وهي اشترت الحلقات على ذوقهه 

حلقه عاديه يسموهه صب كولشي مابيهه حته ما اعرف بيش ومنين بس الي ادري بي رافد مامقصر مخلي فلوس وهي بحجه ماعدهه احد شمه صارت كفيله

يوم الجمعه الصبح كعدت الساعه ب8 لكيت خالاتي جايات والبيت هوسه ادحك على نفسي بعدني بدشداشتي كولشي مامسويه

خالاتي كلهن متزوجات قريب بالقريه والي قريبه على القريه بس خاله وحده متزوجه بالمدينه وبناتهه دارسات ...

امي الحنونه ما اجتي طلعت حجه جهالهه عدهم مدارس  ...

واخواتي المثقفات هم ما كدرن يجن وكل وحده طلعتلهه حجه ابد ما اهتميت واصلا فرحت لأن ما اجني ما اريد اشوف اشكالهن وتمثيلتهن..

رحت للحمام سبحت وبديت احضر بنفسي شويه
كولش هادئه وطبيعيه قيصر شلته من بالي ولا اريد اسمع بي كل فكري مشغول برافد

لان هو الانسان الوحيد الي يستاهل الفرحه محد قدملي الي قدمه رافد يارب كون اكون على كد المسؤؤليه واسعده بحياته ..

كاعده اشسور بشعري هو طويل لحد الورك ولونه تمري تقريبا مو اسود ..

اجتي شهد جايبه علاكه  بيدهه
شهد: شمه هاي دزتهم اسماء الج بيد اخوهه وسام..

شمه: فتحت العلاكه لكيت فستان اوف وايت طويل واردانه كيبور كولش حلو وبي فتحه جانبيه وحذاء نفس اللون وعلبه مكياج كامله مابيهه اي نقص

وقراصه كلهه ورد شكلهه مستطيل بيهه تصير بجانب الشعر

من شفتهن دمعت عيوني ياحبيبتي يا اسماء ماتكدر تحظر الحفله بس مانستني ومشتريتلي من الراقي

جنت حايره شلبس يريدون يجيبولي فستان من بنت عمي حسن  لان قبل فتره انخطبت

محد تذكرني ولاكالوا هاي شراح تلبس مع العلم رافد مخلي فلوس بس امه كالت نسيت الفستان ما اشتريته يله هي كلهه ربع ساعه وقابل رافد ماشايف شمه...

اجبر نفسي ما انقهر بس موبيدي الاحداث الي تصير اطلع الواحد عن طوره وتخلي الحزن كوه يسيطر ....

صفنت ويه نفسي لو وحده من بناتهن اليوم خطوبتهه جان هسه ماخلن شي ما اشترنه

حته خالاتي الي يكولون الخاله حبيبه طلع كله جذب ما وحده دخلت لغرفتي وكلفت نفسهه وسألت شمحتاجه

معقوله طبعهن هيج لو بيه السبب واكثرهن منتحسات شلون رافد يخطب شمه وماخطب من بناتنه ...

تقريبا الساعه صارت 11 الصبح كالت اجه رافد  ماطلعت ولاشفته بيبي نوريه كالت اثكلي شويه
وخلي يشتاقلج

رافد مايدري بسوايه علاهن محد مخابره الا اجه يله عرف  علاهن ماسكتت وكلساع يجي واحد يجيبله سالفه...

بعدهه مستمره تهدد ودكول بس يجي الشيخ الله مايخلصكم افركش الخطبه

الي سمعته رافد كايل اريد اشوف شلون مره تمشي كلامهه براسي اخطب اليوم لو تنطبق السما على الارض وعلاهن خلي تجرب تفتح حلكهه  بحرف واحد

وقيصر محذرهه خاف تسوي مشكله من ناحيه علاهن كلبي مطمئن لان قيصر موجود وهي تخاف منه..

صارت الساعه 4 العصر  واني واكفه صافنه على نفسي بالمرايه فستاني كولش راقي مبين من بغداد مكياجي نازك سوته الي بنت خالتي من المدينه  لابسه حذاء كعب عالي رفعت شويه من شعري والباقي نازل وخليت الي مثل القراصه كلهه ورد بجانب شعري...

بهاي اللحظه كل فكري مشغول برافد نسيت قيصر نهائي خاصه بعد ماسمعت كلامه الاخير

حضرته جاي يسهل زواجي استحقرت نفسي شلون فكرت بي واني عندي شخص مثل رافد

كل هاي السنين واني معميه بحب فاشل عانيت وسهرت وحدي دمرت نفسي ومستقبلي بسبيل كذبه خلقتهه لنفسي..

خلصت مراسيم الخطبه وكالوا راح يدخل رافد
كلبي يدك سريع ولحظات خجل على ارتباك

اول مره  راح يشوفني هيج لابسه وشويه الفستان دلعه وبي فتحه من الجانب كلساع الم رجليه لان طالعه رجلي كلهه

دحكت بالوجوه محد واكف يمي لا ام لا اخت حته خالاتي كاعدات ويدحكن  شهد مدري وين راحت تقدم ضيافه

البنيه بهذا اليوم كل حبايبهه وصديقاتهه واكفات يمهه واني وحيده من طفولتي لحد الان ويجوز اضل وحيده طول العمر...

سعاد وبناتهه كاعدات حته ماتقربن مني والوضع ماعاجبهن وخاصه من شافني لابسه هيج فستان

رادت تلبسني مال عربان حته الكل يكول فستانهه مو حلو وقديم بس اسماء ماقصرت وخلت فرحتي اتم بهاي الخطوه

بدت الهلاهل والهوسات تعلن دخول العريس
رفعت راسي شفته يبوس براس الحجيه ...

لابس بنطرون اسود وقميص سمائي على كولت المصرين ماكل حته منه وهو حنطاوي طالع كولش حلو...

الفرحه مبينه علي والضحكه تارسه وجهه تقرب عليه كال مبروك كوه طلعت مني الله يبارك بي ...

لبسنه الحلقات وباسني من راسي من الخجل والارتباك فقدت الاحساس والمشاعر ماحجه شي ضل كاعد شويه وطلع

كولشي صار بسرعه بدت خالاتي يباركلي وسعاد وبناتهه ماكلفن نفسهن واجن اني هم ماردت اضيع فرحتي ما اهتميت. 

بين ماكملت الحفله وبدت الناس تروح الي بيته قريب راح والبعيد يبات

اجت مرت خالي نعمان كالت شمه  رافد بلاستقبال تعالي....

امشي واتعثر بالكعب العالي والفستان طويل والفتحه شكبرهه شلون راح اطب هيج وهذا مايكعد راحه الضابط

اول ماطبيت سدت الباب مرت خالي هو جان مدنك بس سمع الباب وكف اشوف نظرته مو راحه بيهه كل معاني المكر وسواس الشيطان...

تقرب عليه واني متصنمه بالباب لزم اديه اثنينهم ويدحك عليه واني خجلانه ومنزله راسي..

رافد: تعالي شمامتي شبيج واكفه مصدومه؟؟
شمه: لا هنا احسن لا يجي احد..

رافد: يابه تعالي لاتخافين ما آكلج

شمه: رافد كلهه كاعده برا عيب شيكولون..

رافد: لعنه على علاهن اسكتي حته من صرتي حلالي وحاطه العيب بالنص يابه ما اريد شي بس اشوفج ما شفتج زين  لان جانت هوسه..

شمه: هاك شوف هي شمه نفسهه ومخليه حمره
من كلت هيج تقرب اكثر صرت بين اديه ولزمني من خصري بحركه هادئه

احس خدودي كامت اطلع نار شراح يخلصهه اليوم هذا ماناوي يعوفني..

لا رافد مو هيج بعدنه بسم الله ابتعد خلي اطلع..

رافد: شبيج ترجفين على كيفج تعالي بس احضنج
ما اريد شي..

شمه: لمني بحضنه وايده تتحرك بهدوء على ظهري وايده الثانيه تتغلغل بشعري حسيت براحه موطبيعيه ..

كولشي بالحلال حلو واخر شي الصار استغفر ربي حته يسامحني ما ادري شلون غلطت وسوسلي الشيطان وسمحتله...

باسني من راسي واخذني من ايدي كعدنه على القنفه
الفتحه فضحتني

وهو عينه عليهه ساعه تصعد عينه على صدري وساعه تنزل جوه  نظراته وحده تخلي الواحد يرتبك

رافد: صار شكم سنه وريتي كلبي ور كلما اشوفج كل اوضاعي تتخربط ما اجه اليوم الي ترحميني بي

شمه: رافد اريد احجي وياك بموضوع..
رافد: احجي ياروح رافد

شمه: اني اريد اكمل دراسه الله عليك موتبطلني وخالي مايقبل واني والله شاطره مو كسلانه مثل قبل انطوني فرصه ادرس

رافد: اسمعي شمه اني المسؤؤل عنج مو ابوي لا سلمان ولا عشيره كامله تكدر تفرض رايهه عليه كتلج اخطبج غصب عنج وعن علاهن وهاي هالخطبتج وراح اكلج ادرسين وتكملين وهم غصب عن الكل

يجوز بعدج ماتعرفين رافد زين الي كلمه وحده لاتنعاد ولااتراجع بيهه من هاي الناحيه اطمئني

بس ياشمه اريدج تتغيرين ما اريد مشاكل ويرجعون يذبون بيج واني ما اتحمل واتعارك

خاصه العصبيه والانفعال الي عندج قللي منه وحاولي تبطلينه ما اريد السانج يمطر على الرايح والجاي

شمه: اني شمسويه غير اشوف الي يتجاوز عليه واني ما اسكت ما اكدر

رافد: هسه اختلف الوضع جنتي وحدج وادافعين عن نفسج بقوه هسه اني بظهرج ومحد يكدر يمسج بسوء

ما اكلج صيري فقيره وماينوكل حقج لا اريدج تبقين سباعيه بس لاتجاوزين على الاكبر منج وخاصه امج

شمه: رافد لادكول امج اني ماعندي ام ولا اخوات الي باعت بنتهه علمود الرجل مااسميهه امي

رافد: عود هستوني احجي واعلم لج بنتي مايصير تحجين هيج اني امج وابوج واخوج انسي اهلج ولاكلما تذكريهم تنهارين ودكومين ماتعرفين شلون تصرفين

شمه: ربي يخليك الي ما اعرف شلون جنت عميه عنك وما شفتك هاهي اوعدك ما اخلي واحد يذمني ويكول ما عرف يختار رافد

رافد: على كيفج وياي ترى ما اتحمل الحجي دفعه وحده ادري من زمان بوستج وطلعت هاي المشاعر الضامتهه...

شمه: ضليت اضحك على سوالفه وشويه نحجي وشويه نتشاقه لحد ما راح كال يمنه خوالي وفشله وحدهم ...

بعد ماطلع رافد رحت بدلت وغسلت وجهي ماتوقعت نفسي راح افرح هلكد وعبالي اضل افكر بقيصر بس اني جنت ظالمه نفسي وظالمه رافد ...

مرت ايام خطوبتي طبيعيه رافد دائما دوام وقليل يجي ورا الخطوبه رحت لاسماء وكامت تبجي هي وعمه لان مايكدرن يحضرن الحفله وباركلي بس ماطولت يمهم ربع ساعه ورجعت

الاجواء هادئه اني خلصتهه قرايه لان صف سادس و دائما اسماء تساعدني وتقريني

مرات اعتمد على نفسي واكعد اقره وحدي ومرات تواجهني اشياء صعبه اضطر اروح لاسماء الكاهه تعبانه من الدوام بس خطيه ابد ماتكسر بخاطري ودكول ما اكدر

مرات اطلع العصر اقره بالحديقه لان البيت خنكه مره من المرات كاعده واجت شهد تركض

شهد: ولج شمه ولج شمه
شمه: ها شكو خير فضحتينه شبيج مصركعه
شهد: يولي قيصر فسخ الخطوبه مالته...

شمه: عزاااا ليش فسخ ماظل عن زواجه هواي
شهد: هسه سمعت ابوي الشيخ يحجي يكول طالبه بيت ببغداد لو تفسخ وهو ماكايل لا بسرعه مطلك

شمه: الله يعوضه  خطيه
شهد: خوما ضجتي
شمه: امشي منا عندي رافد يسوه الدنيا شتحجين انتي
تندمت حبيت قيصر وضيعت سنين بعيده عن رافد

شهد: فدوه لمرت اخويه الورده
اني راح اروح للبيت لان سعاد مسويه حمله تنظيف

شمه: ادحك على شهد خطيه شكد يجوهه ناس وخالي مايقبل يريد يلزك براء
حته النسوان الي تجي يطلعلهم براء وشهد ما الهه نصيب

ابد ما اهتميت بفسخه الخطوبه ولا اجه على بالي 

رجعت على كتابي اقره واريد انجح وافرح رافد لان كلهم يلومون بي شلون مخليهه تدرس وهي كسلانه..

حسيت نفسي كبرت 10 سنين بهاي الفتره صرت شمه عاقله حبابه ما ادور مشاكل وتسمع الكلمه..

يوم عن يوم حب رافد يكبر بداخلي مايوم اذاني ولا زعلني مرات ينبهني على شغلات مايحبهه ما اسويهه ولا اكسر كلامه

كل مايجي جايبلي هديه ويا وينطيني مصرف كل شهر احلى ايام عشتهه ويه  رافد شعور الحب من طرفين جميل

مره اجه كال كومي بدلي حته نطلع
جانت هاي اول مره اطلع وحدي وبدون لمه وهوسه

ركضت لبست فستان طويل وشالي وشويه مكياج سلمت على بيبي وطلعت لكيته بالسياره ينتظرني

صعدت يمه بالصدر واحس نفسي اريد اطير من الفرحه وهو كلساع يهمسلي بكلام حب وغزل

رحنه للمطعم وافترينه بالمحلات واشترالي كومه شغلات لو ماعيب جان حظنته بالشارع

رجعنه للسياره والجو حلو ودنيا ليل حته ماخايفه شلون هيج وقت وحدنه ولا اخاف من ردة فعل خالي لان يم رافد احس بلامان

رافد: حبيبتي تونستي
شمه: اي حييييل ربي يخليك الي...

رافد: شمامتي الحلوه اموت على هاي العيون النعسانه
شمه: اني هم احبك
رافد: شو عيديهه بعد
شمه: احبك ...

رافد: اويلي ياب تعال شوف ابنك اليوم عايش بجنه بنيتي الحلوه العاقله التسمع الكلام اروحلهه فدوه

شمه: رافد شوكت حبيتني؟؟
رافد: انت دائما كدامي ويوم عن يوم اشوفج تكبرين كدامي واني عشيرتي مشتعله

تذكرين من لكيتج على السطح وحمودي يكتل بيج بهذاك اليوم ضليت كاعد على الشط لحد 12 بليل واخذت عهد على نفسي انتي الي ماتصيرين لغيري

شمه: الله عليك مالكيت غير هذا الموقف من كتلني حمودي

رافد: من صعدت شفت رجليج طالعه وشويه صدرج مبين لان مدنكه عود اني استحرم ما اريد اباوع واكول هاي عرضي

شمه: هههه يله خلي نرجع لاتاخذك السوالف

رافد: بشرط نرجع بس انطيني بوسه
شمه: رافد كاعدين بالشارع احنه خلي نرجع يله

شغل السياره ورجعنه من طبينه قريتنه بساتين وضلمه اضويه قليله ماحسيت غير  وكفت السياره وبسرعه سحبني علي

لا رافد شدا تسوي لايجي احد
رافد: ما ارجع للبيت اذا ما اخذ حقي

شمه: يمعود رافد بعدني مامكمله كلامي خمط شفايفي ببوسه قويه ...

ايده على خدي ومستمر بالالتهام بعدت شويه عنه
همزين ضلمه وما اشوف ملامحه من يتقرب مني اخجل وارتبك بسرعه

عدل شعره واني عدلت شالي ورجعنه وصلت للبيت محد حاجاني ليش تاخرتي وين جنتي
فدوه اروح للسبع الي محد يتجرأ يفتح حلكه وياي...

ثاني يوم جان اول ايام عطله المراجعه هذا اليوم المشؤؤم الي هسه اتذكر تفاصيله وماراحت عن بالي

جنت كاعده اقره واجت شهد تركض وتصيح شمه الحكيلي .

كمت بسرعه اشوفهه وجان الكاهه واكفه بصاله ودمهه بطولهه وايدهه مكسوره مدري مخلوعه واكعه من كتفهه ولازمتهه

دخيلك ياربي بس وصلت يمهه وكعت من طولهه
اهز بيهه شهد شهد ماكو شفتهه زركه وملامحهه مختفيه من الدم

يولي شهد اكعدي لاتعوفيني وحدي ششششهد...

#يتبببببع

اليوم اريد اهد عليكم مثل علاهن🔫🔫🔪🔪💣 بكل انواع السلاح

هذوله جماعه البارت قصير ولكم خبلتوني والله موقصير اني ما اكتب اقل من 2000 كلمه ولا اكثر من 2500

اترجاكم من اشوف تعليق البارت قصير يصيبني احباط
اني انشر يوميا لذلك ما اكدر اكتب اكثر من هلكد
2000 كلمه اقل شي يرادلهم 3 ساعات او اكثر وكلكم تعرفون اني دوام ول3 يله ارجع

احبكم❤