رواية وحوش بشريه الفصل الثاني 2 - بقلم Rozaya1122

#البارت الثاني
#وحوش بشريه
#للكاتبه 《 روزايه》

مرات الضوه من ينفگد زين
اكو ورده صبحها يصير مغرب

واكو صدمه تنشط الگلبه تعبان
ويظل ايام بس بجروحه يكتب

مو كلشي مشا مو زين مرات
تلگه ايام مره وبيها تطرب

رجعت من المدرسه وطول الطريق اتعارك وي سلام ابن عمي راضي اكبر مني بسنه هاي يوميه نتعارك لحد ما نوصل  للبيت....

اول مادخلت للبيت اسمع صوت علاهن هي وابوي وامي تبجي ودكلهم حرام والله بعدهن زغار
من شافونه سكتوا اشرتلي امي اروح للغرفه

طبيت للغرفه لكيت شروق ورونق كاعدات اثنينهن يبجن رحت تقربت عليهن كتلهن شبيهه امي وليش تبجن 
ماحجن شي بس دفعني وكالن كومي منا واسكتي لاتحجين شي

هاي لحظات مخزونه بذاكرتي رغم صغر سني بس ابد ما راحن من بالي

كمت من يمهن واني ما اعرف شكو رحت فتحت الباب بهدوء وضليت اباوع واحاول اسمع شيحجون
جانت بيه هاي العاده المو حلوه استرق السمع واحاول ارضي فضولي

جانو عمامي كلهم واكفين وامي خطيه تفرفح ما اسمع شي ما اكدر اميز الحجي بس اسمع صوت علاهن عالي ودكولهه اخلي يطلكج واكسر ركبتج
اشوف امي ادافع بكل قوتهه شلون الحمامه ادافع عن عشهه

اللي عرفته بعدين راح يزوجون اخواتي شروق  ورونق لاولاد حما عمتي سميره كاعده بالمدينه مو بالقريه
وامي ماقابله لان اخواتي اصغار هن تؤم عمرهن 14 سنه

جانت هاي الليله اتعس شي امي تبجي وتدعي على ابوي وعيالهه
راحت حاجت عمي حسين وكالهه احسن الهن وهن مايدرسن والولد خوش ولد وحته بيتهن وحدهن
ولو ادري بيهم مو خوش ما اورطهن بس احسن كعدتهن وبس يخدمن بالرايح والجاي وكل ابنيه مصيرهه الزواج

المهم صار الصار واتزوجن اخواتي جنت فرحانه بعرس اخواتي وخلصتهه اركص وافر ببدلتي وما اتحاجه لان اني اخت العروس كل جاهل يجي وي امه للعرس اطرده ما ادري شجنت احس بهذاك الوقت

امي جانت ماقابله حته مافرحانه دكول بعدهن اصغار   وشلون يرحن بعيد عني
بس لان الكل موافق حتى خوالي لذلك امي سكتت

ورا عرس اخواتي ضليت وحدي وامي بس تتعارك عبالك تريد تنتقم منهم بس مابيدهه شي كمت اخلصهه يم عمه فضه صديقتي اسماء نلعب سوه
عمي محسن تزوج واخذ اخت مرت حسن اسمهه حليمه

مرت ايام وبديت اكبر وصرت صف ثالث عمري 9 سنوات ويكولون عليه وكحه شكد انكتل بس ارجع ادافع عن نفسي جانت عمه فضه دكول انتي جنج بيبيتج علاهن واني اتخبل ما احبهه

علاهن الكشره مشوفه امي نجوم الظهر بعد زواج اخواتي مع العلم مرتاحات وبيتهن وحدهن ورجولتهن زينين ويحبوهن
بس امي دكول بعدهن صغار وكلشي ماشافن لاحكات على العرس

ليش مايوم من الايام اني العب وي بنت عمي حسين اسماء واسمع صوت عركه ببيت علاهن راحت عمه فضه تركض واني اركض وراهه لكيت امي كاعده مكطعه شعرهه وتصيح الله ينتقم منكم شسويتلكم اني وهيج جازيتوني حضنتهه عمه فضه واني كعدت لزمت ايدهه وكمت ابجي وياهه

واباوع على علاهن كاعده ولاكأنما اكو شي ودكلهه اكعدي واسكتي راح تصيرين بيبيه وانتي لسانج متبري منج منين اطلبيهه من امج
انتي اول وحده اخر وحده يزوج عليهه رجلهه

امي كامت ونفضت نفسهه وجرتني وياهه كالت اريد اشوف ياعلاهن منو الي يبقه لحظه يمج انتي وابنج
لادكولين اتزوج كولي زنى هذا ابنج ترباتج زاني الله ينتقم منكم دنيا واخره

اخذتني للغرفه تسحل بيه جمعت ملابسهه كلهه واني بس اسال شكو وين راح نروح
تالي صاحت بيه صوت سكتتني
طلعنه من البيت وما اندارت ابد وعمه فضه دكلهه تعوذي من الشيطان  داده
بس امي مصره على الطلعه

التمن عليهه نسوان عمامي يهدن بيهه بس علاهن صاحت بيهن عوفنهه ولجن كاعدات تتوسلهه يروح جلب اسود يجي جلب ابيض
خليهه تولي على كلب امهه بلكي ادورلهه رجل ثاني مشهودلهن هذني امهات الرجوله

طلعت امي وماحجت حرف  واحد والدموع تارسع عينهه واني ابجي على بجيهه بس ما اعرف شصاير
تمشي سريع واني اركض وراهه منين جابت  هاي السرعه امي

صار الطريق شطوله وهو مايفصلنه غير نهر صغير ورفيع وبي كنطره صغيره على كد نفر واحد يعبر عليهه جانو يسموهه( الساكيه)

طبينه بيت جدي تلكتنه مرت خالي الشيخ سلمان  وشافت امي لطمت على صدرهه كالتلهه هاخيه سناء شبيج وليش هيج حالج؟؟
امي ماتحجي بس تبجي وتجر بجنطتهه
اخذتهه وطبينه جوه لكينه بيبي نوريه دنكت امي باستهه التمن نسوان خوالي ويسألن شكو شبيهه سناء ؟؟

كعدت امي وضلت تسولف وتبجي
اني اسمع امي وما اعرف شحجي واني طفله بس المهم ابجي واذا ضحكت اضحك وياهه

امي: ما ارجع لو تذبحوني ابن عمي العار الي كربستوا براسي طلع يخوني ويزني وي وحده من ذاك الصوب اني بنت الشيخ ظاهر هيج انهان والله ما عرفتهه منكم ليش يمه علاهن دكوم وتكعد تغلط عليه وعلى اهلي واني ابلع واسكت تالي هيج يجازيني وفوك كل هذا علاهن دكلي اذا حجيتي نذبحج  ودكلي روحي بلكي امج ادورج رجل ثاني

الحجيه نوريه: كافي بجي راح نتاكد اذا صدك هذا الحجي من باجر اطلكج شلون يزني هالنذل وعنده مره وجهال كومي يمه غسلي وارتاحي ومدام اخوج سلمان موجود مراح يضيع حقج

امي: يمه خلي يطلكني مو دكولين عيب والناس تاكل وجوهونه ما ارجع مره لرجال يوميه يروح ينام وي وحده ومن اسأله يكول بالمشروع
وفوك كل هذا علاهن دكول اذا حجيتي ناخذ بنتج والله احرك روحي اذا رجعتوني

الحجيه: ولج سدي حلكج وكومي خبلتي الفرخه دحكي عليهه شلون تفرفرح كومي تعوذي من الشيطان وروحي لغرفتج ويصير خير

رحت وي امي للغرفه وكالت طلعي يم بنات خالج موالكاج وي الجهال وانتي شكبرج الله ياخذ ابوج واخلص منه

ماجنت انقهر من تغلط وتدعي على ابوي لان ماشفت شي حلو منه ولايوم باسني وكعدني بحضنه اصلا ما اسأل عليه هو والماموجود سوه
...

رحت يم بنات خالي اكو بعمري واكو اكبر مني بس كلما اشوف امي كلبي يعصرني الي عرفته ابوي يحب وحده ثانيه زين اني شنو مصيري اضل يم امي لو ارجع يم ابوي وهاي علاهن المنغوليه شراح تسوي؟؟

طولت سالفه امي شهرين وعمي حسين شكد اجه وحجه وي امي بس جانت معانده شلون هيج سوه  وبيوم اجه خالي سلمان يتوعد كال هاهيه سناء اطلكي واكعدي يمي هذا عار واحنه بناتنه عزيزات
تالي عمرنه ننهان بسبب هالعار ويروح ينهب بنت الوادم

بعد ايام عرفنه ابوي اخذ هاي الغريبه من غير قريه ومنهزم وياهه لغير محافظه طبعا تربات علاهن كدرتهه بس على النسوان وولدهه مابيهم حظ

اطلكت امي وكعدت يم خالي سلمان شكد بجيت بوقتهه لان افترقوا اهلي
صارت مشاكل من وراي علاهن تريدني يمهه وامي ماتقبل بس عمي حسين كال موبعيده كلساع تجينه وشوكت مايعجبهه تجي

رغم الشيخ هو حسن بس الحجي جان لعمي حسين ابو قيصر

صرت اني متنقله بين بيت علاهن وبيت نوريه
بس محد يحاجيني بعد عمله ابوي علاهن مالهه السان اطلعه

رغم الصار بس ضلت علاقه العائلتين قويه بس علاهن ونوريه على خلاف ما اعرف ليش
خالي سلمان وعمي حسين وحسن عبالك اخوه ابد ما اثرت عليهم سالفه ابوي

سدو السالفه ومحد يدري انهزم كالوا شال لغير محافظه
مرات اشتاقله رغم هو ابد ماجان اله علاقه بينه كله براس امي ذابهه
مايوم حضني وكال بنتي شمحتاجه شلونج بالمدرسه اصلا مايدري بيا صف صرت

جان يشتغل بالمشروع مال المي ويبات بي ويجي بالنهار لذلك متعوده على غيابه

...

جنت اكره المدرسه انجح بالدفعات واسماء كل سنه يكرموهه تطلع الاولى  واني امي توصي بالمعلمات واخذلهن حليب وزبد حته ينجحني

بهاي الفتره امي تقدملهه ابن خالهه  وقنعوهه توافق لان مرته متوفيه وعنده بنيه وحده وصدك تزوجت امي وخلتني يم بيبي نوريه

حيل تأثرت بزواج امي صفيت وحيده ابوي شاف حياته وامي تزوجت وضليت اني مجهوله المصير
صح مامقصرين وياي لاخالي سلمان ولا عمي حسين

بس الشعور بداخلي واني طفله شكد اتحسر على حياه بنات عمي واحسدهن من اشوف امهن شكد معتنيه بيهن واني ابدل وحدي وحته تعلمت امشط لنفسي

كمت اكبر واني مشتته اروح يم علاهن وارجع يم نوريه مايفصلنه غير شجرات تين ورمان وهاي الكنطره الصغيره

مرت الايام مثل ماهي رغم صغر سني بس ينتابني شعور غريب احس مستقبلي مظلم
طفله عمرهه 9 سنوات وتفكر بالمستقبل ما اعرف ليش متاكده راح اشوف ايام سوده
احس هاي القريه راح تتحول الى جحيم

جنت احلم دائما اكو نار تلهب بالقريه لو اتخيل يجي يوم اشوفهه محتركه
ما اعرف ليش هيج جانت احلامي
...

بيوم عصريه سمعنه صوت طلقات ابيت علاهن وهلاهل
كلنه ركضنه نشوف شكو شفت عمي حسين يحضن بقيصر وعمي حسن حارك الجو بالطلقات
عرفنه قيصر صار طبيب وراح يدرس ابغداد

سوو عشا وعزموا القريه كلهه من فرحتهم بقيصر اول واحد يصير طبيب بالعشيره البقيه مخلصيهه صيد ويركضون ورا الغنم

كبرت وبدت ملامح الانوثه تظهر عليه خالي سلمان مدللني ورجال يخاف الله ومايوم واحد مد ايده عليه
ومن اروح يم علاهن هم نفس الشي عمي حسين يحبني بس علاهن ابد ماتحبني ولاعبالك حفيدتهه

اخواتي شروق ورونق يجن يمنه بين كل مده وصارت عدهن جهال ومرتاحات وحته شكلهن تغير لان كاعدات بالمدينه

عندي بنات خالي نعمان صديقاتي لان كاعدين نفس البيت
خالي سلمان عنده بس 2 ولد رافد ونوفل وعنده5 بنات

كلما اروح لبيت عمي حسين اسمعهم يحجون بقيصر ويكولون راح يصير دكتور وعمه فضه فرحانه بي مرات اروح وي اسماء تنظف غرفته متروسه كتب وكلهه بيهه صور مال ناس عريانه جنت ماخذه علي نظره هو سخيف ومايستحي مع العلم حته قليل اشوفه واسمع صوته
بس طلع هاي كتب مال دراسه..

صرت صف سادس ابتدائي وخلصتهه يم بيت عمي حسين اقره وي اسماء ومرات ضرغام يدرسنه لان هو صار بسادس ادبي بس اني اشبع كتل لان كلشي ما اعرف

يكولون عليه وكحه لان الي يكتلني ارجع اكتله لو اعضه يوميه ماخذيني للمدير احصل شكم عوده وارجع

بيوم اتعاركت وي بنيه بالصف وكتلتهه لان اخذت اقلامي ورا شويه صاحني المدير رحت للمدير وبوكتهه كتلني 4 عود بايدي بس كل هذا وما بجيت اباوعله واضحك والمدير تخبل يكول للمعاون راح تخبلني هاي شكد عرمه

تالي دزو على عمي حسين وجان طالع اجه بمكانه ضرغام جان بصف السادس
كعدو المعلمين يشكون مني وضرغام يكلهم تحملوهه هاي مريضه وبيهه خيط خبال وكلساع اريد اهد على ضرغام طلعني مخبله

من رجعنه بطريق ضرغام جرني من اذاني وكال بس هاي السنه وتبطلين انتي هم كسلانه وهم وكحه ولج وتالي وياج متشوفين اسماء شلون شاطره

هسه علاهن تبطلج وتزوجج وتظلين ادكين شغل صيري حبابه وكلما تنجحين اشتريلج هديه

كلهم متخذين عليه نظره اني وكحه وصلفه
بس مايدرون اني محد معلمني الصح من الخطأ اشو امي التهت وي الرجال وابوي ماندري بيا ارض ونسوان خوالي حايرات بنفسهم

ضرغام سولف لامه ولزمتني عمه فضه وتنصح بيه ولازم اصير عاقله والوكاحه موحلوه للبنيه صدك احبهه هاي المخلوقه وقررت اسمع كلامهه
واصير حبابه 

شوي عقلت وكمت اركز بالدراسه ونجحت من الدور الاول وصرت صف اول متوسط وعلاهن تريد تبطلني بس عمي حسين حيل يحب الدراسه ومايقبل يكول من ابطل بنتي ابطلهه

من صار عمري 13 كبرت فجأه كل ملامحي الانثويه برزت حته كمت استحي من جسمي اظم بي من اطلع  بس بعدني على نفس الروعنيه ماكو جاهل ما اكتله
وارادد بالحجي واغلط ما اعرف ليش هيج وحشيه
...
جانت عطله واحنه يوميه نطلع بلحديقه نسولف وعمه فضه تخبز ومرات اروح لبيت خالي سلمان ماعندي مكان ثابت
كاعدين واجه ضرغام  كال شمه خالج سلمان يكول خلي تجي امج هنا

فد فرحت بوقتهه صار هوايه ماشايفه امي
رحت اركض بس اشجار تفصلنه عن بيت خالي
جان اكو جلب مال بيت عمي حسن مدري شلون هادي وما احسه غير هجم عليه اركض ويركض وراي من خوفي رجعت على بيت عمي حسين اركض بكل سرعتي صارت بطريقي طابوكه عثرت ووكعت وما احس غير الجلب اخذني بعضه من فخذي كمت اصيح بعلو صوتي
وهذا بعده مثبت رجلي واضافيره على رجليه ومطلع لسانه ويلهث ويريد يهجم بعد

ماحسيت غير صوت الطلقه وتكوم الجلب بصفي

يمه لحظات مرعبه كمت ازحف وارجع ليورا انترست دم رفعت راسي شفت قيصر بيده السلاح ولابس دشداشه تقرب عليه كعد بمستواي وكال خوما عضج؟

كمت ابجي واهزله براسي كتله اي ولازمه مكان العضه

اجت تركض عمه فضه على صوت الطلقه لكتني كاعده وابجي حجالهه قيصر كومتني واخذتني للبيت بدلت ملابسي
فضه: خلي يشوفهه قيصر لا تتلوث
عمه شيشوف وهي بفخذي؟؟
فضه :يله يمه هو طبيب هسه لوناخذج للمستشفى مو يفحصج الطبيب
صاحت علي يمه قيصر تعال شوف بنت عمك لاتتلوث رجلهه

شوي واجه اباوعله ياربي شكد حلو وهيبه من يوم يومه وهو شخصيته تخبل وانوبه دكتور
اتذكرت من كتل محسن وعلاهن وانوبه صاير بعد اضخم صار سنين ماشايفته عايش ابغداد واذا يجي يومين ويروح حته ما اشوفه
وبالعطله يشتغل وي خاله بمعارض مال سيارات
يعني من دخل كليه ماشايفته غير مره وحده

اجت عمه فضه وتجر بيه كومي خلي يشوفهه لاتنجلبين علينه هو انتي منا الله مايشيلج وتضحك

رفعت دشداشتي واني مستحيه صايره فوك مفصل الركبه بالضبط ووطلعتهه
صايره حمره ماعاضني حيل  عقمهه وخله عليهه بلاستر كال مابيهه شي يمكن الجلب ماعنده سنون ماعاضهه بس متخرمشه

رفع راسه وباوع عليه كال وانتي شعندج تمشين وحدج والدنيا مغرب ماكلتي للولد يوصلوج ندري بيج سباعيه

عابتله شكد مغرور وشايف نفسه عود شوفوني اني طبيب ماحاجيته لان من زمان اخاف من عنده

رحت لبيت خالي سلمان ولكيت امي جايبتلي كومه ملابس وشغلات حلوه وسولفتلهم على الجلب
رافد ابن خالي سلمان يضحك عليه يكول تلكي خاف منج شعجب ما عضيتي
ظلو يضحكون وفرحانه بجيه امي واخواتي
بقوا يمنه 4 ايام وراحوا ضجت حيل راح ارجع لنفس روتيني بين علاهن ونوريه..

مرت الشهور سريعه وقيصر ماراح عن بالي بس افكر بي صح صغيره مومال هيج سوالف بس مراهقه وكمت اكبر يوم عن يوم
وهذا الولد من جنت طفله اباوعله
مايشبهنه ابد رزن وهادئ احسه هو الشيخ
طويل وشعره عالي دائما يخلي عالي مايزينه ولحيه خفيفه عيونه سود حادات بشرته حنطاويه
هاي ملامحه جانت شاغله بالي ما اريد اوكع بخطأ
اني مومن مستوى هو طبيب وعايش ابغداد واني الجك من البك ما اعرفه
مرات اسمع امه دكول قيصر مايتزوج هنا ولايعيش بالقريه
يكعد ابغداد ويكون نفسه هناك
يوميه لحد ما انام واني اتخيل ملامح قيصر وشخصيته العاجبتني

والي خلاني معجبه بي اكثر لسه علاهن تخاف منه واذا تعاركن نسوان عمامي يهددن بقيصر ويكللهه والله نسولف لقيصر
يعني جان صكار علاهن بس هو مايجي هواي بس بالعطل الكبار

بعدني اشخبط على الكتاب وبالي مشغول بقيصر
احاول اقره  ماعندي واهس ابد موشاطره بالدراسه وكلما اريد ابطل امي ماتقبل دكول شوفي ابن عمج شلون صار دكتور والكل تهابه هاي شهادتج مستقبلج محد يفيدج لارجال ولا اهل بس شهادتج ماتعرفين شنو المضموم الج بالمستقبل

سمعت صوت الصياح مال بيبي نوريه ......

#يتتتتتبع

حبايب قلبي لاتنسوني بالتصويت ورفع القصه
ارجو منكم متابعه حسابي
متابعه ممتعه
احبكم