رواية وحوش بشريه الفصل الاول 1 - بقلم Rozaya1122

#البارت الاول
#وحوش بشريه
# للكاتبه 《روزايه》

قدري!!
قدري السواد الذي كتب على جبهتي كتب بقلم لا ينمحي مهما حاولت فلا تقنعوني بمقولة "قدري صنع يدي" قدري كتب بيد وحوش الارض رفعت الاقلام وانتهى الامر
.....

يوم من ايام الزمن الجميل
جان التلفزيون قديم ابيض واسود واطاره خشبي مخلي على طبله خشبيه موحيل عاليه والكاع مفروشه حصيره وداير مدايره جودليات ومخدات كل وحده شكبرهه الي توكع على راس واحد تسوي بي نزف بالدماغ

جانت طالعه اغنيه كريم منصور
سلامات ابعث سلامات
وي رايح وي الجاي ابعث سلامات

اشوف عمي محسن يدندن وي الاغنيه لابس دشداشه بيضه وكاعده يضرب صفنات وكلما يشتد المقطع صاح اااخ يابويه
واني عبالي بي شي اجي اركض علي اشوفه وين متعور طلع هو مسلطن وي الاغنيه

اني وبنات عمي نلعب ونكمز منا ومنا نصعد على الدرج صاير بوسط الصاله جان عباره عن بنيان وصابغي ابيض وكلساع وحده من عدنه تنظرب براسهه وفوك مانتعور ننكتل من الحجيه علاهن

العب على الدرج وصوت كريم منصور يرج بصاله ومحسن رايح بغير وادي ومبين علي عاشك ومفلس

سمعت امي تصيحني شمه شمه وينج
رحت اركض عليهه لكيتهه كاعده تكشر بتيته واخواتي شروق ورونق اكبر مني كاعدات يمهه والمطبخ مهوس كومه مواعين محضرين حته يصبون غده

كالت يمه روحي لمرت عمج حسين كليلهه خلي تستعجل الشيخ عنده خطار..
ركضت لمرت عمي  اسمهه فضه حبابه حيل وتحبني ومثقفه حجيهه يختلف عنه
كتلهه عمه فضه دكول امي الشيخ يمه خطار خلي تستعجل..

خطيه شفتهه كامت تخبز بسرعه بسرعه وتحجي وي نفسهه

- يااا عز العزاني شراح يخلصني من الحجيه اذا تاخرت ياربي وين جانت هاي الي شكول عليك حسين جبتني بنص العرب حته اكتافي وكعت من الخبز  لو ادري بيك هيج ولاحبيتك سويتلي الهور مرك والزور خواشيك

ضليت كاعده يمهه واتمعن بيهه حيل عاجبتني واتمنى من اكبر اصير مثلهه شابه زغيره ملامحهه حاده عيونهه كبار وحنطاويه حجيهه ولهجتهه تختلف عنه لان هي من بغداد وهادئه وابد ما تعلي صوتهه

لحدما كملت  خبز واني صافنه عليهه كمت لميت الخبز وياهه ورحنه للبيت لان التنور برا بالبستان..

اول مادخلت للمطبخ صاحت بيهه بيبيتي علاهن
ولج مصكوعه وين وليتي هن خبزات شجاي تسوين بنت المداس؟؟؟

اشوف عمه فضه ترجف من الخوف وماتعرف شتجاوب  كالتلهه والله عمه التنور مايحمه شكد خليتله حطب ومايفيد واني ما اعرف اخبز بي الا بالغاز

عمه العماج بنت بغداد مدري منين الله جابج على كلبي ام الوسخ صرتي ماتعرفين هسه
واحنه رحنه جبناج من هذيج الدربونه خلفله على وليدي سوه براسج خير

اوف ياحسين كسرت ضهري بعملتك هاي الي جبت هاي ام الوسخ وعفت بنات خالتك وخوالك وبنات القريه الي يتمنن طولك

خطيه عمه فضه ماحجت حرف واحد بس اشوفهه شلون خانكتهه العبره وتشتغل بسرعه وتروح منا وترجع منا وبيبتي تحجي وترزل بيهه وكلساع وتعير بيهه ودكلهه بنت الفكر
وفوك كل هذا تسب بأبوهه وهي تخاف تحجي

شكد اكره بيبيتي علاهن لان اشوفهه تكتلهن وتصيح عليهن وهن يخافن منهه
متسلطه والكل يخاف منهه حته ولدهه يحسبولهه احساب والكل خاضع لهاي العجوز الكشره
تدخل بكلشي وتريد كلامهه اليمشي وعود هي الشيخه

هن يشتغلن وهي واكفه على راسهن مثل ملك الموت وكل وحده تاخذ المقسوم اذا الشغل ماعجب علاهن الشمطاء

صبو الغدا واجو عمامي يشيلون بي كالت مرت عمي حسن  اسمهه فوزيه والله ملينه من الخطار ندري شيوخ بس موهيج نريد يوم نرتاح ماكو نركض والعشا خباز..

امي: ولج اسكتي لاتسمعج عمتي وتسويهه يوم القيامه علينه مابينه حيل طلابه ودكوم العصي ادك على ظهورنه

فوزيه: كافي ملينه حسره علينه الكلمه واحنه خدم نشتغل وفوك كل هذا ياريت يعجبهه شي موبس هي شيخه اني هم مرت الشيخ

خطيه واكعات بيهه هذني المساكين تجي الناس تاكل وهن بس يطبخن وينظفن راحت فوزيه لغرفتهه وهي ادردم
..

جان جدي من العوائل المعروفه من جاه وحسب ونسب
من الزمن القديم وهم شيوخ يعني ابآ عن جد مثل مايكولون

عدهم بساتين وحلال يسد عين الشمس..
الشيخ حبيب جدي ابو ابويه رجال جبير صايم ومصلي وحج بيت الله جان المضيف مالته مايفرغ من الناس الكل تحمد بي وبكرمه اهل الانبار يعرفوا وشكد مساعد ناس

جان ما منطي مجال لبيبي علاهن ابد امي دكول حرف ماتحجي رغم هي بنت شيخ بس تخاف منه

من مات صفالهه الجو وصارت هي الامر الناهي وعمي حسسن هو الشيخ من بعد ابو
المفروض الشيخه لعمي حسين الجبير بس هو الوحيد دارس بيهم ومعلم لذلك ما راد الشيخه وطلايبهه عافهه لعمي حسن

جان ايدهم اليمين الشيخ سلمان خالي يصير  يعني امي متزوجه ابن عمهه وعدهه بس 3 بنات اني وشروق ورونق تؤم اكبر مني ب5 سنوات

جانن يكعدن الجناين من الفجر يخبزن وينظفن
مايطلعن ورا الحلال ولا يوصلن للبستان هم مخلين فلاليح يعني جانن بس شغل وتنظيف مالهن علاقه بالبستان يعني تقريبا مسويلهن ذات مو مثل بقيه القريه

بس كدام علاهن ينسحلن ماكو لا ذات ولابطيخ..
تفتر عليهم وحده وحده وتشوف شغلهن وياويلهه الي ماعجبهه شغلهه احسب العصا تكسرت عليهه..

جنت طفله واشوفهه شلون تكتلهن بالعصا وهن يتوسلن بيهه..
حيل اضوج منهه ومن تسلطهه جانت ماتضرب امي لان تخاف من خالو سلمان بس امي تخاف منهه...

عمي الجبير حسين تنازل بالشيخه لاخو حسن
جان يكول لازم واحد يتفرغ الهه واني رجال معلم مالي بهاي السوالف والفصول

جانت مرته عمه فضه غريبه  من بغداد خطيه هو حابهه وخاطبهه من جان بالمعهد وماقابلين ياخذوهه اله لان غريبه وهم الا يتزوجون كرايب وانوب هي من بغداد وهم من الانبار
يعني عمي حسين طفره وراثيه منهم وتزوج حسب رغبته مورغبه امه

لذلك الحجيه علاهن ماتحبهه وهي من الولايه يعني مثقفه ودارسه وهاي العجوز لازمه العصا وتركض وراهه وخطيه عمه فضه بسرعه تكوم تبجي ومن يجي عمي حسين تتلكا العجوز تشكه وتبجي واطلع  فضه هي المتجاوزه

اكثر من مره شفت عمي حسين يبوس براس فضه وهي تبجي شكد جان يتعارك  ويه علاهن بس مدري شلون تلفهه وتذب الصوج براس المسكينه
جانت دائما دكول لو ما جهالي بالمدارس وخاف يضيعون بعدي الا اشرد منا

من يخلص اليوم وكل وحده تروح لغرفتهه تريد ترتاح بس ماكو هيج بقانون علاهن صوت واحد من عدهه تخليهن وحده تضرب بالثانيه ممنوع ينسد باب الغرفه الا ينامن

....

طفله عمري بالضبط 6 سنوات ما اعرف شي بعدني بس العب واكل وانام وما احب المدرسه يوميه امي تشلع شعري يله اروح دائما دكولي شوفي بنات عمج حسين شلون راح يصيرن دكتورات وانتي يزوجوج ويكرفون على راسج شغل

بس لاحياه لمن تنادي كسلانه حيل اخذ بلاملاء واحد لو صفر ويجي ابن عمي حسن يفتن عليه واشبع كتل من امي وعلاهن تصيح بس ترسب تبطل

كله من ورا حسين مخلي البنوات تفر بطولهه بحجه المدرسه والله الي تسقط منج اكعدهه وازوجهه
خطيه اخواتي شروق ورونق هم رسبن وبطلوهن وابوي يخاف من امه وكعدن بالبيت بس يكرفن شغل

على عمه عيونهه ندرس بس عمي حسين مايقبل وحده تبطل يكول الشهاده حلوه حتلو بالريف لازم نكافح ونوصل ونعرف نسولف ويجوز تصيرين دكتورات وترفعن راسنه

يعني الوحيدات احنه جنه ندرس من بنات القريه حته خوالي يبطلون بناتهم حدهن لسادس ابتدائي وتكعد بالبيت

يوميه من نرجع من المدرسه يكعدون بليل الجهال تفتح جنطهه تقره واني من دون الجهال بس اكمز وامي تركض وراي تعالي اقري
حيل حركه ووكحه جنت اكثر وحده تنكتل هي اني

مرات اغار من بنت عمي  تكعد تقره واكعد وياهه جنت اشوف ابن عمي حسين اسمه قيصر يكعد يقره واضل اباوعله شكد حلو وشعره يخبل بس ما احبه لان يخزرني ويكول كسلانه اني جنت  صف اول ابتدائي  وهو صف رابع عام يعني فرق بيناتنه عشر سنوات

عمي الشيخ حسين عنده 4 ولد وبنيه وحده
الجبير اسمه قيصر والثاني ضرغام والثالث وسام والاخير حسام
عدهم بنيه وحده بعمري اسمهه اسماء

ضرغام جان صف اول متوسط حباب حيل ومرات العب وياه ويقريني بس كلش هادئ ومثقف عود مثلنه كاتلنه الوسخ وبشرتنه جافه
 

حته ماكو مرطب يخلولنه بس عمه فضه يوميه مدري شتخليلهم ومن يرحون ترشلهم عطر
ينكرطون كرط جنهم جكليت

جان دائما ضرغام يكول ليش يصيحولج شمه وانتي اسمج شيماء؟؟

اني بنفسي ما اعرف الاجابه بس كلي الي اعرفه من يوم الي اجيت للدنيا امي تصيحلي شمه عاجبهه هذا الاسم

حياتنه حلوه لوماهي العجوز مرات تكعد من الصبح تلزم شعر نسوان عمامي وحده وحده تشوف منو السابحه

خطيه جانت  عمه فضه يوميه تسبح وكلما تجي علاهن وتلكه شعرهه رطب توكعلهه دك رزايل وهي تبلعهه وتسكت

يوم من عدهن تعاركت عمه فضه ويه مرت عمي حسن اسمهه فوزيه ( مرت الشيخ)

جانت عركتهن علمود الشغل لان كله براس عمه ام قيصر وبوقتهه صارت هوسه وكلهن هدن  على ام قيصر
فوزيه وعماتي متزوجات بنفس القريه  وكلما يجن يسون مشكله مالهه راس ولا رجل

شلعن شعرهه وواجت عجوز البين لازمه بيدهه عوده خضره حته اطلع صوت ووكعت لعمه فضه ضرب على رجليهه وخطيه مثل الطفل كامت تفرفح وبتهه اسماء تبجي  جان هذا المنظر كدام اطفال بشع بحد ذاته تشوف امهه تنظرب ومحد يكدر يساعدهه

وعمي حسين طالع وهاي العجوز مستمره تضرب بيهه وعماتي حسنه وساجده لازماتهه وامهن تكتل بيهه وغلط وفشار وهي تأشر بيدهه على اسماء عود روحي للغرفه خطيه ماتريد تشوفهه بهذا المنظر

كلنه مجتمعين انباوع بس محد يكدر يخلصهه من اديهن الي يدخل هم ينكتل امي تفرك بيدهه تريد تفزعلهه بس ماتكدر بس تحجي بصوت ناصي الله لايوفقج

وما نحس غير اجت دفعه لعلاهن وكعتهه بالكاع والدفعه الثانيه من نصيب ساجده وكعت بصف امهه بحيث ساجده وكعت على ايدهه وانكسرت

نشوف بركان وهائج كدامنه قيصير جر امه وخلاهه ورا ضهرهه جان يحجي وعبالك رجال مو مراهق عمره 16 سنه

- علاهن والله احركج انتي وبناتج اذا مديتي ايدج على امي موعبالج اني حسين ابنج واسكتلج انعل اهلج واحد واحد لا ابو عشيرتج اذا مره ثانيه لفظتي اسم امي عبالج ماكو رداد يردج وشايخه علينه
شيخي على ولدج مو عليه

جان لازم العوده بيده وعيونه تطاير شرار وعماتي كومن امهن وهاي تخبلت

علاهن: ولك قيصر بطول الفصمه وتسبني اني الشيخه علاهن عديم التربيه ابن ام السحوره اليوم انعل ساسك لا ابو اليطلع وراك

شو هي كالت هيج وهذا هد عليهه يريد يضربهه بس جانت وي طبه عمي حسن ومحسن ومنعوا وضلوا يغلطون علي شلون يتجاوز على امهم وخطيه عمه فضع تسكت بي دكله ابوك يحجي موانت...

امه لازمته تجر بيده وهو من الوكاحه حته تشيرته انشك من ركبته وعروقه مبينه رغم صغر سنه بس صوته جان يرج رج بحيث سكتهم كلهم امه تخلي بيدهه على حلكه تريده يسكت لان عمامه واكفين
وفوكاهه الشيخ حسن
ولو هو بس بلاسم شيخ ياخذ الشور من راس امه وحته احترام الناس اله قليل

قيصر: عوفيني ابوي يخاف من امه اني ما اخاف من اكبر بشر  التفت على عمامه وكالهم منا ورايح والله الي يطخ امي بحجايه احسب امه ماجابته احرك العشيره على  راسه وموعبالكم صغير ومتمادين عليهه وماوراهه ظهر والله احرك القريه على راسكم

هجم عمي محسن على قيصر ولزمه من ياخته وهذا جنه وحش ضل يتلاوه ويا ويكله ابن الساقطه اليوم اربيك العتب ابن المعلم حسين

جان المطبخ بابه على الحديقه خارجي من كدما ادافعوا طلعوا برا اشوف محسن مايكدرله منين مايلزمه هذاك يدافع
عمي حسن ركض لزم قيصر وتكابلوا علي يردون يكتلوا

علاهن صوتهه يرج رج وتشجع بيهم ودكلهم الايد الي نمدت على الشيخه تنكسر اليوم
شوفوني ايده مكسوره ومعلكه بركبته

خطيه امه تملخ بنفسهه وعلاهن واكفه بالباب مال المطبخ ماتخلي وحده تطلع بس نباوع

وهذوله لسه يتصارعون وي قيصر عمي حسن لازمه ومجتفه ومحسن كباله يشلح بردانه

وما انشوفلك غير قيصر ضرب محسن دفره ببطنه
كومه بالكاع
وي ضربته اتلاوه وي عمه حسن وفلت منهم وركض ليجوا

يمه جان هذا الموقف رعب شلون تجرأ ومد ايده على عمه كام محسن ويريد يلحكه
طلعله قيصر وبيده السلاح ووجهه على محسن
جنه ثور هايج

قيصر: خلي واحد منكم يجرب يلزمني مره ثانيه ويمد ايده ارجعه لعلاهن وحق الله
وخلي كوا... بيكم يجيب طاري امي واعلمه النسوان شتجيب
بيكم خير ماحاكمتكم مره جاي تتمرجلون براسي

لاول مره اشوف الخوف بوجه عمي محسن وحسن وعلاهن ركضت للبيت وتتوعد اجت امه علي تهدي بي وتتوسله يله نزل السلاح واخذ امه واخواته وراح لغرفتهم

هذا المنظر لحد الان ابالي ماشفت طفل كدامي شفت رجال بمعنى الكلمه سكت الكل وعلاهن من فشلتهه ضلت بس تسب بي لو ما عمامي جان كتل علاهن وكسر العوده عليهه

ظلوا عمامي يهدون ويغلطون وخلي يجي حسين ويشوف حل لابنه شلون يتجاوز على الشيخه بس بالنسبه لقيصر ضرب كلامهم عرض الحايط
وتجاوز على الكل مدري السوا صح مدري غلط

من هذا اليوم صرت اخاف منه اكثر هو من النوع الهادئ ومايختلط دائما وي ابو يطلع ودائما اشوفه لو كاعد يقره لو بالمظيف ويه ابو يعني قيصر جان بالنسبه لعمي حسين اخو الرابع

قيصر يمتاز ابنيه جسم قويه عمره 16 بس الي يشوفه يكول 20 اطباعه غريبه دائما اسمع عمي حسين يكول هذا نسخه ابوي الشيخ

للعصر رجع عمي حسين وسمع بالصار
بعد ماتلكته علاهن ومحسن يحجوله شلون كتل عمه وهد علي بالسلاح

حسين:  يمه واليرحم والديج هاي المره الالف اكلكم  لا تعيليون بقيصر ترى لامثلي ولامثل اخوتي هذا نسخه من ابوي الشيخ حبيب وما اضمن شيسوي
واني اكلكم ما مسوؤل عن اي تصرف منه

علاهن: ماعندي واحد يشيخ عليه اني هنا الشيخه  اكسر راسه وادمره وما يرفلي جفن
لو مو حفيدي
شو اشوفك ادافعله وعاجبتك اهانه امك يا ابن بطني
جاهل يهين عمه الشيخ وين صايره هاي؟؟

حسين: يايمه ما ادافع لقيصر واعرف تصرفه مومال ابن شيوخ
بس لوما شاف شي غلط ماتصرف هيج لاتستهينين بعمره ترى بكبري هذا ومرات اشوره
وانتي اول وحده كلتي قيصر نسخه ابوك وتعرفين ابوي شنو
دنك على راسهه باسه واعتذرلهه وكام

عمي حسين صار بين امه وبين عائلته  فقرر يبني بيت ويشيل
علاهن تخبلت شلون يعوف مضيف ابو الشيخ
بس كالهه راح ابني  بيت بصفكم وحته نفس الباب وشالوا بس على الاقل ماتتحكم بيهم علاهن..

اكثر وحده تخاف من قيصر هي اني بس يهددوني بي اموت من الخوف حته من اروح يمهم بس يجي اشرد لبيتنه مع العلم هو ابد ما يأذيني بس مرات يصيح بينه اني واسماء من نسوي هوسه
....

مرت سنه كامله واني صرت صف ثاني بس بديت اتقبل المدرسه ومستواي وسط وبعدنه تحت رحمة علاهن بس قيصر مايطب للبيت ولانشوفه وصدك تخاف منه العجوز
رغم صادف عيد وجابه عمي حسين واجه سلم عليهم بس ضل على موقفه

مرات اروح يم عمه فضه واشوفهه شكد حلوه وبيتهه يلمع اتمنى اعيش يمهم وما ارجع للبيت
على الرغم عدهه 4 ولد و24 وعشرين ساعه تشتغل بس يعجيك تكعد يمهه

يوم منهن  طلعت ويه بنات عمي اركض بلبستان حته اوصل للمدرسه اول وحده اسمع سماح بنت عمي حسن تصيح وراي ولج شمه لاتوكعين وتنكسر رجلج
واني اتراقص وي الفراشات وصلت للمدرسه وبده يومي الدراسي كل معلم يجي يرزلني ويكول العتب على اسمج مال اهل الولايه  وانتي لاحظ ولا دبان
حايره بس اكل الاخضر واليابس ومافالحه بدراسه

رجعت من المدرسه وطول الطريق اتعارك وي سلام ابن عمي حسن اكبر مني بسنه هاي يوميه نتعارك لحد ما نوصل  للبيت
اول مادخلت للبيت اسمع صوت علاهن هي وابوي وامي صوتهه تبجي ودكلهم حرام والله بعدهن زغار..

#يتتتتتتبع

هلا حبايب قلبي شلونكم❤
كثره الطلب على القصه خلاني انزل البارت الاول
اكو شغله اريد اوضحهه
بعض المتابعين يكولون موضوع القصه مكرر وهوايه قارين علي
ياحبيباتي هو انتوا اشفتوا شقريتوا
بعدنه باولهه والقصه تختلف جذريا عن القصص المكرره وتحجين قصه اكثر من بطل من واقعنه المأساواي
لاتضلمون القصه واريد تنطوهه حقهه وتصعدوهه بالتصويت والتعليقات
حبايبي من تقرين اتركيلي بصمه من خلال تصويتج وتعليقج
انتظروني اول ايام العطله اكمل القصه
متابعه ممتعه❤احبكم