وحوش بشريه الفصل الرابع وأربعون 44 - بقلم Rozaya

#البارت الثاني والأربعون
#وحوش بشريه
#روزايه

بجيني بعد وأنت أستلذ وارتاح
والمرتاح ...ولفه جروحه ينساهـا ،،
انه متوبها عيني ؟
دموعي هاي منين ؟
منك ؟ مدري مـن الظيم ؟ الكَاهــا ،،
وديلي نفس وديلي دمعة شوگ
تره حته الرسالة الفارغه اقراها ،،...

شمه: لازمه الموبايل بيدي وصافنه مثل المصدومه منو هاي وشنو علاقتهه بقيصر ودكول حبيبي ..

بعدني واكفه وادحك على الشاشه مال التليفون نبهني صوت قيصر وهو يحجي ويايه

قيصر: شمه شسوين واكفه

شمه: شفت تليفونك يتصل وجاوبته..

قيصر: شلون اتجاوبين بله طلع واحد من جماعتي..

شمه: لا مو من جماعتك وحده تسأل ليش ماخابرتهه مو مواعدهه...

قيصر: وحده؟؟؟ منين مواعدهه اذا رقم غريب ليش اتجاوبين..

شمه: قيصر لاتجي اتحاسبني ليش جاوبت منو هاي وشنو علاقتهه بيك ودكول حبيبي ...

قيصر: ما اعرفهه انطيني التليفون

شمه: هاك اخذه وخابرهه بسرعه لان قلقت عليك خطيه..

عفته وصعدت صاح ورايه بس ما التفتت علي الافكار اتجيبني وتوديني احساسي مايخيب ابد واحس اكو شي مضموم ..

بيومهه قفلت الباب وتليفوني ما اريد اسمع اعذار بدون معنى ضليت لحد 4 الفجر واني ما نايمه ...

ساعه اتذكر حالتي ويه علاهن والضروف المريت بيهه وساعه افكر بقيصر ومنو هاي الوحده الي خابرته وحسيته من نبره كلامه ارتبك وضام شي عليه...

اخذني فكري للبعيد اذا انتهت علاقتي بقيصر وين اروح وين اعيش هم اضل كاعده يمهم واشوفه بطوله..

اتعوذت من الشيطان ليش اجت هيج افكار موحلوه براسي يجوز وحده معجبه بي او شي ...

غمضت عيني شكم ساعه وكعدت مرعوبه احس رجليه مربطه وصار مده كلما اكعد احس رجليه خدرانه وعبالك ثكل فوكاي جان ...

نزلت لكيت الكل بالدوام حته قيصر ماكو بس عمه والبنات مالي خلك كولشي والصفنات ماخذتني...

انتبهت على شهد عيونهه مورمه امبينه باجيه شويه وكعدت امي واخواتي نسيت وجودهم بالبيت..

اول ماشفتهن كمت ما اريد حته اسمع صوتهن يمثلن على فضه دور المضلومات وسناء كاعده تحجي ضيمهه وقهرهه ...

لعبت نفسي منهه ومن جذبهه وممثله بارعه وقار وشهد ما الهن علاقه بيهن حته مايحجن وياهن ..

ما ادري شلون خلص اليوم واني افكر بالمخابره وقيصر حته ماحاول يبرر ويجي يفهمني ...

بهذا اليوم صادف خفر حته ما اجه للبيت وجهازه مقفول ما ادري بي بليل الساعه ب10 خابر على عمه فضه واجت انطتني التليفون...

قيصر: هاشمه شلونج؟
شمه: الحمدلله زينه
قيصر شوماكو تليفونج ليش مغلق..
شمه مابي شحن
قيصر: لا تجذبين ماشفتي من البارحه لحد هسه لو بعيده عليج الشاحنه

شمه هسه شتريد اني غالقته لان ما احتاجه

قيصر احجي عدل لاتنترين بالحجي شنو شريد كومي افتحي الجهاز وحجي زايد لاتحجين

شمه ما افتحه جهازي واني حره بي عسما اكسره عندك شي احجي هسه موهاي مخابر عليمن

قيصر والله اذا ما سديتي حلكج هسه اطلع واجيج اشو صوتج شعلاته وماعندج احترام

شمه العفو العفو حضرت الدكتور هسه المطلوب مني شنو

قيصر: تخبلتي انتي شبيج صارلج يومين هايجه

شمه: قيصر اني نعسانه وتعبانه راح اروح انام وانت مشغول وما اريد اخذ من وقتك هوايه وخاصه عندك مشاغل ومعارف وتتاخر عليهم تصبح على خير

سديته منه حته ما انطيته مجال لان متاكده يعرف البنيه زين ولو يريد جان بلحظتهه برر الموقف بس هين ياقيصر والله اريد انعل ابو الحب الي خلاني طول هاي السنين عايشه بذله ..

صعدت للغرفه لزمت راسي ما اريد افكر بشي ولا اريد اخذ احتمالات مانمت بس مددت وغمضت عيوني اريد بالي شويه يصفى من التفكير والارق ...

تقريبا الساعه بحدود 2 بليل غطيت بالنوم حسيت على حركه على جسمي مثل النمل الي يمشي ...

فزيت ماكو شي فتحت الضوه دحكت منا ومنا ادور ماكو حته الفراش عدلته خاف بي حشره ..

رجعت نمت وكل ساعه افز مرعوبه من هاي الحركه حته صارت الحركه اخشن وعبالك ادين بشر ...

خفت حيل فتحت الضوه ورحت توضيت وفرشت سجادتي ضليت اصلي واقره قران ادعي ربي يريح بالي مليت من الايام السوده والحظ العاثر...

لحد ما اذن الفجر صليت ومددت بصف السجاده وغفيت غطيت بالنوم شفت نفسي واكفه على تل عالي من التراب وطالع بي حشائش متفرقه

واكفه وادحك على الناس اشوفهم مثل النمل من كدما عاليه اريد انزل وما اكدر كعدت على التل والوم بنفسي شلون صعدت هنا هسه شراح ينزلني

بعدني كاعده ابحث عن حبل النجاه شفت بيبي نوريه الله يرحمهه اجت تمشي ولازمه العصا مالتهه سلمت عليهه وكعدت بصفي ...

فتحت الشيله مالتهه وطلعت منهه خرزه زركه حطتهه بأيدي وسدتهه وكالتلي شمه انتي دربج عثر خلصتي من ضيم وراح تشوفين اتعس يابنيتي انتي عندج روح شريره تحوم عليج روحي تخلصي منهه ترى ماتشوفين راحه ابد وهاي امج لاتامنين بيهه ترى ادمرج...

بس حجت هيج وفزيت على ايد قيصر وهي تكعد بيه ...

قيصر: شمه شمه كومي ليش نايمه هنا؟؟

شمه: هااا اجيت

قيصر: صباح الخير

شمه: صباح النور

قيصر: ليش نايمه بالكاع اشفتي بالحلم

شمه: مو شغلك لاتسألني وروح خابر ترى حبايبك هوايه..

قيصر: لاتخربطين بالحجي انزلي اتريكي واهدي وبعدين انسولف..

شمه : عافني وطلع صدك ضايجه منه ولا اريد حته اتقبله ما ادري شجاني ..

نزلت اتريكت وصعدت بعدني بالممر جان يصيحني تعالي انسولف رحت اريد اسمع من عنده

كعدت على الجربايه وهو كاعد كدامي من نظرات عيونه عرفت الي راح يحجي شي جبير ...

قيصر: شمه حقج عليه واعرف الي راح اتسمعي راح يزعلج هوايه بس والله بوقتهه جنت مجبور ..

شمه: شنو مجبور ؟؟؟

قيصر: عندي صديق من بغداد حيل صديقي وسافرنه سوه هو اهله عايشين هناك يعني دائما يروح ويرجع ...

اني من سافرت كعدت بشقه وحدي وضل هو يتردد عليه ومره من المرات عزموني يمهم المهم من صارت السالفه مال علاهن وقدمت على عوده للعراق رفضوا طلبي الا مده سنتين

شكد حاولت بكل الطرق ماخليت مكان مارحتله والله ليل نهار افتر بالسفاره بس اريد احصل موافقه وماكو فائده

هو جان يدري بالموضوع وحته اهله واصدقائي هم اقترحوا اخطب اخته لان هي محصله على اقامه وعن طريقهه احصل وارجع قبل المده..

ما اكلج وافقت بسرعه رحت سألت اكثر من واحد كالوا اذا هي عدهه اقامه انت تحصل خلال 6 اشهر وغايتي ارجع واخلصج من علاهن ...

هذا الحجي بعد ما مليت وماخليت واسطه ما دورتهه بس هناك تختلف القانون اهم شي..

خطبت اخت صديقي واتفقت وياهه مجرد احصل اقامه يعني مساعده منهه كالت ماعندي مشكله حصلهه وانفسخ الخطبه...

ورا الخطبه بشهر واني اركض بالمعامله مال الاقامه انطونه اجازه مده شهر لو تكمله دراسه

قدمت على الاجازه جانت احد شروطهه الي يرجع لبلده يخسر سنه ونص كامله مال دراسته ومايرجع بعد ...

ما عرفت بوقتهه بيمن اجازف بتعبي وسنيني كلهه لو اجازف بيج المهم قدمت على الاجازه واجيت ومالي حق ارجع بعد ..

كل هاي الشروط والمخططات من دولتنه الفاشله حته يضيفون ابناء المسؤؤلين بمكانه...

قبل لا ارجع باسبوع رحت عليهم اريد افسخ مثل ما اتفقنه رفضت وكالت اني ما اقبل واريد كامل حقوقي كبرت السالفه وادخلوا اهلهه ..

فهمتهم اني بعد ما ارجع وهي شلون تعيش بالعراق وتعوفوكم بس ما ادري كلهم جانوا مصرين ...

كل يوم يعادل سنه عندي وانتي بلانبار اجلت سالفتهه ورجعت وضلت ادك عليه كل هاي المده واني مثل بلاع الموس ...

شمه: كل كلمه يكولهه جانت سجين وتنغرز بكلبي كوه كدرت احجي ..

تكدر انت اطلكهه وادكول ما اريدهه لا ادور حجج...

قيصر: صحيح بس ابوهه خوش رجال واخوهه صديقي وهم من بغداد وناس معروفين مايريد بنته تطلك

شمه: افهم من كلامك انت تريد تزوجهه؟؟

قيصر: لا شأزوج منهه بس اريد احلهه بالتفاهم وبدون زعل ...

شمه: اوك قيصر من اتحلهه بالتفاهم وبدون زعل تعالي وهاي اذا لكيت حبك بعده بكلبي..

قيصر: شبيج يولي والله حته مخابره ما اخابرهه هي لازكه وتدري بيه كل هذا السويته علمودج واحبج ما اعتقد اكو وحده تقبل تزوج واحد يحب غيرهه

شمه: مايهمني تخابرهه ماتخابرهه كله هذا مايهم ..

قيصر من اني طفله وعيني من تشوفك دكوم تلمع كل هاي السنين حاربت وصبرت لأجلك كلشي اتحمل منك الا الخيانه والله ادوس على كلبي وانعل ابو الحب الي شبعني مذله

روح وثق زواجك بيهه اطلكهه ماعادت تفرق عندي هذا كلبي شبع صدمات من عندك من حبيتك من طرف واحد هذا غلط واني هسه جاي ادفع ثمن غلطتي ...

رجاءا مالك علاقه بيه اعتبرني ماموجوده بالبيت تحل هاي المشكله يله تجي تحاجيني ..

شوف اني احساسي مايخيب نهائيا وانت عمه فضه تدرون وضميتوهه عليه لو مصارحيني من اول يوم اتقبلهه بس هسه لااا...

يجوز ماتعرفني بعدك اني انانينه حيل وما اقبل واحد يشاركني باملاكي فأنت يا اما الي يا اما الهه ...

قيصر: على كيفج اهدي والله ماعندي شي وياهه غير الورق والي فهمتج علي ..

شمه: ماعندك شي وسامحلهه ادلعك ودكولك حبيبي لعد لوعندك شي شتحجي بعد ...

قيصر: شمه روحي ارتاحي وما اطول هاي السالفه راح تنحل

شمه: ما اعتقد راح تنحل واذا انحلت عندك اني ماتنحل عندي المهم مثل ماكتلك خليك بمكانك ولا تمثل دور المحب براسي من رخصتك...

عفته وطلعت محمله بجبل هموم شمرت نفسي على الجربايه من الصدمه مدري من كد القهر مابجيت بس كلبي هو اليبجي ...

تعبت من هاي الحياه ماشفت يوم حلو واحد وحته اذا يجي هذا اليوم اعيش ورا سنه قهر ....

فوك القهر امي وبناتهه هنا حته مالي طاقه اشوف شكولهن القذره وصلت للمرحله لو مامخافه الله انتحر واخلص...

علاقتي بقيصر حدود الكلام والسلام وبس كدامهم حته محد يشك وتشمت سناء بيه...

صادف يوم جمعه واجتي اسماء بعدهه صديقتي الوحيده الي من اول ماشافتني همست باذاني شبيج يولي مو ع بعضج...

اتذكرت كلامهه من كالت قيصر يتعبج ويزود همج همين بس جنت معميه اشوفه ملاك...

صعدت ويايه للغرفه جنت محتاجتهه حيل شمرت نفسي بحضنهه وبجيت طلعت المضموم بكلبي شكد كابرت وحاولت ما ابجي بس وصلت حدهه وما اتحمل بكد الشعره...

كعدت اسولفلهه كولشي تفاجأت اكثر مني بس كالعاده ما تنطي باخوهه..

اسماء: شمه ما اعرف الومه لو اكول خطيه والله يحبج واكبر دليل ضيع شهاده البورد من عنده على 6 اشهر بس بسبيل يوصلج..

شمه:تعرفين شنو خاطب وعلى ذمته وحده حتلوا مايحبهه مجرد ذكر اسمهه اشتعل نار

اسماء: حقج والله انتي خليج على وضعج هذا حته يحل الامور بسرعه والاسبوع الجاي تبدين اداومين وكافي دافنه عمرج بالحب والعذاب اطلعي امشي صادقي بنات واتونسي هاي بغداد تختلف عن الانبار عيشي حياتج ولو لمره فنيتي عمرج بحب قيصر...

شمه: اي ان شاء الله بس وجود سناء موترني وما مرتاحه وفوكاهه عمه فضه مخليتهن ياخذن راحتهن حته اكعد ب12 بليل الكاهن يشوفن تلفزيون..

اسماء: والله ياحبيبتي البارحه حجيت ويه ماما وكلتلهه نسيتي سناء شلون دفعتج وهدت عليج لاتنطيهن مجال بس امي هذا كلبهه شسويلهه ..

وفوكاهه قيصر لكالهن بيت بس مايكدر يكعدهن نسوان وحدهن وعدهن بنات يكول بغداد تخوف وخاصه اذا مهجرات وحاير منو يكعد وياهن...

شمه: فدوه طلعوهن منا والله اضوج من صوتهن روحي بعد ما اتحملهه ماخذات البيت طول بعرض وعبالك بيتهن ...

اسماء: ولايهمج حبيبه انتي الاصل وين راحت شمه ام السان الي تلعبهن تك رجل شجاج كومي طلعي من هاي الحفره وافرضي سيطرتج على البيت وشوفي منو الي تفتح حلكهه انتي فاسحتلهن مجال...

شمه: تدرين اسماء اني شؤؤم نحس عليكم كل مكان اطبله اهدمه واطلع اول ما اجيت هنا جنتوا مرتاحين ماصار شهر وشهد وضرغام مشاكلهم واصله للستار وحسام ووقار ملاحظتهم بس يتعاركون وغير سناء الغضب..

اسماء: شتحجين يولي انتي شمه ام كلب الطيب ترى حسام من يوم يومه هيج يغار على وقار من الهوه حته لكرايبهه متروح وهي تزعل ...

وشهد وضرغام صار سنين هم هيج انتي شعليج وسناء قابل دازه عليهه انتي...

شمه: ما ادري تعبت من نفسي ..

اسماء: كومي انزلي واريدج تشلعين الكاشي بمشيتج اليوم عيد ميلاد ماما ومسويلهه مفاجأخ كومي يولي جنج عجوز..

شمه: هو اني عجوز شضال بيه عمري 27 وبعدني مرحله ثانيه...

اسماء: هههه يله يالعجوز كومي يعني اني هم عجوز لايسمعج زيد ..

شمه: شلونه وياج

اسماء: زين الحمدلله بس طكه ونص مثل طبع ضرغام

شمه: الله يخليكم لبعض...

نزلت جوه اني واسماء لكيت سناء فارشه وكاعده اتلف كبه هي وبناتهه وعمه فضه واكفه وصافنه اشرتلهه براسي بمعنى شكو ؟؟

اشرتلي اجي وراهه للغرفه دحكت على سناء كانما البيت بيتهه وماخذه راحتهه رحت ورا عمه اول مادخلت لزمتني من ايدي وكعدتني...

فضه: شمه يمه اعرف بالصاير بينج وبين قيصر والله لو ادري قيصر مسوي غلط اني اول وحده اوكف بوجهه ليل نهار يحاول يخلص منهه بس يستحي من اهلهه لان ابوهه صاحب فضل علينه...

شمه: واني شنو ذنبي مامستعده اتقبله وعلى ذمته وحده ثانيه...

فضه: حقج يطلكهه بس انريدهه بالتفاهم ما يريد يخسر صديقه وابوهه ابوهه هو الي عين ضرغام وحسام وحته ماخله قيصر يطلع خارج بغداد مايصير نرجع فضله بلاساءه...

وفوك كل هذا هو بنفسه جاي يطلب من قيصر مايطلك يكوله اخوتي ياكلون وجهي والبنيه تريد قيصر وهو واكع بين حانه ومانه..

شمه: الله كريم عمه اني كتله حل المشكله يله انسولف..

فضه: الله يرضى عنج يابنيتي اريدج سباعيه ولاتخلين احد يشمت بيج وخاصه امج ..

شمه: عمه انتي ليش مكعدتهن ابيتجن والله يهجمنه ويطلعن وشدعوه مخليتهن ماخذات راحتهن...

فضه: ااووف ياشمه ما اعرف شحجي اني من اتزوجت عمري 18 سنه وتعلمت الاصول على ايد حسين جنت اذا اتذمر مايقبل وعلمني اكون وسيعه كلب حته ويه اعدائي..

وهن محسوبات علينه شنو بيدي اسوي اطردهن بشارع وهن الف دينار ماعدهن حته ذهبهن مدري وينه ..

والولد مايقبلون يطلعوهن وحدهن وهن شابات وارامل صعبه يابنتي واحنه مو محافظتنه ..

شمه: ميخالف عمه المفروض مايكعدن هاي الكعده ويشتغلن هن يكعدن ويسكتن اعذريني خاف تدخل بس انقهر من اشوفهن هيج...

فضه: والله يابنيتي تفاجأت من البارحه كلت بلجر اسوي كبه اشو هسه لكيتهن كاعدات يسوت واني جنت اصلي قضاء بعد شحجي والله الساني مايعرف يطلع الكلمه الموحلوه...

شمه: ياريت امي توصل لذره وحده منج بس تخسه امثلهه بيج

فضه: لا يحبيبتي انتي حبيبتي بمعزه اسماء واكثر

شمه: الله يخليج عمه ويطول بعمرج...

صدك هاي الانسانه عظيمه ما اعرف شحجي بحقهه مايوم لفظت كلمه موحلوه ولا قللت من شأن واحد ودومهه فاتحه بيتهه لصديق والعدوا...

مر اسبوع على نفس الحال قيصر خفارات حته ما اشوفه لو يجي ساعه لوماكوا وعنده عمليات ...

ضرغام كذلك حول دوامه مسائي ويبات هناك وهاي شهد اتخبلت دكول حته مايدحك بوجهي..

حسام غيرته قاتله صح وقار حلوه حيل بس مايخليهه تروح لاهلهه هوايه لان كاعدين يمهم بيت عمهم وجان ابن عمهه يريدهه وهذا متخبل وهي تعاند وامهم تهدي بيهم ....

بده الدوام وداومت اول يوم اني وبان لان هي هم انقبلت هندسه مرحله ثانيه اجه ابوعبير اخذني...

اول مره افوت لجامعه بغداد بس بان ويايه حيل حلوه تختلف عن الانبار هنا الحريه مالهه مثيل اللبس شلون والاصدقاء ...

بان لبسهه محتشم وحته مكياج خفيف وحلوه نازكه حقه وسام يحبهه واني لبسي طبيعي بنطرون وفوكا قميص للركبه ...

مرن 4 ايام على دوامي ارجع تعبانه بسرعه انام لان البيت صاير لعبان نفس من شروق ورونق وجهالهن وفضه ساكته كله عيب وفشله...

رجعت من الكليه بعد مانمت نزلت العصر شويه واسماء موجوده وقار مسويه كيكه ونتشاقه ونضحك اندك الباب راحت اسماء اتشوف منو؟؟

احنه بالمطبخ كلنه كاعدين وعمه فضه كاعده تفكر شتسوي عشااا..

طبت ابنيه لابسه بنطرون قماش اسود وفوكا قميص ماروني ولابسه توربان شكلهه طبيعي موحلوه حيل بس مرتبه ونازكه ...

وياهه وحده بعمر عمه فضه بعد مارحبن بيهن ودخلنه كلبي نغزني مامرتاحه مع العلم عمه فضه عدهه كرايب هوايه ودائما يجون...

بعد السلام والكلام كالت المره احنه جايين على الدكتور قيصر الخطوبه طولت والناس اكلت وجهنه والبنيه كاعده ومايصير هيج حجيه ..

احنه نعرفكم شيوخ وتعرفون الاصول تقبليهه على بنتج هيج معلكه كل هاي المده...

فضه: والله ما اعرف شحجي داده بس هاي خطيبته كدامج واحنه نعرف عليمن صارت الخطبه المفروض تلتزمون بلاتفاق..

الحجيه: عيوني ماكو اتفاق الدكتور خطب خطبه عاديه وهو يكول اتفقت ويامن اتفق...

فضه: شلون وهاي بنت عمه على ذمته ومن الصغر اله..

الحجيه: ماكو مره تاكل مره نعرف بهذا الشي بس رجاءا ما انريد انصير حجايه بحلوك الناس..

فضه: هسه المطلوب مني شنو اني مابيدي اي قرار يجي قيصر واتفاهموا ويااا..

شمه: اسمع بالنقاش وراسي يفتر احس نفسي بدوامه مبينه متمسكه بي وماتعوفه وبيت عمي عدهم اهم شي العيب...

احمد الله سناء وبناتهه ماكو طلعن جان صرت علج بحلوكهن راحت اسماء خابرت على قيصر وشهد ووقار اول مره يسمعن وصافنات...

البنيه كاعده وادحك عليه بطرف عينهه اتعس من تصرفات بلسم سمعت امهه كالتهه ماما غزل...

هلا هلا اسمهه غزل فوكاهه والله مبينه موهينه بس اريد اشوف قيصر شلون راح يواجهني كدامهه ..

احس كلبي بدون اي احساس بس صافنه واترقب الاحداث حته اسماء والبنات متفاجأت بيه عبالهن شمه راح تهد وتتعارك مايدرن ماضل بيهه حيل من جور الايام...

سمعت صوت سياره قيصر وفتحه الباب اول مادخل كال السلام عليكم...

كامن يسلمن علي وهو فاتح عيونه ومتعجب بجرأتهه وهي تسلم جانت عينه عليه وبيهه الف حجايه ....

كعدن يسولفن انب عفتهم وصعدت تقريبا نص ساعه شفتهن من فوك من راحن الام اتسوق وهي بصدر..

انفتح باب غرفتي عمه وقيصر اثنينهم مبينين من جيتهم وراهم مصيبه...

فضه: تعالي شمامه انسولف

شمه: اذا على هذا الموضوع لاتحجون شيريد يسوي خلي يسوي يطلك يتزوج ماتفرق..

فضه: شنو هالحجي شلون تنطي بسهوله..

شمه: هو راح ما انطيته اني

قيصر: شمه مقدر وضعج وحالتج التعبانه اكعدي خلي نتفاهم

شمه: شتتفاهم ماعندي حجي احجي ولا اريد اسمع ...

فضه: براحتج لاتضغط عليهه ..
بس الموضوع تأجل فتره علما ابوهه يشوف حل لان متعارك ويه اخوته ومايكدر يكولهم بنتي راح تفسخ..

شمه: اوك ...

طلعوا من الغرفه واني نار واغلي اريد شي اطفي بي غضبي اريد ارجع شمه القديمه الي ادافع عن نفسهه بكل ما تملك من قوه ..

بس للاسف ماعدت هيج كولشي بيه متحطم وتعبان كولشي منهار بيه اريد اوكف على رجليه مثل قبل بس لحظات العذاب ماتفارقني...

حته للعشا مانزلت شكد حاولن البنات وما حركت ساكن لحدما غفيت واني على نفس حالتي وتعبي ...

ب12 ونص فزيت شبعانه نوم كلت خلي انزل جوه اشوف شكو ماكو...

ويه نزلتي ومريت من باب الغرفه الي منطيهه لسناء وبناتهه وقفني صوتهن وهن يحجن ومامتبهات على هدوء الليل والصوت واضح...

بقيت واكفه اتسمع وكل كلمه احسهه خنجر ويغرز بكلبي وين عايشه بنص ياغابه شنو من مخططات عدهن ...

ما اتحملت دفعت الباب عليهن وطبيت من شافني كامن على حيلهن حسيت رجليه تشنجت انصدمت من هول المنظر...

دخيلك ياربي شنو هاي شجاي يصير ضليت واكفه اريد اتعارك واحجي بس صدمه المنظر جانت اكبر...

#يتبببع