وحوش بشريه الفصل السابع وأربعون 47 - بقلم Rozaya

#البارت الرابع والأربعون
#وحوش بشريه
#روزايه

انة ذآك الكاعِد متانيله صدفة تلمه بيك ،
انة ذاك الشاف كومه وجوه حلوه ،
وكلبه مارَف بس عليك !

شمه: دخلت هي وامهه وكعدت خلت رجل على رجل حيل كعدتهه موحلوه باركن لعمه فضه على زواج ضرغام ...

كامن ياخذن وينطن بالكلام لحدما وصلن لموضوعهن..

الام: اتفقنه لراس الشهر الزواج لان الدكتور مافارغ..

فضه: شنوو؟ ويامن اتفقتي

الام: غير قيصر حدد الموعد لان انريد انسافر ونأمن على غزوله..

فضه: لا اعذروني ماكو اي زواج يجي قيصر ونتفاهم..

الام: ليش عيوني شنو ماقابله ترى هذا الكلام مامقبول ..

فضه: خلي اكون صريحه وياكم واحجي بالمفيد لو على جثتي ما اخلي قيصر يجيب وحده على شمه واذا جان ناوي ابني يتزوج فأني لا امه ولا اعرفه...

كلكم تعرفون الاتفاق شنو وسويتوهه مساعده اله حته يرجع للعراق مو تستغلونه بنتج حلوه وشابه والف واحد يتمناهه وصدكي لو ما خاطب شمه تلكيني اول وحده داكه بابج..

بس ياعيوني عندي بناتي من روحي شمه اني ربيتهه وتعبت عليهه مستحيل اخلي قيصر حتلو ابني يكدر من خاطرهه ...

شوفه عينج هذا الجاي تباركيله اني ما احاجي لان ماقدر النعمه الي كدامه ...

اذا قيصر منطيكم كلام ومحدد الموعد اني اتبرى منه..

الام: صدمتيني انتي المره المثقفه الي اول ماشفت كلت فضه واسمهه عليهه يطلع منج هيج كلام..

فضه: اني هم مصدومه بنفسي لان حجيت هيج بوجه خطاري بس كلبي مثل الحمامه وتفرفرح على فريخاتهه اني هسه هيج...

والله وامانه الله اذا واحد من ولدي يجرء يظلم وحده من هذني الي كدامج اغضب علي ليوم الدين ...

شمه اعز من اسماء اني ربيتهه الام مو الي تحبل واتجيب الام الي تربي واني امهه وما اقبل قيصر يسوي هيج وخاصه اني اعرف موقفه شنو وانتو ضغطوا علي...

غزل: عيوني خاله شنو ضغطنه علي ترى اني وقيصر على علاقه حب من قبل ميسافر وجان مواعدني بزواج ...

بس كال بنتي عمي وحيده واهلهه شامريهه ولازم انقذهه عرضي هاي وميصير...

بعد شنو كربستي شمه مدري شسمهه براسه اني على ذمته هسه ومستحيل اطلك وخلي يكون بعلمكم اذا وصلت اقدم دعوه بالمحكمه واكول انتو تهددوني...

وقار: عيني لاتنسين نفسج انتي وين كاعده ترى ابيتنه وجاي تعلين صوتج...

غزل: انتي محد حاجي وياج لاتتدخلين ...

وقار: انتي تريدين تزوجين قيصر؟ وفوكاهه مجذبه ومصدكه جذبتهه قيصر يحبهه ...

شوفي عيني مو عبالج سود معناتهه اهنود هاي السوالف انعرفهن انتي وامج ماتريدن تفوتن الفرصه هم دكتور وهم شخصيه وهسه جايه اطالبين بزواج...

كومي منا احسن ما اطلع جنوني عليجن والله والقران اذا عتبتي الباب مره ثانيه اسحلج سحل بالمحاكم بتليفون واحد حضرتهه هم نزل وهم يدبج على السطح وجايه تهدد ...

الام: مع الاسف هيج طلعت عائله الدكتور المثقفين...

وقار: الي يدك الباب يلكه الجواب شتريدن انصفكلج على صلافه بنتج توكلي خاله واخذي البنيه احسن ما اخابر قيصر وهذيج الساعه يتصرف غير تصرف..

الام: احنه طالعين ام قيصر بس صدكي راح تتندمون لان اجيت احلهه بالتفاهم وياكم ومافاد...

وقار: هاهي خلي نتندم واحنه مانحب التفاهم انحب المشاكل ...

شمه: اخذن جنطهن وطلعن يدردمن عزاا بعينج وقار فرتهن فر اتذكر سوت بسعاد اتعس من خطبنه شهد ...

فضه: ولج لو اكول لحسام عليج يكسرج تكسر شلون تحاجين الضيف هيج

وقار: هن هذني ضيف معتبرتهن مايجن الا بالعين الحمره ...

وبعدين تعالي عمه الله وايدج ما دكوليله وخلي يكسرني تكسير ابنج من نوع خاص..

فضه: عزااا بعينج ولج استحي وقيره ام عيون...

وقار: قابل مجذبه اموت على تكسيره...

فضه: ولجن اخذنهه من يمي لا اكوملهه اني اكسرهه وخلي تموت بعد...

شمه: رغم الالم الي بي بس افرح من اشوف الكل يدافعلي وخاصه عمه فضه شلون دافعت بقوه واول مره تحجي هيج حجي...

ضلينه نضحك على وقار وهي تحجيلنه على تكسير حسام حته دموعي وكعت من الضحك يارب اجعلهه ضحكه خير...

حته شهد طلعت من القوقعه مالتهه وتضحك ويانه واسماء يمنه بس العروس الجديده بغرفتهه ما الهه وجه

عمه فضه خابرت قيصر وسولفتله على الصار ماسألتهه شكال ولا حجيت بالموضوع وصلت الى مرحله اتشبعت بالمصايب..

بليل التمينه داير مداي عمه فضه وانسولف نزلت العروس الجديده تمشي على كيفهه وتارسه حلكهه حمره...

الولد بلاستقبال يمهم جماعتهم واحنه كاعدين وحدنه من شفناهه ما انطيناهه وجه عبالك مسوين حزب...

كعدت يمنه وادحك على شهد من اتسولف وساعه تفر بحلكهه معاجبهه الحجي...

تغريد: خاله اشو ماعدكم اقرباء محد اجاكم...

فضه: ليش ماعدنه غير بالمناسبات يجون شعدهم جايين هسه..

تغريد: لعد زواجنه مو مناسبه...

فضه: مناسبه الج مو النه اني ما راضيه على زواجكم

تغريد: ليش خاله اشفتي مني بعدني بأولهه

فضه: المشكله مو وياج يابنيتي ويه ابن بطني حالج من حال البنات بس ماراضيه على ضرغام..

تغريد: ترى مو اول واحد يتزوج على مرته مابيهه شي اذا حب ويريد يتزوج..

فضه: سدي الموضوع بعد اتزوج وراح

تغريد: لا خاله انريد رضاتج وضرغام اتزوجني صراحه عن علاقه حب مده سنه وبوقتهه ما قبلت بس كال اريد يصير عندي اطفال ومرتي ماتخلف ...

فضه: ضرغام كال هيج؟؟

تغريد: اي بلي خاله هو كال

فضه: كتلج سدي الموضوع ماعايزه ضيجه خلك...

شمه: شهد ساكته اي رده فعل مابينت ولا عبالك الي كاعده يمهه ضرتهه والحجي عليهه ...

غمزتلي وقار معناتهه خلي انكوم اخذنه شهد ورحنه بغرفه حسام ...

كعدنه بالكاع ما انريد شهد تضوج ولو هي حقهه موهين عليهه...

وقار: شهوده لاتضوجين والله مبينه مفلفله منج...

شهد: اريد احجي الي بكلبي تعبت ما اعرف الوم ضرغام لو الوم نفسي...

صار كل هاي المده ويا واحبه حب موطبيعي شكد حاولت اضغط على نفسي واتغير بس ماكدرت...

اكيد تلومني ودكولن كله منج ما اتجاوزتي الصار وعشتي حياتج وليش مارحتي دكتور نفسي وليش وليش؟؟

صدكوني حاولت بكل الطرق احافظ على حبيبي بس فشلت من اني طفله واني اتعذب وانكتل واتجوى...

جسمي كله اثرات اتخيلن منين ما يشوف ضرغام يلكه اثر مرات يسب ويلعن باهلي ومرات يتجاوزههه..

مايوم نمت اذا ماحلمت بكابوس من اعتدوا عليه صحيح لازم انسى بس موبيدي والله واني اتذكر نفسي بين 3 زلم...

تدرن حته اكول ضرغام مايحبني مجرد شفقه لا اكثر لان ماكو رجال يتقبل مرته معتدين عليهه ...

صدكوني تعبت والله يوميه البس واتحضر وكانما عروس وانتظر ضرغام بس يتقربلي انهار ومرات اصير خشبه حته اعذبه وياي...

وصلت الى حاله اكوم اعيط واشلع شعري اضرب اخدودي بس اريد الذكريات تروح..

انحرم من ابسط حقوقه وماشاف شي من زواجه اني حجر عاثر بطريقه والله لو عندي اهل جان التجأت الهم على الاقل جان زعلت على تصرفه ...

اني كمت احس بضرغام تغير حيل مرات اشوفه صافن عليه ما اعرف بيمن يفكر مرات يستخطيني حته ما انهار وارجع اتذكر الصار..

بس هو راحته من كل هذا وين ياخذه الليل والنهار ابدال مايرجع يشمر نفسه باحضان مرته يجي يلكه شهد مثل المجنونه ...

وقار: شهد ليش ماطلبتي منه ياخذج لطبيب نفسي ترى موعيب تتعالجين احسن ما تضلين هيج والى متى ؟؟

شهد: لا تلومني اول ما اتزوجنه وشاف حالتي هيج اخذني للطبيب بس ما استفاديت شي تدرين زادت حالتي ماقلت ...

من اروح يطلب مني احجيله كلشي حته التفاصيل وما اكدر احجي واتعب حسيت نفسي مجنونه تخبلت حته هو كال خلي يولي ما انروح بعد لان حالتج زادت...

شمه: والله ياشهد ما اعرف شنحجي بس انكول الله يساعدج ويصبرج على هذا البلاء...

شهد: الله كريم فرج الله على ساعه...

شمه: بديت انعس وخلصت السوالف كل وحده راحت لغرفتهه بس خليت راسي غفيت اريد اهرب بعيد عن ضجيج الدنيا اريد ارتاح ....

ثاني يوم صاحتني عمه فضه والضحكه بوجهه ...

فضه: شمامه خلصتي من غزل مدري شسمهه طلكهه قيصر..

شمه: صدك؟؟ شلون

فضه: والله هسه كالي من سوايتهه مال البارحه متخبل شلون تجرأ وهيج تحجي ومسولف لابوهه وطلعن يجن بدون علم ابوهه

شمه: الله يديم فرحتج عمه وبوستهه ..

مر اليوم وقيصر ما اجه لان دوامه متعب وخفارات وضرغام نفس وضعه عيونه تلاحق شهد وين ماتروح وهي مامعبرته ابد ...

ما اعرف بشنو تفكر وليش تصرف هيج ووين تريد توصل ...

كل معاني الحب واضحه بعيون ضرغام ويوميه شهد من تنام تقفل الباب بيوم الي الهه يجي يدك الباب وماتفتحه ويروح ..

استمرت على هاي التصرفات شكم يوم خلت ضرغام متخبل كام يفتر وراهه وهي ولاتعبره ...

قيصر مايحجي ويايه فوكاهه هو الزعلان اني ملتهيه بدوامي بعدني على نفس وضعي كلساع تجيني نوبه مال اخبال مدري شأسميهه...

حالتي كامت تزداد سوء وشنو اكله اتقئ كل هذا مثل ميكولون شايلته بحيلي ...

بيوم منهن طلعت من الامتحانات ودخت جنت امشي ويه البنات ماحسيت نفسي غير واكعه بالكاع...

ما اعرف شكد مر الوقت بس فتحت عيوني والبنات يمي جسمي نحلان حيل واتقئ ...

دايخه حيل ما اكدر اكوم طلعت رقم قيصر ودكيت علي...

قيصر: الووو

شمه: قيصر اني تعبانه تعال اخذني وكعت بالكليه..

قيصر: ليش شبيج وشوكت تخربطتي..

شمه: هسه انتبهت وما اكدر اتحرك..

قيصر: حبيبتي 5 دقايق وادخل للعمليه ما اكدر اجي راح ادزلج حساك يجي ياخذج ويجيبج يمي اسويلج فحوصات..

شمه: ماشي...

ضليت انتظر ورا نص ساعه اجه حسام طلعت امشي كوه اجر برجليه اخذني لمستشفى مدينه الطب ومباشره لغرفه قيصر ضليت انتظر وهو بالعمليات..

مرت ساعه كامله يله اجه لابس ملابس العمليات ..

قيصر: هاحبيبي شلونج

شمه: زينه بس دايخه شويه وجسمي تعبان..

قيصر: كومي نامي على السديه افحصج ..

شمه: رحت مددت على السديه اجه يمي اول ما قاس ضغطي طلع طبيعي...

خله السماعه على كلبه نبضاته طبيعيه شفته ابتسم ..

شمه: ليش ابتسمت؟؟

قيصر: اتذكرت اول مره من قست كلبج شلون جان ينبض سريع حته بوقتهه تفاجأت رفعت راسي عليج لكيت عيونج اترجم نبضاتج...

شمه: وهسه شبي كلبي واكف؟؟

قيصر: دكومي مابيج شي شلون واكف وتحجين هسه ما ادري هالعقل شنو بي ...

شمه: كمل فحص راد يسويلي تحاليل بس ماقبلت كتله خلي نرجع للبيت ...

رجعنه وطول الطريق ساكتين اي كلام ماكو ما اعرف هالبرود شنو؟؟

وصلنه للبيت بعدنه بالمطبخ ونسمع صوت الصياح والعركه ما عرفت شكو

بس سمعت تغريد تصيح امشي منا لوبيج خير ما اتزوج عليج واجه حبني هم شايفه نفسج وانتي ناموا وياج 3 زلم...

فتحت عيني على وسعهن دحكت على قيصر متفاجئ بكلامهه ...

التفتت شفت ضرغام واكف ورانه والظاهر سمع كل الحجي فات من يمنه وطب كدامنه وصاح تغريييد

#يتببع