وحوش بشريه الفصل السادس وأربعون 46 - بقلم Rozaya

#البارت الأخير
#وحوش بشريه
#روزايه

ما بطل محبتك يالعشت بيك ..
و صدك لو تركتك ذابت الروح ..
يا مبدأ حياتي البيك ارتاح ..
و بس يمك الملم كل الجروح ..
ما غيرك احب بالدنيا مخلوق ..
رغم بعدك اشم رياحك تفوح ..
يا مدري شوصفك انس لو جان ..
و قلبي الي يتبعك وين متروح ..
بسمك انا صاير انده الناس ..
لان بسمك لساني دوم مفضوح ..
احبك مو بديه و عاشقك للموت ..
و احس صدري بكلامك صار مشروح ..
قصر حبك بـ قلبي وبيدي بانيه ..
وتعال اسكن بقصرك الك مفتوح ..
.....

شمه: دخل ضرغام وعيونه بكصته بدون اي مقدمات ضرب تغريد راشدي من قوته رادت توكع واستندت على التخم ما انطاهه مجال حته تحجي حرف واحد ...

بس كالت ضرغام اني ما.....
ضربهه الراشدي الثاني محد ادخل الكل واكف يدحك ...

انهدت على ضرغام تغلط وتصيح وكل الغلط جان من نصيب شهد حته حجي موحلو كالته عليهه..

ماشايفه هيج وحده حلكهه يجري دم وكل كلمه دكولهه يضربهه وهي بكل صلافه عين ماكو كلمه ماحجتهه بحق شهد ...

حته على عمه فضه حجت وسبتهه من وصلت لهنا ادخل قيصر...

قيصر: سدي حلكج لا اكسر راسج اشو ماعندج احترام قليله ادب اهلج انطوج خبز ما انطوج تربيه ..

وانت ضرغام اذا شفت عاي كدامي خلال 5 دقايق بالبيت احرك البيت على راسك رجعهه للبيئه الي جبتهه منهه ...

صاح بينه كل وحده تروح لغرفتهه عمه فضه لازمه ايد شهد وسحبتهه وراهه واحنه رحنه وياهه..

خطيه شهد ماعرفت حته ادافع عن نفسهه بس ذكروا الحادثه كامت ترجف وعبالك هسه صايره كدامهه...

حضنتهه عمه وتهدي بيهه بس مثل السعفه واجتهه عاصفه كل اعظائهه ترجف...

والله محد يلومهه وفوكاهه انكول انسي شتنسه واقل فرصه يعيروهه ..

جان كلام تغريد مثل الصاعقه على شهد وهي تذكرهه بماضي اليم...

دموعهه تجري بصدمه والم رغم ماحاضنتهه عمه فضه بس مثل الطفل المفزوع ترجف...

مانسمع صوت برا الظاهر راحت لاهلهه وقار راحت تشوف بنتهه تخاف من الهوسه ومن الصوت العالي...

بعدنه نهدي بشهد انفتح الباب ضرغام مباشره اخذ شهد من ايد عمه فضه وحضنهه...

حضنته تختلف جانت عباره عن امان ضامهه لصدره ومخلي ايده فوك راسهه نسى وجودنه اني وامه..

شهد تبجي بكل قوتهه وحركه كلبهه وهو مخلي راسه فوك راسهه ودموعه تنزل...

شكد اتحملتوا ضيم وقهر شوكت تفرج عليكم وتشوفون الراحه....

طلعنه اني وعمه وهم وحدهم عفناهم لكينه قيصر كاعد ومخلي بنت حسام بحضنه يلعب بيهه...

قيصر: هاا يمه شلونهه شهد؟؟

فضه: اووف شوكت ترتاح هاليتيمه شكول عليك ضرغام دمرت البنيه فوك كسرتهه جبتلهه وحده منين مامنين..

قيصر: ابنج غبي عالج الخطأ بخطأ اكبر منه ابدال ماتبتعد عنهه حاول وياهه اكثر من مره كتله عرضهه على طبيب نفسي ...

بس اريد اعرف من سوه هيج شنو جان اباله مثلا يكون عائله ثانيه بدون شهد وهو يحبهه وعيونه تفتر وراهه...

فضه: هاي صارت بعد والله على الشفته من هاي اليوم ما اخلي يرجعهه ابيتي لو على جثتي ..

ولك قيصر انهدت على البنيه غلط ماينلبس علي ثوب مال وحده مال شوارع وشهد حرف ماجاوبتهه لان شتحجي وهيج وحده السانهه اطول منهه..

قيصر: ليش تعاركن وهي شصارهه حته تتعارك وتشوفنه سباعيتهه...

فضه: شهد غسلت مواعين الغده وكلتلهه اصعدي ارتاحي الولد من يجون اني اصبلهم وشمه تغسلهن ...

هي المحروسه معلكه بغرفتهه نزلت ويه ماشهد خلصت مواعين اكلت وعافت المواعين على الميز ...

شهد المسكينه حته موبالهه شالتهن تريد تغسلهن اني صحت بيهه كلتلهه عوفيهن هي تغسلهن...

شهوده عافتهن وراحت تعزل بالهول هاي بنت حسام جنهه جنيه مهوسه البيت...

اشو هاي تعالي على شهد جريهه من دشداشتهه واخذيهه سحل للمطبخ وتتأمر عليهه تعالي اغسلي المواعين....

شهد دفعتهه حيل وهاي انهدت عليهه بالغلط والفشار اريد اسكتهه ماكو هاي لحك ضرعام على لاشي حجي ماينحجي والله الولد مايلفظه شلون بنيه مثلهه تحجي هيج...

قيصر: الصوج بضرغام منين جابهه هي لوبيهه خير ما التفتت على متزوج وتدري بي يحب مرته...

فضه: يايمه موهيج عمري ماشايفه هيج وحده عدهه قابليه على الغلط موطبيعيه..

تالي تدري عليمن طلعت متخبله وتعاركت ؟؟؟

البارحه ضرغام مانايم يمهه هي موليلهه الهه وليله لشهد والله يسلمهه شهد تقفل الباب وماتخلي ينطب...

والبارحه الليله لشهد ومن قافله الباب شهد راح نايم يم وسام وهي متخبله ...

والصبح من كعدنه نتريك صاح لشهد تكعد بصفه جنه اخوك مشتاق ومستحي يحجي...

قيصر: هسه ينتبه على نفسه ومتاكد يطلكهه لان هو يحب شهد بس ما اعرف شنو افسر تصرفه هذا...

فضه: اااوف مكتوبلنه شلعان الكلب يوميه هرجه عند العرجه...

اكلك يمه هاي شمامتك ماتاكل ووجهه اصفر متشوفهه ..

قيصر: اي يمه باجر اخذهه اسويلهه فحوصات كامله لان ماعاجبني وضعهه واليوم متخربطه بالدوام...

فضه: انت شمنتظر ما تزوج اشو البنيه وجاهزه ...

قيصر: اي ان شاء الله منا وهيج بس خلي اشوف شمه شبيهه...

شمه: مابيه شي بس ادوخ ونفسي تلعب...

فضه: عزاا اعراض حمل ولك قويصر هااا؟؟

قيصر: ههههه يمه دخيلج خلي احصل بوسه هسه وعود حمل راسهه يابس وتزعل ...

شمه: اني راسي يابس؟؟

قيصر: اي انتي بس دواج يمي هسه اكول خطيه خلي نتزوج واريد اكسر هذا الراس اليابس...

شمه: دحكت على صفح ودرت وجهي اجه وسام من الدوام ومسوي الفايل على شكل ميكرفون ويصيح...

وسام: يمه شنو غدااانه ؟؟

فضه: سلم ولك بلاول حاير ابطنك...

وسام: هااا السلام عليكم يادار قوم مؤمنين..

هذا قيصر هنا قبل ما اتغده اريد اكول شي..

قيصر: كول خير بسلا متعارك...

وسام: لا اريد تروحون تخطبولي بان بنت خالي ...

فضه: اسكت يمصخم خالك مره كتله وكال سدي الموضوع وسام طايش...

وسام: اسمعي فضه اخطبهه لو عشيره اخوج كلهه تعترض واذا لزم الامر احركه وهو ومرته ام حواجب...

قيصر اني اريد تحاجي خالي الحقنه وكله وسام يريد بان ...

قيصر: خلي تتخرج البنيه واتخرج انت وبعدهه فكر بزواج...

وسام: عادي تتخرج يمي واني كل مرحله نايم بيهه سنتين وابشرك السنه ما انجح لان غشيت بماده ورسبوني وراح يدز عليك العميد ...

واني اداوم بس علمود اشوفهه لا اكثر ..

قيصر: طيح الله حضك من تزوج شتصرف عليهه وانت مابيك حظ وفوكاهه راسب..

وسام: مالكم علاقه حته افلوس زواجي جامعهه ترى ليل نهار اشتغل بس حرك روحك يا اخوي ماتحس بمعاناه المحب مو كلبي انشلع...

قيصر: هي تدري بيك سالتهه موافقه لا؟؟

وسام: شكو اسألهه تقبل وغصبا عنهه والله اذا ماقبلت اخطفهه واشرد بس مالك علاقه روح احجي والهوه بضهرك...

قيصر: الله كريم..

وسام: ادري كريم روح باجر حباب ترى رجليه صارت خيوط من ورا الروحه والرجعه وراهه جني مخبل افتر وراهه وهي تبيع ثكل عليه...

فضه: روح اتغده وان شاء الله خير...

شمه: الساعات تركض ركض ثاني يوم اخذني قيصر ويا للمستشفى ماخله تحليل وفحص ماسوا وكله طبيعي ...

من رجعنه بالطريق ضليته انسولف ليش هيج حالتي واحجيله عن الاحلام الي اشوفهه...

قيصر: شنو هاي شو ماحاجيتلي من شوكت تشوفين هيج..

شمه: من زمان من جنت صغيره حته جنت اشوف القريه تحترك ومرات احس بواحد يخلي ايده على كتفي واشوف شغلات تخوف..

قيصر: الله عليج يعني كل هذا وساكته ماحجيتي من يوم اثنين...

شمه: دائما اقره قران وحته اذا حجيت قابل شراح تسوون..

قيصر: هسه من نرجع سولفي لأمي هي تعرف بهاي السوالف ...

شمه: رجعنه للبيت سولفنه لعمه فضه اتخبلت كالت هسه ناخذهه لشيخ بلاعظميه مانعوفهه هاي كل مشاكلهه من ورا هذا الشي...

صدك اخذتني عمه فضه ورحنه قره على راسي ايات وانطاني مي قاري علي سوره البقره كال اتشربي 7 ايام...

استمريت علي وبدت حالتي تتحسن ونفسيتي مرتاحه بديت احضر لزواجي والكل مخبوص...

ضرغام مانحس غير اجه وكال طلكت تغريد وثاني يوم اخذ شهد وسافروا للبنان يريد يعرضهه على طبيب نفسي.....

بس شهد حيل بارده ويه ضرغام خاصه بعد العركه الاخيره عبالهه هو الحاجي لتغريد على سالفتهه ...

بس بيوم منهن كال تغريد سامعه شهد تحجيلجن ومتسمعه شلون اني احجي على شهد هيج..

وسام خطبوله بان وخالهم بلاول اعترض بس من سمع ابنته موافقه سكت...

الدنيا ماشايلته بس طلع اكثر واحد عصبي بيهم كلمته وحده ومايتنازل ابد خطيه تجي تشكي دكول راسه يابس...

اما حسام ووقار هذوله اثنينهم الغيره عاميتهم وقار تغار علي لان صار مدير عام والموظفات كلهن شابات وحسام كذلك الغيره عاميته لان وقار حلوه حيل ومن تطلع العيون عليهه...

قرب موعد زواجنه وقيصر حته ما اشوفه يركض بين العياده بين الدوام والبيت اطلع ويه اسماء ووقار اجهز ارجع حته رجليه مورمه من الفره مال السوك...

قبل العرس بأسبوع خالاته اجن وعمه فضه فرحتهه ماتنوصف وضرغام وشهد رجعوا وحالتهه متحسنه شويه احسن من قبل ...

بيوم العرس جنت مرتبكه حيييل وخايفه الحفله صارت بالقاعه ومناك للفندق بدلتي جانت ربع ردن ومستوره ..

اول مادخلنه للغرفه باسني من راسي وباركلي شمه ام السان بلعت لسانهه وخايفه وخجلانه...

بعد ماصلينه وتعشينه كمت لميت الاكل وخليته بالثلاجه وهو مدد على الجربايه غسلت واجيت ..

فتحلي ايده رحت مددت بحضنه يلعب بشعري ويهمسلي بكلمات الغزل واني مغمضه عيونه...

رفع راسي بأيده وباسني بوسه عميقه شويه وابتعد رجعت بوسته اني من ركبته ...

هنا استلم الاشاره بالموافقه اخذني بعالم ثاني ياما وياما اتمنيت هذا اليوم وهاي الساعه ...

عاملني بكل حب وحنان حته نسيت كولشي خوفي وخجلي جنت خايفه من قيصر ماتوقعته هلكد حنين بتعامله ...

رفع نفسه من عندي وهو يطبع بوسات متفرقه على وجهي وراسي وكلمه مبروك اكثر من مره سمعتهه...

جانت تطلع من كل كلبي جر راسي وباسني حيييل من راسي وكال يابنيتي يارفعه راسي...

جر الغطا عليه وكام يسبح ضليت مدده بمكانه وسارحه في دنيا ثانيه احس بألم قليل ضليت على نفس وضعيتي لحدما طلع...

شمه: نعيما حبيبي

قيصر: الله ينعم عليج شمامتي كومي اسبحي..

شمه: اي هسه اكوم بس اطلع من الغرفه ...

قيصر: ليش اطلع ؟؟

شمه: عجل شلون اكوم كدامك واني هيج حالتي ..

قيصر: كومي يولي هسه جنتي بين اديه وشفت الي يعجبني ..

شمه: اوو قيصر لاتخجلني ....
لفيت راسي بالغطا جان يجي يشيلني اني والشرشف لازمته لايوكع ...

دفنت راسي بركبته وهو يبوس بيه نزلني بالحمام وفتحلي المي وطلع ...

جانت احلى ليله بعمري اخذني قيصر بحضنه ويسمعني احلى كلمات الغزل والحب...

ثاني يوم رجعنه للبيت والهلاهل والصلوات ماحسيت بتغيير لان هو نفسه بيتي وعايشه عمري بي...

مرت ايام زواجي احلى ايام رجعت داومت ونجحت للرابع ...

مرت الايام سريعه قيصر دوام وخفارات واني مخلصتهه نوم...

شهد ووقار اثنينهم حوامل وكوه يتحركن ووسام بعالم ثاني عايش ويه بان حته متغير وهادئ بس بعده على نفس التحشيش...

رافد ونوفل عايشين بالغربه بروما ومرات يخابرون شهد ونسمع اخبارهم...

امي وبناتهه عايشات يم نعمان الي سمعته صاير بيهه مرض بالرئه ...

تخرجت من الرابع ومباشره اشتغلت بالمشاريع مرات اطلع بتخطيط مشاريع الجسور والعمارات ...

تعينت ورا 4 اشهر من تخرجي وماجنت متوقعه يطلع تعيني ابد بس اذا راد رب العالمين يكرم يبهر....

كل هاي المده واني ماصار عندي حمل بديت الح على قيصر حته انراجع راجعت وهنا جانت صدمه الي دخلت بكأبه موطبيعيه...

طلع عندي ضعف بالمبايض على كولت عمه فضه من كثر الهبطات الي شفتيهه بحياتج...

ولحد هذا اليوم اني ماخليت مكان ماراجعت ونفس الحجي الله مارزقني بطفل شكد حاولت ويه قيصر حته انسوي اطفال انابيب ومايقبل ....

مرات انقهر واكعد ابجي واني اشوف قيصر كبر وشعره ابيض وهو ماعنده طفل يشيل اسمه ...

ومرات افكر خاف يجي يوم يتزوج بحجه الطفل هوايه افكار موحلوه تراودني ...

بس مكتوب عليه ابد ما اتم فرحتي ولازم تضل ناقصه...

ابوي لهذا اليوم ومانعرف شي عنه عدل ميت محد يدري ...

لهنا وانتهت قصتي من معاناه والم وخذلان كلهه عشتهه بفتره العشرين ومن اتذكر العشرينات كلبي يوجعني ...

كبرت على الالم جان ذنبي عشت بنص ووحوش بشريه كل همهم الدم والثار ...

عايشه حياتي طبيعيه ودوامي متعب ليل نهار افتر بالمشاريع والحمدلله رغم النقص مال الحمل بس الله رزقني مكان زين وصرت مديره المشاريع للقطاع الخاص ....

قيصر ساندني بكل خطوه يكول فخور بيج من يكولون المهندسه شيماء زوجتك ...

هذا شي بسيط اكدر ارجع قطره من تعبكم وبفضل دعاء عمه فضه وصلت لهنا....

اني من النوع الي ابد ميتابع قصص لان مشغوله بدوامي بس صدفه جنت معزومه على حفله اخت انمار طالبه ويايه بالكليه...

وهناك اكو وحده اتصور وموجهه الكاميرا عليه اكثر من مره نبهتهه ومافاد بساعتهه عصبت وتعرفون شمه من تعصب تفقد....

كمت اتعاركت وياهه وهي ماشاء الله وكحه حيل صارت هوسه وانفعلت ...

كعدت على الكرسي واني عصبيه انتبهت على اثنين بنات يدحكن عليه ومستغربات ...

سألت عليهن كالوا هاي مسره مرت انمار شكد جانت اخته تحجيلي عنه وشلون يحبهه حجيت وياهه وراحت جابتلي مي....

ضلت صديقتهه الي هي روزايه كاعده سالتني ليش عصبيه وسولفتلهه اجتي مسره واتشاقيت وياهه شلون انتظرتي كل هاي السنين ونسيت نفسي شكد انتظرت قيصر...

اخذتنه السوالف وتعرفنه من هاي اللحظه تبادلنه الحسابات وتعرفت على روزايه ومن هاي بديت احجيلهه قصتي والي شفته ...

طلبت من عندي تنشرهه وبعد تفكير يله وافقت بدون علم قيصر لان مايقبل...

شكرا الكم ولكل وحده دعتلي ربي يحفظكم وين ماتكونو الي اطلبه منكم تدعولي الله يرزقني طفل لان تعبت واني اراجع بدون جدوى...

.....

حبايب قلبي لهنا انتهت قصتنه بكل ماتحمل من معاناه كلنه بجينه وضحكنه ...

شفنه بعينه كل ظالم يشرب من نفس الكاس وحوبه اليتيم ما تخطي ابد ياما وياما ناس ظلمت وعبالهه راح يدوم الهه ووكعوا بشر اعمالهم....

اشكركم من كل كلبي على تفاعلكم للقصه وحصلت نصف مليون بفضلكم...

ما انسى فضلكم ابد واتمنى تعذروني بالفتره الاخيره قصرت وياكم بسبب الظروف الي عكست ويايه ...

دعوه من كل قلبي ربي يرزقكم السعاده وين ماتكونوااا..

انتضروني بقصه جديده ولوا لحد الان ما مقرره شختار قصه مثل مامتعلمين دائما قصصي ذات هدف ومعنى ولازم انتقي قصه تعجبكم....

احبكم❤