رواية وقد كانت صدفة الفصل الثاني وأربعون 42 - بقلم غـدير عبداللّٰه

"وقد كانت صدفة"

النيه چانت بس احبك
وما احب كلشي يخصك
تالي حبيت المحله الأنت بيها
وأهلك وناسك وعطرك...
________________________________

ميسم:گلت الماما على فكرة سيف يقدم العرس هي هم قبلت گتله...

.. ادري ماما هيج بسرعه تردين تخلصين من عندي؟

..يي قابل شنو عندج جامعه لو شنو مثلاً؟...

ميسم:ماما لعد ليش سموه فترة خطوبه غير اتعرف عليه اشوفه اعرف اطباعه شلون...

..يي هسه أنتِ شنو الي تردي؟

ميسم: تحجين وياه تگليله مو هسه العرس بعده ومن هاي السوالف يعني تقنعي لسنه الجديده ما بقاله شي...

..وأنتِ هيج متأمله شمدريج عايشين ميتين والله عليج سوالف...

ميسم:ضليت أتوسل بيه قتنعت وخابرت أمه گال اله ماشي بس الشهر الجاي العقد وافقت اني تمام لان لي هسه ما اعرف طبعه شنو يحب شنو يكره لعد ليش سموه فترة خطوبه شو العالم مدري شبيه كله تريد تخلص مني عبالك نايمه على گلبه ...

مشت الايام وصار شهر حددنه يوم الي رح يتم بيه العقد
صار يوم جمعه العقد احسن حتى عطله ما ردت اخذ اجازه وهم منا يردون زله حتى يبطلونه من الشغل...

وجان تندگ الباب الصبح كله نايمه بس اني گعدت على صوت الباب تندگ بقوه نزلت حتى ما غسلت وجهي اريد اشوف منو هذا هيج يدگه سحبت الشال خليته على راسي وطلعت فتحت باب المطبخ وطلعت بره والباب مستمره على نفس الدگه صحت....

ميسم:جايه جايه صبر...

فتحت وإذا اشوف سيف وعيون تبوح بالعصبيه وملامح الغضب مبينه على وجه دخل ولزمني من شعري وعتني حيل...

سيف: احجي شلي بينج وبينه احجي ،يحجي بعصبيه بس بصوت ناصي حتى خاف يسمعنه احد...

ميسم:لزمت أيده،اخخخ شعري سيف شبيك اخخخ على كيفك ولك شبيك...

سيف:لتگليلي ولك هم الج عين وتحجين اني الغبي الي صدگتج وامنت بيج وحجيتلج كُلشِ عني وحبيتج من كل گلبي هيج تسوين بيه ولج تخونيني احجي يا حقيره والو انتو كلكم من نفس الطينيه ما بيجن امان...

ميسم:يحجي ويعت بشعري وبنفس الوقت مصدومه من كلامه شنو ومنو هو ما فهمت عليه،اخخخ شعري هو منو غير افتهم انت عن منو دتحجي اخخخ سيف وجعتني...

سيف: وتسوي نفسه متدري شدد قبضته حيل على شعري، لج اني وحده تضحك عليه وتوهمني بحبه بعدين الگاه مسويه علاقه ويه اخويه وصديقي يجني يگلي متفيدك،وجان يضربني راجدي حسيت اذني صوفرت،وفزيت ...

ميسم:شهگت وضليت اتنفس بسرعه،دخيلك ربي شنو هذا ضليت اباوع منا ومنا ماكو احد واني بعدني بالغرفه مالتي وعلى فراشي خليت ايدي على خدي شنو هل حلم الله يستر دخيلك ربي الله يعدي هل يوم على خير شفت الساعه بال10حيل هاي بيش الساعه رح اتاخر على الصالون نزلت بسرعه غسلت وجهي لكيت ماما دتطبخ بالغده گتله ليش ما گعدتيني مو ورايه صالون ...

..ما ادري نسيت عندج صالون وابوج خبصني مدري شنو عنده من الصبح يخابر يمكن على عماتج حيجن هم...

ميسم:تمام لعد اني اتريگ واروح بسيارتي...

أكلت شويه حتى ما الي نفس من بعد الحلم ما ادري اكو شي بداخلي خايف...خلصت لبست ملابسي وركبت السيارة ورحت للصالون جنت حاجزه عده دخلت سوت الي تنضيف بشره وبعده بالشت بالتسريحه والمكياج ختاريته بسيطه والمكياج أكثر شي تركز الي على العيون ويه اللبس الي ح لبسه نفس فستاني الاحمر الي لبسته بعرس ماهر ماادري ليش حبيت هاي بعد الفستان الابيض مال العقد...

جنت هواي مخطط لشغلات بس من وره حلم اليوم كُلش خفت ولو همه يگولون احلام الصبح متتحق بس متخوفه منه المهم خلصت صارت الساعه بال2 لبست عبايه اسلاميه مالتي ورجعت للبيت دخلت للصاله مزينه تجننن وطاوله موجودة ومخلين عليه القفل والقرآن وام سبع عيون وسوالف العقد يجنن درت وجهي واذا بابا يباوعلي مبتسم ما تحملت رحت حضنته باس راسي على كيف وبعينه الدمعه گال بضحكه...

..بابا دربالج على التسريحه لتخرب وشيسوي بينه سيف اذا تخربت...

ميسم:من شفت منضره ما تحملت نزلت دموعي وضحكت، عادي يرحن الك فدوه بابا جان تكول...

..تره اني اغار والله...

ضحكنه عليه بعدين صبت الي اكل أكلت لان جنت ميته جوع من الريوگ وما أكلت بس الماي دخل معدتي ،سألت ماما على عماتي گالت يجن بال3 ،عندي عمات3متزوجات وكل وحده بمكان وكل وحده عده بنيه و ولد ميحبون يكثرون بالجهال...

المهم صار الوقت واجن عماتي أجت شهد وايلاف بعده ما اجت وتلفوني خالص شحنه اجت شهد ساعدتني بالفستان الابيض مال العقد وگعدت انتضر بغرفتي وشهد يمي شويه وصعدن بنات عمتي حبابات كلهن ويستحن المهم صار وقت العقد واجوا أهل سيف اجه الشيخ وگالوا...

..خلي تنزل العروس اني هنا متت خوف والتوتر وايلاف ما ادري وينه بس هي الوحيده الي تفهمني نزلت والبنات ورايه واشتغلت الهلاهل  وعيني تدور عليه ما هيه .

جانن عماتي وماما وأمه سيف  مو هواي من گرايبهم جاين بس خالته واخته وبعد نسوان ثنين ما اعرفهم...

اجيت وگعدت على الكرسي وخلو مثل الطرحه على راسي بيضه وبحضني قرآن على سورة الفتح وسبع هيلات بين اصابيعي واكو مثل نجانه بيه ماي ورق الياس وشهد فوگ راسي لازمه شب ما اعرف شنو تفركه فوگ راسي، واني عيني على الباب بلكي تجي....دخلت وأخيراً هيه وأمه باوعتله هيه فتهمتني اجت لزمت أيده حيل وبالگوه لازمه اعصابي مادري من ومتوتره كُلش ...

بده الشيخ يعقد لسيف بالاول بعده اجه إليه يعقد جنت قريب الباب بحيث اسمعه شنو يحجي بده وكون اخر  مره لازم انطي جوابي خلص الاخيره ومنتضر جوابي ضليت ساكته وايد الثانيه ترجف وايد لازمه بيه ايد ايلاف عاده مره لخ...

..هل تقبلين الزواج من موكلي سيف أن قبلي قولي نعم وانت وكيلي؟ سحبت نفس وجمعت قوتي وكلت بصوت يرجف...

ميسم:نعم وانت وكيلي،وجان تعله الهلاهل والتبريكات اسمعه بس احس عقلي فصل ماادري شنو صار بيه وخروا عني الطرحه وگمت بسرعه دخت ولزمتني ايلاف ورجعت گعدتني على الكرسي ماما شافتني نخبصت صاحت بسرعه جيبوا ماي بسرعه صحيت شويه من أثر الضغط الصار عندي والتوتر بس هيه مدري شبيه نخبصت من سمعوا وصياحه گالوا هاا شكو شنو صار ردت عمه...

..ماكو شي بس شويه العروس داخت ماكو ما بيه شي ...

ايلاف:شجاج داده أمشي اخذج للغرفه حتى تبدلين...

ميسم:تمام گمت وياه احسن شويه صعدنه فوگ وسديت الباب...

ايلاف:شبيج خيه اول ما اجيت شفتج مو على بعضج شنو صاير شي وشبيج هسه...

ميسم:ولج ما ادري شبيه من گعدت لي هسه وهم شلون حلمت حلم متت والله ومنا اني متوتره وضغط نفسي ما تحملت يمكن صار عندي هبوط...

ايلاف: دقيقه ما عندج چكليته شي اكليه لتتخربطين مره ثانيه يله تعالي شنو تلبسين؟

ميسم:تمام هذا الفستان الاحمر،بس صُدك تعالي نسيت ليش تأخرتوا؟

ايلاف:سكتي وخليه كله من وره رافد بالگوه قنعته يجيبنه اصلا مراد يجي والله شنو عنده شغل بس لو اعرف هذا الشغل شنو جان رتاحيت يله تعالي داده لبسي هذا

دا ابدل وتذكرت كلام سيف من گال تخونيني ويه اخويه وصديقي مجرد ما تذكرته جلدي كزبر يي...

كملت تبديل وستوني نتبهت عليه شنو لابسه لابس فستان رصاصي فاتح قصير يجنن ومكياجه البسيط وشعره، عزه ستوني نتبهت ولج شلون طالعه تجننين عمي هنيال امير بيج...

ايلاف:يعمري وانتِ هم الرحمٰن يحفضج گمر...

ميسم:نزلته اني وياه وهم شتغلت الهلاهل نزلت باركولي البنات كلهم وأمه هم بس خالته ما عاجبه شي هي واخته يا طز اخر هم بس اكو بنيه جانت كُلش فرفوشه وحبابه اجت سلمت عليه گالت...

غنى:الف مبغوك حبيبتي شايفه كل الخير...

ميسم:حياتي تسلمين...

وضلت تصفگ وتركص بعدين عرفت تصير بنت خالته المهم شويه واجة أمه جان تگول...

..عيوني لبسوا حيدخل العريس يلبسه الذهب....

من سمعت توترت اول مره حيشوفني هيج عزززه صحت لايلاف تجيب الي شال استحي هيه هم فهمتني بسرعه جابت شال وخليته على متني دخل هو واسمع الهلاهل واني منزله راسي مستحيه كُلش أمه تگفل اله هي وهاي البنيه والنسوان الباقيات وعماته لان سمعته يگول الهن عمه المهم اجه وگف يمي واني على نفس مكاني ما رفعت راسي جان يگول...

سيف:بأس راسي وگال،رفعي راسج مو رگبتج نكسرت...

ميسم:رفعت راسي ونتبهت عليه جان لابس قاط اسود
وحتى القميص هم نفس اللون طالع كُلش انيق،هو قرب رأسه يم اذني لفحني عطره وگال...

سيف:شبيج بعد حيلي گالوا تخربطتي اني من سمعت ما عولت ادخل بس اريد اشوفج حتى مدري شلون سلمت ...

ميسم:بخجل ءءلا هسه احسن...

سيف:يي الحمد لله بس اگلج أنتِ اليوم ناويه تموتيني...

ميسم:ياا اسم الله ليش؟

سيف:اخخخ ميسم سكتي جماله تگول ليش ولابسه احمر...بعده ضل يتغزل يخخ اني سحت من الخجل شويه واجت ماما وبيده الحلقات لبسنه الحلقات وخذوا النه صور بعده أمه جابت الذهب وهو خوش نتهز الفرصه كل ساعه بعد الشال بحجت يلبسني الگلاده مال التخم لان جان هو عقد ومهر نفس الوقت بس جابوا التخم مال الذهب هم وانطوا فلوس گالت هي على ذوقه براحته...

خلصنه بعده گصينه الكيك واكلنه واشتغلت الاغاني وبنت خالته ذبت لحمه وتضحك وتهوس اخته ما سوت هيج اخته گاعده مثل الخطار ولا سوت حاجه ولا شي بس باركت اله تذكرت بعرس ماهر شنو سوت وهسه نعاد نفس اليوم بس العكس اني الي فرحانه وهيه گالبه الخلقه...بعده گالوا گوموا للاستقبال احجي اني هنا گلبي يدگ بسرعه وستحيت گتله بلاه ما اريد ردت أمه لا روحي شوفي شنو يريد طبعاً هو راح قبلي...

وصلت الباب فتحته ودخلت لگيته گاعده دخلت وأشر على المكان اليمه رحت واني خايفه اجيت وگعدت على نفس القنفه بس بالطرف هو ضحك..

سيف: هههههههههههه شبيج بابه ما اسويلج شي بس اريد احجي وياج والي بالج انسي مو هسه وقته تعرفين وغمز

اييييو هذا شنو عزززه ستحيت اني ما متعوده لزم ايدي وگلي تعالي هنا گمت وگعدت بصفه وبده يحجي جد ...

سيف:شوفي ميسم خلي احجي من هسه مادام بعدنه بالبدايه وخلي اكون صريح وياج ومثل ما جبرتيني وخلتني اقبل بتأجيل العرس أنتِ هم لازم توافقين على شروطي مو بس أنتِ تتشرطين تمام...

ميسم:تمام...

سيف:شوفي ميسم هسه أنتِ بعد تعتبرين مرتي شرعاً واي شي يصير وياج اني لازم الي علم بي طلعه روحه لازمه تستأذنين يالله تمام تمام..

لبسج ما اريده گصيف وهاي السوالف ولو أنتِ لبسج ما بي شي بس اخاف بيوم تلبسين تره ما أرضه واني احب المره الي اگله على شي يضل بينه ما يطلع منا لعتبت الباب،ويضل يسولف الي على هواي امور شنو يحب وميحب ..

سيف:وهسه أن شاء الله فهمتي عليه؟...

ميسم:تمام...

سيف: دقيقه اني شايف هذا الفستان شو بالله وجان يسحب الشال من صحت بي لا عفيه سيف استحي وهو ضل صافن...

..ولج ليش يا ظالمة النفس تعذبيني لا بس صُدك هذا الفستان شايفه يحجي ويتقرب عليه...

ميسم:هاءءسيف هذا مالتي قديم لبست يوم الحادث يمكن شفته لانو جنت لابسته...

سيف:يي هو شو اشوف واجه صار قريب عليه ودخل أصابعه بشعريه بعده نزل على آذاني اني هنا گلبي صار يركض ضل يباوع لعيوني وايده وره اذني تقرب أكثر يم وجهي صار تنفسه سريع وحار، جان تندگ الباب ثنينه فزينه اني بسرعه شفته فرصه سحبت الشال وخليته على متني وهو راح للباب غنى...

غنى:يله سيوفي كافي نريد العروس بعدين انت تشبع شوف منه..

سيف:اشش أنتِ ام اللسان مثلوم بسيط يله روحي هسه جايه رجع دار وجه الي وضحك لا وأنتِ خوش خذتيه فرصه يله ديري بالج على نفسج واي شي تردي اتصلي عليه تمام....

واجه بأس راسي وطلع اني هم طلعت من الاستقبال يخخ والله شعور حلو يمه فديت ابو بيتي أمشي واضحك لوحدي رحت للصاله لگيت بس أهل سيف موجودين وايلاف ماكو ما هيه سألت عليه گالت تريد تروح اخوه يريد يسافر باجر ويردون يودعوا وشگدد اصريت عليهم ماقبلت...

يا خطيه يله اني اخابره واتشكره منه...

ايلاف:فاجأنه رافد بخبر سفرته ما توقعنه هيج يسوي ماما وبابا يحاجوا وهو طلع مجهز كُلشِ وسفرته الصبح السبت جان هذيج الفتره كله يجهز بيه واحنه مندري بي ضلينه نحجي ويا ماكو قافل اله يروح واحتمال طول سفرته خمس اشهر أكثر ماما ضلت تبجي عليه متگدر بدونه والي لفت نظري هو كلام ماما وهي تگله...

..امي يعني ليش دمر نفسك علموده راحت ...بس جان الكل ما منتبه بس اني هو حاول يسكته واجه حضنه وباس رأسه ضل يقنع بيه بانو بس تخلص هل خمس اشهر ويجي حاولت تتقبل الامر الواقع ...

وبيوم العقد كله من وراه تأخرنه ما راد يروح لكن ماما أصرت يروح ما ادري احس اكو شي بينهم واني ما ادري وفضولي شتغل لازم اعرف شكو المهم وصلنه للعقد خلصوا الحمدلله عقدوا على خير...

شويه ودخل العريس اشرت الي على الشال تستحي نطيت اله گعد يمه ويهمس واحد لايگ للثاني يجننون لبسه الذهب وهيه خطيه تستحي كل ساعه عكمشت وجه اخذو صور وبعده راحوا للستقبال ضلينه اني وماما گاعدين ماما تسولف ويه ام ميسم ونسوان ما عرفتهم واني گاعده وحدي شهد اجه اخوه وراحت شويه وجان تجي يمي بنيه حبابه سلمت وگعدت شايفته وين يا ترى هيه مبين من گرايب سيف اجت گعدت...

غنى:يي شلونج دكتوغه...

ايلاف:بتسمت الحمدلله تمام بس ولا زغراً بيج ماعرفتج؟..

غنى:تقربت عليه وگات اني اخت اميغ ما عغفتني الي مره صاغ حادث واجيت للمستشفى مالتكم..
.
ايلاف:هااا عرفتج حبيبتي والله اعتذر بس نسيت يي شلونج شلون صرتي لحظه وأنتِ مو ويه حسين بالجامعة؟...

غنى:يي صح بس اني غير قسم،تمام اريد اگلج على شي وتقربت عليه وكالت اميغ يسلم عليج وگال هاي الايام محضر شغله اله منتضره بس احصل الموافقه ،ويي اني ادري شنو بينكم لتصفنين هيج عليه ادغي بي يحبج وأنتِ هم...

ايلاف:ضليت صافنه هاي شنو دتگول وشنو هيه الشغله، جان يدك تلفوني رافد گال يالله اني بره منتضركم گلت الماما گامت ضلت ام ميسم تتوسل حتى نضل ما قبلت گلتله على رافد يريد يسافر ونريد نودعه هيه المره هم ما لحت ...

طلعت ماما قبلي اني صعدت جبت غراضي من غرفت ميسم وطلعت بره طلعت من الباب واشف امير واگف هو ورافد ما اعرف شنو ديحجون هو باوعلي ودار وجه وكمل كلامه اني صعدت السياره شويه واجه گال ...

رافد:رح اخذكم للبيت حتى تبدلون ونروح لبيت جدو اليوم اني عازمهم لان رح اروح وبعد ما أكدر اشوفهم وهم ثواب لبيبي وحرك السياره...

دخلنه للبيت بدلت على السريع واخذنه لهناك جان بابا هو وآدم قبلنه جاين المهم صار الليل ورافد راح هو وليث جابوا العشه واجوا صبوا العشه لهناك وجان يگول الهم على السفره مالته ما حجوا شي كله تحمدت اله يروح بالسلامه خلصنه ودعهم ورجعنه للبيت تقريباً ب10 دخلت لغرفتي جان تخابر ميسم...

ايلاف:بنت الحلال بذكره قبل شويه جنت افكر بيج...

ميسم:بعد عمري اني هم نسيت اتصل عليج والله من طلعتوا لي هسه اني افتر وهسه قبل شويه يالله گعدت وخابرتج...

ايلاف:لا حبيبتي عادي ماكو اشكال أنتِ شلونج المعرس شلونه ولج تجننون طالعين اليوم الله يحفظكم ويهنيكم يا رب...

ميسم:ههههه گلبي يوم الالج وافرح بيج صُدك نسيت ليش رحتوا من وقت عود وصيت ماما تنطيج كوس وذني سوالف مال العقد امداني طلعت ناسيه ...

ايلاف:يله عادي ماصار شي ولج مو رافد بأجر سفرته يطلع لتركيا ولازم نضل وياه واول ما طلعنه من عدكم رحنه لبيت جدو تدرين جمعه وهم ودعهم ...

ميسم:يا شعنده حتى هسه توني سمعت من سيف يگول لا حجه ولا گال كُلش ضجت ونقهرت ليش هيج يتصرف لعد منو بعرسي يوگف غير هو يالله الله يسهل عليه ويوصل بالسلامه...

ايلاف:هاي شنو نسوي بعد... گممت اني ودا احجي وياه رحت لغرفت رافد اشوفه شنو يريد بعد لان ديجهز الجنطه مالته دكيت الباب وفتحت دخلت وشفته واول مره هيج اشوفه الجگاره بحلگه وفاتح اغنيه والغرفه عباره عن دخان تخنگ سلمت على ميسم بس اريد اشوفه هذا شبي حتى ما نتبهت التلفون نغلق لو لا، رافد هاي شنو وشديصير ليش هيج شكو؟...

نفخ الدخان على جه وباوعلي وكمل جانت عيونه حمر دم گتله...

ايلاف:رافد تحبه؟

رافد:منو؟

ايلاف:لتغشم نفسك ادري بيك وحتى هاي سفرتك حتى تشرد مو شغل تشرد لان متگدر تواجه صديقك...

رافد:أنتِ عن شنو دتحجين ويا مواجه شبيج ايلاف شاربه شي؟...

ايلاف:رافد انت تحب ميسم؟!

يتبع...

لاتنسون التصويت وتعليق ومتابعة للحساب بدربكم والانستا هم ghe.92

دمتم برعاية الله وحفظه

غدير عبدالله