رواية وقد كانت صدفة الفصل الثالث وأربعون 43 - بقلم غـدير عبداللّٰه

"وقد كانت صدفة"

ليش اليِحب من گلبه يطلع خَسران ؟
لو أدري هَيچ أنسحب مِن أولها !
عافيتي ، صوتي ، وشكلي هذا الذبلان
هاي الخساير ياهو يتحملها ؟.

_____________________________________

رافد...

الحُب مو شي سهل ونحصله ولا شي يعجبنه واحنه نختار بكيفنه الحُب إذا دخل الگلب ماعنده شي اسمه شلون وشوكت وليش وين؟

الحُب مثل المرض يصيب الكل ميفرق بين كبير وصغير ميفرق بين طائفه ميفرق بين اسود وابيض يصيب
الكل...

شگد اسمع عن علاقات الحُب وهاي السوالف وجنت شاهد عليه هم بس خضت هذا التجربه.

هيج شغلات احسه حرام ولو ما غلط مجان صار حرام هسه أغلبه تگول انت ليش معقد ليش متدين ووو...

بس اني هذا طبعي هاي وجهة نظري الشخصيه اني اذا سويت علاقه ويه بنيه وحبيته وعلقة بيه وهي بنيه من اقل كلمه تتأثر وصار عندي شي او اهلي ما وافقوا عليه هيه شنو ذنبه مجرد حبة شخص راح تنصدم وتتأذه لان علقته بيه وفجأه تركتله...

لكن كل هذا جا مجرد حجي اللسان يوم الي شفت ميسم وحبيته وصرت اتأمله يوميه من خلال ايلاف دائما تسولف بيه خلتني اتعلق بيه زياده لكن كل هذا يصير بداخلي وابد ما گلت الاحد بي ابد لا امي لا ايلاف الي هيه اقرب وحده الي كله جان بداخلي...

جنت سنه اخيره الي بالجامعه اني وسيف وايلاف جانت ما اعرف سنه ثانيه او ثالثه جامعه بالضبط ما ادري المهم بيوم رجعت للبيت العصر ما ادري جان اكو خطار بالبيت اسمع امي بالاستقبال دتسولف رحت لغرفتي جانت جوه بدلت وصعدت لايلاف لغرفته حتى تسويلي اكل لان ميت جوع  متعود عليه دائماً اصعد اله وادخل.

بس بهذا اليوم اني واتمشه اله اشوف الباب مردوده لزمت كيلون الباب اريد افتح وجان اشوف ميسم ...

..جان هاي اول مره اشوفه صح سامع بيه بس مشايفه جانت بدون حجاب وشعره طويل  واكفه على مرايه وبصفه ايلاف مدري شنو دتدور بالميز وهيه تسولف وتحدد شفايفه بالحمره واني صافن حتى نسيت نفسي وعلى شنو جاي اصلا جنت مركز ويه حركت أيده وهي تخلي منه لان عاكسته المرايه...

بعده درت وجهي واستغفرت الله ورحت لغرفه مالتي بس ضل منظره بالي مشت ايام واجت ايام واني كل ما ينذكر اسمه تجي صورته بالي شگد حاولت وردت أنساه ما فاد...

تخرجت الحمدلله وره سنتين اشتغلت بشركه اهليه وبعده واسطات وهاي السوالف تعينه اني وسيف جنه أكثر من أصدقاء دومنه سوه...

بعده ضلت تتردد علينه تجي للبيت يم ايلاف رغم هيه البنيه ما بدر منه شي وأخلاقه ماكو مثله محترمه نفسه رغم شگد اشوف بنات وخاصه بنات الجامعه جانن يتماوعن ويتنعوصن بس هاي لا غير المهم تخرجت ايلاف وهم وعن طريق ولدي لگه اله شغل بمستشفى تطبق هيه وميسم...

مشت الايام واني شعور بداخلي اله ،صارت تجي على ايلاف صبح توديه وتجيبه ،ف جانت تجي وقت طلعتي للدوام تسلم عادي ومن اشوفه شعور غريب يجتاحني بعده قررت من تطلع ايلاف اني وراه اطلع...

عدت هيج الايام  والشهور وبيوم اجت وگالتلي ايلاف انت وديني سألته ليش گالت مادري شنو بيه ميسم متخربطه ما اعرف اني نغزني گلبي ضليت الوقت كله افكر شبيه ما عولت تتصل ايلاف بيه حتى اوديه حتى تشوفه شبيه تصلت بيه اني بسرعه ستأذنت ورحت أخذته من المستشفى وديته لبيته ...

رجعت للبيت حاولت أنام مگدرت ضليت اتگلب لحد ما تصلت عليه ولن اشوف الساعه صار اله ساعتين بدلت ورحت اله دكيت عليه طلعتلي سألته شبيه گالت مسويه حادث اني بس سمعت ونفعلت ما ادري بنفسي رغم ما ادخل باي شي وخاصه سوالف النسوان لكن من سمعت بيه طلبت من ايلاف تدير باله عليه وجنت ادري بالي صار وياه ويه ماهر وكل ما اسمعه باسمه ودي اكتله بيدي الي ضيع هيج جوهره ثمينه من بين أيده ...

مشت الايام عادي واني يوميه تجي على بالي صرت هواي اتخيله مرات اضحك على نفسي صرت مهوس بيه ،بيوم قررت احجي ألامي عليه حتى تخطبه وصُدك رحت وحاجيته بس هيه جانت ايلاف ما موجوده ف گالت...

..يمه الساعه المباركه واخطبلك تريد اني اختار الك لو اكو وحده بالك گول امي؟..

رافد:لا اكو وحده بالي...

..ومنو هيه هل وحده؟

رافد:يوم ميسم صديقة ايلاف،بوكت امي ما صدك گالت هي اريد لخطبه الك بس جنت خايف خاف مترضه ،ف گالت...

.. هاي الايام أن شاءالله اروحن واخطبه الك، بوقته الفرحه ما سايعتني جنه كل ما ننجمع اني وسيف دائما يحجي على وحده عاجبته ودز أمه يخطبه صُدك فرحت اله من كل گلبي الله يهنئ ويسعده...

لحد ما بيوم جنت ستوني داخل للبيت اخذت دولكت الماي اريد أصب عطشان وجان اسمع ايلاف هيه وامي تحجي تگول اجوا ناس على ميسم وخطبوه وهيه موافقه امي سألته منو گالت اله سيف صديق رافد !؟

بساعته نصدمت صدمت عمري صديقي الي يحبه دائماً يسولف بيه واني ادعي اله الله يجمعهم نفسه الي گلبي هواه ،كُلش نقهرت ومن ذهولي بالخبر وگعت الدولكه مني على أثره اجت امي وايلاف...

.. نزلت الم الاگزاز وما حس بشي فاصل من العالم كله ايلاف صاحت بيه نتبهت على أيدي غرگانه بالدم بس ما حسيت بالوجع جان وجع گلبي اقوه بوكته كُلش ختنگت بس خلصت ايدي لف بسرعه گمت للغرفه ...

حرت شنو اسوي وين اروح اريد هاي النار الي بصدري تخمد ماكو صار الليل بعد فرد مره كُلش ما تحملت طلعت ركبت السياره ضليت افتر وين اروح ما عندي مكان افرغ الي بداخلي امشي ما ادري وين لهناك وجان اوگف على النهر بس هذا المكان الي محد حيسمعني بي محد رح يعرف شنو صاير بيه...

بس اني ويا أفرغ همي يمه نزلت شفت بسطيه يبيع جگاير جانت هاي اول مره اجرب ومن بعده مگدرت اگطعه بس هي الوحده المصبرتني أمشي وأتذكر كل الي صار من يوم الشفته لو من سيف يحجيلي عنه واني اضحك عليه واگله معقوله سيف الجان يصيح ما اتزوج هسه قرر عمي نياله التاخذك وصُدك نيالك..

وره يومين اجه بشرني على الموافقه وباركتله بس مو من گلبي لان أخذ محبوبتي مني وراه صارت المشيه بالگوه رحت على اعصابي من وره امي جانت هي الوحيده الي تدري بالي ديصير بيه ودائما تصبرني وتگلي مو قسمتك راحت بعد ...

وأصرت اروح بيوم العقد واسمع بأذني حتى اكره وأبعدها من گلبي وعقلي كله وهم رحت مره ثانيه وخلال هاي الفتره جنت اشتغل على الساكت بإجراءات السفره محد يدري اريد اشرد اريد اهج لان كله مكان يذكرني بيه جانت حتى امي متدري بالسفره منا لمن خلصت كُلشِ وحجزت ياله گلت الهم..

بيومه ضل أبويه يحجي عليه وامي گامت تبجي رادت تحجي بسرعه سكتته وحضنته خاف تحجي اني ما اريد احد يدري آدم راح للغرفه يبجي ادري ميتحمل جنه اني مثل الاصدقاء مو اخوه كل ما عنده شغله ميعرفه يجي إليه جنه دائماً نطلع اني ويا نگضي وقت،رحت  وراه ومثل متوقعته يبجي رحت وراه، ها ولك تبيجي ما توقعتك هلگد تحبني...

آدم:رافد شلك بهل سفره اله تروح مو تدري منگدر بدونك...

رافد:يي خويه لازم اروح ما بيه مجال بعد بعدين اريد أوصيك دير بالك على امي وأبويه وخاصه ايلاف لان ادري بيه وهيه من النوع المتتحمل و اريدك تصير بمكاني دومك وياه لتعوفه ابدا والسياره حتضل يمك تمام...

آدم: تمام بس مو تگطع فرد مره خمس اشهر والله هواي!...

رافد:الله كريم...جنت مقنعهم حضل خمس اشهر ميدرون اني ناوي استقر هناك...

ثاني يوم رحنه للعقد وصار واني گاعد على اعصابي بعدين خلصوا باركتله وطلعت بره انتضر امي اجه امير وگتله على سفره هم نصدم بس ضل يگلي احسن الك العيشه هناك احسن وضل يگلي على أماكن زينه وشقق لان عنده هناك صديق ضل يحجيلي عنه اخذت
رقمه...

وراه تصل سيف ضل يغلط عليه ليش تروح وليش ما گتلي لعد منو يوگف الي بعرسي اني گتله هاي بعد صارت لتعارض لان بأجر طيارتي الصبح هو عصب وزعل اني ما شلت هم ...

ايلاف:دموعي تنزل واني اسمع اخويه يحجي بگلب محروگ وشنو الي صاير وياه كل ساعه يسحب جگاره ويدخن لو يدير وجهه يمسح عيونه من الدموع لحد ما خلص،ليش رافد ما حجيت ليش ماگتلي ليش ما سكتتني وگتلي لتحجين بيه كافي رحمي بحالي واني مثل الغبيه جنت احجي عنه...

رافد:لا لتحجين هيج اني جنت اريدج تحجيلي عنه شنو تسوي شنو يصير،جنت اتخيله وأنتِ تسولفين عنه جنت اتمنه يوميه تجي يمنه بس شنو نسوي ما مقسوم الي اعيش أو اجرب شعور الحب ورفع رأسه حتى خاف تنزل دمعه ونزله وبتسم ،هسه يله شلون اريد انام بأجر ورايه گعده الصبح؟...

ايلاف:ما تحملت ورميت نفسي بحضنه اسفه رافد والله اسفه مو بيدي بس حباب لتروح منگدر بدونك حباب...

رافد:يمسح على راسي،ايلاف شو باوعي الي وخرت،انتِ مو تردين انسه واضل مرتاح؟...

ايلاف:هزيت راسي بيي...

رافد:لعد لتشلعون گلبي وتعارضون لان اني ادري رح ارتاح وانسه مدام اني بعيد عن هل مكان خوش...

ايلاف:ها هيه لعد براحتك ،وگمت حضرت غراضه واساعده بالجنط كل ما اباوع اله وأتذكر بأجر يروح ابجي ما تحمل...

رافد:يااا هاي شكو عمي تره مرايح للجبه ...

ايلاف:مو بأيدي والله ما اتحمل فراگك... خلصت من يمه واني شابعه طن بجي صادف ماما گبالي تفاجأة شبيج ولج شكو؟

ايلاف:ماما رافد يحب ميسم وكله من ورايه اني...

.. اششش لتكملين ادري وأنتِ ما الج ذنب ومتدرين وعلى لاهيتج كافي لتبجين وخلي الله يسهل علي بأجر ويوصل بالسلامه هاهيه عبالج اني مرتاحه بس ما دام ابني راحته هناك هاهيه ما أكدر امنعه...

ايلاف:تمام وهزيت راسي ورجعت الغرفتي...

ثاني يوم ركبنه السياره وآدم هو الي يسوق ورحنه اني ويا ورافد نوصله للمطار ومناك يوديني للدوام دخلنه المطار ودعناه ماتحمل خطيه كل ساعه تنزل دمعه منه اني ما تحملت بالگوه آدم وخرني عنه بعده طلعنه وخذني للمستشفى وهو راح للدوما بابا ما گدر يروح وحتى ماما تكول ما اتحمل إذا اشوفه...

مشت الايام نفسه وهو يوميه يتصل علينه فيديو ويطمنه على وضعه الحمد لله هذا الولد صديق امير مساعده وماجرله شقه زينه لان هو هناك مثل الدلال ومن نشوف وضعه ومرتاح هاهيه احنه مرتاحين...

تركض الايام ركض وصار على سفرة رافد شهر لكن هل المره طلعت ألنه سالفه جديده وهيه ماما تشكي من رجليه شگد گاله اله بابا تأخذ تقاعد متقبل ضليت الح عليه وبابا هم ماكو قافله يحاجيه بابا...

..بس اريد اعرف عليمن متتقاعدين ان جان على الراتب الحمد لله ميسوره منقص عليكم شي فد يوم طلبتوا شي وما جبت الكم بعد عليمن هل عناد وصحتج دتروح يوم بعد يوم...

..ما الك دخل بيه اني مرتاحه بشغلي وإن جان على رجله ف أخذ علاج وتصير زينه...

..اللهم طولج يا روح اكول اله صحتج تگلي مرتاحه ليش شنو شايفتني گاطع الخبزه عليج ليش هل العناد...

..يأبه ما مقصر علينه بس اني أريد أأمن مستقبل جهالي هاي دنيه كُلشِ صير بيه نموت اولادنه منو الهم مال عمامهم اعذرني من احجي عليهم ما يديرون بال الهم واني احجيه گبالك مو وراك هذا حق والحق يقال...

..لعد عبالج ما مفكر بهل شي لا مفكر وحاسب اله الف حساب بس محد يدري واني صار الي سنين اجمع بيهم محد يدري وناوي اخلي الهم كل واحد حساب عبالج ما ادري وبس رافد هو الوحيد الي يدري بعدين هم ما عايزين كلمن راتبه عنده...

ايلاف:صراحه كُلش صدمنه بكلامه وما توقعنه حتى ماما سكتت...

بيوم كل احنه گاعدين جان ماما تصيح من رجله بعد متگدر حجزنه ثاني يوم على دكتور ورحناله سولفت اله شنو تحس ضل يحركه ويضغط على المكان الي
يوجعه...

..طبعا رجلج كُلش متأذيه والركبه مالتج بيه ماي وهذا الماي اذا ضل رح يأذيج وحيسبب الج سوفان اذا ما نسحب وكله هذا سبب الوگفه...وضل يشرح النه شلون حتم عمليه السحب ونطاه فتره خلال هاي الفتره لازم تلتزم برياضه اذا ما التزمت ومصارت زينه حيسوله عمليه...طلعنه بعد ما علمه على رياضه خاصه اله وايضا ادويه وابر...

رجعنه وبابا گاله اله بعد ماكو دوام وتاخذين تقاعد سمعتي كلام الدكتور اله تسگطين يالله بهذيج الساعه تعالوا لحگوني ماكو دوام بعد ومن باجر اروح اقدم الج اوراق التقاعد ما دام بعده بالبدايه...

بيومه بابا كُلش صار عصبي عليه وخفنه ليصير اله شي أما ماما ضلت ساكته وما حجت المهم وصُدك قدم اله وبعده ضلت مستمره على الرياضه والعلاج احسن من قبل...

بيوم رجعت من الدوام ميته نعس حتى ما تغديت من گد ما نعسانه بسرعه نمت ماگعدت اله وامي تصحي بيه والج گومي بسرعه...

ايلاف:گعدت مخروعه شكو؟

..گومي بسرعه أجن نسوان...

ايلاف:منو هنه واجن شنو يردن؟

..يخطبوج بسرعه بدلي....

ميسم:من راحت ايلاف بعدني ماغالقه التلفون اسمعه تگله هاي شنو رافد شنو صاير صراحه أخذني الفضول اريد اسمع شكو ضلت تسأله على وحده وهو يجاوبه بعدم معرفه لكن صدمني صدمت عمري من طلعت هل وحده هيه اني اسمعه يحجي وشلون شافني يوم الي اجيت اني وماما اول مره لبيت ايلاف ولمن اخذتني لغرفته دتراويني بيه من جنه بالجامعه مرحله ثانيه بيومه جان دنحضر للسفره مالتنه...

وضل يسولف اله شلون حبني وشلون يتخيلني من ايلاف تسولف عليه وهواي شغلات،معقوله كل هذا واني محاسه بي لهل درجه يحبني بس اني ولا يوم نظرتله غير نظره دائما اعتبره مثل اخويه ما يوم حجيت ويا أو تشاقيت كله كلامنه جان بحدود السلام وبس لكن ما ماسمعت الباقي لان سيف تصل عليه وضل يحجي ويتغزل ويسولف واني بالي فاصل لبعيدد غلقته منه بعدين تذكرة الحلم نخمش گلبي معقوله نفسه الي گال عليه... تسوين علاقه ويه اخويه وصديقي...

يا ربي ساعدني ليش كل هذا ديصير ويايه ليش دومي متعذبه ومعذبه الناس وياي لعد شگد منحوسه
اني ...

شگد جنت فرحانه بهذا اليوم لكن من سمعته الحجي راح واهسي وحتى الليل ما نمته اريد اعرف شوكت حبني حتى المواقف الي حجيت وياه تنعد على الاصابع اوففف ياربي كُلشِ ما اريد  بس تبرد گلبه وتبعدني عنه والله خطيه وميستاهل كل الي صار ورافد خوش ولد ما طلعت منه العيبه والله يرزقه بنت الحلال الي تريحه وتنسيني من باله ...

شهد:بعد ما سويت على الي گالته ايلاف وهو حساب ثاني وخليته خاص وصُدك محد دخل الي ولا شي فقط خواتي وايلاف وميسم وبس...

لكن  خلال هاي الايام صرت اخاف واني أمشي احس احد يمشي ورايه لو يراقبني صرت ما اطلع وحدي لو واحد من اخواني يوديني ويجيبني جنت دائما اشوف سياره تلحگني صرت اخاف كُلش وما گلت الاحد على هذا الشي وگلت لاخواني هم  يوصلوني وحتى صرت اشيل ويايه مقراضه ام السچينه وياي أو مشرط كُلشِ يصير ...

بيوم طلعت من المستشفى اروح لبيت خالتي قريب على المستشفى لان خابرت اخويه گال ما أكدر اجي اتاخر ف گال روحي لبيت خالتي واني من ارجع اجي عليج..

اني هم اخذت على كلامه ومشيت جانت الدنيه ظهر وبيتهم بالافرع حسيت اكو احد يمشي ورايه لو اني صرت ارجف كل جسمي سرعت بخطواتي ودخلت ايدي بالجنطه بحجت ادور تلفوني لزمت سچينت المقراضه...

دخلت بالفرع الاول لان جان بيت خالتي بالفرع الثاني وگفت وسندت ظهري على الحايط ومثل ما توقعت شفت ظل واحد اجه وجان الشارع فارغ ومابي احد دنيه ظهر وحاره جان اشوف الظل يتقرب وصل يمي ومديت ايدي اضربه بالسچينه على رگبته هو سبقني ولزم ايدي حيل وإذا اشوفه...

شهد:هذا انت...

يتبع...
لاتنسون التصويت وتعليق ومتابعة للحساب بدربكم والانستا هم ghe.92
دمتم برعاية الله وحفظه
غدير عبدالله