رواية وقد كانت صدفة الفصل الخامس عشر 15 - بقلم غـدير عبداللّٰه

"وقد كانت صدفة"

گلوله ترة بلياه ..
ما ضل حيل من عمري
وگلولة ترة من چفاه
امشي وألزم بخصري
وگلوله الدمع جواه
بدت تتآكل شفافي ..
شَاب وشابْ كُل شعري !
بجرح خلصت كِل عُمري
بوجع ضليت كُل سهري
بحزن كملت كُل دربي
واروح لوين ؟ ما ادري ..
گلوله اليحبگ خلصت ريتة !
گلولة وعلي بصوتك تردلة اليوم عافيتة ..
گلولة بسواليفك يرد انسان مثل اول !
قوي وجداً صلب ، وياك ما ينذل !
گلولة اليحبك ، صار غير انسان ..
لا ضحكاته ضحكة ولا حياته الوان
عاش بلون الاسود ، چن گلب دفان
مات بفرگتك ما صار اب فلان ،
وگفت دنيته وايامه معدودة
واذا مترد عليه اليوم ، باجر ينكتب موتة ...
__________________________________""'"

..اسفه اسفه اعتذر خو ما تأذيت رفعت راسي امير!!

..يي امير اخخخخخ ايدي

..اسفه والله مو قصدي اعتذر تعال بس شويه اعالجه الك،مشيت قبله واهو بصفي أخذته للغرفه مالتي وگتله

.. تفضل بين ما اجيب الاغراض

..ماشي

جبت العده وگتله نطيني ايدك نطانيه بس شنو كُلش حمره صايره عقمته وخليتله دهن ومركزه بالشغل واخاف يتأذه وهو ولا تحرك ولا ابد ،رفعت راسي لگيته صافن عليه قريب ما اخلص دا الف بالشاش گتله ...

ايلاف:حنطيك كريمات تستخدمهن حتى تطيب بسرعه ولازم تستخدمهم لان اذا ما استخدمتهن حتتجرثم وتلتهب لا سامح الله .

امير : ماشي دكتوره سؤال؟

ايلاف :دالف بالشاش واسمعه تفضل؟

امير:شنو اسم العطر مالتج

ايلاف:نعممم؟

امير:العطر مالتج شنو اسمه

ايلاف:ممكن اعرف ليش؟

امير:هيج عجبني

ايلاف:بس هذا نسائي

امير: عادي اريد أنطي هديه لأختي عيد ميلاده قرب كُلش

ايلاف: اسمه Hot

امير: شكراً

ايلاف : تمام هسه خلصت حكتبلك أسمائهم وعلى حسابي لان اني الي اذيتك كُلش اسفه

امير: يعني هسه تعادلنه مو؟

ايلاف:بس على شنو نتعادل

امير:اني ضربت الباب على ايدج وأنتِ وگعتي الجاي عليه

ايلاف:بس گتُلك مادري

امير:واني هم مادري

ايلاف:لا واضح كُلش متدري من اجيتني وسحبتني من ايدي خلعته خلع مو تگول ايد.

امير: يي وأنتِ هم مجان صعدتي ويه هيج نماذج

ايلاف:اگدر اعرف انت شنو خصك اصعد ويه هذا ويه هذاك انت منو؟

امير:لا الي دخل اني...جان تدخل دكتوره وضلت تباوعلنه لان جنت كُلش قريب عليه بعدت وگتله تمام بس الوصفه

ايلاف:تفضل أخذه وراح يا ربي هففف احس راسي صدع من وراه يا اخي انت منو وتدخل بحياتي ،همزن نقذتني شهد دخلت تگول..

شهد:مين داه المُزه؟

ايلاف:بعصبيه شهد سكتي لتحجين عليه هيج.

شهد :على كيفج داده ماگلنه شي اعصابج .

ايلاف:غمضت عيوني وحاولت استرخي اسفه والله مو قصدي..

شهد: لا عادي حبيبي تصير بين الحبايب

ايلاف:شهد لا تعصبيني شنو حبايب لا اعرفه ولا يعرفني منين جبتي هالحجي

شهد:لا كُلش واضح يله أمشي روحي للدكتور محمد يريدج عنده عمليه روحي بسرعه

رحت وعفته صدُك ضوجوني رحت خلصت العمليه وجانت كُلش صعبه بس الحمد لله نجحت بعده خلص الدوام اتفقت ويه ماما نروح بس متگول لميسم همزين تمت بعد مخلصنه الزياره اجت ميسم وجانت كولش مبينه باجيه وهي بسرعه يبين بيه تصير حمره طلعنه وهي تمشي ورانه صحتله اجت درت وجهي ما هيه گلت لماما ضلينه ندور عليه بعدين لگيته واگفه وداتحجي ويه ولد ماعرف شنو نطاهه رحت اله گتلهه...

..وين صرتي مدگوليلي ومنو هذا؟

ميسم:هذا ولد جان واگع اسواري وديصيح واني ما اسمعه ومن سمعج صحتي باسمي صاحلي أخذته وشكرته وهاي اجيتي أنتِ يله أمشي

ايلاف:مشينه اني وياهه وصلتنه للبيت وراحت مشه اليوم عادي والبعده هم والبعده .

ايلاف:طلعت من الحمام گبل للفراش حتى شعري مجففته ونمت وجان الجو بارد گعدت الصبح جان يوم جمعه بس احس عظامي كله توجعني ما اعرف ليش تريگنه وخلصنه ورحنه لبيت جدو سلمنه عليهم كلهم واني گتلهم راح انام مابيه حيل لان ما نمت البارحه اجيت متاخره واني منا جسمي يوجعني كُلش بردانه گلت هسه انام واصير زينه من وره السهر نمت..

وما گعدت اله والماي على وجهي وجسمي كله ماي ولگيت ماما و عمتي موجودات ودي يسولفن بس ما اسمعهم وجسمي متكسر تكسر دارت وجه ماما واجت عليه

شيماء:ها ماما شلون صرتي؟

ايلاف:بثگل ماما تعبانه وجسمي كُلش يوجعني

شيماء: حقج اذا جنتي مصخنه وترجفين لو ما مهيمن جان هسه أنتِ لا سمح الله وماخذيج للمستشفى بس همزين لحگنه واجه گال النه تلاحگنه عليج وانتِ شلون تصيرين إذا تمرضتي

ايلاف:ماما بردان حبابه غطيني واجت خلت أيده على گصتي وشافت حرارتي

شيماء:اكولج داده هاي بعده حرارته مرتفعه شلون نأخذه للمستشفى؟

لمى :يي اگولج خاف تتخربط بعد أكثر اخذيه وصاحت لمهيمن اجه

مهيمن:ها شلون صارت؟

شيماء: والله بعده حرارته مرتفعه

مهيمن:يله لعد خلي تلبس حتى أخذه للمستشفى

لمى :وحدك تروح

مهيمن:يي ليش؟

شيماء :لا اني اجي وياه

مهيمن :لا خاله أنتِ ضلي خلي وحده من البنات تروح وياه يله لبسيه..

شيماء:لو اخوته هنا جا راحوا بس ما موجودين خلي اشوف وحده من البنات هم تساعدك ذا هاي ،اجت ماما لبستني واجت رفل ويايه هم وصلنه للمستشفى ودخلوني الطوارئ شكلولي كانيولا ضلينه ومهيمن يروح ويجي ومبين القلق عليه وكل ساعه يخلي أيده على گصتي يشوفني بعدين گتله

ايلاف: بتعب كافي ترى كُلشِ مابيه ليش مكبرين الأمور

مهيمن:يي واضح كُلشِ مابيج بس نهدج توگعين ،وسكت صدك بس واحد يهد ايد اوگع وحس الدنيا تفتر بيه خلصنه وطلعت بس خطيه رفل ما سيطرت عليه ردت اوگع ولزمني مهيمن

..على كيفج لتوگعين هديه رفل اني الزمه

.. تمام، بعدت عني واجه مهيمن خله أيده وره ظهري ومشينه وصلني للسياره فتح الباب وحاول يساعدني بس كُلشِ ما اگدر واني هم كُلش مكروه اذا تمرضت مشينه شويه واتصلت ماما جان ايكول اله زينه وشرحله الوضع واني بين النايمه والصاحيه حسيت وگف السياره ونزل هو ما عرف شنو يجيب يمكن الادويه بعدين اجه وصلنه للبيت وهم حاول يساعدني واجت ماما تلگته رحت وياه ضلت تحجي عليه انتبهي بعد لتنامين وشعرج مبلل لان الدينا بارده وهي السوالف واني اگوله تمام .

طلعت ماما مخابره ميسم تطلبلي اجازه لان كُلش مريضه رجعت نمت حتى ضليت بايته يم بيت جدو .

نص اليل گعدت عطشانه رحت للمطبخ جنت ما لابسه حجاب مخليته على كتفي لان كله نايمه دخلت حتى اشرب ماي أخذت گلاص وشربت ماي درت وجهي واشوف مهيمن

ايلاف:شبيك فززتني؟

مهيمن:شبيج هذا اني اجيت للمطبخ حتى اشرب ماي وأنتِ شلون صرتي ،واجه بتجاهي تقرب خله أيده على گصتي كُلش تضايقت وتوترت من قربه إليه..

ايلاف:لا زينه صرت احسن بس بعد شويه ،ضل ساكت ويباوع بعيوني ويتقرب واني ارجع لي وره طخيت بالسنگ وكتله مهيمن وخر اريد اروح وهو ميسمع قرب وجه عليه اني كُلش توترت وخفت خله أيده على شعري صارت عندي رد فعل ودفعته حيل بحيث راد يوگع..

حس على نفسه هو مثل الصحه وخله أيده على على الكاونتر واني رحت واحس گلبي يدگ من الخوف وگلت بعد التوبه اذا اطلع وباجر اخابر رافد من الصبح حتى اروح رجعت وحاولت انام ماگدر كل ساعه يجي بالي الموقف بالاخير ستسلمت للنوم .

امير

جنت راجع من المكتب ومريت على طريق المستشفى الي صار طريقي اروح وارجع عليه اني ودا أمشي شفت ايلاف و واحد لازمه من وره مخلي أيده على ظهرهه وهي رأسه على كتفه ومشت ..

ضليت اباوع شلون ياربي انزل مادري شصارلي حرت انزل لا هسه، احس النار شبت بيه وهي شبيه ماعرف وجهه معبس بس ليش طالعه من المستشفى خاف صاير بيه شي ضليت اسئل بنفسي وانطي اعذار بس داخلي ميرضه يصدگ اوگلبي يحاول يرفض مرضه بعدين صعده ما عرف شنو صار بيه شطت ..

ذا انزل هسه يكولو انت منو وبصفتك منو صعد هو وخله أيده على گصته يا ربي صبرك بعد ما اتحمل فتحت باب السياره ونزلت هو حرك وراح يا ربي دخيلك صبرني بعد ما اتحمل شلون .

ضليت اروح وارجع نزعت الستره والرباط احس كلش ختنگت لازم احجي بعد مابيه صبر لازم يي لازم بس شلون اصارحه ،وگفت صافن اني شبيه ليش هيج نجنيت عليه معقوله احبه زين من اصارحه شاگول؟.

اوفففف شلون ضليت افكر بعدين ركبت السياره ورحت للبيت دخلت وگتلهم لحد يگعدني على العشه اريد انام صعدت ذبيت سويج على الميز واخذت ملابس ودخلت للحمام ضليت افكر وافكر والماي ينزل على راسي وبعدني محتر اريد أطفئ النار البيه ما اگدر.

طلعت ودخلت الفراش اريد انام بس ما گدرت عقلي يجيب ويودي بالافكار هذا منو الي أخذه ابن عمه لا اني شايف اولاد عمامه بس هذا منو .

نزلت نص الليل رحت للمطبخ شربت ماي وطلعت بره أدخن بعدين تذكرت عندي اوراق مهمه بالسياره صعدت جبت السويج واجيت حتى شغلي نسيته فتحت السياره وضليت ادور لگيتهم بعدين فتحت الباب الوره اريد أخذ البطل الماي الواكع ولكيت...

سيف

طگت روحي من البيت والگعده خابرت رافد لازم اكول اذا ماگتله اموت ورافد صندوق أسراري و كلشِ يدري عني أكثر من امير بس هو الوحيد الي أحس بتصرفاته حيل عقلاني يسمعني وينصحني اتصلت عليه حتى نطلع وگال تمام جايك لان متگدر تسوق گتله يله بدلت وخلصت اجه عليه وطلعنه گاله..

رافد:هااا وأخيراً حتگول؟

سيف:يي اذا ماحجيت أاذي نفسي ،طبعا هو يعرفني من اسكت يعني لازم عندي شي اگوله..

وصلنه وگعدنه ضلينه نسولف على الشغل المتراكم عليه بس هو ممقصر حتى شغلي مكمله

سيف:يله أن شاء الله نجازيك بعرسك

رافد: هههههههههههه وينك وين العرس

سيف :ليش تضحك قابل تضل هيج وضعك

رافد:وشبي وضعي يعني اله اتزوج عود استقر يا اخي دروح والله بطران ..

سيف :والى متى تضل هيج؟

رافد :ما اعرف

سيف:شنو متعرف خويه حتدخل الثلاثين وانت بعدك هسه الي بگدك عدهم جهال الله يساعد گلب امك عليك

رافد:هسه انت اجيت تحجيلي لو شنو جنك وحده خطابه وجاي دورلي على عريس زين ليش مو انت تتزوج ؟

سيف :خويه اني جربت حظي وما گعد بعد هاهيه بهل زمن صعب تلگه اليوفي الك لو تخلي كنوز الدنيا كله گباله ميمد أيده وشفت وضعي أنطي واجيب واودي تالي هاي مجازاتي شوف رفعت ايدي ورجلي الي نضربت بيهن هذا تاليتيي تخوني والله من دنعله هذا الاغبر واشرت على گلبي

رافد:بس مو كل أصابعك سوه ،هسه سولفلي شلون صار الحادث؟

سيف:سحبت نفس وازفرته ..

نرجع للزمن.....

..جنت اسوق وصدفه صارت گبال سيارتي ضربت بريك قوي واذا اشوفه نضربت وگعت بالكاع نزلت من السياره خايف خاف ماتت صار شي گتله...

سيف:شبيج خو مصار بيج شي أنتِ زينه متأذيه ،وهيه تبجي وخايفه من الكلاب حاولت ابعدهن ابتعدن لان جانت المنطقة خاليه مابيه أحد والساعه بالوحده الظهر اجيت عليه وسئلته ساكته وسانه نفسه على السياره بس شفت ايده مخليته على رجله گتله رجل تاذيج ؟!

..هزت راسها بيي وتبجي بصمت

سيف:اخذج للمستشفى ترحين؟

..گالت لا اروح للبيت

سيف:ورجلج تأذيج خاف مكسوره شي أمشي اخذج ؟

..لا مابيه شي بس نجرحت وخرت أيده وصدُك لگيت دم طالع من عده گتله اوگفي هسه اجي .

رحت للسياره اجيب بطل ماي وعندي وصله نضيفه شگيته واجيت گتله رجلج وين جانت ساق مالته الي متاذي مدته بللته شويه حاولت انضفه وشديت الوصله گتله
سيف:خلصت تگدرين تمشين هزت راسها تمام وين بيتكم وشعجب ابوج ممخليلج سايق

..بيتنه مو هنا بعيد وبابا متوفي

سيف:ها الله يرحمه وزين ما عندج اخ يوديج ويجيبج ؟

..لا ماعندي اخو بس خوات اصغر من عندي وماما مريضه متگدر وبس اني ادرس ومن ارجع اشتغل

سيف:لعد كومي اوصلج متگدرين خاف تمشين؟!

..لا اني اروح شكرا ماريد

سيف:ليش ابوي اني اوصلج شوفي الدنيا ظهر وين ترحين وحدج لتخافين ما اسوليج بس اوصلج والله

..هااا لا اروح ماريد توصلني

سيف: أنتِ ليش عنيده وشوكت حتوصلين مو تكولين بيتنا بعيد ؟

..يي

سيف:يله گومي لعد ،كامت وراحت تمشي وصعدت بالوره ورحت اني صعدت ومشيت سألته

سيف :شنو تشغلج ؟

.. اشتغل بلبيوت انظف ونزلت راسها وگالت يعني خدامه

سيف:لا لتنزلين راسج بالعكس كون تفتخرين بنفسج انو تدرسي ونفس الوقت دتساعدين اهلج ،هيه بتسمت حسيت هل البنيه كُلش مضلومه وتحتاج واحد يدعمه ويشجعه لان دا تسوي مكافحة كُلش صعبه وهيه بنيه شابه وخاصه عالمنه هذا ميرحم ابد وخاصه البنيه بعض ضعفاء النفوس يعتبروه سلعه رخيصه ،وصلته بعد مدلتني البيت ونطيته فلوس ومقبلت اصريت عليه وشفت عيونه هيه بحاجه الهم أخذته

سيف: زين انتِ عندج تلفون

..يي عندي بس ليش ؟

سيف :هاج هذا رقم خاف فد يوم تحتاجيني أو مساعده يمج رقمي واتصلي عليه زين أنتِ شنو اسمج

.. تمام شكراً اسمي نور

سيف:تشرفت واني اسمي سيف ومثل موصيتج اي شي تحتاجي اتصلي واني بالخدمه وها ديري بالج على نفسج وخليج دومج قويه لتتأثرين بشخص يكولج خدامه وعامله بالعكس افتخري تمام

نور : شكراً الك وعلى مساعدتك الي وابد محنسه معروفك الي وان شاء الله نلتقي بصدفه احسن من هاي باي وراحت

ومن هذا اليوم بدت بداخلي مشاعر اله صرت دوم افكر بيه وگعد على أمل اشوفه اليوم ،ومرت فتره جنت بالشغل ويايه رافد دنشتغل على مشروع مهم دگ التلفون رفعته بدون ما اشوف الرقم اجاني صوت بنيه جنت مامتوقعه هي ابد گالت..

_____________"""

يتبع...

هلو بنات شلونكم حبايبي بارت طويل لعيونكم لاتنسون التصويت+تعليق متابعه لحسابي بدربكم وحساب الانستا هم وشكراً على تفاعلكم وتعليقاتكم الحلو 🥺❤️

ودمتم برعاية الله وحفظه...
غدير عبدالله