رواية وقد كانت صدفة الفصل السادس عشر 16 - بقلم غـدير عبداللّٰه

"وقد كانت صدفة"

جَذاب ما رايد تحب بس رايد تأذيني

والمشكلة دمنتك بعد مثل الجگاره اتنفسك ارتاح وتاذيني

يا الجنت احبك من صُدك هسه انتَ ماتعنيلي...

___________________________

مامتوقعه هيه گالت...

نور: مرحبا سيف ؟

سيف:تفضلي منو حضرتج؟

نور :اني نور تتذكرتي

سيف :هااا نور هاي أنتِ ما عرفتج اعتذر

نور:لا عادي براحتك بس ردت اگولك على شغله وكُلش خجلانه ولو ما محتاجه جان مخابرتك!

سيف :گمت واخذت الستره وطلعت أشرت رافد اني طالع هز رأسه وگتله، يي گولي عادي محتاجه شي

نور:يي والله ولو مامحتاجه جان مگتلك اريد أخذ من عندك فلوس وبعدين انطيكياهن يعني دين ومن اشتغل ارجعهم الك لان هل الايام شغل كُلش قليل والفلوس الي عندي متكفي فگلت اتصل واطلب وانت گلت من تحتاجين شي خابريني وخابرتك..

سيف :ماشي وصلتي وشگد المبلغ حتى اجيب..

نور:*****الف

سيف: تمام زين نفس عنوانكم مو؟

نور :يي نفسه وكلش اعتذر وخجلانه هم وبأقرب فرصه ارجعهم الك.

سيف:لا بويه عادي مو اله.

نور :لا شلون ما احب اضل مديونه لشخص..

سيف: ماشي على راحتج يله الله وياج،ركبت السياره واني كولي لهفه اله بعد ما جنت انتضر اشوفه رحت العنوان مالتهم.

وصلت دكيت فتحتلي الباب هي، ضليت صافن لابسه دشداشة لون وردي نص ردن وشعره البني القصير لواصل لحد متنه وگذلته على عيونه السود الصغيره بس مناسبه لوجه وبشرتها الحنطيه گالت..

نور:اهلا

سيف:ءءء اهلا بيج هذا الظرف بي المبلغ الي ردتي ونطتهيا..

نور:كُلش اشكرك لو ما انت جان هسه اني بخبر كان..

سيف:زين اگدر اعرف شنو سبب الي خلاج تطلبين من عندي.

نور:نزلت رأسه وحجت بزعل انت تعرف وضعي وضع ماما وهل الايام شغل قل اغلب البيوت يردون خدامه تعيش عدهم واني ما اگدر لان امي واخواتي محد الهم واليوم اجه ابو الايجار وطلعتله گال إذا متدفعون الايجار مال 5اشهر اطردكم وضليت حايره ما اعرف منين أخذ حتى الفلوس العندي متكفي واتصلت بيك وانت مقصرت.

سيف :لا عادي واي شي تحتاجي بعد بس اتصلي عليه وعرفتي بعد رقمي صار يمج واني هم مسجله يمي تمام ،صدُك أنتِ گلتي ادرس شنو درسين؟

نور : سادس ادبي.

سيف:زين وشلون مدبرته يعني اني الي اعرف يرادله فلوس ومدرسين خصوص؟

نور:يي اني صديقتي عده ملازم أخذه من عده أقره بيه من اخلص ارجعهم اله

سيف:يله الله يوفقج ومثل مگتلج اي شي بالخدمه تمام

نور :تمام

طلعت من عده وكلش مقهور على حالته بس رغم وضعه المادي عده طموح تكمل قررت اني اجيب اله الملازم واساعده وصدك رحت شتريت ملازم وديته اله.

فرحت من شافتهن حتى خطيه گامت تبجي صرت دائماً اروح اودي الهم شغلات اله ولخوات اشوف الفرحه بعيونه احس شي بداخلي يفرح من يشوفه فرحانه صرت دائماً اخابره اتواصل وياهه أصر عليه واشجعه بانو تكافح من أجل مستقبله.

واجت الامتحانات وصرت دوم وياهه اخابره واحجي وياه واشرحله اذا عده شي مافاهمته وأسهر وياهه هم جانت ساحبه من جيرانهم نت ونتخابر وبعد خلصت الامتحانات ننتظر النتيجه واني دوم وياهه اشجعه وصلت بيه حتى تبجي إذا مافهمت شي اقنعه جنت دوم اكول اله إذا نجحتي اجيبلج هديه متتخيلين شنو هيه احاول ازرع الثقه بيه من خلال الحديث الي يدور بينه.

حسيته فاقده حنان الاب فاقده واحد يشجعه رغم الظروف الي دتواجه دائما اساعده واشجعه ودائما حبيبتي ونوره تگدرين تسويه أنتِ قويه ،طلعت النتائج والحمدلله طلعت ناجحه وبمعدل زين وطلع قبوله تربيه قسم رياض الاطفال صراحه جانت فرحتي بيه متنوصف اكثر من عده قررت اعترف اله وبنفس الوقت مفاجأة مناسبت نجاحه الي وعدته بيه.

ورحت اخذت ورد احمر من النوع الي تحبه وياه تلفون حديث ورحت للبيت مالته دگيت الباب وخليته الورد مقابل وجهي حتى من تفتح الباب تشوفه فتحت الباب وضحكته لساته ترن باذني مراحت ابد من بالي بعدته وگتله ها شلون مفاجاه ؟

نور : حبيبي تجنن...خجلت وخدوده حمرت لان اول مره تگوله..

سيف:يله عادي شنو رايج تصير هاي الكلمه رسميه بينه ،عگدت حواجبه

نور :شلون يعني؟

سيف:نور اني احبج

نور :ها ءءء شنو تحبني يعني ما اعرف شنو يعني مادري

سيف:يي گولي أنتِ شنو

نور:اني شوف هو يعني

سيف:يي شنو احجي مو گلبي راح يوگف

نور :اسم الله عليك ،يي اني هم

سيف :شنو أنتِ هم؟

نور:احبك

سيف :نفعلت وما مصدگ بالي سمعته ،صدُك لو جاي احلم صدُك يعني تحبيتي والله لان مجاي اصدگ حسبالي حتكوليلي مثل اخويه يعنني اصبري خلي اهدء يعني هسه أنتِ تحبيني مو؟

نور : هههههههههههه يي

سيف :يا بعد عمري وشلته وافتر بيه بالطرمه مالتهم وهيه خلت ايد على حلگي

نور:شششش ولك اسكت هسه يگعدون لو يشوفنه احد ،زين يله انت مو وعدتني بهديه اذا نجحت وينه لعد؟

سيف:نزلته يي حقج بس حزري شنو جبتلج

نور:مادري شنو؟

سيف:حزري

نور :سيف لتضوجني گول شنو

سيف :طلعته اله شوفي

نور :شنو هذا فتحته وجان تنصدم هذا الي

سيف :يي حبيبي الج

نور:سيف متتخيل شگد فرحانه والله وگامت تبجي

سيف:ليش هل البجي كله لان جبتلج هديه

نور:يعني انت هلگد تحبني تخيل عمري وحياتي متخيلت احد يحبني هلگد دومهم يحجون عليه يحسسوني منبوذه عنهم وانت اجيت غيرت كُلشِ

سيف :أخذته لحضني اششش لتكولين هيج عسى الله ليحرمني منج واسعدج طول العمر يله حبيبي اني اروح ديري بالج على نفسج وهذا التلفون بس شحني لان كول سويته الج ورقم هم خليته بيه تمام

نور: تمام باي

ودعته ورحت ضلينه نتراسل نسهر الليل كله نسولف ونضحك صدُك تغيرت حياتي من خلاله إلى أن باشرت بالدوام وكل يوميه تسولفي شسوت وشلبست وصديقاتها الي تعرفت عليهم ضلينه فتره لا بأس بيه بعدين اجاني شغل ضطريت اسافر وبيومه اني للصبح اقنع بيه وهي بس تبجي ومدت السفره شهرين بالاخير اقتنعت والحمدلله گتله اضل اتواصل وياج لتخافين اقتنعت.

وسافرت اول موصلت خابرته وحاجتني عادي التهيت بالشغل واني ابد ما نسيته دوم ادزله صوره وهاي.

بعده صارت  يوم ترد ويوم لا قلقت گلت خاف صار شي واگوله اله ترد لا ماكو شي بس دراسه ومجاي تلحگ من هاي الرساله اتطمن گلبي بعدين گمت اتاخر بالشغل وادز رساله اگعد ثاني يوم الگاه نفسه مشايفته بده شعور غريب بداخلي مثل ميگولون بده الفار يلعب بعبي بس شنو احاول اقنع نفسي ماكو شي ودتدرس مشه اسبوع على هل الحاله والرساله نفسه منشافت ادگ على الرقم يطلع خارج التغطيه شلون يا ربي ضليت حاير وبعدلي شهر يالله..

اتصلت برافد وگتله تروحلي لهذا العنوان ضل يسأل منو گتله بعدين أكلك مو وقته گال تمام ضليت متوتر وخايف عليه لا يصير بيه شي ماكو احد اله ضلت افكار سوده تراودني كل ما يرن التلفون اركض اله بس للاسف مو رافد يتصل وضليت على هل اليوم كوله انتضر بالاخير بالليل اتصل رأسا شلته گتله ها بشر شنو احجي گال...

رافد:والله خويه رحت دگيت الباب ما اكو احد ضليت فتره انتضرر ما اكو احد بعدين سألت گالو انتقلوا لغير بيت

سيف:شنو وشلون نتقلوا انت متأكد راحو لغير منطقة زين ما عرفت وين وبأي مكان سكنوا؟

رافد :لا والله گتله للرجال محد يعرف بين ليله وضحاها ما اكو احد

سيف: زين ما عرفت منو الي ساعدهم؟

رافد:يي سألت هم ميدري بس يگول جانت تجي سياره رصاصي حديثه توگف بالباب تنزل منه بنيه شابه وتروح سألته يگول محد يعرف اصلاً محد اله علاقه بيهم ..

سيف: تمام خويه تعبتك اليوم

رافد:لا عادي ماكو تعب يله الله وياك

سيف:غلقته وضليت افكر منو هذا ابو سياره رصاصي ومنين يجيه وهي اصلا محد تعرفه غيري افففف ياربي اخذت التلفون اتصل ويطلعلي مغلق هاي شلون مشكله بالاخير صدعت من التفكير شلون الگه حل وضليت هاي الفتره كله اني بس اتصل حتى على رقمه القديم هم ماكو..

وباخر ايامي كُلش صرت حتى صحتي هملته صارت بالنازل محد مصبرني غير الجگاير اخلص باكيت ارجع أخذ الثاني ورجعت لاهلي حتى ما الي واهس رأسا ذبيت غراضي والجنط ركبت السياره ورحت لبيتهم وصلت ولگيته معروض للايجار ضليت واگف واباوع للقطعه يعني هاهيه بعد ما اشوفه بعد ما اجي واجيبه اله اغراض واوصله هاهيه بعد راحت يعني هاي اخر مره اشوفه بيتهم حسيت بخنگه بصدري اريد اصرخ اريد اطلع ضيم گلبي والايام الي عشته بكذب كله هذا راح .

آه ياگلبي رحت للبيت دخلت وگتلهم لحد يسوي صوت اريد انام صعدت ذبيت نفسي ونمت واني احس هموم الدنيا كله على ظهري مرت اشهر واني على نفس حالتي ادور عليه حتى للجامعه رحت وسالت گالو سوت نقل، يأبه منو النقله منو الواسطه النقل باسم منو محد يعرف وبالأخير وارجع لبيتهم اوگف گبال الباب وعاتبه اله...

_مبريه ذمتك ليش؟

_چاا ودموعي!

_چا والبَعده
مايستقر بضلوعي!

_چا والمحنه التفز من يذكروك؟

_وذاك الضياع
الياكل بموضوعي..

وارجع مرت شهور ويأست بعد هاهيه راحت مو قسمتي بس كُلش تكأبت وشگد حاول ويايه رافد وامير يعرفون بس ما اگول الهم بس رافد گلت اله لان بعد ما اتحمل لازم احجي طاقتي خلصت صرت ابجي واني احجيله بس شيسوي حاول ينسيني بس ما نسيت مشت الايام.

وصار سنه وشهور على غيابه جنت ستوني راجع هم من سفره بس هل مره جانت مدته أقل دا امشي على الطريق السريع ماكو احد بي بس السيارات الكبار يمشن وجانت الدنيا ليل دگ عليه تلفون شلته رقم غريب رفعته وجانت الصدمه الي جنت ما عندي امل انو تتصل بيه بعد هذا الفترة الطويله نفس صوته ونفس نبرته من يوم الي تصلت بيه وطلبت مساعدتي بس هالمره فرحانه عكس ذيج المره الحزن جان مبينه من صوته گالت..

نور :شلونك سيف عرفتني

سيف: طبعا اعرفج الي جنت بس أقره اسمه اشيله لو على فراش الموت

نور :لا حبيبي اسم الله عليك ههههه اكيد شتاقيتلي

سيف:اخخخخ متتخيلين شگد مشتاقلج متتخيلين شگد مشتاق أكحل عيوني بشوفتج وجان اسمع صوت رجال يگول نور عيني حبيبي وينج تعالي.

نور:ماشي حبيبي جايه

سيف : بعصبيه اوگفي تعالي منو هذا وشنو هل الأسلوب شنوحبيبي شنو نور عيني نور احجي منو هذا وصحت احجيي؟

نور :اوي شبيك تصيح هذا زوجي وأبو ابني الي جاي بالطريق

سيف : بصدمه شنو زوجي شنو ابني نور شبيج لتخبليني تره راسي فتر لعد واني شنو هاااا احجي واني

نور :شبيك ياعيني على كيفك وانت مجرد شخص حب يساعدني وهاهيه

سيف:لعد وحبي الج شنو جان هذا كله راح والصرف الي صرفته بس حتى اساعدج مو بعينج عيفج من هذا كوله فدوه لعيونج نور وحبي واني حبيبج ليش عفتيني نور؟

نور: والله ياعيوني جنت مجرد نزوه عابره وخلصت من عده يله اني اروح لزوجي بعدين اخابرك باي

سيف:تعالي وين نور وين رايح.....وطبكته بوجهي واني منتبه بالتلفون داخابر مره ثانيه وجان تجي سياره تريله وتضربني وفقدت بعد مادري شصارلي لحد ما فتحت عيني وشفت...

جان يدگ التلفون امي تتصل ستأذنت من رافد حاجيته جان تكول شو تأخرت گتله يله جاي بالطريق وغلقته واجيت
سيف:يله خويه اليوم دوختك ويايه اني اروح

رافد:يله اني هم اروح يله تعال اوصلك بطريقي

سيف:لا اني اخذ تاكسي شنو ابتليتوا بيه وهي الحمد لله حرجع لشغلي ولحياتي

رافد : دمشي بابه أمشي يي عود على المره الجايه روح تكسي

سيف: والله ماعرف شنو اجازيكم

رافد: كُلشِ ما اريد من عندك بس ترجعنه بخير وسلامه وترجع لحياتك واهلك هاهيه احنه بخير

سيف : أن شاء الله والعوض بالله الكريم يله ورحت للبيت...

غنى

دخلت للبيت جانت ماما داصب بالجاي اجيت سألته

غنى:ماما منو اجه وشنو هل هوسه؟

عبير:همزين اجيتي عمج هو ومرته جاين

غنى:عمي منو من عدهم؟

عبير:ولج شبيج عمج محسن

غنى:وشعجب جاين اول تالي يجي يي يله اني اغوح(اروح) انام كُلش تعبت اليوم..

عبير:ولج تعالي وين تنامين أمشي أخذي الصينيه وروحي قدمي بسرعه

غنى:ماما شنو اغوح (اروح)استحي وضربت رجلي بالگاع ما اروح

عبير: غنى لتعصبيني تره والله احرمج من كُلشِ تردي لتشوفيني منطيتج على مرامج أخذي الصينيه وروحي بسرعه

غنى:أخذته ورحت بملابسي دخلت سلمت عليهم جان جاي ابنه وبنته هم بس اجذب اذا گلت اعرفهم ورحت گعدت يم ماما وبدت السوالف الي ما اله داعي هي ومرت عمو واني نعسانه ردت اگوم جان يستوقفني عمو من گال احنه جاين حتى نطلب ايد غنى لابنه كرم على سنه الله ورسوله،

هاي من بعد ما جان هم بادين بالموضوع واني مطفيه بس من گال نطلب أيده لا صحيت ماما باوعتلي واشرت رأسه يعني گومي واني ما صدكت خبر بسرعه طفرت يمه شنو يطلب ايد ومنو گال اوافق رحت لغرفتي بدلت ونمت لان كُلش نعسانه ماگعدت اله وماما تگول....

..يله غنى گومي صار المغرب يله

غنى:يي يله گمت ،رحت غسلت ونزلت للمطبخ نسوي العشه دا اثرم بالزلاطه جان تگول...

عبير :شنو رايج بي؟

غنى:منو هو؟

عبير :هاي شبيج ابن عمج دا اكول شنو رايج بيه

غنى:مادغي(ما ادري)

..شنو متدرين ماما الولد طلبج تگولين مادري

غنى:يي ماما مادغي(ماادري) يعني اني ما شايفته بس سامعه باسمه تردين تعرفين رايي

..هسه گولي موافقه لو لا حتى ننطي خبر لابوج

غنى:اگولج ماما منو گال اصلا اني اغيد(اريد) اتزوج ماغيد(ما اريد) وكولي لبابا مموافقه وخلص،

وضلت تقنع بيه على انو ابن عمج احسن من الغريب وهي متدري وهو حاله حال الغريب لي ؤگول داگه للعچس وياه

طبعا ماما تهتم للمظاهر أكثر شافت عنده فلوس عباله يگدر يعيشني بنعيم عباله الفلوس كُلشِ بالدنيا تجيب السعاده وراحت بال گتله.

غنى:زين بابا وامير وايسر شنو گالو

..بعدني ماگتلهم وابوج گال بكيفه اني ما ضغط عليه راي رايه هيه وهاي حياته بعد بكيفه

غنى :سأليهم بالاول يالله،وخلصنه عشه بعد مغسلت المواعين خابرت مريم حتى تراسل حسين بأجر ادزله الستره،هاي بعد ما غسلته خلصت قرايه ونمت.

ثاني يوم گعدت الصبح خلصت كُلشِ اجه السايق واخذني وصلت شفت مريم رحنه القاعه خلصنه اول محاضره رحنه للسنتر الي هو المكاني الي اتفقنه نلتقي بحسين بي گعدنه على الطاوله راحت مريم تجيب الاكل واجت سلوفتله على كرم گالت ...

مريم:زين هو شنو يشتغل

غنى:بشغكه (شركة)نفط وعنده سياره

مريم: والله اني لو من عندج يجني هيج واحد داده اني من يمي اكول موافقة حتى تعالو بدون مهر هم قالبه

غنى:شوف هاي اني عليمن احجي وهيه وين اگول ما اغيد(اريد) اتزوج وهي تگولي بدون مهغ(مهر) بابه اني اغيد اكمل دغاسه(دراسه) اغيد اشوف حياتي وگولي اريد اتزوج بس كون اعغف يعغفني(اعرفه يعرفني) عدنه بعض صفات مشتركه مو الي هو ابن عمي ما شايفته اتزوجه شلون بالله

مريم: والله اني اگول لو توافقين احسن يعني ما اشوف بي عيب ترفضي وإذا على موضوع تكملين دراسه شوفي يجوز يقبل يعني مو هل درجه متخلف لي عنده كل هذا ما اعتقد هيج عقليته،وجان نسمع واحد حم حم بس مال واحد عصبي درت وجهي واشوف حسين ورانه گمت شافتني مريم دارت وجه وگالت...

مريم:اهلا حسين تفضل

حسين:لا شكراً مستعجل عندي محاضره بس الستره بلا زحمه.

غنى:هاي ونطيته اله تفضل ،اخذه من عندي بسرعه وگال..

حسين:مره ثانيه خلي لبسج يكون عريض حتى لاتجيج حجايه تايه هالمره اني ساعدتج مره ثانيه اني ما موجود ماشي وخزرني

غنى: تفاجئت من أسلوبه هذا شبي گتله شتقصد؟

حسين:كُلش زين تعرفين قصدي مع السلامه وراح

غنى:راح هو واحنه وحده ضلت تباوع لثانيه هذا شبي منو يمه

مريم:تره حقه أنتِ شايفه شلون لبسج جان

غنى:شنو انتِ اليوم كل ما اگولج على شغله تگلبين ضدي اروح للمحاضره احسن الي ورجعت ضلت هسه وراي تمشي خلصنه دوام طلعت لكيت السايق جاي رحت وصلت للبيت سلمت وصعدت بدات ملابسي ونزلت لگيت كله گاعده على السفره شعجب اليوم كوله موجوده بدينه ناكل ومحد حجه بس صوت المواعين وأخيراً حجه بابا گال...

عصام: البارحه اجه عمكم ابو كرم وطلب ايد اختكم لابنه طبعاً اني گتله اشوف إخوته بس الرايه رأيه البنيه نشوفه وانطيك الخبر وهو مگال شي براحتكم وهسه اني حجيت حتى اشوفكم انتو شنو تگولون ها امير...

امير: والله يابه ما اعرف شنو اگول اني هم من رأيك الشور شوره هي شنو تگول احنه وياه وهاي حياته بعد اني مالي شغل هي بكيفه

عبير:لا شنو بكيفه هي موافقة مالكم دخل أخذوه من عندي

عصام:لا ماكو احنه نريد نسمع الموافقة من عده وانته ايسر شنو تگول...

ايسر:والله يأبه تفاجئت الصراحه يعني ما اعرف هيه بكيفه وهو كرم اني شايف الولد حباب وماشايف شي عليه حتى اعترض واني هم من رايكم هي شنو تقرر اني وياه باي قرار سواء الموافقة او الرفض

وجه بابا سؤاله الي وگال....

عصام:ها بابا شنو تگولين؟

غنى: طبعاً اني صايره حمره من الخجل احس الحراره تطلع من عندي من المستحه ،والله بابا ما اعرف شنو اگول انتو بكيفكم شتفصلون اني البس

عصام:لا بابا شلون بكيفنه هذا قرار يخص حياتج مو شي تشتري ومن ميعجبج ترجعي هذا قرار ما منه رجعه فكري ومن تردين تنطين خبر گولي تمام وكمل وگال ياحبيبتي كبرت وصار يجوه خطابه ،اني بعد ما اتحمل بسرعه گمت من الخجل.

رحت للغرفه مالتي اكمل قرايه لان محاضرات هوايه عندي ضليت أقره بس ماكو اريد معلومه تدخل ماكو كل ساعه بالي يروح لمكان ،خلصتهم وأخيراً

رحت فرشت اسناني وخليته راسي على المخده اجه بالي حسين ستغربت من تصرفه ليش سوه هيج معقوله علمود لبسي وهو هيج متحمل من ذاك اليوم حتى يسمعنياه اليوم لو اكو شي ثاني خاف سمع حجينه اني ومريم بس حتى لو هو شنو اله علاقه ضليت اسأل راسي هواي ماله اجابه بالاخير استسلمت للنوم گعدت ثاني يوم ونفس روتين .

يوم جمعه جنت دا حضر بالعشه وماما دتصلي دخل امير وشكله ميتفسر گال لحد يگعدني اريد انام اني هم مگلت شي گتله تمام صبينه العشه كله اجت تاكل سال بابا عليه گتله ميقبل أحد يصيحله يريد ينام گالت ماما...

عبير:شكو خو مابي شي ليش ما اجه؟

غنى: والله ما اعغف(اعرف)اجه عصبي گال لحد يگعدني اريد انام اني هم مگلت شي گتله بغاحتك وهاهيه.

.. تمام،خلصت كملت المواعين لان عليه ملات العشه وگعدت شويه اتفرج ويه ماما مسلسل بعدين ضجت صعدت لغرفتي سمعت تلفوني يدوگ تنبيه بوصل اشعار بعدته عن الشحن فتحته جان جاايني طلب متابعه باسم حسين بالإنكليزية بس مامبينه لان جان داير وجه وماخذ الصوره وافقت على الطلب وگعدت شويه اگلب بالتلفون جان تجيني رساله من نفس الحساب دخلت ...

_______________________

يتبع...

شلونكم بنات جميلات احوالكم ونزلتلكم بارت أن شاء الله يكون خفيف لطيف عليكم وحيصير النشر كل أحد وخميس
لان تدرون بده الدوام وكذا ف بهذني الايام عندي مجال انشر وأوقات النشر بالليل مادري ليش احس نفسي بومه 😂😂وهسه حبايبي لاتنسون التصويت+تعليق متابعه لحسابي بدربكم والانستا هم ghe.92

ودمتم برعاية الله وحفظه
غدير عبدالله