رواية #وكر الأشتر الفصل الثامن عشر 18 - بقلم الكاتبه سمو العراق

البارت السابع عشر
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔

- أحياناً تواسي #غيرك بِالكلام الذي تحتاج انت سماعة!! 🖤.
•  موجوع قلبي | ⌯

............................

رسمت ابتسامه حزينه على شفايفي واني الزم بقبضة الباب احس ايقنت ان اني سمعت گلبي من تكسر

باوعتلي افيان بصدمة اعتلت على ملامحها باوعتلها واني اطمنها بشبة ابتسامه ظلت ترمش بعيونها ممستوعبه الوضع

بعدها تداركت الامر وهي دكولها.. اي الف مبروك منين الخطبها

رنا بتنهيده..صديقة كوثر بس تدرن عقد قران كريم على هاي المغروره راح يثير جنون حنان هههه

بعدني بصدمتي وبالي تشتت واحس رجليه مكدرت اوكف عليهن كالت الها افيان ... اي وشدخلها حنان انوب بس لا تحبه ام كحيله

رنا رفعت اديها تبري ذمتها.. مالي شغل والله ما اعرف الله ليعلم

درت وجهي وتركتهن واني امشي بياس وعندي رغبه عارمة بالبكاء تنهشني نهش كلام رنا نزل على راسي مثل حمم بركانيه احس صاعقه ضربتني ودمرت كل مشاعري

دخلت ورايه اختي ونظراتها تبين نظرات وحده متاسفه على حالي عضيت على شفايفي واني اكتم دموعي استحيت منها حيل فشلت وحاولت اقوي نفسي وما اضعف

ابتسمت ابتسامه موجعه ومتاسفه خلت ايدها على كتفي وكعدت بصفي كالت... الله كريم الله يعوضج بالاحسن

جاوبته والغصه غزت بلعومي حتى ما اكدر احجي ... عادي قابل اعز من امي الله يسعده

تركتها ورحت طلعت شكو اغراض و فراشات وغسلتهن جنت اغسل وارجف من البرد واجلف حيل بحيث ايدي حسيتها تشنطت

اجت افيان ولزمتني بغضب وهي تصيح عليه... اصحي على نفسج اصحى لج شدتسوين حتتمرضين خلي يولي ما يستاهلج واذا تزوج ليش هيج تسوين بنفسج

باوعت لفرشة البساطات ببرود وجاوبتها ... ليش شبيه ترا طبيعيه

عاطت بوجهي بغضب... لا مو طبعيه ادري بيج تطلعين ظيم كلبج بالتنظيف ما اريد اشوفج هيج انتي قووويه لا تصيرين طفله

بلعت ريكي بغصه وحضنتها... اكيد قويه صدكيني ما بيه شي عادي دا انظف

باوعتلي وشفايفها ترجف دليل على بكائها رجعت احتضنتها مره ثانيه... افيان لا تخافين والله ما بيه شي شوفي حتى ما بجيت

بجت بصمت مطبق وهي دكول.. لو باجيه احسن ترتاحين بس انتي دتكتمين بداخلج مو زين عليج

بللت شفايفي واني اضحك.. ههههه شبيج هلى شنو ابجي مبيه شي

ردت عليه وبصوت يرجف.. دتجرحين نفسج بضحكة وهميه ودكولين اني بخير؟؟

هزيت راسي والدموع انسابت على وجنتي... مو بخييير اببببد مو بخيير افيان اختنكت اختنكت شوفيلي حل طلعيني نسيني احجي ويايه لا تخليني

حضنتي بحيره وهي تتافئف ... خلي يولون والله ميستاهلج ان شاء الله باجر تلكين احسن منه يمعوده شنو اللذه من الفگر ترحين تعيشين يم حنينه البربوك اوووع خليج يمي وجهي يفتح النفس( حجت هيج تريد تلطف الجو)

ابتسمت من بين وجعي بعدها كلتلها.. علميني على الحفافه والصبغ وكل شي كل شي تعرفين علميني عليه

ردت عليه بخبث مصطنع... لا عمري لا صح انتي اختي وبنت امي بس مو مال انطيج سر المهنه انتي اطبخي ونظفي ونجبي

جريت نفس بقهر.. تعلميني لو شلوون

ضحكت وهي تكرص بخدودي... اعلمك يگمييل يحلو انت

كملت غسل وشريت الفراشات ونظفت البيت وكعدت يمها تحف بالنسوان اباوعلها وهي تحف ودكول هيج الزمي الخيط وهيج سوي والصبغ هلكد حطي بلوندر وهلكد اوكسجين وطايحتلهن ميش كله اصفر تضحك على النسوان يخبل ويجنن وهسه رجلج يموت عليج يمه فلشج طلعتي تخبلين

صفنت عليها وايقنت اني دافنه نفسي بالوحل واني اصلا ما اعرف اتصرف ولا اعرف اعتمد على نفسي ولا عندي ثقه بروحي افيان طفله وكاسبه النسوان ودتحصل رزق واني شنو ظاله اركض وره وهم وره سراب

لازم اعتمد على نفسي هي مرات ما تلحك فتروح النسوان ومرات متكدر تتعب الحفافه تتعب وهماتين تسوي شيره للجسم وتتعب فمتستقبل نسوان

كلت تعلمني واساعدها واذا لزمتلي شغله بيدي راح انسه همي راح اعيش لنفسي مو اعيش لخاطر فلان وعلان

بس ما  اعرف شبيه اليوم احس بروحي حيل بحاجة امي وبحاجة سولين اريد الكل يمي كعدت ارتب بأغراض افيان وروحي ترجف واغسل بشعر النسوان وامشطه واشسوره

مره كالت .. عمت عينك يعامر عندك هيج طيور وهيج معذبهن من غضب الله عليك كون

ودت افيان وهي مسويه الشال عمامة والخيط مال الحفافه بحلكها وتحف تهز بركبتها كالت... والله يا خاله هذا متعافي على نعمة ربه الا العنده وحده مثلي يبوس ايده وجهه وكفه اعادل عشر زلم

ردت المره... وعلي خوش بنات انتن مؤدبات انتي واخواتج

ردت فافي وهي ترفع ياخه ثوبها... اي تربيتي

دخلت مره هي وابنها والطفل وكح كل شويه وهجم وطشر الاغراض ويضرب بامة وانوب كل شويه ودفع امين واني اكوله.. حباب عوفه لا تتعاركون

افيان عاطت بيه.. واك اكعد ابو راس راسك مصفح عاصيه بيك امك بالولاده اكعد من عاب هالشوفه حشا خلقة الله بس بعد تحاجي امين الا اعضك اصبغ شعفتك صفره اطلعك جنك عصفور مهلس

هو خنس وكعد يم امه ويباوعلها ويخنزر امه كلتلها.. اكلج افيان شو الصبغ بعده اصفر اني مو كتلج اريده بلاتيني

ردت عليها بقهر... يمه منجن يالنسوان برابيج تطلعن الواحد من طوره جااا مو الف مره كتلج هو ياخذله اسبوع ويصير ثلجي جااا شلون بله اجيبلي سماعه وكل شويه اعيد اسويها سواية ابو الطماطة من كل شويه طماطه بالف طماطه بألف

المره.. يااا شبيج افيان لسانج شطوله هو سؤال بس بيني وبينج رجلي تعجب كال جنج اجنبيه

غمزتلها وهي تضحك وكتلج كتلج اخذي كلامي هيج لون يلوكلج وانتي بشرتج حلوه من اروح فدوه ونذر لهالبشرة الموردة

ظلت تضحك المره ولزمت ابنها تخاف من افيان تكتله .. يالله اني ما اكدر مثل افيان افيان هيج طبيعتها اني اجامل هي لا وياه وياه محد يندك بيها اني لو يفلشون البيت على راسي ما احجي استحي وانحرج هي لا كدام امهم و ترزل بيهم

ظلت تعلمني شويه شويه حسيت اخذت شمره وتعلمت منها بس كسران ظهر ويعاملن ولعبان نفس واكو يردن حفافه بالدين بس متقبل افيان تاخذ فلوس ليكدام دكول هو مو ضحك

قررت استغل الفرصه وابتعد عن شي اسمه كريم الله يسعده هو اختار طريقه واني لو بباله جان خطبني بس هو ما يحبني اقنع عقلي بس گلبي شيقنعه وهو متمرد ضدي وكاسر خاطري تعبت واني بأثر الصدمة واحاول اتناسه الصار

....................

صفاء

جنت كاعد بالغرفه الوحدي منتظر اتصال من الاشتر واخاف اطلع لان زوجته تحوص بالمطبخ وما الي خلگها وحده شكوكيه وادنى حركة اسويها واخذتها بغير صيغه وفسرتها على كيفها اصلا ما عندها ثقه بيه الهذا السبب ما حبيت احتك بيها

ملل وقرف ولعبان نفس رجعت بذاكرتي لايام راحت وصارت بطي النسيان جان عمري تقريبا بيها ست شنوات والاشتر تقريبا ١٥ سنه جان كاعد يم حجي اديب والحجي يطحن بهارات واحنه كل شويه وعطسنه من الفلفل

كال بحنية.. بوية روحوا منا لا تصير عندكم حساسيه

جاوبه الاشتر وهو يفرك بخشمه والطبره بحاجبه جان اثرها طري گله.. لا حجي صدك جذب اخذ راحتك

هو تعصب .. ولك الاشتر صدك تشرب جكاير؟ وانت كل عمرك ١٥ سنه

رد عليه الاشتر بعدم اهتمام وتكذيب.. شني السالفه حجي اديب شويه ودكول شارب الأبيض والبيجي

عقد الحجي حواجبه الغليضه وهو يرد عليه بعدم فهم.. والابيض والبيجي شنو انوووب

رد ببرود.. عرگ

فتح عيونه الحجي بدهشه وصدمة سيطرت على جميع ملامحه وكف وهو يدك يدة الهاون بالمييز ... ولك صاير حيل مستهتر انت

الاشتر مسح وجهه بتوتر ورد على حجي اديب.. شبيك حجي هاي واني تربيتك وبعدين لا شارب جكاير ولا شي اصلا اختنك منها عندي حساسيه

حجي اديب.. تختنك منها وقمصلتك لكيت بيها شخاطه وجكاير هاي شسميها بله

رد ببرود.. مو الي الساهر

الحجي بنص عين.. ومن شوكت انت صحبه ويه ساهر حتى ينسه عندك جكايره وشخاطته

الاشتر بملل.. اهووو حجي هو استجواب لو شنو هسه يعني واذا شربت قابل كفرت

وكف الحجي قريب منه وحط اديه على جتافه وهو ينصحه ... لا تضيع نفسك يبني انت بعدك مراهق لا تنسى روحك وتغضب ربك وتلهيك الدنيا وتغرك خليك واقعي وليدي ما اريدلك الضر ولا اريدلك السوء يبعد ابوك انت

جاوبه بحسره وضياع .. بس محترگ گلبي حجي

الحجي وهو يهز راسه باسى.. الوقت كفيل بالنسيان

وكف بكل غضب وعصبيه وهو يشد على ايده بكل قووه وبتفاضه.. اذا ما كتلت ساهر ابن العاهره وتحسين الكلب ما راح انام ولا راح يرتاحلي بال ذول هم ساس البله هم و وجيهه الجايفه حيل محترك دمي منهم والوقت ما ينسيني ثاري

حجي اديب... وليدي صير مثل يوسف مسامح

ضحك باستهزاء... ههه شنو ليكون اني نبي وما ادري بروحي

فتح حجي اديب الجراره مالته وهو لمح بيها مسدس ابو البكره قديم طلع فلوس من الجراره كله.. دهاك اخذ جيبلنه ببسيات نبرد على گلوبنه وهاا هاي الفلوس راح اكطعها من اجرتك نشرب على حسابك ههههه

ابتسم وجاوبه.. تتدلل حجي انت الخير والبركة

راح جاب بيبسي واجه ولكة الحجي مموجود فتح الجراره وطلع المسدس منها التفت يمين و ويسار وخله المسدس بظهره بحزام البنطرون وبعدها لبس قمصلته وهو يتسلل بخفيه

باوع بنظره نشوه وانتصار وانتقام كإن يخطط الشي رجعني للبيت وكفت اباوع عليه من بعيد وعيوني تتامله جان واكف بالركن دنيا ظهر والعالم نايمه جان الوكت مو مثل هسه وكف وهو خاتل وره مدرسه ركن وحاط ايده على ظهره على اهب الاستعداد

طلع تحسين العار وهو يمشي متوجهه السيارته يمشي بثقه يمشي بغرور وطاغوت وجبروت ولأ كأن هو مسوي شي

باوعت للاشتر جان طفل طفل مو مال يقتل ويصير مجرم بس هو جسر ما يخاف من هو طفل  سحب سلاح حجي اديب بسرعه وهو يوجهه على تحسين ويرمي بصوره عشوائية بحيث صار الرمي من كل جهه حتى ميعرف يرمي

وتحسين صار مثل الفار يتكمز منا ومنا ويختل وره السياره و وكع وهو سابح بدمه

جنت طفل والمنظر اثر بيه صرت بوقتها اخاف من الاشتر اخاف من صوت الطلق ظليت اصرررخ و واحس شراييني طلعت بس هو مجان يدري اني مراقبه

شفته ركض بسرعه وهو يضم المسدس وره ظهره و طفر من سياج المدرسه واختفى عن الانظار

وتحسين يصارع بروحه التمت الناس ونقلوا على المستشفى وما عرفوا منو ضربه جان مضروب بجتفه ورجله وهو لحد الان عنده عرجه برجله لان رجله بلاتين

صرت اخاف منه وابتعدت عنه فتره وبعد ما رحت لحجي اديب وكتله المسدس اخذه الاشتر وضرب بيه تحسين

تخبل حجي اديب وتحلف بيه ومن اجه لزمه من ياخته وهو يتهدد عليه... ولك احجي صدك المسدس عندك وضربت بيه تحسين

جاوبه ببرود... اي اني ضربته اعتذر منك اخذت مسدسك من دون علمك

تعصب حجي اديب وشد على شفايفه بقسووه وزنگة من قميصه.. ولك شلون بيك تريد تموتني تريد تقضي عليه انوب ماخذ مسدسي تريد تبليني ولك لا عبالك عمرك ١٥ سنه ما تنسجن لا يشمرونك بسجن الاحداث ويخلونك تعفن

سحب نفسه من حجي اديب وهو يعدل ملابسه... هاا خوش اي عادي واذا نسجنت السجن للرجال

عض اصبعه الحجي بتهديد .. موتتني احجيلي البارحه وين انطمرت كول وين جنت نايم

جاوبه ببرود.. بالمدرسه بصف الخامس باء

الحجي هز راسه باسى .. شلون تنام وحدك بالمدرسه انت ما تخاف جني انت واكو كهرباء جانت لو لا

رد عليه.. لا ضلمة هندس

لزمة الحجي بخوف وقلق.. ما تخايلك شي ما خفت

رد بهدوء... لااا بسرعه حطيت راسي ونمت

الحجي.. الجو بارد شلون تحملت

الاشتر .. تغطيت بقمصلتي ونمت

الحجي .. ما انبك ضميرك ما فكرت تحسين يمكن مات

جاوبه بضحكة مستهزئة.. جنت منتظر يطلع الصبح حتى اكون سعيد بخبر بموته بس للاسف ضميري انبني لان ما عرفت ارمي عدل واخيسه بالگبر

حجي اديب كعده بصفه وهو ينصحه.. ولك شلون بيك بويه ولدي ما راكض وراهم بكدك انت واحد شيطان ومشعوذ ولك واحد طفل بكدك يقدم على جريمة قتل

ضحك بسخريه.. جريمة قتل؟ عجييب ! ههه ترا هذا حقي والساكت عن الحق شيطان اخرس

الحجي شاف الكلام وياه ضايع كله .. بعد اني اسحب نفسي اخليك انت وابني اياد لان تعبت انصح بيك وانت ما تنصح

رد عليه بغضب وتبرير.. حجي شسالفه هسه الي يسمعك يكول كاتلي واحد

ضحك الحجي بقهر.. وانت ابد بريئ مسكين ما كاتل ولك مو خليت دمة بطوله

رد ببرود.. وشنوو ذاك جنه ثور لا مات ولا بي شي هسه يشبع صناديگ بيبسي ومواصلات

اردف بقهر.. وبعدين واذا مات چلب وفطس شنو يعني شدعوه هلكد گلبك محترك عليه

تنهد الحجي وعرف الكلام ويه الاشتر ضايع لان هاي سوالفه استفزازيه وبرود عنده مو طبيعي بس اكيد داخله غير

ظروف بعض البشر مدفونه في اعماقهم فأن لم تعرفوها فاكرموهم بحسن الظن...

حسيت اكو صوت برا وكفت بالباب واني احجي بصوت مسموع.. منو هنا اكدر اطلع

ودت عليه وهي تخشن صوتها كالعاده انتبهت عليها من احجي وياها ترد بصوت خشن وتتصنع الرجوله ليش ما اعرف ردت... هااا خويه اطلع اطلع

طلعت باوعتلها ابتسمت وجهها طفولي وناعم وصوتها مو يم شكلها ورغم سامعها اكثر من مره من تصلي وتقره قران مو هيج صوتها زين ليش هيج تسوي عجيبه هاي البنيه

ظلت بنفسي سألتها .. احم اختي ممكن سؤال اذا متصير زحمه

ردت وهي تتجاهلني او بالاحرى ما تباوع بوجهي كالت.. تفضل خويه

تحمحت يله حجيت.. ليش من تشوفيني تتلثمين وتخشنين صوتج

كالت بحده.. شنو اتلثم شنو قابل جاي اغتالك لا تخاف بس اني هيج ملتزمة بحجابي وبعدين شبي صوتي هو هذا شسويله قابل اروح اشرب زيت الخروع واحسنه الخاطرك

جاوبتها باحراج.. لا مو قصدي بس بس يعني سامع صوتج مو هيج يعني اكثر من مره سمعتج تصلين وتقرين قران على گلبج وهمين تناجين ربج صوتج مو هيج

ردت بعصبيه... شنوو شنوو عيد بله شكلت شكد عيب عليك لك اني امانة اخووك اذا انت كافر وما تعرف ربك خلي اخوك بين عيونك امنك عليه شلون ولك تتجسس عليه نصاص ليالي شكد عيب عليك بله نزعت حجابي تمددت والله جنت حاسه بيك مو مريح بس مو صوجك صوج اخووك

رديت عليها.. هوووب هووب يمعوده شبيج صدك جذب هو مجرد سؤال شكو خبصتي الدنيا وبعدين لا متجسس ولا شي مجرد سمعتج تصلين همزين كلت تصلين لو كايل غير سالفه جان شسويتي

جاوبتني بغضب عارم... لا والله انوب سالفتيش تريد تذب عليه اكلك وبعدين اني شنو وظاله احجي وياك احنه مو خلينا شروط محد يحجي ويه اللخ

جاوبتها.. ترا اني محجيت عليج كتلج سمعتج تصلين وبالعكس هالشي حلو تدرين شلون من اسمعج تصلين يصير عندي هاجس إيماني والتجئ الرب العالمين واصلي الحمدلله

جاوبت بهدوء لاول مره...اصعب شي يفقد الانسان هيبته ومبادئة واخلاقه يكون مجرد جثه تتحرك وكتاب مفتوح للمعاصي وبعدين الصلاة عمود الدين الله لا يبليك بشي يبعدك عن صلاتك

رديت.. اميين

خلت ومشت خطوات وهي دكول محتاج شي اسويلك ريوك رديت عليها.. لا خويه اتريك برا

رجعت باوعتلي وهي ملثمة .. اخوك هم خابر

ابتسمت.. اي خابر وسال عنج راد يحجي وياج وكتله نايمه استحيت اجي اكعدج انوب تفهمين غلط

جاوبت ... اي همزين ما اجيت لان مستحيل اقبل تجي لغرفتي نصاص الليالي وتدك الباب بحجة زوجي المصون مخابر جان كتلك طفى الموبايل وكوله نايمه حتى لو جنت كاعده

ابتسمت على كلامها وجنت اعرف ردها مستحيل تقبل تخابره باليل حتى لو فعلا هو رايدها ولو فعلا هي جانت كاعده مع العلم هو صح خابر وطلبها بس اني كتله نايمه

عفته وطلعت برا عندي مشوار ظروري

........................

رنا

اليوم الخميس وهي خطوبة كريم بعد ما شافها اتفقوا على الحاظر والغايب وكل شي

رحنه البيت جدو كهلان وجانوا ذابحين الذبايح وعازمين الناس وحنان لازمة راسها كالعاده صاعد الضغط وكاعده وساكته بالغرفه

وكريم جان بالحلاق واجه هو و جاستن

دخل مزين وطالع حلو وامي هلهلت وهي تركص وتطش جكليت عليه..فرحنا واليحبنه يفرح ويانه وهذا اول فرح شفناه بدنيانه ... ودلل خويه تدلل والمال هوايه تدلل خويه تدلل

وهو يضحك وهي تركع بيه بالجكليت قصف عشوائي تقربت منه وباسته وهي تباركله... مبروك خويه ان شاء الله بالرفاه والبنين

تشكر منها وراح يبدل وجاستن تقرب مني وهو يجر نفس بسخافه.. يوم الالنه ان شاء الله

رفعت حاجب .. درووح

عض شفته.. ولج شصايره تخبلين انتي مثل الكاشان الايراني كل ما يعتك يصير يجنن ( يقصد الفراشات الايرانيه او السجادات)

ابتسمت على كلامه وعفته ورحت ظلينه نمكيج وكوثر مو هنا ويه العروس بالصالون

وحنان وجهها ما يكصه الموس بس خلت تطن مكياج ولبست قفطان مغربي ولبست باروكة صفره يبووو مدري شسوت بروحها بس خليناها براحتها وجدي عنده حلوه بعد ذوقه قديم شنسوي ههههه والله نصحتها تخفف مكياج وتلبس شي مرتب مقبلت دكول ما احب واحد يتدخل بذوقي عاد عفتها مالي خلقها

لبست اني شي بسيط فستان نيلي طويل وردان وبي من الوسط تول بيجي وشيورت شعري ولبست حجابي وطلعنه

كريم جان لابس قاط اسود وجوه قميص ابيض من دون رباط بس ما شاء الله عليه طالع يجنن يلمع لمع ويه طوله واناقته وقاطه منطي اطلالة كولش حلوه

وصلنه بيت العروس كعدنه بالصاله والزلم بالاستقبال

جانت لابسه فستان احمر قصير مرفوع من الركبه والكصه من الصدر مثل القلب وردانه للعكس ومكبكب منفوش مدري منفوخ بس حلو وذوق للامانه ولابسه حذاء لونها ذهبي ومكياج هادئ وتسريحه بسيطه حلوه جانت طالعه ولابسه عقد فضي تراجي وكلاده ومحبس وسوار

بس يا نظره الغرور الس بعيونه تباوع بطرف عينها للناس ومطنكره مدري شبيه مدري هي هيج نفسيتها زفت

الطركاعه مو هنا الطركاعه امها لابسه بنطرون ثلجي وحذاء باته ولابسه تشيرت برتقالي  للخصرومشسوره شعرها صابغته رمادي ومخليه مكياج بالصالون امها اوووفر حيل بس يمكن هي هيج تحب

بس جان كل شي حلو وفاخر حتى الكيك والعصير الي وزعوا جان راقي بدايتة من الماعون لحد اخر دزاين وزعوا وهي عباره عن باكيت مثل الهديه بداخله شغلات حلوه توزيعات يعني جانوا ممخلين شي مجايبي والكوشه اخر موديل والترتيبات حيل انيق وحلو

شويه وظلن يهلهلن النسوان وام حسن تركص وتهلهل هي وامي ونسوان من كرايبهم وكوثر ذبت لحم بالركص

والعروس تبتسم وتنزل راسها وبعدين امها شغلت الديجي على اغنية على الموت اخذنه اخذنه ولا تردنه لنصرت البدر ونزلت امها تكسر تكسر بالركص تركص احسن منه

وبنات اخواتها واقاربهم كلها فساتين وتسريحات وركصن ركص ظلينه فاهين وصافنين وانوب غيرنها انا بياحال والدفان يغمزلي

وهاي حنان من شافتهن تصركعت انزلي وركصي وياهن جنها الچمبيله خزتنا عبالك ذبانه بنص بقلاوه

طلعت بنت خالت ايو بعد ما هجمت عليهن حنان وهي دكول بصوت ينعوص... اوووي هاي شبيها عبالك غول وهجم دروكصي عدل

جاوبتها بسخريه.. اعذريها عيني سميره اليوم مو بوعيها

هي ظلت تضحك وشويه وكالو الشيخ ديعقد وحيدخل كريم وابوها والشيخ

دخل ابوها اسمرررر حييييل وخشمة كبير واصلع تفاجئت عزا واني جنت مخيله عليه شفت بيه احلامي اظل على الاشقراني احسن ههههه بس جان متوسط بالعمر ولابس قاط وما عنده لا لحيه ولا شوارب وجهه مو رحماني مرته حلوه شو هو محلو بس ينكث فلوس

وكريم واكف بصفه دكول كسوف وخسوف فرق بين الثرا والثريه خرب شلون ابو  ايو صادله نسيب

دخلو عقدوا وطلع ابوها والشيخ وبعدين طلعت هي وكريم تضحك ولازمة ايد كريم جانت كصيره وناعمه وهو طويل شكلهم حييل حلو جانت فرحانه وهو مبادلها فرحتها

كعدوا على الكوشه والركص بفلس بنات خالتها كدامه يكسرن وامها واكفه يمه وكل شويه وكالت.. يله ايووو گومي اوركصي يله ايو گوموا

شغلت الهم اغنية ع عبالي حبيبي لاليسا

هو جان خجلان حيييل وكل شويه ومسح  بالكنلكس  حبات العرگ الي تلئلئت على جبينه

باوعتله ايـــــــــو ببتسامة وهي دكوله.. حبيبي خلينا شويه نركص

باوعلها بدهشه كلها ..تمام

وكف وهي وكفت وتعدل بفستانها خلت اديها على اكتافه وهو خله اديه على خصرها الناعم وظلت تتمايل على نغمات الاغنيه وهي تغني بيها وهو يباوعلها ومرات احسه يشرد بتفكيره وذهبه وهي مندمجة وتردد كلمات الاغنية بكل حماس..

بعدها حظنته ونامت على صدره تقريبا ثواني وبعدها عنه وهو يكولها .. يله اني اترخص الوالد اتصل عليه

لزمت ايده وشاورته وهو هز راسه بقبول وهو يبتسم بعدها سلم عليها وطلع وما عرفت شنو كالت اله والفضول صار عندي إلف

خلينه ورجعنه واحنه نركص وفرحانين تمنيت ويانه بنات عامر سولين وجيهان وافيان جان تونسن شويه بس وين عامر الكلب ميخليهن

...........

صفاء

جنت طالع بسيارتي ضايج وطالعه الدنيا من عيني شوكت واحد يستقر هسه غير يجي الاشتر والله شنو اكعد من الصبح اطفر اجي باليل من وره مرته

اتصل موبايله رفعته شفته مصطفى تفاجئت هذا شيريد انوب فتحت خط كتله.. هلا ابو الصوف شلونك احوالك امورك

رد عليه بغرور... هلا صفاء شلونك وين انت

جاوبته.. اني يم الجسر اذا تريد تعال

سد الموبايل وماكو نص ساعه واجه نزل من سيارته الفاخره سدها بهدوء جان لابس قميص سمائي وبنطرون اسود ونظاره شمسيه نزعها وتقرب مني وهو يرتجي على السياج ... شلونك

جاوبته بهدوء... بخيير

ضحك بخبث.. والله ممبين بخير دشوف حالك من رافكت الاشتر لحد الان وانت عبالك واحد متسول شوف الفرق الي بيني وبينك

جاوبته بحده.. احترم نفسك تمام وبعدين الحمدلله عايش وبخير مو شرط البس مثل لبسك ولا سيارتك حتى اكون بخير الحمدلله لا اشرب عرگ ولا انام ويه الكح..

رفع حاجب باستعراض.. هه شنو قصدك اني اشرب ونام ويه الكح..

جاوبته... جااا روعة شنو علويييه؟ حشا العلويه منها

مصطفى بضحكة رفع راسه وهو ينفخ الدخان ليفوك وبعدها باوعلي بحده كال... روعه نعال برجلي ما البسها والوصلك كلام عني دايخ بروعه جذاب صح اشرب بس مو مال احب وحده صايعه مثل هاي

رديت عليه.. وليش تشرب

جاوب بعدم اهتمام... عادي نكعد كعده مثقفه نشرب شويه وبعدها ننسم شي حلو مو بخربطه شرب بثقافه

ضحكت باستهزاء... هههه كلت شرب مثقف مو  ترا هو الشرب شرب لو موبثقافه وانت دتغضب ربك

جاوبني.. هسه عوفنه من هالكلام تشتغل وياي وامشيلك بالشهر مليون تشتغل وياي بالمعمل مال الجلود

جاوبته بحده... لا دامك داك الصدر لتحسين ضد الاشتر مستحيل اشتغل وياك

رفع اكتافه بعدم اهتمام ورجع يدخن .. بكيفك حبيت افيدك

رديت عليه.. هيج استفاده ما اريدها واعرفك لان اني ويه الاشتر تريد تسحبني انت وتحسين ضده

جاوبني.. بابا هذا ميفيدك ما تحصل من وراه بس وجع الراس والمشاكل مرتح تحصل شي

تعصبت من كلامه جاوبته واني احط ايدي على صدري... هذا اخوووي هذا عضيدي والاضفر ما يطلع من اللحم اذا انت خاين وحقير اني مو مثلك

جاوب باستفزاز.. تمام على العموم الاحد الجاي ان شاء الله خطوبتي اذا تحب تجي اتشرف بيك

عقدت حواجبي.. اي ناسبت منو

رد بفخر.. تحسين انطاني بنته

فتحت عيوني مصدوم ومدهوش من كلامه احس عقلي طار من راسي لزمته من ياخة القميص بعصبية... شنووو ولك انت شكد عار اني شكد شفت عارات مثلك واحد مشفت ولك شلون تناسب عدونه وانوب تاخذ بنته انت نسيت شسوه هذا العار

سحب نفسه مني وعدل قميصه كال ببرود.. عدوكم انتم مو عدوي

ضجت منه حييل كتله ... الاشتر يشنق وحق ابو فاضل

رد عليه.. شكو وهو شدخله هو مو تزوج حتى ما عزمني بعد على شنو يتدخل بحياتي قابل اني متدخل بحياته

جاوبته بغضب... اني حذرتك وانت بكيفك

باوعلي بنظرة غرور واستفزاز وخله وراح وهو يضحك بخبث وحقاره

استغفرت ربي ما اعرف هذا شبي ما اعرف ليش هيج صاير ويه تحسين وساهر ولو هو من زمان هيج مستغلي ساهر وتحسين لصفه ويعتبروا ورقه رابحه ضد الاشتر

خليت ومشيت شفت الموبايل اتصل رفعته شفتها هدى بنت ساهر كشرت عن ملامحي عفتها وسديته بوجهها بطرانه هاي

رجعت اتصلت مره ثانية جاوبته .. ها هدى شلونج

كالت.. حبيبي ماما متقبل اتزوجك راح اتزوج ابن خالتي باااي

قفلت الخط بوجهي يا الله هاي شبيها دوم مستعجله گبر حتى گبر روحي تزوجي ابن خالتج شدخلني دولي

........................

جيهان

اليوم خميس يعني اليوم موعد خطوبته جان يوم عليه من نار احاول اصبر بروحي واكتم بداخلي بس ما كدرت كل شويه اتخيله لازمها يضحك وياها يبوسها وكل شويه اواسي نفسي يله ترا هو ممواعدج بشي الله يسعده ما قصر ويانه

وارجع لنفس النقطه وانحسر على حياتي بعدها صفنت اني ليش هيج حياتي ليش هيج مستقبلي منو السبب ماكو سبب غير ابويه شكد اكرهه هو سبب دماري وتعاستي لو عندي اب بي حظ مجان صار الي صار

جان اني هسه ممحتركة ولا معلقه نفسي بكريم ولا امي متوفيه وانوح عليها ولا اختي ما اعرف بيا مكان

تذكرت امي وبجيت ما ردت جيهان تشوفني ردتها تكون بقوتها وصبرها دخلت للحمام وبجيت همست بوجع .. وينج يمه مشتاقتلج وينج عني حيل بحاجتج اليوم حرمنا حتى من گبر حرمنا حتى نبجي عليج

لواحد من يموت عنده عزيز يروح يزوره يسويله ثواب يبجي عليه ينوح يلطم عند قبره واحنه ابد منكدر كل شي نسوي حيل ظلمنه ابوي

صارت عندي رغبه اروح وازورها وكلبي مفرفح عليها بدلت وطلعت شفته دخل وهو شايل تايل شمره بنص البيت كال.. بعد لا تشغلن صوبه نفط ماكو عود اذا بردتن شعلن هذا التاير وتدفن بيه

گوة صبرت نفسي ما احاجي وافيان باوعتله بقرف ودارت وجهها

كعد وهو يحجي... شنو محد خطبجن ولا منو يخطبجن وامجن كح.. وميته بغسل عار

احس روحي فارت من كلامه سكتت محاجيته والرجفه بكل جسمي

كال.. والله جنت اعرف بعد محد يدك الباب عليجن هسه كون يطيب ابو سعدون حتى ازوج هاي المشوهه اله

اني گال هيج واني صار عندي انهيار عصبي هجمت عليه بعنف ... ياااا حقيير يا كلب محد مشوهه غيرك وغير صاحبك العاااار واكرهك ولك اكرهك

صكيت على اسناني والدمع يتطافر من عيوني... شكد شفت حقراء مثلك ما شفت انت السبب بكل شي انت السبب والله اليوم اقتلك

افيان فتحت عيونها مصدومه كلتله... لا تحاجيها عوفها اي صح انت السبب وبعد ما نسكتلك لا عبالك مثل امي

عطت بوجهه بغضب ... اي والله موتك على ايدي والله

هو تخبل عفاريته هجمن تقرب مني وهو يغلط .. المشوهه المحروكة ولج تغلطين عليه اليوم ادوسج بنعالي مثل الصرصره

صرخت بوجهه.. محد مشوهه غيرك

ما حسيت غير بوكس على وجهي افقدني الوعي

.........................

سوليين

قفلت الباب الرئيسي ويوميه ادعي الدوحي لان فلش ذاك الباب وجابلنه جديد فد مرتاحه على الاقل الباب ينسد وينقفل مو مثل ذاك حتى قفل ما ينقفل

دخلت سبحت وفتحت البقچة مالتي طلعت منها ثوب عادي وشال سبحت بسرعه ركض ركض وطلعت

اول ما طلعت واني صرخت صرخه وعطت من صدمتي وتهشدتي

باوعتله جان كاعد بصف التيل ( عمود الكهرباء ) ويدخن من عطت باوعلي بنظره من فوك ليجوه كال.. شبيج ولج

لفيت راسي بالشال ... هاي انت شدخلك اني مو قافله الباب شنو شبح انت لو دخلت من جوه الباب

رد ببرود .. هيج تستقبلين زوجج حبيبج بالعياط ولسان الطويل

رفعت حاجب باستهزاء.. هه حبيبي !! وبعدين صدمتني دخلت محد بالبيت طلعت لكيتك كاعد على القنفه حتى ما اعرف انت اليوم تجي

جاوبني بهدوء وهو يطفي الجكاره بالنفاضه.. اي غير انتي ادبسز ما تسألين

اجيت كعدت يمه .. اي صدك شلونك احوالك امورك

رد عليه بنص عين .. من الاخر كولي شعندج

تنهدت .. عندي طلبين بس بداعة سالي لا ترفض

عقد حواجبه .. عود ليش سالي بالذات

جاوبته ببراءة.. غير صديقه واخت على كولتك هسه المهم تقبل بطلباتي لو لا

رد عليه وهو ياشر بجكارته.. قبل لا تطلبين صفاء شلونه وياج

جاوبته  بصدق ... لا زين خوش ولد احسن منك

سحلني من ياخة الثوب وجرني يمه عطت بصوت عالي وراسي صار بين عضدة وصدره كال.. شكلتي ولج

جنت محنية الراس واني بين اديه .. لا يعني قصدي حباب لطيف انت شويه عصبي وتتجاوز بس هيج قصدي

رخه من قبضته عليه ورجع حضني وهو يباوع لعيوني كال.. اي هو هم كال انتي حبابه ومؤدبه وخوش بنيه

رديت عليه .. اي فدوه الحلگي وين اكو مني انييي

عض شفته وهو يباوع لشفايفي كال بسخافه ... اي والله فدوة الحلگج

توترت من كلامه وسبحت نفسي شويه باوعت الرجليه لابسه شحاطة شوشو الجابتها هديه ام الورد كتله ... شوف هاي جابتها شوشو صاحبتك بمناسبة زواجي

كرصني حيييل من جتفي واني اكمز بوجع ... اوووه اييي خاب شبيك كله كرص وعض شحجيت انت تجي تفطسني ولا تعرف تكعد كعده بيها حظ

كال بعصبية مصطنعه ... جااا شنو دكولين صاحبتك جابتلي هديه

رديت ببراءة.. شمدريني غير هي شوشو تعرفك قابل تعرفني وجابتلي هديه على العموم ما تروح بعد تاخلك فد عشر ايام وتجي فد جنه مرتاحيين منك

باوعلي بنظرة ثقه كال بتهديد... ابوووسج

جاوبته بخووف... لا لا العفو ظل هنا يابه نور البيت

رد عليه وهو يبتسم بغرور.. وينه صفاء

جاوبته بحماس... هسه عوفنه من صفاء دا احجي وياك اولا طلب اريده منك اريد اشوف اخواتي مشتاقتلهن

رد عليه بخبث .. بوسيني يا الله

تنفست بغضب .. ترا عيب عليك هيج تستغلني ودا احجي بجديه ونبي صدك اريد اشوف اخواتي طاك گلبي عليهن جيبهن شويه اليه او خليني اروح لاهلي

رد عليه .. لا مترحين الاهلج ابوج عار اخاف منه يركبه مطي ويتصرف تصرف ميعجبني بس اكدر اجيبهن الج

لزمته بتوسل وغصه .. عفيه جيبهن والله مشتاقه الهن

حك لحيته وجاوبني ... والله بوسيني واجيبهن

ضربته بقبضة ايدي على صدري... ما اريد لا تجيبهن بطلت تبريت منهن اصلا

رد ببرود.. كيفج عود كلت اجيبهن تتونسين وياهن وتسالين عن احوالهن وتتطمنين عنهن بس انتي رفضتي العرض

وكفت بعصبيه وعفته ومشيت صاح عليه .. العرض صالح لمدة اسبوع

جاوبته.. لو سنه ما اوافق بي

جاوب ببرود .. براحتج العرض بيه تخفيضات بوسه من دون حضن

باوعتله بسخريه وسديت الباب قفلته وخليت دبة المي ارو ورجعت باوعتله من الشباك .. وين جنت وقتلت منو

رد بخبث.. كتلت ابوج ارتاحيتي

ابتسمت .. خوش خبر معناها نتطلك واشوف اخواتي

رد .. من ضمن شروط العرض قتل عامر شنو رايج

ضحكت.. ههه واصير شريكتك بالجريمة لا شكرا خلي عرضك الك ما اريد المجرررم

رد عليه بنص عين.. تأدبي

سكتت مجاوبته بس اباوع عليه وهو كذلك بعدها حجيت .. اكولك انت مو تبوسني ذاك اليوم مو بستني يله جيب اخواتي

كال بعدم رضا.. لا هاي بوسه غصب اريد تبادل طرفي يصير فد شي حلو نروح بغير عالم

جاوبته.. خليك بعالمك طلق رمي عركات عصابات احلى على الاثل اكشن وينك وين الرومانسيه

رد عليه.. حبينه نغير شنسوي

وكف وهو يعدل بقميصه وركن مسدسه وره ضهره ولبس جاكيته تقرب مني وكف يم الشباك ونفخ الدخان بوجهي واني كحيت وظليت اهفي .. يمه خنكتني خاب شبيك

جاوبني بسخرية .. طالع محتاجة شي

رديت بدون نفس ... لااااا

حط اصابعه على شفايفه وهو يطبع بوسه عليهن وشمرها بالهواء بسرعه سديت الشباك وهو ضحك

وصل للباب واني فتحت الشباك وصحت عليه .. بوستك نركعت بالشباك و وكعت تعال اخذها

دار وجهه عليه وعلى وجهه ابتسامة حلوه غمزلي وقفل الباب

وخرت من الشباك وگلبي يرجف خرب حتى ما خلاني اطلب طلبي الثاني هذا راح يقضي عليه راح يموتني بس الحلو الي بيه ويايه هادئ وحباب ولطيف بس ما اعرف هو هيج لو جذاب يريد يستغلني وياخذ الي يريده وبعدها يشمرني بالزبل خيولي كل شي ما انطيه ما اريد اتورط وياه

فتحت الباب كملت تنظيف وبالي مشغول باخواتي حيل مشغول اريد بس اشوفهن بالي عند جيهان احس بيها شي والله دا احس اكو شي جيجي بس لا مريضه او بيها شي ياريت الاشتر ما يخبث ويطمني عليها والله بالي عندها

زين ابوووسه ؟

لا ما احبه ما اريد ابوسه ابد مستحيل شنو هي ديرت بوس بهالزلگ بطران انوب يستطمع ويريد اكثر انوب يستغلني خلي يروح

سويتلي اكل اكلت شويه وبعدها غسلت مواعيني وصليت ظليت اباوع من الباب الصراصير كاضات الباب ويتمضحكن وسوادي ابو كرعه اخو دوحي مكابلهن شلون نسوان ما تستحي ويييع

خليت ودخلت جوه خليني افكر عدل خلي من يجي الاشتر اكوله المنطقه مو زينه وذن مو زينات انوب كل شويه وحده جايتني وهسه تصير سمعه عليه حتى شنو بلكي يشيلني بغير بيت لان بصراحه لعبت نفسي خلي اسوي روحي مسكينه واذبلي دمعتين واخاف تشوه سمعتي ومن هذا الكلام  وسمعت يكولون مرت الاشتر صاحبة الصراصير هه خرب شكد احبني من اصير حيه

صار دنيا اليل استغربت لحد الان صفاء ما اجه هذا وين راح هو صح يتاخر بس يجي يسأل عني واشوفه بس اليوم ابد ما بين

والاشتر هماتين اشو طلع من وكت لحد الان ماكو معقوله خطفوهم زين اذا نخطفوا اني وين اظل وين اروح خرب والله حيره خفت من الجو والمكان بس لا انام وحدي اليوم هم وجودهم بالنسبه اليه كافي بالبيت

كعدت صليت وقريت سورة يس حافظتها كلها على الغيب من زمان حافظتهد واحبها ودوم اقراها اهديها لامي الله يرحمها

دمعت عيوني بأسى من اتذكرت امي شكد احبها واموت عليها ما توقعت هيج ابويه يموتها ويحرمنه منها من دلالها وحنيتها جنت ما افركها ما اعرف شلون فاركتها وگلبي نار تفور عليها

حضنت نفسي وصرت ابجي بصوت عالي يطلع من گلبي واشهك ولو بيدي اصرخ بعلو صوتي بس اخاف يصير شي والعالم تفهم غلط

حسيت بيه دخل فتحت الشباك واني اباوع شفته واكف بكل غضب وهو يحجي ويه ثنين نفسهم الي جانوا وياه من جاب ساهر

حجه بغضب ومن بين اسنانه... هسه ثوووواني اريده يمييي مفهوووم

جاوبوا بطاعه .. نص ساعه وهو يمك

هز راسه بقبول ومسدسه بيده ارتعدت من شكله وخفت سديت الشباك وضليت اباوع من البرده

طلعوا همه وهو ظل يتهدد ويتوعد... بسيطه لك كلب حيوووان بسيطه يصير خيييير هاي تاليها لهنا وصلت بسيطه

دفر الكرسي المقابيله وهو يزفر بغضب وفتح موبايله ديتصل .. وينك انت الثاني ما بينت اليوم لك صفاء ويينك

بللت شفايفي بحيره والجو اظلم عاكس بس نور القمر على هيئته ماكو نص ساعه وهو يروح ويجي بنفس المكان ويتصل ومحد يرد وبعدها انفتح الباب شفتهم دخلوا ثنينهم واحد لازمة من اديه والثاني حاط المسدس براسه

من شفتهم من الخوف وكعت من طولي وظليت بوكعتي حتى ما عطت رغم الوجع الي برجلي

سمعت الاشتر يكوله ... احنا المو كدنا ماجرينا اسلاح عليه

نهاية البارت ... يتبع

كونوا انتم كونوا بخير.. احبكم 💔

اعتذر البارحة نت ما عندي فما نشرت ان شاء الله اعوضكم وتتدللون

ولا تنسون التصويت والنجمة الخضرة بعد روحي وجروحي 😍