رواية #وكر الأشتر الفصل التاسع عشر 19 - بقلم الكاتبه سمو العراق

البارت الثامن عشر
رواية.. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

يا اهلا وسهلا بكل شخص انظم الكادرنا برواية (وكر الاشتر )

مدخل

••
قـدمت الـوضوح فـي كـل شـؤون حـياتي،
ولـم أنـل إلا الـشكوك والـتساؤلات. . 🖤

...............................

جان واكف بجبروت هائل وهو ينتظر الشخص المعلن

انفاسي خافته ومضطربه ودگات گلبي سريعه من شفته لازم اسلاحة وهيئته وشكلة اجرامي خفت حيل

بالرغم من كل شي و بالرغم من اسلوبه ويايه بس دا اشوف وره هذا الأنسان شي ؟ يمكن انخدع ! يمكن انجرح ! يمكن تعرض لابشع الافعال بس هذا الرجال غير عن كل الرياجيل الي يتعرضون لفد موقف يوكفون بنص الطريق ويتعقدون نفسيا هذا ممتعقد نفسيا هذا هو يريد يعقد العالم نفسيا

بالعكس الاشتر دا احسه يحارب بذاته بشخصيته ....بعيدا عن الاجرام بيه او يكب غضبه عليه وهذا الشي مريحني نسبيا

بعد ما دخل الشخص المطلوب قلصت عيوني واني اركز بيه هذا اعرفه شايفته بس وييين وين؟

تشابكت الخيوط بمخيلتي حتى اتذكرت اخر موقف ويه هذا الشخص ايي ايي عرفته هذا الي اسمة مصطفى الي جان ويه ساهر باخر موقف وياه

حطيت ايدي على صدري .. عزا شكو بس لا يكتله شمسوي هذا حتى هيج يتصرف وياه وليش جابه ؟

كل التساؤلات والشكوك بداخلي تريد جواب !

شفته سحبه بشراسه جان ينافسه بالطول والهيئة من غير الاشتر مبين عليه اكبر منه بعقد كامل او اكثر

هزه من قميصه والغضب مغيم على ملامحة الغضه وهو يزمجر بغضب... مصطفىىىىى تستفزني !! عجيييب انت من شنو مخلوق انت ما عندك احساس لهلدرجة وصلت بيك المواصيل تناسب عدوووي تناسب ابغض الناس الي

رد عليه مصطفى بصوت مرتبك يتصنع الشجاعه ... أعتقد هاي حياتي واني حر بيه

سحبة من ياخة قميصة بكل غضب ... لا مو حر وحياتك مو حر بيها تتزوج جلبه من الشارع ولا تتزوج بنت عدوي وحق الكفل الزينب اسوي مو عرس اسوي مجزرة عليك وعلى راس الكلب تحسين

صاح مصطفى بصوت عالي... انت شدخلك اريد اعرف شدخلك ترا مو من حقك وبعدين اني مو واحد من رجالك

ما اشوف اله الاشتر جاب مصطفى براشدي طير ملامح وجهه انصدمت وخفت

من غير اني من اول ما شفته وكعت ورجلي التوت وتاذيت ظلت حيل توجعني ومن شفته هيج زاد الوجع عليه بس ظليت متماسكة واباوع من الشباك اريد اعرف النتيجة شنو

مصطفى خله ايده على خده وهو مصدوم بلل شفايفه وهو يهز راسه بقبول.. يصير خيير يصيير خيير

رد عليه الاشتر بقسوة ... ما يصييير خييير وحق علي ما يصيير خير واذا انت رجال روح اخطب بنت تحسين وشوف شيجرالك اخليها تتسولف سالفتك بالتاريخ وحق عرش الله

مصطفى مسح وجهه بتوتر ورد عليه... انت فعلا مثل ما گالو عنك مجرم وعند شغلات ممنوعه

الاشتر بغضب.. الي يحجي احط رجلي بحلكة وافركة اله وانت اناني وما تحب غير نفسك وباجر تندم صدگني باجر تندم ولا عبالك تحسين النذل يخبم لاااا.. بس هو يستغلك ضدي وعلى يوم اخيسه واطيح حظه

مصطفى وهو يكتم غضبه... صفاء المنافق هو الي گلك راح اخطب بنت تحسين مووو بسيطه صفاء

الاشتر فتح عيونه مصدوم والغضب اكتسح ملامحه لزمة من عنقه وهو يصفه على الحايط حسيت روحه طلعت من عيونه والاشتر يحجي من بين اسنانه ... اذا صفاء صار اله شي لو تجي من الله اريده منك ومن تحسين

واحد من الموجودين تقرب من الاشتر وهو يهدي بيه .. بلا زحمة بس حاول تهدئ لا تنسى مصطفى مكانته شنو عندك

باوع على هذا الشخص وابتعد من مصطفى وبعد كعد وهو يدخن وذاك وكع على ركبه وهو يكح ويحاول يلتقط انفاسه

الاشتر صاح على الشخص الثاني الموجود بهذا الحادث وكله.. جيبله مي بسرعه

كمرت من مكاني ... عزا بس لا يجون على دبة المي ارو ياخذوها

بس حمدت الله وشكرته من راح للمطبخ وهو يجيب مي انطاه اله بس مصطفى ما قبل دفع ايد الولد بقوة وكع الكلاص وتناثر الكزاز على الارضيه المحفره بكل قسوه

وكف وهو يعدل وملابسه وشاد على ملامحه وزاد الحقد عنده

والاشتر حجه بهدوء وهو يطفي بقاية الجكايرة بالميز الكدامة گله.. شوف مصطفى صفاء اذا صار عليه شي انت وتحسسن وساهر المسؤولين هسه لو يفوت من هذا التيل ( ويتكهرب ) انتم حصتي

مصطفى بغضب.. شنو انت متعافي

رد ببرود.. اي متعافي ما دامك كلت بسيطه واني الك صفاء يعني نيتك مو صافيه وشغله ثانية اذا تريد تخطب بنت تحسين روح اخطبها بس خليك على علم العرس يصير مجزره وانت تعرفني شنو لا اخاف ولا استحي

سكتت مجاوبه بس احس بداخله براكيين تغلي

بعدها الاشتر كال بامر لواحد من رجاله... رجعه منين ما جبته

وكف هذا الشخص وگله .. تفضل ويايه

مشه مصطفى وهو يبعد عنهم وما قبل يلزموا

والاشتر صاح على الشخص الثاني وحجه وياه بهدوء گله .. لا تحاجوا حتى لو يتجاوز لا تحجون وياه اي كلمة خلو براحته

وذاك يرد عليه .. سمعا وطاعه

خلوا وراحوا والاشتر ظل يدخن ويرجع ليوره بحيث صفا الباكيت الجو برد حييل واني خليت ورحت دا انام واسمع صفاء اجه وظلوا يسولفون انوب خلوا وراحوا وللثنتين ماكو خليت وعفتهم ونمت والخوف يسري بجسمي كل شويه واكول هسه يهجم عليه ساهر وربعه وين انطي وجهي وهذا طمس هالطمسه طمسه

....................

جيهان

فتحت عيوني ببطئ شديد والرؤية عندي مغوشه الدموع تنساب عندي مثل انسياب المطر بإي حق هيج يضربني ضربه احس راسي من الوجع راح ينفجر احس عظام وجهي تهشمت وخلايا الآلم تهش بجسمي

ليش هيج احنه من دون البنات نعيش هيج عذاب احس خاصرتي تكطعت ما اعرف شبيها ونيت بصوت عالي اصرخ من اوجاعي

اجت افيان تركض عليه وهي تبجي... هااا جيجي ها حبيبتي كعدتي

شهكت بعبره وهمست بضياع... اريد امي

حضنتني وهي تبجي بصوت عالي... اني امج حبيبتي

لزمت خاصرتي بوجع... جسمي يوجعني هنا الوجع شكوو هو شسوالي اخر شي اتذكر ضربني بوكس على وجهي جسمي شبيه يوجعني

بلعت غصتها وردت عليه.. الحقير النذل من وكعتي رفسج على بطنج وخاصرتج گوة خلصتج منه انوب رش البيت نفط يريد يحركة

شهكت من بين دموعي.. ما نخلص منه

هزت ايدها بقهر.. شيخلصنا انوب عار والعار ما يموت والله اذا مات ويدفنوا اجيب خباطه واصبه بسمنت خاف اله نية يطلع من الگبر هالنذل هذا

جاوبتها بتعب .. الرسول يكول رضا الله من رضا الوالدين هذا شلون بيه وهو حتى مو مثل الآباء

نفخت بضجر... الله ينتقم منه ويعاقبه على كل سالفه سواها بينه ولج ماكو هيج اب اصرخ وابجي اگلة راح تموت وهو ولا جنه

سكتت مجاوبته وخليت و وكفت واني اترنح بمشيتي بتعب وجزع وكفت على المراية واني اشوف وجهي ملطخ بالدم وخشمي مورم وعيني زركة  صايره وجهي صاير خارطة مسحت دموعي الي تلوثت بالدم والشخوب كاسي بشرتي

اووووف اللهم لا حسد بس اليوم ناس فرحانة واني بقمة تعاستي الله يسعد العالم واحنه من ضمنهم والله تعبنا ومل الصبر منا

غسلت وجهي واني احس ببرودة المي تهيج اوجاعي وتثير جنوني غسلت بحذر وطلعت صعدت فوگ

حل الظلام وظلمة روحي اتعس حياتي كلها ظلام بظلام وعايشه ويه وحش شرس ما يرحم

ظليت كاعده على زاوية السطح والمطر نزل كأنة يغسل جروحي قطرات المطر تنزل بقسوه على وجهي ما حسيت باوجاعي الوجع الي بداخلي اعمق وجرحة طري

دائمآ أسال نفسي هذا السؤال ليش اني بالذات على كولته مشوهه مجروحة مظلومة منبوذة ليش احس العالم دايستني ما عندي سند غير امي من بعد رب العالمين

وراحت سندي وظلت الحياة تردم بيه من كل جانب ليش ما شفت يوم حلو بحياتي ليش ما الحياة نصفتني بيوم من الايام اااااااااه تعبااااانه

بجيت واني اشهك وارجف وملابسي لزكت على جسمي واشتد المطر وخدرت خلايا الآلم عندي

ياريتني متت من احترگت من قبل واندفنت ولا اعيش هيج معاناة ومأساة ليش ياربي شوكت الفرج صار سنين اني نفس المعاناة نفس الالم نفس الوجع ماكو تعريض ياربي اريدك تعرضني

انجرحت بما فيه الكفايه تعبت وتعبت نفسيتي صرت اتمنى الموت جزعت والجزع حرام تعبت ياربي ماكو اي امل عندي انقطع كل امل بداخلي

حسيت بافيان واكفه على راسي واني اناشغ كالت بدموع تغسل وجهها المتعوب... كافي حبيبتي كافي الله ياخذ حقج من كل ظالم وتطلع حوبتج

جاوبته والدموع حجبت عندي الرؤية ... ابوي قضى عليه دمرني دمر حياتي كرهني بشي اسمه اب صرت حتى اخاف اتزوج ويصير عندي طفل اخاف يطلع مثله والله هيج صرت افكر كرهت كل شي بهاي الدنيا التعاسه ملت روحي

جرت نفس و وكفتني كالت... الله كريم حاولي تقوين نفسج وحاولي تنسين كريم حتى بعد ما تتعصبين و تتوترين وتشدين اعصابج

سحبت نفس عميق وزفرته والدمعه تلالي بعيني ... شتحجييين انتي اني احبببببه

تعصبت وصكت على اسنانها ... انجبي لا تكولين احبه حبتج حيه خلي يولي ما يفيدج تنرفزيني من دكولين احبه

جاوبتها بقهر وارجف لزمت اديها بتوسل ... والله مو بيدي والله ياريت لو بيدي ياريت لو اكدر ولج ما اعرف شبيه ما اعرف جنت اشوف بيه دنيا اشوف بيه حياة ضاع كل شي مني

مشيت خطوات واني اتجه لعمق السطح واحجي بصوت عالي ورافعه اديه ...ياربي فدوووووه يارب بحق كل من صاحب حق بحق عزتك وجلالتك اريدك تغسل كريم من گلبي مثل ما غسلت الشجر والشوارع وحل شي بالمطر غسل كلبي من حب كريم هو مو نصيبي طلعه من كلبي ولا تعلقني بيه اكثر

تقربت مني اختي وحظنتني من وره وهي تبجي همست بعذاب .. كافي يروح اختج كافي والله من اشوفج هيج اموت قهر

حظنتها واني ابجي محد ظلي بهاي الدنيا غيرها ماتت امي وسولين راحت ما عندي غير اخيتي افيان الي صارت الي سند

نزلت وياها جوه انطتني ملابس بدلت بسرعه ولفيت نفسي ببطانيه ونمت وخشمي كل شويه ونزف دم وجهي مشوهه وجسمي جثه هامده حتى ما اكدر اتحرك من الرجع

حظنت نفسي واني ابجي ابجي لحد ما حسيت اذن اذان الصبح اريد بس تتعدل حياتنا والله تعبنا متنا بيتنا اظلم يفتقد لحنية امي يفتقد لكل شي

شكد مشتاقه الها اريد احظنها احسها متعذبه بگبرها ياريت الميت ياخذ اجازه من رب العالمين ويجي يشوف اهل بيته شصاير بحالهم من بعده ياريت

وكفت بتعب رحت غسلت من الدم وسبحت بعد ما انكطع نزيف خشمي توضيت وصليت بالفجر وجماله حسيت انجلت روحي وارتاحيت شويه فعلا الصلاة طاقه ايجابيه وصبر

الحمد لله الذي كتب علينا الصلاة، والله لولاها ما علم المرء أين كان سيفرغ صدره حين تملأه الأماني المصلوبة كمدًا؟
وأين كان سيهزم الدنيا حين تنقض عليه!

.........................

من بعد ما طلع ابو المصايب ابو المشاكل من البارحه باليل ماكو هسه لا يرجع شدخلني بيه بس المشكلة اني اخاف اظل وحدي وتتخايلي اشياء

طلعت من الغرفه اول ما طلعت شفته طلع من الحمام وهو ينشف بشعره فتحت عيوني مصدومة سألته بهدوء.. هاي انت شوكت اجيت هسه اجيت ؟

رد عليه بعدم اهتمام وينشف شعره بالخاولي ولابس كامل ملابسه كال.. اجيت بالثنتين باليل دخلت لغرفتج حاجيتج وبستج وشميتج بس انتي جنتي نايمه حاولت اصحيج بس لو افجر يمج عبوه ناسفه ما تكعدين نومج ثگيل

فتحت شفايفي بدهشه وعصبيه... لااااا تجذب اصلا نومي  خفيف واصلا مخليه دبة المي ارو  مدخلت لا تجذب

ضحك باستهزاء وشمر الخاولي عليه... اي مو عساس دبة المي ارو صبه كونكريت

تعصبت اكثر وشديت على شفايفي ... يعني صدك دخلت للغرفه واني نايمه

هز راسه بإي

ظليت اتنفس بغضب وصدري ضاق شكد غبيه ليش ما قفلت الباب بس شسوي هو الباب السركي عطل البارحه

مشه خطوات وركضت عليه لزمته من ايده ... يله بسرعه خليني اشوف اخواتي

رفع حاجب.. ليش وافقتي بالعرض ؟

هزيت راسي بنفي... لااااا بس انت استغليتني ودخلت غرفتي من دون علمي واخذت الي تريده معناها تعادلنا

باوعلي وهو يعض شفته بذوبان ...حظنتج حظنه بحراره عبالك جاي انتقم من المسافه الي حالت بيني وبينج

عطت بوجهه بغضب ... جذااااااب ما اصدكك

ابتسم ابتسامة جانبيه كال.. جنت ما اعرف معنى الحظن واول مره البارحه لكيت اديه تلتف على خصرج الناعم اووف اختلطت انفاسي بانفاس اشتميت عطرج وبستج

عصرت اديه بقسوه و وجهي احسه صار نار واحس راسي طگ بيه فيوز كتله بحده .... هاي اخر مره اسمحلك ثاني مره تشوف شي ميعجبك ويله اخذني الاخواتي دامك حرامي متسلل الغرفتي

رد بعدم مبالاة ... لا ترا هذا استغلال مو من ضمن شروط العرض يعني اني استغليت نومتج

عطت بوجهه واني رافعه وجهي اباوعله... جذااااب ادري بي بيك جذاب

رفع اكتافه من دون اهتمام كال .. كيفج

بلعت ريكي وعفته كعدت على القنفه ومتوتره وارجف شلون حقير عود صدك بس والله احسه جذاب لان مستحيل اني افز واخاف خاصه من اجيت هنا هوايه اتفزز بس يمكن يضحك عليه

كرطت اضافري باسناني وكل شويه واوكف وارجع اكعد حطيت ايدي على خدي .. عود صدك يحجي

رحت وكفت بباب غرفته من دون ما ادخل .. زين شجنت لابسه

رد عليه والجكاره بين شفايفه ويسفط بملابسه بجنطة كال.. لابسه ثوب كصير ابيض وبي وردي وردانه كصيره بس يابه تدرين شكلت بيني وبين نفسي

اني انصدمت اي صح اني هيج لابسه جاوبته واني اتخصر بعدم رضا .. اي شكلت

بعد الجكاره من بين شفايفه وهو يحجي ...كلت هاي لوحة مو انثى

بلعت ريكي بتوتر وعقدت حواجبي استفسر اكثر منه

جر نفس ورجع يكمل ياخذ اغراضه المهمه يخلي بالجنطة  .. اي جنتي نايمة مثل الحوريه رجل عاكفتها ورجل مادتها والثوب مرفوع للركبه جان احلى عرض مجاني احصل عليه

بللت شفايفي بحيره ... ولا مره اجيت الغرفتك ليش تدخل لغرفتي

جاوب ببراءة .. والله شسوي گلبي مينطيني ما اتطمن عليج شفتي شكد شريف مو مثلج حيه

جاوبته... اييي اني سولين الحيه

اردفت بحزن.. بس عفيه صلح السركي وعليك بروح موتاك بعد لا تدخل عليه هيج وتستغل نومي عيب عليك

كال.. هااا اوك ادللي

بعدها حجيت بضياع.. مو البارحه هيج مسوي حباب خلي اشوف اخواتي عليك ابو فاضل

جاوب ببرود..اجيبهن بس تعرفين شريد !

ضربت رجلي بالارض بغضب... لعد مو بستني واني نايمة

رد .. وانتي نايمة عبالك جثه اريد تبادل تفاعل احساس مو تشخرين واني مستلم السريع

تنهد بحيره وضياع حجيت بتوسل.. حباب والله احس اختي جيهان بيها شي

رد عليه.. اني هم هيج احس

تقربت منه ملهوفه ولزمت ايده بقلق .. الله عليك تعرف شي جيهان بيها شي افيان اخاف ابويه ضربها اعرفها ملسونه واموني يعمري عليه

كال بهدوء.. لا تخافين ما بيهم شي وحتى ابو سعدون طيرته من يمهن طبعت رقم السايبه بخاصرته لخاطر اخواتج

عقدت حواجبي بعدم فهم.. شنو قصدك

رد باستنكار .. يكولون ابو سعدون مسوي حادث داعمته سايبه ومنهزم صاحبها

جاوبته بحقد ... حلللل طبه مرض فوك مرض المعقج خطبني عبالك بكده اني يدور كتاكيت ابو زردوم المجعد

اردفت بفرحه... انت دعمته اووووي اول احترم مجرم

جرني من اديه حيييل كمزت من مكاني... ولج شنو مجرم كوه تريد تسويني مجرم

جاوبته ... اسفه اسفه حباب جيب اخواتي او طمني عنهن

رد وهو يرفع حاجب.. ما احب كل شويه عايد نفس الموضوع

خليت ورجعت بمكاني بالباب ماخذه وضعية الاستعداد للهروب

تنهدت بضياع.. زين تمام نتباوس بس هااا يعني مجرد تمثيل يعني لا احبك ولا تحبني هيج مال مصلحه

رفع عيونه بتفكير وبعدها جاوب.. يله عادي شورانه نجرب

وكفت بمكاني و رجليه ترجف وگلبي يدگ سريع .. انت تعال اني ما اجي

شمر الجكاره وكف اردان القميص وهو يرد بحماس .. اجي واني الممنون

تقرب مني وحط ايده على خصري جنت مثل الصنم بس هادئة باسني بهدوء تضامنًا للشرط بادلته بقرف وريحة الدخان عبت ريتي

ابتعد عنه واني امسح شفايفي

ما باوعتله بس سمعت صوته وهو يكول مثل واحد مسكين ... لازم نعيدها جنت متوتر

باوعتله بغضب عارم وتخصرت ... شنوووووووو اخاف ما تقبل والله ولا عليه ماكو اعاده هي وحده وبس

كال ببراءة... جااا ما حسيت بيها جنت مرتبك

عطت بوجهه.. والله مالي شغل هذا الموجود والعباس يسطره الما يوفي بوعده

ضحك كال... اوفي بوعدي ادللي

لزمت ايده بعد ما هدئت من ثورتي وحجيت بتوسل .. جيبهم هسه حباااااب

لبس جاكيته واخذ موبايله وسويج السياره كال... لا ان شاء الله باجر

ضربت رجلي على الارض بعصبيه... لا شنووو اريد اليوم منو ما يكول تنخطف تموت كل شي يصير حياتك مو امان لازم تجيبهم وبعدين وين متريد تروح روح

احتظن وجهي ورد عليه ... باجر اجيبهم لا تلحين

رجعت لزمته بعنااااد .... لا هسسسه

مشه متجاهلني واني اصيح فتح الباب قبل لا يطلع كال ... كتلج باجر اصلا باجر ما عندي شغل واروح اجيبهم الصبح قبل لا تكعدين من النوم تلكيهن بوجهج

ركضت عليه ولزمته ... الرجال لازم يكون كد كلمته الزم شاربك حتى اصدك لان اني ما عندي ثقه بالزلم

كال بتنهيده... بس گليلي اليوم موعد هرموناتج لان احسج مو طبيعيه

صكيت على اسناني... الزم شاربك وعوف الهرمونات كول والله هذا شاربي ازينه اذا باجر ما اجيب اخواتج

كال.. هو اني اليوم رايح للحلاق حتى شاربي راح ازينه

حسيت بغصه بداخلي حجيت بتوسل.. اني مو بستك مو بستك والله الخاطر اخواتي والله راح اموت عليهن شبيك ليش تضحك عليه لا تسوي هيج والله مشتاقه الهن

تقرب مني ومسح وجهي تنهد كال ... باجر كتلج الصبح قبل لا تكعدين هن يمج

رفعت اصبعي بطفوله ... وعد

رد ببتسامة ... وعد

خله وراح واني متوتره واحسب دقيقه دقيقه لباجر عود صدك ابتسمت بحالميه واني افكر شلون احضنهن شلون ابجي وياهن شلون اخليهن على صدري يمه شلون احبهن اموت عليهن يارب يجي باجر بسرعه

عمري امووووني شلون مشتاقه لوجهه الحلو فديته وليدي عمري ما اعرف شلون احظنه وابوسه

..................

رنا

بعد ما خلصت الحفله ومر ايام عليها جدو كهلان عزمنه كال راح اخذ سياره للامام الكاظم عليه السلام لان هو ناذر من يخطب واحد من ولده ياخذ سيارة على حسابه للامام الكلظم عليه السلام

خلينه ورحنه اني وامي دخلنه لكينه جاسم محظر روحه اني جنت لابسه بنطرون وقميص طويل وفوگاه عبايه

وحنان ما قبلت تروح صاعد الضغط كل عاده وام حسن حظرت نفسها

كوثر تقلد خطيبة كريم لابسه بنطرون من دون عباء او صايه ولابسه قميص طويل

واجت خطيبة كريم هي وامها لابسات بنطرونات وقمصان طوال وايو لابسه عدسات تفاجئت جا هي غير زياره العدسات شنو موقعهن من الاعراب

كريم جان مموجود بالدوام همزين جان ايو ظلت تفيك علينه عود عروس عشتو

حنان من شافتهن انكرصت كالت ... اروح احس ما كاعده بالبيت جني بومة

بدلت وراحت رحنه كلنه انوب اجت ام حنان واخواتها راحن ويانه جاسم كال ... لمه مال نسوان ما اروح وياجن

كتله .. بعد احسن

غمزلي .. لو بس اني وياج جان رحت اوووف

هزيت ايدي بقرف وعفته مصدك روحه الاشگر يحبني

اخذنه السايق مالتهم كوثر كاعده يم ايو وايو خلصتها الطريق كله تخابر بكريم وتضحك ما انطت مجال انوب صوتها ما ينسمع ناااااصي وهاي سميره تشيل روحها وتركعها بالكاع مصدكه روحها

وصلنه للكاظميه ايـــــــــو وامها كالن احنه ما ندخل نزور علينه الشهريه انتم زورا واحنه حنروح للمول مالت الامام نشتري ملابس ونجي وكوثر لطشت وياهن

واحنه دخلنه زرنه وصلينه وحنان بنص الامام وتكص بيهن .. كح.. برابيج جذابات ما عليهن الشهريه بس يردن يديحن ولا حبيتهن ولا رتاحيت الهن انوب يباوعلي بنص عين يغارن مني

صفنت هاي من كل عقلها يغارن منها هنه شايفاتها كدامهن حتى انوب يغارن منها مصدكة روحها العوبه

طلعنه من الامام وره اذان المغرب وهن من العصر لحد وره الاذان صلينه وكملنا وهن ماكو اتصلنا ردنا محد تفتح خط

وسميره تشيل روحها وتركعها بالكاع .. ما شبعن خواره جاييبن نزور لو يرحن يخوره امهات الموبايلات

كطعت روحها تكطع اجن بعد ما تصلنه بيهن و وصفنه الهن المكان كالت ام ايو... اعتذر منكم بس هاي ايـــــــــو ذوقها صعب عذبتني مخلت مكان ما فترته تريد ثوب نوم احمر على مزاجها

حنينه ردت عليه بقهر ... وينه وين ثوب النوم جايين نزور لو نتشلتح للزلم امشن صدك جذب هناك اسواك واشترن مناك

كرصتها ام حسن وهي تسكت بيها

كالت ايـــــــــو بعصبيه ... والله بكيفنا منين منريد نشتري نشتري انتي شدخلج

انوب علگت هناك حنان وايو تجادلن وام ايو صارت عاقله وسكتت بنتها وام حسن طاحتلج كرص الحنان بس حتى تسكت

دخلنه مطعم وايو ما عجبها وام ايو هماتين كالت... لا اوووع مناكل بهاي المطاعم الوسخه هناك نروح وياخذنه ابو ايـــــــــو حتى لو نروح لمطعم بتهوفن

عفناها تسربت الوحدها وظلينه ناكل براحتنا وهن ابد ما اكلن ولا حطن ايدهن بالاكل يله مو مهمات المهم احنه نستمتع

رجعنه اشتريت گرگوشه ولوزينه و وزنت وقست طولي ورجعنه الحمدلله شكد بسيطه اني ما فخفخ بس اذا تزوجت جويسم شلون اعيش ويه حنينه وايو خرب ما ينجرعن هاي تفيك وذيج مسمومه

ركبنه بالسياره واني غطيت راسي بالعبايه دا اريد انام بين ما نوصل سمعت كوثر تسولف ويه ايـــــــــو دكولها... اي احبه بس مستحيل اعترف اله واعرف گلبه مو ملكي

ردت ايو بخباثه.. صارت قديمة مال كلبه مو ملكج خلي ملكج وغصبا عن الكل وروحي اعترفي مثل ما فهمتج وتدلعي مثل مكتلج وشوفي اذا مصار محبس بيدج

جرت نفس كوثر وجاوبته.. تمام اروح ليش لا بس تعرفين هو يحب ابرب الناس الي

ردت بعدم اهتمام ايـــــــــو وجاوبته... اوووع انتي شكد بطرانه الواحد حاليا ميفكر غير بنفسه يمعوده صدك تحجين يا صديقتج يا اقاربج يا بطيخ المهم نفسج تمام

جاوبت كوثر بحيره ... تمام

استغربت وعقدت حواجبي.. شنو هاي منو هذا لتحبه وگلبه مو ملكها صدك تحجي صار عندي فضول يريي

.....................

سولين

للصبح كاعده ما نايمة حتى بسرعه اهجم على غرفته اول ما يصبح الصبح واكوله هااا وينهن اخواتي يله روح جيب اخواتي

بس ما اعرف شلون غفيت غفوه صغيره وبيومها مطرت مطر بحيث احس الغرفه غركت بس اني نايمة على الجربايه ما الي شغل بالمي انوب من السكف من يم الباب ظل المي ينزل بغزاره عزا السكف حيوكع ونبي تحلفت اله تحلف باجر لازم اكعد ولعب بي لعب احرك الجو لعد ليش مخليني كاعده ببيت خايس ومعفن خلي يرجعني بذاك البيت

طلعت من الغرفه واني افرك بعيوني واعصابي متكهربة طابگ عندي الحار والبارد واذا احجي يمكن شهر ما اسكت من كد ما انقرفت من الوضع

طلعت الشمس بعد ما طكتها البارحه مطره مو طبيعيه كعدت لكيت الحوش غركان...

تعصبت حييل كلت اليوم هذا البربري المجنون افلش البيت علئ راسه ليش البيت يغرك وهو ما اله شغل..ليش مخلينه ببيت بس تمطر نلگه روحنه فايضين...

رحت بسرعه دكيت الباب حيييل فلشته تفلش....اطللللع اطلع يا زوجي العزيز المعدل تعال شوف بيتك المعفن غركان  ولا اصفي المي ما الي شغل اني ما اشتغل عندك اني

لو تموتني ما اصفي لو تشنقني واذا جبرتني تعرف شسوي ؟؟..ما سمعت منه رد

رديت علئ نفسي...كلت شسوي...

انتحر احرك روحي وهناك بالمستشفى اكلهم هو حركني واحلف جذب لان هو المنتحر بالنار يعني اني بالنار بالنار حتئ لو حلفت جذب بس المهم اورطك وتروح اعدام

رفعت ايدي لسماء...امنيتي الما تحققت

ما شفت منه اي استجابه دفرت الباب برجلي قوووي... اكعددد اكعد شوف بحيرة الرزازه الصارت بقصرك المشيد

استغربت شعجب ما كعد يمكن طالع فتحت الباب لكيتها فارغه مموجود لعد مو كال باجر ما عندي شغل واجيب اخواتج من الصبح 

ههه شلون اصدك بواحد مثل هذا غدار وجذاب

بعدها فكرت... يمكن راح يجيب اخواتي واتاخر لان الشوارع فاضيه ومطر ايي صح يمكن هيج يله لعد خليني انظف البيت لا يجن

تنهدت واخذت الماسحه اكرف بالمي مالت المطر وامشيه علئ المجره تعبت نهد حيلي ..

جنت لابسه جاكيت مالته واصلي للركبه ومسرفنه ارادنه طابكتهن خمس طبكات وبجامة مالتي حمره قديفه وثوب اسود رافعته وشادته على بطني وارجف من البرد

رحت لبست حذائه حتئ تتكطع من المي انتقاما منه حتئ يعرف شلون يعيشني بهيج بيت جايف...

ضليت اكمل بالبيت واكرف بالمي والناس بالمنطقه كلها غركانه وطالعه النسوان تشمر بالمي بالشارع والشارع اصلا فايض ههههههههههه

والصراصير كل وحده فاتحه بابها وتكرف بالمي وتطلع للشارع انوب لا حجاب ولا عبايه طالع صدرهن

وهذا سوادي الگو... د... واكف ويباوع على مياده ويشرب جكاير وهي تباوعله وتكرف بالمي بسطل وتضحك

سديت الباب بقرف منهن اصلا ما طلعته المي ليبرا لا بالمجره

نشفته شويه وبعدها كعدت على القنفه الخشب الموجوده بالحوش نفخت بضجر البجامه مرفوعه لركبي وحذائة بطولي والجاكيت شكبره وشعري مضفور بس شنو طالع شعر منا ومنا مال وحده كاعده من النوم ومتعاركه على شعفتها البزازين...مال جكاره هسه

اي شسوي الخير يخير والشر يغير حقي اتغير واطلع جني طالعه من حاوية الزباله على الحياة المقرفه العايشه بيها...

حسيت الباب انفتح واني حضرت ماسحتي واخذت وضعية  الاستعداد اليوم لو العب لو اخرب الملعب اذا جايب اخواتي ما احجي واذا لا اركعه بالماسحه

واكيد يطلگني بعد ما يشوفني وكحه وصلفه وحيه ومحد يكدر يعيش ويايه يطلگ وهو الممنون

اول ما دخل باءت محاولاتي بالفشل والصدمة الجمت حواسي...

يااا حقيير وصلت بي للخيانه يخوووني

دخل بطولة الفارع لابس جاكيت اسود وبنطرون اسود وتشيريت اسود مصخم وملطم

دخل هو وبنيه جانت ناعمة وضعيفه بس حلوووه تجنن لابسه بنطرون كابوي ثلجي ولابسه كوت طويل اسود وتشيرت اسودولابسه لفاف اسود وملامح الثقه مرسومة بإتقان على وجهها

عفاريت الجن والإنس كلها تجمعت براسي بس ما كدرت احجي ولا كلمه

جانت حلوه شعرها اسود وطويل وملامحها حلوه وبيييضه مثل الثلج ونظرة غرور بعيونها متت من الغيره بصراحه

اي اكون صريحة حسيت نفسي طالعه من الزباله وهي حتى انصدمت مني باوعتلي بقرف

تصخمت وتلطمت ويه بجامتي ويه حذائة ام البوز شطولها وسترته خرب اخزي فشلت فشله بس كله من وراه شكو يدخلها هيج غفل جان گلي

بسرعه نزعت الحذاء والجاكيت شمرته على القنفه وروحي تفور من القهر هي باوعت عليه وهو بادلها النظره كلها .. اعرفج سولين زوجتي

ابتسمت مجامله كالت ... هلاو

هو اشرلي عليها كال.. سالي صديقتي

فتحت عيوني على وسعهن بدهشه عزاااا العزاني سالي دهر صابني كون سالي خرب هذا عنده سالي وجاي عليه صخام الصخمني انوب شلابسه واني شلابسه

هي مدت ايدها ببتسامة كالت ... اتشرفنا

اني من الارتباك والثول جاوبتها ... اني الاشرف

هي انصدمت وعقدت حواجبها باوعتله وهو ضحك كلها ... اعذريها ممتخرجة

ضحكت بغرور وهي تعدل خصلات شعرها

واني تخبلت كتله بحده ... وين انتم خليتوني ادرس حتى اتخرج هسه نجحت من السادس ومصايبكم افترت على راسي

هو تقرب مني وسحبني من ايدي ومشه بيه للمطبخ كال بحده وعصبيه ... كم مره كتلج لسانج لا تطولينه

تخصرت وجاوبته... ما شاء الله جايب ست الحسن والدلال وجايني شنو المدام ما عندها اهل محد يسال عنها لو انت وين الدايحه ملفيها

لزمني من فكي حيل حسيت تكسر بيده كال... انلصمي وتادبي لا افرك حلكج فرك سالي مو مثل ما تتوقعين سالي شريكة ويايه بالشغل

ضحكت باستهزاء بعد ما بعدت ايده من حلكي... اي هسه تطلع المسعده ام قتاده

باوعلي بنظره مستهزئة تعبر عن هوايه امور ما كدرت افسرها بعدها كال بغرور.. حاولي تسدين حلكج شويه ما اريد تتجاوزين على سالي لان سالي محترمة

ضحكت .. اي تنكط احترام عود لان حلوه تبرر الها لو نفس الصواصير جان طلعتها من الطهاره المهم مالي شغل بيكم ناركم تاكل حطبكم

باوعلي ثواني وخله وراح كعد يمها وهي تحجي وياه بس ما افهم تحجي عن دراستها وهي سنه اخيره جامعه بعدها كلتله انطيني البشاره

كلها بنشوة وانتصار .. انفصل مووو ؟

ردت بضحكة حلوه.. انفصل اكيد وكتابه صعد للوزاره والعميد كال الاسئلة مثل العرض ودكتور ساهر طعن بعرضه

رخه ظهره على القنفه وهو يبتسم بخبث ويدخن بجكارته الملتهبه بين اصابعه ... خسر شغله الي اجه بالتزوير اول الغيث قطره يا سالي

باوعت بعيونه وهي تبتسم وتقربت عليه... تعرف شنو خلصت الطلاب من شره جان يساوم الطالبات على شرفهن مقابل ما يرسب ويعيدون السنه وبعدها من دزيت عليه الطالب امير مهدي وانطاه الامان طلب ينجحه اذا انطه على كل درس عشر ورقات

نفخ الدخان وهو يكول بحماس.. كملي

ابتسمت .. كتله وافق ومن وافق هو ساهر مو لهذه الدرجة غبي ما قبل اتصال ولا قبل يكون التسليم بالجامعه وحتى الاسئلة كذلك مقبل ينطيهن واتفقوا يكون التسليم ببن رضا علوان

خليت اختي تكمل المهمه صورت امير ودكتور ساهر من انطاه الاسئلة وسلمة المبلغ وامير سجلة صوت وكلها انطيتها للمقرر مال القسم وفصلوا امير ودكتور ساهر

كلها بعقدة حاجب.. اخاف امير يروح مستقبله

ضحكت .. شبيك ترا هي جامعه اهليه وامير مثلي هم مجند جندة ابو ايه انطه بس مباشرة ٢٥٠ الف ومن انفصل استلم اضعافهن بعد ما نفصل دكتور ساهر وتقدم للنزاهه

ضحك بانتصار... سالي انتي كفو

ضحكت وكملت .. تربيتك ابو ابراهيم واختي كذلك تريد تكون مجنده

جاوبها.. خلي تتواصل ويه ابو ايه

ردت عليه...بس هسه دكول شنو مجنده

جر نفس عميق وزفره كلها ....كليلها بالحقيقه جاسوسه

بعدها كالت.. امممم بصراحه زوجتك احسها مو يمك يعني مدري شنو

هي ما كالت واني طلعت ... شبيه عيني مو يمه يعني اله البس بنطرون لو البس بدي واحصر روحي يله ترتاحن الحمد لله شريفه وانكط ورد

هو من شافني حجيت هيج بسرعه وكف ركض عليه وهو يحاصرني بجسمه حضني ضعت بحجمة ضحك بارتباك وهو يكول.. لا انتظري سالي تقصد ان انتي اصغر مني بهواي مو هيج سالي ( شفته غمز الها )

ابتسمت سالي مجامله كالت... اي اي هيج دا اقصد

رفعت عيوني اله .. ترا شفتك غمزت الها

سحبني ومشه بيه دخلني للغرفه كال.. اكعدي هنا وسدي الباب بدبة المي اروا

جاوبته بغضب ... لا والله وانت كاعد يم المسعده اي لا تهمك سولين ولا عشره من سولين بعد وين شفت ست الحسن والدلال المهم عوفنا منها مو فد نعال

اخواتي وين انت مو كلت اجيب اخواتج هاي انت تظل تجذب عليه تجيب نعال وفلان وعلان واخواتي متجيبهم لعد شكد تكرهني وحاقد عليه لك اني شرفك عرضك عيب عليك وحرام هيج تتعامل ويايه وما تحترمني ومسفهني

لزم راسه بوجع كال ... اوووف شكد تلغين

تخصرت ... اي صرت الغي لو جاسوسه اشتغل عندك جا فتحت حلكك عليه بس وين اني سولين ظال بس تقشمر عليه واذا هيج سالي كاطعه كلبك ما تزوجتها ليش تزوجتني واحلف عليك هسه تطلعون متزوجين

سد حلكي بيده حيييل كطع انفاسي وكفخني على راسي حييل كال .... اكص لسانج بعد اذا نطقتي بحرف بالقران مو بس ابوسج حتى اغتصبج

فتحت عيوني مصدومة ورخت رجليه من الخوف ابتعد عني وهو يمشي خطوات سديت الباب بسرعه بعد ما طلع وحطيت الدبه واباوعله من الشباك ظلوا دقايق وبعدها طلعوا

واني ظليت افور نار شعلت بصدري حسيت اريد ابجي ليش هيج احس انهانيت اليوم والله بس يجي اله اتعارك وياه شلون يراعي شعور جالي الغبره واني كل شويه وكفخني انوب تكول ما لوگ اله مو عساس هو احلى مني

لو اشرب دية المي ارو كلها مراح تطفى النار الي بداخلي كعدت على الركبي وغلبني الحنين على نفسي بجيت بصوت مسموع شكد حققير براعي شعورها واني لاااا شكد نذل قشمرني ما جاب اخواتي الله ينتقم منك ويوكعك بشر اعمالك يا خاين يغ نذل

.........................

صفاء

رجعت للبيت الي بيه اخويه بخفيه وتسلل دخلت ولكيت مرة اخويه ماده الطنگورة شبرين يمكن اذا اكلها شلونج تشنقني ما حجيت ولا سلمت ولا كلت شي

من شافتني سوت حركتها المعتاده قدمت شالها على عيونها وعلى حلكها طلع بس خشمها وعيونها دخلت جوه لغرفتي اخذت فلوسي وطلعت

بس هي وجهها ما يكصه السيف ردت اسالها بس خفت مو مال اسال ما رايد روحي جانت تهز رجلها بتوتر وغضب

طلعت برا فتريت بالسياره اتصلت على الاشتر ماكو محصلته رحت يم النهر كعدت نزعت نعالي حطيته جواي وكعدت وظليت اشمر حصو بالنهر واباوع على انسياب المي شلون يكون دائره متكونه من عدة دوائر

واني على هالحال افكر بعد النا مشوار طويل سمعت ساهر انفصل بعد ما جان دكتور معروف باحد الجامعات كالوا بايع الاسئلة واني اعرف اخوي وره هالسالفه فرحت لان السواه بينه ابد مو قليل وهذا قليل بحقه الي ديسوي الاشتر

شفت موبايلي يتصل شفته مصطفى مجاوبته ما الي خلكة واحد ارعن واحقر من ساهر النذل

ظل يتصل يتصل فتحت خط جاوبته... هااا ابو الصوف

بسرعه انكطع الخط ما اعرف ليش عفته وكفت جاي البس انعالي وما اشوف اله نزلوا عليه وهم مسلحين ارتعبت من شفتهم وبلعت ريكي كتله ... شكووو

اشرلي وهو متلثم ... امشي ويانه من دون اي صوت لا نزرفك تزرف

جاوبته بقلق وخوف ... اني ما عندي شي ولا مسوي شي على شنو امشي وياكم شنو عداوتي وياكم حتى هيج تسوون بيه اني ما عندي عداوه ويه اي شخص

رد عليه بهدوء... امشي لا افرغ المسدس براسك

سحبني من ايدي حتى نعالي ما لحكت البسه دفعته بقوووه وركضت ركضت بسرعه بسرررررعه بحيث احس روحي تركض مو اني ما حسيت الا بالطلق والرمي صار عليه من كل مكان واشتد عليه الظلام

...................

سولين

اني صار فتره متخبله كال اجيب اخواتج ومجابهن واني روح بالسما وروح بالارض وبس اتعارك وياه ويجاوبني بكل برود اي عود اجيبهن لا تلحين

واني اموت من القهر من يحجي هيج شنو زعطوطه اني ويضحك عليه عليه

دخل بهمه وهو متعصب دخل بسرعه للغرفه وطلع سلاحه وهو يترسه طلق

لزمته بعصبيه ... انت وين تروح وين عايفني الوحدي وبعدين وين اخواتي

دفعني بغضب وهو يكول... وخري من وجهي لا ابتلي بيج اني وين وانتي وين

رجعت لزمته واني مجلبه بسترته .. والله متروح والله متروح رجلي على رجلك ترا اني دا اخاف هنا ومصطفى مدا يجي ابد اصلا هو اليوم ماكو

دفعني بقسوه حييل وكعت على الصبه وهو خله وطلع صرخت من الوجع واني التلوه احس ظهري انكسر وكفت واني اشهك من البجي ولازمة ظهري

الجلب الحقير حيوان شلون دفعني كسر ظهري الله يكسر ظهرك وينتقم منك شلون دفعني من اجت سالي مدري جالي وهو متخبل اي بعد رجعت علاقتهم يمكن اخذني حتى يكسر عين سالي شكد كرهته الله ينتقم منه ومن ابوي دمر مستقبلي هو وذاك النذل

دخلت للغرفه لا تلفزيون لا فلك واحد يلتهي بيه احس حتصير بيه حاله نفسيه كد ما بس كاعده بالبيت لا احد يجي لا اسولف متت حاله نفسيه اذا صارت بيه قليل بحقي

جافه عيوني النوم صارت الساعه بتلاثه باليل واني منايمة خفت حيل الجو اظلم وبس صوت الجلاب تنبح اخاف من صوتهن طلعت برا دا اشوفه اجه لو بعده حيل تاخر وطلع منهار ومسدسه بيده هسه خلي يموت بس غير اعرف مصيري شنو

طلعت امشي بحذر وخوف وما اشوف وجهه مرعب وشعر طويل ولهثه وركضه وصرخه صرخت بصوت عالي ورعب .... لااااااالااااالا يمممممه لااااااالاا

نهاية البارت ... يتبع

كونوا انتم كونوا بخير ... احبكم 💔

نور سمو العراق

لا تنسوا التصويت والمشاركة جبيداتي الحيايه😄🐍