رواية #وكر الأشتر الفصل الخمسون 50 - بقلم الكاتبه سمو العراق

بارت الخمسون
رواية وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

‏أعتقد أن المهارة الوحيدة التي يحتاجها المرء للعيش هي التأقلم، التأقلم مع كل شيء و أي شيء.🖤

بارت طوووووويل🌚🌚

...........................

جيهان

اصعب شي من الانسان يتقدم بكذبته وتالي بعدين تنكشف هاي الكذبه شكد موقف محرج ومأذي بنفس الوقت

باوعلي و وكف تقرب مني وهو يكول .. منو هاي الحساسه مدااام

ظليت مصدومة وما اعرف حتى انطق بحرف واحد شتت نظري واحس گلبي حيطفر من مكانه تمنيت يصير زلزال يصير اعصار ولا اظل بهذا الموقف

هزيت راسي بنفي ورديت عليه .. مم ما اعرفها

رفع حاجب بغضب وهو يكول .. هااا متعرفين مووو لج انتي تضحكين عليه تضحكين عليه مسويتلج حساب ومسويتني مضحكة عندج صدك انتي وحده ما تستحين

دمعت عيني بخجل ... لا والله مو اني هي افيان

عاط بوجهي بغضب وهو يكول .. وانتي شنوو زعطوطه تضحك عليج افيان ترا انتي داخله بالعشرين مو طفله تعرفين شنو مو طفله

يعني عيب عليج تضحك عليج افياااان مو صح لو انتي مكيفه على الوضع

جنت بس واكفه وما اعرف شلون اتصرف بس احس كلبي حيطلع من مكانه من الخوف والفشله والرعب نزلت راسي ولا رفعته

حاضرني بين الحايط وصدره كال بخبث وحقد .. اريد اعرف شغله وحده انتي من سويتي حساب شنووو جانت غايتج اريد اعرف شنو غايتج

رفعت عيوني ببراءه وخوف وهزيت راسي بعدم معرفه رد عليه بغضب .. هاااا متعرفييين مووو متعرفين امشي اطلعي براااا

رد عليه .. ولج اني الغبي الي كاعد اعترف للالماسه الحساسه وتالي تطلع الالماسه انتي ولج شنو اني زعطوط جاهل وتضحكين عليه ولا عبالج ترا جنت عارفج بس مسايرج اريد اشوف وين توصلين

مجنت احجي بس ارجف واريد ابجي حرف واحد ما نطقت بيه احس بلعت الاحرف وبلعت الكلام اشر على الغرفه وهو يكول ... اطلعيييي برا بعد ما اريد اشوووف خلقتج

رجع كعد بتعب على الجربايه ولازم عمليته باوع على موبايله وقفله همست بصعوبه .. ببس

باوعلي ببرود وهو ياشر للباب كال ... اطلعيي برا

طلعت من بيتهم وگلبي احسه يخفق بقوه ارجف ارجف ومتوتره يربي شلون شلووون ما جنت اعتقد هيج راح يكشفني بكل سهوله

طلعت مطروده من بيتهم ومطروده منه عزااا يا مصيبتي دا احس نفسي مسويه جريمة واستاهل الطرده بصراحه

شفت جاستن بالباب حجيت ويه بهدوء .. جاسم فدوه رجعني لبيتنا

باوعلي مستغرب كال .. شكو منو مضوجج وبعدين شعندج ظلي هنا ابوج اليوم ما يرجع

هزيت راسي بنفي ... لا فدوه خلي اروح فافي هناك لوحدها وهماتين اخاف على امين

رد عليه بقلة حيلة .. يله اصعدي

صعدت بالسياره واني الوم على نفسي كله من وره افيان ام المصايب اني شعرفني بهاي السوالف كله منها هي السبب

اتذكرت كلمته من اكتشفني والموبايل بيده وباوعلي ببرود وبعدها شد على اعصابه وهو يكول ... اطلعي برااا

يمه دا احس اريد ابجي احس كرامتي انهانت خرب بيج افيان هو اني غبيه واخذ كلامها ام الخلطات الاكسباير

وصلت للبيت نزلت دخلت بسرعه واني الطم على خدي باوعتلي افيان وهي تهلس اديها بالشيره كالت ... هااا البومة شبيج تلطمين

جاوبتها بدموع وحيرة .. عمو كريم عرفنيي واكتشفني

فتحت عيونها مصدومة وبعدها طكتها بضحكة .... ههههههههههههههههههه العباس عليج عرفج خرب عرف انتي حساسه ودمعتج الماسه

كعدت وروحي ذايبه .. دنجبي لا تضحكين غير من عرف طردني

رجعت تحف رجلها بالشيره وكالت بعدم اهتمام.. زين شلون عرفج انتي بس لا اعترفتيله

باوعتله بنظرة حاقده.. شبيه لهلدرجة ثوله بس ما اعرف اني اول ما حجيت هو صفن وبعدها عبالك واحد دازه عليه بسرعه اكتشف الموضوع لج خلاني ارجف انوب طردني

ضحكت وهي دكول بحزن مصطنع .. اوووي تكسرين الخاطر ههه المشكلة مو هنا المشكلة هو معترفلج بكل شي ههههه خرب

تنهدت بحيره وحزن .. شلون بعد اخلي عيني بعينة والله مستحيه وخجلانه مجان متوقعها مني

ردت بلا مبالاة.. دخلي يولي شنسويله طبه طوب هذا الموجود

سحبت نفس وزفرته .. المشكلة مريض انوب قهرته والله خطيه عمو كريم كله بسببج

ردت عليه بغضب .. انعل ابوج لابو حتى عمج شدخلني اني

اردفت بعصبية .. انتي عاجبج اكريم لكيتلج خطه هسه انوب ما عجبج الوضع وظليتي تلومين عليه منو يوميه شاركة الحلك من الاذان للاذان جدتي لو حبوبتي

بللت شفايفي بحيره وعفتها يا ربي شسوي والله عيب بعد ابد ما احط عيني بعينه هو حتى ما عرفت ابرر اله ولا عرفت اقدم اي عذر اني شلون ورطت روحي انوب طردني همزين طردني

تقريبا مرة ساعة واني الوب مثل المرة المعسره بولادتها ممرتاحة ابد

ما اشوف اله انفتح الباب بكل قوه وبكل وقاحة دخل وهو عيونه براسه من عصبيته وكفت بخوف وقلق والرجفه اعتلت جسمي كله همست بخوف .. عموو

مشه خطوات تعبانه وهو لازم عمليته وشاد على شفايفه بغضب جنت واكفه واطگ بريگي تقرب مني حيييل حسيت فگي انخلع بيده لزمت ايده بخوف والدمعه تلالي بعيني همست .. عمووو

عاط بيه بغضب عارم وهو يفح بعصبيه ومن بين اسنانه ... اذااا گلتي عمووو لسانج اكصه سااامعه حظج اطيحة

باوعتله بنظرات بريئة ورجفت شفايفي جان يباوعلي بكل غضب من شاف حالتي ابتعد بسرعه وهو يقبض على ايده بغضب

فركت حنجي بوجع و وكفت بمكاني حجيت بهمس.. اسسسفه

رد من بين اسنانه ورجع العصبيته ... صوتج ما اسمعه

نزلت راسي وسكتت وهو دار وجهه وحط ايده على خصره وهو يتافئف

افيان جانت خاتله بالمطبخ وتباوع وتضحك شلون فورت دمي عضيت اصبعي اتوعد الها

رجعت اباوع الطوله واني اكرط باضافري من الخجل والخوف وگلبي يرجف

مشه خطوات تعبانه وايده على عمليته سوده عليه جرحة بعده ما طاب واني جرحته كعد على الدرج وسحب جكاره وهو يدخن وينفخ بغضب بس ميحجي

واني واكفه اراقبه بخوف وقلق واراقب كل تحركاته صاح عليه بسخريه .. جيبيلي مييي يالحساسه

عضيت شفايفي بخجل ورحت بسرعه دخلت للمطبخ وافيان كاعده على گونية الطحين وفاطسه من الضحك

كالت وهي تشهك من الضحك .. يمه خربت ضحك عمو كريم شطوله واني جنج عصفور مهلس بيده لازمج بيده ويعصر بيج ترحين يمنه ويسره

غميتها واخذت المي ورحت جان منزل راسه ويفرك بجبينه وعلامات القهر مرسومة بإتقان على ملامحه

مديت الكلاص اله وايدي ترجف رجف مو طبيعي باوعلي باستهزاء ... شبيج ترجفين اثبتي جنج استكاين الرمادي بأيام الحصار

نزلت عيوني بارتباك وهو اخذ المي مني ايده طخت ايدي كمزت من مكاني وهو سيطر على الكلاص شربه دفعه وحده ويباوعلي بحقد يتمنى يكتلني

ظليت واكفه كدامة مثل طالب راسب بكلهن وهو يباوعلي بنظرات غريبه عجيبه

همست بارتباك .. عموو

جر نفس وهو يهز راسه بوعيد .. عمووو !!

وكف لزمني من كتفي حييل قربني اله خفت منه رفعت عيوني بخوف .. عمو وخر شنوو ونبي لا اصيح الم عليك الدنيا

رد بخبث .. صيحي

رفعت عيوني برجاء وتوسل .. والله اسفه واعتذر والله مجان قصدي

ما حسيت بيه الا باسني بخدي فتحت عيوني مصدومة ومرعوبه دفعته حييل بحيث ايدي احسها اخترقت جرحه واني اعيط بيه ... شكد متستحي عيب عليييك يله اطلع برااا

غمض عيونه وهو يستند على المحجر والالم واضح عليه جان لابس قميص بيجي حط ايده على بطنه والدم لوث قميصه

صرخت بخوف وركضت عليه بسرعه لزمته من خصره وسندته صحت بخوف .. عمو شبيك عمليتك دتنزف عزااا لج افيان تعالي

كعد على الدرج وحجه بوجع كال .. عوفيني مبيه شي

اجت افيان تركض كالت .. يا عزا هذا القميص ناكع بالدم لج جيجي خلي اخابر على جاسم يجي ياخذه للمستشفى

هو رد عليها بغضب كلها .. لاااا لتخايرين هسه اني اروح لوحدي ما اريد واحد يعرف اني هنا

جاوبته بخوف وقلق .. بس شلون هيج تروح وانت عمليتك تنزف فدوه عمو لا يصير بيك شي

حجه من بين اسنانه وهو يكول .. عمووو لا تكوليها بطلي عمو مو كرهتيني بروحي

هزيت راسي بقبول .. اي بعد ما اكول بس انت لا تصير عصبي مو زين على صحتك فدوه

باوعلي بنظره سخريه نزلت راسي نظراته مدري شبيهن يوجعن احسه يستهزء بيه

يخليني اكسر نظرتي بخجل وحزن بس شويه وتتغير نظرته ويحل محلها الحب والمشاعر الحلوه والمراوغه يخليني اوكع اسيره لحبه يارب ما ادري شبيه مستحيه حييل

يعني هو يعرفني فقيره وفطيره مو مال هاي السوالف واني احس نفسي غلطت و وكعت من عينه شلون احساس مخزي خرب بس لا تغيرت نظرته عليه

رجع وكف مره ثانيه وهو يخابر صديق اله يريده ياخذه لان هو مدري شلون اجه واصلا جرحة لسه مطاب بس مبين محترك كلبه من سوالفي سوالف غواده لوبي

خله وراح واني لزمت خدي واتحسس بوسته اليه صح ضجت وعاركته من باسني بس انفجرت بداخلي مشاعر مكبوته وضجت ما احب هيج يستغلني ما احب اذا بالحلال مسموح بالحرام لا ابد مو مسموح شنو يبوسني خلي يولي

اجت فافي تركض. كالت .. خايبه شو هذا ما صدك طاحلج بوس شنو السالفه ترا ما رضيت اني بهاي السالفه انوب يريد يشبع بوس قبل الزواج وعلي اذا عادها مره ثانيه اله اشهره كدام حنان وجدي اسوي فضيحته على كل لسان

عفتها ورحت دخلت جوه يربي شلون هيج صار بس دا احس بيه جذاب دا احسه يعرف من زمان بس ليش هيج تخبل عليه وليش واجهني بجذبتي شلون هيج سوه بيه شكد استحيت يربي متت بدمي خرب

...........................

سولين

احس روحي متت وانتقلت للجحيم وجهنم محاوطتني من كل جانب، منا ألم روحي ومنا الم رجلي الي ما يهدأ

انوب كملها عليه سني يوجعني ووجعه ماينحمل ، خليت ايدي علئ خدي ومددت رجلي وابجي، تعبت كمت ثنيتها وهم توجع شسوي ياربي

وكل شويه اتخيل شي مرة اتخيله وهو يهجم عليه ومرة اتخيل سوادي مشرح احس روحي جاي تنازعني حتئ تطلع وتترك هالجسد خالي من دون روح من دون حياة

بقيت بهالحال ومحاوطني حزني وغضبي ونقمتي،
علئ الاشتر كرهت بكد كرهي لالم سني بكد الم رجلي
ليش هيج سوئ بيه ليش مو يدري بيه مريضة موو يدري تعباانة مو يدري مامتقبلته

يدري كولشي بس خبيث متعمد هيج ياذيني،ويتلذذ. بعذابي

سمعت صوت الباب اندكت واجاني صوته الحنين
يكول خويه سولين
عرفته صفاء هالولد هذا هم ابتلئ بيه وهم مااجازي ابد علئ الي دايسوي ويايه

بس والله مابيه اكوم افتح الباب، لفيت شالي وخليت جزء منه علئ حلگي

كتله صفاء فوت الباب مفتوح، هو فات ويسوي احم احم ونظراته عالارض

دخل بيده علاليك وصينية خطية تحركت بمكاني حتئ مابيه اكوم اخذهم منه

هو خطية اجه وخلاهم مقابيلي،وظل يفتح بيهن كال اكلي سولين وجهج اصفر مابي قطرة دم ومبين مماكلة صار ايام

كاله واني متألمة من سني واضغط علئ اللثة بقووة
والله مااشتهي سني ديوجعني

كال سلامتج بس ميصير تبقين بلا اكل هيج تتأذين اكثر اكليلج شويه واني هسه اوديج لعيادة الاسنان

خليت ايدي علئ حلكي وارص علئ خدي
كتله صدك مااشتهي

رد وهو ينطيني خاشوكة كال جبري نفسج خويه روحج هم الها عليج حق موزين

اخذت منه الخاشوكة مترددة واكلت وطبعا الاكل طيب بس اني كوة اكل احس سني ينحفر بلثتي ويسببلي الالم

اكلت وبعدها داششيل الاكل هو مقبل وشاله وداه للمطبخ واني بقيت بالصالة اجه كال كومي اوديج ميصير هيج تبقين تتألمين

بقيت لازمة حلكي واعصر بخدودي كمت كوووة ورحت فرشت اسناني ورجعت لبست وشفته ينتظرني

مشيت باتجاهه و امشي كوة اسحل بروحي سحل مثل عجوز عمرها بالثمانين سنة هيج اني والله احس بشيخوخة مبكرة واني بعز سنواتي العشرين

اخذ النه صفاء تكسي لعيادة اسنان قريبة
امشي واعرج واحس الكل يباوعولي متعجبين

وكفت يم صفاء دياخذ باص حتئ نفوت علئ طبيب الاسنان واسمع الي كاعدين بصالة الانتظار وينتظرون دورهم يتهامسون

الي وصل لأسماعي منهم يكولون خطية بعدهه صغيرة وتعرج

تجاوبها الي يمها اي وحلوة هماتين الله يعلم شبيها

ردت يمكن من الولادة هواي اكو هيج

جاوبت الله اعلم

حيل بلحظتها انقهرت علئ روحي واستهضمت
اخخخ ياروحي شكد وجع شفتي وشكد بعد حتشوفين

قطع الوصل وكال روحي استراحي وكعدي الئ ان يوصل دورج تفوتين عالطبيب

كعدت موجوعة والنظرات محاوطتني ، اجت يمي مرة كعدت علئ الكرسي الي بصفي وشايلة طفل رفعت راسي اباوعله كل براءة الكون بي ابتسمت رغم كمية الوجع الي جاي احس بيها

جان شكله حلو وبريء ويجبر االواحد يبتسم اله
فاتح حلگه يضحك وعنده بس سن واحد جوه واكو مثل الدم طالع من حلگه مبين مجروح بلثته

وهماتين عيونه حمر ومورمة مبين هواي باچي

مدلي ايده واني بدوري مديت ايدي وداعبت خده
امه ضحكت كالت متزوجة انت

جاوبتها واي انزل راسي واهزه بأي،

كالت ماعندج جهال

هم هزيت راسي بلا

ردت الله يرزقج بس شلعان گلب والله

كتلها الحمدلله علئ كل حال بس شبي حلكه

كالت الشعنون ولا يگعد اليوم الصبح ديلعب بالسيارة مالته واني لاهية بهالبيت واخوته، جلب سنه بالسيارة سمعته صرخ رحتله سحبتها حيل وجان اشلع سنه وياه بس فررر من الصريخ وهسه جبته لطبيب الاسنان يشوفه

اني لزمت خدي من جهة الي موجوع سني وتوجعت لاارادي خطية طفل شون كدر يتحمل الالم

كتلها اووي خطية

كالت اي كوومة دم طلع منه
سكتت اني وبس اداعب خده وهو يضحكلي شكد حبيته صفنت بوجهه واحس بتحساس الامومه ما اعرف ليش هيج حسيت وكان القدر والصدفه تبهه عن شي راح يصير

كالت بهمس بعد ما تلفتت شبيج تعرجين بس اذا سؤال يحرجج لتجاوبين بس والله لان حبيتج حبيت اسالج

كتلها لا عادي تعرضت لحادث وهيج صار برجلي

حييل انقهرت من سؤالها

هي كالت يااخطية ان شاءالله الله يشفيج متستاهلين مبين عليج طيبة وحبابة

هزيت راسي ومدنكة وخطية صفاء واكف يم الباب

بقينه نسولف اني والمرة وتعرفت عليها الئ ان اجه دوري افوت عالطبيب وهنا بدا الرعب الحقيقي.سالني كال .. انتي حامل

رديت عليه بخوف وقلق واني الزم بطني .. لا مو حامل اني لااا

رد عليه ببرود وهو يكول .. هي اجراءات لازم نسالها لكل مريض حتى نتاكد من حالته

سكتت وهو ظل يشتغل بسني واني عندي فوبيا من طبيب الاسنان ظاله بس ابجي ولازمة ايد الدكتور ما اخلي يشتغل وهو كل شويه وعايط بيه

انوب دخلوا ويايه صفاء يصبر بيه ويهدي بيه حتى اسكت لحد ما خلصت احس روحي طلعت

..........................  

فافي

دا اروح للسوك اشتري شغلات مال مكياج طورت الشغل ظليت اجيب مكياج ابيع بيه بالقسط يعني الحمره بالف ابيعها بالف ونص اخذ شي قليل على الحاجة بين ما اطور شغلي وبعدها بلكي اتسوك من الشورجة لان بصراحة السوك اجيبه مفرد مو جملة

اول ما وصلت للركن وشفت مصطفى واكف وجهه صايره خارطة الوطن العربي احمر واصفر واخضر وبنفسجي مدري شني ما شني

شكيت بيه بصراحة كاتلي بالملهى على مود رقاصه حل يستاهل شكد انصح بيه وهو اذن من طين واذن من عجين مو بشر ورطة

عفته ومشيت اني زعلانه منه لان سمعت عنده خلاف ويه نسيبي واني نسيبي لو اختي سويلينه تخالفه اتبره منها ومن ابوها الخلفها

صاح عليه بسرعه .. افيااان فافي اوكفي شبيج شنو ما تشوفين

جاوبته .. يااا شلون ما اشوف عبالي لوحة ألوان انت و وجهك الي صاير قوس قزح

تنهد وهو يكول بخيبة امل .. محتاج اشكي الج واسولف وياج ليش ما تفتحين خط وتحجين وياي شبيج انتي متشوفين شلون متغيير

تخصرت بقرف .. يااا واني هسه هيج فارغه ما عندي شغل وعمل اكعد ادك سوالف وياك وعلى شنو محتاجني يمه شبيك كل شي ما بيك ياكل بيك السبع شهر كامل وما تخلص وبعدين شدخلني بيك واني انسانه وقتي ثمين وعندي  هدف

تنهد وهو يكول .. شبيج انتي خبله ترا بالقران احجي صدك والله طالعه روحي انتي ليش كله تستهزئين هو اني هم صوجي اجي عليج

جريت نفس ورديت عليه .. دروح ان شاء الله من ارجع افتح عنك الحظر واشوف شبيك

باوع يمنى ويسرى وهو يكول .. اني بصراحة اخاف عليج ترحين لوحدج للسوك ترا الناس ما ترحم

تنهدت وجاوبته .. والله بصراحة انت بس كون تفكني وما تلزملي الركن اني بخير ومحد يتعرض الي

ضحك وخله وراح واني رحت كالعاده حلصت شغلاتي ورجعت ما الي شغل باحد وعصبيه والي يتعرض الي افضحه وافضح الخلفه لهذا السبب محد يندك بيه واصلا السوك قريب علينه

رجعت للبيت وراسلت مصطفى وهو جاوبني بسرعه كتبت .. خير شبيك ليش هيج وجهك مكلوبه خلقته منو كتلك

رد عليه ببصمة وبصوته حزن فضيع اول مره احس بيه كال .. هجم عليه اخوي الاشتر وهاني وضربني بنص بيتي واني بصراحة حيل اثر بيه الموقف واذاني وصار خمسة ايام ما اكدر شلون اتخطاة

عقدت حواجبي مستغربه الوضع ليش ضربه وهانه بنص بيته الا مسوي شي واصلا الاشتر حيل يحبه مو مال يهينه وياذي بهاي الطريقه واني شفت شلون وجهه متاذي

كتبت اله .. بس ليش هيج سوه ترا اني اعرفه للاشتر ما ياذي شخص الا اذا جان داك وياه الناقصه احجي انت شسويت حتى هيج سوه

رد عليه كال ... اني راح احجيلج كل الي صار وانتي احكمي عليه بس والله يعني اني مجان قصدي ولحد الان ممستوعب الي صار اني هم انغدرت

عقدت حواجبي وكتبت ... اي شنو احجيلي صار عندي فضول

طول شويه وبعدها كال .. شوفي هو صح جان اتفاق بين تحسين وساهر على الاشتر هم رادوا اني اجرجره لان هو مسوي ازالة شيوع على كل الاملاك لان هو يعابر اخو ساهر بالجنسيه ورافع عنهم دعوه هم رادوا يعني احجي وياه حتى ياجل الدعوه وبدل ما يبيع الاملاك كلها بالحكومة ويخسرون بيهن بالمزاد رادو ينطيهم مهله ويبيعون على كيفهم وبسعر افضل

بعدين جنه نحجي عادي واخذت مهلة منه وهو وافق كال عادي اوقف القضية واني هم حاب استفاد بس لمدة شهر مو اكثر

بعدها حسيت بيه داخ وظل يخربط بالكلام و واول ما طلعنه اني وياها اجه ساهر وتحسين هم اخذو وياهم وظلوا يحجون وياه على صفحة اني ما خليتهم ظليت منتظرهم وجذبت عليهم كتلهم خابرت صفاء راح يجي ياخذ الاشتر

بعد ما عرفت شنو الي دار من كلام بينهم والاشتر اني بيدي وصلته البيته بعدين انصدمت ثاني يوم ما اشوف اله هاجم عليه وتبره مني وضربني وهاني كدام امي واختي وهذا الشي كلش يحز بخاطري

وهسه اريد اعرف منو الغلطان بينه اني لو الاشتر

جاوبته بعصبيه وحقد .. انت اكيد تعرف ليش انت لان بصراحة لو معتبر اشتر اخوك ما ترافك ساهر وتحسين وهم يدورون الزلة على اخوك ذاك صفاء لان يحب اخو ما يتقرب منهم وهم ذول حقراء وجبناء وديستغلوك لصالح مصالحهم وباجر بس تخلص مصلحتهم راح يطگولك بيبسي ويخلوك تسيس بس انت بصراحة ما تعرف وين مصلحتك وعايف ايد اخوك ولازم بادين ذول الحقراء الجبناء الي ديستغلوك المصلحتهم

رد عليه .. اني عفتهم عفتهم من زمان بس هم طلبوا مساعدتي لان الاملاك من تنباع بالحكومة مراح نستفاد شي الحكومة تكسر سعرهن مو مثل ما واحد يبيع على راحته وكالو لان هو يحبك انت اطلب منه يوقف المحكمة ما ادري بيهم راح يشربوا وما اعرف شنو الصار حتى هيج تخبل عليه اعتقد فصح عن شغله او عن شغلات تهمه وتخصه

تنهدت وجاوبته .. شوف مصطفى ارجع واكولك انت غلطان وحيل غلطان والحمدلله من صحيت على روحك حتى بعد ما يستخدمونك طعم الخاطر مصالحهم وبعد لا تثق بيهم هاي اني فافي لا تثق بيه ترا بهذا الوقت محد كفو تثق بيه

وبعدين الاشتر اخوك من لحمك ومن دمك والدم يحن واني اتذكر من فشختك براسك هو تخبل عليك وشفت الخوف ولهفه بعيونه عبالك ابنه مو اخو لك اني هيج عندي اخ مثل الاشتر يدور مصلحتي واروح اركض وره الزبايل تحسين وساهر انت صدك مال كتله مال طابوكة احط مخك بحلكك

ضحك وهو يكول .. هههه زين هسه شسوي اريد اعدل الامور بس ما اعتقد هو متخبل ومتسودن عليه واموت واعرف شنو الصار حتى هيج تخبل

مع العلم اني رحت وتعاركت وياهم لساهر وتحسين وكلتلهم شسويتوا بيه شنو الصار بس ما انطونه اني نشده واني تاكدت هم اتفقوا ويه صاحب الكوفي يحطله حبوب بالعصير لان بعدين شفته نفسه القدم العصير يحجي وياهم واستلم فلوس منهم

تخبلت اني كتله .. يعني شربتوا نسيبي وخليتوا يتحمل الحرام يا اولاد الحرام صدك عيب عليكم ولك انت مصيفي مو محل ثقه واذا تضحك عليه وما متندم ما تلوم غير روحك

جاوبني بسرعه .. لا بالقران متندم تعرفين ليش متندم لان بصراحة حسيت نفسي انغدرت من ساهر وتحسين واني شكد جنت واكف وياهم وسببولي مشاكل اني بغنى عنهن

رديت .. تمام اني حنطيك طريقه اخليك ترجع ويه اخوك بس اصبرلي شويه واخليك تتقرب منه

كتبت .. لا ما اريد ارجع واتقرب منه بس اريد توصلين اله اني ما غدرته وجانت نيتي صافيه بس الصار كله بسبب تحسين وساهر وروح امي اني ما الي ايد بيها السالفه

جاوبته .. تمام ان شاء الله ولا يهمك خليها عليه اسويكم دهن ودبس كد ما اصفي علاقتكم بحيث اخلي علاقتكم اصفى من مفعول خلطتي

طل يضحك واني فعلا قررت احسن علاقته ويه اخو وان شاء الله اكدر احسن هاي العلاقه وارجع المياة المجاريها

.............................

صفاء

بعد ما اخذت سولين للطبيب

خابرني الاشتر ورحت عليه التقيت بيه عند الجسر لكيته واكف على سياج الجسر والجو بارد بحيث الدخان يطلع من بين شفايفه

اول ما اجيت سلمت عليه كال.. هااا صفاوي حبيبي شلونها سولين ان شاء الله زينه

رديت عليه بخيبة امل .. لا والله مو زينة مريضه وبس تبجي وتخاف انوب اليوم اخذتها للطبيب سنها يوجعها

هو تخبل ومبينت علامات الخوف والقلق على وجهه كال ..وهسه شلون صارت احجيلي كلبي صاير نار عليها

جاوبته بهدوء .. لا الحمدلله صارت زينه خليتها نامت وجبت اكل من المطعم تغدينه والوضع تمام

جر حسره وهو يكول .. دير بالك عليها واني ان شاء الله بعد كم يوم عندي وجبه مال اسلاح هاليام ويه دوش وسكان والاسبوع الجاي راح تصير الكبسه عليهم لان اجرته الهم لهذا السبب لازم تطلع سولين من البيت تمام

رديت عليه .. اوك تمام بس وين اخذها اني هم تورطت هي البنيه عبالك صايره بيها حاله نفسيه وتخاف احسها حيل تبهذلت واحس استعجلت بزواجك منها

جاوبني .. اييي صح استعجلت بس اني احبها واعرف بيها متحبني وجنت اجاهد حتى اخليها تحبني تالي تدمر كل شي وابوها دام بعده ويه تحسين ويهرب اسلاح ويشرب مخدرات ما ظل شي ويسون عليه كبسه ويعفن بالسجن يعتبروا اربعه ارهاب

كمل بغصه وهو يكول ..بس اخلص من ابوها اطلكها واخليها حره تتخلص مني وتعيش حياتها مثل ما تريد مو مثل ما اني اريد حاولت وياها بس ما شفت الحب بعيونها ولا شفت اللهفه اليه لذلك كل شي صعب بحياتنا وان شاء الله ترجع امهن الهن ويعيشن وياها من دون خوف ومن دون كل شي

تنهدت ورديت عليه.. الله كريم ان شاء الله تطلع غلطان وتطلع تحبك وتغير قرارك وقرارها

تنهد وهو يكول .. الله كريم ان شاء الله

كمل كلامة وهو يكول ... مو تنسى صفاء ان شاء الله يومين تلاثه ويجون الجماعه جايبين السلاح

رديت عليه .. لا شلون انسى تدلل

انطاني فلوس وخليت ورحت للبيت اني ما اعوفها وحدها وهي صارت تامن بيه وتسولف وياي وتشكي مرات وحتى حجت الي شلون اخوي جان موجود وشاهد على جريمة قتل امها

واني اعرف من الاشتر ان امها ما ميته وجنت كوه لازم نفسي ما احجيلها واصبرها وافرحها بس اخوها طلب تثبت برائتها يله يفصحون عن وجود امها بالحياة

وصرت احجي الها عن اخويه وشلون عاش حياتها حبيت ان ابين الها معاناته بس هي جانت وابد ما تتفاعل ولا تتعاطف الضاهر هي مجروحة جرح عميق منه

..........................
جيهان

بالي عند سولين خابرت على الاشتر الحمدلله طمني عنها وكال اريد اجيبها الكم تظل عندكم كم يوم حيل فرحت من كال هيج بس كون ابوي ما يجي ويتعبها فوك ما هي تعبانه

تنهدت احسها مدتشوف السعاده ويه الاشتر وكبريائها وعزة نفسها ما ترضا باجبارها وهي تزوجته تحت ضغط ابويه وتزوجته مجبوره

الله كريم بس والله الاشتر خوش انسان وبيه جوانب حلوه بس بعد الله اعلم يجوز بيه سلبيات هي تشوفهن واحنه ما نشوفهن بحكم هي عاشت وياه وشافت كل تصرفاته

جريت نفس وزفرته بس والله احسن من كريم يتعيقل ومغرور وشايف روحه شلون فشلني انوب من لزمني لحد الان لا يراسلني ولا شي وكله عنه نشط ومتفاعل ولابسني مثل النعال

معقوله هو جان حاس بيه اني جيهان وكال خلي اضحك عليها بلكي تعترف وتكول اني جيهان ومن شاف ما بيه امل اعترف واجهني بالحقيقه؟

ياربي هذا الزلمة هم يدوخ هسه يحبني يضحك عليه الله اعلم بس شلون عيب هسه اني شنو فرقي عن ايو هي راسلت السحاره واني راسلته واثنينه نراسل هسه بس لا يقارني بيها ؟

عزااااا وين انطي وجهي فد مستحيه بعد لو اموت ما اخلي عيني بعين عمو كريم ولا اروح الهم احس مسويه جريمة عيني مكسوره

انوب هو ابد محجه وياي ولا احنه رحنه الهم ما النه عين نروح وانطردنت لو اموت ما ادخل بيتهم بعد شنو قابل لهلدرجة ما عندي كرامة
جاوبتن
بس والله هو كايل لكوثر اني احب جيهان وروحي شوفيها تتقبلني وذيج البربوك ما كالت الي يعني هو يحبني

زين ليش هيج مثكل عليه وابد بعد ما حجه ويايه ودوم اشوفه نشط وما يحجي

دخلت على حسابه ورحت كلت الفافي .. احضري بسرعه

ردت عليه بغضب .. امشي ولي عود ليش احضره شمسوي المسكين

ضربت رجلي بالارض بعناد ... احضري ما اريد وجوده بحياتي يتعيقل وشايف روحة صار شكد من دره بيه لا واسل ولا شي شايف روحه على شنو ما ادري اصلا شايب اكبر مني ب ١٢ سنه اخذ اغاته هسه

ردت بسخريه .. ديله دوري اغاته انوب بعدين احضره جا مو نصير مثل هاي الي لا حظت برجيلها ولا اخذت سيد علي

تنهدت بعصبيه ... هو بعد لو يموت ما اتزوجة ولا اقبل بيه ترا ما يصير هيج ما احب الرجال الشايف نفسه

ضحكت وهي تكول .. اي وبعد يومين من يتزوج غيرج دكي والطمي وغني يمكن نايمة بصفه وعطرها تارس الغرفه

هزيت راسي بنفي ... لا ما اغني اصلا هاي مو اغنيتي انتي اخترعتيها

جاوبت بخبث وهي تكول .. اي صدك جنتي تغنين كله حبيتو بيني وبين نفسي ومقلتلوش على الي بنفسي معرفش ايه بيحصلي لما بشوف عنيه

ضحكت وسرحت بحالميه ... هههه اي والله ما اعرف شنو يصيرلي من اشوف عيونه عوفي لا تحظري احبه

غمتني وراحت وهي تحجي وتسب بيه وتتذمر

..........................

سولين

بركان الم يسكت شذرات الامل الي عندي  غصة وجع سكنت باحشائي من دون رحمة...

صوته اعتبره مثل صفير المقابر ما بي روح ولا اي عاطفه...

اسمه اللعين يطاردني حتئ بكوابيسي وحارمني من لذة النوم

يگولون بوقت المحنه اقرب طريق للشكوى هي الصلاة

واجمل الاصوات هو صوت القران من يردد اجمل الايات

فعلا من اقره قران تغمرني نوع السعاده وتنزاح عني غيمة الآلام...

بعد صراع طوويل ويه نفسي فرشت سجادة الصلاة واخذت القرآن بعد ما توضيت ولبست إحرام الصلاة...

صليت وقريت سورة يس ارتاحيت شويه بعد ما دخل البؤس باعماقي...

سفطت السجاده واحرام الصلاه خليتهن علئ الميز والقران بسته ومسحته علئ صدري وخليته بمكانها المخصص اله...

مشيت خطوات واني اعرج برجلي غصة اعتلت وجداني و وگفتني عن تكلمة طريقي حطيت ايدي علئ رجلي بحسرة كأن محد يحمل هاي الاذيه غيري

غمضت عيوني واني اصبر نفسي...لا انتي قويه انتي شاطره انتي محد يكدر يذلج انتي مو عرجه ان شاء اللة تطيبين

جريت نفس عمييق وكلام عطوف يتردد على اذاني...خطيه شوف شلون تمشي عرجه

لزمت راسي بوجع انفضت كلامهم من عقلي صكيت علئ اسناني...كااافي كااافي لا تفكرين هوايه الحمد لله علئ كل حال

طلعت للمطبخ شفت صفاء كاعد يلعب بالموبايل مالته تنهدت خطيه كتله الجوع واني من اجيت لحد الان هامله الوضع حييل...

دخلت للمطبخ تعبااان جان حييل الحايط مالته مكرفع والصبغ طايح والارضيه مالته صبابه وتنكث تراب

فتحت الثلاجه هدووء ما بيها غير طماطات ثنين وخياره وحده

تنهدت وطلعت الطاوه خليت زيت وكليتها خليت عليها شويه ليموندوزي وملح كملت خليتهن بصينيه والخياره كصصتها دوائر حتئ تصير هواية...واخذت كلاص وبطل مي خليتهن ببطن الصينيه والخبز كذلك

اخذت الصينيه واني اعرج برجلي ودخلت للاستقبال شافني صفاء عدل كعدته كال...خويه ليش تعبتي نفسج جان كلتيلي،رحت جبت لفات من المطعم

ضحكت وخليت الصينيه كدامه...يمعود قابل شمسويه اني المفطح هن طماطات خايسات وخرت المعفن منهن وگليتهن احسن ما نموت جوع هههه

اخذت خبزه ولوثتها بالطماطه دا اكلها

هو گال...ههههه والله عبالي نايمه جان رحت كلت عود من تكعد حرم اخويه المصون اروح اجيب اكل

غمضت عيوني بقرف...ليش جبت طاريه سديت شهيتي من الاكل

جر نفس حزين كال...الله يهدي بالكم ولا حبيتي شويه

نزلت الخبزه من ايدي وخليتها بالصينيه...سدي الموضوع فدوه

اخذ الخبزه وضل ياكل گال ...حامضه

ابتسمت...اي احبها حامضه خليت شويه ليموندوزي

رد عليه بحنية...بس عاشت ايدج طيبه

جاوبته بمرح...بالعافية خوية

كملنه اكل ورحت غسلت المواعين وسويت جاي شرب واني رحت صليت المغرب والعشاء

رجعت لكيته نايم حسيت اختنكت البيت موحش عليه ضاله بس اني بي وهم يطلعون ...

كعدت يم راسه وهمست بهدوء...صفاء صفاء خلي موبايلك عندي ضوجه اريد العب بي ...

فتح تك عين كال...اخذي هذا الصرصور لان موبايلي الحديث والله ما منزل بي ألعاب

ابتسمت..اي عادي العب دوده  احبها

رجعت للغرفه الكاعده بيها جان بيها كنتور الطلاقات مالته «الابواب » كلها مكسره ومخليتلهن برده وسادتهن بس باب واحد ما مكسور وهذا الباب مقفول ما فد يوم شفته انفتح

تمددت وضليت العب بالموبايل بالدوده وحاول اكسر الملل العندي...

تقريبا نص ساعه حسيت بحركة غريبه ما ادري شبيه خفت ركضت بسرعه باوعت من شباك الغرفه المزنجر شفته هو...

گلبي احسه وكع ببطني مو خوف لا رعب ما اريد اشوفه كارهته وحش بالنسبه اليه

رجعت المكاني واني لازمة الموبايل بقوة حسيته حينكسر بيدي وغطيت وجهي كله وجسمي كله ...

ماكو ما اجه أتأخر طلعت عين وحده من البطانيه واني اترقب الوضع ما شفت بس حذاءة الاسود من صار كدام باب الغرفه دخل خطوتين وبعدها تراجع وكف بباب الغرفه وهو ينهر واحد من ربعه وامرة بهدوء....لا تدخل عوف نزل كل البضاعه هنا وروح

رد عليه ذاك...استادي شلون اخليك الوحدك وانت تعبان خليني ادخلهن جوه

جاوبه بثقل...لااا الاهل نايمين ما اريد ازعجهم مثل ما كتلك عوف كل شئ بباب الغرفه واني اكمل الباقي وانت روح...

ضل واكف الرؤيه محجوبه عندي وخرت البطانية من وجهي لان اختنكت وفاتحه عيوني علئ كيف شفته منطيني ضهره وحاط ايده علئ،خصره وهو يحجي،وياهم ما اسمع بس الطكطكه ما اعرف شنو جايب...

هو يحجي وياهم..عفيه سبع عاشت اديكم شباب جان ضيفتكم بس تعرفوني ما اعرف و زوجتي نايمه ما اكدر اكعدها غير مره ان شاء اللة

ردو عليه...لا استادي صدك جذب شني احنه جاي نجربك ما نعرفك احنه يهمنه رضاك علينه...

مد ايده بجيبه وطلع فلوس كلها حمر وانطاها الهم وهو لحد الان واكف بباب الغرفه عبالك حماية واكف عليه

اخذو منه الفلوس وهو صاح عليهم سدو الباب وراكم شباب

دار وجهه عليه غمضت عيوني حييل ما اريد اشوفه حسيت بي يشيل بالاغراض فتحت عيوني بس شنو عبالك نايمه والرؤية مغوشة عندي...

جانت اشياء طوويله ومغلفه بگواني جنفاص مدري جلفاص ...وملصقه بلاصق اعتقد اسلاح رشاشات وهيج اشياء واضح من الهيئة...

وكف كدامي وضح باستهزاء واني بلعت العافية كال..هه ما لكيتي تنامين الا يم الباب الصاحي هسه شلون اضم السلاح...

حسيت بي كعد قريب مني و وخر البطانيه من يمي واديه تسللت الخصري وكتفي ...

صرخت بصوت عالي من دون سابق انذار و كعدت...وخرررررر وخر مني لااااا عوووفني ولا اذا ما عفتني اذبحك والله لا عبالك كسرتني لااا

احتدت ملامحه بغضب وشد علئ شفايفه وعيونه تتاملني برعب هزني بعنف...اهدي شبييج لا تخافين ردت بس اوخرج من الكنتور اريد اخلي بي اغراض ما اسويلج شئ والله...

هديت من ثورتي شويه وابتعدت منه وكفت واني اجر بروحي جر رجلي ماذيتني

نفخ بضجر وعض علئ شفايفه ما يعرف شلون يرضيني

كعدت بزاوية الغرفة...وهو وكف ضل يدخل بالسلاح بالكنتور من دون ما يباوع عليه بس اني عيوني جانت تتاملة وتتامل حركاته ما اعرف هذا الرجال غامض واني حييل خايفه منه ...

كمل قفل الباب مال الكنتور وطلع تساءلت لشنو هذا السلاح كله...

ضليت كاعده بالساعه ما طلعت كلبي يدك وبطني كل شويه ومغصتني ...

صار عندي فضول اعرف وين راح وكفت مشيت خطوات متعوبه قلصت عيوني واني اشوف الضوه مال الغرفه مالته مفتوح ...

ما اعرف شلون قادتني رجليه ومشيت عنده وكفت يم الباب شفته من بعيد...

مقابيله ميز مال حديد ومفروش عليه مثل النايلون مشه خطوات وفتح الصندوك مالته طلع منها بطل مثل الديتول بس بطل كبير و مقص وسجين وسرجنه اشياء مدري شنو تخوف وكطن...

لبس الكفوف البلاستيكيه والكمامه وكعد علئ الكرسي صار ضهره اليه وهو ما شاء الله سد الشاشه عليه مدا اشوف شنو يسوي

وكفت علئ اطراف اصابعي دا اريد اشوف شنو بس ماكو بس اشوف حركة ايده كان يكص بشي وبعدها دخل السرنجه بالبطل واخذ منها شويه وضل يحقن بالشي الي كدامه...

عقدت حواجبي وتافئفت هذا شديسوي اخذ كمية كبيره من الكطن وضل ما اعرف شيسوي وبعدها اخذ اسلاك مال حديد كان يدخلهن بفد شئ وبده يخيط ..

رن الموبايل بيدي هو التفت واني بسرعه صرت وره الحايط وطفيته ما كدرت امشي خاف يحس بيه ولا اكدر اضل...

عضيت شفايفي ورجلية تشنجت عبالك دخل بيهن الموت صرت جني مومياء محنطه...

كلت ما دام ما اجه عندي ولا فتح الباب جوز عباله موبايله او شئ ثاني خلي ارجع اشوفه وين وارجع الغرفتي بسرعه...

باوعت انصدمت جان الميز ما عليه شئ وهو ماكو الكرسي الجان كاعد عليه فارغ خفت حييل...هذا وين راح ...

تقربت اكثر واني ادورة بالغرفة ما حسيت غير بشئ ثكيل التف علئ جسمي من وره  وجهها صار بوجهي وعيونه مفتوحه بقوة صرخت بصوت عالي...ولج يممممممممه  الأشترررر....لاااااا

هو فتح الباب بسرعه وركض عليه حضني بسرعه وهو يهدي بيه كال بخوف .. سولين حبيبتي شبييج شكو ششفتي

صرخت برعب ... لااااا ما ادري ما اعرف شنووو جنيه صعدت على جتفي

شالني ودخلني للغرفه الي جان بيها ظليت ارجف بخوف وقلق كعد على القنفه وهو يقوه ايات قرانيه ويحصني ويسمي باسم الله ويمسح على شعري كال بحنيه .. ماكو شي والله ليش تخافين

رجفت حييل وابتعدت عنه.. ما اعرف احس شفت شي صعد على جسمي هذا البيت يخوف شلون تعيش بيه

رد عليه بحب .. ما عايش بيه يروحي ترا بس وكت الشغل اجي بيه بس انتي صار كم يوم هنا وصفاء هنا هم خفتي

رديت عليه .. جنت اخاف بس هسه اني متاكده شي صعد على ضهري شفت شي يخوووف يخووف

ظل يمسح بدموعي بحنية واني جنت شارده بذهني اصلا ممهتمة لكل تحركاته جنت اباوع على المكان جان اكو دم ومقاصه وسرنجة واشياء تخوف

درت وجهي عليه وابتعدت عنه خطوات خايفه وكلي رعب منه .. شجنت دتسوي

ضحك وهو يكول .. شبيج جنت اشرح حيوان يسمونه كرطه

بسرعه مرعليه طيف سوادي وتخايلته بالمشرحة كتله .. انت تشرح

بلل شفايفه بحيره ورد عليه .. اي حيوانات بس حيوانات اشرحها واحنطها لان احب هاي الهوايه جان يشتغل بيها حجي اديب وعلمني عليها

وكفت واسحل برجلي متتني حييل دا اباوع شفت بطل وشفت فعلا اكو حيوان ديحنطه

باوعتله بارتباك وقلق .. مو حرام تحنيط الحيوان وتشريحة

رد عليه بعدم اهتمام.. لا مو حرام اذا كان التحنيط والتشريح لاسباب علميه وعمليه

رمشت بعيوني وبروح مسلوبه سألته.. تدرس عليهن

رد عليه.. تقريبا

جان هذا البطل حسيت بشك بيه تقربت منه واخذته بيدي دا اشتمه وهو صاح بيه بغضب كال ... لاااا سوليين

ركض عليه واخذه من ايدي بصوره مباغته رجعت خطوات خايفه منه وضميت اديه وره ضهرها كردة فعل على ردة فعله

تنفس بصعوبه وهو يكول .. شلون تشمين هاي الماده انتي تردين تموتين هاي ماده سامة تستخدم بالتحنيط اسمها فورمالين انتي مو جنتي مراقبتني وشفتي جنت لابس كمامة حتى ما اشمها

بلعت ريكي بانزعاج ومجاوبته بس الخوف دب باعظامي تقرب مني وهو يبتسم ويحاول يكون لطيف وياي بس ما يعرف

كال .. شلونه سنج صفاء كال تعانين من وجع اسنانج

رديت عليه بحسره ودمعه .. ليش هي بس اسناني

تنهد وهو يتحسر كال .. اي حقج بس والله و روح رحيق الصار غصبا عني جنت مو بوعيي

جاوبته بعيون دامعه .. العذر اقبح من الفعل

رد عليه .. ترا والله حتى مو فعلتي تعرفين اعدائي هواي وصار الي صار

بجيت بحسره .. بس اني تعبانه حييل تعبانه كل يوم تطلعلي سالفه كل يوم شغله تعبت جنت عند امي مرتاحه ليش هيج صار وياي اريد اعرف ليش

تقرب مني ورجعت ابتعدت مره ثانيه كال .. ادري صدك والله حييل تعبتي وخاصه من اجيتي عندي بس والله انتي الي تردي اسوي شتردين اني حاظر

جاوبته بسرعه ودموعي تنهزم من عيوني كتله .. اريدك تطلكني خلينا ننفصل

ابتسم وهو يجر حسره كال .. ميخالف مثل ما تردين اصبريلي بس اخلص شغلة ابوج اطلكج

عقدت حواجبي .. شنو شغلة ابوي

رد عليه .. تخص الدوله ما ظل شي ان شاء الله

سكتت محجيت انصل موبايله بنغمته الرنانه ... فعذبها حتى اذاب فؤادها

قفل الخط بسرعه وهو صاح على صفاء كله رجعها لذاك البيت واني راح اظل هنا لان هي تخاف من هذا البيت وتحسه مسكون

خطيه صفاء ما قصر واخذني وياه لذاك البيت وهو فعلا بعد ما اجه لهذا البيت صار فتره احس مرتاحه منه بس حيل مشتاقه لاخواتي واموني ياريت اشوفهم لو يجيبوهم الي احس تغربت عنهم وهالشي حيل ياذيني

صفاء توسل بيه اداوم جامعه بس ما قبلت احس ما الي خلك لاي شي لا دوام ولا الاشتر ولا حتى اهلي

قد تكون احدئ الغزلان جامحه ترفض الانصياع لرغبات سيدها

.........................

جاسم

رجعنه اني ورنا حددنا موعد جديد للعرس ان شاء الله على الشهر الجاي بس كون ما نفكر العالم ونموت النه واحد منا لو منا

اجيت كعدت جان ابوي كاعد هو وكريم وعمتي ام حسن وكوثر وحنان كلنه العائلة الكريمة كلها مجتمعه

جنه نسولف عادي بس كريم حسيت بيه ساكت وشارد بذهنه عن العالم دسيته بعكسي كتله .. هييي وين ابو الشباب نايم كاعد

ضحك بارتباك وهو يرد عليه .. هههه لا يابه وياكم موجود

ابوي .. شنو بويه كريم شو اشوفك ساكت وهاليام ما عاجبني بس تصفن بيك شي صاير شي

كوثر ضحكت وكالت .. صدك كريم مكتلك ايو عرفت بيك متصوب وخابرتني وتبجي تريد تجيك هي وامها وابوها ويتحمدون الك بالسلامة كالت انطيك خبر

رد عليها بغضب ... وين تجي لا تجي ولا شي انتي تحجين صدك يعني بعد عملتها تردينها تجيني انوب خوش سالفه هاي

حنان نطت من مكانها وهي تكول .. اي والله خوش درب مال لواگة عشتو المسعده تريد تجي هي واهلها حتى شنو حتى كريم يحن الها وتكسر عيونه ونرجعها ايو الدلوعه ما عولنه نخلص منها

ابوي عاط بيها كلها .. كافي لا تحجين البنيه غايبه وملائكتها تسجل شني هالكلام وبويه انتي كوثر كليلهم لا يجون وحبل الموده انكطع ماكو داعي الجيتهم او تهربي منها وكليلها رجع الدوامة

ام حسن كالت من مكانها ..ليش خويه خليها تجي البنيه صح غلطت بس جل من لا يخطى وخطيه انكسر ضهرها وهي صغيره وتطلكت حرام اني اكول لو نرجعها احسن

وكف كريم وهو متعصب كلها .. شنووو ترجعين منو ايات ما ارجعها لو امي تطلع من كبرها انتي عمه شدتحجين صدك جذب تردين ارجع هاي ام السحوره ما خلت سالفه ما سوتها وتالي تسوي سحر خدمة توصيل تطورت الخايبه حتولي لا ارجعها ولا اريدها

ابوي رد عليه .. جا بويه انت هم ما يصير هيج تظل من دون زواج واذا فشلت بزواجك الاول مو معناها بعد هذا هو ما تتزوج وتكون عائلة

رد على ابويه وهو يكول ... لا ليش ما أتزوج ان شاء الله اتزوج وبريبا ان شاء الله

حنان انخطف لونها وصار وجهها بلون شعرها اصفر مثل الليمونه وعيونها تتلاكط

ام حسن ضحكت وهي تكول .. جا خوش دام تريد تتزوج هاي بنيه بنت صديقتي شلون بنيه مثقفه ودارسه اروح اخطبها الك وعلي يكيفون

جاوبها كريم ببرود وهو يكول ... لا تتعبين نفسج ولا تمشين اني قررت اخطب جيهان

نهاية البارت ... يتبع

كونوا انتم كونوا بخير ... احبكم 💔

اذا صعد تصويت بارت اليوم باجر انشر بارت يبعد روحي وجروحي😅

باعوا جمال هذا التصميم الي خطف قلبي ❤️❤️🥺من تصميم رزان
razanlola