رواية #وكر الأشتر الفصل الثالث وثلاثون 33 - بقلم الكاتبه سمو العراق

بارت ٣١
رواية وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔💔💔

‏"نحن نقع في حب العقول والأرواح، أما الشكل فإن الله لا يخلق شيئًا قبيحًا .!!

اقروا البارت بتركييييييز 🤐

............................

سولين الحيه

خوف ورعب والقلق وكفت بعد ما حسيت بالمسدس صار براسي جان گلبي ضرباته تهزه بعنف صرخت بصوت عالي .... لاااا يمه الاشتر وييينك لا

دارني عليه واني اصرخ وابجي .. والله اني مالي شغل هو الاشتر كل شي عنده حتى عنده اسلحة ومدري شيسوي جوه

سمعت صوت ضحكته وهو يكهكه وشدد على حضنته اليه فتحت عيوني مصدومة مرعوبه والدمع لازك بأهدابي ظليت بحالة صمت شنو هاي شلون هو اخاف مو هو شنو استنساخ رفعت راسي و باوعت عليه شفته هووو لا عزااا مو معقوله

ابتعدت عنه خطوات وركضت على الباب دا اريد افتحه جان مقفول رجعت اباوعله بعدم تصديق اشرت بخوف واصبعي يرجف .. انت وييين ؟ مو جنت جوووه شطلعك منين طلعت

عقد حواجبه وباوعلي باستغراب.. شنو وين جنت جنت طالع اجيت وعبالي حرامي لان مو عوايدج تكعدين هيج وكت وتگابلين هاي الغرفه

تنفست بصعوبة واباوعلة وارجف اشرت على الباب برعب .. انت جنت هنااااااا !!

ضحك .. هههه شلون جنت هنا ما افتهمت شنو قصدج

تقربت منه بخوف .. اني شفتك قابل تجذب عيوني انت منين طلعت راح اتخبل هاي الغرفه بيها بس باب واحد انت شلون طلعت مخي راح يطير

لزم وجهي و هو يرتب شعراتي الطايره ببرود وجمود .. جنت برا اني هسه دخلت

ابتعد عنه بخووف ... لا انت جني مو بشر والله اني جنت مراقبتك وشفتك دخلت هنا وحتى لبست جفوف بلاستيك بيض نفس مال العمليات وطلعت شغلات وجان مقابيلك ميز وخرته عن انظاري وبعدها اختفيت

عقد حواجبه .. شنو هاي فلم هندي اشو ما اكدر اصدك هذا السيناريو اخاف تتوهمين

حجيت بعصبيه .. شتخييل لا ما اتخيل ابد والله شفتك

ابتسم .. زين هسه شلون اجيت من برا والباب مقفول

لزمت راسي بقلق وخوف .. شنووو راسي حيطك ترا راح اتخبل شلون هيج انت جنت موجود والله شفتك حتى نفس هاي ملابسك

سحبني من خصري ويحجي ببرود وهدوء ... لاااا يتخيلج

بلعت ريكي .. زين افتح الباب دا اشوف شكو

رد عليه .. لا ماكو داعي هاي الغرفه تخص شغل لحجي اديب اصلا هذا بيته ما اكدر افتح الباب هاي أمانة

جاوبته بحيرة وقلق .. زين شبيها ؟ عندي فضول من ناحيتها

رفع حاجب بعدم قبول كال وهو يعض شفته ..افااا تردين احجيلج شبيها وانتي بعدج مشايفه منو حط المسدس براسج اعترفتي عن الاول والتالي

كورت ايدي و ضربته بصدرة بقهر وغضب.. غير انت حاط المسدس براسي ما دكول هاي مرتي على ساعه تنجلط من فعايلي وياها

مشه خطوات وهو يضحك وبعدها دار وجهه عليه رفع اصبعه كال .. هذا جان مجرد اختبار الج ورسبتي بيه

عقدت حواجبي باستغراب.. يعني شنو قصدك

مجاوبني تركني وراح للمغسله وهو يغسل ملابسه سود وطويل عنده لياقه بجسمة مايل للضعف شويه مثل عمود الفاتحه بس بيه شي غريب غموض قاتل حتى بهيئته بطريقة ملابسه بحركاته غريب حييل

غسل اديه حييل وكأنه جان لازم يشي قذر بحيث كرر عملية الغسل بالصابون اكثر من ست مرات

واني جنت هادئة وصافنه بس قلبي تعبان وعبالك خاض حروب ومعارك ومدا الگة سبيل للنجاه بس دا اشوف ضياعي وشتاتي بين الأيام

رجعت الغرفتي واني أمشي بخطوات يائسة والقلق اخذ حيز من تفكيري دخلت للغرفه بشرود كعدت على الجربايه وحضنت نفسي بخوف

بلعت ريكي واني افكر كال انتي رسبتي بالاختبار معقوله من خله المسدس براسي جان ديختبرني وديريد يحجيلي عن طبيعة شغلة واني اعترفت عليه بدون ما اعرف منو الخله المسدس براسي ؟

وبعد ما شاف اني مو كد الثقه نكر شغلة داخل الغرفة وبعدها ما حجه عن شغله شي ورجع نسب الغرفة الحجي اديب اوووف راح اطك واموت يمكن اذا جان يثق بيه بعد هذا الموقف رجعنه للصفر

زين شلون اني لازم ابين اله اني واثقه منه واني احبه واعشقه واني وياه واحد حتى اكدر اكسبه ويحجي عن كل شي

بس هو ما ينكسب او حتى لو اكسبه ما يفصح عن سره وشغله سري للغايه

زين الغرفه شلون طلع منها هو شبح لو شنو والله الغرفه ما بيها غير هذا الباب اني اعرف ومفتشه حوالينها اموت واعرف منين طلع

اندك الباب رحت بسرعه فتحته شفته هو يحجي وجكارته بين شفايفه كال بادب .. اسمحيلي ادخل مدام ؟

باوعت بعيونه بحييره بعد ما رفعت عيوني اله جنت احس نفسي صغيره كدامه صغيره بكل شي بالتفكير بالعقل بالطول بالحجم بالغموض احس نفسي لا شي

رجفت شفايفي وحظنت وجهي وبجيت بسرعه ما اعرف ليش بجيت وشنو الشي المخوفني وخلاني ابجي بس من شفته حسرة اكلت گلبي وبجيت من روحي

لزم اديه وهو ملهوف وباوعلي بخوف وقلق واضح على ملامحه .. ها يبويه شبيج تبجين شكو شصاير اخذج يم اخواتج

هزيت راسي بنفي ورجعت النوبة البكاء حسيت بيه شالني ورفعني جنت لا شيء بالنسبه اله تلعقت برقبته وكأن اريد اشكي منه وعليه

مددني على السرير وتمدد يمي احتضني بدلال وريحة الدخان سارت بانفاسي وريحة ثانيه مخلوطه بالدخان مثل ديتول او معقم هيج شيء

سحب ايدي وباسها بشغف واني شحبت ايده جان اسم رحيق مزينه بشي حلو ولطيف استشقت عطر ايده وغمضت عيوني

فتحت عيوني وسألته.. ليش ايدك بيها ريحة معقم او ديتول

باوع بعيوني بعمق ثواني مو اكثر وجاوب بسرعة ..عقمت العمليه

رديت عليه بنتر .. ما شاء الله عندك حلول لكل شي

جاوبني بخبث .. لعد شنو اجذب عليج اشتمي رگبتي وصدري وراح تعرفين ممجذب بولا حرف واذا تحبين بوسيني بطريقج

رفعت حاجب بقهر .. تعرف شلون تغيير الموضوع ما شاء الله عليك

ابتسمت .. افتحيلنه موضوع حلو خلينا نسولف

جاوبته .. عندي مواضيع كومة واذا فتحتهن وياك مراح استفاد منك شي لان انت ما ينوخذ منك لا حق ولا باطل

رد عليه بهدوء .. تمام لعد خليني اني افتح موضوع

درت وجهي عليه واباوعله منتظره موضوعة كال .. حارث لو خاطبج قبلي توافقين بيه

جاوبته بصدق ... اييي ليش اجذب عليك هههه

ضحك.. بس اني اعرفج توافقين مو حبا بيه لان انتي متحبي  يمكن صار عندج اعجاب عادي فترة مراهقه تصيير

كعدت واني اضحك على افكاره حلو هو بهيج مواضيع متفهم ومو همجي يضرب ويسب على ابو شنو جنتي تحبين غيري لو شفتج ويه واحد

جاوبته بكل مصداقية.. شوف حارث حباب وخوش ولد واي وحدة تتمناه هو جان رايدني بس هو ما قبل بيه ابويه لهذا السبب ما تزوجونه

رد عليه بغرور ..الحب مثل الحرب ينرادله واحد شجاع مو خيخه مثل حارث

باوعتله مصدومة .. حارث خيخه ؟

جاوبني بثقه .. اي خيخة يعرف ابوج سلبياته اكثر من ايجابيته والخباثه فول عنده يعني لا هو كاسبه ولا هو لازم عليه لزمة ومهدده بيها

عقدت حواجبي .. شلون يكسبه ليش هو ابويه ينكسب ؟

رد بخبث .. يعني امه عندها مزرعة ورث ويه اخوها وتنازلت عنها جان يكدر يساومة يطلب وحده منجن مقابل تنازل امة هذا حل ؟

الحل الثاني هو ما بايع المزرعة وكال ان هو باعها وتنازلت امج للرجال الباعها اله وهذا تزوير جان يكدر يركعة بدعوة مدنيه تخص التزوير تطيح حظه بس هو حارث فاهي وميستاهلج

ومدام ابوج مستقوي عليهم حتى لو تتزوجي مترتاحين لان عديم شخصيه كل يوم هاجم عليه ابوج وماخذج منه افتهمتي

جاوبته بتفكير .. اي حتى امي جانت دكول ابتعدي عن بيت عمتج ما نريد مشاكل بس اني بحياتي ما كلت الحارث احبك بس جنت اوافق اذا خطبني

رد عليه ببرود .. توافقين حتى تنهزمين من اهلج ومن العيشة الي انتي بيها

هزيت راسي بقبول .. صح كلامك وما اخجل منه وخاصه من بعد ما ماتت امي حيل كرهت العيشه ببيتنا وجنت اريد انهزم من الكل بكل طريقه البيت من دون امي جان معتم واسود وغابه وما بيها بس وحش واحد الي هو عامر

حرك ابهامة على شفتي السفليه وكال بهيام .. جان يريد يزوجج لابو سعدون صدمني بوقتها من فتح موضوعج بنية حلوه مثلج طفله ودارسه تتزوج شايب مجلد مثل ابو سعدون ما كدرت اتخيلج وياه واصلا ابوج ينطيج اله وجان شاد العزم

انتقضت ضدة واخذتج منه وخليت ابو سعدون يدك على راسه وهو منطي لابوج مبلغ والاثول ما كاتب بيه تعهد او مخلي شهود الدولة ما تنصفه بهيج شي وما تنحل غير عشائريا لذلك ابوج لغفهن

جاوبته بقهر .. وظل يحوم على جيهان

ضحك .. واجته سيارة طايره وطيحت حظه

ابتسمت على كلامة ورجعت نمت ظل يمسح على شعري وما تجرأت أسال عن شي لان اعرفه مراح يجاوب ويظل يتشرد مثل كل مره

......................

جيهان

اندك الباب صحت من وره الباب منو رد عليه بصوته المزعج .. هاا جهونه اني ابو سعدون محتاجين شي

رديت عليه بقرف .. لا شكرا ممحتاجين

كال .. اجيت اريد اشغل اموني وياي بالوكاله يوزع حصه

عقدت حواجبي بعصبية .. انت شنو من مله وينه وين الوكالة طفل هذا حتى بطل زيت ما بيه حيل يشيله روح عيني ممحتاجين شي وميشتغل روح الله وياك

طلعت افيان من الحمام حاطه الخاولي على راسها كالت منو بالباب جاوبتها ابو سعدون

لبست الخاولي على راسها ومدت وجهها شويه من الباب كلتله .. خيييير محتاج شي

كلها بخوف وارتباك ..لا اجيت اسال اخاف محتاجات شي

جاوبته بدون نفس .. ممحتاجين شي اذا تريد احنه نداينك اسبوع ونكص الباب

ضحك .. ههههه الله يزيدجن ويخليجن ويحفظج ويسقيجن من الجنه

جاوبته بقرف .. ويسقيك من ماء الحميم كول امين

سحبتها ودخلتها واني اضحك ... هههه ولج عوفي خلي يولي

ردت عليه بعصبيه .. هذا حقير عايف الدنيا كلها ويريد يشغل امين هالطفل المسكين اموت واعرف شنو غايته وشعنده ويه امين يعني شباب المنطقه كلها ما كفته يجي يركض وره طفل

جاوبتها بقهر .. والله ما اعرف هذا حيل حقير يعني اموت واعرف شعنده ويه امين لج يخوف بس لا يريد يستغله او يسويله شي

ردت بغضب وعيونها طفحت وهي تاشر بيدها .. غير اشكة بالنص وانعل والدي والدية

اني صحت على امين لزمته وبسته كتله بتفهم .. حبيبي اموني دير بالك تروح يم ابو سعدون هذا واحد حقير وامي الله يرحمها تكرهه اذا يصيحك كله ما اجي فافي متقبل هو يخاف من فافي

رد عليه بطفولة .. لا جيجي اني ما اروح هو يصيح عليه يكول تعال انطيك موطه ببلاش انطيك مصاصه نستله بس اني ما اقبل اكله ما اريد

افيان صفكت على رجلها بعصبية كالت .. بالقران اذا اروح لو ابو سعدون هسه اله امده بالخيس الجايف ميتين على حلوياتك المعقج

بسته وهو حضني و وعدني ابد ميروح يم ابو سعدون وهو حبيبي ابد ميطلع بس مرات يروح ويه فافي للسوك

عفته ورجعت امسح بالبيت

كعدت افيان على الدرج وهي تتذمر كالت ... اكلج انتي نهار كله تنظفين بهاي الصبابه المكرفعه شنو انتي ما تملين ؟ والله اني من يمي مليت

رديت عليها .. شسوي لعد اخلي البيت وسخ بس والله حتى اديه يبست وظهري نكسر انوب المي يدخل بالحفر كوه اطلعه منها

هي خلت وراحت لبست صايتها وحجابها صاحت .. اموني وليدي تعال امشي وياي نروح لحوم الخلفه نخلي يطبگ يعدل النه البيت ويطبگة كاشي دام عدنه فلوس

صحت عليها بصدمة .. يااا ولج فافي اكعدي لا يطلع ابويه من السجن ويذبحج بعدين هذا شغل زلم شدخلج

ردت عليه بقرف .. امداج امده الزلم العندج حشا نسيبي لج لو على ابوج نظل بكد نومة اهل الكهف وما يسويلنه شي خلينه نستغل الفرصه ونبني عاد نكعد بمكان بيه حظ

اردفت باستفزاز .. لو انتي فكر تموتين على الفكر مثل ابوج عامرلو بيدج تعيشين ببيت الطين يم صوينيه وعذيب

ابتسمت ... مو هيج عمري بس اني اخاف عليج شعرفج بالعالم وتردين تبنين البيت

جاوبتني .. لا تخافين اعادل عشر نسوان وعشر زلم وست زلم من مصطفى الجلب

خلت وراحت تاخرت واني كلبي نار هاي وين صارت شو اتاخرت وكل شويه وامد راسي اباوع عليها وماكو مدا اشوفها واخر شي مديت راسي واشوف اللوري اجت وافيان لازمة امين وتطرك وراها

وكفت ببابنه ونزلوا الطابوك والكاشي والرمل والسمنت لطمت على خدي .. عزا بعينج فافي راح تبني البيت من جديد هسه كون أبويه يتأخر يله يطلع بالقران يذبحها

دخلت وشمرت حجابها لزمتها بغضب ... رحتي ويه الرجال الوحدج

ردت عليه .. دولي شكووو رايحة وياه انطيته فلوس وراح هو عنده معاميل جاب منم ظليت كاعده يم مرته حفيتها وسويتلها شيره هي وبناتها طكيتهن بخمسين الف واجيت ههههههههه

لزمتها .. اكولج خاف الفلوس ما تكفي

ردت عليه .. باعي هو كال بالقسط جبتلج ركل وكاشي وطابوك واحنه نشتغل ونوفي والعدنه الظامينه ننطي اله شويه شويه نوفي وما شاء الله ادينه ذهب وشغلنه ماشي ولج انوب صرت معروفه فافي خبطه

ضحكت .. هههه خوش لقب بس اكولج عود صدك بالقسط جابه الرجال  وين اكو هيج

ردت عليه بصدق .. وروح امي هو هيج يبنون عنده ولج شبيج يستفادون لان راح يحمل عليه وهم ماشي شغله شلون اني مرات من ابيع خلطات بالقسط واكض الباب على العالم هههه

كرصت خدها .. والله انتي فد شي

جرت نفس وزفرته .. انتم من دوني تضيعون تاكلكم الواويه والجلاب همزين اني موجوده بحياتجن اوووي اروح فدوه الخشمي شكد احبني

كلتهم فلشوا البيت بس خلوا غرفه نكعد بيها بعدين كملوها لان نشتغل بيها ما قبل الرجال كال لان صب واحد يصير فقررنا نكعد يم عمتي ام حارث ما نريد بيت حجي كهلان نخاف من المشاكل خاصه من تزوجت ايوصرت حيل انجنبهم واخاف اروح الهم

.....................

سولين

كعدت الصبح فتحت عيوني شفته ماكو مو يمي عدلت نفسي وكعدت خليت ورحت غسلت باوعت بالمرايه ركبتي زركة عزا بعينع شكد ما يخجل

هو مجان موجود دورته ماكو البيت سكون وهادى ماكو شي بعدها خليت ونظفت البيت كالعاده

رحت للغرفه سويتلي لفه ورحت كعدت بالغرفه اكل بيها سمعت صوته يصيح عليه .. سوليين وينج

طلعت بسرعه اله كتله .. ها عيني محتاج شي

انطاني اغراض كال .. هذا مسواك وشتردين موجود اخذي خلي بالثلاجة

اخذته من ايده وخليته بالمطبخ رجعت عليه شفته كاعد يدخن ويخابر كعدت يمه من شافني طفى الموبايل بسرعه

قلصت عيوني واني وكزت بيه كال بهدوء .. ماكو شي بس مجرد اتصال عابر صفاء خابرني رايح للنجف وهكذا

غركت اديه بتوتر وجحيت بهدوء.. ضايجة اني كله كاعده بالبيت خليني اكمل دراستي على الاقل استغل الوقت بدل مكاعده هنا جني بومة

طفى جكارته ورد عليه .. ان شاء الله ان شاء لله مظل شي

رديت بحماس .. ادرس جنايات

جاوبني بجمود ... لاااا

فتحت عيوني مصدومة..ليش انت مو كلت قسم حلو وراح تحبي واني صرت احلم بيه

جر نفس ورد عليه... حسيت ما يلوكلج انتي شفتيني تصوبت انرعبتي مو انوب تشوفين وتعيشين بنص الموته ترا هذا القسم ينرادله جرئة وصبر وانتي لا جريئة ولا عندج صبر

جاوبته بعناد ... لا اني جريئة

ضحك كال .. المرحلة الرابعه يدرسون تشريح الانسان وما اعتقد انتي تكدرين تشرحين هو انتي شفتي حيه انرعبتي وصار طفارج ماله والي

اردف ...وبعدين ترا المرحلة الرابعه دراستها تكون على الطب العدلي والطب العدلي خاص بالجثث يعني راح تدرسين كيمياء عضوية و تصوير وتوثيق ادلة الطب العدلي وادلة الطب العدلي والشهداء والخبراء  وتشريح الانسان

تنهدت بحيره .. بس اني حبيت هذا القسم حيل حبيته واحب اعرف عنه

رد عليه وهو يسحب بشواربه كال .. هو حلو وحتى انواعه حلوه اقصد انواع الادلة الجنائية

ابتسمت بفضول .. شنو انواعه

رد عليه.. دليل فيزيائي مثل اثار الاحذيه بصمة وراثية اثر رصاص او اطارات سيارات هيج شي يعني

واكو دليل حيوي يعني مثل افرازات جنسيه والها اسم ثاني هذا مختص بالزنا يعني شلون تعرفين هذا الشخص زاني او لا وهذا الشي هوايه يتكرر بالطب العدلي يعني هوايه يقتلون بداعي الشرف ويدفنون الجثه بعد مده من الدفن اذا تم العثور على الجثه وتم تحليلها وفحصها من خلال الفرازات الي تكون عنده المره راح يبين اكو زنا او لا من خلال وجود بصمات للرجل داخل الرحم   حتى وان كانت الجثه مدفونه من اشهر وحتى السائل المنوي كذلك

حسيت جسمي تيبس بمكانه وخجلت من كلامه اكره موضوع الزنا وهاي السوالف سكتت مجاوبته

كال.. وبعد عن طريق اللعاب وكذلك الدم  كلها ادله يمكن الاستفاده منها بمسرح الجريمة

جاوبته بتوسل .. حلو خليني ادرسه

رد عليه .. هو قسم مميز حيل بس بيه مخاطر بس بنفس الوقت بيه اثاره وتشويق وبعيد عن الملل وبصراحة هو تخصص حساس حييل تحسين نفسج كاعده بمسلسل درامي كد ما تشوفين حوادث وجرائم

سالته بترقب ... الله عليك دارسه

ضحك .. لا عمي وين ويني دراسته معدله فوك التسعين حتى انتي بمعدلج ما يقبلوج الا بجامعه اهليه واني مستعد ادفع للجامعه بس اشوفج متدبريها وما اريد اخاطر بيج

لزمت ايده بتوسل ... فدوه حباب عاجبني

رد عليه بقبول .. زين اوك راح اسالج كم سوال اذا جاوبتي اخليج تدرسي

عدلت كعدتي بحماس وانتظرت اسالته كال ..اذا شخص تردين تقيمينه تقيمي من خلال ملابسه وشكله لو من خلال عضلاته وتحركاته لو من خلال كلامة والمواضيع الي يطرحها ؟

درت عيوني لليمين بتفكير .. لا اكيد من خلال كلامه ومواضيعه

رد عليه .. اهاا تمام زين تتذكرين قبل يومين شنو تعشيتي

ضحكت .. هسه كول شنو تريكتي ما اتذكر

رد عليه .. زين تحبين افلام غموض لو اكشن لو اجتماعيه لو رمانسيه

جاوبته .. رومانسيه فديت رومانسيتي والله هههه

كمل .. اذا اجيبلج لعبه مثلا لغز عندج طاقه تحليها لو لا لو تملين بسرعه مثل هاي تكون رسمة ولد مخربطه ولازم تجميعها وترتبيها تحبين هيج لو لا

رديت عليه بقرف .. لا يع ما احب شلي بالدوخه

جاوبني بضحكة واثقه كال ..متصلحين تدرسين جنايات كل اجوبتج خطا عدا السوال الاول جاوبتي صح

وخليني ازيدج شويه انتي ما تعرفين شوكت تتدخلين بالمشكلة انت تهجمين وهذا القسم ما يفيدج يحتاج فطنه وذكاء

وكفت كدامة  وحجت .. بس كول انت دارسه

احتضن خصري وضحك .. ههه منين واحد مثلي دايح وينه وين الجنايات بس قاري عنه وحاب ادرسه شكو بيها هو هذا القسم ما يهمه صغير او كبير المهم فطن وذكي وحلو مثلج

ابتسمت كال .. صار هوايه مبايسج

جاوبته .. اشتم بيك ريحة موت هسه تطلع عايش ويه الجثث

وكف بهمه ولزمني حيييل واحتضن شفايفي بانتقام باسني بشغف وقوه أبتعد بإرادته وهو يكول .. عقاب على كلامج انوب بيه ريحة موت؟

مسحت شفايفي ورديت .. والله دا احسك ويه الاموات عايش ههههه

غمزلي .. عايش ويه احلى ملكة اني

مشه خطوات واني صحت عليه .. اشتر

داو وجهه عليه ورد بحب ... يگلبه الاسود على كل والابيض بس عليج سولينتي

ابتسمت بفرح .. احسك فد شي كبير

هز راسه بقبول وعلى محياه ابتسامة حلوه كال .. احبببج

جاوبته بضحكة .. حبك ربك

ركض عليه واتقرب مني لزمني جاوبته بضحكة .. ههههه لا والله احبك احبك بس مو من كل كلبي من كل بنكرياسي ههه

كرصني وباسني حييل .. انوب حبك ربك حبك الله ادري وانتي شوكت تحبيني

جاوبته .. احبك بكد القطار

باسني بطرف شفتي وطلع صحت وراه .. وين رايح

رد عليه ...الصدك لو الجذب

جاوبني بسخريه.. وزعوا النتائج وسالي راسبه وراح اواسيها

رديت عليه بهلهولة .... كللللللللللوش اوكف اخذي وياك اتشمت بيها يمه فديتني شكد حيه اني احب اتشمت

تقربت منه اكثر وتعصبت .. صدك رايح تواسيها

ضحك كال .. لا والله على شنو اواسيها بس هي عادت السنه وتريد واسطه عود رايح اشوفلها واسطه

لزمت قميصه واني العب بازرار قميصة بدلع وهو لزم اديه .. اذا تحبني لا تتوسط الها

رد بلهفه وسرعه .. خليها تعيد السنه احسن تتقوه مبيها شي مو صدك

جاوبته بحماس واني اباوعلة .. صدددددك خليها تتقوه وتتادب ااووه قصدي تتقوه ووو وهاي اي وتعرف تقره

ضحك وباس ايدي كال .. يله خلي اروح

رفعت اصبعي بتهديد .. مو تواسيها لعد ما قرت خلصتها فراره وتريد تنجح المسعده عشتو

عض شفته من كلامي و وجهه مستبشر بالخير وخله وراح وعيوني تتأمله بضياع ومشاعر مخربطه

بعدها فكرت وإني اسأل ضميري الاعب بحالي ..بس خطيه اخلي يساعد سالي؟

جاوبني ضميري .. دخلي تولي تستاهل صيري حيه

...................

فافي

خلينه وكعدنه عند بيت عمتي والله هم يمها نسوان احف الهن واكط واهلس خلص عمري بالهلس لا حبيب يهتم ولا عشيق يسأل يمال اللطم كون

خليت ورحت للسوك اتسوك خلطات طبعا اني ببيت عمتي ايد ما اطلع ولا بيت جدو كهلان اله وحده تطلع ويايه بس بيتنا لا اروح اني واموني

فأني شسوي حتى اتسوك اخليهم يجيبونه للبيت على ابو عندي زبائن واجي للبيت هم اكطكط بالنسوان واحفحف بيهن وهم اروح اتسوك انوب حتى خلطات مال فطور رجلين ظليت ابيع راح اطك للستار راح اصير ماكيره فافي وامشي ويه الشخصيات

اخذت اموني ورحت اموني السكن مالتي تسوكت كالعاده مسواك خبطات وارجع للبيت اخبط وابيع وهماتين جنت اصباغ مال شغل وتنظيفات مال بشره تطورت صرت انظف بشرة هههه

وطبعا اني كل ما اروح للسوك اشوف مصطفى واكف بنفس المكان شكد تافهه اووع ثول حتى ثول ركعته بطابوكة لو ابتليت على عمري

عفته ورحت وهو جان كاعد بسيارته وظل يباوعلي مال العما كون والله لو ما اخو نسيبي اله افلش سيارته

جنت امشي بالسوك حسيت بواحد ضخم اسمر طويل يمشي وراي درت وجهي عليه استغفر الله وجهه قبيح ما بيه رحمة خليت وتغاضيت عنه ومشيت ردت اشوفلي سيطره شي واعيط بيها واخليهم ياخذوا

مشيت وهو وراي امشي وهو وراي قلقني واموني وياي خفت عليه وكل شويه ودرت وجهي خاف افضحها وخاف تصير مشكلة وهو اصلا محاجي شي

طلعت من السوك وامشي وهو وراي امشي وهو وراي باوعتله بعصبيه ... خيير محتاج شي

رد عليه بهدوء .. لا ماكو شي

جاوبته بغضب ... لعد شكو تمشي وراي

باوعلي باستغراب .. لا متوهمه

عفته ورحت امشي على السريع وهو يمشي بعدوء وعلى كيف

وصلت للمكان شفت مصطفى لحد الان منتظرني وهو هاي طبيعته من اجي للسوك لحد ما ارجع هو مرابط مثل المطي هنا

حسيت بهذا الشخص الي يمشي وراي وهو يكول .. انطيني رقمج

درت وجهي عليه بعصبيه وغضب .. شنو شنووو شكلت شتريد

ما اشوف اله مصطفى صار ورايه وهو يحجي بعصبية .. خيير شكو منو هذا

هو رد على مصطفى بنتر .. وانت شكو تتدخل توكل منا اني والحب انت شكو

ما اشوف مصطفى اله جابه ببوكس وكعه بمكانه عطت بقلق .. مصطفى عووفه خيولي

هو صعد عليه وذاك يحاول يساعد نفسه وطاحلة بوكسيات وذاك يهومش بديه وصرخ التمت العالم واني ابتعدت فارغوهم بسرعه

وذاك وكف وهو يمسح بالدم من وجهه ويتوعد المصطفى كله .. بسيطة اني الك

رد عليه مصطفى بعصبيه وصياااح ... انجب لك لا احط النعاااال بحلكك سكط يله امشي ولييي منا والله اذا بعد شفتك اله ازوعك العافييييه امشي كوااا..

هو خله وراح ويمسح بوجهه والعالم عاط بيهم مصطفى .. يله روحوا كل واحد يروح مشكورين ما قصرتوا

اني عفتهم وخليت ورحت ولازمة امين بيدي حسيت بيه يمشي وراي صاح عليه .. هذا منو

جاوبته بسخرية .. صاااحبي !

رفع حاجب متعصب.. احجي عدل

ضحكت بحقد واستهزاء .. وشعرفني منووو سارحة بيه اني واحد نذل لحكني مدري منو دازه عليه وجاي يفتر وراي بصراحة وجهك مو خير خلصت عمري اروح للسوك وحدي من شفتك لحكني هذا الثور

كملت كلامي .. على العموم مو شكرا على السويته اعرف نيتك مو صافيه عساس شوفي اني سبع وعندي عضلات هاي كلاواتك ما تمشي على فافي

ضحك كال .. فافي اسمج حلووو حبيته

باوعتله بنص عين... مشاعري طابوك جمهوري ما اثرت بيه

بلل شفايفه وهو يباوعلي باستفزاز عفته ورحت صاح عليه.. اريد اشتري خلطه اجرب خلطاتج

درت وجهي عليه ... شكد تريد كم وحده ؟

جاوبني .. شكد ما عندج ناوي اسبح بيهن

ضحكت .. عندي تلاثين وحده والوحدة على خمسه اني ادري بيك ما تستخدمها بس عادي ابيعلك شعرة من جلد خنزير

عض شفته بغضب .. بالقران محد غيرج خنزيره انتي مال فافي انتي مال عبود سماره يلوكلج بس فافي بصفحة وانتي بصفحة

جاوبته بقرف .. عوف التنمر على صفحة من زين شكلك هسه حشا خلقة الله باجر بيش ساعه تجي اجيبلك خلطات حتى ؟

رد عليه بقرف وغضب واضح على ملامحة .. نفس هيج وقت

عفته ورحت وقررت ابيعلة باقي الخلطات خليني استفاد وهو طبه مرض شسويله اكو مثل يكول ياهي تزوج ابوي اصيحلها مامي اهم شي اداري رزقي

......................

سولين

مرت الايام طبيعيه والاشتر يروح من وكت ويجي متاخر يجي يدخل مرات بهاي الغرفه اخاف اروح حسيته شبح من اخر مره شفته بيها

دخل للبيت سبح وطلع واني اباوعله من الشباك بس ما طلعت طلع من الحمام وكعد بالحوش ظل يتصل ويخابر ويحجي ما فهمت شي منه

بعدها اندك الباب وهو راح فتحه من فتح الباب دخل وياه شخص من ركزت بيه عرفته .. عزا هذا عايد شجابه بنص اليل

راحوا دخلوا للاستقبال واني رحت اباوع عليهم سمعت عايد يكوله .. سوادي ماااااات

الاشتر بصدمة واضحة على ملامحه بحيث وكف كله .... لااااا ليش شلون مات

عايد بحيره وقهر ... جان رايح سفرة سياحية هو جياد وزياد ولد تحسين وهناك غركان وميت

عقد حواجبه الاشتر باستغراب .. بس الي اعرفه سوادي يعرف يسبح محد يغلبه واصلا هم اصلهم من ميسان وهناك الشطوط والانهر موجوده بكل مكان حتى على ظهرة يعرف يسبح

رد عليه عايد بحيره وحزن .. ما اعرف والله احتمال جان سكران ؟

الاشتر بغموض .. بس اذا جان سكران و وياه ولد تحسين شلون خلوه يدخل للبحيره وهم يعرفوا سكران زين وين جانوا من غرك ليش ما نقذوا

عايد .. الضابط جابه من الحبانيه وهسه هو بالطب العدلي و ولد تحسين منطين اقوالهم وذبوهم سجن بس اهل سوادي سقطوا الدعوه وطلعوا

الاشتر بترقب .. زين شنو هي اقوالهم ؟

عايد .. اقوالهم ان هو جان سكران وهم سبحوا وكملوا وراحوا للشقه وهو هناك كايللهم مختنك راح ارجع اسبح مره ثانيه ورايح وما سامعين بس الضجة طالعين من الشقه لاكينه ميت

الاشتر بتساؤل ... زين اذا هم يعرفون بيه سكران ومكثر شلون خلوه يروح يسبح ويدخل للبحيره ليش ما منعوا

عايد .. مو كالو عساس من يغسل ويلوحة مي عساس يصحى حسب اقوالهم يعني ان هو مغسل ومصحصح ورايح بس خطيه حتى موبايله محترك وكله مي

صفن الاشتر وهو يفكر كله .. زين شلون يدخل للبحيره بموبايله سالفه ما يشيلها العقل هذا مكتووول ومشمور بالبحيره لان مستحيل اذا مصحصح يدخل بموبايله يعني ما فكر موبايله يحترك ؟

عايد بتنهيده ...والله ما اعرف

عدل حزام بنطرونه واخذ موبايله وسويج السياره وهو يحجي .. امشي خلي نروح لازم اشوف اكون حاظر خطوه بخطوه واشوف الجثه قبل لا يطمطمون السالفه

رجعت المكاني بسرعه وهو خله وطلع بسرعه يمشي بطوله الفارع وعايد وراه يركض

رجعت للغرفه وغطيت نفسي واني ابجي بصوت عالي من اسمع واحد ميت اتذكر امي واخاف حسيت روح سوادي تفتر عليه ميت ومخليه بالثلاجة وغركان يمه خفت حيييل احس روحه تفتر عليه

استعاذيت من الشيطان الرجيم وقريت ايات وسور قرانية قصيره وانتظرته للفجر وهو ماكو وصليت وهو ماكو بعدها غلب عليه النعاس ونمت

..................

جاسم ...

جنت كاعد بالمطبخ الصبح وجاي اتريگ .. دخلت ايات تتثاوب وتتمطط بدون متكول صباح الخير راحت عالطباخ وصبت الهه كوب حليب چاي ... وطلعت من المطبخ

اشوف حنان وعمتي وحدة باوعت للثانية وحنان ظلت تفر بحلگها معاجبهاااا

تقربت من عمتي وكالت هاي لشوكت تبقى هيج تسوي بس لنفسها ومتساعد ترة مخسرانة شي اذا غسلت ماعون لو حتى شالت الزبالة اصلا هي العود ما تشيلة من الكاع يعني تخيلي ام حسن هذاك اليوم المخدة مال القنفة واكعة بالكع فاتت من يمها وعبرتها ولا شالتهاااا انوب دفرتها برجلها

كوثر كالت اي وماتشيلينهه انت شكو مراقبتها

ردت عليها حنان هو أني شلتهه لعد شعبالج مااشيلها بس اني شفتها فاتت ولا شالتها واني وراها فتت وبعدين شبيج تردين تموتين عليها

عمتي ردت باطمئنان
هسه من تجي اني احجي وياها انت يجيج الصافي هي لأن عروس وتعرفين عروس تتعزز

جاوبت حنان اي يعني شكو بيها اذا عاونت ترة هو الخطار حده تلث ايام ويصير من اهل البيت ويكوم يساعد لو هي بنت الملك واحنه خدم عندها

كوثر بنبرة شبه عصبية شبيج انت حنان ما تفتهمين ترة هي عروس هااي أولاً وثانيا عدها امتحانات هسه خلصت اكيد تعبانه من الامتحانات شنو انت ماكو احساس اشتغلي انت شنو عندج شو كاعده وساكته

عمتي باوعت لكوثر بتحذير وكالتلها كووثر يمه

كوثر ظلت تفر بيدها ... باوعتلها بخزرة وحاجيتها واني ارجع ظهري عالكرسي لو تدرسين قانون مو احسلج خوش ترهمين محامية

حركت اكتافها وكالت هو ليش الي يحجي الحق تستهزءون بي عود

مديت الهه كوب الجاي الفارغ وكتلها ام الحقوق دكوومي صبيلي جاي احسن ولا تطولين لسانج

كامت اخذته مزعوجة وصبته وجابته

ورا دقايق طبت ايات تباوع للكل بعدم رضا وعجرفة
غسلت كوب الجاي وخلته على السنگ

وهن اشتغلت النظرات بينهن عمتي تباوع لحنان وحنان بدورها تشجع عمتي حتى تحجي وتأشر بعيونها على آيات

وعمتي تشجعت وقبل متطلع ايات حاجتها بحنية ولطف
بس مترددة شويه يمه ايوتة غسلي وياج المواعين عفية بالمعدلة هن مو عليج مواعين الريوك

ايات كشرت عن انيابها وعجرفتها وكالت أوووي هو شنوو اغسل مواعين غيري ، انووب!! كلمن ينظف وساخته وكلمن يخدم نفسه بنفسه لاا تظلون تتشرطون هو اني شربت بس حليب وجاي وغسلته بعد شكو

اني شفتها هيج تتجاوز وعلى عمتي الي المفروض أكبر منها وتحترمها وهي أصلا عمتي طلبت منها باحترام وحنية بس هي ماقدرت هذا الشي ولا خلت اي اعتبار لشيباتها غثتني كلش وقررت لازم اوصل هالمهزلة لكريم فتحت فديوو وبلشت اصور ..

حنان فتحت عيونها مصدومة وجاوبتها على كيفج وعيب عليج بالله اريد اسأل سؤال اذا كريم عرف بهذا لسانج ووجهج الي تبدلينه كل شويه شراح يسوي وشنو ردة فعله بالله

تخصرت ايات بيد وبالايد الثانية حركت ايدها
وردت ايباااه شنو هذا تهديد لو شنو بالضبط وبعدين اي ما انظف وشتردون تسوون سوو طبكم مرض

عمتي حجت على كيفج يمه حسبيني امج وطلبت منج طلب وهذا هم بيتج والمساعدة حلوة

دارت وجهه وكالت تؤتؤ تؤؤؤؤ شنو تردون انظف خيستكم بالله شون حجي هذا كلمن تنظف خيستها وفضت راحت وبعدين امي هي وحدة وماكو غيرها اعتبره امي

كوثر كامت لزمتها من اكتافها وتحجي بلواكة
على كيفج ويا نفسج عمري محد يجبرج على شي انت اهتمي بنفسج وامتحاناتج ومستقبلج وكريم وبس
واي أحد يتأمر عليج لا تسمعيله ويجي بابا واحجي وياه

جاوبتهه اي اووي اني ممتعودة اشيل العود من الكاع اصلا ، شون يردوني اجي انظفلهم واغسللهم هو ابيتنا كله خدامة احنه ماما متعرف تشتغل انوب اني اووي

ردت كوثر أصلا حتى كريم ميقبل تتعبين اناملج عيني انت هسه روحي ارتاحي بالغرفة أكيد هسه ضوجوج وسمموج بحجيهن دمشي امشي ارتاحي

طلعن وهن يباوعن على عمتي وحنان بنظرات كلها استهزاء

وحنان تباوع وتكول لعمتي ياا هاي شبيها كوثر صافة وياها صدك جذب وصاحت حنان بغضب ... خاب ايـــــــــو الخايسه من طاح حظج

جاوبتها عمتي بقهر حنان بعد ماعليج بيها الشغل مايموت عود احنه نشتغل الحركة بركة وكافي لا تسوين مشاكل

ظلت تفر براسها حنان وتحجي والله ماصدمتني غير كوثر تمشي وراها مثل العمية هسه أريد اعرف شنو مسويتلهها ساحرتها هالحية والله كل شي يطلع منها اعوذ بالله

اني قطعت التصوير وفكرت ادزه لكريم ...

وشويه وكبت العيطه بين حنان وبين ايات وصارت طك اخوك لا يطيح وذيج زعلت واعتكفت بغرفتها كالت يجي كريم واكوله

عاد اني فلشت البيت وظليت اصيح وهن سكت لان ابوي مجان موجود عنده طلابه بالبصره ورايح هناك

بعد مرور كم يوم

كريم رجع من شغله دخل والجمود مكتسي ملامحه نزل جنطته العسكريه المرقطه وكعد بالصاله على القنفه وهو يمسح على شواربه ويباوع للفراغ

اجت ام حسن سلمت عليه وكعدت تساله عن شغلة بحنيه وتحجي وياه وهو يجاوبها ببرود

نزلت كوثر سلمت عليه وبعدها راحت عند ايات تخبرها ان كريم اجه

شويه واجت ايات تمشي بغضب وعصبيه هو من حس بيها رفع عيونه الها ويباوعلها بنطرات بارده وجامده ومستمر يمسح على شواربه

وكفت كدامه وهي تحجي بعصبيه وتبجي وتشهك ... لووو اني لو عمتك الحيه ومرة ابوك العكربه اني ما اكدر اعيييش وياهن ذن الحقييرات لو اني لو هنه وانت اختااار

هو جان يباوعلها والجمود مكتسي ملامحة وشاد على شفايفه بقوه

كملت كلامها وهي تنحب وتبجي ... عمتك هااااي اكبر حقيره هي ساس البله اكبر كلب

وكف كدامها وضربها براشدي طيير ملامح وجهها على اثرها وكعت على الطاولة وتكسرت التحفيه الكزاز على راسها وهي صرخت بصوت عالي هز جدران البيت وعياطها يجيب التايهه

كونوا انتم كونوا بخير .. احبكم 💔

هااااا شو من خليت البارت حسب التصويت ظليتن تصوتن شكد حيايه 🌚🌚🐍🐍🐍