رواية #وكر الأشتر الفصل الثاني وثلاثون 32 - بقلم الكاتبه سمو العراق

بارت ٣٠
رواية وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

السواد الأعظم من الناس يسقطون بسهولة أكبر ضحايا لكذبة كبيرة وليس لكذبة صغيرة.

غلسوا على السحك لان كتبته سريعً💔🌚

....................

رنا

شكد اكو ناس استغلاليه وناس تستغفل ناس بحيث تداري مصالحها على حساب غيرها

الي عرفته من حنان ان ايو ابد مدتطلع من غرفتها وهي باجر اخر امتحان الها والله شنو عندها امتحانات وتقره ما تريد واحد يزعجها وقافله الغرفه وكاعده

حجت الامها موضوعها الضامته عن الكل كالت .. شحجي وشكول هو اني غير من اول امتحانات فصلوني هاي السنه

امها تخبلت لزمتها وهي تحجي بخفوت .. شنو ولج شلون يمعزايه شلون فصلوج

تنهدت وهي ترد على امها ... غير لزموني دا اغش وعندي برشومة وطلعوني وبعدين من طلعوني اخذوني للعماده وكتبوا بيه كتاب وفصلوني

امها تخبلت .. عزااا بعينج كووون صخام الصخمج عود انتي ليش ما تقرين ليش تغشين انتي مو نهار كله كاعده بالغرفه ليش ما تقرين شلون بيج اني

جرت نفس وجاوبت امها ..اهووو ماما انتي دتواسيني لو تلومين عليه يعني فوك ما اني مقهوره وضايجة وضاع مستقبلي ومفصوله انوب هيج تحجين

امها بغضب .. يعني ذيج السنه سويتيلج سالفه وفصلوج وما كعدتي راحه انوب هسه تغشين بله اني هسه شكول لعيالج شكول لابوج مدكولين شلون اتصرف يعني انتي ناويه تموتيني شحنكول لزوجج

جاوبتها .. اكوله نجحت وبعدين اشوفلي طريقه اداوم بيها حتى لو بس على كد الامتحانات

امها .. وكوثر تدري بالموضوع

ردت على امها ... لا متعرف لان اني امتحنت جوه بقاعة المختبرات وهي فوك بالطابق الخامس ومن لزموني بس طالبين جانوا لان كلها طلعت واصلا ميعرفوني

امها بحسره وتنهيده .. اي لا تنطين سرج الها اخاف تلزم عليج لزمة وتظل تهدد بيج بس انتي الزمي عليها حتى ما تكدر تفك حلكها ولا تحاول تاذيج فاهمه

ضحكت ... ههههههه ولا يهمج ماما تربيتج ربطتها بثنين شبكت لحية بلحيه

امها بشك .. بس باعي خليج عساس انتي تدرسين وتقرين لا تطلعين من الغرفه محد يستاهل تنظفيله خليهن هن خدم الج تمام مامي

جاوبت ..يس مااامي اصلا لا توصين عود الشخاط ما اشيله ويطبهم الف مرض خليني بس شويه استقر واخلي كريم يشيل يم بيتنا حتى اصير جوارينكم

ضحكت .. اي عفيه بنيتي الاعرفها باعي ديري بالج على روحج ولا تخابرين بكل مكان واحذفي المكالمات حتى محد يلزم عليج مستمسك تمام امي

اجت فافي مدرعمة هن من شافنها سكتن وغيرن الموضوع كالت فافي .. هااا خاله شنو تردين ترحين لا بالعباس ما ترحين تتعشين يله اليوم نريد نذوگ طبخ ايو فدوه العينها مبينه معدلة عليج

طلعت اني اباوع عليهن مصدومة منهن ايـــــــــو عقجت ملامحها من سمعت بالطبخ كالت .. اني ما اعرف اطبخ لان جانت عدنا خدامة او نجيب من المطعم وهكذا

وبعدين هماتين ما اكدر اشتغل لان باجر عندي امتحان ولازم اكعد اقره

ضربتها افيان بمزح .. دمشي امشي ولج حتى لو تشوفين باليوتيوب لا اصلا انتي ناااادره مبينه يا سبحان الله سيماهم في وجوههم

عفتها تحجي وياها واني حليت ورحت للحديقه افكر بالموضوع الصار شنو شسوي والله عجيب اني صح قررت احجي الكريم بس مشكلة ما اكدر اخاف يكولون عليه منافقه والله صعب احجي ما اكدر اخلق مشكلة بين ثنين متزوجين وبعدين هاي مشاكل شخصيه صح مستغله بيها بيت جدو بس صعب ما اكدر

قررت احجي لافيان لان فافي شويه جريئة يمكن تكدر تسوي شي واني اطلع من ذمتها استغفر الله يارب الف استغفر

ظليت بحيره احجي الكريم لو اسكت اخاف احجي وتصير مصيبه بله كويثر وموضوعها وياها ما الي شغل بيها هي عندها عقل ولازم تفكر بيه ولازم تعرف عدوها من صديقها اني ما الي شغل بيها

شفت جيهان من بعيد اجت ضحكت بوجهي واجت كعدت يمي بالحديقه كالت .. شو كاعده لوحدج خير ان شاء الله

تنهدت بحيره .. والله ما اعرف شنو اكولج بس بصراحة سمعت موضوع حيل ضوجني حسيت العالم غافله

عقدت حواجبها باستغراب.. خير ان شاء الله شكو ؟

باوعتلها بارتباك .. مرة كريم مفصوله من الجامعه من اول يوم امتحان وهي مستمره تكذب عليهن عساس هي تدرس ومتطلع من غرفتها هيج تتحجج اني سمعتها بس شنو اخاف احجي الكريم وتصير مشكلة

جيهان ... لا عيب لا تحجين خلي هو يكتشف بنفسه لان اذا حجيتي هاي تعتبر نفاق وهاي مشاكل شخصية شدخلنه بيها

سألتها.. يعني ما تنصحيني احجي

هزت راسها بنفي.. لا يمعوده شلج بالمشاكل صدك جذب مالج شغل

دخل عمو كريم من الباب الرئيسي ظلينه نباوع عليه

ضحكت جيهان كالت .. لو فافي تعرف بالموضوع جان هسه عمو كريم ما عتب باب البيت اذا ما صار عنده الخير

ضحكت .. ههههههههه فافي كارثه مصيبه شكد وكحه ولسانها طويل

.................

سولين

من بعد ما الاشتر صار زين شويه جنه كاعدين بالبيت الجديد الي يثير الشك بصراحة ما ارتاحيت لهذا البيت ابد مو مثل ذاك البيت مريح

شويه واندك الباب راح هو فتحه جان بعده موجوع وجرحة ما طاب دخلت سالي و وياها اختها وبعد وياها ثنين زلم بس ضخمين وبينين حوك

اني ختلت بالمطبخ من شفتهم سلموا عليه وتحمدوا اله بالسلامة ودخلوا جوه بالاستقبال

شويه وهو اجه للمطبخ باوعلي كال .. بوية سويلنا جاي اذا متصير زحمة

جاوبته بلطف .. لا ولو تدلل رحمة

ابتسم على كلامي ولطفي وخله وراح سويت جاي بسرعه وگلبي يفور من جالي وصلت للباب ودكيته انطيته اله اخذه بيد وحده ودخل

حطيت اذاني واني استمع الهم شفت الوظعيه تعبانه ظليت اباوع عليهم من زرف الباب

شفت واحد ضخم اسمر حييل وشواربه ثخان كال ... تم القاء القبض عليه وبعد الكتله اعترف ان مو هو وره الاصابه الي صوبك هو ساهر وتحسين حسب كلامة هو

رد عليه الاشتر .. سويتوا عليهم القاء قبض؟

تنهد الرجال جاوبه .. طالعين خارج المحافظه بس اكيد وصينه السيطرات والدوريات بس تظل شهادة عامر ضئيلة بسبب عدم وجود ادله كافيه وعدم وجود شهود

ردت سالي .. عائلة عامر جانت موجوده بمكان الحادث ويكدرون يشهدون لصالح عامر

فتحت عيوني مصدومة .. عزااا يعني ابويه هو بالسجن ومتهم بقتل الاشتر وانوب يردون يفرفرون أخواتي بالمحاكم والمراكز من وره ابويه لا والف لا مستحيل اقبل الاشتر يخلي اخواتي يدخلن مراكز

هو جاوبها وهو يتنهد ويرك اصبعه على طرف الاستكان .. سالي اني اريد عائلة عامر خارج اللعبه لان انتي تعرفين كلش زين شنو يعنون الي البنات واخوهن وهن اخوات مرتي يعني عرضي ما اسمح بهيج شي ابد

جاوبه واحد منهم .. مو حتى تربح القضية لازم يكون شهود

بلل شفايفه بحيره وتنهد .. البنات امهن رايحة ما اريد يتعذبن اكثر ويجرجروهن بالمحاكم خلي نشوف حل خلونه نفكر

اخت سالي كالت .. زين يكدرون ياخذون اقوالهن بعيدا عن المحاكم والمراكز ؟

جاوبتها سالي ... لا غير يصعدون محكمة شلون هيج وبعدين لازم اقوالهن تتصدق عند القاضي

الاشتر بنفي ... لا لا الغوا هذا الموضوع بعدين اني عندي حل وان شاء الله خيير

واحد من الاشخاص الموجودين كال ... السلاح بيد سوادي وديتهري لذلك لازم تستغل الناس التشتغل وياه وتصدره لهنا وهاي مهمتك انت حتى بعدها نعرف وين نصرفه

الاشتر .. ان شاء الله ظليت اشتغل على هذا الموضوع وان شاء الله كل السلاح راجع بس ينراد وقت وحتى من انقلت من ذاك البيت هو بسبب موضوع السلاح لا اكثر ولا اقل

وكفوا ثنينهم وحجوا وياه كالوا .. تمام احنه نترخص وان شاء الله نظل على اتصال

من شفتهم وكفوا خليت وانهزمت للمطبخ وهم طلعوا وبعدها هو رجع هذن يأجوج ومأجوج ما راحن ظلن كاعدات

غسلت وجهي وخليت مكياج وبدلت صدك عندي مكياج شتريته بعرس عمو كريم

دخلت سلمت عليهن وهن ردن ببرود كعدت يم الاشتر واني احجي بحزن ... هااا عيني سوده عليه شلون صرت

هو باوعلي مصدوم وهن يباوعلي بسخريه كتلهن .. متت من القهر من الاشتر تصوب تدرين سالي حتى ما شفتج ولا شفت طولج حتى صفاء كال اجت سالي للمستشفى كتله وين ما شفتها

ضحكت بسخريه .. ههه اي صح مشفتيني بس تذكرين من اجينه نتعارك كدام باب الغرفه وانتي تردين تدخلين عنده

رفعت عيوني بتفكير.. يااااا هاي انتي واني عبالي الفراش الي بالمستشفى

رفعت حاجب وباوعتلي بتحدي كالت وهي توجهه نظراتها للاشتر ... عامر ابوها مووو

اردفت بخبث .. ما اعرف شنو من انسان هذا شنو من حقاره يعني كل سالفه عوجة مسويها وتعرف طلعت حتى المزرعه لاختها نص حقها وهو ماخذها شنو هذا شنو من عائلة

ارتعبت من كلامها فعلا هو صحيح  بس شلون حقيره تعيرني بفعايل ابويه وتبين ان السبب بأزمت الاشتر ومرضه هو ابويه الي لازم يكون سند اليه ولازم افتخر بيه

جرحني كلامها وما عرفت شلون ارد عليها

بس تلافه الموضوع الاشتر وهو يكولها ... لا هو انضحك عليه واصلا مو هو الي رمه الي رمه تحسين وساهر وفروها عليه ان شاء الله يطلع

وكفت اني متعصبه ... لااااا اذا هو عنده ذنب خلي بالسجن وخلي ياخذ استحقاقه اذا ابويه او اخويه اي شخص مو ادمي وما راضي ربه وهو من نسبي فهو مو عار عليه عار على نفسه ويتحاسب ويتحمل نتيجة افعاله

سالي ضحكت.. هههه ليكون ضجتي لان ذكرنا ابوج وافعاله التافهه ترا هاي حقيقتة ما نكدر نجملة

جاوبتها من بين اسناني ... لا ما ضجت ولا رااااح اضووج تمام ولا مطلوب تجملينه انتي اهتمي بنفسج وكعدي ببيت اهلج وعوفي العالم الوحدها

صاح الاشتر بصوت غاضب .. كااااافي لا تحجن سوليين روحي وانتي سالي هم روحي

باوعتله بخيث وحقاره كالت ... والله بصراحه ما اعرف شلون الها نفس تدافع لابوها وهو قاتل امها بقضية غسل عار

فتحت عيوني مصدومة موعوبه من كلامها بهتت ملامحي وشحب وجهي ما عرفت حتى ارد عليها كلامها ياذي حسيت دموعي وكعن من دون سابق انذار

هو ما قبل عليها وصااح بيه ... سااااااالي اطلعي برااا

ضحكت .. تمام عيني نتواصل

صرخت بصوت عالي بوجهها واني اتذكر موقف قتل امي ... ياااا كلبه يا حقيره يا حيوانه ان شاء الله غسلوا عارج ام الزلم ام الولددددد

هي تخبلت ... اكلي نعل ادبسز بنت المجرم بيج خير روحي لابوج العار

الاشتر تخبل ظل يغلط علينه ثنينه وطردها وكسر الاستكاين والسراحيه والكلاص كمزت من مكاني وظليت اابجي وهو يغلط ... بنات الكلب بنات النعال عبالك مو رجاااااال اني هنا عبالك رجل كرسي

لزم عمليته بوجع ومن كثر حركته واعصابه نزف دم وكعد على القنفه والتلم واضح على ملامحة

سالي حجت بخوف  وهي تتقرب منه بحذر .. اني كولش اسفه

باوعلها بعصبيه... اطلعي براااا

سحبتها اختها وطلعت واني جنت واكفه وابجي باوعلي بعصبية وحده .. انتي شلون بيج تصرفاتج هاي الطفوليه شووووكت تبطليها من تشوفين قندره سالي شكووو تجين لو تموتيين على المشاكل

بجيت بحزن وعطت بصوت مخنوك .. ما شفتها شلون تعير بيه شلون تحجي عليه وانوب دكول كتلو امج غسل عاااار اني كووه انسى الموقف وهاي الحقيره الكلبه تذكرني

رد عليه بحده .. انتي لبديتي انتي السبب لا تسوين المشكلة وتكعدين تبجين بطلي سوالفج كتلج لبنيه عندي شغل وياها خليني اخلصه على خيير

اشرت على نفسي مصدومة .. يعني طلعت هسه اني الغلطانه وسالي ابد مغلطت تمام شكرا واني اسفه واعتذر وبعد اذا شفت ركعة وجهي تعال واضربني بالنعال

وكف والدم ينزف كال بحيره وعصبيه.. يعني اني مريض وانتي هذا اسلوبج انتي شنو ليش هيج انانيه ما تحبين بس نفسج عادي عندج اموت انجلط اروح بستين داهيه عادي ؟ وهذا الكدرتي عليه ما تشوفيني وجهج يعني فوك همي تزعلين وترديني اشيل همج

كعدت على الارض واني ابجي .. يعني عجبك الي صار من قبل ما تجي مو جنه سعداء انت تحبني واني احببك

تقرب مني وكعد ركبه ونص ولزم ايدي همس بحنان .. تحبيني

رفعت راسي ومسحت دموعي.. يعني حلوين مع بعض ماكو مشاكل هي هاي تجي حاصره روحها تسوي مشاكل

كال بحنية .. بس انتي هم مو قليلة شر وتسوين مشاكل

جاوبته .. اي صح بس شويه مو هواي مو مثلها هي حيل حقيره ومستفزة وتكرهني

بلل شفايفه وتنهد كال .. شوفي بنيتي هذا سر بينه حتى بعد تبطلين تغارين من سالي

كمزت من مكاني .. شنووو شنووو اني اغار من جالي لاااا انت فاهم غلط اني اجنن احلى منها واخلاقي احسن منها وساتره روحي ماكو شي يخليني اغار منها

ضحك كال .. اعرف بس اقصد مستغربة علاقتي بيها واني راح افهمج طبيعة شغلها هاي ضابط برتبة ملازم اول

فتحت شفايفي مدهوشه من كلامه ... عزااااااا جالي ضابط لعد انت شنو انت مره كلتلها جندتج انت شنووو ؟

رد عليه بضحكة... هههههه لا يابه اني انسان عادي بس استفاد منها بهواي امور هيج شي

باوعتله بشك .. ما صدكت

رد عليه .. سالي ضابط مفصول

رفعت حاجب ... انووووب سالي ضابط مفصول ؟

ضحك.. هسه عوفينا من هذا الكلام عرفتيها اسكتي منها تمام

جاوبته بعناد ... لا ما اسكت منها تستفزني استفزها تضربني اضربها وهكذا

تقرب مني وباس شفايفي كال .. ميخالف تروحلج فدوه بس كون انتي بخير

ابتسمت .. بخير بخير صدك عيني سوده عليه شلون صرت جرحك لسه ينزف

عض شفته بحقد .. شكد عياره وادبسز جا قبل شويه تتلوين جنج حيه وهي سودة عليج

ضحكت .. صدك وين الحيه مالتنا الصدتها

كال .. اهو بعتها وراحت

باوعتله بشك واتصل موبايله بسرعه هو فتح خط وابتعد عني دخل للغرفه المقفوله وظل يحجي بيها وما سمعت منه اي شي  الظاهر عرفني اتصنت واجمع كلام بس ما عرفت شنو هذا الانصال وليش راح عني

بنت الكلب سالي شعرفها امي قتلها ابويه معقولة لان ضابط تعرف زين هو ابويه حتى ما انسجن وحتى ما اعتقلوا معقوله يعني الاشتر هو الي گلها عن امي اذا صدك هو والله ازعل وما احجي وياه بعد

..................

جيهان

جنه كاعدين يم بيت جدو ضوجة حيييل حيل ضوجة ببيتنا احسن هاي ايو تطلع بس وقت الاكل عساس عندها امتحانات وحوثر تقلدها وظاله بس حنان تفتر علينه

عمو كريم مموجود طالع ونخابر على رجل سولين ياخذنه ماكو ميفتح خط ويطلع خارج التغطية

ام حسن صاحت على فافي كلتلها.. فافي تعالي اغسلي مواعين بعد بيبتج ردت عليها بمكر ... ياااا صدك جذب بيبي تردين تطبقين مقولة الخطار لو يكرب لو يهرب هههههه وداعة ابوي  جان غسلتهن بس ايدي انشكت بخيط الحفافه وشوفي هاي حاطه لزكة

كملت كلامها .. و جيهان متعيني عليها البارحة ليل كلة ما نامت من ايدها تبجي واني كاعده اخرط بيها متعيني من الحفافه ما تشيلها والعباس بس تطيب ادللي كل شي نسويلج

بس هسه روحي كعدي جنتكم ايـــــــــو وذيج حنونه ام عطوب الصفر وكوثر الكرادية وخليهن يغسلن ترا عيب الخطار يشتغل هاي مو من شيم الشيوخ

ردت عليها ام حسن .. دهر صابج كون ابتليت كتلج اغسلي المواعين عمي اعتذر اني اغسلهن

جاوبتها بقرف .. وشنو عود اذا كلتي اني اغسلهن راح يصحى ضميري واكول لا خطيه اني اغسلهن لا بالعباس ولا يصحى لان بيبي بصراحة ولو تزعلين مني بس تستاهلين

كرصتها حيل اريدها تسكت وبيبي باوعتله بصدمة... يا ولج ليش استاهل

ردت بقهر .. والله لعد شنو عندج تلاثه بالبيت وحدتهن حيلها حيل ابو قاط الرصاصي وانتي كاعده تغسليهن مواعين لج بيبي صيري نجره وادخليلهن بالماسحة كسريها على روسهن وروس الخلفهن واسحليهن سحل

كملت كلامها .. جايتني تعالي اغسلي مواعين وباجر من يوزعون ورث محد يذكرني يروح الايو وحنان وكويثر واني اغسل الهن مواعين تهي بهي

طلع كريم من غرفته  وهي سدت حلكها بعدها حجت .. فدوه عمو اخابر على نسيبي الكفو شو ماكو ؟متعيني بس لا صار بيه شي وداعة ابوي وكعكاته انتحر

ضحك كلها .. ههه ما بيه شي لا تخافين عليه نجر نسيبج

امين جان كاعد يلعب بالمكعبات اشرتهن اله ام حسن واني خليت ورحت للمطبخ غسلت المواعين البيبي كالت .. فدوه اروحلج يمه احسن من ذيج اختج ام لسان

جاوبتها .. انتي مثل امي ويعز عليه اشوف مره كبيرة مثلج تشتغل واني نايمة

تنهدت .. اي وذنيج البرابيگ كل من لفت راسها ونامت وهاي حنانه مخبثه من اجت ايو لحد الان

رديت عليها.. اي لان بس هي تشتغل فحقها تضوج هي تخدم والعالم نايمة انتي لازم تعدلين بينهن وقسمي الشغل حتى ما تصير مشاكل

جاوبتني بتنهيده ... ايـــــــــو ما تقبل يتقسم الشغل

سكتت مجاوبتها وظليت اغسل بالمواعين هي طلعت اخذت تفاحة وكعدت على الكرسي وتباوعلي شلون اغسل كالت .. متعرفين تغسلين غسلج مو نظيف

ضحكت .. دامج هيج نظيفه تعالي اغسليهن لو بس اكلتي وانهزمتي وظلت بيبي تغسل وهي مره كبيره

دخلت فافي .. اي والله شكد عيب عليجن محد تنظف وصاختها مثل البهايم تاكلن وتكومن

رجعت تكرط بخيارتها وتباوع بطرف عينها شويه واسمع ضجة وهوسه طلعت من المطبخ شفت عمو كريم وياها واحد وهو يصيح .. لحد تطلع ادخلن جوه

باوعت من شباك المطبخ شفته شرطي واكف وهو يحجي ويه امين فتحت عيوني مصدومة ومرعوبه هاي ليش ديحجون ويه اميين

لزمه الشرطي ومشه بيه مسافه عدلت حجابي وطلعت اركض صحت عليه ... وييين ماخذينه امييين اخويه وين رايح تعال جيبووووا اميين تريدون تسجنوا

ركض عليه كريم وهو يهدي بيه .. شبيج عمو على كيفج ماكو شي مجرد استدعاء وشهاده

صرخت بوجهه ودموعي تجري ... شهاااادة شنو طفل هذا وينه وين الشهاده صدك تحجي ما يرررروح ما يروح شلون اخويه لا تردون تسجنوا

ردت عليه بيبي ام حسن .. وين اكو طفل ينسجن انتي شتحجين شبيج بيبي اهدي

باوعتلها برعب وروح ملهوفه ... لا شنو اهدى سجن الأحداث هناك ياخذون الاطفال بيه

تقرب مني عمو كريم وهو يحجي ويايه بهدوء ... لج عمو شبيج والله محد ياخذه مجرد استدعاء اني اروح اخذه بيدي وارجعه بيدي مجرد يشهد ويجي

عقدت حواجبي باستغراب.. يشهد على شنو

جر نفس .. عمو حبيبتي .. يشهد ان ابوج ما رما بالمزرعه وجان وياه ثنين اشخاص الي هم ساهر وتحسين

قلصت عيوني ... هو منو رفع دعوه على ابويه ؟

رد عليه بتنهيده .. الاشتر

فافي بفرحة .. صدك عوود نسيبي الكفووو يبعد عمري شكد احبببه ابو طبرة دولة وعلم تاج وباج اذا يريد حتى اني وكل زبوناتي نشهد وياه يدلل نسيبي

ضحك كلها .. لا ماكو داعي هو بس امين يشهد وهذا هو

سالته مستغربه .. بس هو طفل شلون يعني يشهد اشو السالفه ما تدخل بعقلي

رد عليه .. يعتبر شاعد عيان يعني شاف بعينه تحسين وساهر لو لا وبس هيج لا تخافين لو اعرف خطر عليه والله ما اخلي يروح

جاوبته بتوسل .. فدوه دير بالك عليه اموني فقير وما يعرف شي

سحبتني فافي وهي تحجي ويه عمو .. روح عمو روح اخذه خلي الولد تصير عنده جرئج حتى يصير رجال خو ما مخليته يمي اني وزبوناتي كل سوالفنه بالهلس والخلطات

ضحك عمو كريم ودخلنه جوه واخذ اموني وراح واني كلبي نار عليه خطيه اخويه ما يفهم شي سوده عليه صغير ويخاف من الشرطة من شافهم صار وجهه اصفر

مر تقريبًا ساعه واجه عمو كريم هو وجاسم واموني اخذته منه وحظنته هو كال .. ها مو كتلج بس يشهد وارجعه شبيج تخبلتي

جاوبته بخوف .. والله اخاف عليه خطيه بعده صغير ويخاف

باوعله وكال ... لا اموني سبع شهد بالحق وظاف للمحكمة نقاط مهمة لصالح القضية وان شاء الله كسبانه

افيان بحماس... ان شاء الله لصالح نسيبي الكفو تروحله فدوه اختي ؟

ضحك كلها ... ان شاء الله لصالح نسيبج الكفو

اجت ايو مبدلة كلتلها .. عمري يله دنروح مو كتلك ماما عازمتنه

وكف كلها .. بس اسبح ونروح

هو خله وراح وهي كعدت رجل على رجل وظلت تگلب بموبايلها وبعدها اتصل الموبايل وخلت وطلعت برا تخابر وبعدها هو طلع من الغرفه سابح ومبدل وخله وطلع

اني الحمدلله دا اتغاضه عنه مو مثل قبل مخبله بيه لا ركدت الحمدلله بعد ما افكر بيه هلكد

..................

افيان

رجعت للبيت اني وجيهان الفاهيه موتتني مال الزمها واشمرها بالزباله لان فاااااهيه تعل الكلب بس صافنه مال راشدي اصحيها على زمانها

كلت مثل ذيج المره نستغل الوضع عامر بالسجن واحنه نحف ونكط ونهلس ونجمع فلوس والله ماكو احلى من الفلوس تخبل وليكول وسخ دنيا هو الوسخ

خليت جيجي بالبيت واني خليت وطلعت رحت للسوك اني واموني ما شاء الله خبطاتي تجنن ومعروفه فافي الحفافه ام الخلطات منين تجيني العالم من اخر الديره

رحت امشي اني واموني جبت مواد الخلطه من مره اسمها ام زينب ورجعت امشي وشايلتهن وافكر شلون اخليها تصير هواي احط نشا عليها شلون يربي

باوعت شفته كدامي اني ما اخاف بس مرات هذا الشخص يثير القلق بداخلج
جان لابس قميص سمائي وبنطرون اسود ويفر بسيويج السياره و واكف مرتجي على سيارته

كملت طريقي ومشيت من كدامة عبالك ما اعرفه استوقفني صوته وهو يكول .. بسبس بسبسبس بسبس ميوو

درت وجهي عليه .. الله على التافهه انت شتريد متكلي كل ما اروح للسوك اشوفك كدامي

تقرب مني وهو يحجي .. اريد تحفيني

باوعتله من فوك ليجوه .. ليش انت مره واحفك

فتح عيونه بعصبية .. لا تتجاوزين ولج لا بالقران هذا لسانج اكصه وخليني محترمج

جاوبته بسخريه .. وااوو ما شاء الله محترمني هو انوب يكص لساني هو انيابوي عامر ابو المشاكل ما كص لساني تجي انت تكصه

كال بتغاضي .. هسه عوفينا من هذا الكلام وخلينا نحجي

تخصرت .. وشنحجي بله

حك شاربه ورد عليه ويباوع بنظرات سخيفه .. انتي حلوه شكد عمرج

جاوبته بحقد وقهر .. افهم منك واعقل منك واصغر منك

باوع يسرى ويمنى وهو يامن المكان .. من ضربتيني لحد الان وانتي ببالي

ضحكت .. هههههه والله ضربه دمك بطولك خليته بس شنو متت ضحك شبسرعه وكعت شطولك شكدك تكومت جنك شايب بالتسعين

عض شفته وهو يباوعلي وطك رقبته باجرام .. عاجبتني

باوعتله بنص عين.. عشتوو عاجبته عباله ما اعرف دروبه تريد تنتقم مني لان ضربتك لك عيني اني فافي الحفافه محد يضحك عليه هسه لو مو اعجبك لو توكع بغرامي ما تهز شعره من شاربي

ركز عيونه على شفايفي وهو يكول .. هاي شنو عود حفافه وخابصه روحج وبدكير ومنكير واجلط واهلس وتاليها شواربج اطول منج وسفه عليج

جاوبته ... اي شفت ماكو زلم غير نسيبي فقررت اربي شوارب

رد عليه بنظرة سخيفه.. وليش الزلم بالشوارب مو حتى الصراصير عندها شوارب

مشيت عنه ورديت عليه .. گول لروحك شدخلني اني

صاح عليه واني امشي .. ممكن الرقم حتى نتواصل

جاوبته بعدم اهتمام .. روح تواصل ويه جدتك بالكبور

ضحك كال .. اروضج ان شاء الله

درت وجهي عليه وباوعتله بقهر .. خو انتم الزلم مخلصيها اروضج واروضج شنو صخول احنه لو حصونه دطييير كوة ينسبون المره للحيوان وحيدين القرن ان شاء تنقرضون

عفته ورحت واسمع صوت ضحكته الرنانه بالقران لو ما اخو نسيبي الا افضحه فيضحة والم امة محمد كلها عليه

دخلت لكيت جيهان تحف وكلها بالدين فد فااااهيه على يوم انجلط من وراها عاد اني لزمت الباب وما خليت اي وحده تطلع واخذ منهن كلهن فلوس ورجعت بعت بقية الخبطات بالقران ناس ما يجي وياها الطيب والفقير ياكلوه اذا ما تلعلع وعرك ينوكل حقنه

.....................

سولين

صار عنذي شك من ناحية الاشتر بحيث هو يدخل للغرفه هاي ولا ساعه ولا ساعتين مرات يطلع بيده قطرات دم لو بقميصه ومن أساله يكول عمليتي نزفت بس اني شك بداخلي فضيع

طلعت من الغرفه ولكيته كاعد هو وحجي اديب بالاستقبال وهو يحجي وياه كله .. شنو شوكت تشتغل على زينب وزهراء

جاوبه الاشتر بتنهيده .. ان شاء الله بس تجي المدارس لان ما اكدر التقي بيهن الا عند طريق المدرسه

حجي اديب .. ومصطفى شلونه

اشتر بغضب.. الحقاره تمشي بدمة ومتحلف بيه اذا ما كسرته فلا اطلع الاشتر

حجي اديب .. لا بويه لازم تكسبه لصالحك وطول بالك عليه واصبر حتى لو تعبت بس هذا من لحمك ودمك هذا وصية امك مظلوم مثلها وحاقد ميخالف حاول تكسبه اكثر

تنهد الاشتر .. تعبت حجي هذا ما ينصلح عايش بارات وعرگ ونسوان وراحة بعد شلون ينصلح وشلون يرجع الي

حجي اديب بحزن .. لا تشوفه هيج هسه تلكاه شايل هموم الدنيا كلها على راسه وما مرتاح ابد شعبالك اليشرب والينام ويه النسوان والمبتعد عن ربه هذا مرتاح ؟ لا بويه ما مرتاح وحتى روحة هايمة حاول ولا تيأس

جاوبه الاشتر بجمود وهو يكول .. سجنت ابو مرتي وخليت ساهر وتحسين بالدعوه

حجي اديب .. الي يشب النار لا يزعل على دخانها طبهم مرض يستاهلون

نفخ الاشتر بضجر .. جنت عبالي الكيد بس للنسوان من انذكر بسورة يوسف ان كيدكن عظيم وتالي طلعت غلطان الزلم كيدهم كيد

جاوبه الحجي بايمان .. واذا تكمل السورة راح تشوف مكتوب بسم الله الرحمن الرحيم ولا تقصُص رؤياكَ على إخوتِكَ فيكيدوا لكَ كيدا ] بحيث اجت كيدا مفعول مطلق وهاي الايه تثبت بشكل مطلق كيد الرجال واذا المراة كادت اليوسف من كد ما تحبه اخوته كادوا اله من كد الحقد وشوف الفرق !

يا الله شكد احبه هذا الانسان شلون مؤمن وفعلا يفتهم الحمدلله الي خلاه بطريق الاشتر

كمل الاشتر كلامة وهو يكوله .. واني ناوي على الكيد

جاوبه الحجي وهو يكوله .. شناوي يبوووك ؟

نفخ بضجر .. زياد وجياد اولاد تحسين هم احقر من الحقاره لعبوا بعقل جدي وهو مريض وخلوا سجلو العماره باسمهم وبمساعده ساهر وتحسين اكيد وهم يشتغلون بالسلاح بس المشكلة ما اعرف ويه منو يشتغلون

فهذا سوادي جافص يم عايد وكايله ابيع سلاح ومدلي وطلع وياهم اريد اامن عليهم من الجماعه الي يشترون ويهربون السلاح منهم وبعدها ابلغ عنهم اريدهم اربعه ارهاب لان هم يهربون سلاح لجهة ممعروفه لاسرائيل لداعش الله اعلم تدمر البلد من وراهم

جاوبه الحجي .. خوش بويه واي شي تحتاج اني حاظر اذا تريد فلوس تدخل وياهم شركة عساس هم ادزلك

رد عليه ..لا يابه مشكور والله عندي

حجي بمزح .. بيع ذهبات المره هههههه

اشتر بضحكة .. هههه ما عندها ان شاء الله اشتريلها ما انطتني مجال اشتري الها وترا لسه مخطوبين بنظرها

وكف الحجي وهو يكوله بضحكة .. خوش من تعرسون اعزموني

الاشتر .. ههههه تتدلل ان شاء الله بس اخلص من همي اسوي احلى عرس لسولي

تنهد الحجي وكله .. ان شاء الله تستاهل بنيتنا الحلوه العصبيه

ضحكوا وبعدها طلعوا اني خليت ورحت جان الوقت باليل رجعت الغرفتي اتصنع النوم واريد اعرف هو هاي الغرفه قافلها شبيها وليش بس باليل يدخل الها ومن يطلع امره عجيب ومرات اسمع صوت مقاصه واشياء حاده شنو هاي

كلت اليوم لازم اكتشف شنو فاستدعيت النوم وهو دخل شافني نايمه غطاني وباسني براسي ومسح على شعري وطلع من طلع ظليت مراقبته اباوع عليه من الباب شديسوي وبعدها راح بتجاة الغرفه

فتحت الباب بحذر وطلعت وراه حسيت بالباب انقفل والكيلون تحرك حلو قفل الباب عليه

تقربت اكثر واني امشي على اطراف اصابعي وبحذر باوعتله من زروف الباب شفته فتح الديلاب الحديد وهو يطلع منه باكيت ولبس جفوف بيض بلاستيكية وعدلهن وبعدها طلع بطل صغير ابيض جنه بطل الديتول وخلاهن على الميز كدامة

بسرعة وجهه نظراته للباب وصار مقابيلي اباوع الطوله وهيئته فد شي هيبه لابس ساعته بيده وقميص اسود وبنطرون اسود وحزام اسود كذلك هلي يمكن لابس اسود حتى ما يتدمر

لان ما جان يلبس ابيض او رصاصي يدمر بسرعه واني اكتشفه واحقق وادقق فلبس اسود

سحب الميز الي كدامة من يم الباب وصار مغطه بالحايط بحيث ما اشوفه شكد خبيث حتى ما اشوف عزا بس لا شافني

ظليت احوس منا ومنا دا اريد اشوف بعدها مشيت خطوات وما احس اله بواحد لزمني وقيد مقاومتي وحظني حييل ظليت ارجف ورجليه ماتت من الهبطه صرخت بصوت عالي.... يممممه

نهاية البارت .. يتبع

كونوا انتم كونوا بخير .. احبكم 💔

ولجن ليش ما تصوتن شلون اهد فافي عليجن بطابوكة بعد النشر يعتمد على التصويت 🌚🌚🌚💔

.....................