رواية #وكر الأشتر الفصل الثالث 3 - بقلم الكاتبه سمو العراق

البارت الثاني..
رواية.. وكر الاشتر
بقلمي.. نور سمو العراق

💔💔💔💔💔💔💔💔
••
لا يـزال
الله يـنقذني فـي كـل مـرة ظـننت أنـها الـنهاية. . 🖤'

........................

بعد ما التفت عليه شفت ابويه كاعد بسياره وهو يباوع للگدام جان كاعد بالصدر وبصفه السايق جانت سياره عاديه نوعا ما مجانت نظرته علينه بس بثواني الرجال الي كاعد بالصدر باوعلي بنظره زلزلت جسمي من الخوف ما كدرت اسحب انفاسي وبسبب خوفي من بابا حتى ما كدرت انطق بحرف واحد

هو باوعلي وقلص عيونه وعقد حاجبه كأن يعرفني ركز بيه ثواني وبعدها شخط السياره بسرعه جنونيه مثل البرق بحيث فزيت من مكاني من السرعه والشخطه بلمح البصر هو صار بالشارع الثاني

ومن صوت الشخطه والسحكة فز حارث وهو يفتح الجام وصيح ياكلب يا حيوان شكد ما يستحي بله طلع طفل كدامك اكو واحد هيج يمشي

عطت بي واني ارجف .... اششششش اسكت ربك وشخط السياره بابًا جان كاعد بالصدر نزلني بسرعه

فتحت عيونه مصدوم كال.... هاااا شنو انتي شدتحجين

فتحت باب السياره واني اجمع بملازمي وگلبي يرجف... نزلني نزلني همزين ما شافني بابًا جان موتني والله شكتلك حارث جان عميت عليه وخليته ذبحني كلتلك بعد لا تجي

رحت اخذت الملازم واركض بسرعه وكلبي يرجف والدمعه بعيني والله ابويه ابد ميتفاهم وخاصه اني محاربني لان ادرس وماما تاخذ فلوس المستشفى ما تنطيهم اله تنطيهم للمعهد وهو متخبل من دراستي لهذا السبب

اباوع الاديه ترجف رجف مو طبيعي ورجليه گوه عانني و ومشيت بيهن ما شفت نفسي الا اني بباب بيتنا والسياره بباب بيتنا الي شفتها بلعت العافيه

دعيت ربي الف مره كون الباب مفتوح اخاف ادك الباب ويطلع بابًا انوب يظل يغلط عليه حطيت ايدي على وجهي واني اخفي توتري دفعت الباب انفتح حمدت الله الف مره وشكرته دخلت بسرعه اركض للغرفه

واسمع صوته هو والرجال الي وياه ذاك يحجي بهدوء وبابا يحجي بصوت عالي ومزعج هو دوم هيج صوته عالي خاصة اذا يتعارك هو وماما الجوارين تجي على صوته

اول ما دخلت للغرفه شافتني ماما وجهي مخطوف استغربت كالت .. شبيج ؟

دا اجاوبها وبابا صاح بصوت عالي... وييينجن تعالن سون جاااي

ماما وكفت بسرعه كلتلها بارتباك .. منو عدنا

هزت ايدها .. مدري ابوج جايبله واحد وجاي من طرگاعة طاحت على راس ابوج كون

راحت اسوي جاي واني بدلت بسرعه وشفت جيهان كاعده اصلي عمري شكد احبها شلون حبابه ومتدينه رغم احنه بابًا ما يصلي وماما تصلي بس صلاتها مخربطه مملتزمة عدل بس جيهان لا حيل ملتزمة بصلاتها

دنكت عليها وبستها بكتفها دعيت الها ربي يوفقها ويزيل عنها الهم فقيره ومسكينه وهادئة عكسنا اني وافيان أم السان

باوعتلي وابتسمت ابتسامة خفيفه وكعدت تكمل دعائها

طلعت برا واسمع صوت كلامهم خليت راسي على الباب واني اتسمع عليهم سمعته يكول لبابا .. الي خلص عمره فراش وندوس عليه ما يصير غطا ونتغطا بي على العموم هذا واحد ساقط لا تخلي يلعب بعقلك

باوعت من زرف الباب شفته نفس الشخص الي شفته بالسياره شكلة يرعب

ابويه كله.. صدك عود انت مساع شبيك شخطت السياره صدك جذب گلبي طاح ببطني عاد كول راح اوصلك لبيتك

رد عليه بجمود.. غير ردت اوصلك بباب بيتك

رد عليه ابويه.. ايباه توسلت بيك منا لمن انهانت كرامتي ما قبلت توصلني اشو انوب ما اشوف روحي الا بباب بيتي شني هالتناقض هذا؟

جاوبه.. غيرت رأيي عندك اعتراض؟

ابويه هز ايده كال...خلي اروح اجيب الجاي

خليت وشردت دخلت جوه مفهمت من كلامهم شي بس لحد الان اتذكرنظرته اليه بالسياره حسيته يعرفني ونظرته تخوف جان حاجبه مطبور اثر جرح قديم منطي اطلالة مرعبه بس شكلة نوعا ما زين

شفت بابًا اخذ الجاي وراح وهو يسعل ويطلع اصوات مقززه خييخ ويخ مدري شنو هذا صديق بابًا اذا شرب الجاي فهذا فعلا رجال ونعم منه وماره عليه مصايب على هالعبان نفس

دخلت لماما بالمطبخ شفتها ضايجة وتغسل بالمواعين تنهدت كلتلها.. ماما عندي موضوع وياج

ردت عليه من دون متباوعلي.. اي شنو؟

بللت شفايفي بحيرة... ليوم حارث ابن عمة شكريه اجه للمعهد

باوعتلي بسرعه كالت .. شيريد ؟

نزلت راسي بفشلة وخجل.. يكول احبج

تنهدت.. احنه وينه وين الحب كليله بعد لا يجي ابوج متخبل منه انوب تصير مصيبه من وراه خلينا ساترين على رواحنا

جاوبتها بخوف.. هو غير بابا اجه يشوفني لو ما ربج ستر بس هذا الرجال الي اجه وياه تدرين هو نقذني اول مشافني هو طار بالسياره احس نخلعت رگبت بابًا كد ما جان سريع

عقدت حواجبها.. شنو يعرفج ؟

رفعت اكتافي بعدم معرفه.. والله ما اعرف اول مره اشوفه بحياتي بس من باوعلي من نظراته حسيت بي يعرفني!

حطت ايدها على خدها... عزا صخام بس لا انوب يفتن لابوج عليج لازم اخابر عمتج شكرية اكولها بعد لا يجي حارث لا يسويلنا مصيبه

فزيت بخوف... عزا ماما عود صدك يفتن عليه والله بابا يموتني انوب هو شلون يحب حارث صخام الصخمني

تنهدت بحيره كالت... لا تخافين ولا تفكرين بشي المهم دراستج عندي واني احل كل شي من ارجع من المستشفى امر على عمتج واحجي وياها وهذا اذا حجه لابوج نكول جذاب ما عنده دليل عليج

طمنتني شويه سمعت بابا طلع هو وصديقه ارتاحيت وجوده مرعب بالبيت

كلتلها بتردد.. ماما تدرين جيهان احس بيها تحب عمو كريم !

باوعتلي مصدمومة ومستغربه كالت... شنو شنوو يمعوده وينه وين كريم هاي اختج صدك تخبلت انتي تحجين صدك لو تتشاقين ؟

جاوبتها.. والله ما اعرف احسها تفرح من تروح الهم ومن تشوف عمو كريم تتخربط وضعيتها

عضت شفايفها بخسره وحزن كالت.. بس كريم بعيد عنها كل البعد منصب وجمال واناقة الف وحده تتمناه وكريم مرغوب انسان ناجح ومؤدب وشخصيته حلوه واختج مريضه سوده عليه

جاوبتها.. بس ماما لازم تتعالج خطيه شنو ذنبها هيج تعاني ومحد الها والله اني قررت اذا نجحت واتعينت اسويلها العمليات

ضحكت بحزن... بعد هوايه يا يمه بس لا اني بس اكمل قسط المعهد التفتت الها الحمد لله ربج رزقني وان شاء الله اجمع فلوس عملياتها جان لازم من زمان نسويهن بس غير ابوج الفگر لو يملك الدنيا كلها بس يلطم

بعدها تقربت مني كالت... باعي بس حاولي تبعدينها من كريم وتحسسيها ان هو بمثابة عمجن لان ما اريد تنتكس حالتها بس يتزوج لو يطلع مرتبط

جاوبتها بأسف وغصه.. بس ماما اني كولش افرح من اشوف لمعة الفرح بعيونها تتغير مو جيهان الي تعرفيها تصير عبالك طير تحبه وعيونها فاضحتها

حطت ماما ايدها على شفايفها وغلبها الحزن بجت بحسره.. سوده عليه يمه جيهان شسوي شبيدي والله تخبل جنها طير ذهب احلى بناتي بلكي الله واكدر اجمع فلوس عملياتها

شويه ودخلت جيهان وهي لابسه احرام الصلاة شكلها يجنن عبالك حمامة فعلا هي احلى وحده بينه اصلا ما تشبهنه تشبه بيبي ام امي الله يرحمها هم جانت هيج حلوه وشكلها نازك

ماما من شافتها حضنتها وباستها كلتلها.. هااا يمه جوعانه اسويلج شي

هزت راسها بنفي.. لا بس دعيتلج بابًا يصير زين وياج

ضحكت ماما وهي تمسح بدموعها.. طركاعه على راسه كون ما يصير زين لو الشعب العراقي كله يدعيله بالهداية

ضجت من كلامها مو حيل ببابا بس دتكول ان بابًا ماكو امل ينصلح جان اخويه امين واختي افيان دوامهم ظهري يحلون بالخمسه العصر كالت ماما..سولين يمه باعي من يجون اخوانج صبيلهم غدا خطيه تعبانين من الدوام واكعدي اقري زين ؟

هزيت راسي بقبول

رجعت كالت.. ولا تتعاركين انتي وافيان عوفيها حتى لو تتجاوز لا تحاجيها اني اجي واحاسبها

تخصرت... لااااا والله شنو تتجاوز عليه اطيح حظها غير ترا اني اكبر منها لازم تحترمني

جيهان ردت عليه بتوسل... لا حبابه عوفيها من تردين عليها اظل تتجاوز

باوعت لماما بعصبية .. ترى بنتج مستهتره

جرت نفس وزفرته كالت ... ادري ومليت منها ميفيد الحجي بيها طبع ابوها وما اريدها هيج لازم نسايسها حتى ما تضيع وتصير مثل ابوج

جاوبتها.. شنسايسها اذا هي حتى من نسايسها عبالها نخاف منها تتفرعن بالزايد

كالت.. ميخالف انت هم على كيفج لسانج هم طويل

رديت .. بس اني على الحق هي على الباطل

ماما ظلت تحجي وبعدها كالت.. هسه اني رايحة للمستشفى ما اوصيج ديري بالج على اخواتج واخوج وابوج من يحجي تكفي شره لا تردن عليه عوفنه الوحده

كملت كلامها بتعب خلي اروح هاي المسؤوله بسعاد شاده حرابه وياي لان هناك الناس يحبوني كل شويه ومطلعتلها سالفه عليه تريدهم يفصلونه البارحة على البصمة لان نسيت اسويها مغيبتني يوم كامل وشلتها كلها مو راحة وتطعن بيه وهذا الكلب علاء الي بالامنيه يساومني و واكف وياها

كلتلها.. ديري بالج

ردت بحزم .. لا خلي يولي اشك حلگة وحلگ الخلفه

بعدها خلت وراحت واحنه ظلينه بالبيت الحمدلله جان نظيف مو مثل كل مره شويه واجت افيان من المدرسه كالعادة وسخة شمرت جنطتها وحذائها بنص الغرفه وفتحت الكنتور طشرت الملابس وبدلت عافت الكنتور مفتوح تدق الواحد دق بتصرفاتها

كلتلها.. لمي ملابسج وسدي الكنتور وحذائه وجواريبج خليهن بره وجنطتج خليها ويه الجنط

ردت عليه بانزعاج... اوووي شكد تحجين بيه حييل ترا تعبانه انام واكعد والمهن

ضحكت باستهزاء.. وعيني احنه ننتظر حضرة جنابج شوكت تكعدين حتى تشيلين الملابس بله لجانه خطار شنكول المسعدة نايمة

جاوبت باستفزاز... تمام اذا انتي هيج تحبين النظافة شيليهن ولا تكعدين تنعثلين فوك راسي دايخة ولعبانه نفسي

عطت بيها... والله تلميهن وقبل ما تنامين وغصبا عليج

باوعت الجيهان بغرور.. جيهان گومي لميهن وجيبيلي وياج مي

خطيه هاي المسكينة بدون گلب خلت وراحت تلم بيهن واني تخبلت لزمتها وخرتها عطت بيها بصوت عالي... انتي شنو خدامة عندها لا تعلميها هاي تتعلم على الخيسه خليها تعتمد على نفسها

ردت عليه.. مو خطيه تعبانه

صكيت على اسناني بغضب... شبيها تعبانه هسه لو واحد يگلها تعالي نروح للمول لو الموضوع بي دياحة ما تلگيها اول الناس راكضة

شو هاي وكفت متعصبه رفعت اصبعها بتهديد وهي دكول بصوت عالي... شوفي انتي بنت الكلب لا دكولين دياحة ماكو غيرج دايحة وكلجن هنا خدامات عندي

فتحت عيوني مصدومة من كلامها من جرئتها وصلت بيها تسب حتى ابوها هو صح مو زين ويانه بس ميخالف مو مال تسبه ولو يلزمها تسب بي الا يذبحها على القبله ويشرب من دمها وما يشفه غليله

هزيت راسي بنفي... صدك متستحين

ردت ببرود.. طالعه عليج ما استحي ابيع شرف وافتر ويه الزلم

انرعبت من كلامها وتقدمت الها واجيبها براشد خليتها صفنت ثواني تستوعب هي وين واني تنفسي يصعد وينزل من العصبيه وارجف

هي حست على نفسها وهي هجمت بذاك الصوت العالي والفشار والصياح والصريخ ... بنت الكلب بنت الزمال اليوم احرك البيت الي على راس الخلفج تضربيني ؟؟ اليوم اهجمكم هجم

انوب اريد اسكتها ماكو تصرخ وتلطم وهجمت عليه سحلتني من شعري اريد اخلص نفسي منها ماكو عاد جبتها براشدي ثاني وهي لازمة بشعري عضيتها لا فاد وياها ماكو قويه

ظلت جيهان تصرخ وتعييط هي خطيه بيها حاله من اشوف تصير مشكلة لو عركة اظل تصرخ وتتشنج اعصابها وتتخربط نذب عليها مي يله تصحة وتظل خايفه اليوم كله

هي من شافت حالة جيهان ابتعدت عني بسرعه واني ركضت على جيهان احاول اصحي بيها ماكو بس فاتحة عيونها وصاكة على اسنانها و وجهها صار شاحن اصفر عبالك وجهه ميت

ظليت الطم واعيط .. عزا حتموت الله لا يوفقج افيان الله ينتقم منج يا كلبه

اتصلت بماما ماكو اتصلت ماكو ردت اتصل ببابا بس خفت يكتلنا كلنه كتلة جماعيه يتخبل اذا طالع و وحده منه تخابره

ما عندي غير كوثر خابرت عليها فتحت خط كالت... هااا سولينا حبيبي ونبي مشتاقتلج

رديت عليها بنحيب.. الحكيلي كوثر جيهان تخربطت ومحد هنا حتموت بين ادينه

جاوبت بسرعه... يله يله

بلعت ريكي واني ارجف وابجي.. خلي بيبي ام حسن تجي وياج

قفلت الخط منها واشوف افيان كاعده يم جيهان وتحاول تصحي بيها وتذب عليها مي وتحجي بحرگة... جيهان اكعدي جيهان

دخل اخويه امين من شاف حالة جيهان ظل يبجي كال بطفولة.. ماتت !!

حضنته واني .. لا لا ما بيها شي هسه تكعد بس تخربطت شويه

ظلينه نحاول وياها ماكو واتصل بماما ماكو متفتح خط اندك الباب وراحت تركض افيان فتحته اجت بيبي ام حسن وكوثر دخلن وعمو كريم وعمو جاسم هماتين دخلو من كد ما بيتنه ناصي من دخلوا من الباب دنكوا

بيبي ام حسن لونها مخطوف كالت برعب.. هااا شبيها جيهان شصار عليها

رديت عليها واني ارجف وابجي.. ما ادري بيبي تخربطت

دخل عمو كريم شافها متمدده وجهها ما ينتمي للاحياء بإي صله

تقرب منها ورفعها حط ايده جوه ظهرها ورفعها وهو يضرب على خدها على كيف... جيهان بابا تسمعيني جيهان

بعدها شالها وطلع بيها برا لان الغرفه گلوبها خافت وماخذه رطوبه وخنگة عبالك گبر مو بيت

طلعها برا بالاستقبال شويه اهون من الغرفه صاح عليه كال... جيبيلي عطر قوي اي شي

ركضت بسرعه جبت عطر بيبي ام حسن كلتله.. خلي ناخذها للمستشفى

رد عليها.. لا ميحتاج هسه تكعد اني اعرف حالتها ماره عليه هواي

جاسم حجه وياه.. كريم وخر خلي اسويلها تنفس اصطناعي

هو باوعله بخزره سكتته  جاسم حك راسه بفشله

بعدها كال.. سولين خلي مخدتين وارفعي رجليها خليهن عليها

اني هم رحت بسرعه جبت مخدات ثنين خليتهن جوه رجليها وهو ظل يضغط على صدرها بخفه ويفرك باديها ويدفيهن حتى يرجع الدم بيهن

وظل ياخذ مي باطراف اصابعه وينكثه على وجهها ظل تتفزز شويه شويه ورفعت عيونها الة بعد ما رمشت عدة رمشات والدموع لازگة باهدابها

ابتسم بوجهها وهو يكلها.. ها عمو حبيبتي صح النوم

فزت مرعوبه من حظنه وهي تتلفتت يمنه ويسرى عدلت حجابها وجرت الثوب على رجليها بعدها باوعت لعمر كريم بحده وخزره وسألته.. هم نزعت حجابي ؟

ضحك كلها وهو يرفع ايده ببراءة.. همزين الكل شاهد لا نزعت حجابج ولا تحرشت بيج بريئ من التهمة مثل براءة الذيب من دم يوسف

رد عليها جاستن.. اي اخووي شريف حتى قدمتله عرض مغري <تنفس اصطناعي > ورفضه كال لا هاي بنت اخوي ما ادور وياها الزلة

بيبي ام حسن عاطت بي.. ولك استحي ذن بنات اخو ما يدور وياهن بمثابة عمهن شوكت تحجيلك حجايه بيها خير

تنهد عمو كريم كله... امشي روح جيبلنه عصير وكيك خلينه ناكل وها جيب لجيهان بسكت مالح وميزو حتى توازن ضغطها

رد عليه.. ومنين الفلوس ؟؟

جاوبه عمو.. سناتر عندك خير من الله وتبجي بباب العباس هذا السؤال مال منين فلوس شيله من قاموسك

ضحك.. هههههههه اول كلمة بالقاموس اصلا

ضحك عمو..ههه ديله روح حتى اقنع رنا تتزوجك

عض شفته... اوف يا رنا بالقران اذا تزوجتها اتوب توبه نصوحة

رد عليه .. انت لو تتزوج الاميرة ديانا ما تتوب توبة نصوحة

ظل يضحك وخله وراح خطيه جاب حلويات وعصاير هم ظلوا شويه وبعدها راحوا

صبيت للبنات اكل وامين هماتين بس لا احجي ويه افيان ولا هي تحجي ويايه بس للامانة حسيتها حست بالذنب وظلت كاعده تفرج برجلين جيهان وكل شويه تبوسها وتوكلها

اجه ابويه من شغله كعد بالاستقبال يدخن ويرجع ليوره وجهه اسود من الشموس ومن كثر ما يفتر وشكلة مبهذل بالضيم

صاح على اخويه امين راح يمه وهو كعده بحضنه كله .. شلونك ؟

رد عليه بخوف.. زين

باوعله وعيونه حمر كله.. تخاف مني انت؟

هز راسه بإي ضحك كله لا تخاف اني ما اكره الولد لان الولد سند لابوه مو مثل البنيه افتهمت ؟

رد عليه امين.. لا

رجع يدخن كله.. البنيه عار وتظل عار منا لمن تتزوج وتحطها برگبة رجال وتخلص منها ومن همها تخاف عليها واحد يغتصبها لو تطلع عن الطريق وما ترتاح الا تزوجها مو مثل الولد تسبحه وتلبسه وتكعده بالباب محد يتعرض اله

اخواتك لا تحبهن باجر عكبه يسون بيك مثل ما سوت بيه ام حارث الملعونه من خلت ابنها السكط يهد عليه ويسجني ويجي واحد ويكلك صلة رحم وحب اختك وهن هاي سوالفهن دخلتني سجن على مود وسخ دنيا: فلوس؛

خطيه امين بس يهز براسه وهو كاعد يحشي براسه ويطبعه باطباعه وهو يخاف منه مستقبل منه كل شي

بعدها كله .. اريدك بهذا البيت اصير عيني شتشوف على امك وعلى اخواتك تجي تكولي وتصير اذاني شتسمع هم تجي تحجيلي بالذات امك خاف تدخللها واحد للبيت واني مموجود كلي حتى احط طلقه براسها واكتلها

هز راسه بقبول وعافه وطلع يركض لزمته بخوف وغضب كتله... امييين لا تصير مثل ابوك مالك شغل بي احنه اخواتك وامي تحبك لا توصل اي شي اله

كال بخوف.. لا لا اني احبجن واجب امي هو ما احبه يخوف اسنانه سود من الجكاير

ضحكت على كلامه بقهر وكعدت انصح بي واعصابي مشدوده ما اعرف شلون حنجح واطلع معدل واني بهذا التوتر والقلق والمشاكل انوب اذا دخلت كليه هذا شيسوي يمكن يوميه يذب عليه صاحب

بعدين والله عمتي ام حارث ابد ما عايله بيه هو اكل حقوقها كلهن وما استافدينا شي خلصهم مدري المن ومن طالبته باخر حصه كتلها وطردها وحارث ما قصر خرط بيتنا خرط اجه يكتله وانوب سجنه ورفع عليه دعوه

رجعت اقره وجيهان نامت مليت وتعبت من القراءه عندي دفتر ابو السيم سمائي كتبت اكتب بي مذكراتي هو مقسم اربع اقسام القسم الاول كتبته عن ذكريات طفولتي والقسم الثاني عن مراهقتي والثالث عن دراستي والرابع جان مميز ولحد الان مكاتبه بي ولا حرف بس معنونته مخليه بي عنوان

جان العنوان حلو ومميز وحابته كاتبه ( الى عشيقي المحترم)

مجنت كاتبه ولا صفحه مقرره بعد ما ادخل بحالة عاطفيه اكتب عنه اقتباسات واليوم من شفت حارث كتبت اول صفحه بالدفتر

كتبت..الى عشيقي المحترم
انت قهوة تعدل مزاجي
انت ربيعًا زاهيا لأيامي
كن مجنونا او مجنونا
تهيم بي عشقا متيم بي حبا
اريدك سندا وجيشا تقاتل لأجلي
اريدك سيفا تحارب كل من يبغضني
اتذكر!!
اليوم عندما التقينا امام ملجئ دراستي
حيث أتيت وعيونك تلمع حبا لاجلي
كان يوما جميلا تمشينا معا
كان موعدا غراميا بلا موعد
كاد يصطادنا ابي
ااااه كم ارتعبت بتلك اللحظه
خوفا عليه وعليك
ضننتها نهاية البداية
واخيرا أشكر لله واثني عليه
لان لو لا لطف الله لكنا اليوم في خبر كان...

صفنت بالكلام الي كتبته حست بوجع بصدري من سابع المستحيلات انجمع اني وحارث ابن عمتي لان ابويه اذا يحقد يحقد ويظل حاقد سنين طويله

لذلك حاولت اشيل حارث من ذاكرتي وشلعت الورقه من بين الاوراق وظلت بداية عشيقي المحترم فارغه

خليتها بنص الملزمة وسديتها خليتها على الميز طلعت برا اشتم هوا ضايجة مدري شبيه احس شي حيصير وبيتنا بس مشاكل

اجه على بالي الشخص الي شفته ويه بابا بالسياره شافني هو واكيد عرفني خرب بس لا يدك الناقصه ويكول لبابا عليه بس هو لو يريد يكول لبابا جان من البداية خلاه يشوفني

بس وجهه قاسي حيل ومبين من ذول الاعصاب الي مسوي الف مشكلة ويدور عن مشكلة جديده

شلته من تفكيري وبعدها خليت ودخلت اجت ماما سولفت الها عن الي صار ظلت محتاره وراحت يم جيهان كالت حاخذها للامام الكاظم عليه السلام بلكي تتحسن نفسيتها

ثاني يوم اخذتها للامام ومرت الأمور طبيعية واني قررت اروح ادرس يم كوثر شويه هدوء واستقرار وجو مال دراسة

خليت ورحت ظليت عندهم يومين اجت رنا بنت عمتي ام حارث صار كومة مشايفتها يابه فد مشتاقتلها حضنتني حضنه احسها دخلتني بضلوعها وهي تبوس بيه وتشمني واني كذلك حيل فرحت بيها ورحت سلمت على عمتي خطية حضنتني وظلت تبجي هي حيل تحبنه وتودنه

رنا حلوه هي عمرها ٢٥ سنه بس ممبين عليها عبالك بكدنه لان  ناعمة وشكلها طفولي جان جاسم يموت عليها وهي تتخبل منه وهو من يشوفها يكعد ويسكت ويتحارش بيها ويكلها اتزوجج اتزوجج وهي ترد عليه لو تموت ما اتزوجك

عمو كريم جان مو هنا بالدوام كل لفتره الي اني خلصتها يمهم هو مموجود همزين اني شويه استحي منه مو مثل جاستن ميانه وياه

عمو كريم بس ويه رنا ميانه بس احنه بنات عامر نستحي منه حيل

اليوم موعد نزوله اجه من شاف رنا ضحك وهي سلمت عليه بيدها مثل الرجال... هلا بركس اللعين

هي تسمي ركس اللعين هو هم تسالم وياها عساس هي رجال كلها.. هلا بالحب شلونج

ردت عليه .. بعد روحي وجروحي

ضحك .. مشتاقلج ولج

جاوبته.. خاب شني لا تحجي هيج تتخربط عندي الوظعيه

ضحك عليها.. لا يجيني جاسم هسه يكول تتغزل بالحب

ردت بقرف... اوووع لا يمعود اني ادور اسمر ملتحي ومن النسوان يستحي واخوك لا اسمر ولا ملتحي ولا من النسوان يستحي

كلها ... بس المهم يحبج

جاوبته باستهزاء.. اي كولش يموت عليه ابو النسوان اخذتله صديقتي تاجر منه بدلات ولكيته كاعد بنص الحبايب هو وام الصالون هو يدخن وهي وياه

انوب مو هنا المصيبه المصيبه اجر الصديقتي بدلة تجنن وبالحنة بدلها منطيها وحده نفسها بس كلها گلگ وتخابرني واروح اهد عليه واخذ منه بدلتين وكعد يعتذر ويبرر وهو اكبر جذاب من شافني تخربطت اموره وزروره

ضربتها بفشلة من اخر كلمة كالتها وهي كمزت كالت لعفو لعفو بس متعوده

رد عليها.. اي هي هاي سوالفه اني هم ذاك اليوم بدل بدلة اخت صديقي وفشلني وياه

هزت ايدها.. وتريدني اتزوجة هذا يبدل بدلات يجي يوم ويبدلني

اتصل موبايلي جانت ماما فتحت خط وتجانس صوتها مرعوب كالت.. تصخمنا وتلطمنا الحكي

رديت عليها بخوف.. شكوو

كالت .. ابوج لزم ملزمتج ولكه بيها ورقه مكتوب بيها غزل وتخبل يكول لو مصاحبه لو صاحبها كاتبها الها واجه عليج كلي لجدج يحميج منه

ظليت اضرب على خدي والدمعه بعيني .. ما حاجيتي

ردت وصوتها كله خوف..شحاجي كلب الدنيا كلاب

خطيه من شافني رنا وكوثر هيج وبيبي ام حسن اجن يسألن بيه شكو ما شكو
سديت الخط وسولفت الهن

كالت رنا ماكو غير كريم هو يحل المشكلة جاوبتها لا لا عفيه انوب يكول ذن مستهترات والله هيج اقتباس مجرد اقتباس كتبته والله ماكو شي

رنا راحت صاحت عمو كريم وسولفتله السالفه هو باوعلي وعقد حواجبه كال .. عمو انتي مو تعرفين ابوج عصبي ويدور الزلة حتى يبطلج شلون هيج ما تاخذين حذر

نزلت راسي بفشلة وما حجيت ولا كلمة كال .. تذكرين شنو كاتبه؟

هزيت راسي بإي

كلتله رنا... خويه كريم انت مو مهندس متفجرات فككلنا هاي المفخخه ابو هاي الطركاعه بعد روحي وجروحي

كال.. هاج سولين هذا موبايلي اكتبي بسرعه شنو كتبتي هنا

خطيه كوثر جابتهن بسرعه كلي اكتبي شنو كتبتي بسرعه اني كتبت همزين اتذكره

بعدها كال انطيني اي انشاء او قصه عندكم بالانكليزي خلي ابحثها انطيناه بسرعه بحث وخلاها بملف وترجمها عربي انوب خله كلامي وترجمه انكليزي خله قصه كاثرين مانسفلد وكلامي وياها

صاح على جاسم كله جاسم شوف تروح تسحب هذا ل pdf بسرعه شوف اربع دقايق الخامسه لا تجي وتلفي للبيت

خطيه جاسم بسرعه راح صدك خمس دقايق وسحب الملف ملزمة عربي وانكليزي خلاها عندي

كال .. شوفي من يجي ابوج كليله هاي قصه  عدنا بالسادس واني مترجمتها عربي وحفظتها بورقة وهاي الملزمة

بلعت ريكي بخوف ولزمتها بيدي جدو كهلان مجان موجود جان كتل بابًا بالعگال

هو دخل مثل الإعصار وهو يصيح وينها هاي الساقطه التدبير وينها اليوم اذبحها نزلت راسي

هو عاد عمو كريم هجم عليه .. هيييي شبيك خبصت الدنيا انت شنو ما تستحي بيتنا وتتهجم علينه

رفع الورقه وخلاها بوجهه عمو كريم وهو يكوله.. شووف شووف شلون طينت راسي باوع الكلام والغزل والفراره

عمو كريم اخذها من ايده وشمرها وعاط بيه كله... اصحه على نفسسسك شنو ورقه شنو كلام انت صدك تحجي انت باي عصر عايش حتى الي بالعصر الجاهلي مو مثلك ولك هاي بنتك عرضك شرفك انت تسترها موتشهرها انت شنو من بين الزلم

رد عليه .. هااا هذا ردك اي مو بنتك اذا سوت غلط ما توكع برگبتك توكع برگبتي انييي

اخذ لملزمة من ايدي وخلاها بوجهها كله شوف شوف هذا الكلام نفس الكلام المكتوب بنيه عندها دراسه وتقره هاي قصه وبنتك مترجمتها وتقره بيها عيب عليك تتهمها باطل وهي ما عندها شي

هو يعرف يقره عربي بس ميعرف انكليزي قراها وفشل بلع ريكة ورد عليه .. يله اني اترخص

عمو كريم ما حاجاه ولا طلع وراها خلاها لوحده يروح ولا اعترف بي وخله وراح دخل لغرفته

ورنا تصيح.. بعد روحي وجروحي هاي الزلم الخشنة حلاها بدقايق مثل المفخخات من يفككهن

هو باوعلها وضحك كلها.. رنا عوفي لبنات يقرن انتي مو ساقطه وتردين تسقطيهن

كلتله ... لا لا رجاءا حدد نوع السقوط

ابتسم كلها... ساقطة دراسيا شبيج

ضحكت.. اي الحمدلله

ظلينه كاعدين خابرت ماما طمنتها عني وهي كالت رجع ما حجه شي خله ونام ظلينه نقره وكل شويه ونا هجمت علينه وكعدت تسولف وبيبي ام حسن تطردها همزين زوجة جدو كهلان مموجوده جان خبلتها

..............

مرة الامور طبيعيه وظلينه نقره اكثر كعدونه عطلة مال نهاية السنة ودا اقره هاليام بابًا صاير عاقل مو مثل قبل متخبل همزين مالنة خلك مشاكلة وماما تداوم

بعد مرور اسبوع

چنت بالمطبخ اعزل بي ، اخواتي كل وحدة بصفحة جيهان كاعدة يم الشباك على الكرويتة وصافنة بالفراغ

وافيان بس تحوس تروح منا وتجي منا واذا اصيح عليها اكوللها تعالي ساعديني تتخصر وتگول مابيه ..

غسلت اخر ماعون وخليته ع السنگ ينشف ، رحت غسلت اديه بالصابونة ونشفتهن بالخاولي ..

انفتحت الباب وفاتت امي ، رفعت ايدها وباوعت علينا بنظرة عابرة وراحت نزعت صايتها وكعدت على الكرويتة

حسيتها مو طبيعية وبس تتحسر تصفن ولهناك
وتهز براسها

رحت يمها طليت بوجهه سألتها خيرج ماما شبيج ؟
اكو شي مبينة متعوبة اليوم. ..

جرت نفس وزفرته كالت هذا الكلب ابن الكلب الساقط ماعنده شرف وعرض يساومني على شرفي لو يبطلني من الشغل

انصدمت وانقهرت خليت اديه على وجهي بصدمة
شبيها العالم تخبلت صدك جذب وشراح تسوين ماما

كالت شراح اسوي مثلا شسووي الفقير بهاي الدنيا ينوكل والله

سألتها يعني تبطلين ؟ لو ؟ شهگت عزااا ماما

باوعتلي خزرتني ودارت وجهه اديها على افخاذها
كالت لا اذا ابطل منين تصرفون وابو كم العار ولا هامه شي سألت صدك لعد هو وينه ؟

كتلها لبس وطلع

كالت وهي تدعي وترفع اديها ليفوك يلبسه جني ان شاءالله

جاوبتها دخيلج ماما هو من غير جني مطلعلنه كل وحدة گلب بصف گلبها

بعدها ماما جانت تلوب واني اباوع الها ورجعت سألتها
ماما شحتسوين؟

كالت شسوي شسوي اروح اشتكي عليه بوزارة الصحة وانعل سلفى سلفاه بس خلي يصير الصبح بسيطة عباله اخضعله هو هذا البطران مالگى غيري يساومني سهلة يتدلل

ايدت فكرتها و لزمتها من كتفها كتلها بتشجيع
اي عفية ماما لتخافين اشتكي عليه هسه يطيحون حظ حظه شنوو تايهتله

كالت وهي مفرفحة وعيونها مغرغرة
هو غير لو يصير الصبح باجر اخلي اسمه بالوزارة

كتلها تاكلين شي ؟؟ مجوعانة

هزت راسها وكامت واخذت بيدها جواريبها وجنطتها والصاية كالت اروح اغسل وانام حتى نفسي مسدودة

كالت اخر كلماتها وراحت صوب الحمام باوعتلها بقهر وافكر بالموقف

شنو هالبشر هايه يعني مايفكر بعرضه بشرفه ماعنده اخت بنت او ام يفكر تنحط بنفس الموقف هذا والدنيا كلها دين .... خطيه أمي حيل ضايجة هاي فوگ ضيم الدنيا وضيم ابويه انوب بالشغل لاحكها الضيم
اووف

ماما ماشافت شي بحياتها ولا تهنت بشبابها جابتها تعب بتعب علمودنا حيل انقهر عليها وعلى وضعها واتمنى مستقبلي مايشبه حاضرها ولا ماضيها واتمنى اعوضها عن كل شي

صار الصبح وعيت على أمي تگعد بيه
وبصوت ناعس مبحوح گالت سولين سولين

تمططت وجاوبتها واني النومة بعيوني بعدها
هاا ماما

گالت بسرعة گومي امشي وياي للوزارة اشتكي على هذا منعول الوالدين

گوة استوعبت وگمت اتثاوب واتمطط ، رحت غسلت وجهي بمي بارد ورجعت على فراشي سفطته

رحت للمطبخ شفتها مسويه ريوگ كعدت مااشتهي بس شربت جاي

وهي اجت استعجلتني واني رحت غسلت وبدلت وطلعت وياها اخذناهه مشي للشارع العام ومناك صعدنا فورتات وبعدها اخذنه تكسي للوزارة

بالضيم يله دخلنه وتفتيش واجراءات يله وصلنه لمكتب معاون المدير العام بالوزارة...

انطته ماما الاسم الكامل لعديم الشرف وشرحت اله كل شي وهو بدوره كتب كتاب يأمر بفصله. . بصراحة جان متعاون

ورجعنا للبيت واحنا دنمشي سألت ماما يعني هسه راح ترتاحين منه أن شاء الله

كالت بتعب ان شاءالله

واذا طلع مسنود ويضايقج وخاف ساندته جهة ومينفصل ؟؟

كالت اووو سوولين بالله برووحي الموضوع مضوجني ومأرقني انت لا تزيدينها عليه

جاوبتها لا ماما مو قصدي بس يعني افكر بأبعد الاحتمالات

لاتفكرين لاتجذبينها ان شاءالله خير وينفصل هالگ""" العار واخلص منه ويصير درس وعبرة لغيره عباله اي وحدة يگدر يساومها

هزيت راسي موافقة على كلامها ...

وصلنا للبيت ودخلنا ... هستووة طابين وتنفتح الباب وتنرگع بقوة ونسمع صوت صياح بابا يصيح على امي وهو يم باب الحوش واحنه بالغرفة

امي بس سمعته كالت كون سن معدل ويوكف بزردومك ومايلحگون يكولولك حتى اسم الله على هالصياح هذا والصوت المزنجر

دخل  بابا للغرفة و عيونه براسه والشر مستوطن ملامحه ومبين ماناوي على خير

عااط وهو يباوع لأمي ويتوجه الها
ولج بت الكلب بت النعال من الزمج هسه اكسرج وانعنع ظلوعج احد يلومني ؟؟

عاطت امي بوجهه شبيك شبيك جاي متخبل عليه شسامع اشايف ؟ وجاي  داخل علينا بحيل صدر

رد بصياح وعصبية ولج وين جنتي تسربتين انت وبتچ

صاحت امي وهي بقمة غضبها جنت بشغلة شغلة يعني وين وليت رايحة اتونس ؟ اني شكلي مال وناسة گضيتها تعب بتعب تحاسبني على طلعتي للشغل ؟

تقرب منها اكثر وصاح ولج بت الطحال يا شغل هذا وانت ماخذة وياج بتج للشغل مو بهاي عيني شفتج

كالتله عسى عيونك تاكلها الدود ان شاءالله وخر مني ماناقصتك ومالي خلك عركات هسه

اجه يمها وسحبها من ملابسها وضربها حيل على وجهه وظهرها وهو صاك سنونه ويحجي ولج مالج خلك منوووو الدايحة تفترين بالشوارع ومخليتني وراج رجل كرسي اني الا انعنعج يله ترتاحين ولج دايحة ومديحة بناتج وياج

هو يضرب بماما وهي تصيح وتدعي عليه واني اسحب بي وادافع لأمي ويدور عليه ويدفعني ويرجع يضربها بلا رحمة

افيان مالها حس  وجيهان غطت راسها بالبطانية بس اني اواجه واحاول افك امي وكل دفعة احصلها اوكع بالكاع وعظامي احسه تضرب ببعصها وارجع واكوم اتوسل بي يتركها

هو الى ان تعب وتركها وهي كعدت بالكاع تندب حظها وتلم شعرها الي تطاير بسبب قبضات ادين ابويه عليه

كالت وهي القهرة نابعة من نص روحها
وين جنطتي جيبيها

اني لازمتها من كتفها واهدي بيها وابجي عاطت ودموعها على خدها  جيبي الجنطة وانطيني التليفون

حجيت بنبرة كلها بجي شسوين بي والمن تخابرين ؟

كالت اخابر خالج بشار اني مااتحمل هذا الوضع

كتلها فدوة وين تعوفينا عفية لخاطرنا ماما

كالت بيأس  الى متى ابقى هيج هي الدنيا كلها ساعة وتلفنا الگبور عليمن اعيش عمري خسارة وي الطنطل

باوعتلها بقهر يعني هذا هو راح تروحين ؟

ماحچت شي بس باوعتلي بشفقة ومسحت الدم الي يجري من حلگها بسبب ضربات ابويه

انتبهت على افيان واكفة صافنة وجيهان مطلعة وجهه من البطانية ونظراتها كلها فزع وتبجي

ظليت اباوع بوجوههم وحدة وحدة ولو بيدي اشيل الحزن عنهم

واسمع ماما تخابر بخالو بشار وتشتكي عنده  على بابا اخر شي كالتله انتظرك تعال سويلي چارة

وسدت الخط تباوع علينا كمت من مكاني ابوس بيها
ماما فدوة لترحين قابل اول مرة عفية يجي يوم وتفرج

كالت طبع الي بالبدن ميغيره غير الچفن

كتلها مو يمكن يجي يوم والله يهدي

هزت بيدها ولبست صايتها

عيوني اخواتي تبدلت من فزع وقهر الى دموع وحزن

والتمينا عليها احنا الثلاثة ونتوسل بيها نبوسها ونبجي

كعدت بالارض يائسة واستسلمت لنوبة بكاء وشهگات تشاركنا بيها كلنا واستمرت دقايق

واندكت الباب هي فزت ووعت من نوبتها وراحت تركض للباب وتكول اجه خالجن بشار هسه يتذابحون هو والعار

طلعنا وراها شفنه بابا وخالو بشار بره

خالو صار قريب من بابا وهو بقمة عصبيته ، كور قبضته وضرب بابا بوكس قووي اجه بنص وجهه

ومن شدة قوته اختل توازن بابا ووكع بالخيس الي كدام باب بيتنا ..وهي علگت

نهاية البارت.. يتبع

كونوا انتم كونوا بخير.. احبكم 💔

لا تنسوا التصويت والمشاركة 🥺

اليوم البارت متروس بس عرك ومشاكل ويه بيت ابو سولين🌚