رواية #وكر الأشتر الفصل الرابع 4 - بقلم الكاتبه سمو العراق

البارت الرابع
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔

يجب على المرء
أن يحظى بلمسةٍ
حَنونة في أيامه القاسية
لئلّا يتيبَّس
.....................................
رنا

الحقد موجود بگلب كل انسان مثل الوحش النايم اذا صحيته وكلته طالبك بالاكثر منا لحد ما يدمر صاحبه مجنن اتوقع هاي حنان هيج او بالاحرى هي صح لطيفه وحبابه من نجي تكيف وتشاقه ويانه بس الانسان مينعرف الا اذا عاشرناه

بعد ما راحوا جدو كهلان وكريم وسولين يرجعون ام جيهان ظلينه اني والبنات

عمو كريم قبل لا يطلع لبس قميص ابيض وبنطرون اسود طلع من الغرفه وهو يلبس بساعته وغاض البصر عن الكل

حنان عدلت كعدتها وعدلت حجابها عود هي تستحي هو اصلا ميباوع الها بعدها ظلت تباوعله وتبتسم وعيونها تلمع

استغفر الله شكيت بيها هاي شبيها صح جدو شايب بس محد جبرها وكلها اخذي هي وافقت وكيفت مصدكت يعني محد جبرها وامها كيفت واخذن فلوس المهر فوك مهرين

حجت وياه بصوت دلوع.. اجيبلك حذائك تلبسها

باوعلها مصدوم ونهرها بغضب... لا مشكوره انتي اخيتي اني اخدم نفسي بنفسي ماكو داعي

نزلت عيونها بخجل وهي تبتسم همست.. شكرا

يمه ما ارتاحيت الها جنها سميره بالعشق الممنوع بس لا تسويها صدك وتحب كريم ونعيش العشق الممنوع يبووو لا ما اكدر اتخيل

بس لا مستحيل هي صدك حلوه وجذابه وصغيره بس مستحيل يحبها كريم ويغدر ابو كريم انسان مودب ومرضعه طاهر مستحيل هيج يسوي

طلع الشيخ من غرفته لابس عكاله ودشداشته البيضه الناصعه وعبايه سوده وهو يكول.. هااا بويه كريم خلصت ترا رايحين نرد المره مو نزفك

ضحك وهو يعدل بساعته.. ههههه يابه خلصت

رد عليه... ادري بويه صارلك ساعتين شتسوي

ابتسم.. شسوي يعني صليت وسبحت وكويت ملابسي وطلعت هذا مو وقت ؟

جدو ضحك وهو يقبض على سبحته.. وقت بويه وقت ههه

بعدها جدو باوع لجيهان الي جانت كاعده وصافنه وتكرط بأظافرها متوتره ما اعرف شبيها عيونها محوره و وجهها شاحب بياض بصفار بس هي ما شاء الله حلوه حاجبها مرسوم بإبداع الخالق وعيونها صاحبة رمش حلو ولونهن صفار مميز معانيها حيل حلوه لو تهتم بنفسها وتطلع من القوقعة الي هي بيها تكون احلى اخواتها جيجي

جدو كال بحنية... انه اليوم رايح ومتعني لخاطر جيهانه وتدلل على جدها

ابتسمت وهمست بصوت خافت.. شكرا جدو

هم خلوا وراحوا واحنه ظلينه بالبيت جاستن بالسنتر لحد الان مجاي وبيبي ام حسن راحت للسوك تسوك لان كال اذا رجعت ام جيهان نسوي عزيمة

ظلينه بالبيت بس اني وكوثر وجيهان وافيان وامين كوثر راحت تدرس بغرفتها لان امتحاناتهم قربت وهي تريد اطلع معدل

اجت حنان كعدت وهي تطكطك بموبايلها كالت.. حتجي امكم ان شاء الله مو

ردت عليها افيان.. اي ان شاء الله

ضحكت كالت.. ههههه بس ما شاء الله رجع الدم بوجهكم من اجيتو عدنا لحد الان

افيان عقدت حواجيها باستغراب وردت عليها... شنو شنو ليكون ماكلين بصينيتج واحنه ما ندري

واردفت بحده.. شوفي حبيبتي هذا بيت جدنه معناها بيتنا وبعدين لا عبالج ببيتنا ميتين جوع وشبعنا هنا لا حبيبتي امي مدللتنا دلال وممقصره ويانه بشي

باوعتلها حنان بصدمة كلتلها.. لحظه لحظه على كيفج اكلتيني بكشوري يا كلمة ردي المكانج

وكفت افيان وردت عليها بعصبيه.. اي كلامج ردي لمكانه وهالكلام عيب وميصير ينجحي

حنان بصدمة وعصبيه.. عيب عليج انتي بكد بزري ولسانج شطوله هاي واني زوجة جدج واحترامي من احترامة هيج تردين بوجهي

افيان بانزعاج... اوووي دروحي شكد بطرانه

عافتها وراحت طلعت للحديقه وهاي تخبلت ظلت تحجي .. شكد ما عندها تربيه وادبسز شكد ما تستحي بكد القوندره ولسانها اطول منها بسيطه بسيطه

خلت وراحت دخلت الغرفتها محد حاجاها جيهان كالت.. شكد عيب هسه هم نزل وندبج على السطح افيان متعرف تسكت

جاوبتها.. اندري هي ذيج سميره ( حنان ) هم مترد لسانها

استغربت جيهان.. منو سميره

ضحكت.. شبيج حنان مرة جدي كهلان اسميها سميره لان تذكرني بسمر تشبهها مال عشق الممنوع

كالت.. لا متشبهها ابد ابد متشبهها

ضحكت.. مدري هيج احس

ردت جيهان بأسف .. اروح اعتذر منها؟

ودخلت افيان عاطت بيها..روحي اعتذري منها حتى بالقران اكتلج واموتج تموت انوب نعتذر منها فوك متعيرنه

كعدت بعصبيه وهي ترجع خصلات شعرها المتناثره على وجهها المحتقن من عصبيتها بللت شفايفها وتنهدت كالت.. كله بسبب هالعار الكلب عامر باع وين وصلنه خله اليسوه ولميسوه يضحك علينا

جيهان ردت عليها.. ميخالف ليوم ترجع ماما ونرتاح وهي اكيد متقصد

ردت افيان بملل.. دسكتي انتي تجلطين الواحد بكلامج متقصد المسعده لج هاي حية رقطه تريد الديره بس الها

بعدها وكفت وحجت بعصبيه بوجهه جيهان.. وانتي كافي اصحي على نفسج ما الج سند صيري قويه لا تظلين بس تنوحين وبالعه لسانج صيري مثلي ومثل ذيج اختج الحيوانه حتى تعيشين مثل الاوادم

عطت بيها بعصبية.. هي انتي شبيج اكلتيها حاصل فاصل استقري شويه ما تشوفيها مريضه لو ترديها لسان مثلج عوفي لبنيه بحالها لبيها مكفيها

جيهان صفنت وهي تداري بنفسها المتعوبه وتصارع بروحها بلعت ريگها وبللت شفايفها بجزع

رجعت عافتنه وطلعت برا عصبيه حيل وروحها بخشمها ما اعرف شبيها بس تهجم

ظلينه شويه وطلعت حنان لابخة الوجهه لبخ عيونها جارتهم بالكحل شلون مال غجريات خطة كحلها كالت بتنهيده.. ما اجه كريم وابو

جاوبتها... لا لسه ما اجو هسه شويه واخابر على سولين اشوفهم وين صاروا

هي باوعت الجيهان كلتلها.. اكولج انتي شنو سالفتج انزعي لحجاب شويه ليل مع نهار لابسته ما تختنكين

ردت عليها بخجل.. لا عادي متعوده

جاوبت بقرف.. نزعي اوووع

تعصبت منها تريد الها حجة تريد بس تسوي مشكلة كلتلها.. هي مرتاحة هيج انتي شكو تتدخلين

تخصرت كالت... اييي ايي هم طلعي لسانج مثل ذيج الادبسز العايقه

كلتلها بعصبيه.. خاااب انجبي شنو عايقه حسني الفاظج هييي

باوعتلي من فوك ليجوه ومحاجتني اعرفها متحجي حتى تروح تشكي لجدو كهلان ودكوله هيج سون بيه وتكعد تسفط

تقربت من جيهان وسحبت حجابها طك الدبوس بحنجرتها جيهان بسرعه تفادت الوضع وماخلتها وذيج تسحب بيه بقوه وتضحك دكولها.. اله انزعه منج اليوم

هنا انهارت كل حصون جيهان وتحولت من الانثى الرقيقه الناعمة الهادئة لانثى هجومية متوحشه ظلت تصررخ بصوت عالي هز اركان البيت بحيث من كل ما صوتها عالي حسيت تكطعت حبالها الصوتيه

اجت افيان تركض وكوثر نزلت من غرفتها تركض وهي مخطوف لونها وكتابها بيدها و حنان بهتت بمكانها من الخوف وعافت الشال

وجيهان نريد نسكتها ماكو دخلت بحاله من الانهيار العصبي والهيستيريا بعد من كثر ما تعبت تشنجت اعصابها و وكعت مغمي عليها

افيان ركضت عليها وهي تصحي بيها وتصيح احتارينه شنو نسوي وياها ذبيت عليها مي وحنان تخبلت ظلت ترجف وتحاول تصحيها بس ماكو طبعا هي حنان اخاف من جدو كهلان غير يلعب بيها لعب

...................

سولين

اول ما دخلنه ونزلنه من السياره ونسمع صوت الصريخ من بين الكلام سمعت صوت جيهان تخبلت وماما انجنت دخلنه نركض

ونشوفها سوده عليه الدمع مبلل وجهها و وجهها اصفر مثل الليمون وجسمها متشنج

ركضت عليها ماما وهي تحظنها وترفعها لصدرها.. يمه جيهانه يمه شبيج سوده عليه هاي يمه اني اجيتج هياتني يمج اكعدي

كلها كريم .. ام جيهان خلينا ناخذها للمستشفى

ردت عليه.. لا لا هسه تصحى هي من تتعب هيج توكع وتصير زينه بعدين

صاح جدو كهلان بعصبيه.. منو وياها منو ماذيها

ماما جانت حاضنتها مثل الطفلة وتمسح بوجهها وتبجي كالت.. لا منو يحاجيها بس هي لان ما متعوده اغيب عنها هوايه تخربطت

جان ردت افيان بقمة غضبها... لاااا هاي حنان مرة جدو سحبت حجابها وخلتها تخبلت

ماما فتحت عيونها مصدومة و وجهت نظرات من نار لحنان وكل الانظار صارت على حنان

جدو تخبل لزمها من زندها وهو يهزها بقوه... ولج صدك انتي وياها

ردت وهي تبجي وتشهك ودموعها ماليه وجهها.. والله مو قصدي والله بس كلتلها انزعي حجابج محد موجود من الولد وهي معرف شبيها تخبلت ونبي ممحاجيتها ابد مسويت شي

دفعها جدو بغضب كلها.. وانتي شدخلج انه جم مره كتلج هنا انتي تعيشين خويه وعميت وطرشه ومتتدخلين بغيرج

ردت عليه افيان.. يا ما تتدخل لسانها هالطوله حتى غلطت عليه دكول عايقه

هو تخبل لزمها جابها بكفخه على راسها واجه يكتلها بس عمو كريم وكف كدامه وهو يحميها منه ويتوسل بابو.. يابه بروح امي عوفها ميخالف غلطت بعد متعيدها

وماما وكفت لزمته وهي تتوسل بيه... عمي ابو كريم فدوه اروحلك عوفها هي هاي افيان وكحه ما ترد لسانها

ماما مجانت تريد تسوي مشكلة لذلك هيج حجت وحنان تبجي وتصرخ وتحلف بثنعش معصوم هي محاجيه ولا مسويه شي

ماما عضت اصبعها وهي تتوعد بافيان لان هيج حجت وافيان ولا هامها تزيد للنار حطب

راحت حنان وهي تبجي لغرفتها وجدو تخبل من غضبه كعد على القنفه وهو يفح من عصبيته وعمو كريم يهدي بيه

ماما حاضنه جيهان الي بدت تصحصح شويه شويه ماما باستها بخدها وعيونها وهي من شافت ماما ما صدكت كمزت من مكانها وحضنت ماما وهي تبجي بصوت عالي وماما تبجي وياها وتهدي بيها

جدو تقرب منها وحضنها كلها.. ها جهانتي جدي منو وياج

هزت راسها بنفي.. محد

جر نفس كلها شسوتلج حنان

جاوبته باحراج.. لا خطيه ما سوا تتشاقه ويايه

ماما حظنتها وتمسح على ظهرها وتمسح بدموعها ودكولها.. اجيت لخاطرج ولخاطر اخواتج يمه جوجة شلون هيج تهبطيني عليج وتفزعيني

عمو كريم جر نفس وهو يباوعلها وخله وراح الغرفته

وجدو ظل يحجي وياها ويطمنها وبعدها اجت بيبي ام حسن جايه من السوك ممخليه شي مجايبته حتى فراشات كالت هاي الكم من الشيخ

ماما لزمت افيان وحصرتها بالغرفه كلتلها .. ولج موعيب هيج تحجين مدام جدج جان سكط المره وانوب يكولون من ورانه صارت الهم مشاكل

ابتعد من امي وهي تعدل بنفسها.. طبها مرض خليها تتأدب بت ام الغاز مسويه روحها بس هي وبس وتعير بينه ام كحيله كحلتها واصله لاذانها

ردت عليها ماما وهي تصك على اسنانها.. لج جان استحيتي من جدج وسكتي واحنه كاعدين ببيته جان تغاضيتي عن المشاكل وبعدين شنو بت ام الغاز ؟

ردت بحقد.. اي اعرفهم ذول صديقتي جيرانهم بالمدرسه كالت امها تبيع غاز

ماما جرت نفس.. عيب تعيرين لبنيه والشغل مو عيب مو هاي اني اشتغل حتى اعيشكم وين المشكلة وين الفرق

كالت بحده.. الفرق احنه مشايفين روحنه على العالم

ماما شافت الكلام وياها عقيم واجت رنا ظلت تحشي براس ماما على حنان وكالت هي لبدت بس ماما ظلت ما راضيه لان كالت عيب احنه خطار لازم نحترم نفسنا مو نسوي مشاكل للناس

بعدها اجتمعنا على العشا وطلعت حنان وكفت كدام الكل وهي تبجي وتمسح بدموعها كالت ... اعتذر منكم كلكم والله مو قصدي اسوي هيج بس والله جنت دا اشاقه وياها ابد مو قصدي اذيها ولا طبعي هيج وهذا الموضوع كولي حز بخاطري

ردت عليها ماما بإحراج... لا حبيبتي اخته نعتذر منج صارت بوجهج وهي جيهان دوم تتخربط هي هاي حالتها لا تخلين بخاطرج حبيبة ان شاء الله ما صار شي

كلتلها بيبي ام حسن .. كولي يا الله هسه انتي عليمن تبجين لان الشيخ حاجاج ترا ابو كريم يحبج ويريد خاطرج بس لان بيت عامر خطاره ضاج وانتي تعرفين شكد ابو كريم شكد معزب

مسحت دموعها وهي تباوع لجدو كلتله.. اعتذر شيخ ان شاء الله متتكرر ومتنعاد

مسح على شواربه وهو يتنهد كلها.. معذوره بويه روحي غسلي وجهج وتعاي اكلي وانه هم اعتذر منج صحت بوجهج واذيتج بس من شفت البنيه متخربطه حز بخاطري وانه اعرفج بنت اصول وعاقله ما جنت متوقعها منج

مسحت دموعها.. والله اني مسويت شي احس بغبن على العموم بالعافيه عليكم اني ما اريد اتعشه

خلت وراحت دخلت الغرفتها وجدي ضاج عليها وماما انحرجت حيل كالت لازم نروح منا شلون عيب والله ميته بدمي من الخجل

اجه بابا كالب الخلقه علينه وماما لابسته تعشا وصالحوهم بس شنو واحد لابس الثاني بس بالاسم متصالحين واصلا ماما ما رجعت الخاطره رجعت الخاطرنه لذلك وجوده وعدمة نفس الشي

بابا خله وراح كال .. عندي مشوار ويه صديقي عود خلي واحد يجيبكم للبيت باليل اني ما الي خلك

هو طلع وماما غمته بس مو كدامهم لان هم طلعوا وراه كالت.. ماكو لحد يلحدك ويخلصنه منك ما يعرف يوصلنه للبيت خلانه برگبة العالم

ظلينه عندهم لليل كال عمو كريم اني اوصلكم باليل شعندكم ظلوا هنا لان وايركم مال السحب كاطعة عامر ودزيت جاسم وصديقه يسوو ويشتركون بالسحب من تجي اوديكم

يالله شلون انحرجنا ابتلوا بينا بلوه بيت جدو واحد غيرهم طردنه من زمان بس جدو يحبنه من زمان ويحب ماما ويحترمها

كملنه عشا وغسلنا مواعين واني صعدت اقره اني وكوثر وماما ظلت يم بيبي ام حسن وجيهان ويه رنا وفافي ( افيان)

وحنان ابد ما طلعت من غرفتا وجدو بالاستقبال

................

رنا

جيهان دخلت للحمام تسبح واني كاعده ويه امها نسولف وهي تسألني عن امي وشلون صارت

اجت سولين كعدت يمنه امها سألتها كلتلها.. ابوجن من رحتن هم ضربجن

سولين ردت عليها.. لا هو اجه يكتلنه بس شنو اجه صديق سالي ونقذنه

امها عقدت حواجبها.. منو انوب هذا صديق سالي

ردت سولين.. هذا السولفتلج عليه الشخط السياره

كالت .. هااا اي اتذكرته هم انعم الله عليه نقذج مرتين من ابوج

سولين... اي حسمي المنقذ ههههههههه

خليت ورحت دا اشوف شي اكله فاكهه شي شفت جيهان تلاكت هي وكريم جانت هسه طالعه من الحمام ولافه نفسها بالخاولي ولابسه حجابها

هو جان لابس تراك اسود وجكارته بيده رادت تفوت قطع طريقها رادت تفوت من يساره حاصرها

باوعتله ببراءه وهو قابلها بنظرات هادئة وهو يدخن كلها.. شلون صرتي

ردت عليه بخجل وارتباك... زز زينه

كلها وهو يسحب من جكارته.. ليش احسج تستحين مني ترا اني بمثابة عمج لا تخجلين ولا تستحين كوني طبيعيه

هزت راسها بنفي وهي تبلع ريكها كالت.. لا ما استحي
لا
كلها بحنية.. اريد اكسر هذا التوتر اريد تكونين مثل باقي البنات مثل رنا وسولين لهذا السبب حاخذكم باجر لفد مكان حلو او متنزهه شنو رائيج ؟

هزت راسها بقبول وايدها ترجف.. بكيفك شكرا تسلم

كرص خدها وهو ينزل لمستواها وهي رافعه عيونها اله جنها بزونه اليفه .. الله يسلمج يبويه

خطيه خربط عندها الوضعيه خلاها متعرف شلون تتصرف عمي حقها خرب بيك كريم على هالدكة هو متعاطف وياها والفرخة راح تطيح بحبه

خليت ورجعت لاكاني جاستن كسرت بوجهه بقرف شلون اني بالشكران كال بغرور.. هلا بالحب

رفعت حاجب باستهزاء.. دطير

كال .. اكلج انتي ليش ما تتزوجيني وتقيمين هنا بدل ما كاعده خطار واني كل شويه اباوعلج ومتحمل حرام من وراج

جاوبته... يااا ومنو كلك تباوع وبعدين كطنه وشيلها من اذانك ما تزوجك لو تنط وتحط

رد عليه .. شني زاجل ونط وحط على العموم عود ردت افيدج الا اني ما ميت عليج الف وحده تتمناني وعادي نتزوج بس على الورق

صحت بوجهه.. عزا بعينك دروح متاثر بالمسلسلات التركية كد ماسافر التركيا

كال بنبرة حزن.. فريت العالم كله ما لكيت لاحبها بكدج

جاوبته بنفس نبرته... اوووي قهرتني على حالك حيصير عندي انهيار عصبي

رد بخبث.. اغتصب من تحب وسيزوجها لك القانون وفق الماده 398

تخبلت من كلامه وصدك خفت ضربته على صدره بغضب.. والقران اذا بعد حجيت هيج كلام اكول لجدو عليك اخلي يطردك من البيت

ضحك ... اشاقه وياج شبيج هههههعه

رفعت اصبعي بتهديد... حتى بالشقه لا تحجي هيج تمام؟

عفته ورحت هز بدني المعفن اريد ارجع اتعارك وياه عبالك صدك اعتده عليه اني صدك وحده ما تستحي هسه شعندي كاعده عند العالم وعايفين اهلي صدك جذب

ردت اخابر على حارث يجي ياخذني كريم ما قبل كال باجر اطلعكم اونسكم عادي اني بيها ونسه كيفت ونسيت سالفة جاستن المعفنه وكعدت احضر للطلعه...

..................

سولين ...

بعدما عمو كريم وعد جيهان ياخذهه لمكان حلو ، احنا كلنا تحمسنا نروح ونشوف هالمكان الحلو مو بس جيهان

هم ظن من حقنا لأن والله محرومين من الطلعة للمكانات الحلوة ، ماما على طول مشغولة وبابا خلي يلبي احتياجاتنا الضرورية  يله عود يطلعنا

وكفت جيهان على المرتبة تباوع لنفسها ، رحت يمها لزمتها درتها عليه همست بإذنها بعد شتردين هاي الطلعة على مودج

ابتسمت متوترة مثل عادتها ، لزمت كفوف اديها
وباوعتلها كتلها هاا متحمسة

هزت رأسها وابتسمت ابتسامة متلاشية
وجانت اجابتها بين اي وبين لآ ...
هي هيج ممستقرة دومها

كملنا لبس وطلعنا ترخصت من ماما حتى نطلع
وصتني على اخواتي
وطلعنا للسيارة هو كال فوتوا السيارة خليتها مفتحة اسوي تليفوني واجي ...

طلعنه للكراج وفتنه بالسيارة ، رنا عاركت كوثر الا تريد تكعد كدام تكول هذا الي المكان وفعلا استسلمت كوثر واجت كعدت يمنا ... ب

لشويه طلع عمو كريم كاشخ ولابس ومتأنق

سمعت حسرة تسللت من جيهان باوعت عليها
تباوعله من الجامة  وحتى رنا انتبهت عليها

هي خطيه خجلت منه وظلت تفرك باديها بتوتر ...

دعيت الله مايعذبها بهالحب ، الي من طرف واحد
وهو حباب ومتعاطف وياهه حييل ... ويهمه امرها

صعد كدام ولزم الستيرن حتى يسوق ، كال ها يبنيات مستعدات

رنا كالت وين رايحين للقمر ؟

التاف عليها كال هاي منو كاعدة يمي ولج هذا مكان كوثر المفروض تكعد مكعدين يمي الخبلة شكو

والتاف علينا احنه ورى كال كوثر انت شلون تخلينها تتعدى على حقوقج

كالت رنا والله اختك وحقوقها اشمرهم من الجامة

كال انصحج تلبسين حزام الامان يمكن نص الطريق وتنشمرين من الجامة انت منو يتحملج

كالت انت عمو

كال المهم وهو يلبس نظاراته الطلعة هاي على شرف جيهان

احنه كلنا باوعنالها وهي توترت حييل باوعتله ونصت وابتسمت

ورنا كاعدة بالصدر ظلت تصفك وهي فاتحة اديها على اوسعها وتباوع لجيهان وتكوول هههييييييي

كال كريم موجه كلامه لرنا الخبلة كعدي ...

وباوع بالمراية كال يله اختارولنه اغنية نسمعها نريد نشوف الاذواق

رنا كالت شغل بسبس ميوو

كال ماعندي وبعدين شهالذوق الخايس هذا !!!

رنا تأشر على روحها بصدمة بس بشكل صامت مثل افلام شارلي شابلن بمعنى أني ذوقي خايس

احنا اختارينه بس هو كال وهو يباوع بالمراية الامامية اني اريد اعرف ذوق جيهان ....

بعد لحظات توتر وتردد واحنه كلنه عيونه عليها
جيهان كالت اريد اغنية شيرين حبيتو بيني وبين نفسي

كال وهو يمد ايده على المشغل مال السيارة كال الله هاي الاذواق مو بسبس عووو مدري شنو ووو احب شيرين واغانيها

كالت رنا اي عوفك من ذوقي وين راح تودينه ؟

كال هسه تعرفين

ردت ميصير نختار المكان يعني ؟

جاوب نووو انت بالاغاني ذوقج خايس انوب بالاماكن شيطلع

ضربت ايدها على رجلها موو كتلك عووفك من ذوقيي

شغل الاغنية وصدح صوت شيرين العذب
بالاغنية الي اختارتها جيهان

باوعتلها هي تنهدت وتجت راسها على الجامة وهو مقابيلها وعينها عليه وهو كدامها يسوق تغمض وتتحسر وتعصر بأصابعها

وتردد كلمات الاغنيه.. على بالي ولا انت داري بلي جرالي
الليالي سنين طويلة سبتهالي.. حبيتو بيني وبين نفسي

هو بالنسبة الها حلم بعيد المنال وتورط قلبها بحبه ...

وصلنا لبناية كبيرة كلش صفگت رنا
وكالت هييي المول....

نزع نظاراته ونزلنا احنه مبهورين بالمكان جبير وعالي وكله اضويه وناس طابة وناس طالعة محملين اشكال الاغراض

صعدنه بالدرج الكهربائي ، جيهان كولش خافت

باوع عمو كريم عرف بيها خافت كال سولين لزميها

لزمتها من ايدها وشبكت اصابعي بأصابعها ...هو دار وجهه يباوع كدامه وجيهان تباوعله بهيام

واجتازينه الدرج وصعدنا للطابق ....

وهناك اخذنا للمطعم وكال يله شنو تطلبون

رنا اخذت المنيو وكالت اني راح اطلب الي وللبنات

هو اخذ المنيو الثاني كال طلبي الج لوحدج والبنات اني اطلبلهن خاف يطلع ذوقج بالاكل مثل ذوقج بالاغاني

رنا خلت المنيو على وجهه لزگته

كوثر صاحت عليها ولج رنا مكياجج وهي بسرعة وخرته من وجهه وظلت تباوعله بتفحص خاف صار بي اثر مكياج واحنا ضحكنا

بعدهه نزل الاكل ..... واني جنت خجلانه احسب لكل حركة تبدر مني اول مرة اكعد بهيج مكان ونفس الشي بالنسبة لجيهان بس افيان منطلقة وماخذة راحتها حاطه رجل على رجل وتقره بالمنيو عبالك مديرة اعمال

بعدها خلصنا اكل واخذنه لكافي طلب النا شراب موكا بارد
كوثر ورنا رادن لاتيه وهو طلب عصير الليمون

شربنا وجان شي كولش طيب بحياتي مضايگته حيل تشكرنا من عمو كريم وحيل تونسنا

رنا وكوثر اخذونا على محل عطورات تجنن ومستحضرات وهو كال اي شي يعجبكم اشتروه

بس كولش خجلنا وماطلبنا شي ابد

هو كال لرنا وكوثر يشكلون النه تشكيلة ملابس عطورات مستحضرات واي شي خاص بالبنات رغم معارضتنا اشترا لكل وحدة منه بس احنه حيل متحسسين وخجلانيين

وبداخلي ابد مقابلة انو يشتري النه واصلا مافرحت بالاشياء الي اشتراها مااحب احد يتفضل عليه

ادري هو سوى هيج بنية جدا سليمة ومن باب متعاطف ويانا بس اني ممرتاحة لهل شي ودومي قنوعة بلي عندي

بعدها تشكرنا منه هواي ورجعنا للبيت وفعلا تونسنا باليوم هذا ...

جيهان تغيرت ملامحها شويه ونشنشت واني هم غيرت جو ونسيت شويه من همومي ومشاكل اهلي بهالساعات القليلة وارتاحت نفسيتي ولو دقايق ...وحاضنه الاشياء الي اشتراهم الها كريم بحب و اول مره اشوفها تضحك ومبتسمه

......................

رنا

رجعت لبيتنا بعد ما بيت خالو رجعوا لبيتهم دخلت واشتغلت امي عليه رزايل وعياط اجت تكتلني كالت.. جا انتي مرة خالج زعلانه وانتي وياها شنوو

ظليت اتوسل بيها... ماما هي شنيه ماما غير خطيه بنات خالو من اعوفهن لوحدهن تاكلن الجلاب غير انتي ما تدرين حنان خلت جيهان تخربطت من وراها

ماما انزعبت.. يا يمه سوده عليه شلونها هاي لبنيه ولا ارتاحت مسكينه

كعدت اسولفلها واحمسها واحط فلفل وبهارات على السالفه حتى شنو امي تنسه السالفه وما تكتلني وتحجي عليه

اجه حارث ظل يسولف ويايه ويسأل على سولين كال.. شلونها مشتاق الها واحبها حيل بس شسوي الخالي محاربني ويكرهني بس لو يظل يوم بعمري ما اعوف سولين واخذها لو اعرف اموت

ردت امي بتعب.. اسم الله يمه فدوه اروحلك عوفني من سولين وعوفني من خالك هذا متعرفه وانت تركض وره سراب

رد عليها بحسره وهو يحط ايده على گلبه.. شيقنع گلبي يمه احبها مو بيدي شكد شفت بنات بس مو مثل سولين تربعت بنص گلبي

ماما جرت حسره على كلامه وتحس بيه وبمعاناته بس شنسوي الخالو حاقد على حارث وخاصه بعد ما رما على بيته وسجنه صار يشوف دم اسنانه وميشوف حارث

وطبعا حارث رجع ورث امي كله من بعد ما سجن خالو

باوعلي كال بنبرة حزن... ساعديني اخذ سولين

جريت حسره كتلة.. اله تخنگ خالي

عض شفته .. اووووف والله لو مو حرام من زمان خنگته

ظليت اضحك وبعدها امي نست السالفه ولتهت ويه حارث تسولف واني طفرت نمت

.................

سولين

بعد مرور شهر كامل رجعنه لبيتنا ماما تروح وتجي للشغل وهماتين تحف وتصبغ للنسوان بالبيت ومتحجي ويه بابا

وهو يدخل ويطلع وياكل ويشرب ويروح مايحجي وهادئ نوعا ما مو هايج مثل قبل فرحت كلت يمكن تغير وماما سوتله كرصة اذن

جانت مهتمه باكله ولبسه حتى ما يلزم حجة عليها ورغم هي هوايه جانت تعاني من شغلها بسبب حقد بعض الممرضات والآمنين هناك وخاصة من بعد ما فصلت علاء الي جان يشتغل بالامنية

لهذا السبب جانت حذره وتروح من وكت حتى ما يفصلوها وناكل الوحل وصارت تجمع فلوس عملية اختي جيجي وفرحانه حيل شويه استقر وضعنه وبابا تغير

اني صارت الامتحانات الحمدلله كل يوم اروح للامتحان جان الجو حار شهر السادس والصفوف حاره حتى مبردات ماكو والصف الي ما بيه مبرده بس بنكة خطيه بالظيم احنه جانت بيها مبرده بس ما بيها مي وتجرخ علينه وتذب سم مو هواء متنه من هالعبان نفس

وجانوا حيل متشددين علينه بحيث ننزع الحجاب وحتى اذا لابسه محبس او تراجي ننزعه جانت الاسئلة زينه نوعا ما واني وكوثر نروح ونجي يجينه سايق بيتهم

لحد ما خلصنه امتحانات الحمدلله وظلينه ننتظر النتائج اني الحمدلله مجاوبه بس اخاف انظلم بالتصحيح

مو اسبوع على نهاية الامتحانات بهذا الاسبوع حسيت بابا حيل متوتر ويتصرف تصرفات مو طبيعية يحاول يتقرب من ماما بس هي تصده وما تريد تحتك بي لان دكول ما يغير طبعه

لحد ما اخر يوم تصالحوا وتسوك للبيت وجاب دجاجه من المطعم خرب شلون فرحنه حتى احتفلنه وسوينه حفلة

وبعدها رجع لنفس طبعه صح شويه احس بس احس ظام شي او بباله يدور فد شي حيل قلقانه منه وحتى وصيت ماما تدير بالها وهي كالت ما عندي شي اني الحمدلله اروح بطريقي واجي بطريقي

بوحدة من ليالي المعتمه المؤلمة حد النخاع امي لحد الان مجايه ضاعفوا عليها ساعات العمل

اتذكرت ابويه اليوم يهوج علينه من الصبح وهو كل شويه وكال راح ارتكب جريمة راح انام على الحطب راح اكل وحل راح اعيش مجرم

وبعدها كمل وهو يتوعد ..والله اذا الي ببالي صحيح ارتكب جريمة وما يرفلي جفن

جنت كل ضني يحجي عن واحد من اصدقائة او واحد متعارك وياه..

رحت للاستقبال شفته لحد الان ما اجه وماما هماتين حيل تأخرت دب الرعب بجوارحي وحسيت بحرگة تسري بجسمي ملل وخوف وغربه

اتصلت عليها ماكو گلبي صار مثل الورقه اليابسه يتكسر شويه شويه والقلق زاد عن حده مو عوايدها امي تتأخر

رجعت للغرفه وغطيت اخواتي واخويه ونمت انتظرها واتصل متجاوب ليش ما اعرف ونار متسعره بصدري

بيومها حسيت بصخره جاثمة على صدري متخليني اتنفس احس بسجين كاصه ظهري كص..

من بين تفكيري وخوفي على امي شتت تفكيري صوت الطلقه الناريه الي اصدائها بجدران أذني

حطيت ايدي على شفايفي وفتحت عيوني المليانه دموع بخووف كبير همست بصدق..كتل امي

ما اعرف ليش حسيت هاي الطلقه اخترقت گلب امي مع العلم محسيت ان اكو احد دخل او بالأحرى ما سمعت

وكفت واني ارتجي على الحايط وبطني من الألم تكطعت صوت بداخلي يكولي لا تطلعين هاي الطلقه لامج وراح تظل ذكرى موجعه الج لسنين

وصوت بداخلي يكولي اطلعي وتطمني ان شاء لله ماكو شي وصرت بين نارين بسبب حال الفوضى الصارت بداخلي

طلعت واشوف گلوب الاستقبال مشتغل وكفت بحاله من الهلع والصمت وصلت واني اشوف جريمتهم بعيوني

جان ابويه الحقير واكف مثل التمثال والمسدس بيده يعلن عن جريمته جان شيطان بجسد وحش متجرد من الانسانيه

وصديقه واكف مصدوم وهو يباوع للجثه المهدوره كدامه الي شبعت الارض من دمها وفرحت روحها بعد ما تحررت من جسمها

ما باوعت الها حسيت بالدم حسيت بكل شي حسيت هاي جثة امي بس ما باوعت الها جنت اتنقل بنظراتي لأبشع ثنين شفتهم بحياتي..

تمسكت بضعف بباب الاستقبال وجسمي يرتعد بعنف حاولت اوكف بس رجليه خذلني

سمعته يحجي وياه وهو يضربه بقبضة ايده على وجهه حطم ملامحه..شسووويت قتلت مرررتك

صرخت بصوت عالي بعد ما سمعت موت امي المزعوووم.......يممممممممممة يمممممه لاااااااا

نهاية البارت ... يتبع

كونوا انتم كونوا بخير... احبكم💔

لا تنسوا التصويت والمشاركة بكم نكتمل 🌸🙂

اجمل الهدايا لبطلاتنا من الخاص 😍❤️

ومن هنا ابتدأت احداث الروايه لنبحر بوكر الاشتر

انطوني انطباعكم عن الروايه واكثر الشخصيات الحبيتوها

وللمعلومة الرواية تخص وكر الاشتر بكل حذافيرها غالياتي

كونوا بالقرب مني دائما ❤️❤️🥺

واشكر تفاعلكم وحبكم القلمي واكيد ما احكم عن تفاعلكم من هسه لان الاحداث حاليا بدأت وبشدددده 💔🥺

احبكم