رواية #وكر الأشتر الفصل الثاني عشر 12 - بقلم الكاتبه سمو العراق

البارت الثاني عشر
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔

انا ياسيدي انثى تشبه الياسمين  تبقى بيضاء مهما خانتها الفصول .

..........................

شعور صعب من اعيش ويه شخص ما اريده والاصعب هو بمجرد ما انطق كلمة ينهار عليه ما اعرف شنو سره هو مو زوجي هو انسان غريب عليه غريب لان كل شي ما اعرف عنه

يمكن استفزيته ومتقصده استفزه ما جنت اعرف للاسم أهمية تفوق الخيال وينصت الها الهذيان

وكعت من ايده واني ارجف واكح ورجليه ترعش من الخوف باوعتله وعيوني احسها تهشمت زحفت برعب على الارض وايدي على نحري التقط انفاسي وارجع روحي المسلوبه تحت إرادته القويه

باوعلي وهو مصدوم وكآن رجع لوعيه رجع لذات الشخص رفع ايده اليه واعصابه بارزه

صرخت بخوف بمجرد ما شفت ايده انمدت الي وحصرت روحي بين القنفه والطاوله حطيت اديه على راسي احمي نفسي منه.. يمممممه لاااا فدوووه ما اريدك راح يموتني راح اموت مثل امي

حسيته نفس ابويه حسيت بي طبع من اطباع ابويه وهذا الي اني كارهته وهذا الشي الي يخليني ابتعد عنه الف متر

صدر يصعد وينزل وتنفسي سريع وشريان احس حيطگ بدماغي من كثر ما انهرت

خله ايده على راسي بضياع من دون ما ينطق حرف بس ملامحه تجبرت وقست وكأن الزمن وگلبي عند هالاسم المشؤوم

صك على اسنانه وهو يحجي بحده وتهديد صريح... هذا الاسم ما ينذكرررر كدااااامي هذا الاسم اذا ذكرتي تصير نهايتج على ايددي حتى باحلامج ما تذكرررري مفهوووم

بلعت ريكي بخوف والدموع ماليه وجهي وكفت مهزومة منه ومن عصبيته تغير من انسان يمكن يكون بسيط الانسان وحش ومجرم حتى ملامحه تغيرت

اول ما شافني وكفت لزمني من اكتافي وهو يصرخ بوجهي بكل قوه وجبروت برائة وجهي كدام جبروت وجهه شي فضيع حسيت نفسي لا حول ولا قوه حسيت بضعف وخوف

هزني بقوه وهو يصرخ... انتيييي وحده ما عندج تربيه انتي مو مؤدبه لا تتجاوزين اتقي شرييي وحافظي على نفسج لسانج هذا الطويل كصي وثمني كلامج ولا تقارنين بين الجنه والنار مفهوووم

كلمة وحده ما حجيت بس فاتحه شفايفي بذهول والدموع عشره عشره على وجناتي ... اخرررر مره اخرررر مره تتجاوزين وتغلطين ادبسز

تركني وهو يتنفس بسرعه عبالك واحد داخل معركه مسح على وجهه بتوتر وعض على شفته بقسوه لزم الطاوله الكزاز بقوووه ورفعها وكسرها وهو يصيح ويغلط.... سااااهر الكلب اذا ما طلعت عيونك من راسك فلا اطلع ابن ذيج الحره اذا ما حركتك مثل ما حركت دمي  وحركت گلبي

صرخت بصوت عالي وحطيت اديه على اذاني انهزمت منه بالغرفه واني اسمع باقي تكسير الاثاث باوعتله من الباب شال البلازما وكسرها

وهو يلهج باسماء هوايه اسماء اول مره اسمعهن تيقنت اله مشوار طويل وياهم

صرت ارجف مثل السعفه وحلگي يبس من الخوف مو عليه طيف ابويه من جان هيج يتعصب ويكسر كرهته ياربي هذا مثل ابويه ياربي خلصني منه خلصني شلون وين ارووح دخت راسي موتني طلعت من گبر دخلت بگبر الله يعين گلبي

هدء من ثورته وعصبيته كعد على القنفه وهو مگابل الانقاض الي سببها بالبيت حط راسه بين اديه وينفخ بضجر سحب باكيت جكايره ويدخن جكاره وره جكاره بحيث خلص الباكيت كله وما طفت النار الي متوجره بصدره

صرت ما اشوف من الدموع حتى صدري تبلل من دموعي واشهك بصوت مسموع عقج باكيت الجكايره بيده وشمره

ورفع كف ايده الي بيه الاسم وهو يبوسه بحسره همس بصوت حزين.. اعذريها حبيبتي مو قصدها بعدها طفله ما تفهم

قفلت الغرفه وتكررت على تفسي واني اشهك وابجي شلون وين انطي وجهي احس بشي جاثم على صدري اريد اتحرر احس بحزن فضيع ما اكدر اظل هنا راح اطك واموت

حطيت ايدي على خشمي شفته ينزف دم هو ما ضربني بس خنگني بس انصدمت من الدم بس يمكن من كد الضغط ظل ينزف ما اكدر اواجهه هيج انسان ما عندي طاقه وطاقتي على گدي دمعي اختلط ويه الدم واني اندب حظي

اريد ارجع لاخواتي اريد اشوف شلون احنه وحده تسند الثانيه و وحده تدافع للثانيه هنا ظاله محد يخلصني منه تعبت ما اريد اظل هنا اني اريد اخلص من مشاكل أبويه ادخل بمشاكل هذا المجنون البربري

كعدت خليت الخاولي على خشمي اكطع نزيف الدم وكفت على المرايه الموجوده بالغرفه شفت نفسي ذبلانه حيييل عيوني مورمه وضايعه بين الجفون وخشمي مورم من البجي و وجهي صاير اصفر من القهر والهالات شويه وينزلن على خدودي صايره جني شبح اخوووف خفت من روحي حيل

مشيت واني اترنح بخطواتي ومختنكه بسبب احتباس الدموع سحبت نفس ورجعت اباوعله جان كاعد على القنفه وساعد اديه على رجله ومنزل راسه شاد على شفايفه بقسووه ونظراته ما تعبر عن شي

اتصل موبايله بنغمته الي دوم اسمعها من يتصل موبايله واحب اعرف سرها جانت كلماتها تكول... فعذبها حتى آذاب فؤادها
وذوقها طعم الهوى والتدللي
فقلت هدا بهدا فأطرقت حياءً وقالت كُل ظالم مبتلي

رن اكثر من مره وبكل مره ينعاد مثل المقطع وهو مثل التمثال ما يجاوب على الموبايل ولا حتى شاف منو المتصل بحيث حسيت حفظت المقطع

وكف واخذ الموبايل وهو يمشي بين الكم الهائل من الانقاض والكزاز تراك وراه خرابه سبب دمارها هو وطلع

من شفته طلع تنفست بارتياح وسحبت نفس عميق وغز احس بعيوني مثل الابر طلعت واني اباوع للدمار الشامل الي صار رفست بقايا البلازما برجلي ودخلت للغرفه

همست بيني وبين نفسي هذا مكانه هو ينظفه مو هو يدمر واني اعمر واني مكاني نظيف هنا ما الي شغل بيه

نمت والدمعه بخدي واني اندب حظي على الصار اليوم ويني وين الزواج والاسم ثار الشكوك بداخلي شنو سره هذا اهله وين عشيرته وين رحيق منو ساهر منو اريد جواب لتساؤلاتي ماكو

.............................

جيهان

شفت افيان لبست صايتها ونعالها وطلعت صحت عليها.. افيان وين رايحه لا يجي ابوي ويموتج

ردت عليه... عساه بالموت ان شاء الله مالج شغل رايحه اكول للنسوان اني اشتغل مكان امي احب واصبغ خو ما نظل على ابوج الفگر نموت جوع

استحيت من نفسي اني ما اعرف احف ولا حتى الزم الخيط ولا اكدر اساعد اخواني احس نفسي مقيده وما احب اشوف العالم اضوج من تساؤلاتهم وسوالفهم  الماصخه فدائما من اشوفهم ادخل جوه لهذا السبب اني ما اكدر اشتغل

هي دتطلع ودخل ابويه سحلها من صايتها وهو يعيط عليها.. وين موليه بت الزمال الدايحة ام الشوارع

كشرت ملامحها وتعصبت من كلماته الجافه ما بيهن ذوق ردت عليه.. اريد اجمع النسوان تجي تحف وتصبغ على الاقل يصير عدنا جم فلس

تركها وفرك لحيته بتفكير كلها... يله روحي اني احب روح المساعده وما اريد اظلمجن وما اخليجن تشتغلن هيج حق الله يكول

جاوبته باستهزاء... اذا هيج حق الله يكول ما تخليني اكمل دراستي

رد عليها بغضب... الدراسه فاشله بالعراق فلا تاكلين نعل وامشي روحي اجمعي نسوان اشتغلي بوجوهتهن النعل

عافته وراحت صاح عليه كال.. امين وين بت السكط

جاوبته .. نايم

رد عليه بقهر.. نامت عليه طابوگة اريد اسوي رجال گوه ما يصير طالع على خاله بشار نفس الفهاوه

سكتت مجاوبته هو خالي بشار غير جابه براشدي سحله بالخيس

كعد لابس فانيله حمره وبجامه برتقاليه الوان زاهيه وكلهن وسخ لعبان نفسخ وعمره اصلا مو مال هيج لبس بس هو هيج بخيل ما يشتري وما عنده ذوق

صاح عليه.. كعدي هذا السكط ابن السكط اني مو كتله تشتغل ويه ابو سعدون

دا اريد اكعده اندك الباب هو راح فتحه كله.. اهلا وسهلا تفضل تفضل احب الخطار من يجي تزورنا الملائكة

دخل ابو سعدون لابس دشداشه مقلمة وعركشينه دخلوا بالاستقبال طبعا ابو سعدون يخاف من افيان حيل لهذا السبب جان يتلفت خاف يشوفها وترزله شافها طلعت واجه دك الباب

كعد ابويه يشكيله عن الحال ميتين جوع وشغل ماكو كله.. مو كتلك شغل امين وياي هو صح فاهي وصغير بس ميخالف لا تخلي تبرد لحمته خلي يتعلم على الشغل ويشيل كبرتك

رد عليه.. لا ان شاء الله اخلي يطلع وياك

بعدها كمل.. اني اجيتك وتعرف طلبي الي اريده منك تزوجني جيهان ضاعت سولين من ايدي وكان ميخالف بس جيهان لازم اتزوجها

ارتعش جسمي من كلامه ايييع مستحيل اتزوج هذا العار مستحيل والله تقرف روحي منه وجهه معقج ورگبته معقجه شكد اكرهه المعقج

حسيت روحي ترجف من الخوف ياربي ما عندي غيرك هذا ما اريده اكرهه مستحيل اتزوجه واخاف ابويه يجبرني عليه والله اموت والله اني اصلا كارهه روحي انوب هذا يكرهني بروحي بالزايد

كمل بحقاره.. شوف ابو امين اني من اجيت اخطب جيهان صح اني رجال متزوج وعندي ولد وبنات بس ما يمنع ان اني ما التفت لنفسي واجدد شبابي

وانت لان صديقي فكرت ببناتك تعرف ليش لان بناتك محد ياخذهن ومحد يدك بابهن اول شي امهن ماتت مكتوله بغسل عار وثاني شي اختهن انهزمت وهاي بصمة عار ثانيه وبعدين هاي جيهان محتركه منو يگلبها غيري لا تتوقع شاب زاهيتله الدنيا يآخذ وحده مشوهه لا مستحيل ما ياخذها غير شايب مثلي

كلامه احسه مثل النار والتهبت بصدري الدمع ظل ينزل دمعه تواسي دمعه هيج اني بنظر الناس هيج لازم اتحطم واموت واندفن بالحياة اني الي ادور شخص يسندني ينسيني همي مو واحد شايب مخرف ماخذني بس لعب ويجدد شبابه على كولته والله احرك روحي واتحمل الحرك ولا اخلي هذا المنافق الدجال يوسخني بقذارته اكرههه اتخبل منه هو سبب باذيتي هو سبب دماري حتى خلاني ما اكدر احلم مثل العالم حتى استحي اكول اني اتزوج مثل البنات واني على كولته مشوهه

طلع من البيت وهو يحجي ويه ابويه اتمنيت اقتله واشرب من دمة العار الخسيس النذل حيوان والحيوان اشرف واحسن منه

دعيت عليه من كل گلبي ودموعي تنزل بصمت مطبق... ياربي هذا ميته سوء اريدك تعاقبه وتبهذله اني يتيمه و وحيده محد الي اريدك تجعل كيده في نحره

اجت افيان تهف من برا وكعدت طلعت العده بكره وملقط ومقص وباودر عدا مال حفافه مالج ماما وشدت الشال سوته عمامه وهن اجنها النسوان وكعدت تحف بيهن

هي افيان من جانت ماما تحف وهي تعرف مرات تساعد ماما هي وسولين ومتعلمات عليها النسوان

طلعت المره من عدنا وهي لازمه ابنها لبست نعالها ودكوله.. يله ولك بسرعه ابوك ما نعني ادخل عليهم لا يجي ويعرف هنا يطلگني خطيه ابو جيهان حقه يكتلهن

انصدمت من كلامها عود ليش هيج تحجي معقوله لان صار بينه الي صار بس ماما بريئة وسولين انهزمت من قهرهم ليش هيج الناس ما ترحم وما يعرفون السالفه ويحجون لا ويبررون لأبويه صدك الناس ما ترحم وتطعن من دون ما تعرف السالفه شنو

بالي عند سولين عمري عليها شلون هسه عايشه زينه لو لا زوجها حباب لو قاسي ويضربها مثل ابويه انكطع كل اتصال بينه وحرمونه منها

.......................

سولين

كعدت من النوم دايخه وراسي احسه يريد ينفجر وعيوني عبالك بيهن وكل كد ما بجيت من وره هذا المخبل البربري

باوعت للساعه بتسعه باليل عزااا شكد نايمه اني صايره هوايه انام عبالك وحده فاقده الوعي ياريت انام مثل اهل الكهف وما اكعد ولا اگابل هاي الوجوه الي ما تبشر بالخير عابت مدري شوكت نخلص ونرتاح

وهو طالع اكثر من ست ساعات ما يمل ابد عفيه حييل .. حيل مال ثيران مزاكط ومناطح عفيه قابليه شويه من حيلك اشو جنت اجي من المعهد انام عشر ساعات عبالك رايحه للنجف مشي

سمعت صوت الباب ينفتح يمه اجه المفلوك خلي اسوي روحي نايمه غطيت وجهي ونمت حسيت بي واكف كدام الباب بلعت ريكي وشديت على اعصابي هو صاح عليه بصوت هادئ...گاعده

مجاوبته وسويت انفاسي عود اني بسابع نومه واني اباوعله بتك عين من جوه البطانيه ضحك باستهزاء وخله وراح

تنفست بارتياح شكد مكروه من اشوفه ينكطع عندي الاوكسجين واظل حتى ما اعرف شلون اسحب نفس

ظليت على هالحال يمكن ساعتين مليت واحس عظامي تكسرت كلت خلي اطلع اشوفه بلكي راح لان وجوده مزعج لحد النخاع

طلعت شفته طالع من الحمام وهو ينشف بشعره وصدره عاري فشلت وانصدمت وهو توقف عن تنشيف شعره جان لابس البنطرون والحزام من دون قميص

تداركت الوضع وطلعت بسرعه للحمام عبرت من يم البلازما  المكسره ورحت

طبعا اكثر فقره مزعجه الغرفه ما بيها حمام اضطر اطلع برا حتى اسبح او اغسل

ظليت تقريبا عشر دقايق بالحمام واكفه مثل الصنم كل شي مدا اسوي فتحت الدوش عود عساس دا اغسل وبعدها طلعت لكيته لابس قميصه الاسود مشيت من كدامه لكن استوقفني صوته وهو يكول.. اوكفي

وكفت ودرت وجهي عليه باوعت هو لحد الان بنص الأنقاض الي كان هو سبب بدمار كل شي جاوبته.. تفضل

بلل شفايفه بحيره وهو يباوع للدمار الشامل الي خلفه كال.. تكدرين تنظفين المكان

هزيت راسي بنفي وجاوبته.. لا ما اكدر

رفع حاجب .. ليش بيج شي

رفعت اكتافي بعدم اهتمام وجاوبته.. لا بس مو اني السبب حتى انظف

قلص عيونه وهو يركز بيه كال...انت السبب بكل شي صار اليوم انتي تجاوزتي وثرتي اعصابي

جاوبته بهدوء.. جان لازم تتحكم باعصابك مو صح

رد .. دستي على الوتر الحساس

رمشت بعيوني مستغربه.. ليش هالاسم شنو يعني الك حتى تطلع اعصابك هيج وتخلف كل هذا الدمار

عض على شفته وهو يكتم بداخله هوايه من الامور الي اني غافله عنها كال.. توكلي بالله ورجعي الغرفتج

عفته ورحت وكفت بالباب شفته طلع موبايله وهو يتصل كال .. الوو عايد اريد تجي تنظفلي البيت

انقفل الخط بسرعه وهو يكول .. الوو الوو وينك عايد

دفر بقايا الطاوله برجله وكعد يسمح وجهه بتوتر وبعدها شال سويج السياره وموبايله واندك الباب اول ما فتح الباب دخله وهو يسحلة من ياخته كله بغضب... ولك شلون تقفل الخط بوجهي

رد عليه عايد كله.. صدك تحجي ما تستحي انت شلون تخابرني دكول تعال نظف البيت جنت قبل انظف الك اكول ممزوج بس هسه تزوجت وينها مدامتك عشتو

رد عليه بغرور.. مدامتي كلتلها وكالت ما اكدر واني ما احب اجبرها

جر نفس بحسره وهو يرد عليه... اوووف يالقهر هسه صرت محبس بيد مدامتك جعلني المدام وهيج اتدلل جا شو اني طايحلي جلاليق معقوله انت هيج تذوب كدام الجنس اللطيف

سحبه من قميصه وهو يصيح عليه بسخريه.. شكد تحجي هسه تنظف لو لا لو اروح اشوفلي عامله من المسطر

دخل وهو يقفز من بين الاغراض المكسره كال.. ولك شمسوي هاي المدام حصلت بوكس جلاق لك خاف مو ما تكدر خاف صايره جنازه

رد عليه بجمود.. ما بيها شي اصحى منك بس ما احب اجبرها ماشي بوصيه الرسول رفقا بالقوارير ولو هي مو قاروره على هاللسان والعراميه

ضحك باستهزاء.. ههه من يمته وانت تهتم للجنس اللطيف لا تذكرني بسوالفك القديمه ويه الصراصير

جاوبه بهدوء.. ما عندي اي سوالف قديمه وياهن وبعدين انت ليش ما تصدك اني مستحيل اتقبل هيج شخصيات بحياتي من سابع المستحيلات تلعب نفسي من المره المنحطه ادور درر اني

غمزله.. مدامتك دره

جاوبه بحده... وغصبا على شاربك

ضحك وراح جاب الماسحه وسطل مي وسرفن بجامته للركبه وهو يغني ويكرف بالانقاض.. غاب الگمر وخليته وكل نام ويه مريته واني المگابل الاشتر وكاعد وانظف بيته

ضحكت شكد عيب عليه هسه لو منظفه البيت وساكته احسن ما جاب صاحبه نظفه بس لا خلي يتأدب ليش هيج يفلش البيت ويصيح جنه ابويه من يتخبل علينه بس سوده عليه امي جانت متحمله هواي وجانت هي تنظف وره خبالاته

كمل تنظيف عايد وكعد بتعب وهو يحجي.. عمتي شاده وياي واني حامل وجهالي وكحين ورجلي ما بي خير بلكي يطلگني طلاگ تعسفي واخذ حقوقي

ضحك عليه كله.. مشكور مقصرت

جاوبه بثقه.. صدك جذب تدلل اسويلك عشاء اذا تريد خاف المدام مزاجها بنفسجي والله عمي خوش نسوان تالي وكت

اردف بقهر.. اموت واعرف ليش ساكت الها والله حيل مستفزه واطلع الواحد من طوره شعجب متحملها وادري بيك انت روحك ما تتحملها اموت واعرف شلون متحملها

جاوبه بهدوء.. تذكرني بناس لهذا السبب متحملها

استغربت منو الناس الي يدكرني بيهم خاب اندري مالي خلك افكر واحلل الامور

رد عليه.. يمعود يا ناس ادبها وطيح حظها

جاوبه بعصبيه.. دنجب لك شنو اللي بيها طولة شارب واطيح حظها عوفها مالك شغل بيها

فرحت من كال هيج هو ما كبر بعيني ولا راح احبه بس على الاقل ابزعه ويطلكني دام معلن الهدنة ومناوي يضربني

اردف بتنهيده.. اي شكو ماكو

جاوبه.. ماكو شي بس دوحي لحد الان بالخرابه بايگ ماطور البيت مالتك وحابسينه

ابتسم شبه ابتسامه ورد عليه.. لا تطلعوه خليني بس اخلص شغلي واجي اعرف شلون اادبه

عايد.. ترا جان سكران

الاشتر.. واذا سكران لازم يتأدب وياخذ نصيبه حتى بعد يعرف شلون يمد ايده على غرض مو اله

عايد.. هو ماطور وعطلان

الاشتر.. اي عادي يصلحه ويرجعه وينكتل هم ويتأدب

عايد بتنهيده... خوش هو اني حابسه عود من تفرغ مرلي لان ضجت منه حيل كل شويه وتعال فكني اريد اروح للحمام مدري شماكل مع العلم خلصتها وياه فلافل

جاوبه بصدمة.. بس لا توكله على حسابك

عايد.. لا شسالفه لكيت بجيبه عشر الالف ويرميه جايبته لفتين من جيبه اوكله

الاشتر وهو يدخن ورخه ضهره باريحيه.. زين حلو عجبتني

عايد.. اكلك صدك شراح أسوي وياه شنو العقاب

الاشتر بغرور.. لا ماكو عقاب مجرد اوبخه

عايد بضحكة.. هههه كلتلي توبخه مو

ابتسم ابتسامه جانبيه من دون ما يرد عليه وذاك خله وراح ظل كاعد تقريبا خمس دقايق واندگ الباب مديت راسي اكثر واني اريد اشوف منو انوب اجانه مره ثانيه صاير بيت كاوليه كل شويه و واحد جاي

فتح الباب وخله وطلع وياه بس معرفت ويه منو ايع شهالعيشه دياحه وجكاير وغلط

.........................

جاستن

جنت كاعد بالسنتر جان دنيا المغرب جاي انعزل ودخل حارث سلم عليه وكعد كتله... هلأ بأبو الحوارث شنو شو اليوم جايني ليكون تريد تاجر بدله للعروس المستقبلية

رد عليه بسخريه.. وشبيه خبل ااجر منك بدله لا يمعود صدك جذب

ضحكت.. بالقران ما ابدلها شبيك غير انت عرف واسطه يمعود

ضحك.. ههه واسطه ؟ اذكرك من توسط كريم لاخت صديقه لو اظل ساكت

جاوبته بفشله مصطنعه.. لا ظل ساكت بس بشرفي مو اني بدلتها العمال ما يكعدون راحه

جاوب.. ههه كتلي العمال

تافئفت.. هسه بلا لغوه كول شرايد

جر نفس وجاوبني وهو يتلفت يمنى ويسرى كال.. رجل سوليين

عقدت حواجبي.. شبي

جاوبني بحده وجمود.. اريد اوكل واحد يكتله

فتحت عيوني مصدوم من كلامه المعلن كتله بقلق... انت شتحجي شدتكول ولك  شتخربط اصلا

نفخ بضجر ورد عليه ... ما انسه اله دوسة بيتي ولا انسى شلون رعب امي واختي ولا راح انسى شلون اخذ سولين غصب مني كل هذا يدك بصدري ولو اني اظل بهالدنيا لو هو

صكيت على اسناني وجاوبته... لا اصير مجرم حرام قتل النفس وهاي الاشياء تكدر ناخذها بالقانون

ضحك بسخريه.. ههههه هو وين اكو قانون لو اكو قانون مضبوط جان خالي عامر معفن بالسجن ومشلعين اذاناته

اردف بتفكير .. لحد الان اتذكر كلمته من يكول هذا جبان ميسويها ههه اريد اشوفه الجبان شيسوي

ضجت من كلامه حيل هذا متخبل من تزوجت سولين لحد الان هو حقه لان انداس بيته وتهدد كلام امه ويحاول يرجع كرامته المهدوره بس ما توصل للقتل

قفلت السنتر وطلعنه بالسياره تنهد وكال.. جاسم انت ابو سوك وتعرف النشاله والحراميه والزايعتهم الگاع اريد تشوفلي واحد يخلصلي شغلتي

جاوبته بعصبيه.. اصحى على روحك انت شتحجي عيب عليك ولك شنو الصار وتوصلها للقتل وهذا فد واحد ملعب وما ينغلب تذكر من رحنه اله المحل حجي اديب شسوه بينه وشلون استفزازي وحقير

حارث.. حقير على روحه اذا هو ساقط اني هتلي وشيصر اصير مثله لك انت ما تدري بيه شلون روحي تفور على سولين تكرهه متحبه واكيد جبرها على نفسه وعذبها ليلي ما انامه واني افكر بيها هي لازم تصير مرتي مو مرته بس عامر الزمال جبرها ودمرها

وانهزمت وما خلصت منهم انهزمت لان تحبني وتريدني واول ما هديت على خالي هي انهزمت وهذا الشي شتفسره ما اله غير تفسير واحد ما اله غير ان هي تعشقني وجازفت بروحها الخاطري

جريت نفس وتنهدت من كلامه قافل وميقبل يرجع عن كلامهشكد حجيت وشكد نصحته بس هو متخبل وحاقد بحيث اول مره اشوف حارث بهيج شخصيه مختلفه وعدوانية لأبعد حد

......................

سولين

مو اسبوع كامل هو ابد ميحجي ويايه ابد يعني حتى سلام ميسلم ولا حتى يسألني عن شي ويجيب اكل ويخليه على الطاوله ويطلع

حلو خوش وضع اكل ونوم لا شغل ولا عمل وهذا الشي مريحني اذا يستمر الوضع هيج اني ملكة لان اني ممحتاجه لا حبه ولا عاطفته المهم اكل واشرب وانام هايشه على كولته

بس الوضع خوفني هو من البارحه باليل ماكو وهسه بالعشره باليل وهو ماكو رغم علاقتي بي ضئيلة بس وجوده يخليني انام مطمئنه لان ما اعرف المنطقه ولا اعرف هاي الناس ولا معاشرتها

كلت خلي اروح اكعد بالصاله متت مليت من الغرفه عبالك وحده مسجونه شكد كرهتها كعدت انوب البلازما كسرها ماكو عدنا شي بعد بس نباوع على وجهه

كعدت على القنفه ومديت رجليه على الطاوله وتنفست بارتياح ما اشوف اله انفتح الباب ودخل عدلت كعدتي وجريت ثوبي على رجليه واني اباوعله بقلق

شمر روحه بصفي وهو يمسح على جبينه بضجر حسيته كولش قريب مني بسرعه وكفت دا اروح ما حسيت غير بيده سحبت ايدي

باوعتله بقلق شفته ساند على راسه على تاج القنفه ومرخي جسمه همست بخوف وقلق.. محتاج شي

مجاوبني بس عيونه تتاملني واحسه مثل واحد نعسان كال.. بعدج زعلانه

باوعتله برهبه وعقدت حواجبي...على شنو

رد عليه ببرود.. اخر موقف

جاوبته بحزن مصطنع.. اي زعلانه لا تحجي وياي وما ارضى لو شتسوي ما ارضى بس اذا طلكتني ارضا يمكن

رفع حاجب بغرور وجاوبني.. هه ظلي بزعلتج افضل

سحبني حيل وكعدني بصفه عطت بصوت عالي وكورت ايدي وضربته على صدري... ايدي انخلعت  لا تقارن جسمك بجسمي

ضربني على ظهري حييل حسيت فطست عود يشاقه عشتو عطت مره ثانيه واحس غصيت كال.. جسم الانثى ميتقارن بجسم الرجل

جاوبته عود اني قويه.. بس اني قويه واعادل الف رجال اصلا اني رجوليه

رد عليه بثقه.. وجهة نظر الرجوله للبنيه مرات تكون ضروريه بس الانوثه للرجال ما الها مبرر

جاوبته واني اگلب بعيوني.. ايي صح ومرات الذكور يتخبلون من المراه القويه

ابتسم بسخريه.. تحسسيني مديرة شركة ابل استقري شويه

ضجت منه .. هسه شنو شعندي كاعده يمك اريد اروح ادخل بغرفتي اقصد بزنزانتي ههه

رد بانزعاج.. اوووه شكد درامية ومزعجه

جاوبته.. مزعجه عوفي اروح حتى ما يخرب مزاجك عيني

ضربني على رجلي بكف ايده عطت من سخافته وجرئته كال.. گومي شكد تصرخين

جاوبته بعناد وعصبيه.. شوو ما اگوم كاعده هنا

اندك الباب باوعلي گلي .. ادخلي جوه

جاوبته بعدم اهتمام .. ما ادخل ضايجه اريد اكعد هنا

سحبني من ثوبي ناحية الصدر وقربني عليه لزمت ايده بخوف ورعب جاوبته.. والله ادخل اصلا اتشاقه وياك

جاوبني بهدوء .. انتي حيييل مستفزه والضرب ما ينفع ويه البهايم تحترمين نفسج لا اتخذ غير اسلوب وياج

صار عندي فضول والباب مستر يندك.. شنو الاسلوب الي تتخذه

ضحك بخبث.. هه افتح الباب وبعدين افهمج تمام

خليت ودخلت جوه وكالعاده ظليت اباوع من الباب والله ضايجه يعني شسوي ماكو واحد تحجي وياه لا تلفزيون لا موبايل عبالك محبوسه انفرادي لهذا السبب اكيف من واحد يجي واظل اتسمع على كلامهم ولو كل شي ما افهم بس احب اقضي وقت وياهم

اول ما فتح الباب حظنه حييل وهو يشمه وذاك يبادله الحسن بكل حنيه ويبجي ذاك يبجي مثل الطفل وشاف ابوه كان معقوله ابنه

دخله وهو يمسح بدموعه ويحجي وياه بحنان.. حبيبي اسكت كافي لا انت رجال ما احب اشوف دموعك

شهك ذاك بحسره وهو يرد عليه.. ما متخيل ابد عنك كل هالفتره بس شسوي لازم ابتعد حتى محد يشك بيه خووويه مشتاقلك اكثر من روحي وبالي عندك والاتصال ما يريح الروح مثل ما احظنك واحس نايم لحظه ابوي

ضربه على كتفه وهو يشجعه ... دموعك مسحهن والحق لازم يرجع لصحابه انت بطل وكفو وحتى لو ما كدرت تسوي شي اظل اخوي وافتخر بيك

رجع حظنه واتوب يبوس بيه ملهوف عليه ورجع باي ايده بكل حب واحترام تفاجئت اول مره يجي واحد محترم ويحجي بأدب عكس تجمع العفطيه لجامعهم عليه

كعد بصفه وهم يسولفون كله.. لا تخاف حتى لو ما خلصت المهمه هذا هو المهم سلامتك واني فخور بيك لان انت حاولت

ضحك وهو فخور بنفسه... لااا شلون تحجي هيج حاولت و وصلت وهذا السند عندك

خطفه من ايده بنشوه وانتصار كله... اوووه لا ما اصدك تحجي صدك لك صفاء شلون جبته والله انك كفو وبطل وتستاهل مني هديه ترفع الراس

نزل راسه بحيره وحزن وجاوبه.. استغليت  هدى وهي الي وصلتني للسند

عقد حاجبه وهو يتسائل.. شلون استغليتها ؟

بلع ريمه ورد عليه... گلتلها اني احبج وصارت بينه علاقه مو هنا المشكلة المشكلة تعلقت بيه واني ما احبه ومستحيل اتزوج بنت سليوه تعال طلعني من هالورطه

عض على شفته ورد عليه... لا صفاء ما ردت هيج كتلك بنات تحسين طلعهن من السالفه جان عرفت شلون تستغل جياد وزياد

هز راسه بنفي.. ذول نغوله ما ينغلبون ما لكيت كدامي غير هدى وهي الي سوالي مجال وخلتني اخذ السند من دون علم اي واحد حتى من دون علمها اني بگته بوگ بس هسه محتار شلون ابتعد عن هدى ما اريد اعلقها اكثر ولا اريد اكسرها والبنيه فقيره مو مثل اهلها

رد عليه.. اسحب نفسك تكتيكيًا

جر نفس عميق وزفره وبعدها سأله الاشتر.. مصطفى شلونه بعده راسه يابس ويتصرف ضدي

جاوبه... اييي احد الان ما متقبلك

هز راسه بوعيد وهو يتنفس بغضب.. اوووف لو ما مصطفى عزيز عندي جان عرفت شلون اتصرف وياه بس ما تكدر احس نفسي مقيد احبه ما اكدر اضغط عليه ولا اكدر اجبره على شي

واردف بقهر... ما اعرف شلعبوا بعقله ساهر النذل وتحسين الكلب بحيث ابد من يشوفني ينهزم الف متر وشكد حاولت وياه ما كدرت

جاوبه صفاء... مصطفى راح يضيع مخلينه على راحته وساهر النذل جايبله وحده اسمها روعه هاي فد وحده ادبسز معروفة ومصطفى متخبل عليها شايف من تزعل منه يشرب العرگ بالقندره

نفخ بضجر وهو يمسح وجهه بتوتر... لازم ارجع مصطفى الي حتى لو اجبره ما اكدر اعوفه هيج واني اعرف غاية حارث كل شي ولا مصطفى يصير عليه شي

جر نفس وجاوبه.. خلصه من روعه وهو يصحى على زمانه لان هاي مسويته طلي لك مخلت على حاله حال انوب يشرب ليل ونهار شوكت ما تخابره طافي وصاعد الراسه

جاوبه وهو يدخن جكارته الثانيه.. بسيطه اعرف شلون ارجعه وساهر اذا ما ندمته فلا اطلع الاشتر

كله.. سالي شسوت

ضحك بخبث..نقطه وحده وساهر يسيس

ابتسم وجاوبه.. احس المصايب والمشاكل كبرتك اكثر من عمرك تدخل مصيبه واطلع من مصيبه

رد عليه بفخر وهو يضحك...اذا وكعت بمصيبه مو معناها فقدت كل شي لا بالعكس راح يكون اختبار اليه بمدى شجاعتي وطاقتي

بلل شفايفه وتنهد .. كفوو منك واني هسه لازم اروح اخاف يشك بيه ساهر وما اكدر اجيب باقي السندات

وكف وياه ولزمه من اديه وهو يوصي.. يله روح بس دير بالك على نفسك ولا تستهين بكل شي ترا ذول حقراء وحتى بمصطفى لا اثق لان لحد الان مصطفى يعتبر عدو مفهوم

هز راسه بقبول بعدها انطاه مبلغ من المال وخله وراح وهذا الاشتر هماتين راح وياه استغربت وخفت هذول شديسوون خفت خوف مو طبيعي يربي عصابه شنو شو وضعهم ما يطمن وناس تطعن بناس وكل يوم اكتشف اسماء جديده بوكر الاشتر شنو السالفه

..................

رنا

اليوم كالو يجي كريم من السفر وجدو الشيخ ذابح طليان عاد اني اموت على العزايم روحي بالعزايم اولا اكل بلاش وغسل مواعين مو عليه

خليت ورحنه اني وامي لگينه كريم جاي وبالحمام وبيبي ام حسن تركص وتهوس وفرحانه بي

وحنان يا مصيبة حنان حتى الجايه من الصالون مو هيج ممكيجه لابسه ثوب احمر ابو الشراشيب ورشتا احمر عوزها بس ثور ينطحها وحاطه حمره حمره مسويه روحها قوطية معجون

جانت فرحانه وتعبس بالهيل ادري هو شنو كريم جاي يبوسها وحاطه طن هيل بحلكها

امي هم ظلت تهوس وتركص لكريم فرحانه بيه وهو طلع من الحمام لابس تراك اسود والخاولي على رگبته ضحك من شافنه هو صح ابن عم امي بس عبالك اخته باسها براسها وحظنها وهي كذلك

واني سلمت عليه واهوس واركص...افرح لابن الهم تحتاج ايامه افرح لابو العم

ضحك وخله وراح يم جدي لان جايه ناس وسميره ماتت كل شويه وفزت من ينفتح الباب عبالها اجه كريم دخل وهو ابد ولا دخل

بعدها من خلصوا غدا دخل صاح عليه كال.. رنا تعالي اريدج

خليت ورحت يمه كتله.. هااا ابو الكرم تفضل جاي كهوه

ضحك كال.. اريد اسال على بنات عامر شلونهن

جريت نفس وجاوبته.. شلونهن سولين تزوجت واحد ممعروف اصله من فصله واحد هتلي وعصابجي مدري شنو وافيان وجيهان يم عامر اكيد مسكط حظهن

مسح على شواربه بتوتر كال.. محد راح عليهن مووو

جاوبته... لا محد هو وين ابو سعدون الفگر يخلي واحد يوصلهن خالي ما يلفي للبيت بس هذا المنافق كل حجايه بحلگ خالي فمحد يكدر يروح

هز راسه بقبول.. يله بسيطه نشوفلنه حل

سالته بضحكه.. صاير حلو

ضحك.. مو احلى منج

ابتسمت.. شفت مرت ابوك عوزها بس ثور ينطحها

هز ايده بقهر .. شكد مكروهه وقبيحه مرتين غيرت خطي من وراها

استغربت.. ليش تتصل بيك

جاوب بارتباك.. اي عساس تسال على ابن رجلها مو اني بمثابة ابنها

هزيت ايدي.. خرب حظي ما ادري ليش احسها مكروهه بس اكولك احجيلك شغله بس ما تكول

عقد حواجبه كال.. شنو

التفتت يمنى يسرى وجاوبته.. سمعتها تخابر بواحد تخون بجدي وتدعي حتى على جدي

كال.. سجلتيها

جاوبته... لا وين ارتبكت ما كدرت

رد عليه بقهر.. ثول حتى ثول لازم يكون عدنا دليل عليها حتى ناخذه مستمسك مره ثانيه من تسمعيها سجليها

عافني وراح واني كسرت عن ملامحي .. خيير شنو من كلهم اني المحقق كونان انوب اكعد اصور جا متصورون انتم انوب سميره اصير شريفه براسي شدخلني

........

سولين

كعدت على صوت طكطكه صوت المطر من يضرب الارض وينعشها ويسقيها طلعت للصاله وفتحت الشباك باوعت شفت المطر ينزل بكل قوه على العشب المحاوط الشقه ويسقيها وهواء عالي متناغم ويه خفيف الأشجار

ابتسمت براحه واني امد ايدي من الشباك والتمس قطرات المطر شكد احب المطر هسه لو اني ويه اخواتي جان استمتعنا بهذا المنظر لحلو وتجلت ارواحنا

وعلى صعيد ابتسامته اثار انتباهي سياره عاليه سوده واللايت مالتها ضاويه لخطوات الاماميه والمطر ينزل عليها بكل قوه نزلوا منها تلاثه ما شفت منهم بس السواد والدخان يطلع من شفايفهم سديت الشباك ودخلت كعدت بالصاله

كلت بس يجي اجبره يطلعني بالمطر لان اني من عشاق الشتا وهيج اجواء وغصبا عليه يطلعني

حسيت ببروده خليت ودخلت للغرفه حسيت بشي يطكطك بالصاله كلت يمكن هو اجه فتح الكنتور وطلعت صايتي وبعدها حسيت بربكة قويه واصوات اول مره اسمعها ارتجفت اعضائي و وكعت الصايه من ايدي

ما اشوف اله اقتحام صار بالغرفه اربعه عمالقه لابسين كلهم اسود و وجوهم ترعب رجفت بخوف وفرحت عيوني اني يمكن اتخيل رجعت خطوات واني اصدق الواقع الي صار گدامي صرخت بصوت عالي ... منوووو انتم اطلعوا اطلعوا

جانوا واحد بيهم مبين بالخمسينات لابس بالطو طويل وعاقد حواجبه بخبث عبالك من ذول المافيا والثاني يجي بنهاية التلاثين و وجهه مبين مو رحماني وسخيف اكثر واحد بيهم رعبني وخوفني

وشاب طويل حييل بي لمحه من الاشتر نفس طوله وهيئته بس انعم من الاشتر ومبيت اصغر بهواي بس طويل حتى يمكن اطول من الاشتر

والثاني لا ضعيف وناعم حيل وجهه مزلوغ دلع واحمر

صرخت بصوت عالي واني ارجف... منوووو انتم اطلعوووا اطلعوا ادبسزيه حقراء

ضحك هذا الوجهه مو رحماني وباوع للخمسيني كله.. ابو جياد هاي زوجته خوش صايدله صيده اللعين

ابتسم بشبه ابتسامه ورد عليه... منو قبل يناسبه اكيد ابوها عار مثله ودايح

بلعت ريكي بخوف ولزكت بالكنتور والرجفه اعتلت كل جسمي اباوع للعيون كلها قاسيه وما بيها رحمه ركضت اريد اطلع من الغرفه

هذا الحقير الي بي شامه جبيره لحميه بخده لزمني من خصري ورجعني وهو يكول... له له له بعدنا ممتعرفين وين رايحه

وخرت ايده القاسيه من خصري واني اصرخ ... وخرررر حقير لا تلزمني اشتررر وينك وخررروا مني عوفوني مالي شغل

لزمني بقوووه من رگبتي وهزني حيللل كال... السند وييين

بلعت ريكي واني التقط انفاسي هزيت راسي بنفي صرخ بوجهي بصوت عالي كال... ويييينه

جاوبته بانفاس مقطوعه... معرف

الشاب الطويل كله بجمود وهو واكف مثل الصنم وكأن انقهر على حالي ودموعي كله.. خليها تتنفس خليها تحجي

رخه ايده من حنجرتي وحجه ويايه بهدوء.. احجي بابًا وين السند ضمه الاشتر

جاوبته برعب ودموعي غسلت وجهي .. معرف والله معرف هذا البيت كله فتشوه شتلكون اخذوه مالي شغل ولا اعرف عنه شي

باوع للخمسيني وكله بذوبان وخدر.. تحسين ممكن شويه تخلونه على انفراد ما اكدر اخليها بنفسي

انتفض الشاب الطويل وسحبني منه من ايدي وهو يحجي وياه كله... لا مستحيل متنفرد بيها مشكلتك ويه الاشتر تحلها بينكم ما تدخل اطراف لا توصل للشرف

رد عليه بارتباك. .. هههه شبيك مصطفى اتشاقه وياكم ممعقوله ادنس شرف بنيه لخاطر الاشتر واصير زاني

ابتعد عني كله.. هيج تمام

رجع وكف بمكانه وهذا كعد يدخن ويحجي بحقاره يستفزني جاوبته.. لا تصير عليه رجال ذاك الاشتر وروح حاسبه مو شفته طلع واجيت عليه لان جبان

تقرب عليه بهدوء وخبث وجكارته بيده كال.. ما شاء الله لسانج اطول من لسان رجلج خاف هو لسانه مكصيته اكص لسانج

وبصوره مباغته منه ما حسيت الا طفه الجكاره بشفايفي صرخت بصوت عالي وكعت بالارض واني مفرفحه من لسعة الجكاره

نهاية البارت ... تبع

كونوا انتم كونوا بخير ... احبكم 💔

البارت اليوم طويل تعويض عن البارت المحذوف المهم لا تنسون التصويت

وانطوني انطباعكم عن القصه حلوه لا 🥲

تابعوا هذا الحساب فضلا وليس أمرا ان شاء لله بي قصص حلوه😍
adyan_fadil