رواية #وكر الأشتر الفصل الثالث عشر 13 - بقلم الكاتبه سمو العراق

البارت الثالث عشر
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔

ماذا لو كانت هذا الليله الاخيره لي
موجوع قلبي💔🥺

غسلوا عن السحكات لان الكيبورد عندي يبدل الكلمات الي اعرف منين اعدله تعلمني 🥺💔
............................

الم ينهش بشفتي وصدري جنت الهث بقوه ودموعي اختلطت ويه مأساتي

ياربي اني والله مسكينه مجبوره اعيش بحزن دفين وآهات مكبوته

نمت على جنبي وغمضت عيوني واني اجهش بالنحيب حطيت ايدي الي ترجف بجزع على شفايفي تمتمت بانكسار واني استنجده... وينك

نهيت كلمتي بشهگه عاليه باوعت للوجوه شفت الشاب الي اسمه مصطفى تنفس بخوف ويباوع عليهم وكآن واحد متورط وانقهر على حالي

عاط بساهر الكلب وهو يكوله... ليش هي مالها ذنب

جاوبه ساهر بحقاره.. لسانها طويل واذا مجانت تحت تأثير التهديد مراح نستفاد شي

جاوبه مصطفى بحيره.. بب هاا بس مو هيج تكدر بس تهدد من دون متاذيها

جاوبه ساهر... لا مستحيل اقتلها بس اني متلذذ بعذابها وبعدين لا تنسه طبيعة شغلنا

ابتلعت ريكي بخوف وصدري يهبط ويصعد دعيت ربي يخلصني من هاليلة الگشرة نهضت متوجعه ومتألمة

بعدها مصطفى تنهد بعدم ارتياح وابتعد تركه يكمل شغله

تقرب مني خطوات واني تركت العنان الصوت صريخي ظليت اصرخ بهستيريا حتى ما اكدر اصرخ من الم شفايفي ظليت اتلوى من الآلم

يارب شنو الي سويته اني حتى احصل هالكم الهائل من الالم والغدر ليش ابواب الجحيم انفتحت كدامي

اذا هو هيج حياته مليانه غموض وقتل وثارات ليش يورطني وياه شنو ذنبي ليش اني اواجهه اعدائة اني هو مكادرتله انوب اعدائة

صرخت واني الملم نفسي ابتعد عني لا تتقرب مني .. والله ما الي ذنب ولا اعرف اي شي عنه اني اصلا اصلا ما اعرفه هو منو اني مظلومه وياه روحوا انتم وياه اني مالي شغل

صرخ بيه مصطفى بصوت عالي وهو يكوله.. طلعها من اللعبه كافي

تحسين العجوز عاط بيه وهو يكولها... مصطفىىى لا تغرك دموع التماسيح هاي مرته ستره وغطاه لازم تعرف وين اخذ السند وهاي ورقه رابحه النه دوسة بيته وضربنه لمرته هاي بصمة عار على جبينه

مصطفى بلل شفايفه وهو يتنفس بغضب گله.. طلع النسوان من السالفه ما ادري ما مرتاح للشغله

جاوبه ساهر.. اطلع برا اذا ممرتاح

مصطفى بتوتر.. لا مرتاح بس خلصوا بسرعه لا يجي الاشتر

رجع لزمني مره ثانيه ساهر واني عبالك تكهربت انغمرت بشعور من الحزن وصرت اصرخ بأقوى ما عندي... ما عندي شييي عوفني عوووفني والله اشتكي عليكم والله

ضحك بصوت عالي... هههههههه وين اكو دوله وتشتكين وخاصه النا احنه

صرخت بوجهه بهيستريا... انتم منووووو انتم منوووو

رد عليه وهو ينزل راسه لمستواه راسي كال.. اسألي زوجج هو يعرف

جاوبه حجي تحسين وهو يكوله ... مبينه ما تعرف شي

ضحك بخبث وهو يدير وجهه عليه كله.. ترا ادري متعرف شي بس هذا تلقين درس للاشتر حتى يعرف شلون يندك بساهر تاج راسه

مسحت وجهي من الدموع واحس شفايفي تضاعف حجمها ما اعرف شبيه سيطرت عليه كأبه قويه بحيث حسيت بظلم وغبن كلش قوي دا اريد اكتله اضربه اسوي شي يرد كرامتي المهدوره

بس للاسف اني بنص عمالقه وما املك النفسي غير الدعاء هذا جان تنكيل للاشتر تهديد واضح وصريح حتى يكلوله ان مرتك بخطر لا تلعب بالنار

تقرب مني اكثر ولزمني من عنقي وحط المسدس براسي خضني حيل بيد وحده كال... هذا الكلام وصلي لرجلج الزفت گليله يكول ساهر راح اشتاقلك واتمنى احظن جثتك

حط اصبعه على شفتي وهو يضغط مكان الالم صرخت ولزمت ايده دفعته حيل ضربته ببطنه ضحك وهو يمسح مكان الضربه كال كليله .. هذا درس صغير وان شاء الله نكمل باقي الدروس ؛ جان يحجي وياشر بمسدسه على جرح شفتي ؛

ضحك تحسين وهو يكوله ... ههههههه والله يا ساهر انت كلب كل مره تخلي ذكرى للاشتر ما ينساك بيها من حاجبة لشفة مرته

جاوبه بغرور وهو يركن مسدسه على خصره بالگراب ولبس سترته كله.. بس حقير ميتوب مني ولازم احصل السند واموت واعرف منو اخذ السند و وصله اله محد يكدر يدخل بيتي اذا مو مني وبيه

جاوبه هذا الولد الضعيف الناعم الاحمر كله.. احتمال كبير صفاء

هز راسه بنفي.. ما اعتقد صفاء ما يدخل بيتنا الا الاشتر داز ناس واني مموجود بس زوجتي موجوده شعجب

بعدها فتح الكنتور وهو يسبب فوضى عارمة بالغرفه وعبالك متقصد حتى الميز داره وشمره على الارض وفراش الجربايه وسحب الجربايه خلاها بالوسط وجان اكو قنفه صغيره جفاها على وجهها ما عرفت الغايه من هذا الشي شنو وليش هيج خرب كل شبر بالغرفه ووسخها

طلعوا من الغرفه واباوع لهذا الي اسمه مصطفى شفت بعيونه نظره غريبه نظره حزن على ما اعرف شنو بس حسيته يريد يتطمن عليه اكثر وكأن مقهور عليه تنهد وخله اديه بجيوبه وطلع وراهم

اول ما طلعوا واني وكعت صريعه حاولت اعدل نفسي مكدرت واحس بثقل براسي والحزن سيطر عليه عبالك سهم اخترق صدري

اشهك من البجي حسيت نفسي بكابوس مريع عقلي حسيته تخدر اكثر من جسمي حضنت اديه الصدري واني ارجف من الوجع گلبي يدگ بسرعه جنونيه وجسمي عبالك تريله داست عليه حسيت بالالم غزه شفايفي والدمع المالح جرح خدي ظليت اشهك واني محتاجته اريده يجي اعاتبه اجرح احساسه مثل ما جرحني واذاني وخلاني فريسه سهلة الهم

.............................

جيهان

ما اعرف شبيه حسيت بكابه غريبه سيطرت عليه حسيت روحي تريد تطلع بس ما حجيت

افيان جانت مقابيلي وهي تقره بكتاب الاحياء باوعتلي بدون نفس كالت.. انت شوكت تنزعين هاي البخناگة ؛ تقصد الحجاب؛ مو والله مليت منج ليل مع نهار لابستها ما تختنگين

هزيت راسي بنفي... لا مرتاحه هيج

نفخت بضجر وردت عليه.. متنه جوع شلون منتعشه

رديت عليها.. اسوي تمن ابو العدس وخلي امين يجيب روبه

تنهدت بضيق.. خوش سوي وخليني اني اروح  للمحل هاي العالم ما تتأمن وهو طفل

استغربت .. شقصدج

جرت نفس وزفرته كالت.. هاي الناس ما تتأمن اخاف واحد يستغله وهو طفل ويعتدي عليه

فتحت عيوني مصدومة وكفت تذكرت من ابو سعدون العار تحرش بيه ورجعت من الخوف احتركت كلتلها.. بس هو ولد وابوي يكول الولد احسن من البنيه تلبسه وتطلعه وماخاف عليه

ضحكت بسخريه وهزت ايدها كالت.. هذا ابوج خبل عقله مو براسه حطو مكان عقله قوطيه ولج هاي البشريه على الحيوان ترجف رواحتها مو انوب طفل ماكو فرق بين بنيه و ولد وانتي دتشوفين الاغتصابات كلها اطفال ولد كان او بنيه وتعرفين بسبب منو سبب الاهل الي تخلي طفل يشتغل وما تعرف اكو نفوس دنيئة يمكن تستغله وتستغل ضعفه شلون هسه سالفة ابوج يريد يشغل امين ويامنه عند ابو سعدون الساقط

شمئزيت من كلامها وكتمت دمعتي كلتلها... بعد امين منخلي يطلع ابد اخاف عليه خاف يسووله شي وهم منطقتنه مو زينه خاف واحد يستغله

نفخت بضجر و وكفت كالت.. اني اروح اجيب هو منو يندگ بيه ابو سعدون ومن يشوفني يعزل من الخوف خاف ارزله

كلتلها بخوف... لا يشوفج ابويه

عقدت حواجبها بعصبيه وباوعتلي بنظره حاده من فوك ليجوه كالت.. بي خير خلي يتسوگ ويترس الثلاجه مو فالح بس بالعياط

لبست صايتها وطلعت واني اباوع الامين يعمري عليه طفل ناعم متكور على نفسه ونايم لازم ربع بيده وملامحه كلها حزن

بجيت بصمت عليه تقربت منه بست ايده سوده عليه بنفسه كل شي بنفسه امي وحنية ابويه بنفسه يلعب مثل الجهال وما يخاف من باجر بنفسه. يداوم مدرسه بملابس جديده مو عتيكة

بست اديه ورجليه ورحت طبخت تمن واني ابجي وبالي عنده كسر خاطري ما اكدر احمي واساعده ابوي قاسي واحنه منكدر عليه المن اروح المن التجي ما عندي غير هذا الاخ واخاف ابويه يضيعه من ادينه

دخلت افيان شايله علاگة جايبه روبه وجايبه حلويات وعصير كالت .. اكلي انتي وامين ضميهن لا يشوفهن ابوي ويتخبل يگلي تصرفين وما تنطيني فلوس

اخذتهن من اديها وتشكرت منها بصراحه افيان حيل فايدتني من بعد ما راحت سولين احسها تحملت مسؤوليه اكبر من عمرها وتحاول بكل طاقتها

كعدته وصليت عشاء خطيه جان ياكل بهدوء حضنته واني اضحك.. اموني حبيبي شوف فافي شجابتلك كيك وعصير وحلويات كلهم الك

صفك باديه فرحان... هيييي شكرا فافي عاشت ايدج

لزم العلاگة وهو فرحان بيها ويوزع علينا واحنه نضحك وياه واستلمته افيان تدرس بي وتقري كلتله... لازم تقره وتصير شاطر حتى تصير دكتور وتزيدله جرعة مخدر لابوك وتموته مفهوم

ضربتها على راسها بالكتاب.. ولج خبله لا تعلمين الولد على الأجرام حرام عليج

حكت راسها وردت عليه.. ابوج قتله حلال هيج كون سم جريذيه ونخلص منه لا والله كون مادة الفورمالين ونخلص منه

عقدت حواجبي بتسائل... شنو هاي انوب

جرت نفس وزفرته.. ماده سامه ما تنطي مجال بسرعه يم ابو اصيبع ببير عليوي حتى عزرائيل ما يلحك يقبض روحه

تعصبت عليها.. انجبي لج حرام هيج تحجين استغفر الله ربي

اندك الباب وهي طلعت كالت .. منووو

رد عليها... اني اني ابو سعدون الوالد موجود بنيتي

تخصرت وهي ترد بغضب.. لا مموجود خير رايد شي

جاوبها.. لا بس جايه زايره

ردت عليه... زارك عزرائيل ان شاء الله انت وابوي تزور ابوي اكثر من ابليس كافي بعد لا تجي واكع علاقتك بي لان من صادقك ما شفنه خير بصراحه

جاوبها بغضب.. صدك ما تستحين بسيطه يجي عامر واكله عليج يرجع يربيج من جديد

جاوبته بسخريه... يمه خفت ظليت ارجف دروح روووح شكد قديم من كثر ما قديم واحد اذا دفعك تطلع تراب

سحبتها واني احجي عليها.. ولج كافي شكد تجادلين

سحبت نفسها مني وهي تعدل بنفسها كالت.. هذا اذا ما تلزمينه دك رزايل ما يمشي عدل ويظل كل شويه رايح جاي عبالك بيت مال ملاهي كل شويه وجفت علينه دمشي ولي صلي اقره قران ايييع شكد تافهه

جريت نفس كلتلها.. اكولج هذا ابو سعدون يريد يخطبني شسوي

ردت بغضب.. دخلي يعيدها ويخطبج الا اشك حلكه ما كافي خسرنه سولين من وراه وابوي زوجها لواحد ممعروف اصله من فصله

رفعت ايدها وهي تدعي بصدق.. ياربي اريدك كون تحرك گلب ابو سعدون الجايف مثل ما يحرگ گلبنه كون هيج مكسر ويمشي بعربانه

ضربتني .. ادعي ولج ادعي انتي فقيره دعائج مستجاب

رفعت ايدي وادعي وياها شويه ودخل ابويه حط جدر التمن وخبط فوگ روبه وياكل ويلوخ بيده عبالك ابد مماكل شلون لعبت نفسي يخبط خبط بالاكل

ما نسمع بس هوسه وصياح طلع ابوي يركض ما شاء الله صاحب غيره واحنه نباوع من الباب

سمعت واحد يجاوب ابويه على سؤاله وهو يكوله.. ابو سعدون دعمته سياره ونقلوا للمستشفى

وافيان دخلت جوه وهي تهلهل... گللللللللوش ياربي الحمدلله والشكر الف الحمدلله والشكر متشمته بالعباس متشمته الحمدلله ما ضاع دعائنا على الخالي بلاش الف شكر وحمد الك يارب

واني ابتسم عليها صدك مخبله فافي

بعدها ما اعرف شبيه سيطر عليه الحزن اريد امي ما اعرف ليش احس سولين مو بخير وحتى احس امي ممرتاحه يراودني حلم مزعج يبين ان امي ممرتاحه معقوله ماتت الله غاضب عليها ليش اشوفها ممرتاحه

وهذا الشي كولش ديضوجني اتمنى تكون امي مرتاحه وبالجنه لان حيل تعبت ويانه وتحملت اكثر من طاقتها وتعبنا من راحت وتبهذلنه ياربي ريحها وارحمها ونور قبرها واعفوا عنها واغفر الها

.................

سولين

واني على هالحال والدموع بركان من نار حسيت بخياله الضخم خيم على هيئتي رفعت عيوني اله واني فاتحه شفايفي ما اكدر اسدها بسبب الحرگ الي صار بيها

تذكرت اختي جيهان من جانت طفله واحتركت وجانت تعاني من الوجع والتشوهه سوده عليه اني بشعه ومدا اتحملها شلون هي جسمها وجزء كبير منها بس الشفه حساسه احس روحي فازت وطارت من روحي من الوجع

اول ما رفعت عيوني اله هو تخبل سلط نظراته عليه وبعدها انتقل بنظراته للمكان وهو يشوف الانهيار الفضيع الي صاير بالغرفه بله ريگه بتوتر وعض على شفايفه من دون ما يسألني كال... ساهر

تقرب مني وكعد ركبه ونص رفعني من اكتافي وهو يهمس.. سوولج شي

بعدت شعري عن وجهي واني اصرخ عليه... ايييييي سوووولي سولي ضربوني سبوني خوفوني ورعبوني اكرهك انت السبب انت السبب بكل شي الله ينتقم منك وينتقم منهم ليش هيج ليش والله عزت عليه نفسي والله انهدرت كرامتي

شد على شفايفه بقسوه وقبض على ايده بقوه وملامحه تحتد ويه كل كلمة اكولها

رعش جسمي من الخوف والقلق وحلگي گوه احجي منه اشرتله على شفتي ... شووووف شوووف هذا الاثر اذا راح منا من گلبي مراح يروح ولا راح انسه الي سووه بيه ربعك ولك اكرهك شلون شلون خوفوني شلون رعبوني

باوعلي بضياع ولزمني من اكتافي وهو يثبتني باوع الوجهي وارتكزت عيونه على شفتي السفليه الي بده يتضاعف حجمها واحس بيها مثل الي تكتلت

صرخ بوجهي بقسوه ... شسوووالج شلووون حركج احجيلي احجييييي بشنو حركج بشنووو

رعبني اكثر من ما اني مرعوبه ابتعدت عنه وركضت مهزومة منه بنهاية اخر الغرفه ارجف من عصبيته وخباله

تقرب مني اكثر واني صوتي انبح من الصراخ عبالك وحش يتقرب مني وكف بأسى على حالي كال.. احجيلي لا تخافين والله اطلع حقج من عيونهم

جاوبته بدموع حيرانه... طفى الجگاره بحلگي

ضرب الحايط بقبضة ايده تقرب مني اكثر وسحبني من ايدي زرعني بصدره وتحكم بيه جنت ادفع بي واصرخ واريده يبتعد عني بس ما كدرت جنت تحت إرادة القويه ما خلاني ابتعد عنه

هدئت من ثورتي وانهياري واني استمع الكلامه واحساسه وهو يگول.. كافي بنيتي كافي يبويه والله حقج اطلعه من عيونهم بس اهدئي وخلينه نجحي

شهكت بحضنه وتمسكت بقميصه.. خفت حييل عساهم بوجع گلبي

رد عليه بحزم .. حق الجگاره هاي ارجعه الج تكيه كامله واني الاشتر

رجفت ودموعي بللت قميصه.. اريد حقي انهدرت كرامتي وبدون سبب

شدد عليه بحضنته وهو يدفن راسه بشعري رد عليه.. حقج اطلعه من عيونهم وكرامتج محفوظة وداعة امي اخليج انتي تاخذين حقج منهم مو اني وانتي تهينينهم وتذليهم

شهكت من بين دموعي.. بس اظل اكرهك وانت السبب

رد علية بلهفه.. ميخالف عادي واعرف اني السبب مجان لازم اعوفج وهم حقراء وكلاب وتهددت منهم بس مجنت متوقع توصل بيهم الخسه والنذاله لهنا دموعج غاليه والله ابجيهم دم

سحب ايدي وطلعني للصاله كتله.. الغرفه وصخه خلي يجي عايد ينظفها

ابتسم من بين حزنه عليه كال... لا ساهر ينظفها احنه تعلمنه مو يدمر يرجع هو يعمر مو صح

جاوبته واني امسح بدموعي.. بله تأخر ساهر شلون اظل الغرفه خايسه

رد عليه .. لو تظل سنه مدام هو السبب هو ينظفها

كعدت على القنفه جابلي مي وهو يشربني بحذر كال.. على كيفج لا تتاذين

بجيت بصوت.. جنت منتظرتك نطلع بالمطر بس هم ما خلوني اكمل باقي احلامي ولا انت اجيت

وكف بسرعه وفتح البارده كال.. بعدها تمطر خلينه نطلع

جاوبته.. ما اريد انكسر خاطري حتى ما اتمنى اطلع

كعد مقابيلي ركبه ونص واحتظن اديه البارده قشعريت من دفو اديه كال... ثقي بيه والله ساهر اخلي يركع كدام رجلج ويبوسها ويعتذر منج

عضيت شفايفي وتنهدت .. هو احقر واحد بيهم

حجه ويايه بهدوء.. تعرفين اسمائهم كلهم

هزت رأسي بإي.. واحد اسمه تحسين و واحد اسمه مصطفى

فتح عيونه مصدوم كال.. مصطفى همييين

هزيت راسي بايجابية... اي بس هو الوحيد مقبل ياذيني وجان يحجي عليهم ولزمهم

صك على اسنانه وتعصب اكثر كال... لا يا كلب يا حقير انت وياهم تدليهم على بيتي بسيطه مصطفى يصير خير اذا ممشيتك صفح فلا اطلع الاشتر

جاوبته باستنكار.. هو الحباب بيهم

باوع بعيوني بحده كال.. جيته وياهم بيها الف حسبه يا حباب انتي الثانيه

ضجت جاوبته.. لا تتعصب عليه ترا ضايجه راعي مشاعري وسايسني

رد عليه بقبول.. تمام نعلن الهدنه وهسه گومي خلينه اخليلج علاج

حطيت ايدي على شفايفي... لا مستحييل انوب تحطلي دهن مال رجلين اروح للصيدليه يله اريد اطلع اختنكت بس خاف ذول يهجمون علينا واحنه بسياره

رد عليه بجمود.. ياكلون نعل امشي نطلع

رحت لبست صايتي وحجابي وخليت وطلعت لكيته كاعد يخابر وهو يغلط ويصيح ويكوله.. خلال هالاسبوع ساهر اريده جوه رجلي

باوعت عليه واني واكفه بباب الغرفه قفل الخط مد ايده اليه وهو يبتسم كال.. يله امشي

تجاهلت ايده ومشيت فتح الباب وركبنه بالسياره جان المطر ينزل بغزاره وهو جان لابس بالطو اسود طويل مشت بينه السياره و وكفنه عند صيدليه وكف عندها ودينزل لزمت ايده بخوف... تريد تنزل وحدك ؟

باوعلي متسائل من حركتي هزيت راسي بنفي .. متنزل وحدك انزل وياك منو يكول ما واحد يهجم من عصابتك

عقد حواجبه.. عصابتي شنووو

رفعت اكتافي بعدم معرفه كال.. انزلي

نزلت و وكفت بباب الصيدليه ما دخلت لان بصراحه ما اعرف شكلي مال وحده طالعه من الشماعيه الحجاب مخربط وخشمي مورم من البجي وعيوني عبالك مگمطات صارن عمص مثل عيون اليابان استحيت ادخل واتوب نعالي وردي لاستيك والصايه من هذن العراض مال خليج خفاش

هو عمي مرتب ارتب مني بس اني اخزي مدري شعاجبه بيه جني وحده لاگيها بالحاويه

طلع من الصيدليه وبيده علاكة صغيره بيضه بيها عصاره وحبوب انطاهم الي ورجعنا صعدنه بالسياره

مشه الطريق وهو مشغل اغنيته المفضله فعذبها حتى إذاب فؤادها وتخلص ويرجع يعيدها واتوب موبايله يرجع يرن بيها دخت ولعبت نفسي

وحاوطني الحزن مره ثانيه وكرهت روحي لان الاغنيه حيل حزينه وصوت المطرب حزين حييل يكطع الگلب خليت راسي على الجام والمطر ينزل بمثل الندى مو مثل اول مطلعنه قويه والشوارع مغسوله والاشجار ينزل منها المي بهدوء الطريق جان حلو حييل يجنن

بس جنت حزينه وينعاد عليه الموقف الي صار اليوم والدمع ينزل مثل مطر هاليوم بعدها سالته.. هذا الشارع شنوو اول مره اشوفه

رد عليه.. شارع ابو نؤاس بالكرامه حاليا

رمشت بعيوني ... احبببه ابو نؤاس

جاوبني بهدوء.. فد يوم اجيبج الصبح لان حاليا بس السكاره بيه

سكتت مجاوبته ورجع اتصل موبايله نفتح خط بعدها نزل عند جسر ونزلني جان رغم مطر بس اكو نوارس وكفت على السياج واباوع للجو حلو بس روحي تعبانه ما احس بجمالية المكان

هو وكف ورايه كال.. هذا جسر الجادرية

درت وجهي واني اباوعله بحسره.. هنا جامعة بغداد مووو شكد جنت اتمنى ادخل الها وكمل تعليمي بس حظ ما عندي

مسح دموعي بيده ورد عليه .. كل من وقدره وحظه الحمدلله على كل حال

جاوبته.. اريد ادرس

رد عليه بجمود.. اتركي الدراسه هسه

عقدت حواجبي وتعصبت ... ليييش؟ مو من حقك ترا ادرس وادرس

رد عليه ببرود.. الله كريم

تنهدت.. اعرف الله كريم بس اريد كلمه تشفي صدري ولازم ادرس

جاوب.. حاليا اتركي الدراسه وضعي حيل مخربط واخاف عليج

عقدت حواجبي.. شلون فهمني احسك لغز انت ليش هيج اني احب الانسان مثل الكتاب المفتوح وانت ابد مو هيج

ابتعد عني وسند اديه على سياج الجسر ورد عليه .. كافي تحجين مو زين على حلگج

جريت حسره... الله ينتقم منهم احس شفتي انشلت و الوجع يدك بگلبي

دار وجهه عليه وهو يحجي بفخر.. بالعكس اشوفج قويه بحيث طلعتي ترفهين عن نفسج وما تعتكفين على حالج وتعيشين الصدمه

ضحكت باستهزاء.. صدمه!! ترا ماكو اقوى من صدمة ان اشوف امي تنقتل على ايد ابويه تعلمت على حزن وموقف اليوم عادي مقارنة بالماضي بس اريد كرامتي لا اكثر ولا اقل

نفخ بضجر.. كرامتج محفوظه صدگيني واطيح حظ كل واحد نزل دمعتي

جاوبته بترقب.. انت هم نزلت دمعتي

ضحك بسخريه... هههههه

بعدها باوعلي وهو صافن عليه وترني استحيت من نفسي قطعت تأمله واني اگوله... ادري شكلي مبهدل ومحلوه ماكو داعي تصفن موقف صعب اليوم مو مال اصير حلوه لا تصفن

ابتسم ابتسامه جانبيه وهو يرد عليه...بالعكس التأمل بيج عباده

خفيت ابتسامتي ورجعت اباوع للنوارس كتله... احجيلي ذول ليش هيج هجموا عليه وليش ناويين عليك وكالوا هاي كسرة عين الك شنو السبب ممكن اعرف

تنهد وسحب نفس عميق وزفره كال ... صارت مشكلة وياهم ان شاء الله سهله

ضحكت بسخريه .. هههه واضح سهله

سكت مجاوب حظنت نفسي واني احس ببروده نزع البالطو مالته وخلاه على اكتافي ارتبكت من تصرفه وحظنت البالطو عليه

اتصل موبايله وهو باوعله فتح خط وابتعد عني اني جنت على السياج وهو نزل الرصيد ديتصل وكف كدام سيارته ويحجي والندى محاوطه

ظليت واكفه شديت على بالطو باديه وكل شويه اباوعله اخاف عافني وراح او واحد يهجم علينه

تقربت منه سمعته يكوله... هذا الاسبوع اذا ما جبتلي هذا الخسيس اعتبر نفسك مسيس تمام نشوف شوف لحد الان مصبر نفسي لان زوجتي منهاره وما اريد لخوفها اكثر بس نااار نار مشتعله بصدري اليوم ما اعرف شلون انام

دار وجهه عليه شافني كال قفل خط بسرعه.. شوكت تبطلين تتصنطين

جاوبته بهدوء.. ما اعرف منا لما اعرف سرك

ضحك .. ههه ما عندي سر شبيج

سكتت مجاوبته كال .. نرجع للبيت لو لا

انطيته البالطو و تنهدت .. اي نعست وتعبانه رجعنه للبيت اول ما دخلت كعدت وهو جاب العصاره وخلاها على طرف شفتي خجلت منه حيل بس هو جان مركز على شفتي ويحرك اصبعه بلطف شديت على شفايفي ولزمت ايده واني اعيط بوجع... توجععع لااا

ابتعد بسرعه وحذر كال.. يله يله خلصت هذا هو لا تخافين لا تخافين

نمت على القنفه بكامل ملابسي وهو غطاني ببطانيه وطفى الضوع وراح للغرفه

رمشت بعيوني ليش راح كعد بالغرفه ليش احسه يريد يرضيني بس لازم يكون بعيد عني ليش تهت وخفت شيخلصها وياه

مرة ساعه وهاج عندي الوجع ظليت اتگلب بمكاني بس محجيت ولا رحت اله وهو شويه وشفته مر من كدامي بسرعه وطلع مستعجل حيرني

كمزت من مكاني بعد ما قفل الباب هذا شكد حقير عافني وراح وهو يعرف اني مرعوبه وخايفه هذا متصير اله حاره بسيطه يرجع لو ميرجع اله احرك البيت على راسه انوب صرت گوه احجي مثل واحد بحلگه عظم وما يكدر يحجي كل بسبب هذا البربري المخبل نمت واني كل شويه وفزيت من الخوف

.....................

جاستن

جنه كاعدين بالبيت من بعد ما رجع كريم ابوي اجتمع بينه وجان حارث ابن بنت عمي موجود كال ابوي.. انا كبرت وانتم ولدي اتمنى اشوفكم كدامي متزوجين وافرح بيكم وهم احب اشوف اولادكم واريد اصير جد ما شيبت وانت ممزوج واحد منكم

جاوبته.. والله العروس موجوده بس هي رافضه شسوي اخذها غصب اجبرها شسوي مو مليت بعد بس ما جبت اوباما يقنعها تزوجني وما تقبل

رد عليه حارث.. منو هي

جاوبته بقهر.. اختك رنيوه

جاوبني.. وشلازك برنيوه من حورها دروح دور غيرها ما تريدك هي گوه

تنهدت.. شسوي احبها المهدوره بس هي ما تحبني والله شلون اشكر تريد واحد صومالي اختها ذوقها زفت وذاك اليوم من وراها كاعد بالشمس وطگني التيفو من وراها ٣٦٠ وستين صرت امشي صفح مو حتى مرض تمرضت من وراها

ضحك ابوي كلي ... هههه النفس وما تهوه بويه جاسم اذا اريد انه اخطبلك انت بس آشر

جريت نفس ... اشرت على رنا يالله اخطب احبها مو بيدي

حارث هز ايده .. صدك ما تستحي شو مكابلني وتتغزل باختي

جاوبته.. شوكت تغزلت ترا حتى مو حلوه هي بس اشوفها احلى وحده وبعدين مو زين جاي بالاحلال مو لعب

حارث.. دنجب هي رنا ينلعب عليها تلاعب الملچ چبيدي وتغلبه سته صفر

رد عليه ابوي .. عرفنا منك ومن رنا بويه كريم شني ما ناوي تتزوج ترا المثلك عنده تلث فروخ

جاوبه بهدوء.. شغلي صعب وبعدني ممستقر ما اريد اظلم اي بنيه وياي

ابوي حاجه بحماس... شلون بنيه بنت اخت حنان مرتي شنو من اخلاق شنو من ادب وتدري هي تدرس محاسبه وابوها قاضي يعني عايله تلوكلك وانت فاهم وعاقل

جاوبه بنفي... لا ما اريد تناسب من اهل حنان

انصدم ابوي ورد عليه.. ليش بويه شبيها حنام وشبيهم اهله ناس اجاوييد ومعروفين بالسمعه الطيبه وحنان خوش بنيه وعاقله ورزنه ما شفت منها شي محلو وعاشرتها معاشرتها طيبه ونعم منها

كريم بارتباك.. لا بويه مو هيج بس اخاف تصير مشاكل وتلحك بحنان انت ما تعرف الناس واني ممستعد للزواج هسه

جاوبه ابوي... براحتك بويه بس اني الي اريده منك تفكر زين وما تلكه مثل هالبنيه قمة بالادب والاخلاق وابوها معروف

دخلت عمتي ام حسن وكوثر ما شاء الله عدنا كوثر حيل خجوله من حارث خاصه ومودبه والله اختي خوش بنيه

كالت ام حسن.. اي والله يمه شلون بنيه بنت اخت حنان اخلاق وادب ودارسه تلوگ الك وحلوه تخبل حيل حلوه

مسح وجهه بتوتر... لا ما اتزوج مستحيل

ابوي تخبل.. شبيك كريم ليش مستحيل انت شبيك من طرحت عليك بنت اخت حنان انرعصت صاير شي حنان مسويه شي حتى اكسر ظهرها

رد كريم بارتباك... لا يمعود يابه شبيك هو اني وين شايف حنان حتى يصير شي لا صاير شي ولا هاي خوش بنيه ونعم منها بس اني ما اريد اتزوج

ام حسن.. انت ما تريد تتزوج لو متريد بنت اخت حنان

هز راسه بنفي.. حاليا ممفكر بالزواج وممفكر اتزوج

ام حسن جفصت بيها.. جنت اتمنى اخطبلك وحده من بنات عامر بس هذا مخبل مو مال واحد يناسبه افيان وسولين شلون بنات حرامات ضاعت من ادينا

هو تخبل كلها.. صدك تحجين انتي شبيج عمه بنات عامر بمثابة بنات اخوي ابد ما جانت نظرتي الهن زواج اذا جانت سولين او جيهان واصلا افيان طفله وينها وين الزواج ورجاءا بعد موضوع بنات عامر سدي

ضحكت كتله .. انت تعرف عمتك ام حسن جانت ناويه تزوجك جيهان وتزوج عليها لان لبنيه محتركة

فتح عيونه مصدوم من كلامي كال... شنووو شنو هالمهزلة لهلدرجة اني حقير واكسر ظهر لبنيه واجيب مره على راسها اعذبها فوك عذابها وبعدين جيهان ما اشوفها اله طفله وتصيحلي عمو والله حتى احس بيها أصغر من افيان كد ما بريئة وناعمه وتخاف اصلا هي ما اعرف حتى شلون اتفاهم وياها

ام حسن .. اشوفك دوم تحجي بيها كلت يمكن تتقبلها

هز ايده بسخريه وملامحه احتدت.. اتقبلها شنو؟ هاي بنيه مسكينه لا حول ولا قوه تصيحلي عمو تشوف بيه سند مو زوج ورجال ومره كافي ترا مصختوها البنات اني بمثابة عمهم وشيردن اني بخدمتهن بس مال زواج لا مستحيل احسن بنات اخوي وفتحت عيني يصيحلي عمو اصلا احتمال هن ميرضن بالزواج معتبراتني عمهن

ردت كوثر بغرور.. والله حقك اني ما اعرف شلون عمه ام حسن تفكر اصلا جيهان حيل مكروهه ومريضه نفسيا وينها وين الزواج واحد من يكعد يمها اصير بي حاله نفسيه ههه تردين اخويه يتمرض

هو عاط بيها بغضب... كوثرررر لا تعيرين العالم بمرضها الظلم ظلمات يوم القيامه انتبهي

وابوي هم ما قبل كلها.. لا بويه كوثر مو هيج ربيتج انه ما يصير نتشمت بالوادم والبنيه ما بيها شي حرام عليج

جاوبته باستنكار.. ان هي حلوه وهادئة واصلا احلى من افيان وسولين واهدئ بس هماتين ما انكر ان هي تحتاج دكتور نفسي ودكتور يعالج جسمها اني هذا الي اقصده لا اكثر ولا اقل

ومن احجي هيج بس حتى تنتبه على نفسها وتبطل خوف وضعف لان وضعها كلش محلو

جاوبتها اني .. ادري كوثر شسالفتج بنيه مريضه وظروفها صعبه لا تاخذ ولا تنطي لو الا تريدنها لسانها هالطوله و وكحه يله ترتاحن كافيه خيرها شرها شدخلكم بيها

هي ضاجت من كلامنا وخلت و وكفت كالت.. تمام اني اعتذر واذا تردون اروح ابوس جيهان واعتذر منها بس لا تنهارون هيج

خلت وراحت وكريم هز ايده وخله وطلع..

........................
سولين

مر يومين وحلكي مد اكدر افتحه شفتي تنز جراحه وفراگيس وكل شويه وبجيت وهو ماكو مموجود حسيته متعاطف ويايه اول مره بس هسه لا وهذا الشي كولش زعجني واذاني يعني معناها جذاب ومنافق ولان شافني منهاره

صرت اضوج منه حيل بس هو للامانه يجيب اكل ويرجع ليوره ويجيب علاجات

واني اليوم حيل مسخنه ومنسوبه ومنا الجرح ينز كارهه حتى روحي اني لو اموت احسن شنو وجودي بالحياة ظاله بس للظيم ويه هذا الخبل

نمت على القنفه وهو دخل كال بسرعه وهمه .. يله سولين حظري نفسج

فتحت عيوني مصدومة .. وين نروح وين احظر نفسي

جاوبني بهمه وهو ياخذ اهم اغراضه.. ننتقل من هذا المكان لمكان اامن لان هناك محد يكدر يندك بيج

بعد اني شمدريني لبست صايتي ونعالي وشالي ورحت وياه جان يسوق بسرعه واخذني طريق طويل بحيث نمت بنص الطريق وفززني وهو يگعدني كال.. يله اكعدي وصله للبيت

رمشت بعيوني واني دا استوعب .. وينه البيت هاي شنو المنطقه مو بيوت عبالك گبور

باوعتله باستنفار.. وينه البيت وشنو هاي المنطقه مو حلوه مثل ذيج المنطقه

رد عليه وهو يركن السياره.. مو مهم الجمال المهم الداخل شنو على العموم انزلي

نزلت وگفنه عند باب جوزي مدري زنجاري طلاقتين والبيت ما احس بيه بنيان اول ما نزلنه واجه عايد يركض وهو يحجي ويه الاشتر..يمعود همزين اجيت دوحي عفن واني حابسه ومليت ترا

رد عليه من دون اهتمام.. دطلعه شلزكتلي بدوحي عبالك ما عندي مشاكل غير دوحي

ذاك خله وركض وهو فرحان لان راح يطلع دوحي من سجنه الدفين باوعت جان اكو قفل كبير وساسله قافل بيها البيت ما اعرف ليش خفت وهو لزم القفل وفتحه وسحب السلسله الضخمه ودخل سحبني واني مفهيه على الوضع

دخلت وما اعرف شلون اوصف البيت جان عباره عن حوووش كبير والگاع مالته مكرفعه وصبه اصلا مو كاشي ومتروس بزازين وومتروس غرف غرفه بصف غرفه تقريبا اربع غرف وبيبانهن مكسره وظلمات

عاد اني انتفضت من قذارة البيت ولعبان النفس عبالك فلم رعب مو بيت عطت بيه بعصبيه... شنو هاي وين تريد تكعدني بالزباله

جر نفس ورد ببرود... بيت مستور ما بي شي حاولي تتاقلمين بي هالمده لان هنآ أأمن شي

تخصرت واني اصيح عليه... لا والله شنووو أأمن شي شكلولك عليه سجينه بتهمة مخدرات وتخاف يلگفوني و امنت عليه هنا لا والف لا مستحيل اكعد بهذا البيت

جاوب ببرود.. رايج مومهم ولازم تكعدين هنا حاولي تتاقلمين

تخبلت وتخصرت ... اي عيني شفتي محد وراي كلت اكعدها بزباله محد يحجي لا والله لا عبالك محد الي اني لنفسي ومستحيل اخليك هيج تستغلني ابشع استغلال وما اكعد هنا لو تموت

باوعلي من فوك ليجوه من دون ما ينطق حرف وعافني لزمت ايده واني احجي بصوت عالي... احجي وياك جاوبني مستحيل اكعد هنا طلعني منا رجعني لذاك البيت

عاط بيه بصوت عالي... اشششش كافي تلغين من البداية جان لازم اجيبج هنا بس ما صحت فرصه وهسه اسكتي بلا لغوه واكعدي واستجني

عطت بيه بغضب.... اكرهك اكررررهك اصلا انت ابد مهامتك اصلا اني نكره بالنسبه الك ذاك اليوم حركوا حلكي حتى حقي ما طلعته

هو تخبل لزمني من ياخة ثوبي وسحلني شمرني بالغرفه ورفع اصبعه بتهديد.. لا عبالج نسيت الي صار بس ما تعرفين الانتقام من يصير سريع يصير ممل لازم يكون مثل السم يقتل ببطئ

جاوبته بعصبيه.. حجي يفيدك

رد عليه .. من جبتج هنا الي غايه وهالايام تعرفيها وهذا لسانج الطويل اعرف شلون اكصه

وكفت وتخصرت.. اي كصه عصابتك تحرك وانت تكص

جر نفس وجاوبني.. بس فهميني اليوم موعد هرموناتج

عقدت حواجبي مستغربه... شنو موعد هرموناتي قصدك اني خبله

جاوب ببرود.. اقصد الد... الشهريه

احس وجهي صار نار من الخجل وجاوبته.. عيب عليك شكد متستحي وجريئ عيب تحجي ويايه بهيج مواضيع

رد عليه بهدوء.. مو عيب عادي موضوع جدا عادي ما اعرف ليش تكبرن الموضوع هيج من واحد يسالجن وبالدين ينطقوها بصريح العباره ويايدون العذر الشرعي

بلعت ريكي وجسمي يرجف..انوب تحجي بالدين اذا اعرف الدين ما تصلي مو احسن متشرح اعذار شرعيه

باوعلي بنظره من فوك ليجوه وتركني وراح واني الطم من القهر شلون هيج يسوي بيه شلووون شكد كرهته كعدني بزباله شكد حقير انوب مريضه اني

.......................

رنا

دهر صاب خالي ان شاء الله حارمنه من بناته جان عندي شغل قريب من بيتهم اني صح مخلصه علوم سياسيه بس ممحصله شي كلت خلي اروح ادور وظيفه وجان اكو معهد قريب من بيت خالي تدريس خصوصي رحت اسجل بس ادرس طلاب عشتو

شفت روحي كولش قريبه منهم كلت دخلي اروح الهم بلكي خالي المفلوك مموجود سمعت مره واكفه ببابهم وهي دكول.. خلي نروح لبيت الحفافه ام جيهان دام رجلها طلع

لزمت ايدها بسرعه كلتلها.. هي مو ماتت الحفافه

انصدمت المره مني وسحبت ايدها كالت.. اسم الله غير تحجين دكولين صدك جذب كمزتيني

ضحكت.. لعفو خاله بس جنت دا اريد اساله وشفتج واكفه بالباب بس صدك ابوهم مموجود

ردت عليه.. اي مموجود ابو سعدون اندعم وراح وياه

عاد اني عفتها وبكيت الباب بسرعه وافيان تصيح.. اجيت اجيت باب مال كاوليه كل شويه واحد داگة صدك جذب دريت بنفسي حفافه بس مو هيج

فتحت الباب وشافتني اول ما شافتني استبشرت ملامحها وانتقلت من الانزعاج للفرح ضحكت وسحبتني وحضنتني... رنا رناوي حبيبتي مشتاقتلج والله

حضنته وبستها واني ابجي وهي تبجي وبعدها صاحت على جيهان.. جيجي جيجي تعالي شوفي منو اجه اجت رناوي واخيرا شفنه الناس الي نحبهم

اجت جيهان تركض مثل الطفل وهي احسن بيه وتبوس دكول بيج ريحة سولين اشوف بيج سولين وينج عنه ليش رحتي بعد ما اجيتي

افيان سدت الباب وطردت النسوان وكعدنه سوه

......................................

سولين

جنت نايمه بالخرابه بعد مرور اسبوع كامل بعد ما نضفت الخرابه ولعبان نفس كلها زبايل اصلا هو معايش بيها ظليت ابجي والله ما اعرف شلون هيج يخليني هنا شلون اعيش ما اعرف قذر مكان حيل قذر

هو يروح ويجي ويخابر وانوب كل شويه و واحد اجاه وهذا الي اسمه صفاء هماتين اجاه واني ابد ما احجي وياه ابد زعلانه عليه ما اريد احجي وياه بعد ما خبلني وجابني بهذا البيت حتى احس مسكون بي جني يمكن والله مدري يتخايلي

بس عود هو هم عدله وجاب كلوبات وصبغه شويه طلع وجهه بس المشكلة هو ينز مي وهماتين حيطانه مكرفعه وكله جرابيع وريحته مبوخه وتلعب النفس ينرادله صاروخ ونفلشه ونرجع نبني

جنت نايمه وكعدت على صوت نحيب وبكاء رمشت بعيوني يا الله هاي شنو منو هذا معقوله الاشتر يبجي بس لا مستحيل يمكن جني أعوذ بالله حضنت نفسي وغطيت روحي بالبطانيه واني اقره المعوذات وارجف اللهم سكنهم مساكنهم اعوذ بالله من الشيطان الرجيم

بعدها حسيت ان هذا صوت الاشتر طلعت بحذر واني امشي على مصدر الصوت باوعت من الغرفه الثانيه شفته كاعد على الكرسي بكل اريحيه ومسدسه بيده

واثنين واكفين وياه صايرين مقابيله واحد على اليسار واحد على اليمين وشخص منزل راسه واديه مربوطه وهو يگوله.. ليش جبتني كول اني شمسوي

رد عليه الاشتر بسخريه وخبث .. لا هيج ماكو شي بس ضايجين وما عدنا شي نلتهي بيه فگلنه نجيبك شويه ندوس بمصارينك

ركزت اكثر وفتحت شفايفي مرعوبه... عزااا هذا ساهر النذل

نهاية البارت.. يتبع

كونوا انتم كونوا بخير .. احبكم💔

مو تنسن التصويت احبكم واحب تفاعلكم الحلو😍🥺

الغلاف من ابداع المصصمه المبدعة عبير الحسناوي ان شاء الله اعتمده عاشت ايدج عمري كولش حبيته 🥺❤️

AbeerAL_Hussnawy