رواية #وكر الأشتر الفصل الخامس وستون 65 - بقلم الكاتبه سمو العراق

بارت ١٤
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

بين صدري والمقابر، علاقات بالاسم والمعنى ودفن الضحية، الفرق بأنّ المقبرة تدفن أموات، وأنا دفنت أشياء بالصدر حيّة.

......................

افيان

من الانسان يتعصب ويتهور ما يعرف شنو يحجي وبمرور الايام من تساله عن الكلام الي نطقه بوقت عصبيته هو راح ينسى كل الكلام وما راح يتذكر شي لان عقله متمحور عند المشكلة الي سببت عنده العصبية مو عند الكلام البذيئ الي نطقه

سولين داست بالكلام اني من يمي احترك دمي اتمنيت اضربها راشدي اصحيها على زمانها هي جانت منهاره انهيار فضيع بحيث رجليها ترجف اباوع الرجلها وحده تضرب بالثانيه

ومن بعد كلامها القاسي الي نزل على الاشتر مثل السياط الظالمة جان اكبر شي يسوي حتى يرد كرامته كدام كوثر وحارث هو طلاقها منه رمه عليها يمين الطلاق وهي حامل بابنه

شفت وجهه حارث استبشر وفرح وكأن هذا الشي حيى امل بداخله على الرغم من الظروف الي نمر بيها

وكوثر انصدمت وظلت فاهيه وفاتحه حلكها مصدومة من الطلاق الي صار وحست روحها بخطر

هو جان يباوع السولين وشاد على شفايفه وقابض على ايده شرايين ايده برزت بشكل ملحوظ وكأنه حقد عليها بكد الدنيا

تقرب منها وهي صدرها يصعد وينزل ومتعصبه حييل ومصدومة كلها .. خلف الله عليج

تركها وطلع احس اني روحي طلعت وياه شكد انقهرت شكد استحقرت اختي صح اني وياها كلنه مقهورين على امي بس مو هيج الغلط عمره ما جان حل ضيعت حقها بيدها جان تكدرتعاتبه تحجي تكسر خاطره بس مو تغلط

هي لسانها فالت وضيعت كل حقها انوب هاي تطلكت وذيج زعلانه شيخلصها ويه عامر

كعدت على الدرج وكأنها صحت على روحها عطت بيها بغضب وهزيتها بعنف .. انتي شسويتي شسويتي كلبه لج شلون هيج تغلطين ضيعتي حقج بيدج وخليتي طلكج

ردت عليه بعنف .. وخررري مني انتي الثانيه محددد عاش معاناة امي بكدي ومحد يحبها بكدي محد انكسر وانهضم بكدي

لج هذا الي تدافعين عنه هسه يستاهل كل كلمة حجيتها بحقه لج جان يشوفني مثل الطير المذبوح كدامة واني انعي امي ما كسرت خاطره ولا هزيت منه شعره ما طمني ولا بكلمة

وكفت واشرت على نفسها .. لج انييي زوجته تعرفين شنووو زوجته يعني هو ستري وغطاي واني كذلك اكووو واحد يضم على زوجتة هيج موضوع

رديت عليها .. يجوز عنده اسباب ليش مخليتي يفهمج ليش هيج تصرفتي وغلطتي وتجاوزتي كلامج ثكيل محد يكدر يتحمله لج اشتر طلع نعال ما يسوه يا نعال ولج هو وين اكو مثل اشتر نسيتي شكد وكف ويانه نسيتي شلون جان مدارينه وشكد خلصنه من مشاكل عامر

حارث رد عليه بجمود وهو يكول .. لا تضغطين على سولين وهذا افضل حل وهو اصلا يستاهل الغلطة ويستاهل اكثر من هيج وين اكو رجال يضم على مرته هيج موضوع وفعلا نعال ما يسوه هذا اصلا مو رجال

رفعت حاجب ورديت عليه واني بقمة غضبي ... هاااا لعد هيج الكلام ؟ يعني هسه جدي كهلان هم نعال ما يسووه موووو ؟ وكريم ما يسوه نعال مووو؟ لان كلهم يعرفون بحقيقة موت امي ومحد منهم كلف نفسه وخاطره وحجه النه عن السالفه

عاط بيه حارث وهو يكول ... احترمييي نفسج انتي شلوووون هيج تتجاوزين

رديت عليه بسخريه ... اي على اهلك ما ترضا بس على الرجال ترضاها وتكعد تبرر الها

كوثر جاوبتني .. احترمي نفسج انتي شنو وتحجين هيج عن بابا وعن اخويه

جاوبتها بغضب .. امشي ولي من وجهي لا ابتلي بيج انوب ما عليه بس وسخ رجلية شلون ناس كلها باطلة

سولين لزمت بطنها بوجع وكعدت وهي تون كعد كدامها حارث وهو يحجي وياها بحنية .. سوليين بنيتي اخذج للمستشفى خاف بيج شي وبعدين لا تقهرين نفسج هذا هو طلكج وهذا افضل حل صدكيني اصلا انتي وياه ابد ما متوالمين وانتي اصلا ما تردينه ومجبوره عليه

هي جانت ساكته وما تحجي اي شي تريد تستوعب حجم الضرر الي سببته لنفسها

هزت راسها برفض وهي تكول .. كافي كافي اني هسه ما الي شغل بأي احد اريد بس امييي اخذوني لامي فدوه اريد امي

وكف حارث وهو يكول .. ما ادري وين امج كالو بالبصره بس خوما اني اندل كل البصره اني بغداد واتيه بيها

وكفت وهي تايهه وتتصل وين تروح ما تعرف مو ثابته ولا تعرف وين تروح

وحارث راح وكوثر لزكت وياه وراحت سوه شوكت يرتبطون ويفضوها ما اعرف

رحت عند اخواتي جان امين نايم بحضن جيهان ويبجي وهي تبجي بصمت وتمسح على راسها وهاااااادئة عبالك وحده مصدومة

وسولين متعرف شتريد تفتر بمكانها انوب راحت لبست صايتها ولزمت فلوسها وموبايلها اتصلت على صفاء كالت .. الو صفاء تعال اخذني للبصره اني طلعت عايشه وراح اموت عليها فدوه تعال اخذني

سكتت ثواني وكملت كلامها كالت .. لا هو اصلا طلكني ما يريدني واني هم ما اريده بعد هذا كل شي انتهى بينا بس انت اخووي وصديقي انت تاخذني لامي

انطته فرصه يحجي وكملت .. لا لتخاف ما يصير بيه الطفل قابل شيصير واكيد البصره طريقها حلوو صح طويل بس امشي على كيف بدون طسات

نفخت بضجر وهي تكول .. انتم ولا واحد بيكم يسويله شغله بيها خيير هاي كون اشتر جان بسرعه اخذني

قفلت الخط وهي تتذمر

باوعتلها مفهيه .... لا بالعباس اختي مو صاحيه ابد مو صاحيه هاي عود صدك تحجي

كلتلها .. لعد اذا هيج داكلج صدره الاشتر ليش تكولين عليه نعال ما يسوه وخليتي يطلكج جان مو هسه احنه يم امي

عقدت حواجبها كالت بحزن وقهر ودموعها ما وكفت من البجي .. ليش ضم عليه امي عايشه ليش مقهوره منه اني حيل مقهوره هو الغلطان غلط بحقي هواي

عفتها ورحت اذا اظل يمها اتعارك وياها وما الي خلكها ابد مصدومة حالي من حالها ممصدكة امي عايشه واحنه الجنه نتمنى نلزم تراب قبرها

وهسه راح نلزمها ونحظنها ونبوسها والله ما مصدكين يارب ترجع النه امي ونجتمع بيها يارب فدوه الرحمتك مثل ما رجعت يوسف لحظن ابوه رجعتنه لحظن امييي فدوه اروحك يارب الف الحمدلله والشكر

حشا لله ان يظلم عبده يارب سهلها علينه وخلينه ننجمع بأمي باقرب وقت

.........................

جاسم

جنه متواجدين ببيت اهلي وعامر هاجم علينه لگينه قبل بوقت لازم سلاحة ويتهدد علينه كال .. يا حقراء يا كلاب ولكم هيج تطعنوني بظهري هيج تسوون بيه اثاري الكح.. طلعت عايشه وانتم مخليني على عمه عيوني صدك ما تستحون انتم مو كفو انتم مو سند

لزمه كريم من ياخة تشيرته الاحمر وسحلة وهو يكوله بغضب .. ما تاكل تبن وتسد حلكك شوو انت صدك مطييي شتريد فوك ما نقذناك من حبل المشنقه وتحملنة سوالفك انوب جاي تهدد

رد على كريم وهو يكول .. هاي عار هاي نعال هاي وحده زانيا حرام عليكم هيج تضمونها مني ولك هاي قتلها حلال جريمة هاي انتم مجرمين هيج حق الله يكول

جاوبه ابوي بعد ما ضربه بعوجيته وهو يكول .. ولك استغفر ربك الله بريي منك ومن امثالك يا قذر امشي امشي ولي لا بارك الله بيك من رجال تافهه وحقير وزمال الله ينتقم منك بهذلت بناتك وابنك ومرتك

شويه ودخلت ام حسن هي وام حارث واجت وياهن مره خشنه عندها سكسوكة ما عرفتها منووو

من شافها عامر عاط بيها كلها ... ولج تسواهن شجابج هنا صايره دايحة تطبين وتطلعين بكيفج

جاوبته بدون نفس وغضب كالت .. كافي كافي لا بارك الله بيك هجمت البيت علينه من هجمك الله كون وخلصنه منك شعندك هاد على الوادم جنك فسيفس واكع بالخيس

هو تخبل وظل يتهدد يريد يكتلها .. ولج تسواهن اليوم اموتج ولج اليوم اطلع حركة ايار الكح .. بيج عار خايسه اني الج

هي كلها خايسه وهي هجمت عليه جرته من تشيرته خمطته خمطه بس الاه يستر منها ما توازن عامر اجه يوكع كلتله ... ولك اني عاااار اني خايسه بالعباس اليوم اخلي جحيم يسوويك لحيم للحديد اليوم اخلي يشكك شكتين كل شك بصفحة اليوم اعشيرتك اسلكهم واحد واحد

رد عليها عود هو سبع وبطل ... انيييي ولج انييي هيج تحجين عليه تهددني باخوج بسيطة يتسواهن وشنو خايف من جحيم بيش الكيلو اصلا

جاوبته بشماته .. جااا ذاك اليوم من لزمك وزوعك العافيه شو اجيت تسويها على نفسك

دك على صدره مثل الغورله وهو يكول ... اني اسويها على نفسي يا ما عندج تربيه اليوم اطلكج اطلكج

تسواهن .. شحدك تطلك غير جحيم يعلكك بالسكف وبعدين ترا اخوتي حطو عليك مهر عشر ملايين ب١٥ مليون

تخصرت وهي يحجي بعصبيه و وجهه احمر ولحيته واصله لعيونه .. شمنطيني ست الزبيده لو ماجده الرومي حتى حاط هيج مهر يكسر الظهر هو انت مفتحين بيج خمسه بربع

عاطت بيه بغضب وهي تكمز وتلطم .. ولك اني خمسه بربع يالدسم ولك انت شايفك روحك لحيتك طابكة ويه حواجبك

عامر بسخريه .. عاد اني رجال وعندي لحية جااا انتي شمالج ما تحفين لحيتج

تسواهن بضحكة مستفزه ... هههههه انت رجال منيلك ولك انت ربع رجال

صارت بينهم مشاجره كلش قويه ناس تغلط على ناس واحنه بنصهم ونفرغ بيهم بس ما يجي وياهم

ابوي تعصب منهم وطردهم ثنينهم من البيت وهي تغلط عليه وهو يغلط وكل شويه وهددته بجحيم صار عندي فضول اعرف جحيم منو وشلونه

.......................

جيهان

جنت مصدومة منهاره بس ما احجي جنت كاعده وساكته عكس سوليين جانت منهاره متسرعه تريد بكل طريقه توصل الامي

اني بصراحة مو مثلها جنت اريد كل شي اصولي اريد كون امي ما تضرر اذا التقينه بيهد ما يصير عليها شي لان احنه ما صدكنا لكيناها انوب نروح نفقدنا بسبب تهورنا

ابوي جان يطب ويطلع متعصب ويغلط متخبل شلون امي طلعت عايشه ما يريد تكون عايشه يريدها ميته يحب الدم والقتل سولفتلي جيهان وكالت هو من صغره قاتل وتعود

جان عباله مثل ما مفكر هو وحسب مبدأ مالته ان هو تخلص من عار امي وهذا وسام معلكة بصدره ومفتخر بيه

تنهدت وحسره بكلبي اريد اصرخ كرهت بيها كريم شلون هيج ماگلي هو شاهد على موت امي من ماتت وجنه بوقتها منهارين ذنبه اعظم من ذنب اشتر لان باول موتتها هو ويانه وجان يجينه

جنت احس عنده كلام يريد يحجي بس ما حجه وخلاها حسره بكلبي ذنبه عظيم والاعظم الاستغفال الي استغفلونه بيه

هاي امي نبض روحي والله قهر وظلم محد منهم يعني شالته الغيره عليها وطمنه والله ما جنه راح نصير اطفال ونجفص لو نفضحهاا المهم عدنا سلامتها بالدنيا كلها امي روحي دمعه منها تكسر خاطري

ما اعرف شنو اسوي بس الي اعرفه اني ما اريد اشوف كريم ولا اهله لان الي يشوف امي عار فهو مثل ابويه وهو اصل العار ادوس على كلبي واتبع خطوات امي امي مو عار امي الشرف كله

والله احس روحي طفله اريد بس اروح الها ابجي بصمت ابجي بكل لحظه وثانيه عطشانه على شوفتها اريد اشوفها واروي روحي بيها اكحل عيوني بشوفتها يارب شسوي صبرني

حسيت اندك باب الغرفه بطريقه مو غريبه عليه اعرفها هاي الدكة لكريم

ما تحركت ولا وكفت ولا بدرت مني اي ردة فعل فتح الباب ودخل بطوله الفارع باوع عليه وتنهد

تقرب مني وكعد بصفي مباوعتله ولا حطيت عيني بعينه مد ايده راد يبعد شعري عن وجهي

بسرعه سحبت نفسي منه وحطيت ايدي كدامة كتله ... رجاءًا كريم ترا روحي طالعه ما عندي اي استعداد اناقش واحجي واستنزف طاقتي اكثر من هيج

جاوبني .. بس اريد اعرف شغله وحده انتي الرسائل منو وصلهن الج

رديت عليه من بين اسناني .. مو مهم من منو وصلن المهم بين حقدكم وخبثكم تجاه امي ههه طلعت امي عار بنظركم ولازم تكون ميته

رد عليه ... لا مو هيج

جاوبته بغضب ... لا هيج اني اكولك هيج لان لو مو هيج جان انت بنفسك طمنتني وكلت امج عايشه لا تخافين لا تبجين لك اني خلصت الزفه كلها ابجي ومنهاره وانت ولا يمك يعني هيج انتم حجر

جاوبني .. الموضوع صارله هواي انسد من زمان مو مال افتحه وخالج اصلا كاتب تعهد ما نحجي بالموضوع وهاي شغلات عشائرية

ضحكت بسخريه .. عشائرية؟ زين واحنه يعني مالنه اي خاطر ماكو النه رأي زين ما كسرنه خاطركم ما نريد امنه هي احنه ما عدنه شخصيه بحيث موتوا امنه وعيشتوا على راحتكم بكيفكم احنه لو شنو اريد افتهم ؟

تنهد وجاوبني ... انتي ما تعرفين ذيج الفتره شلون جانت عصيبه شلون الامور تأزمت بسبب ابوج جان صار كاتل ومكتول واحنه الحقن الدم هيج سوينه احسن ما تروح العالم بسبب ابوج

رديت عليه ودموعي على خدي.. ميخالف جان كتلي من دون محد يعرف يعني لو مطمني بكلمة شنو قابل اني اروح افضح امي لو الزك الا اروح الها ترا هاي امي تهمني مصلحتها اكثر منكم

جر نفس وزفره كال .. مراح تفهمين

جاوبته بسخريه وببتسامة مقتوله ... لان ما عندك عذر

لزم ايدي وهو يكول .. امشي للبيت وخلينه نحجي

باوعتله بحده وثبات ... ما ارجع وياك مستحيييل الصار بينه مستحيل يتصلح انت ما معتبرني زوجتك ولا عندك عذر وكل الي حجاها الشخص عنكم ان انتم فعلا عندكم امي عار عليكم ولازم تتخلصون منها

هز راسه بقبول وهو يكول ... راح اخليج ترتاحين فتره ان شاء الله وارجع اخذج

جاوبته بجمود .. لا ترجع تاخذني

ابتسم وهو يكول .. مردج الي وين ترحين

باوعتله بقرف صدك ضجت منهم شلون هيج يسوون بينه اول الناس يدرون علنوا موت اني وكسروا رواحتنا مو بس گلبنا

تركنه وراح من البيت بس حسيت بيه ضاج وانقهر واني ما الي خلك اداري قهراته اصلا ما الي خلك اله ابددد وكرهت بيت جدي كهلان حيل

بس هو قبل لا يروح اصر ياخذ الرقم الي تواصل ويايه ودزلي بصمات ما اعرف ليش

.....................

صفاء

بعد ما عرفت اشتر طلگ سولين احس روحي انعصرت ما عرفت شنو السبب الي يخلي يطلكلها وهو يموت على تراب رجليها مرات احس بي يعاملها مثل الطفل مدللها ويراعي شعورها ويصف وياها بس ليش طلكها هذا الي ما اعرفه

اتصلت عليه اتصلت مجاوب اني اعرفه هو من يضوج يروح لحجي اديب هناك يفرغ كل طاقته السلبيه والحجي يعرف شلون يهون ويصبر عليه

رحت بسيارتي من بعد ما اتصلت بيه سولين تريد اخذها لامها اني وين اخذها لامها انوب حامل تروح تموت هي والطفل هي متسرعه ما تتحكم بعقلها وخبله عاد اني مو أروح أايدها واكيد لازم ارجع لاخوي افتهم منه اعرف شتصرف واحجي وياه بموضوعها ما اكدر اسوي شي من دون علم اخووي

وصلت لمحل حجي اديب وفعلا مثل ما توقعت لكيته يم الحجي جان عاقد حواجبه بكل غضب وكاعد مقابيله ميز صاجي وطفاية الجكاير جان يشرب جكاير ويرجع ليوره وحجي اديب كاعد بصفه

كعدت بعد ما سلمت كلتله .. خيير اشتر اشو اتصلت بيه سولين وتكول مطلكها صدك هاي تحجي لو الهرمونات اثرت عليها

باوعلي ببرود ورجع طفه الجكاره بالنفاضه وشغل الثانيه كال .. اي صدك

طلعت عيوني مترين كتله ... يعني صدك طلكتها لا ما اتوقع احجي عود صدك ليش شسوت

مجاوبني سكت ورجع يدخن

باوعت الحجي اديب حجيت وياه .. حجي شسالفه احجي مو حتى لساني صار ما يعرف يحجي

جر نفس حجي اديب وهو يكول .. اي طلكها قللت ادب وياه واخوك ما تحمل

جاوبته .. شحجت وليش؟

باوع حجي اديب لاشتر وسكت عرفتهم ما يردون يحجون بالموضوع عفتهم ورحت اطحن بالبهارات واكمل باقي الشغلات لان اني من اروح دوم اشتغل ويه الحجي

رحت جبت جايات ورجعت عزلت المحل سمعت الحجي وهو يكوله ... بس ما جان اكو داعي للطلاك بويه جااا هي المره شعندها غير لسانها اني من زمان كتلك المره ما عندها غير لسانها و ساعة عصبية اكيد ما يطلع الكلام من كلبها

رد عليه الاشتر وهو يكول ... لا حجي هي بساعة العصبي يطلع الكلام الصحيح ويكون نابع من الگلب وهي فعلا هيج تشوفني بس بسيطه هذا هو انتهى كل شي واذا گلبي يحن الها ادوسه واذله

جاوبه الحجي كال .. انت تعرف بيها مو واعيه ومو ذكيه والحجي والضغط الصار عليها خبلها خلاها ما تعرف شتحجي حقها بويه لا تدمر عائلتك وتيبس راسك

هز راسه بشرود وكان الحجي ما يحجي وياه

ندسه حجي اديب وهو يكوله ... شبيك بويه اشتر لا تخبلني لا تسودني حالتك ما تطمن احجي كول اي شي لا تظل ساكت

باوعله بحزن وحط ايده على صدره كال .. احسها كسرتني كلمتها ثكيله والله ثكيله

حجي اديب .. صح ثكيله بس لا تضوج نفسك وقوي روحك

هز راسه برفض وتنهد كال .. الله كريم

حجي اديب بحزن .. گلبك قسى يا اشتر مراح ينسى كلمتها مووو؟ وابنك شلون

باوعله وضحك بسخريه وقهر وهو يكول .. گلبي قسى حجي ولو تجيب عشرين طفل بعد ما تاثر بيه ولا الها مكان بداخلي

حجي اديب ... لا تصير هيج بويه لا تقسى مريتك هاي تتذكر من خطبتها ب١٢ باليل تتذكر كل شي صار وياها انت هم ظلمتها وانت ليش ما حجيت موضوع امها الها

وكف متعصب وهو يكول .. حتى لو ما حجيت موضوع امها الها ما ينطيها الحق تتخبل عليه وتغلط اي تعصبي ابجي انهاري نتحاسب اني وياج بغرفة وحدنا ابوس ايدج واعتذر منج بس مو كدام اليسوه ومايسوه كدام حارث ونعل وزباله لااا ما ارضاها على روحي لو مو تصير سولين لو تصير رحيق والله ما ارضاهااااا

واني جنت كل شي اسوي المصلحتها ما خذ عهد ويه خالها ما احجي ي اديبجالموضوع من قبل لا اخطبها واتزوجها حالف بكلام الله شنو القران لعبه هذا ميثاق واني متعهد حالف بروح اختي ما افتح الموضوع لسولين الا اذا كملت القضيه وربحتها امها

جنت احقق بيها اروح من البصره واجي البغداد كله الخاطر عيونها فلس واحد ما ماخذ من خالها وشلون اخذ. هاي ام سولين امهااا كل شي جنت اسووي نابع من روحي من حبي الها وصلت لفك خيوط القضية

ومنتظر اليوم الي احجي بي الها وافرحها امسح دمعتها وتكون احلى مفاجأة الها اطيب خاطرها واجمعها بامها اطلع حق امها وادخل عامر السجن وكل واحد دخل بخطيتها يتعاقب

تاليها اني اطلع نعال ما اسوه من بين الزلم هههه والله وسفه والله وسفه ويا حيف صدك اطلع نعال ما اسوه من بين الزلم اذا رجعتها وفكرت بيها بعد

حجي اديب ... كول يالله بويه هسه انت بساعة عصبية ما تعرف شنحجي

اشتر بعناد وعصبية ... لا اعرف و واعي على نفسي كلش واعي

اتصل موبايل اخذ باكيت الجماير وموبايله وطلع وهو يكول .. هلا سالي ما اكدر اجي الغي الموعد ويه الطبيب الجنائي

وعرفت اخوي گلبه محترك من سوليين وموجر ومحد يطفيها حاليا
......................

سولين ...

جانت الدنيا ليل واحنه متمددين على الكاع نتظاهر بالنوم بس حتى مو نعسانيين كل وحدة بداخلها كوومة حجي تحجي لنفسها

اندفرت الباب فزينه كلنه فد فزة وكمنه مرعوبات وخايفات
خاصة اني احس طفلي فززز ويايه

وجان يطب عامر هايج ومتخبل وشافنا على هالحال احنه الثلاثة وتسواهن ويانه متجمعات بمكان واحد احتار شيسوي ووكف يباوع علينا وعبالك يريد حجة يهجم

ظل يباوعلنا بالسرى كل وحدة منه تباوعله بنفس النظرة كل وحدة منه اخذت منه مأخذ

وكف وخله ايده عالحايط وتخصر وعيونه حمررر هو ميحتاج حجة اصلا حتى يدمرنا ويبث سمومه علينه

كال هاااا ولجن مسعدات عاجبجن الوضع مووو ؟ التميتن على گلبي عود انتن فد قنادر مثلا شايلات خشومجن على رجالجن عود فد مندلة فد نعايل مكطعه

وخر ايده من الحايط وقرب منه
ولجن هو انتن منو مكلبجن مو زين منهم اخذووجن
امجننن وحددة كح٫٫٫٫٫٫٫ة وعار وسمعتها زبالة ومو بعيدة تطلعن مثلها وزايد هو بس الي مارايد عمره ياخذجن

افيان طلعت من صمتها وكالت امي اشرف من الشرف لتحجي عليها ماكافي الي شافته منك كله ؟؟ وصلت لدرجة موتوها بالحياة وبعدوها عنا لمايخافون من الله

نزع نعاله وصاح سكتي ولللج بت الكلب وشمر النعال ووكع بصفها

باوعت للنعال الي يمها وورجعت باوعتله بقرف يمكن لو بيدها ترجعه عليه بس شي يمنعها

كامتله تسواهن سحبت النعال من يم افيان وشمرته يم عتبة الباب

ووكفت يم عامر تحاجي اسكت اسكت ماتمل ماتعجز عفية رجال عشر نسوان بالمحلة ما يلحكنك بالكركة امشي ولي

خله ذراعه كدام صدرها يبعدها عنه وكال وخري عن دربي ودنك سحب جيهان من ايدها حييل ويعت بيها

كوومي ولج كووومي ردي لرجلج انت ماتكليلي منو يكلبج محرووكة وحال الضيم حالج كووومي بوسي ايدج وجه وكفى اخذج كريم مو زين منه انت منووو يشتهييج منو يشتهي يطل بوجهج يالمشوهه

ظلت جيهان تصرررخ ووووخر عني ماارجع وووخر وخررر
بس هو ايده قووية وهي خطية تقاوم حتى تتملص منه
وهو يسحب حييل بيها ، نزلت للكاع وهو يجر بيدهه

كمنا اني وافيان وتسواهن سحبناهه منه تلاثتنا
الا خلصناهه منه وهو مستمر يصيح ويسب ويغلط

خليناهه ورانا وهي تصيييح بصررااخ وجهه احمررر مااريد اررجع موو بكيفك ترجعني

ظلت تسواهن تحاجي بعصبية من كل عقلك انت رجال عاقل صاحي هيج يحاجي بته ولك انت يالمزعبل بوس ايدك وجه وكفه على هذن البنات غيرهن حطن سجينه ابطنك وشكنهه حتى يخلصن منك ومن ضيمك

بهاللحظة ركبه شيطان مدري جني ظل يصييح بعلووو صوته واديه يصفك بيهن عالحيطااان واحنه نرعبنا اكثر

ولجن انووب زعلانات زعلانات على گلبي عود هن مثل امهن يتعيقلن

رجعت البلوة امهن وهن كيفن عافن رجولتهن واجن يمي علة على گلبي مطلكات لاا وچمالة مرضى وحوامل مشوهات ومطلكات

تسواهن كلتله ايي وشكووو بيهااا واحد يبطل مايحبل مايجيب يجووز مايتمرض شنوو باب طبلة حايط هنه غير بشر شبيك انته هم بشر هنه ذني يحبلن ويجيبن ويتمرضن خما مثلك جنك صل كلشي مايصير بيك خليني محترمتك لا اعرف شسوي

جاوبهه ولج تسوواهن انت وياهن ووياي شوون مرة الله بلاني بيج وولج لاتنطيهن عين خلي نكسحهن لرجولتهن لاتخبليني ولجن هذن كحاا... ب من ملة امهن حقج ماتعرفيها شنوو من ملة

كالتله ايييه كووة هي مايريد يررردن شماالك انت خاب مطي خلفتك هاي تشمر بيها ينطي جوز لماعنده سنون

دفع تسواهن ويريد يمد ايده على جيهان ويصيح بوجهها تعاي المحرووكة امشي المشووهة خلي اردج لرجلج امشي
كحححح

تقدمت وصرت بوجهه وايدي على بطني
كتله عووفها عووفنا بحالنه انت شوون وياااك ماتخلصنا من عقدك النفسية وامراضك بناتك احنه ارحم بحالنا كاافي الي احنه بي انووب انته علينا اصلا كل الي احنا بي بسببك كلللله

هو من شافني وكفت بوجهه كلي وووخري وولج امج ساس البله اني شكووو ولج طلعت عايشه العار و شوفي بس رجعت كلجن تطلكتن وامجن ك...ح...به والا ارجع اكتلها مرة ثانية

صررخت بوجهه بدوون وعييي هههيه بكيفك تكتلها مرة ثانية الله كتبلها عمررر واحنه كلنااا ضدك كلنا وياهااا واذا ماتريدنا احنه نروح يمها

هد عليه يريد يضربني وتسواهن صارت بيناتنا وخواتي وامين يصرخون ويبجون بصووت عالي هو شاف نفسه مايكدر يوصلي اخذ دولكة مي وصوبهه باتجاهي من بعيد

اجت بصفحة راسي ووكعت على الكاع تناثر الكزيز بالارض و من اثر الضربة ارتديت للخلف وانركع ظهري بالحايط صرررخت بصووت ومووجوووعة الالم براسي وبظهري وبطني والكزيز جوه رجليه ادووس عليه

لااراديا خليت ايدي على طفلي وحسيت بشي حار يتدفق بين رجليه

خواتي لزمني وتسواهن يمي حسيت بألم فضيييع يمزق احشائي صرت اتلوى ملابسي رطبة وراسي احسه رطب وودم ينزل على صفحة وجهي شسووويت بيه عامر

ثواني اجيت افقد الوعي بس الم بطني صحاني
صررت اصررخ من الالم كعدني خواتي واني لازمه صفحتي واصيح اغمض عيووني بقوووة واعض على شفتي حييل واجر نفسي حسيت رووحي راح تطلع
اررريد الالم يخف ماكووو وملابسي نكعت مي ودم .

نهاية البارت ... يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل

غلاف من متابعات الانستا 😍❤️