رواية #وكر الأشتر الفصل الرابع وستون 64 - بقلم الكاتبه سمو العراق

البارت الثالث عشر
رواية .. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔💔

خذلوني أولئك الذين ظننت الحياة معهم ستكون أفضل، فليتهم اصطفوا ضدي، ولم يصطفوا خلفي ليتقاسموا ظهري بخناجر غدرهم المسمومة، تركت لهم ظلي ورحلت، لأنني لا أحمل رغبة الانتقام من أحد، والأيام كفيلة برد اعتباري.

...............................

تنويه .. نقدم خالص العزاء للشعب السوري ان شاء الله يارب بردا وسلاما وانا لله وانا اليه راجعون يارب يلطف بحالهم وينجي العالقين تحت الانقاض والرحمه والخلود للشهداء 💔🥺

..................،

تنويه .. تصرف سولين غير قابل للنقاش علقوا من دون مسبه وغلط هي تعرف كولش زين غلطانه لكن ما نحكم بسبب ظروفهم بذاك الوقت وصدمة شعورهم وارواحهم بموضوع امهن 🥺💔

اقتضى التنوية

.................

جيهان

جنت بحالة ذهول جسمي صابته رعشه مو طبيعيه كله يرجف الموبايل وكع من ايدي ممصدكة الي ديصير ولا راح اصدك اني مسمعت من قبل ميت رجع للحياة وين احنه حسيت نفسي بفلم هندي ما اصدك ذول يردون يلعبون عليه يردون يستفزوني

بس املي ما انقطع وبصيص الامل كبر عندي حياتي تخرب ما اريدها ما افكر بيها اريد امي معقوله امي ترجع الي جنت اتمنى احضن تراب كبره واحصلي ذره من التراب اشمه احطه على صدري

مددا اصدك من بعد ما جنت احضن كبرها انوب احضنها واحجي وياها ابوسها واشمها تشكيلي واشكيلها لا لا ما اصدك

رجعت فتحت الرسائل مره ثانية استمع الهن وارتعش بقووه حتى الموبايل كوه مسيطره عليه من بعد سنين عجاف من بعد سنين فراگ ترجع امي ترجع النه نحضنها نبوسها نشمها ما اصدك والله

رجع كال .. انتن لو تفكرن شويه جان عرفتن امجن عايشه لان خالج لا اشتكى على امج ولا سجنه حتى لو غسل عار ترا هم ينسجن ويطلع من السجن بس هو تركه لان اخته عايشه اخذها وراح بيها بامر من كريم وجدج ابو كريم واشتر كلهم ذول بعدوها عنجن لان هي بالنسبه الهم عار وما يقبلون يناسبون العار ما يرضون نسوانهم امهم عار وينتمون الها لهذا السبب هم اعلنوا موتها وحتى عامر ما يعرف بخططهم وانتقاماتهم

لزمت راسي بوجع من القهر والصدمة حسيت بشي حار نزل من خشمي رفعت اصبعي خليته على خشمي شفته دم رجف كلبي حييل

اريد اصرخ اريد واحد يطمني يكولي الخيال واقع والكذبه صارت حقيقه اريد اعرف صدك هذا الكلام منو يجي ويصدق هاي الاقوال

اتصلت على كريم اكثر من مره اتصلت اتصلت ماكووو حطيت ادية على شفايفي سديت صوتي ما اكدر اصرخ افزز كل شخص بالفندق اسوي انهيار عظيم

ركضت للحمام اغسل بوجهي وابجي بصوت مسموع ابجي واكتم صراخي عضيت على ايدي حتى ما اطلع صوتي وافضح نفسي

سمعت صوته وهو يصيح عليه .. جوووجة جيهانه تعالي يابه جبت الريوك

طلعت بسرعه حالتي حالة ملابسي مبلله وخشمي ينزف دم والدموع ماليه وجهي وعيوني حمر

من شاف وضعي هو تخبل ركض عليه بسرعه ولزم اكتافي بخوف ورعب كال ... جيهاااان شكوو شبيج منو وياااج احجي لا تخبليني

نكثت روحي منه بسرعه وعطت بيه  واني منهاره من البجي حتى كوه احجي ... أريد أسألك سؤال واحد واريدك تجاوبني بصراحة

بلل شفايفه وبلع ريكة بحيره كال ... اسألي شكوووو ؟

ركزت بعيونه وكلبي احس معصور ممرود ومنتظره الاجابه بكل جوارحي .. امي ميته لو عايشه ؟

بهت لونه بسرعه وصغن بوجهي من خلال انهياري ودموعي هو عرف اكو شي وعرف اني عرفت الحقيقه ومن خلال صفنته وذهوله وحيرته تأكد الموضوع صحيح من دون ميجاوبني

عطت بيه بغضب ... احجيييي كول امي عدلة لو ميته

رد عليه بسرعه وهو يكول ... عدلة

رمشت بعيوني ممستوعبه دايخة مصدوومة منهاره هزيت راسي برفض ورجعت خطوات مهزومة من كل شي

كمل كلامه وهو يتقدم خطوات كال .. جيهان بس افهمي خلي افنهج

صرخت بيه بصوت عالي ... لا تتقرررب مني لا تحجييي انت شنو من مله تعرف بموت امي وما تحجي انتم ساس البله انت وابوك تعرفون امي ما ماتت وخفيتوها عنه لان امي عار ما تتشرفون بيها

هز راسه برفض ولزمني ابتعد عنه بسرعه وضربته على ايده .. اذا تعتبرون امي عااار فاحنه مو مثلكم احنه نريد امنه وانتم يتمتونه منها وهي عايشه

صاح بيه بصوت غاضب ... مو هيج الحجي لا تظلين تمسلتيين

صرخت بوجهه ... اي امسلت اي مو هاي جيرانه الاحجي عنها هاي امييي تعرف شنوو تقبل واحد يحرمك من اممممك احجي اريد جواب اريدك تجاوبني

نفخ بضجر وهو يكول .. بس امج احنه ما خفينها هذا طلب من خالج لان هو ما يريدكم ولا يريد ابوج افتهمتي

هزيت راسي برفض والدموع منهمرة على خدي ... ما عندك عذر ما عندك عذر

مشيت خطوات اريد اسيطر على نفسي ما اكدر احس الدنيا افترت بيه وسودت الدنيا بعيني وخشمي ظل ينزف بغزاره وكعت بسرعه بعد ما حسيت الدنيا صارت ظلمة وما شفت اي شي

.......................

سولين

جنت نايمه بيت اهلي وحاسه بخنكة فضيعه ما اعرف شبيه اني يعني بطني كبرت وما ظل شي على الولاده بس احس الطفل صاعد على گلبي

وكفت اتمشى باليل جانت افيان نايمة وحاطه رجلها فوك ظهر تسواهن واذا كعدت تسواهن ولكتها هيج لا تعلك رجلها بركبتها

بس هي بعد فافي ما عندها غير هاي النومة والا تدحس روحها بصف تسواهن وتضايقها بنومتها

مشيت بخطوات وفتحت باب الاستقبال هو ترمم مو مثل قبل جان قبل قديم وحايطة مكرفع وحالته حاله وكاشي ماكو هسه احسن بهوايه

ظليت صافنه ولازمة باب الاستقبال احس كلبي انعصر تذكرت امي شلون قتلها ابويه هنا جان يوم مفجع اليه لو اعيش عمرين ما اكدر اتخطى هذا اليوم ولا اكدر اتعالج منه احس هذا الموقف ينهش بصدري ويكسر خاطري و وجداني

كعدت بباب الاستقبال وبجيت بونين مسموع واندب امي واترجاها ترجع
صاحبتي امي اختي روحي من الدنيا مو مثل اي ام امي مستحيل تتكرر امي انسانه زينه طاهرة والي يحجي بعرضها هو ما عنده عرض

استوقف دموعي صوت وهو يندهلي باسمي .. سولييين شعندج هنا

باوعت اله برعب و وخوف زحفت على الارض مبتعده عنه اكرهه واكره وجوده وكل شي يذكرني بمعاناة امي والظلم الي تعرضت اله من هذا الوحش الطاغي الي ظلمها وكسرها وبهذلها ودمر كل شي بيها

كعد مقابيلي وهو يكول .. ليش كاعده هنا وتبجين الجو بارد لا تتمرضين ويهد علينه رجلج عاد هو شلونه بس مال مصايب وطلايب يعارك ذبان خشمة ما ادري شني من رجال يموت على المشاكل جااا هسه اني مو رجال بس فقير ومن اهل الله امشي بسد الحايط واكول الحمدلله

بلعت ريكي بحسره وافور من داخلي جنت اتمنى يجي يوم واقتلة وصل بيه الحال اتمنى اقتل ابويه سالته ومن خاطري اساله من زمان .. انت ليش هيج ؟

عقد حواجبه وهو يكول .. شلون يعني هيج ؟ شبيه شتقصدين ولج

جاوبته بقهر ... لا عندك حنيه لا عندك رحمة ولا عطف انت شلون جنت عايش حتى هيج تطلع عقدك النفسيه بينه

لزم ايدي بغضب وعتها حييل كال .. اني ما عندي رحمة وما عندي عطف !!! انتن صدك ما يجي بعينجن اي شي انتن صدك ما تستحن

تغاضيت عن كلامة وسالته .. انت شلون جنت عايش احجيلي عن طفولتك عن اي شي يخص ابوك يخص عائلتك اني بحياتي ما سالتك ولا خضت بسوالفك بس هسه اريد اسال اريد افهم شنو الي يخليك توصل لهيج مرحلة من الخبث وعدم الرحمة

اتعصب اكثر وجدحت عيونه بكل غضب كال .. انتي وحده حقيره مثل امج عمرها ما حبتني وعمره ما بررت الي اكرهه واكرهج واكره ابووي الجابني للدنيا و ورطني بهيج عائلة قذره مثلكم

سألته متغاضيه عن غلطه وتجاوزه .. شلون جانت علاقتك ويه جدي الله يرحمة

ضحك بسخريه وكال .. لو ما مات من اني صغير جان صارت موته على ايدي بس للاسف اخذه الاقوى مني هذا حقير كلب دمرني

عقدت حواجبي .. ليش شسوالك

دار عيونه واشاح بنظراته عني كال .. مسوه شي

جاوبته .. حسيته ظالمك

رد عليه.. خلاني اصير قاتل واني بعمر ١٢ سنه

فتحت شفايفي مصدومة مذهوله عدلت كعدتي .. شنوو شلون هاي مدا استوعب

جر نفس وزفره .. جان عنده عداوه ويه جيرانه ابو كاظم ويكره تعاركوا على مي الري والقطع الزراعيه وصارت بالسلاح

وره ما فضت رجع الحق لابو كاظم ابوي انتفض على عشيرته وانتفض على ابو كاظم لان اكل حقه وعشيرته ما طلعت اله حق

وره فتره ابوي ما نسه ثاره انطاني السلاح كال العب بيه اريدك تتعلم من تكبر تكتل ابو كاظم لان هذا اخذ حلالنه

وكفني بباب البيت وهو صار وره الباب فات ابو كاظم كال .. هسه نيشن عليه ودوس هاي هسه راح تتعلم ومن نكبر نكتله سوه

جنت ما اعرف اني ولا ادري مسحوب فات الرجال وهو كاشخ عنده فصل لابس دشداشته البيضه والعبايه والعكال والجفيه سبحته بيده ويمشي بكل هيبه و وقار

هو جان وره الباب ويحجي يكول اضربه يله ولك يله تعلم اريد اعلمك على السلاح هذا سب امك اخذ حلالنه

دست على الزناد وهي ثارت الطلقه من رميت جنت طفل انركعت بالحايط من قوة الضربه والصوت العالم

ما اشوف الا الرجال سابح بدمة ويشخر بروحة تريد تطلع وهو يلهج بذكر الله

مات الرجال وذنبه بركبتي واني طفل اجت الشرطه واخذتني ظليت كم يوم بالسجن وطلعت وابوي جان يحلف ان هو ما قابل عليه وضربني واذاني كدام الكل جنت مثل امين فقير بس بعدين لااا كرهت الحياة كرهت كل شي

بعمر ١٢ سنه تركت اهلي وتركت كل شي صرت اشرب واديح بالشوارع مستهتر كلها تكول بالمنطقه هذا قاتل جان هذا عار ملازمني صرت اقتل واضرب واسفك بالدم

كبرت واشتغلت ويه ابو ايار جان الرجال محترمني بس ابنه الجبير سالم يكرهني وينتقص مني ومن خطبت منهم ما قبل ينطيني مره منا لمن مات وارتاحيت منه

تزوجت امج وجانت جاحده تكرهني واني من جنت اشوفها هيج هي حلوه وصغيره واني قاتل وجبير جنت احس بنقص الزمها اكطعها تكطع جرمت بيها هواي اجبرها على النومة وياي

تخلف مني والشيطان يحرض بيه هي ما تحبك هذول مو ولدك شوف منين جابتهم ابد ما جانت زينه وياي تكرهني وتلعب نفسها مني جنت اتنرفز من هيج تسوي

ومن اكتلها تكول انت مجرم قاتل انت حقير جانت تذكرني بطفولتي وشلون كتلت ابو كاظم تخليني ينعمي على عيوني ولو اذبحها بيدي ما يشفه غليلي حقيره امج حيييل حييل حقيره زادت الطين بله عليه

باوعتله باسف ودموعي تنزل مثل المطر .. اني حقيرة ؟ اخذتها عمرها ١٥ سنه راويتها انواع الذل والقهر انت لو زين وياها هي ما تحجي هيج عليك

اكثر مني مستفزه احجي على اشتر اكله انت قاتل قبل لا نتزوج انهزمت منه كل شي سويت وياه بس هو خلاني على راسه احتواني وحبني وقدرني خلاني احبه و واكع بغرامة غصبا عني

انت يابه اناني عندك روحك بالدنيا وانت ما تعالج نفسك مريض من انت طفل وطلعت كل عقدك بامي المسكينة طفله اخذتها طلعت كل امراضك بيها عقدتها كرهتها بروحها اشتغلت الك وظلت تجيب لكمة الاكل وتحطها بحلكنه لان انت مقصر

رد عليه ... لااا هي جانت تشتغل حتى تديح هناك وتاخذ راحتها وتخلص عهرها هناك لان عامر شايب ما يعجبها تريدلها شاب يريحها بعمرها ما ميته على الفلوس ميته على النوم والزنا خانتني وكتلها حلال

تنهدت بقرف من كلامه .. انت مستحيل تكون انسان صاحي امي مو هيج والله مو هيج صح مجانت تهتم الك بسبب معاملتك بس ابد مخانتك وجان كل همها احنه شلون توصلنه وتكبرنه وابد ما اهتمت النفسها ولا اشترت الها شي

رد عليه .. جذابه هي لكيتها بشقه واخذوها سجنوها هناك لكوها بشقة دعاره امجن عااار بعد لا تحجن ولا تكولن ولا تبررن الها لان هي عار وتظل عار وحتى واحد حرام يترحم عليها هيج حق الله يكول

جاوبته ... زين عندي فكره ليش ما نروح فد دكتور نفسي تسولفله كل شي بخاطرك ونشوف شنو يكولك

جاوب بغضب ... شنووو اني خبل بت النعال امشي ولي للغرفه نامي لا بارك الله بيج مثل امج كل ما حجت وكالت اخذك دكتور نفسي تعالج المخبلات يردن يخلنهم يشمروني بالشماعيه امهات النعوله

عفته ورحت الكلام وياه عقيم وابد ما اكدر اتناقش ويه اجي وياه يمنى يطلع يسره

دخلت للغرفه وهو دخل وراي شاف تسواهن نايمه وتشخر

غمها بثنين اديه وتفل عليها كال .. لا بارك الله بيج ولا باخوج جحيم ظال على ايار احسن الي عاد ادمغ بيها محد يحجي وجنها حوريه

وهسه هاي جنها ثور ونايم وجحيم عبالك منطيني بنت الاربعطعش وهي حايله ومجيمه ومحد بحالها

بس هو اني حظي من الصغر نايم بالطهاره من ايار لتسواهن وهي نعال ما تسوه

ابتسمت على كلامه بعد ما طلع والله اذا تكعد وتلگاه يغلط عليها الا تمرعده تمرعد وتلعن امه الجابته

ظليت افكر بكلامة بصراحة اول مره اسمع عن هذا الموضوع الي حجه بيه يعني معقوله كلامة صحيح لو خرف من وره تسواهن وظل يالف قصص من كيفه

كولش مشتاقه لاشتر اتصلت بيه مجاوبني واليوم حتى ما سال عني عزااا بس لا راح عند سالي صار هوايه مملتقين هو وياها اي طبعا لكاها فرصه كال .. المسعده مموجوده خلي اروح ويه سالي الجالي عساها بجالي حتى لو تسرب روبه ما تطيب منه

استغفرت ربي شسالفه صايره خبله هسه ساعه بالثنتين اكيد نايم حبيبي سيد الرجال اووي فدوه شكد انيقه اني كاتبته سيد الرجال وفعلا تاج وباج ابو ابراهيم المحقق مالتي جعل محد يحقق غيره

......................

رنا

جنت هسه عروس فرحانه بروحي ردت اروح بعرس جيهان ما قبل جدي للاسف وحيل ضجت منه بصراحة بس محبيت استفزه لان اني هسه متزوجة مو مال اسوي مشاكل خلي عود اثير قديمة ويتدللون

كوثر لحد الان مدري شبيها تتصل وتخابر و وجهه مخطوف اصفر اثارت حفيظتي وشككتني بأمرها غريبه هاي البنيه شبيها

سمعتها تخابر وهي تحجي .. اي الحمدلله المهم انفتحت الرسائل يعني صار عندها علم بالموضوع

من شافتني كالت وهي تضحك ... ههه اي لازم تشوف الرسائل سجى حتى تعرف اني مو قليله هههههه يله عمري هو موضوع شقه بعدين نتفاهم

قفلت الخط وراحت تمشي ما بررت ولا حجت اي كلمة

رحت كعدت بالصاله اتراسل ويه امي ..اتصلت على جيهان ما حصلتها بس شكد مشتاقتلها اريدها تدزلي صور عرسها اريد اشوف شطالعه واريد اباوك الها

جدي جان يصلي جوه بالاستقبال الظهر وجاستن بالسنتر شويه ورجع من السنتر والخوف والقلق واضح على وجهه دخل بسرعه كال .. وين ابوووي احجي بسرعه

رديت عليه بسرعه ... جوه بالاستقبال ديصلي ليش اكوو شي ؟

تجاهلني وعافني وراح يركض دخل جوه وهو يكول لجدي ... يابه جيهان مرة كريم عرفت امها عايشه ومتخربطه وهسه هي بالمستشفى

اني ارتعشت من الخبر احس مدري شنو مشه بجسمي احس كزبر جلدي صرخت بصوت عالي... عزااااااااااا مرت خالي ايار عايشه عايشه شنو هاي صدك تحجوووون

جدي باوعلي بغضب انوب رجع باوع الجاسم وهو يكوله .. شلوون عرفت احجيلي

جاسم .. والله ما اعرف هي عرفت وخلص البنيه منهاره والمشكله اذا عامر عرف بالسالفه شيخلصنه منه وانت تعرفه شكد واحد متعجرف ومخبل

دخلت كوثر وام حسن بعد ما عرفن بالموضوع كوثر ظلت تبجي تكول عساس مقهوره على ايار لان هي تحبها وفرحانه لبناتها لان راح ترجع الهن وتدعي على كل واحد فرقهن عن امهن واولهن عامر

جدي بسرعه لبس عكاله وراح لكريم ....وكوثر وام حسن اخذن تكسي وراحن لبيت خالي عامر

.................................

افيان

كعدت الصبح ما اعرف شبيه ضايجة يمكن نايمة عليه تسواهن وخانكتني لان حسره مو طبيعيه دهر فر تسواهن شكو سالفه ما بيها حظ تسويها مرة فاذر

كعدت يمي تسواهن وهي تكول .. خاب اكلج ما عندج خلطه منا منا جااا انتي مو يسمونج ام الخبطات اريد خبطه كون تكون مستعجلة اكثر مني اريد اصير بيه متت وجهي املح اجلح جنه صبابة بيتكم

جاوبتها بخبث ... جيبي فلوس وخلطه تكون عندج لعد شعبالج تسوين روحج حلوه براس الازواج

غمتني وهي تكول .. اهمداج امده خيرج فكر مثل ابووج تلطمين على الربع تاليتج مثل عامر تكرطين كعك وسنونج واكعه ومكسره

ضحكت ... ههههه لا عيني لا لا لا لا اني مبذهه نفسي اصلا تلافه كله يسموني فافي التلافه مشيت اخواتي على فلوس

فرفرت شفايفها معاجبها الوضع مدت ايدها بصدرها وطلعت الفين كالت .. هاج هاي الفين وتظلين تطلبيني تلاثه من يجي اخوي جحيم انطيج تلاثه اخذ منه

لزمت ايدها بتوسل .. لا فدوه لا عيني اخذيها ببلاش انوب جحيم يدري بيه هيج مسويه بيج وينفخ على بيتنا ويطيرنا شيخلصنه من جحومي الله يحفظه ويرعاه ويطول بعمره

عيني تسواهن الخلطات الج مجانن ببلاش بس كون جحيم يرضا علينه وهااا عيني شوفي اني مثل ابوي الشخص المحترم احترمة واقدره مو اخاف منه احترمة ركزيلي على احترمة

اخذت الخلطه مني ودهنت وجهه بسرعه صارت ملحة بالزايد بس عادي بعدين تبين النتائج هسه تصير تلج لج من البياض

ما نشوف الا دخلت عليه ام حسن وكوثر وحدتهن وجهه اسود ما يكصه السيف ومخطوف لونهن حتى من دون ما يسلمن كالن .. صدك الي سمعناه

طلعت سولين من الغرفه لان هي بايته يمنه كلتلهن ... اي شنوو الي سمعتنه انووووب

ردت كوثر وهي منهاره وتبجي ... امجن عايشه

.....................

سولين

اول ما سمعت صوت كوثر وام حسن طلعت بسرعه بعدني هسه طلعت وهي صدمتني من كالت ... امج عايشه

وكفت بمكاني ما تحركت خطوه وحتى جمد عندي الاحساس جمدت كل مشاعري الدم نشف بعروكي ما اعرف شنو الي صار بيه تخبلت والصدمة الجمت كل حواسي

لكن راودني شعور بين تصديق الكلام ورفضه معقوله لو هاي تضحك عليه يعني امييي عايشه لااا ما اصدك مستحيل اصدك

وكعت من طولي وكل جسمي يرجف عطت بيها بغضب .... لااااااا جذب انتي وحده جذابه انتي منافقه تردين تحركين كلبي على امي .. امي ماتت وشبعت موت لا تلعبين علينه

ردت ام حسن بعد ما تقربت مني وحضنتني وهي تكول .. والله امج عايشه والله وهسه عند خالج بالبصره امج تبجي عليجن دم بس الله لا ينطي الجان السبب

وكفت بجنون ... لاااا مستحيل لاااا اني شفتها ماتت شفتها كتلها ابوي رماها سبحت بدمها لااااااا لتضحكون علينه والله ماتت لو تخلوني اتعلق بامل وبعدين تكسرون بيه ما اريد تكسرونه مره ثانيه اموت مرتين والله ما اريد اعيش بامل وتالي انخذل

ام حسن لزمتني كالت .. والله يمه والله امج عايشه وبصحة وخير الحمدلله

عفتها وركضت بالبيت ابوس بافيان الي جانت تصرخ منهاره وامين يبجي بصوت يكطع الكلب جنت احضن بيهم وابوسهم واحجي وياهم ..، شفتوا امي طلعت عايشه راح نرجع لامي يارب شكرا الرحمتك يارب تحيي العظام وهي رميم دخيلك يارب

سجدت بمكاني وكلبي ينزف من الداخل وابجي واصرخ ولزمتني تسواهن وغسلت وجهي جانت تشرب بجكارتها كالت .. على كيفج راح تموتين الطفل ببطنج لا تتخبلين

باوعتلها ولزمت اديها ابوس بيهن .. فدوه خاله فدوه كولي يعني صحيح امي عايشه يعني صدك امي ما بيها شي ؟ فدوه ريحي گلبي ريحيني احس گلبي راح يطلع من صدري

مسحت دموعي وهي تكول .. اي عايشه امج لا تخافين ومثل ما كالت ام حسن هي عند اخوها بالبصره والحمدلله صحتها تمام

جاوبتها بحزن وذهول والدموع عشره عشره ..يعني تدرون محد منكم كدر يطمن كلبي بكلمة محد انكسر خاطره علينه

ردت عليه كوثر .. هو زوجج اول واحد يعرف ومتفق ويه خالج ما يحجون شي. يله المهم عايشه ما تكدرين تعاقبين على عالم على الكلام يمكن جانوا يخافون من عامر يوصل الها

صرخت بيها وهزيت راسي برفض ... لاااا مستحييل لا اني اعرف اشتر لا يخاف من ابوي ولا هم يحزنون ليش ما حجه ليش

اتصلت عليه اتصلت ميجاوب احترك كلبي حييل وعقلي ظل يراودلي بأشياء ما الها صحه

شويه واجت عمتي ام حارث هي وحارث تركض  كالت بقلق ورعب .. وين ابو كريم هذا عامر هجم على بيتكم ورنا وحدها بالبيت

راحت ام حسن تركض هي وعمتي وتسواهن وظلت بس كوثر حارث هو اخذهن

جنت منهاره ابجي ساعه ساعه اوكف بالباب اتصل اشتر بسرعه جاوبت عليه كتله من دون كل شي ... من شووووكت تعرف امي عايشه ومماتت

صمت ثواني بعدها كال .. جاي هسه افهمج

قفلت الخط وابجي امسح بدموعي وتنزل عشره شويه ودخل حارث وهو جايب جيهان وياه لازمة وكوه يمشي بيها

كال .. هاي جيهان ديروا بالكم عليها عامر تعارك ويه كريم وجدي كهلان اروح اشوفهم

اني جنت منهاره حتى ما بيه الزمها واكعدها اخذتها كوثر وهي تمسح بوجهها وشربتها مي

اخذت الموبايل من جيهان لان كوثر كالت .. الرسايل واصله الكوثر ما اعرف منو مراسلها

فتحتهن واني اقره بيهن جنت حتى ما اشوف من كثر الدموع حتى ما اكدر انصدمت من الكلام المكتوب اشتر يعرف وما يريد اعرف امي عايشه لان امي عار ويخاف يلوحني عارها

سمعت حارث وهو يكول لاشتر ..ادخل ادخل

حديت اسناني بغضب وطلعت منهاره وهاجمه عليه انعاد عليه شريط مقتل امي والاشتر جان موجود اكو هوايه اشياء راودتني امي

شفته كدامي كتله بدمعه وحسره .. من شوكت تعرف امي ما ميته من شوكت

تنهد ورد عليه بحيره  كال .. اهدي وخلينه نحجي

رديت عليه بصراخ وانهيار ... احجييي اسمعك

جانوا كلهم واكفين كوثر واخواتي وحارث جاوبني .. من اول ما انضربت امج

مشيت خطوات مذهوله مكسوره .. يعني جنت تعرف امي عايشه جنت اتوسل بيك ازور قبرها ابجي والدمعه بيعني كدامك انهار واتخربط ما هزيت منك شعره ما نكسر خاطرك عليه شلون ترضاها انوب والدمعه بعيني وانت تعرف كل شي وساكت حتى بكلمة ما تطمني

جاوبني .. جان اتفاق هسه افهمج كل شي

صفكت باديه باسف .. لا والله مع الاسف عليك ظام عليه موضوع امي مخليني اصارع بمكاني ولك والله هاي مو سالفته رجال بهاي سالفتك بينت
انت نعال متسوه من بين الزلم

انصدم من كلمتي هو مو بس هو انصدم حتى اني انصدمت شلون هيج دل لساني وكوثر باوعتله بصدمة حارث كذلك الوجوه اختلفت

وافيان صرخت بيه وهي تكول ... انجبييي

تقرب مني وهو يكول .. اني ما سوالي نعال خلف الله عليج

باوع بعيوني بتركيز كال بحده وقهر ... انتي طالق

نهاية البارت .. يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل ❤️