رواية #وكر الأشتر الفصل الرابع عشر 14 - بقلم الكاتبه سمو العراق

البارت الرابع عشر
رواية.. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

تودُ النجاه ولاتنجو لأنك تغرقّ رغم محاولاتك.

.............................

الانسان من يكون تحت عائلة من وسط متدهوره او عائلة بايعه بزرها ومتعرف تحافظ عليه حيكون اكثر مواجهه للخطر وحنشوف عجايب من الدنيا لان العائلة هي الداعم الاول لكل شخص

اني لو جان ابويه شخص منطقي مجان شفت هيج شكولات ولا شهدت على هيج نماذج ابويه شمرني شمره بس الله يستر منها

سامعه هوايه ما شاء الله العراق ما يخلي من العصابات والثارات والقتل سامعه اي بس ابد مشايفه بعيني ابد مشايفه

سامعه اكو احزاب مجرمه واكو طائفية واكو تجار مخدرات واكو كل شي واكو ناس تقتل بدم بارد بس ابد مشايفه بعيني مشايفه وحاليا دا اشوف ومستغربه وگلبي يرجف والشك صار عندي يجري بالدم

جنت اباوعله الاثنين الي جانوا وياه ابد مشايفتهم مبينين راكزين وايده اليمين بعيدا عن عايد وعن دوحي وبوحي ومدري شنو لا ذول وجههم ميتفسر وما ينطقون بحرف

زين ذول منو وتجمع العفطيه منو والله دخت وحتى دخت بعلاقة ابويه بيه

ساهر جان كاعد على ركبه ومنزل راسه واديه وره اجتافه ارتعدت من المشهد وخفت من الاشتر حيل بعد ما احجي وياه ولا استفزه ولا اكوله اكرهك

هو كال اجيبه يعني اجيبه وفعلا جابه وما فوتها اله ولحد الان يدور بعقلي شنو الي صاير بينهم حتى واحد يهجم على الثاني

وكف وهو يجر نفس كال بصوت هادئ... اي ساهر جنت تتوقع تكعد هاي الكعده وتركع كدامي لو ممتوقع

رفع راسه اله وهو يجاوبه بخوف .. اشتر لا تتخبل دير بالك تكتلني ترا اذا كتلتني راح يعرف تحسين انت وره موتي وانت تعرف تحسين شنو وينتمي لمنو

جاوبه الاشتر بضحكة مستفزه.. ههه اي هي الدنيا خربت اكو مثل يحجي الي حجي اديب الله يذكره بالخير يكول خربت والمعلم بعد ما ينهاب اذا كدام عينه تركص الطلاب  تهددني بتحسين الزفت

ضحكوا الاثنين الواكفين بصوت عالي وكأن هم يجاملون الاشتر وساهر تخربطت عنده الوضعيه

ساهر بقلق... اريد اعرف انت المن جايبني هنا

جاوبه بعدم مبالاة.. مو كتلك ضايجين لا تخاف مجرد اوبخك وتروح

التفتت برعب ساهر وهو يباوع الواحد الواكفين كله.. بب بس اوكف خلينا نتفاهم

هز راسه برفض الاشتر... اوووه بصراحه ما حاب اتفاهم وياك كلش ما احب لغة التفاهم

بعدها سحبه من ياخته وهو يوكفه بقمة غضبه همس بصوت مرعب وهو يذكره... تذكر رحيق تتذكرها لو نسيتها ؟

بلع ريكه بخوف وهو يجاوبه.. اكو واحد ينسه رحيق حرگت گلوبنا مثل ما احترك گلبك

شد على شفايفه وتحولت ملامه الى شيطانيه وهو يضربه ببوكس بنص وجهه بحيث ساهر رجعت خطوات وهو ينضرب بالحايط و وكع بقايا الجص الموجود بالحايط

صرخ وهو يتلوه على الارض ويحاول يفتح اديه وتلوث حلگة بالدم

خفت حيييل ومن الخوف ما اعرف شوكت بجيت واديه ترجف وگلبي يدگ بسرعه خفت ارجع خطوات ويحس بيه تضاعف عندي الخوف منه وحسيت بيه اجرامي حيل اليوم

اشر الواحد من الموجودين وهو يگوله بسخريه.. افتح اديه حتى اذا بي خير يدافع عن نفسه

بسرعه ذاك بكل امر نزل الساهر وفتح اديه وكعده وساهر احسه داخ من البوكس وما كدر حتى يكعد

الاشتر رجع كعد وسحب جكاره وهو يدخن حجه من بين شفايفه الجكاره ورفع اصبعه بتهديد.. اسمها الحلو لا توسخه بالسانك القذر مفهووووم

ساهر مسح الدم من خشمه بقميصه المقلم وهو يكح ويتشحط بدمه

ضحك الاشتر بخبث وهو يكوله.. تتذكر الماضي لو نسيته ابن وجيهه لمدلل هه

بلع ريكه ساهر وجاوبه وهو لازم خشمه الي تفلش.. انت جايبني حتى تعيد الماضي لو شنو

الاشتر والجكاره بين شفايفه ويشغل بالجداحه ويطفيها وهو مركز عليها.. ليش هو منو الذكرنه بالماضي

وبعدها باوعله من فوك ليجوه وهو يتفحصه وكف وكعد مقابيله ركبه ونص مد ايده بجيب القميص وهو يطلع منها ورقه مطبوگة فتحها وخلاها كدام وجهه كله .. هذا السند صار عندي شفت ما تصعب عليه يا ابو هدى مو صح

اردف بغرور وهو يضربه بطرف الورقه.. لو ماشين عدل وما مسوين كل سوالفكم مو جان هسه احنه حبابين بس انتم طمعتوا بهذا السند ههه اكدر احركة كدامك بس هذا حقي راح احتفظ بيه( رجع ضماه بجيب القميص)

ساهر وهو يزحف خطوات مبتعد عنه.. انت هذا السند وصار عندك بعد شتريد ليش جايبني

الاشتر جر نفس وهو يرد عليه.. كتلك مجرد توبيخ

بعدها كمل ... بعدها امك طايحة حظ لو تعدلت

سكت ساهر مجاوبه

ضحك ... ههه شعدلها وهي جايبه عار مثلك

صرخ ساهر بغضب وهو يصيح... شتريد مني انت كولي شتريييد مني

جاوبه الاشتر بغضب .. متعرف موووو لك عار دست بيتي وهددت مرتي وتسأل شكد صلف وحقير وكلب بكل صلافه تسال شنو اريد

اريد اطيح حظك واشگ حلگك واترسه نعل وارجعك للساقط تحسين الي داگلي بي الصدر

ساهر بقلق .. ترا مصطفى هو جابنه

تنهد الاشتر ورد عليه ... لا تنافق كلكم دستو بيتي ومدامتي تگول انت طفيت الجگاره بحلگها فاني شنو تدري شنو حبيت بس شويه اادبك وبعدها تروح

جاوبه ساهر وهو يرتعد.. هي استفزتني وغلطت جان لسانها مستفز وسليط

جاوبه الاشتر بغرور.. لو تحط النعال بحلكك ما تحجي مفهوم

وكمل.. بعدين لبنيه كاعده ببيتها لا تعرفك ولا تعرفها ترا عار عليك تستغلها ضدي وشعبالك اسكتلك مثل قبل ليوم جبتك باجر اجيب العاهر جبيرك تحسين النعل

وكف وهو يحجي بغرور ويوجهه كلامه للاثنين الموجودين.. انتم ناس اعتبركم اجاويد وفضا للنزاع اشهدكم اذا اني غلطان هسه اطلع ساهر واني الممنون واذا مغلطان خلوني اتصرف

شوفوا هذا اقتحم بيتي واستغل عدم وجودي وتهجم على مرتي واذاها بينه ثار ما دخلت مرته ولا احد من عائلته بس هو لزمني من ايدي التوجعني وهجم على مدامتي شتكولون يستاهل العقوبه لو لا

جاوبوا بطاعه.. يستاهل اكيد

رد عليهم وهو يمد أيده إلهم .. دام هيج انطيني المكينه

هو گله انطيني المكينه واني من دون ما اشوفها خرطت العافيه والله جان كل ضني مكاينه متل خياط عبالي يخطيه مدري شيسويله صرت ارجف غمضت عيوني ما اريد اشوف صفكت على خدي .. عززا عزاا عزااا

والفضول عندي زاد باع الوكاحه والعراميه وحده غيري تشوف رجلها هيج يسوي جان انهزمت واني اباوعله خرب شكد ادبسز

انطاه المكينه شفتها مكينه مال حلاقه استغربت وهدئت من ثورتي .. يذبحه بالمكينه لو شنو يمممممه

وكف على راس ساهر واحد من الاثنين الموجودين ولزم المسدس خلاه براسه والاشتر شغل المكينه وهو يكول.. نمره اربعه مو

ساهر رفع اديه وهو يتوسله.. دخيلك لا دخيلك لا تسويها

ضحك بخبث وهو يامر الواكف على راس ساهر كله.. اذا رفع ايده مره ثانيه انهي حياته

وبعدها قرب المكينه منه وهو يزين نص شاربه

وبعدها انتقل الشعره الكثيف وهو يسوي بي شوارع يزين مكان ويخلي مكان

قفل المكينه وشمرها تكسرت بالحايط واني كمزت واحد من الموجودين حجه وياه وهو يوجه نظره للباب گله.. احس واحد موجود برا

جفلت بمكاني وحطيت اديه على صدري من الخوف واني ارجف

سمعت صوته وهو يضحك.. ماكو غير المره  مشتغله مخابرات عليه

ركضت بسرعه للغرفه واني ابجي ما اعرف شبيه حيل هزني الموقف جنت بحاجه امي اخواتي اي شخص جنت اريد افضفض اريد احجي اني الي شفته معقول صحيح لو شنو هذا الانسان شنو اريد اسولف الاي شخص وينصحني يطمني يكولي ذول مجرمين لو شنو

ليش يمي هادئ ويم غيري يخوف دخت غطيت نفسي واني ابجي وارجف من القلق والخوف

حسيت بي استوطن الغرفه وصوت انفاسه وصلي حجه بصوت جامد وهادئ.. سوليين اعرف جنتي كاعده تعالي بسرعه وراي للغرفه لجنتي تراقبيني منها

فتحت عيوني مصدومة ومرعوبه وكعدت هزيت راسي بنفي وارجف... انت منووو ؟

رد عليه بثقه... الاشتر

تقرب مني ردت اصرخ بس هو كتم كلامي بباطن كفه و وكفني مشاني لعند الباب واني ارجف واريد اوخر ايده من حلكي مكدرت

نزل وجهه عند اذاني وهو يهمس ويحاجيني عبالك طفله يرضيها... اششش لا تخافين مجرد اخذ حقج انتي متردين حقج

هزيت راسي بنفي وهو بعد ايده عن شفايفي جاوبته بخوف فضيع ... لا لا ما اريد ما اريد اشوفك تقتل وتجرم خليني عايشه على عما عيوني ما اريد

باوعلي بنظره زلزلت بدني كال .. صارلج ساعه تتجسسين عليه هسه خفتي شكد ادبسز

شهكت ... لا لا انت شنو ناوي تسوي كدامي

جاوب بجبروت.. احرگة مثل ما حرگج اني وعدتج و وعد الحر دين

فتحت شفايفي مرعوبه من كلامه ... تنازلت عن حقي عوفه خلي يولي

رد عليه ببرود وجمود... لازم يتأدب

فتحت عيوني برعب .. بس ما اريد اشوف شي ما اريد بطلت حتى بطلت اتجسس عليك

رد ببرود... براحتج

خله وطلع باوعلته جان يمشي بكل ثقه عبالك مدير شركة باوع للاثنين الي وياه وهو يكلهم .. تعذروني يابه تأخرت عليكم

جاوبوا.. تدلل ابو ابراهيم ما عدنا شي المهم راضي علينا

بعدها اختفى عن انظاري وهم هماتين

واني ظليت افتر بالغرفه بخوف اسمه يحجي بصوت عالي وكانه متقصد وبعدها سمعت صرخه مدويه من الطرف الثاني الي هو ساهر

الاشتر اسمعه يحجي بصوت عالي ومتعصب.. وهذا الاثر خليته بحلكك حتى تتذكر مرتي

ورجع عاد نفس الكلام ونعادت نفس الصرخه ورجع كال... وهاي لزكتها بگصتك حتى من تمشي بالشارع ويسألوك تتذكرني

حطيت اديه على اذاني و وكعت على الركبي ياربي اني وييين معقوووله معقووله هيج اكو بالعراق ناس تكتل ناس وناس تعاقب بناس احس كاعده بنص شياطين بنص وحوش

ركضت بسرعه وسديت الباب قفلته واكو دبه مال مي ارو سحبتها وسديت بيها الباب حتى ما يدخل

صح هو جابه الخاطري وعاقبه بس اني صار عندي رعب وخوف منه وحسيتهم ناس يدورون الشر اني مجنت اتمنى اتزوج هيج شخص

جنت اتمنى اتزوج انسان مثقف دارس موظف استاذ جامعي هيج شي مو الاشتر امره مريب ومتخفي وغريب عليه حتى ميحجيلي عن حياته

ولا كدرت احلل الامور ولا عرفت منو ساهر والادهى انذكر اسم رحيق اليوم والاشتر انهار... هذا الاسم تارك وجعه بگلبه ياربي ما اعرف شسوي تعبت واني باول المشوار

حسيت بيهم طلعوا ركضت للشباك و وخرت البرده شفت طلعوا ساهر وهم رابطين عيونه ورابطين اديه

جان الجو مظلم وبارد وهدوء بس صوت الصراصير ينسمع وهواء عالي حيل وبارد حجه وياهم وهو يأمرهم.. اخذوا نظل على الاتصال ان شاء الله وبعدين اكلكم شتسوون

اخذوا وطلعوا وهو كعد على القنفه الخشم القديمة جانت متواجده بنص الحوش امتد عليها ابد ميحس بالبرد شنو جلد مال تمساح شغل موبايله وهو يستمع لاغنيته المفضله وضوء القمر عاكس عليه

عفته وتغطيت ببطانيتين ونمت واني ارجف وادعي واردد بيني وبين نفسي ( وجعلنا من بين أيديهم سدا ومن خلفهم سدا فأغشيناهم فهم لا يبصرون ) ان شاء الله اختفي من عيون الاشتر

نمت تعبانه وكل شويه افز مرعوبه ودندنة الأغنية يطرب بأذني..

.....................

جيهان

من بعد ما اجت رنا ما صدكنا فرحنا من كل گلبنا عبالك مثل السجناء واجو اهلهم يزوروهم ما نعرف شنسوي نبوسها نحظنها ما نعرف شكد نحبها واني بالذات حيل احب رنا بنت عمتي شكريه حيل طيبه وحبابه

كعدناها جوه بالغرفه وقفلنا الابواب كلها هي كمزت من مكانها.. شو سديتن البيبان بس تردن تغتالني

ردت عليها افيان.. دستقري مو انتي عاليه نصيف ونغتالج غير نخاف لا يجي خالج وتصير بالنعل

رنا بحسره... شلونه وياجن هالمدهور بعده مخبل ما عقل

افيان بسخريه.. لا عقل صار بس هو وبس يصوم باليل ويفطر بالنهار دسكتي تحجين الواحد كوه شيعقله وهو صديق ابو سعدون الفضولي

رنا ضحكت.. قصدي بعده يضرب

جاوبتها.. اي يضرب بس هالايام ساده حلكة احف وانطي فلوس حتى ما يشغل امين ويه ابو سعدون

عقدت حواجبها بصدمة.. شنو يشغل اموني ويه ابو سعدون ويشتغل بله هالطفل المسكين والله يا خالي

افيان هزت ايدها.. شمدريني بخالج امداج  امده فرگج بعدج لهسه تصيحين خالي بعدج ممتبريه منه اني منج واني ببطن امي اتبره منه صدك جذب خال جيس حب

رنا ... هههه شسوي حظي بعد اي بشرني سولين ماكو اخبار عنها

جاوبتها اني متحسره على حالها... لا سوده عليه ماكو تكسر باب الگلب ورجلها عصبي مدري شنو لج ما ينعاش وياه مطيح حظ ابويه

رنا بسرعه.. هاي احلى فقره مطيح حظ ابوج

جاوبتها بحزن .. بس شنو الفايده سولين تخاف منه وتكسر الخاطر

ردت رنا.. هو صدك ما ينجرع وعصبي ومبين داخل بكل زاغور هو اجانه واني حيل خفت منه من اقتحم بيتنا وهدد اخويه بس تدرين شنو سولين مو فقيره هم لسانها اطول منها هسه تلگيها صايره بالنعل بينهم

حطيت ايدي على صدري والحزن خيم عليه... يمه هسه بس لا يكتلها

رنا .. الله كريم ان شاء الله يلطف بحالها وميحاجيها بس كون ترد لسانها لان اختج اعرفها هي وافيان نفس اللسان

جاوبتها.. لا سولين اهدئ فافي لسان دلاله

ردت عليه افيان بفخر.. حفافه گلبي لحد الان ممشتعله بالدلاليه

ظلت رنا تضحك كالت.. صدك كريم رجع من السفر ويسال عنجن

ما اعرف شصار بيه من ذكرت اسمه عبالك ذكرت شخص ظالمني حسيت ببروده باطرافي وگلبي احسه وكع ببطني بلعت ريكي بخوف.. الحمدلله على سلامته

جاوبت افيان بعدم اهتمام.. وشنسويله خلي يولي ما عنده موقف ويانه

رنا ردت عليها.. وشيكدر يسوي ترا ابوجن ظالم وظل يذب تهم على الرجال على ابو اني اطلع وانت تتحرش ببناتي ابوج ما يكدرله بس رجل سولين هو كل ظالم الله يسلط عليه ظالم اكثر منه

بعدين كريم الكل صار ضده من بعد ما اجاكم وابوجن هد عليه انوب الرمي صار بباب بيت جدي كهلان وجدي عرف ابوج ما وراه بس المصايب لهذا السبب هو بعد كريم وجاسم منجن

بس لحد الان كريم ممقصر ويسال ومو حتى دز المره تاخذ اخبارجن ترا وما عرفنه سولين مخطوبه الا من كريم هو خبر حارث ويحاول يساعدجن بكل ما يملك بس عامر ما ينطي مجال ويصيحه ويشتكي عند جدي وعند العشيره وبعد ما انطرد من العشيره محد مسؤول يتدخل بيجن غير عامر يعني زين منه ويسأل

افيان .. هو بس يموت عامر احنه الحمدلله ما عدنا شي

رنا جاوبتها بحزن .. شكد صعبه البنيه من تكرهه ابوها وتتمناله الموت الاي مكان وصلجن حتى هيج تحجن عنه

افيان بحقد... ما زرع طيب زرع بس الحقاره وحصد بس الحقد الله ينتقم منه كتل امي بدم بارد ومحد اخذ حقها منه عذبها وظلمها وبعده يظلم بينه ظلم سولين وانطاها لواحد ممعروف اصله من فصله وجرم بخاطرها كل هذا ويصيح حق الله لا شافك الله ان شاء الله ولا رحمك بحق محمد وال محمد

رنا حبت تلطم الجو ضحكت كلتلها.. ليش طردتي زباينج جان حصلتي جم فلس

افيان باستهزاء.. يمعوده خيولن كلهن منافقات وجذابات يطلعن يكصن بينه حابه اادبهن لان هن ذن النسوان اذا واحد ما يتعيقل عليهن ويتعزز ميمشن عدل صدگيني

رنا... هههههه بس اني دوه للعالم كله دام راحت سولين ازوجج لحارث

عقدت حواجبها بعدم قبول وكشرت عن ملامحها... ويييع اني اتزوج اخوج ما بي خير هي عود سولين يموت عليها وخلاها راحت من ايده لعد اني شلون يمكن كل شويه ولزمنه عامر وخلانه نرافس

رنا بقهر.. انتي صدك كل شي ميجي بعينج ولج شلون مو هد على خالي وضربه بالنعال انوب هد على الاشتر شيسوي اذا نسيب ابوج مخبل

افيان بتنهيده... سولين دزتله رساله واحتمت بيه وما سوه شي الا بعد ما طاح الفاس بالراس يالله اجه ما اجاها اول ما وصلته الرساله

استغربت رنا وجاوبتها ببلاهه .. يا رساله شتحجين انتي

كملت اني الكلام عن افيان وجاوبتها.. اختي سولين دزت رساله بيد حوراء بت ام فاضل وانطتها الكوثر وكوثر كلتلها وصلت لحارث هاي قبل لا تنخطب سولين

رنا انتفضت من مكانها وردت عليه.. لا مستحيل مواصل هيج كلام ولا واصله اي رساله لاخويه لان اخويه ابد ما يضمن عنه ودو فعلا واصله اله رساله اكيد يجي شلون هو يتخبل على سولين

رفعت اكتافي بعدم معرفه.. والله ما اعرف بس حوراء كالت وصلت الرساله وكوثر وصلتها

بهتت ملامح رنا و وكفت كالت ... يله اني لازم اروح ان شاء الله هماتين اجيكم

انطتنه فلوس كالت .. هاي ٢٥ الف تصرفن بيها وان شاء الله امر عليكم دام ابوج مشغول بابو سعدون المعقج

ضحكنا وافيان راحت باوعت منا ومنا وامنت الها الطريق وطلعتها ظلينه كاعدين وافيان راحت اشترت النه واجت والله مدللتنه

شويه ودخل ابوي وهو شايل صندوگ مال طمامه صاح علينه كال.. تعالن تعاااالن بنات الكلب تحجن عليه واني مدللجن دلال جبتلجن صندوك طمامه اريده يظل شهر

افيان ردت عليه.. خلف الله عليك

باوعلها بعصبيه .. والعباس لو ما حق الله واخاف من الله جااا انتي هسه ادفنج بمكانج انتن من وراج وره لسانج العالم تحجي عليه بس ميخالف يكول المثل كن مظلوما ولا تكن ظالما الحمدلله ربي اهم شي رضاك محمود مشكور ربي

استغربت هاي اول مره ابوي يحمد الله ويشكره هو دوم يلطم ويبجي بباب العباس بس يمكن حاس نفسه مسوي فد انجاز وفرحان بروحها هو وصندوك الطماطه

كعد ياكل وهو يطلع اصوات مقززه من الطماطه وانوب وسخه ومدبگة يييع لعبت نفسي همزين طالعات على امي نظيفات ونكشكش مو مثله يخبط خبط
وياكل وسخ

انوب يا الله اللبس يصغر بنفسه ما اعرف شنو لابس تشيرت اخضر فسفوري وبنطرون بنطرون اسود بي خطوط برتقالي هو يشتري من الباله عباله كشخه هسه

اووف يا يمه مدري شعجب جدي بيه وزوجه الج بس هو مراوغ قسمر جدي وجان مداس اله ومسوي روحه بس هو وبس وبعدها طلعت ريحته جدي امي ما تبري الذمة وحتى من مات ما برته الذمه لان كالت مو بس اني تعذبت حتى بناتي تعذبن وضاعن

.............................

سولين

كعدت الصبح گوه فتحت عيوني عبالك وحده مضروبه كمياوي من الوجع راسه احسه صاير طبل وعيوني كوه فاتحتهن

اول ما فتحت الشباك واني اباوع اشوف الاجواء شفته كاعد على القنفه وهو لازم سجين ويقلم بخشبه طويله ويحدد بيها ومركز عبالك ولا جنه البارحه هاجم شخصيه تتغير جنه جلد الحيه كل شويه بلون

تافئفت ضايجه انتبهت على التيل موجود بنص الحوش هاي شنووو هاي اشو هسه انتبهت على التيل خرب الناس بنص بيتها شجره نخله اني تيل

هاي يمكن حتى اذا سويت وكاحه يعدمني بالتيل لو يشقنني بيه خلي اصير مؤدبه وحبابه احسن الي

رفع عيونه للشباك من دون ما يرفع راسه وحجه بهدوء.. مناويه تكعدين ب١١ ونص صارت

سديت البرده بسرعه و وخرت دبة المي ارو ولبست حجابي وطلعت بارده جانت حيل وماكو ملابس لبست ثوبين واحد فوك اللخ

وكفت كدامه وهو يكشط بخشب العصايه الطويله كتله .. صباح الخير

رفع راسه اليه مصدوم كال... مسخنه ؟

هزيت راسي بنفي جاوبته...  لا ليش؟

أبتسم باستهزاء كال.. اول مره تكولين صباح الخير مو عوايدج

جاوبته واني ابلع بريگي ... لا هيج عادي هسه مو زين كتلك ليش تفشلني راعي مشاعري

هز السجين بيده وهو يرد عليه .. احجي كلمة تردين عشره شكد عندج قابليه للحجي

كعدت مقابيله على القنفه وهو مستمر كشر العصه تگشر بعدها باوعلي كال .. تكدرين تسويلي ريوگ عايد مموجود

وگفت وجاوبته ... اي اگدر

انصدم مني هو متعلم كله ما اگدر بس اني خفت من البارحه وعيني على التيل كتله.. اسال سؤال

جاوبني بسرعه.. اذا عن الصار البارحه افضل متسالين

رديت عليه .. لا ميخص البارحه

جاوب بغرور.. چاااا اسألي

بللت شفايفي وشجعت نفسي.. يا مهندس مفضوح هذا الي بنالك هذا البيت بحيث اول مره اشوف تيل بنص البيت

ضحك كال.. مهندس متجاوز على الدولة هه

ابتسمت بملامح حزينه.. فعلا متجاوز على الدوله ترا مو جذب ناس تاخذ نص متر متر تجاوز بس مو نص الشارع

رد عليه.. بعد شنسوي خبل هذا المهندس

ابتسمت وخليت ورحت للمطبخ ايع مطبخ مقرف الي درجه مكرفع الحايط مالته بيه سنك وطباخ وثلاجه عتيكات وبي سله بيها بصل وبتيته  وكاونتر خشب صغير

فتحت الكاونتر طلعت طاوه .. يا الله هذا شسويه هسه من اكله خلي اتفنن حتى يغزر بيه الزاد والملح

خبطت بيتنجان وبتيته وطماطه وفلفل كلهن سوه ولبلبي لكيت هم خليته وطكيت بيض عود اتفنن اسوي فن الطبخ حطيتهن بماعون وحيطت فوكاه طماطه مقطعه منا ومنا وكرفسايه وحده منا و وحده منا وبصلايه منا وبصلايه منا

وسويت جاي وطلعت حطيته كدامه هو شمر العصه والسجين واني مفتخره كال.. ما شاء الله يفتح النفس الماعون

ابتسمت مجامله وهو كعد ياكل كال.. تعالي اكلي

كعدت انقش بصراحه مو طيب يلعب النفس حشا نعمة الله انوب مالحهه بس هو اكلها واستطعم بيها هو وين يعرف الطعم منو طابخله كله عنده طيب ههه

كمل وشرب جاي وبعدها كام غسل واجه وهو ينشف اديه بالخاولي كال.. عاشت ايدج ومشكورة مقصرتي

جاوبته.. عادي مسويت شي ماكو داعي للشكر

رحت دا اغسل مواعين سمعته وهو يتصل ويخفت بصوته عقدت حواجبي وتسللت ببسكوت واني اتسمع عليه

سمعته يكوله.. وينك انت اليوم كعدت من الصبح متت جوع ومالي خلك اكل بالشارع وانوب المره سوتلي ريوگ

بعدها كمل ... يمعود منيلها اكلها طيب اسوء اكلها من بعد اكل مال اليتيم لعبان نفس بس جاملتها

فتحت عيوني مصدومة ... يا جذاب انوب يكول عاشت ايدج وهو يقلد على طبخي ما يسوه التفنن

رجعت للمطبخ واني انظف اريد اعرف شغله وحده يعني هو حيل حباب ويايه ويجاملني وما اذاني بس احسه يجمل نفسه كدامي والبارحه الموقف يدگ بگلبي والله يدگ بگلبي ليش هيج يتصرف ويايه رغم هوايه استفزه واطول لساني بس ميحجي

زين معقوله يخاف مني لعد شكد حيه انييي ياربي والله دا احير وياه هذا الانسان ممار عليه هيج ابد شخصيه كلت اكعد يمه واتقرب منه بس اخاف يبوسني شلون  لا لا ما اتقرب خليني بعيده عود ناويه احتوي بس اتذكرت الزلم وينعطون مجال

سمعته وهو يصيح بصوت عالي ... لك كلب حيوان سكان انزل لا املصك انت وطيورك

مديت راسي من الباب شفت ولد صاعد على سطحهم ومتعلي على بيتنا وهو يطير طيور ويصيح كش عااااااا كش عااااااع

رد على الاشتر ... شصار واذا طيرت طيور على سطحك نمونه خو ما نمونه يا ما جنت اطير ما تحجي هسه من تزوجت صرت ما تقبل هاي واحنه اهل

جاوبه الاشتر بقرف.. دنجب انوب اهل شوف لك البيت اله حرمته واني مو وحدي اذا سمعت او حسيت واحد منكم متعدي على بابي لو صاعد على سطحي ما يلوم غير نفسه مرتي موجوده بالبيت الي يضايقها اشگ حلگه و وصل خبر لربعك العفطيه تمام؟

رد عليه ذاك ... اووووف والله زمن

اخذ طيوره وخله ونزل جوه وهو يدردم والاشتر رد عليه... مو اجي اشگ حلكك

وذاك جاوبه.. هي شنهي هسه اني شحجيت

طلعت وخليت وكعدت على القنفه وهو كاعد رجع يسوي بالخشب يمكن سوه عشرين وحده حجيت بقهر.. المنطقه كولش حلوه ما شاء الله وناسها شلون ناس مثقفين هسه يطلع دوحي دكتور

باوعلي بطرف عينه كال.. شعرفج بدوحي

جاوبته.. تقريبا عرفت نص العفطيه جماعتك

ضحك بسخريه .. ههه

رديت عليه... ممكن سؤال

رد عليه... جواب

سحبت نفس وزفرته... ممكن تحجيلي شويه عن نفسك

رد عليه.. شحجي شاب عادي حالي حال الناس

ضحكت بسخريه.. صدك عود تعتبر نفسك حالك حال الناس

رفع حاجب ورد عليه.. ليش شبيه زومبي لو اكل بشر انسان طبيعي

ضحكت... اكثر مثل ينطبق عليك هو الزومبي هههه

رد عليه باستهزاء... لا هاي شنو هاي انتي كلش لوتيه اني لازم انسحب

رفعت حاجب.. ادري تضحك عليه

ابتسم .. لا صدك جذب  شلون اضحك عليج

تنفست بغضب.. زين ليش تزوجتني

رفع اكتافه بعدم معرفه... ما اعرف

وكفت متعصبه.. هو شنو ما تعرف لا تحجي لا تكول شنو اني زوجتك لو گونيه عدس ولا جني زوجتك والي حق عليك

باوعلي بنظره هزت بدني من فوك ليجوه كال... لا عاد لهنا وكافي تدورين حقوق عساس انتي ناطيتني حقوقي انطيني حقي والج حقج

احس نفسي صرت نار وتعصبت اكثر.. يا حقوق يله عود عيني واكعد اصرف عليك ادللك دلال حتى وجهك يورد

ضحك .. حقوق زوجيه بنيتي

استغربت  وبعدها افتهم تخصرت ورديت عليه بغضب... زوجيه شنووو ليكون تريد تنام وياي

مسح طرف شفته وهو يرد عليه... اوووف لو يدري عايد مراح يصير عم الا المدام هي بذات نفسها تسلم الحقوق الا ينجن

هزيت راسي بنفي... لا مستحيل ما احبك اني وناويه اتطلگ

رد عليه.. ان شاء الله خير

رجعت كملت .. اي والله انوب اتزوج واحد ما اعرف عنه اي شي وحتى نا اعرف منو اهله وحتى عرس مسويتلي

ابتسم.. اسويلج عرس ان شاء الله

جاوبته بحقد... اي عود من تسويلي عرس افكر انطيك حقوقك

رد عليه بذوبان ... الله متحمس

خليت ومشيت من كدامه متعصبه شنو هاي لا ينطي حق ولا باطل وبس يضحك عليه عبالك طفل يحجي ويايه ولا جني زوجته والي حق عليه ترا ميصير هيج

صاح عليه بصوت جهوري... طولج حلووو

تكهربت مشاعري و وكفت من صدمتي وييي يتغزل بطولي بعدها مشيت خلي يولي لا مياثر بيه عود يريد يقشمرني والله اذا ما اعرف سره ممنوع اخلي يتقرب مني

..........................

رنا

من بعد ما اجيت من بيت خالي واني عقلي يفور معقوله معقوله رساله دازتها سولين وكوثر ما وصلتها زين ليش شنو السبب والله عجيب هي وحده من الاثنين لو كوثر لو حوراء هي الي ما وصلتها

ظليت يومين وخليت ورحت البيت جدو كهلان دخلت لكيت حنان لابسه ثوب ستريج ضيق والزوادات اللحميه طالعه منا ومنا اني مو اتنمر لا بالقران هي حلوه مو محلوه بس هي شنو جسمها ممرتب احس عندها عضلات وزوادات وصدرها كبير مال بقره بس وجهه للامانه حلو وخاصه كحلتها مال امون تجنن

سلمت عليها وتمددت كلتلها..حنونه مي دافي اريد لان بلاعيمي مطبگة من الشتا وعمايله

ضحكت وخلت واجت جايبتلي مي شكد تخلي مكياج الكحل والتاتو والحمره احسها بدون مكياج احلى واتمنى اشوفها من دون مكياج بس هي وين مره مات عمها ورحنه لكيناها ممكيجه عود جنت متحمسه ههههههه

دخلت كوثر جايه من الجامعه لبسها حلو وهي حلوه لابسه بالطو طويل اسود وتشيرت ابيض وبنطرون ثلجي وبوت طويل اسود وحجاب ابيض وشايله كتبها وجنطتها من شافتني ضحكت كالت.. هلا مشتاقتلج عود كلت اليوم اجيكم

جاوبتها بضحكه... ما انطي مجال اني اجيتكم هههه

ظلت تضحك وراحت بدلت واجت تغدينا بس اني وياها سالتها عن كريم كالت والله ما اعرف هو من ابويه مموجود ميكعد بالبيت ابد

ضحكت بسخريه... اي يخاف من سميره تهجم عليه ههه

باوعتلي مستغربه بس سكتت مناقشت بعدها خلينه وطلعنه للحديقه ظلينه نتمشى بيها ونسولف

دخل جدو سلم علينه وراح دخل جوه

كالت بهدوء.. حارث بعده يحب سولين

جاوبتها.. ما نساها ولا لحظه ومستعد لو تتزوج وتتطلگ يرجع يتزوجها حيل يحبها

رد عليه .. لا خطيه سولين صديقتي وحيل احبها اتمنالها الخير ان شاء الله يارب ما تتطلك وحتى حرام على حارث هيج يحجي البنيه انسترت عيب هذا الحجي والفال المو حلو

ابتسمت باستهزاء.. زين الرساله ليش ما وصلت الحارث متعجبه اني

باوعتلي مستغربه كالت.. يا رساله ؟

انفعلت من كلامها .. الرساله الي رسلتها سولين الاخويه حارث قبل لا تنخطب بس الرساله ما وصلت الحارث

باوعتلي بارتباك وقلق كالت... فهميني يا رساله اشو انتي دتخوطين بصف الاستكان

رنا... سولين كتبت رساله لحارث اخويه قبل لا تنخطب وانطتها الحوراء صديقتجن توصلها الج بس الرساله ما وصلت الحارث بس وصلت الج مو صح

فتحت عيونها مصدومه وهزت راسها بنفي وهي مفهيه.. لا موصلتني ما وصلني اي شي لو وصل شي جان وصلته الحارث وليكون انتي دتتهميني ان اني ما وصلت الرساله الحارث؟

سكتت مجاوبتها وانطيتها فرصه تكمل كلامها

جاوبت بعصبيه ... ابد مستحيل موصلتني رساله لو واصل شي جان وصلته انتي منو وصلج هيج كلام يا جذاب يا منافق

رديت عليها ... افيان وجيهان

تنفست بغضب وحده واديها ترجف.. والله عرفتهن ماكو غيرهن ذن المنافقات الجذابات شكد اكرهن واكره نفاقهن اني يمهن بقربهن وهيج يحجن عليه بسيطه اذا مخليت ابويه يطيح حظهن فلا اطلع كوثر

تعصبت منها ومن كلامها ... لج شبيج انتي هجمتي على البنات ترا مجرد كالن وصلت الرساله يجوز حوراء جذبت عليهن وموصلتها

ودت بغضب.. والله ما اعرف ولا يدخلني بمشاكلهن عائله ميجي من وراها غير وجع الراس والنفاق ايع شكد مكروهات گبر حتى گبر

لزمتها وتفاجئت من ردة فعلها.. لج شبيج على كيفج يمعوده هو مجرد سؤال شكو انهرتي هيج ترا متسوه

تنفست بعصبيه ... بصراحه لان الموضوع مستفز ويضوج وهذن الادبسزيات تمادن حيل شايفات رواحهن مدري على شنو وهن حتى ما بيهن حظ وعائلة تافهه ومنحطه

صدك اني تعصبت رديت عليها...حدج كوثر لا تغلطين على بنات خالي احبهن ومثل اخواتي ما الهن ذنب اذا ابوهن ما بي خير واصلا ما حجن عنج ولا ذمنج بس مجرد كالن الرساله ما وصلت فلا تظلين تحجين من كيفج عيب عليج

دخلت جوه ضايجه كلت خلي اروح لاهلي هاي هزت بدني وضوجتني لسانها شطوله تعصب الواحد شايفه روحها مدري على شنو

اول مدخلت وشفت حنان وهي حاطه راسها على صدر جدو كلتله.. متت راسي يوجعني ما اعرف شبيه

كلها .. انه عندي شغل والشيوخ ناطريني من ارجع اخذج

ردت عليه بدلع.. اخاف تتاخر متت راسي مدا اكدر ارفعه

جاوبها .. خوش بويه هسه اخابر كريم اخليه ياخذج هو وام حسن للدكتور

بللت شفايفها وهي تتنفس ذايبه.. خاف عيب من كريم

رد عليها بضحكه ثگيله ... هههههه لا ابن رجلج مو عيب انتي حرمة ابو بمثابة امه

صدك اني ضحكت الحجي ميدري الحرمة ذايبه و ولهانه وهو يكلها امه اامده حظي نايم يجدو ورجليك بشمس

خليت وخابرت على حارث انتظرته شويه واجه وخليت ورحت وياه واني گلبي يفور وبالي منو موصل الرساله تشتت يا الله والله تشتت ولو واصله الرساله حارث يكدر يمنع الخطوبه يا ترى؟

........................

سولين

ملل وفد ضوجه ولعبان نفس انوب البيت شكد ما انضفه ميجي وياه ابد ميتنظف لعبت ام نفسي منه وهذا الاشتر لا احساس ولا مشاعر اصلا هو ملافي حتى يكعد بالمزبله الي كعدني بيها وعلى ساعه اتعارك وتصير حرب البسوس

دخل وهو يخابر دخل الساعه بالتسعه باليل هو عادي يحجي مرات كدامي لان هو يشفر الكلام ومرات ما افهم شي من كلامه فهو متطمن ما اعرف اسراره عشتو

سمعته يكوله... لا عوفه بعده ممتادب وحتى لو سالوا عنه يطبهم مرض خليهم يتادبون نفسه واذا ظل يزنطح عليك لا تسكتله طيح حظه ودير بالك تذكر اسم صفاء كدامه

قفل الخط واني باوعتله بسخريه.. ههه كلها مو مؤدبه ولازم تادبها

رد ببرود قاتل... أتفق

رن موبايله .. فعذبها حتى اذاب فؤادها

هزيت ايدي .. شكد كرهت هاي الاغنيه كد ما سمعتها هسه اذا دكول شسمج اكولك فعذبها

ضحك كال.. احبها اكيد مو ذوقج انتم المزعطه تحبون هاي الاغاني صديقي باكُ محفظتي وقهرني طلع فلوس مابيها وقهرته

جاوبته بذوبان.. الله شكد جنت اركص عليها واتحمس الها

سحبني من خصري بصوره مباغته صدمني كال برومانسيه.. اركصيلي واخليها نغمه الموبايلي

سحبت نفسي منه واني خجلانه جاوبته.. لا عوف ذيج مال ناس مضروبه بوري احسن تلوگلك كولش هم بيها عذاب وفرات وجلاليق

عض شفته بعدم رضا كال... لااااا عاد كل شي ولا عبد الرحمن احب كل اغانيه ولوحيد الي اسمعه واعيش احساسه

فتحت عيوني بدهشه مصطنعه .. عندك احساس ؟

باوعلي وهو يعض شفته بسخافه ويتقرب مني.. احساس ومشاعر وطاقه وكل شي اذا تحبين جربي

حطيت ايدي على صدره واني ابعد جسمي وراسي عنه .. يمعود دوخر موبايل هاي ثالث مره يرن

رد عليه بحب .. فداج

خليت بسرعه وطلعت واني ارد عليه وهاربه منه... عود شكرا

فتح خط وهو يرد... هلا سالي لا وداعتج جنت احجي ويه شخص مهم عليه مكدرت ارد

اردف بضحكه.. لا يابه شلون انساكم لا والله مشغلني الزواج بس والله ظروف وانقلت لغير مكان من غير ساهر الكلب وسوالفه

كمل بهدوء.. اني هسه طالع اوصل عند ابو ياسر واخابرج هناك يله تمام الله وياج مع السلامه

لبس جاكيته وديطلع همست بصوت مسموع .. ابو النسوان

توقف من لبسه الجاكيته وباوعلي كال.. شگلتي

رديت عليه بهدوء.. كل شي ما كلت مو بس تريد تعارك

جاوبتي بوعيد.. تأدبي

خله وطلع واني اشتغلته رزايل من راح بالقران بس بعد يتجاوز عليه وهيج يلبسني ويخابر جالي مدري سالي امده هنااا اعلكه بهذا التيل والعب لعب انوب ما عاجبه يكول شگلتي گلت ابو النسوان يله شتريد

اووع شلون مجتمع دايخ الرجال يخابر بوحده كدام مرته لازم محد تحجي ومن وحده تخابر گبل حدوا سيوفهم راقبوا نفسكم وحصنوا يالله تحاسبونه اووع

صفنت على نفسي اني دا احجي ويه الحايط قول حتى ثول

اندگ الباب ترددت اروح افتحه بس باوعت من الزرف شفتها وحده حواجبها تاتو يسمونه طياري مدري شيطاني وعيونها مثل عيون العگروگة و وجهها منفوخ وصاحبة حلك كبير كلتله.. انتي منوو تفضلي امي رايده شي

ردت عليه بدلع .. اني شوشو افتحي الباب دنتفاهم جابتلج هديه مو عروس جديده بالمنطقه وهماتين اني مو الوحدي ويايه مياده وازهار

جاوبتها.. عمري ما اكدر افتح الباب زوجي مو هنا واخاف بصراحه هو مهددني كال ذن شوشو ومياده وازهار لا تدخلين ذن الصراصير

هن تخبلن ظل يزاكطن مثل الحصن ويحجن كالن .. هو ما يحجي علينه ماكو غير عايد الكلب هو الي يحجي علينه بس يجي الاشتر لو ما يجي اله نخلي يكتله ويطرده منا بسيطه عايد تروحلنه فدوه ونذر يالمعفن

عفتهن ودخلت جوه ضوجه وين اروح لا من اهلي ولا من اهله ظاله تفتر عليه بس العطفيه والعصابجيه هسه غير كون افهم شسالفه ماكو

حسيت صار صريخ بالمنطقه ودبكه وركضه ركضت لباب دا اشوف منو واشوفه من بعيد من دوون قمييص وكرشه متدلي ولازم سجاجين ثنين والعالم تتراكض زلم ونسوان من كدامه وكلها شردت

فتحت عيوني مرعوبه من منضره والدمع يخووف سمعته وهو يكول.. مرة الاشتر بس مفهمت شي

نهاية البارت ... يتبع

كونوا انتم كونوا بخير .. احبكم 💔

البارحه المشهد من لبسها البالطو تكولون مسلسل تركي لعد شكد طاكم الجفاف سوده عليه 🤣اني من اطلع ويه زوجي وجو بارد البس القمصله مالته والجامعه شفت اكثر من هيج مشهد عيني صرنا اتراك اووي انتم شكد قديمين وين عايشين😆🌚

اتشاقه وياكم احبكم بكد العدس الوزعوا بالحصه ومو تنسن التصويت ❤️