رواية #وكر الأشتر الفصل الرابع والعشرون 24 - بقلم الكاتبه سمو العراق

بارت الثالث والعشرون
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

هل تسمعني يا ﷲ ❤️!
لم تعد لي القدرة على المقاومة

.............................

الله خلق المره ارق من الرجال بالمشاعر واضعف منه بالبنية الجسديه
وخله الها الكيد سلاح تداري بيه رقة مشاعرها وتعوض بيه فارق القوه بينها وبين الرجال

وفعلا اني جنت ضعيفه وهشه بين اديه حتى كيد ما عندي وعرفت عندي سلاح واحد ادافع عن نفسي بيه هو التوسل والدموع بلكي يعتقني وينكسر خاطره عليه

بعد ما هجم عليه بعنف مريع يبس عودي ما عرفت شلون اسيطر على نفسي ولا جنت متوقعه منه هذا الهجوم

صرخت واني احاول ابتعد عنه قيد مقاومتي بغضب وهو يكول .. ثمن ليلتها دافعها من زمان وما قابض حقها

رجفت شفايفي واني دا اريد استوعب الي ديسويه رفست رجليه بصراخ ... وخرررر انت شدتسوي وخررر

كتمت انفاسي بيده وايده الثانيه كشف بيها اجزاء من جسمي صرخت واني اضرب بيه واحاول بكل طاقتي احاول اساعد نفسي واصرخ بصوت مجروح وكله يأس رجليه صارت ترجف من الخوف

حطيت ايدي على وجهه والدموع ماخذه مجارها بعدته عنه وابجي واتوسل بيه جان حقير ما اهتم التوسلاتي ولا اهتم البكائي وايده تعوث فساد على جسمي

فتح ازرار قميصه وهو معمي على عيونه ضربته خمشته باس شفايفي بعمق لزمت اديه بنهيار ودموع .. فدوووه الله يخليك والله بعد ما احجي حتى على سالي ما احجي فدوه والله العفووو ابوس ايدك لا تكسرني ما اريدك ما اريد

استنشق عبير عطري بذوبان وهو برد عليه بصوت ناعس .. فات الاوان بنيتي

ما جان عندي فد شي اكدر اسوي وكل محاولاتي فشلت مجان عندي حل غير اذكر الاسم الي يثير عاطفته وخبله صرخت بيه بغضب .. ووخررر اذا تحب رحيق عوفنييي بداعة رحيييق عوفني

صمت لحظات ورفع راسه مني عقد حواجبه وكانه يفكر بشي او يعيد احداث من الماضي

ما حسيت نفسي الا انركع بالجربايه عدة مرات واهتزت بيه وهو يصرخ بصوت هرج البيت هرج ... جم مره كتلج لاااااا تذكرينها لا تجيبين اسمها على لسانج انتي تردييين اموتتتج تردين اذبحححج

وكف وهو يفلش شكو كدامة واني الرعب دخل برجليه وكفت واني اركض خارج الغرفه واصرخ ركضت وثوبي مشگگ من صدره لازمته بيدي وشعري مهوس وحالتي حاله ركضت اريد اطلع اريد اختفي من حياته

حطيت ايدي على الباب شفته مقفول ضربته باديه والدموع تتطافر من عيوني مثل الشلال ... لاااااا طلعووووني راح يموتني

درت وجهي وسندت ظهري على الباب و وكعت على ركبي ابجي وانحب واني اسمع صوته يغلط ويفشر ويصيح وتحسين وساهر و وجيهه ما وكعوا من لسانه حسيته مثل الاعصار ما يرحم يدمر كل شي كدامة

ما اكدر اظل وياه هذا وحش هذا خبل ما اريده كرهته والله كرهته شلون احمي نفسي منه غامض عني ما اعرف عنه شي

احسه يكسر بالبيت وكل الخطايا وجع  يزيل عنه تذكار الماضي وكل ضربه تزيح عنه وجع الا وجع رحيق ساكن بگلبه

حسيت بهدوء صار والبيت ما اسمع منه بس صوت الماره بالشارع وسوالف النسوان شهكت من بين دموعي وگلبي دا احسه يريد يوكف

شفته طلع من الغرفه وعلامات الندم والغضب واضح على وجهه جانت ايده تنزف دم وهو ما مهتم الجرحة وكف بباب الغرفه ويباوعلي بذبول و روح ذايبه

شهكت من شفته وحصرت روحي على الباب واحتضنت نفسي بخوف صار مصدر رعب وخوف اليه

تقرب خطوات مني واني كل ما يتقرب التصق بالباب اكثر واحمي نفسي بديه منه غمضت عيوني ما اريد اشوفه ولا اريد التقي بيه

حسيت بيه حط ايده على راسي بضياع ورفعها بسرعه رفعت عيوني اله وابجي بانين مفجع

وكفت وركضت  بتعب وصلت لوحده من الغرف المهجوره كعدت بيها بعد ما سديت بابها نمت على ارضيتها الرطبه الباردة ومسحت دمعة متمرده على خدودي

احس جسمي يوجعني احس صدري كله دموع شنو وليش شنو السبب يمكن غلطت يمكن استفزيته بس مو من حقه هيج يتصرف شكد ما جنت اطمئن من اشوفه هسه رجعني لنقطة الصفر

حسيت نفسي كاعده بسجن مظلم ما عندي غير الدموع تشكي حالي معقوله معقوووله علمود سالي الحيوانة حظرته عليه هيج يسوي بيه

اذا هيج كاتل روحه على سالي وما يرضا عليها الزله شكو تزوجني .. الله ينتقم منك الله يحرگ كلبك مثل ما حركت گلبي حسبنا الله ونعم الوكيل عليج يا سالي

اريد احجي اريد اصرخ اريد اتعارك وياه اريد اخذ حقي بس ما اعرف شلون تعبت احس كرامتي انهدرت احس بوجع ساكن بأعماق روحي

تذكرت امي من جنت اضوج والتجئ الها تمسح دمعتي وتطيب خاطري منين اجيبج يمه تحسين بيه تحسين بوجعي دا اموت والله دا اموت عذابي ويه اخواتي اهون من هذا العذاب على الاقل وحده تصبر الثانيه هنا محد يصبرني

شعور صعب ورخص بعيني كل شي ودا احس الدنيا ما تسوه شي من ماتت امي لحد الان

حياتي وياه مثل واحد مبتوره اديه ودخلت بعينه شعرايه كولش صعبه حياتي وياه مثل رصاصه توجع بس ما تموت

تركت جروحي تنزف واحتظنت نفسي مثل جثه هامده

..................

جيهان

ايـــــــــو دخلت الغرفة كريم وما طلعت مالي شغل بيها خطيبته حلاله شدخلني

جنت بصراحه بدون جذب بتناقض مميت صرت عندي ازدواج بالشخصيه شخصيه تذم بايو وشخصيه تحاول تبرر الها وايقنت هذا ضميري الصاحي هو الي يدافع الايو ويبرر الها

حتى مرات اوصل لحد الجزع من نفسي واتعصب على روحي واحجي وياها بغضب وكأنها شخصيه ثانيه.. كافي مالج شغل بيها خطيبها حره بيه هي شتريد تسوي تسوي مدام عاقد عليها لا عيب ولا حرام واذا دخلت الغرفته انتي شكو صابتج غيره الصمي حلكج واسكتي مفهوم

ورجع احاجي نفسي بخيبة امل .. مفهوم جيجي مفهوم كافي تلومين عليه هسه مدكولين شحجينه على ايـــــــــو

جاوبت نفسي .. ميخالف لا تحجين على البنيه مالج شغل بيها

والله العظيم جنت هيج احاسب نفسي وارد على روحي حتى حسيت روحي مريضه نفسيه ولازم اتعالج

كعدت بالصاله على القنفه وكوثر راحت تبدل اجت حنان كعدت يمي كالت بخبث.. شفتيها ايـــــــــو ام عدسات العدسات خاسن بعيونها شوكت تنزعهن ما اعرف جايبه روحها بالمكياج

جاوبتها ببتسامة .. حلوه ما شاء الله عليها الله يسعدها

باوعتلي بقرف ودفعتني و وكفت كالت .. عبالي بيج حظ طلعتي فاهيه وكل خير ما بيج اروح الفافي احسن

سكتت مجاوبتها وهي خلت وراحت شبيها هاي متخبله معقوله متريد كريم يتزوج طمعانه بالورث وتريد اله وحده من گرايبها بعد الله اعلم شمدريني

بس هو هذا اختياره بعد اختار ايـــــــــو احنه شدخلنه دام مقتنع بيها الله يسعده

دخل جاستن جاي من الشغل كعد على القنفه كال .. منو عدنا

عدلت كعدتي وجاوبته بإحراج..خطيبة عمو كريم

ضحك كال.. اي اهلا وسهلا اخابر حارث يجيب رناوي مشتاقلها الكلبه دام كلها موجوده

ابتسمت عليه خطيه يحبها بس هي ما تحبه شلون حاله والله العظيم هاي قاعده ثابته الشخص الي نحبه ما يحبنه والي ما نحبه يحبنه ليش هيج ما اعرف

عافني وراح انتظرت شويه واجت رنا دخلت وهي تسلم كالت .. جابني اخوي من فديته كون برابيج محد تذكرني لو ما جويسم خوش ولد خابرني وكال تعالي تغدي يمنه

ضحكت عليها وبستها ظليت كاعده بمكاني وهي دخلت للمطبخ واسمع هرجته وهوستها ابتسمت عليها شكد عندها طاقه ايجابيه وحلوه

شفتها طلعت من الغرفه وهي تضحك بس هو ما طلع قابلتها كوثر بعد ما بدلت ولبست تراك حصر بارز ملامح جسمها  كلتلها.. هااا حبي وينه كريم

ابتسمت الها وهي تباوعلي وتتنهد بضحكة مستفزه .. كال هسه اسبح واجي

ضحكت كوثر وكعدت هي وايو صارن مقابيلي  يباوعلي ويتشاورن ويضحكن اجيت اروح بس كلت اخاف يكولن انهزمت منه

اجت افيان كعدت بصفي كالت .. شبيهن دريه ونفيسه يتبسبسن

جاوبتها .. اش اسكتي

شو هاي حطت شفايفها يمي وهي تهمس كلام ممفهوم وتباوعلهن وتتمضحك فشلت من يمي باوعتلي بلوم .. افيان شبيج

ردت عليه.. مالج شغل خلينا نتبسبس عليهن حتى ينهزمن مثل ما يسون نسوي ههه

حطيت ايدي على رجلي بعدم رضا.. احنه مو مثلهن كافي عيب

رجعت تعيد نفس الحركة وهن تخبلن من حركاتها وضحكها عليهن صاحت عليها بيبي ام حسن ... افونه بيبي تعالي اخذي العصير

طفرت من مكانها بحماس وركضت جابت العصير واجت قدمتلي وهي تكول .. اخذي جيجي اخيتي من اروح فدوه لهلحلك الاوربي ههه

اخذت الكلاص واني ابتسم على كلامها ردت عليه.. جوجو اخذي بعد كلاص الي خلي يمج

اخذت كلاص خليته على الطاوله المقابيلي وهي راحت خلت الصينيه بيها عصير على الطبله ورجعت كعدت يمي

هن تخبلن فتحن عيونهن مصدومات و وحده تباوع للثانيه كالت كوثر وهي ترفع حاجب بعدم رضا... مو جان لازم تضيفينه بالاول

جاوبتها فافي بانزعاج .. اوووي الي خلك هذا هو على الطبله واخذن صدك جذب لا تصيرن عجوزيات ومليقات خو ما اشتغل هنا كل من يخدم نفسه بنفسه

وكفت كوثر وهي تخزر بيها واخذت ثنين عصير قدمت واحد الايو و واحد الها وهي دكول .. اخذي حبيبتي الضاهر الناس صارت بدون ذوق

ضحكت ايـــــــــو... هههههه واضح حتى ذوق بالبس ماكو ولا حتى بالاسلوب

افيان ردت عليهن ... اي والعباس الناس صارت بدون ذوق بحيث الناس تروح للدراسه بعدسات ههههه

وكفت ايـــــــــو مصدومة من كلام فافي كلتلها وهي تاشر على نفسها ... تقصديني ولج

وكفت افيان ببراءه ... لا دا اقصد على الحاطات طن مكياج ولابسات عدسات ليش هن ذن مو عيونج

ردت على افيان بغضب كالت... انتي حيل مستفزه انتي هنا خطار احترمي نفسج وانلصمي لا اكول لكريم عليج يتصرف غير تصرف

افيان بخوف مصطنع ... يمه خفت صرت ارجف الحكولي انجلطت من الخوف خاااااب طيري والله شايفه روحج

لزمتها واني اكرص بيها اريدها تسكت

ايـــــــــو بغضب ... بسيطه يا مستهتره ما عندج اخلاق وكولج خلگ حشره اعرف شلون اربيج

اجت رنا وبيبي ام حسن وحنان كالن ... شكووو شكو شصاير

ردت افيان بحزن مصطنع ... جنتكم شاده وياي دكول انتي خطار احترمي نفسج واكعدي تقبلين بيبي هاي تاليها ترا احنه منريد نجيكم هو عمو كريم لزك بينه

صاحت ايـــــــــو بصوت عالي.. جذابه حقيره هاي حيه وحيوانه اني اذا هاي تدخل للبيت خلي كريم يطلعني ببيت لو اني لو هي بالبيت غيوره حاسوده مبينه كاتلتها الغيره

حنان جاوبتها .. على كيفج عيني ايـــــــــو على شنو تغار منج صدك جذب وبعدين افيان طفله لا تاخذين عليها ما تقصد

ايو بصوت عالي... هاي طفله هاي هاي انتقام

طلع كريم وهو مخلي الخاولي على جتافه ولابس بس الفانيله الداخليه البيضه وبنطرون اسود كال بغضب .. شكو شبيجن شنو هذا الصوت حتى ما لحكت اسبح

افيان استلمته بعياره وهي تبجي بجذب .. عمو والله ما مسويتلها شي كاعده تتشاور وتضحك علينه انوب دكول اذا انتن بالبيت اني ما اكعد وخلي كريم يطلعني واخلي كريم يطيح حظجن عمو شنو ذنبنه انت خليتنه بهذا الموقف احنه ما ردنه نجي بس انت جبتنه رجعنه لبيتنا فدوه

ظليت محتاره وفشلانه من كلامها واكرص بيها بخلسه وهي مستمره بعيارتها

ايـــــــــو باوعتله وهي دكوله .. صدكتها

هو رد عليها بجمود .. باعي ايات هذا كلامج مال ما يظلن بالبيت ياريت لو تشيلي من قاموسج البنات عرضنا والهن صدر البيت والعتبه النه واي كلام مرفوض

بلعت ريكها وهي ترد عليه بحده ... هاي وحده جذابه ومنافقه خلقت مشكلة وصار الها ساعه مكابلتني وتتمضحك شككتني بنفسي

تخصرت افيان وهي ترد عليها .. لا والله اني الجذابه والمنافقه اصلا هن مكابلات اختي جيجي ويضحكن عليها واني انقهرت على اختي وقلدتهن

هو باوعلي وركز بنظراته عليه واني نزلت عيوني فشلاااااانه

هو عاط بيهن بغضب عارم... وانتن شنو احسن من جيهان وتضحكن عليهاااااا ؟ انتن هاي سوالفجن النسوان شوكت تبطلنها

ردت افيان تأييدًا لكلامة ... اي والله بشنو احسن منها على الاقل اختي تجنن وعيونها مو عدسات يخبلن

ردت ايـــــــــو بصدمة .. ونبي كذااابه هاي اكبر حيه وكذابه ماكو هيج شي ابد هذا مو طبعي ولا استايلي

ام حسن لزمته وتحاجي بتوسل.. على كيفك يمه كريم هس افيان لسان صدك ايـــــــــو مو هذا اسلوبها

افيان باستنكار ... هاااا ام حسن هاااا على كيفج هاي واني من دمج ولحمج طلعتي تطربين على الغريب

سحبت افيان وهي بعدها تلعلعل والرزايل اشتغلت من كريم على كوثر لان هي ساس البله وخطيبته زعلت وتريد تروح

لزمتها دخلتها بالغرفه واني الطم على خدودي .. ولج شلون بيج شلون بيج بس فهميني انتي شنو من مله لسانج شلون بيه يضحكن عليه طبني مرض خليهن يضحكن عليه انتي لا تتدخلين وتسوين مشاكل

استفزتني اكثر وهي تغيير الموضوع وعبالك مصاير شي .. اكلج جيجي العصر اروح للسوك اتسوك خلطات اخلطها وابيع للنسوان شرايج

سحبتها بغضب .. بس اريد اعرف انتي شنو من مله كاتلتي العالم انوب محتاره تردين تجيبين خلطات تبيعين للعالم

جاوبت بملل وعدم اهتمام ... اييع شسويلهن هن وكحات خليهن يتأدبا هسه عوفينه من هالموضوع اروح اني العصر للسوك تمشين وياي اخذ حنينه العكربه اقشمرها بلكي

تافئفت وهزيت راسي بعدم قبول من كلامها وعفتها صاحت علينه حنان كالت .. خلص الغدا تعالن تغدن

افيان راحت تتغده عبالك ممسويه شي واني ما رحت استحيت حيل وما الي وجهه بعد ما صارت العركة

طلعت بالاستقبال سمعت جاستن مشغل اغنيه لاحمد السلطان كلماتها حلوه دكول.. صدك يَعْنِي تُحِبّ غَيْرِي حِبِّي تَغَيَّرَت عَنْه
صدك أَتْعَب عَلَيْك إنِّي وَغَيْرِي بيك يتهنه
بلكي اللَّه وَحَلَم يَطَّلِع أَفَز مِنْه وَالِي تَرْجِع
صدك نَهْر الشفايف ذَاك جَنَت عَطْشَان اضووكنه
وَيَلِي يابه أُجَّةٌ غَيْرِي وَشَرِبَ مِنْهُ

صفنت بكلمات الاغنيه وروحي تعتصر رددت المقطع .. بلكي الله وحلم يطلع افز منه والي ترجع

ياريت ما جان خاطب ولا وحده بذمته حتى استحي افكر بيه احس نفسي منحطه وقليلة اصل ادعيله بظهر الغيب ربي يوفقه وياها جنت ناسيته بس من بعد ما انسجن ابويه واجينه يمهم صار قريب مني وانعادت عليه الذكريات

كتمت عبرتي وطلعت برا للحديقه واني اتنفس هوا عذب جان فضحت نفسي والله مو بيدي ياريت لو بيدي ياريت لو اكدر كل الي اكدر اسويه ان اني مبينه ممهتمه بس داخلي جرح وجرح عميق وينزف والله احبه مو بيدي جنت شايفته سند اني حبيت سلبياته قبل ايجابياته لحد يلومني والله احبه

ظليت اتمشى بالحديقه وافكر يعني لو امي موجوده احنه ما جان هسه كاعدين ببيتنا ومحترمين نفسنا شكول عليك يابه ولا حتى ما الي عين اباوع للعالم

حسيت اكو حركة جايه من جوه وكفت وره الشجره واني اباوع شفته طلع هو وياها جانت لازمة ايده وكتبها بيدها وتسولف وياه وتضحك وهو يبادلها بهدوء

حسيت بانفجار صدر بداخل گلبي درت وجهي واني اداري دموعي ليش ليش يا گلبي حبيته والله ما يستاهلك انساه انساه لا تصير ضدي فدوه والله بعد ما اتحمل ما اكدر اتحمل كل هالوجع وياريت لو اكدر اتقبل غيره

.................

صفاء

خابرت الاشتر جاوبني بس جان مزعوج كال بسرعه ارجع للبيت وظل هناك لان ما الي خلك عرفته معارك ويه سولين

فخليت ورجعت بسرعه للبيت دخلت شفتها هدوء ماكو شي تفاجئت لعد شبيه الاشتر خبص الامة خليت وكعدت شويه على القنفه شفت باب غرفتها مفتوح وهي بالعاده تقفله شعجب اليوم مفتوح

اثارني الفضول وساقني رجليه الغرفته طليت من الباب تفاجئت من كمية الفوضى والانهيار الي صاير بالغرفه شنو هاي بيبان الكنتور واكعات مكسرات بس باب واحد صاحي

والجربايه مكسوره من جهه وحده ما ظال شي صاحي بالغرفه ودبة المي ارو متبديه و واكع نصها استغربت شنو هذا الاعصار الي صاير بالغرفه

عفتها وطلعت الظاهر اخويه متعارك ويه مرته ومكسر الغرفه كعدت على القنفه بصف التيل واني افكر شكو شصاير فضولي زاد عند حده

شفتها طلعت من الغرفه ودخلت للحمام سبحت وطلعت تحت انظاري وتنزل شالها كالعاده  جانت تمشي بروح ذايبه وفاقده للامل

وكفت واني احجي وياها بهدوء ...سوليين شبيج خويه

دارت وجهها عليه وهي تبجي بصوت مسموع كالت ... تعبانه  خويه تعبانه مليت تعبت

تقربت منها واني احجي وياها بحذر .. تعالي اكعدي خويه فضفضي احجي لا تخافين

كعدت واحتضنت اديها وتفرك بيهن والدموع شلال من نار كالت بشهكة .. خلي يطلگني حياتي وياه عدم ما احبه

جريت نفس وحاجيتها بسياسه .. على شنو تعاركتوا شنو المشكلة

جاوبتني بحسره ... شلون جاوبت سالي الادبسز هو تخبل شلون غلطت عليها سالي حرضته عليه وهو اجه منتقم مني اذا هو هيج يحب سالي ما تزوجها شكو تزوجني ودفني هنا

ضحكت على كلامها ... ههه لا شبيج والله الاشتر يحبج اكثر من سالي

عقدت حواجبها بافتراس ... خلي يروح لا اريده ولا اريد حبه جذاب ومنافق تخبل على جالي شلون حاجيتها

انتيهت عليها اثر شخط بخدها والدم يابس عليه اصلا وجهها متغيير وذبلان والهالات السوده مكتسحه عيونها ذبول طاغي على ملامحها وجهه ما يبشر بخير ومبينه باجيه هواي

تنهدت بحيره .. ضربج علمود سالي ؟

هزت رأسي بإي ومسحت دموعها وكملت كلامها .. تدري شنو الحارك دمي الحرك دمي من عيوني باهلي كدامك هذا الشي جرحني اصعب شي على الوحده من زوجها يعرف بماضي اهلها ويكعد يعيرها بيهم

شوف اني لا دزيت عليه ولا قبلت بيه ولا حتى رضيت بظيم ابويه و وضعه عامر هو الي وصلنه لهاي الدرجة يعني عامر لا احنه ربيناه ولا احنه وصلناه لهاي المرحلة هو هيج هو هيج اسلوبه احنه شنو الي بدينا نسوي اخوك جرحني والله وجرحه ما ينلم

جاوبتها محتار .. والله ما اعرف شكلج يا خويه انتي حاولي تكسبي وتتقربين منه والله اخويه طيب واكيد ما يظلمج

وكفت متعصبه.. خلي يولي لا اريده ولا اريد طيبته اي مبين طيب كلش هو دافني ومخلصها فراره ودكول طيب لا تصير مثله هاي واني جاي اشكيلك همي

ضحكت .. عمي على كيفج سكتت سكتت لا تتعصبين هذا هو هو اخويه غلطان وان شاء الله يجي يعتذر منج ويبوس راسج

ردت بعنف ... لا اريده ولا اريد بوسته بس خلي يكفني شره ويبتعد عني ما اريده اكرههه طالبني بطلابه

جاوبتها واني اهدي من روعها ... يس والله هو دائما يمدح بيج ويمدح باخلاقج حتى كدام سالي وبعدين انتي شكو تغارين من سالي ترا الي بينهم مجرد مصلحه وشغل والطرفين يعرف بهذا الشي

وكفت وهي متعصبه ... انييي اغار عليه والله لا اغار ولا شي بس هي هاي مستفزه وشايفه روحها اكرهها ما احبها تخبل شلون كلتلها ام الزلم

ضحكت وهزيت راسي .. ههههه وانتي شلون هيج تغلطين حرام عليج هاي تهمه وطعن بالعرض

كتفت اديها متعصبه .. لا والله لا تهمه باطله ولا حرام اني ممجذبه هي نهار كله تفتر ويه الزلم قابل مجذبه مو نهار كله وليل كله دايحة وياه

رديت عليها.. هذا شغل

دخل هو شافته عبالك تكهربت بسرعه مشت مبتعده عنه وراحت دخلت للغرفه الثانيه

باوعلها وهو يتبعها بنظراته تنهد وكعد يمي كلي .. شلونها

رديت عليه بتنهيده .. منهاره خطيه انت شسويت الها معقوله بس ضاربها اشو تحجي وترجف

بلل شفايفه وتنهد كال .. اي

اتصل موبايله رفعه جانت سالي قفله بسرعه كتله .. جاوبها ؟

رد عليه .. يمعود من الصبح لهسه تتصل ما الي خلك افتح عليها خط لعبانه نفسي

جاوبته ... سولين مقهوره حييل روح راضيها

جاوبني .. عوفها هسه مالي خلكها هي الثانيه

ظلينه تقريبا ربع ساعه كاعدين نسولف وما نسمع بس صوت صريخها ركض الاشتر بسرعه عليها وهو يسوي الدرب خطوتين

دخل عليها شفناها واكعه على جنبها وهي تصرخ ولازمة راسها ... راسي رااااااسي راح اموت

لزمها ورفعها لصدره وهي تتبرغث على الارض مثل طير مكسور جناحه مسح وجهه من الدموع وهو يحجي وياها .. سولينا سولي شبيج شبي راسج

ردت وهي تبجي وتصرخ .. ما ادري ما ادري راح اموووت وجع قووي راسي حينفجر عقلييي عقلي يوجعني عيوني توجعني

شالها وهي تصرخ .. عقلي راسي ما نعرف شبيها فجاة اول ما شافت نور الشمس ضمت وجهها بصدر الاشتر لان عيونها وجعنها رغم قبل شويه مجان بيها شي ما اعرف شبيها يمكن من كثر ما بحت وانهارت هيج صار بيها

ركضنه بيها للمستشفى بسرعه اخذوها منه بالطوارئ وحولوها كبل مفراش واشعه اني خفت كتله .. اشتر اخاف هاي تعصبت وضربت راسها بالحايط لان ممعقوله هيج بسرعه تتغير حالتها

رد عليه وهو يبلع ريكه .. لا ما اعتقد سولين ما تأذي نفسها

جاوبته بحسره .. بعد لا تاذيها فدوه

تنهد ونفخ بضجر كال .. صفاء تعباااااان تعبان الماضي مجاي يطلع من راسي دخت شلون تخلص ما اعرف اركض وره هم منو مصطفى لو رحيق لو سولين لو منو دخت ومجاي اكدر اسيطر عليهم كلهم تمردوا

حجيت بهدوء.. سوليين بنيه ضعيفه رغم طول لسانها بس تظل هشه دير بالك عليها وهي اصلا مقهوره منك حيل راجع نفسك وشوف بشنو اذيتها

باوعلي بجمود وخله وراح يمها جان يحجي وياها وهي دايره وجهها منه جانت ما تحجي وياه رغم جان يحاجيها ويحاول يلاطفها بس هي جانت جامده  هاي بعد ما هدئت من الوجع وضربوها ابر مهدئة

بعد ساعه طلع المفراس مالتها والدكتور شخص حالتها مبدئيا كال .. عندها شقيقه حاولي تكونون هادئين وياها وتنام من وكت وتلزم بعلاجها وتبتعد عن الاكلات الحلوه لان تهيج عندها الآلم

خليناها شويه وبعدها رجعناها للبيت شفت الخوف واضح على اخويه مجان يعرف شلون يطيب خاطرها صار بالنسبه الها معروف بس بكسر الخواطر

.............

جيهان

بعد ما صارت العركة اقريبا بثمانيه باليل شفت عمو مريم كاعد بالحديقه وهو لازم موبايله ويدخن اركيله اترددت اروح عنده واحجي وياه

وبعدها شجعت نفسي ورحت وكفت يمه هو بسرعه باوعلي و وخر قمجي الاركيله من شفايفي كال .. هااا بويه جيجي شعجب جايتني

فركت اديه بتوتر وقلق .. ممكن احجي وياك عمو

ابتسم ورد عليه واشرلي .. اكعدي يابه واحجي ليش واكفه

كعدت والارتباك واضح عليه تحمحمت ورفعت راسي حجيت واني اطك ببلعومي .. عمو كولش اعتذر عن الي صار اليوم ويه خطيبتك والله مقبلت اني على افيان بس هي افيان عصبيه هيج طبعها

ضحك كال .. عادي عمو كلتلها اني افيان طفله مو مال تاخذين عليها وهي ايات هم غلطت واني اصلا الي اعتذر منج اخاف ايات ضوجتج بكلمة واكيد ما اقبل عليها

هزيت راسي بنفي .. لا عمو ما ضوجتني ولا سوت شي واني كلت اخاف ظل ببالك فحبيت اعتذر منك

ابتسم وهو يتنهد كال .. حبيبتي جيهان لا تعتذرين ولا شي وكتلج اني اعتذر منج وابوس راسج هم اني عمج والتحتاجي اني كدامج

جاوبته .. شكرا عمو متقصر بس حابه اطلب منك طلب اذا ماثير زحمة

رد عليه وهو يعقد حواجبه .. انتي ليش هيج مودبه ولطيفه انتي ما اعرف شلون اوصفج يعني معقوله انتي اخت افيان

ضحكت .. اي والله اختها هي فافي والله كلبها طيب بس شتسوي عصبيه مو بيدها

جاوبني بتنهيده ... اي خليها احسن وانتي هم قوي نفسج اي وكولي بشنو حابه اخدمج

جاوبته وافرك باديه .. اريد نروح لبيتنا فدوه عمو لا ترفض والله احس هنا كاعدين على نار

رد بعصبيه ... لا مترحن هنا تكعدن منا لما يطلع عامر من السجن مفهوم

رديت عليه .. عمو بس الصبح نروح ونجي باليل والله هيج احسن هماتين عدنا شغلات نسويها بالبيت فدوه لا ترفض لازم نرجع

كال بتنهيده ... اخاف عليجن اخاف واحد يستغلجن

هزيت راسي بنفي .. لا لا محد يكدر فافي تعادل عشر نسوان والصبح ماكو شي نجي وره المغرب هنا عمو لا ترفض حباب

جر نفس ورد عليه .. براحتج اذا هيج حابه ماكو اشكال بس تنامن هنا مو بيتكم تمام

هديت راسي بقبول وكفت وحجيت بهدوء .. تصبح على خير

رد عليه ونظراته غريبه تخترقني كال .. وانتي الخير كله يابه

عفته واني اتعثر بخطواتي واحسه يباوعلي ويتبع مشيتي درت وجهي عليه شفته فعلا يباوعلي ونظرة حسره وندم بعيونه

درت وجهي بسرعه ودخلت جوه واحس كلبي يريد يطلع من ضلوعي
..................

رنا ...

دام البنات هنا اني يوميه عند بيت كهلان حتى جاستن يكولي من مموجودات بنات عامر انتي ما نشوف طولج اشو هن اجن وانتي ترحين وتجين عليه

اجيت لكيتهن مموجودات وخابت آمالي ظليت كاعده محد موجود حتى كريم مو هنا بشغله

اجت ايو هي وامها يردن يشترن غرفه على ذوقهن فكالت بيبي ام حسن تروح وياهن انتظرن بيبي ام حسن تسبح وتحظر نفسها وايو وكوثر طلعن برا

أخذت گلاص مي من المطبخ ومشيت واني اشرب بي فتت من يم شباك يطل على الحديقة واسمع صوت ضحكة
رنانة جايه من الحديقة

الشباك مفتوحة الجهتين مالته وكفت يمه اطل واشوف ايات وكوثر كاعدات على الصبة الي تحوط الحديقة

ميلت نفسها كوثر على ايات وطختها وتكوللها والله شبيج ماتصدگين ؟؟

رجعت ايات ضحكت ولج هذا كل البلا يطلع منج ؟

ردت كوثر بثقة لعد شعبالج يعني هن بنات عامر  صح فقيرات بس ما عندهن شي يجذب وخاصة ً جيهان محتركة ومدارسه وحتى ذوق ماعدها بس عندهن حظ  بحيث واحد مثل كريم شنو يفكر بوحده مشوهه مثل جيهان

مو معقوله اخلي اخويه يتزوج وحده مثلها ماتناسبة ابد اصلا اني سويت فضل وسويت عين العقل والمصلحته هذا الشي

هزت راسها ايات وكالت بدلع مصطنع اوووي مدااتخيل هايه جيهان وكريم لا لالاااا مستحيل فعلا عندها حظ او يمكن تكون منحطه وسوتله واهس بيها او بحركاتها او يمكن امها سحاره الله اعلم

ردت عليها كوثر اي لج هو كريم قبل ميخطبج طلب مني اروح اجس نبضها

ايات بترقب جاوبتها اي شنو ؟

اي يعني راد يخطب وهيج فكال اخطب جيهان ليش اروح بعيد وصاني اروح المح الها اشوفها اذا هي تقبل تتزوجة او لا وجان منتظر على نار

اني رحت مو مرحت بس ولا جبت طاري للموضوع الهن رحت واجيت من دون ما انطق حرف ولا افتح حلكي بكلمة

رجعت ضحكت ايات وعبالك من فرحتها رادت تتقيء وتسوي حركات مدري شلونها تتمايل وتنزل راسها للكاع وتضحك

وكالت اوي فدوة كوكو همزين وصار كريم من نصيبي بس اني استاهله لج والله اذا مخليت حارث يبوس نعالج فلا اطلع ايو

جاوبت كوثر أي ابوها ساقط وامها مقتوله غسل عار اووي ماانتشررف بيهم احنه وين وهم وين شبيج انوب يجيبون النه سمعة مو زينة والله الي بس يعلم هن شيطلع منهن اذا امهن وابوهن هيجي وبعدين الساس نداس ولعرق دساس

ايات بفضول بعد ما كملت ضحك وشنو كلتي لكريم وهو شنو كال

ردت كوثر اي هو جان ينتظر رد مني من اجيت حاجيته على صفحة كتله جست نبضها ومتحبك معتبرتك عمها وتكول نفسي ما تتقبله طول عمري اعتبره عمي
وحتى سولين كالت هو بمثابة عمنه منفكر بيه ابد وحتى ظلن يضحكن كالن لا ممعقوله وحده منه تتزوج عمو كريم واحنه طول عمرنا نصيحله عمو وهي بالذات جيهان هيج كالت

هو انصدم وضاج بنفس الوقت كال خما كتيلها اني دازج ؟

رديت عليه لا اطمأن اني بس لمحت الهن  يعني كلتلهن اذا نخطب وحده منجن لكريم تقبلن وهن ماتن ضحك واستهزئن بالموضوع

لج شوفي ايو يعني هذن شكد عدهن حظ يعني توقعي عائلة منحطة وجايه من نص الطهارة وحظهن كاعد كعدة بس الله يعلم بيها

يعني تخيلي هي هاي جيهان نفسية ومشوهة ومحروگة واخويه قابل بيها لو ذيج سولين العرمة الي متنجرع لسانها لسان دلالة وحارث ميت عليها ولا يشوف غيرها

جاوبتها ايات لج اي اي دااشووف مبختات هذن بس انت ولا يهمج اني عندي طرق تعجب وتخلي حارث يتزوجج

صفنت عليهن هاي شنووو شكد مضغوطات من بنات خالي !! على شنوو خطية حاسداتهن وهنا حال الظيم حالهن عود صدك يحجن ذن لو يشاقن والله غريبات عجيبات

شون تكدر كوثر تكون مؤذية الهالدرجة وتتسبب بأذيتهن وهن ممسويات شي الها هاي كوثر دواها بس افيان

مشيت عفتهن انقرفت من حجيهن مو طبعي اتصنط بس انجبرت لأن بي اذية للبنات هسه اني شسوي ياربي !! والله كسر الخواطر حرام !

وهي كسرت بخاطر حارث وسولين وجيهان وحتى اخوها ما سلم منها هاي شون الله راح يجازيها على كل هذا الي سوته ؟!

شون تخلي راسها على مخدتها وتنام مرتاحة هاي وهي مجذبة ومأذية بشر ! لا وتحجي بعمايلها وتفتخر بنفسها خدعت اخوها وهو محملها أمانة!

اذا الله يحاسب حتىٰ على النوايا شلون هاي راح ترجع عليها افعالها ؟

.................

سولين

مر يومين واني احس وجع براسي مو طبيعي من اشرب العلاج تتحسن حالتي ومن اتركة يرجع عليه الوجع جنت ضايجة حييل ولا اريد اشرب علاج ولا شي خليني اموت بس الوجع لا يطاق يخليني انجبر اشربه

جنت نايمة بالغرفه الثانيه ذيج الغرفه تركتها بعد ما كسر كنتورها وبعد ما حاول يغتصبني بيها وشهدت على حرب عارمة بيني وبينه تركتها ولا ادخللها بعد

شلون جان مثل الوحش شلون حاول يكسرني شكد توسلت بيه جان فاقد حتى اباوع على رگبتي بالمرايه مشوهه ومعضوضه عبالك جلب العضاض

جنت نايمة على البساط وعلبة الحبوب بيدي شفته دخل باوعت الرجليه غمضت عيوني ما اريده ما اريد اشوفه ولا احس بانفاسه و وجوده ويايه بالغرفه حسيت بيه لزم ايدي واخذ العلبه منها وغطاني بالبطانيه

فزيت بسرعه وكعدت واني ابتعد عنه رفع ايده ديسحبني عطت بصوت عالي.. لااا لا وخر لا تلزمني

حط ايده كدام وجهي وهو يحاول يهديني ... كافي لا تخافين ما اسويلج شي هدي نفسج مو زين على راسج

جاوبته بغضب .. اي اني عصبيع وراسي يوجعني عووفني ذيج الغزفه فلشتها على راسي هاي ما بيها شي بس لا تريد تفلش الطايوگ على راسي

بلل شفايفه بحيره ورد عليه .. سولين خلينا نحجي

حطيت اصبعي كدام وجهه بتهديد... اشششش ما نحجي ولا كلمة مستحيل احجي وياك مستحيل ومثل ما دخلنه بالمعروف نطلع بالمعروف

جاوبني بجمود ... دخلنا بالمعروف ونطلع بالمعروف ههه لا بابا فاهمه غلط وبعدين كافي تتدلعين قابل شسويت الج كافي عادي مصاريين البطن تتعارك قابل اول زوجين يتعاركون لو انتي دراميه زيادة عن اللزوم

جاوبته بقهر .. تمام اني دراميه وحيوانه وحيه وحقيره بعد شتريد بس عوفني وخليني بضيمي

سحبني الصدره وهو يضحك .. سوليين لا تصيرين نفسيه كافي اعذريني عني والله اسف واعتذر وشتردين حاظر ابوسج للصبح واعتذر هم اسف

دفعته بحده .. لا اريد تبوس ولا تعتذر بس وخر مني وكفيني شرك وشرك عشگاتك وخلصني

احتضن وجهي وهو يحجي بحب .. سولين انتي شتحجين يا عشيكات ولج وحق الله لا سالي ولا الف من سالي يطولنج انتي وين وهن وين

جاوبته بحقد .. اي اصبغ بيه وجذب عليه وبعدين اني نفسيتي تعبانه يعني انت مصر تتعب نفسيتي هيج تكرهني بحيث لان من اشوفك انهار وتصعد الكابه عندي مكابلني وكاعد يوميه نهار كله ما لافي اليوم كاعد وساكت يمي

سحبني من ايدي وهو يحجي بذوبان .. احبج غيير

ضحكت باستهزاء .. لازم اصدك مووو

رد عليه .. مجبوره تصدكين

سكتت مجاوبته كال .. نطلع نتمشى اني وياج الجو حلو

جاوبته بزعل ونفي قاطع ... لاااا

تنهد .. زين ليش ما تاكلين العلاج قوي ومعدتج ما تتحمل

درت وجهي ورديت عليه.. شبعانه ما اريد عوفني

كعد يمي وهو يكول .. اني من شوكت اعوفج وانتي بهاي الحاله ما اكدر اعوفج وانتي زعلانه

جاوبته بحقد... على الرعب الرعبتنياه والسويته بيه ما اسامحك ولا ارضا والله خليتني اركض بالبيت مثل الهبله

رد عليه.. حقج والله

باوعتله بروح ذايبه وسألته.. ابوي ليش قتل امي ؟

عقد حواجبه وصفن ثواني بوجهي بعدها كال .. اخذج لبيت كهلان تظلين كم يوم عندهم اخواتج هناك

عقدت حواجبي ... ليش اخواتي هناك

كال بهدوء.. ابوج بالسجن وهن ظلن هناك

حسيت اكو شي انكسر بداخلي واكو فرحة تغلغلت بداخلي بلكي اخواتي يكدرن يخلصن من شره وبطشه وفرحت لان هو قبل بيده ياخذني البيت كهلان واخيرا راح اشوف اخواتي راح اشوف رنا راح اشوف كوثر شكد مشتاقه لجمعتنه من قبل شكد افرح بيهم يالله شلون مشتاقه الكوثر وكعداتها صديقتي الصدوقه

ابتسمت ولمعت عيوني بفرحه ... يعني صدك راح تاخذني لبيت جدو كهلان

ابتسم وهو يرد عليه.. وظلي كم يوم واجي اني اخذج بس كون ترضين وتقتنعين وتنسين الي صار قبل كم يوم

رفعت اصبعي بتهديد ... لا ما انسى

سحب اصبعي وباسه كال بحب .. لا تنسين ولا اني اكدر انسى ( غمزلي )

وكفت واني احظر نفسي ... يله خلينه نروح لبيت جدو والله مشتاقتلهم

وكف وهو يعدل قميصه كال .. حظري نفسج واني منتظرج برا

هو طلع واني حظرت نفسي بسرعه ولبست يا الله شلون متغيره هسه شكول لبيت جدو كتلني لو حاول يغتصبني لو سألوا ليش متغيره

طلعت و وكفت مقابيله كتله ... كملت

تقرب مني وهو يعدل بحجابي كال ...مريتي حلوه حتى لو كل ملامح التعب عليها

نزلت عيوني من كلامه ورحت وياه لزم ايدي وصعدنه بالسياره مشت بينه واني احس كاعده على نار شوكت اوصل لبيت جدو كهلان شكد ضامة بگلبي اريد اسولف الكوثر احجيلها عن كل شي

وصلنه البيتهم نزلت وهو لزم ايدي كال .. يومين وارجعلج ومن ارجع لا تتعبيني وتلزكين هنا تعرفيني مخبل حتى بيت جدج اشيله من الكاع

ابتسمت على كلامة وجاوبته .. الله كريم هسه يجوز تسوي حادث منا ليومين تفائل بالخير

ضحك وعض شفته كال .. لو مو بالشارع جان بستج وادبت هالشفايف الما بيهن كلمة حلوه

رفعت حاجب بعدم قبول ونزلت دخلت للحديقه واشوفهن كاعدات هي وبنيه ما عرفتها بس روحي فرفحت على كوثر متغيره وصايره تجنن صحت بصوت عالي ... كوثرررر اني سولييين اجيت

وكفت مصدومة وما بدرت منها اي ردة فعل حضنتها واني ابوس بيها وهي ترد ببرود وكفت من حماسي وسالتها .. كوثر اني سوليين ما مشتاقتلي ؟

نهاية البارت .. يتبع

كونوا انتم كونوا بخير .. احبكم 💔

لا تنسوا التصويت والمشاركة بكم نكتمل احبتي الغوالي 😍