رواية #وكر الأشتر الفصل الثالث والعشرون 23 - بقلم الكاتبه سمو العراق

بارت الثاني والعشرون
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔

- إنّ الصلاة على النبي نعيمٌ."

اللهم صل على محمد وال محمد

..............................

صفاء

خابرني الاشتر كال تعالي بالمطعم ال ... موجود اني وسالي خليت ورحت

جنت اتمشه قريب من المطعم واني افكر ليش الاشتر اتخذ سالي وسيله اله هي واختها واعتمد عليها معقوله بسبب كيد النساء

ضحكت وخليت اديه بجيوب القمصله احميهن من البرد ورجعت افكر ليش يعني معقوله الزلم ما عندهم كيد اريد اناقش اشتر بهذا الموضوع

وصلت عند المطعم جان مطعم فاخر يضم ارقى العوائل واكثرها بذخ ودلال باوعت شفته كاعد يم نافورة المي الموجوده بالمطعم وهو يدخن اركيله شكله يختلف كل الاختلاف يعني من يكون بالبيت او بفد مكان

جانت سالي كاعده مقابيله كالعاده تشع بأنوثتها وجمالها لابسه قمصله بيجيه وبنطرون اسود وبدي اسود دائما تكرر هاي الألوان  ودائما تلبس لفاف يغطي عنقها وفاتحة شعرها وتشرب عصير

واختها كاعده بصفها تشرب ارگيله انصدمت هاي شنو وين كاعدين بس بعدها انتبهت اكثر الموجودات يدخنن اركيله يعني معقوله احنه بالعراق ومعقوله هاي عوائل محترمه يمكن عادي بس اني بطبعي ما احب المره الي تدخن

سلمت وكعدت بصف الاشتر سالي جانت قريبه منه حيل وجانت مندمجة وتسولف وتضحك كالت  بغموض .. والردته صار والمسعد عفن بالسجن بس الضحكني الفريق الركن هوايه مجذب هههههه

ضحك الاشتر وهو ينفخ الدخان ... اي هم هاي سوالفهم لا تخافين هسه يترقه بجال الحمير

ضحكت وهي تگلب بعيونها ... أعلنت مديرية نجدة بغداد القبض على متحرش مسن ههههههههههاي

ردت اختها وهي تضحك وتقره بالموبايل .. وبعد جهد كبير ومميز تم نصب كمين محكم وبدلالة الشهود تم القبض عليه وتسليمة الى مركز الشرطة أصوليًا

رخه ظهره الكرسي بغرور كال .. يستاهل هسه عين العقل عود عباله ما اعرف بيه ريحة النفط تكتل يريد يحرك البيت يكول عندي نمل بالبيت والي وياه لا حول ولا قوه عاد نتصرف احنه احسن هه

ردت مارسين .. اي بس ترا هو مو عبالك شريف هم من انطيته مجال وكع على وجهه وظل يتحرش صح انضحك عليه بس هو هم عار ويستاهل الصار وياه حتى مره ثانيه ما يثق بإي شخص

تنهد وهو يرد عليها .. اي يستاهل والقانون لا يحمي المغفلين محد گله يصير مغفل ويوكع بالشبگة وكفو منجن صح انتن سند وعليجن الاعتماد

سالي ضحكت ولزمت ايده .. تدلل وبعدين هذا شغلنه ماكو داعي للشكر

سحب ايده منها تفاجئت هاي شنو تلزم ايده وعندها عادي يمكن طبيعة شغلها هيج او هي فري بس عادي عندها تطخطخ وتلزم ايده وتضحك وجان لازم ورقه هم اخذتها من ايده هو سحبها وهي لزمته حيل وتضحك واخذتها تفاجئت بطبيعة العلاقه وخاصه ان هي الي مندمجة اكثر

بعدها ظلوا يحجون مواضيع عامة سالي وهي تجمع خصلات شعرها الاسود كالت بغرور .. اشتر ممكن سؤال

رد عليها وهو يعدل فحم الاركيله .. اي جواب

بللت شفايفها وحجت بهدوء.. جنت ممفكر بالزواج وبعدها تفاجئت بزواجك شنو الي خلاك تتزوجها وبعدين هي مو يعني ما اعرف شلون اوصفها بس يعني ممكن جنت تكدر تاخذ احسن منها

رد عليها بهدوء وراحة .. مره من المرات حجي اديب حجالي قصة نبي موسى كال تعرف شنو الي شافه نبي موسى عليه السلام ببنية مدين حتى خلص عشر سنوات من عمره وهو يجمع نفقة مهرها؟

اردف بتنهيده .. مجنت اعرف الجواب

عقدت حواجبها سالي وهي تسأل .. وعرفته

رد عليها .. اي سالت حجي اديب عن الجواب وكال افتح القران واقره قولة تعالى ( تمشي على استحياء )

يعني حجي اديب وضحلي ان رب العالمين ما وصف طولها ولا شكلها ولا لبسها بس وصف حيائها وخجلها

اردف بلهفة .. اني شايفها واعرفها من زمان ومراقبها واعرف عنها كل شي بس اني مجنت ناوي اتزوجها وفجاة لكيت الفرصه كدامي واني احب اغتنم الفرص

ضحكت على كلامه وجاوبته .. اشتر تعرف انت من عفتني وياها تخشن صوتها مثل الرجال وتنزل حجابها على عيونها وعلى حلكها تطلع جنها داعشيه جنت فاهم حركتها يعني هي تبين الي ان هي ما بيها اي جاذبيه اخاف الي نيه والعياذ بالله

ابتسم وهو يباوعلي .. اي اعرفها  واعرف كل حركاتها ههه ولسانها احلى ما بيها

سالي رفعت شعرها وشمرته وره ظهرها وهي تجر نفس حقود واضح عليها كالت .. تعرف اشتر انت صديقي واني اعتز بيك وما مفكره بشي تجاهك بس ما اعرف احسها اخذتك منه وصار وقتك الها ومن باب الصداقه من حقي اغار مو هيج

جاوبها بنفي قاطع .. لا مو هيج فعلا انتي صديقه واخت واعتز بيج بس هي زوجتي الها حق عليه وهي الي حقها تغار مو انتي هههه وبعدين احنه اصدقاء عمل مو اصدقاء طفولة يعني صداقه مبنيه على مصلحة وانتي اكثر انسانه اثق بيج من بعد اخويه صفاء

ابتسمت .. زين تثق بيه لو تثق بيها

عقد حواجبه وهو يفكر وشبه ابتسامة على وجهه .. بصراحة هي مقدمتني بالخساير يعني بس واحد يسويلها بز تروح تگولهم ذاك الاشتر روحوا اعتقلوا اكتلوا اذبحوا شدخلني ههه

سالي ضحكت .. عكسي تماما اني مستحيل انطي بيك ومستحيل اضحي بيك لو اعرف على حساب مصلحتي وشكد حاولوا ويايه ورادوا يعرفون اشتغل لصالح منو بس ابد ابد ما انطيت بيك

جاوبها بثقه .. واني واثق منج اكثر من نفسي ولو اعيش بعد عمر مراح الگة احسن وافى منج

ابتسمت ونزلت عيونها وطلبوا وجبة عشا نزلوا ما شاء الله شي فاخر واني لحد الان ما عرفت منو الشخص الي اعتقلوا وشنو علاقته ويه الاشتر

بعد ما كملوا هو صاح على النادل كله باحترام .. حبيبي بلا زحمة اريد الطلب سفري

جاوبته سالي .. المن سفري مو تعشيت

ابتسم .. مدامتي ممتعشيه

نفخت بضجر وبعدها خلوا وطلعوا احنه ركبنه بسياره ورجعنا وهن خابرن على سايق اجه اخذهن

سالته بهدوء .. الاشتر شعندك ويه سالي ومارسين

ابتسم بخبث وهو يكول ... كيد الزلم يحتاج كيد النساء حتى يكمل ههههه

.......................

جيهان

صار دنيا اليل وابويه ماكو فد مرتاحين منه الحمدلله كون دوم يرجع باليل عاد يلف راسه وينام احسن ما يظل ينكد علينه عيشتنه

استغربت من حالنه صايرين حييل نكرهه والا ليش استغرب هو سوالفه المعفنه هوايه شذكر وحده ثنين تلاثه

اليوم من الصبح كعد وهو بتفل ويطلع اصوات محلوه مقرفه من الصبح دخل للغرفه وكعد افيان برجله يرفس بيها ويصيح .. اكعدي بت النعال اكعدي انطيني فلوس محتاج

هي افيان عصبيه ما تتحمل كعدتله وعاطت بيه بعصبية .. ادري مخلفتك وناسيتك منيلي فلوس نهار كله مكسور ظهري من الحفافه وتالي تجي تاخذهن على الحاظر

رفسها على وجهها برجله وغمها وهو يغلط عليها .. كح ساقطه ام الزلم بعد اريد وحده تدخل للبيت تحف الا اشحتها واشحتج وياهن بسيطه ما تنطيني فلوس ولامة عليه الكح..

جاوبته بغضب وهو تمسح وجهه من اثر ضربته .. صير رجال وروح اشتغل بدل ما كاعد تطلب مني

هو تخبل شلون هيج تحاجي سحلها سحل من شعرها وهي تصرخ وهو يغلط يريد يشمرها بالشارع فضحنه فضيحة واني اصرخ وابجي واتوسل بيه

انوب عندي جم فلس جامعتهن عود اريد اسوي العمليه لكيتهن بايگهن احتاريت شنو انطي حتى يسكت ويفك عنها

كتله بتوسل .. اطلب ام جبار وبناتها خمسه وعشرين هسه اخلي امين يجيبهن بس عوفها وكفينا الشر

عافها وهو تصيح .. الله ينتقم منك الله ياخذ حوبتي منك ولك انت شنو شوكت نخلص منك

لزمتها حطيت ايدي على حلكها ودخلتها للحمام وقفلته عليها لعد اذا يظلون تصير مكاصب

راح امين يركض يجيب الفلوس اجه كال .. دكول ما عندي خليهن على الشهر الجاي

لطمت على خدودي .. عزا العزاني شلون بيه روح الحوراء بت ام فاضل كللها جيهان تريد خمسه وعشرين يومين وتدزهن

خطيه هذا الطفل هم ابتلى راح يركض شويه واجه جايب فلوس انطيتهم اله وطلع وهو يتهدد ... بسيطه افينة الكح اذا ما ربيتج فلا اطلع عامر لا بالقران اطلع عار على الزلم بسيطة

اجيت كعدت يمها هي جانت كاعده على الدرج كلتلها .. ابوج صارت ظلمة وهو ماكو وين راح

جاوبت بغضب .. وشمدريني عساة لا اجه ولا شفناه يمه وجهي يوجعني شلون دفرني على وجهي الله ينتقم منه

كعدت يمها وشويه واندك الباب رحت وكفت وره الباب صحت .. منوو

رد عليه بلهفه .. اني عمو جيهان افتحي الباب

عقدت حراجبي وكلبي يرجف .. هاا عمو احنه وحدنه بالبيت

جاوبني وهو يضحك ... ادري عمو وترا مجاي الوحدي وياي رنا وحارث وعمتج ام حارث

حسيت روحي انتعشت وفرحت حيل شعجب اجونه فتحت الباب وشفتهم فعلا كلهم حظنت عمتي وهي خطيه عبالك ما اعرف شبيها عبالك واحد ميت تبجي بصوت عالي وتشم بيه وتحظني وترجع تبجي وتنوح

ورنا هماتين ظلت تبجي وحارث وكريم دخلوا جوه واجت افيان تركض حظنت عمتي ام حارث وظلت تبجي وتبوس بيها عمتي شكد حنينه وتحبنه بس كله من وره ابويه دمرنه خلا العالم كلها تكرهنا وكلها زعلانه وياه محد يدخل علينه

دخلنه جوه عدنا كعك خفت اخلي ويه الجاي اخاف يجي ابويه وينتحر ما الي خلگة

جبت الجاي عمتي ورنا كاعدات وكريم وحارث يسولفون شربوا جاي وكريم كال .. يله عمو حظرن نفسجن امشن ويانه لبيت جدجن

عقدت حواجبي مستغربه .. عمو ابويه ميقبل نطلع

ابتسم وهو يكول .. ابوجن بالسجن احتمال يطول يله بسرعه

وكفت افيان وهي تضحك بفرحة عارمة ... صدك صددددك عامر بالسجن كللللللللللللوش فرحنا واليحبنا يفرح ويانه وهذا اول فرح شفناه بدنيانه

سحبها كريم من ايدها  وهو يسكتها .. ولج اسكتي فضحتينا ابوج بالسجن وانتي تهلهلين

جاوبته بفرحة.. غير من فرحتي والله عمر لو تعرف هسه لو كايليلي مطلعه معدل طب ما افرح هالفرحة ان شاء الله اعدام

ضحك عليها وضربها بمزح على راسها كلها .. كافي ولج اسكتي ههه

لزمته وهي متحمسه .. شنو عمو قتل متفجرات مخدرات احجي عمو فرحني

ضحك .. هههه لا تحرش

عقدت حواجبها .. شنو بمنو تحرش هو اصلا منو تقلدله يله المهم ينسجن عسى لو يغتصب ام ميثم شدخلنه بيه

سحبته وضربتها كامت تجفص وهي تضحك وعمتي ورنا يضحكن عليها وحارث ظل يضحك بصوت عالي عليها وكريم كاتم الضحكة

بعدها كال كريم .. يله بسرعه بدلن خلي نروح

جاوبته بهدوء.. لا عمو خلينه هنا ما علينا شي وما عدنا شي ماكو داعي نروح

باوعلي بعصبية مصطنعه .. امشي لا اكسر رجلج ما تظلن هنا تمشن وياي

عمتي ام حارث كالت ... لا يرحن وياي بنياتي خليهن يمي

جاوبها كريم كلها .. لا ام حارث تعذريني ابوي خابرته وكال البنات يجن يمنه ما يرحن عند احد وان شاء الله هن بينه وبينكم وكلنه اهل

بلعت ريكي بحسره شوف شلون تبهذلنه من مكان المكان شلون ورطه وحيره هسه لو ابوي بيه حظ جان ما صار بينه الي صار ولا تشتتنه هيج

استسلمنه للامر الواقع وخلينه ورحنه وياهم جمعت ملابسي وملابس اخواني ورحنه هم صعدوا بسيارة حارث واحنه صعدنه بسيارة كريم

بالطريق أتصل موبايله وهو رد سمعت صوتها الدلوع جان واضح من الموبايل .. حبيبي كريم شوكت تجينه مشتاقتلك

رد عليها ببرود .. ما اكدر اليوم ان شاء الله غير مره

رجعت حجت .. اكولك شفت الغرفه الي مختاره ابوك النا بصراحة كولش محلوه ذوق قديم اني اريد الغرفه على ذوقي اذا هاي نروح اني وياك نختار الغرفه ماشي

جاوبه.. بعدين نحجي بهذا الموضوع هسه عندي شغل باليل اخابرج

ضحكت بدلع .. وهسه شنو دنيا الصبح ليكون قصدك ب ١٢ باليل مخابره مال عشاق هههههه اوك حبيبي انتظرك باي يروحي وعشقي احببك

جاوبها احسه يجاملها .. اوك

رجعت حجت بدلع وزعل .. لويش مدكولي احبببج ؟

جاوبها .. بعدين حاليا طالع ويه ناس محترمة من افرغ اخابرج

ردت بانزعاج .. منو الناس المحترمة بله اشو احسك بسيارة

رد عليها.. اي بسياره جبت افيان وجيجي واخوهن يمنه

سكتت ثواني وبعدها جاوبته ... اهااا يله تمام لعد اخذ راحتك باي

قفلت الخط من دون ما تسمع رده وهو اصلا شمر موبايله على الكشن بإهمال وهو يتافئف

اني بصراحة بهاي اللحظه حيل كرهته ما حبيته رغم اموت عليه اعشقه واعشق كل كلمة منه حتى لو سلبيه بس ما اعرف ضجت وحسيت برغبة البجي حسيت اريد ابجي اريد سولين انام بحظنها اشكيلها ما اعرف احس گلبي تكطع وضجت حيل وحتى كلامه المختصر وياها محبيته لان هالشي ما يكطع عندي الامل واني اريد اكطع الامل ما اريد اظل بامل مبتور يارب يسعده وياها ما اريد مشاكل

وصلنه للبيت تلگانه جدو بوسنه وحظنه وبيبي ام حسن كذلك بس كوثر كالو نايمة بيبي ام حسن فرشت النه يمها نومتنه وكريم اجه كعد يمنه

كلتله بيبي .. هااا يمه كريم شعندك شو اليوم كاعد يمي

جاوبها وهو يدخن .. حاب اكعد يمج بيها شي

ضحكت وهي دكوله .. دطلع البنات يريدن ينامن

تمدد وهو يطكطك بموبايله كلها .. شنو السالفه دجاج بعدهن كاعدات خلينه نسأل نشوفهن نشوف عامر شنو اخر التطورات

حجت بتنهيده ... ولك يمه باجر اسالهن عوفهن يرتاحن

وكف وهو يعدل قميصه وموبايله بيده تمغط وبعدها مشه خطوات وكف للباب وهو يركز بنظراته عليه حسيت نظراته مثل السهام وصدري يصعد وينزل نزلت عيوني بسرعه من نظراته وگلبي يدگ سريع يمه شلون خفت هذا شبيه

نمت واني افكر بيه خربط عندي الوظعيه ليش هيج يباوعلي هاي مرتين هيج يتصرف واني گلبي رجيج يرجف عليه راح ابجي شلون بيه احتركت عشيرتك كريم دمرت اعصابي

....................

سولين

صار دنيا اليل والاغا مموجود اي دايح ويه سالي وربعها ام بنطرون قابل مثلي جني داعشيه خلي عساه لا لفه بعد احسن مرتااااااحه الراحه النفسيه الاني بيها

كعدت بعصبية بصف التيل واني احجي وياه .. ادري انت شنو شغلك هنا لو تكهربني لو تكهربه ترا هاي مو حاله

يعني اني اظل هيج هسه واحد يهجم عليه من ربعه ساهر وتحسين ونعال وقندره والله ضوجة شنو حبس انفرادي لا طلعه لا طبه بالقران يجي واتعارك

سمعت الباب انفتح باوعت شفته دخل هو وصفاء رحت بسرعه هجمت واني اتخصر ... بعد وكت مووو لو جاي الصبح مو احسن

رد عليه .. شغل بابا شغل يعني نعوف شغلنا ونگابلج

جاوبته بغضب .. شغلني جاسوسه ارهابيه افجر كل شي بس خليني اطلع

صفاء ضحك ... ههههه شسالفه الاشتر لو ابو بكر البغدادي

جاوبت بقهر .. شمدريني ما تساله ظال لا يحجي ويايه ولا يسولف بس يجي يسولف ويه سالي وجالي ودارسين

ضحك الاشتر وهو يكول .. هذا الحارك دمج ولا يهمج بعد ما احجي ويه سالي

فتحت عيوني مصدومة .. لااااا ما حارك دمي ولا اغار بس مجرد عيب يعني يعني مدري شنو يعني تدري شنو اني ما اريد اظل هنا

رفع العلاگة وهو يحجي وياي كال ... هاج هذا عشا تعشي

اخذت العلاكة منه وصفاء خله وراح الغرفته كعدت فتحت العلاكة دا اكل الاكل ما شاء الله يجنن وراقي مبين من مطعم راقي مو خايس

كتله واني اكل ما شاء الله منيلك فلوس وتنكل عليه لحم ودجاج واشكال واللوان

كال .. مو كتلج بعت كليتي

رفعت عيوني اله وحجيت بتساول.. اي وشنو ظال من دون كليات

رد عليه بكذب .. اي شديت فلاتر والحمدلله

ابتسمت وكف وشمر سترته على القنفه بصفي كال .. اغسليها من تخلصين بس فتشيها خاف بيها شي

جاوبته بانزعاج .. ما بيه حييل

باوعلي بغموض .. مو من ارجعلج ارجع الحيل كله بيج

جاوبته بقرف .. شقصدك تكتلني

رد بذوبان ... اييييي

باوعتله بنظرة شك وقرف ورجعت اكل جاوبته .. اغسلها واتكفى الشر بس بالغساله مو بيدي

عافني وراح مجاوبني خرب راح نام شنو السالفه اني اظل هيج ظاله بس اخدم واكل وانام ينطبق عليه هذا المثل هم البهايم علفها

كملت اكل ورحت غسلتها رحت اتصنت عليه بغرفته سمعته يخابر وهو يكول .. هلا كريم صدك لا زين ليش سجنوا لا مجنت اعرف هسه دريت منك

استغربت منو الي انسجن وكريم منو ليكون كريم عمو ابن عم بابا اندري شو دخت

خليت اذاني اكثر على الباب واني اتسمع كله ... شنو قضية تحرش لا افا لا عيب يله زين البنات وين هااا عندك اي دير بالك عليهن اي خطيه اذا تريد اجي اخذهن يم اختهن

ياربي دخت شنو السالفه هذا شديحجي منو الي انسجن ومنو اختهن

بعدها كمل .. لا ونعم منك لا متقصر اكيد اني والله اكيد هم ما اقصر وياهن بس بصراحة مجنت اعرف مسجون ابوهن على العموم شنو تحتاج اني حاظر وبخدمتك

قفل الخط واني رحت اكمل غسل السترته اسمع طكطكة بالغساله غلست عبالي الغساله بيها عطل وتطكطك كملت دا اطلعها انشفها واشوف الموبايل مفتوح القبق بصفحة والموبايل بصفحة

انهبطت بطني وجعتني حسيت بهزة عنيفه بصدري ... عزززا ما فتشت الستره وحركت موبايله عزااا صخام هذا موبايله الثاني

طلعته بسرعه احتاريت شسوي اله جبته منا خليته منا ماكو الموبايل محترك لا عندي شسوار واشسوره وين انطي وجهي احمي شسوي ما ينشف شغلته حاولت ماكو محترك

طلع هو كال .. سولين فتشتي الستره موبايلي الثاني يمكن بيها

بلعت ريكي والرجفه اعتلتني جاوبته وارجف... هااااا لا مشفته ماكو

كلت اشمره بزباله من دون ما يدري حتى ما يعاقبني لان هو وصاني افتشها

تقدم مني خطوات وعيونه بعيوني بلعت ريكي وتراجعت خايفه منه كتله بخوف.. والعباااااس شوف ما ادري غسلته

عقد حواجبه مستغرب كال .. شغسلتي

بلعت ريكي بقلق .. الموبايل

فتح عيونه مصدوم تخبل ... لاااا جذابه كل شي ولا هذا الموبايل بيه مصايب

توترت وجاوبته بقلق .. والعباااا

بعدني ما مكمله كلمتي سحبني من عنقي بغضب وهو يحجي بعصبية .. شلون بيج انتي ترا انتي هم على گلبي موتيني ما بيج ولا بيج فايده يعني اكو وحده تغسل الستره وبيها الموبايل

لزمت ايده اخفف من قبضته على رگبتي من ورا ومنحنيه جاوبته.. والله ما ادري والله

صرخ بعصبيه .. انييي مو كتلج فتشيها انتي ليش هيج مهملة وتستفزيني

رديت عليه والدمعه بعيني .. شسوي نسيت

حجة من بين اسنانه .. بالج وييين

طلع صفاء وهو يهدي الوضع .. هااا خويه على كيفك شكوو

رد عليه وهو يكعد على القنفه وگوة لازم اعصابه ... هاي المصيبه الطاحت على راسي حركت موبايل بيه سندات وبلاوي سووود لك ماكو هيج وحده غبيه

جاوبته بعصبية  والدمعه بعيني .. مو غبيه لا تحجي عليه كاااافي حتى لو مدا اسوي شي بس اني مليت تعبت نهار كله حابسني هنا شنو فصليه مال اهلك ترا كرهتك وكرهت العيشه وياك ولعبت نفسي

وكف وهو متعصب .. وعلى شنو كرهتي العيشه هنا من زين عيشة اهلج يعني على الاقل هنا تاكلين وتشربين ومحد محاجيج احسن ما ظاله يم ابوج يكفخ بيج

فتحت عيوني مصدومة من كلامه كلامة سبب عندي هزه عنيفه بصدري كلامة مثل السم هي حقيقه و واقع يس واقع مؤلم ومو من حقه يعيرني بظلم ابويه النه

انلجم لساني ما عرفت شلون احجي بس احس روحي ترجف طلعت سيئاته طلع حقده بجيت بسرعه وحجيت ... احترك حتى ابويه بهاي الساعه وشنو تعيرني بابويه انت احسن منه وجهين لعملة وحدة انتم

هو تخبل وكف وهو يتهدد لزمة صفاء كال .. هسه صرت وجهين العمله وحده بسيطه اذا ما ربيتج فلا اطلع الاشتر

تخصرت بعصبية .. والله متربيه واحسن تربيه ولا عبالك صديقك عامر رباني لا اني ربيت نفسي بنفسي ما فد يوم شفت الغلط وسويته احسن من ذولاك الناس العلط راكبهم من ساسهم الراسهم ومفتخرين

عقد حواجبه  وحجه ويه صفاء بهدوء ... صفاء روح الغرفتك

جاوبه صفاء بحيره .. خووويه بس احجي

حط ايده كدام وجهه صفاء وهو يمنع كلامه .. صفاء اخذ راحتك

مشه صفاء خطوات وهذا شفت الشر بعيونة شيخلصني ركضت بسرعه لزمت بقميص صفاء ... صفاء فدوه حباااب لا تعوفني والعباس مو قصدي شمدريني هو الموبايل بالستره وروح امي ما ادري وهاي اول مره احلف بيها

صفاء دار وجهه عليه كال .. انتي ما سمعتي طكطكة مال موبايل بالغساله

جاوبته بصدق .. لا سمعت بس ما اهتميت عبالي شسمة الغساله تطكطك

اشر الصفاء يروح وصفاء ما يكسر كلمته خله وراح ظليت وحيده منكسره وخايفه ما عندي طاقه اواجهه

تقرب مني وحظني صرت تحت جنحة وهو يحجي من بين اسنانه ... جم مره اكلج لسانج لا تطولينه

جاوبته والدموع تنزل بصمت .. اصلا اليوم ما حجيت وتكفيت شرك وحده غيري جان لعبت لعب بس اني مو حيه حتى انكد عليك

ضحك باستهزاء... لا ابد انتي ما تعرفين شنو معنى النكد اصلا

شهكت من بين دموعي .. تعبت والله

تنهد بحيره وعافني كال .. انتي تجيبين المشاكل الروحج

مسحت دموعي .. عيرتني باهلي وهذا الشي كسرني رغم ما اعرف عن اهلك شي بس ما عيرتك شوف الفرق بيني وبينك

وكفني عدل ومسح دموعي باس شفايفي بعمق كال بهدوء .. روحي نامي

سحبت روحي بسرعه ومشيت بهدوء عبالك تحررت وصلت للغرفه ودخلت بسرعه قفلتها وخليت دبة المي ارو وبجيت بصوت واني حاظنه نفسي وابجي بجيت من گلب محروگ احس روحي تريد تطلع

مسحت شفايفي حييل مقرف حقير يهيني ويبوسني اكرهه اكرههه

....................................

جيهان

كعدنه الصبح يابه التغيير الي صاير ممعقول شنو التغيير ؟ حنااان تحبنا ياااي هههههه

والله صدك كولش تفاجئت من حنان كولش حبابه ويانه ومحترمتنا وتحبنه وتصب اكل مو مثل قبل

اجت كعدت يمي وهي دكول .. شفتي هاي المكروهه خطيبة كريم فد وحده نعويصه شايفه روحها ام النفخ ولبخ شكد اكرهها

جاوبتها .. والله ما ادري ما اعرفها مشايفتها

هزت ايدها .. عساج لا شفتيها جنها نعال مكطوع من الجهتين مدري شعجبه بيها كريم وخطبها ما اعرف شنو غايته لا خلقه ولا اخلاق انوب تتنعوص والله هذا معجبني والله هذا محلو مو عساس وجهج الحلو وجهه الجوب

ابتسمت .. ههه زين انتي ليش هيج كارهتها بعدها ما اجت يجوز هيج طبعها ويجوز تطلع حبابه

هزت ايدها والسوارات تخرخش بيدها .. اي كلش تنكط حبابيه دخلي تولي ما ادري ما اطيقها حاصره روحها حصر هسه تجي نافخة حلكها وتصيح تبيعي ( طبيعي )

جاوبتها .. عادي خليها تغير من نفسها شكو بيها اذا عاجبها هذا الشي احنه شدخلنه

دارت وجهها ما عجبها كلامي بعدها كالت .. كريم نايم شوكت يكعد والله متت هسه غير يكعد

عقدت حواجبي.. ليش خلي نايم شدخلج بيه

هزت رجلها بتوتروهي معصبه .. ما يصير يخلصها نوم بس يجي من دوامة منفهم منه شي يخلصها نوم لو يم ايو البومة شلون حياة سز ما يروح يم اخو بالمحل بدل ما يروح لايو النعال

نفخت بضجر وعفتها ورحت لكيت افيان متمدده تباوع للتلفيزيون ضربتها .. اكعدي عدل ولج لحد يجي

عدلت كعدتها وردت عليه كالت .. ماخذه دور المكيب ارتست هههه عبالي بيتنا من اكعد اشمر على النسوان

ضحكت حاجيتها بهدوء.. شوفي فافي احتمال خطيبة كريم تجي لا تحجين اي شي مفهوم حتى لو هي تحجي لا تحجين

جاوبت باستنكار وعصبية ... شنووو شنوو لا گلبي اذا انتي تسكتين عن حقج اني لاااا ونبي تغثني بكلمة اغثها بألف كلمة واني فافي

تنهدت ... ولج تكفي الشر عوفينه منها وحتى حنان لا تحاجيها

ردت بقرف ... دخلي تولي هاي الرعنه هم مصدكة روحها وعلي من الزمها الا اصبغ شفتها حمره دام هي صفره

ضحكت عليها متاخذ الكلام شسوي الها حسيت نفسي متقيده حيل رغم ظلم ابويه بس بصراحة احسن ما نظل بمنية العالم ما اعرف احس متوتره وكاعده على نار احس بثقل عليهم

كريم فعلا تاخر بنومته صارت بالثنتين وهو مكاعد ومحد موجود بالبيت بس بيبي ام حسن وحنان

شويه واجت رنا هي وعمتي كعدن ظلن يسولفن وراحت عمتي ظلت رنا نظفنه البيت اني وياها وحنان هم تنظف ويانه حابتنه وام حسن تسوي بالغدا

شويه ودخلت كوثر وهي تضحك وتحجي ... ههههه ماكو هيج حمايه حلوه مثلي شوفي اجيبج تتغدين ويه خطيبج شفتي اكو احسن من هيج هههه

و ايو ترد عليها .. هههههه اوووي اموت عليج يعمري الله عوضني بيج احلى حمايه

من سمعت صوتهن ما اعرف شصار بيه توترت حيل فركت اديه بقلق ما اعرف شلون اواجهه خطيبته رغم محد يعرف بحبي اله بس ما اعرف توترت حيل وحتى خفت

دخلت كوثر لابسه بنطرون اسود وقميص طويل رصاصي وشال رصاصي كالت .. ها عمه مخلصه غدا مو

ضحكت ام حسن وكالت .. اي مخلصه جبتي ايو موو

مدت راسها من باب المطبخ وهي تضحك بدلع .. هلاوووو عمتووو شلونج عمري

تقربت من ام حسن وباستها وحنان مطنكره حتى ما سلمت عليها ولا ذيج سلمت عليها

باوعتلي وقلصت عيونها تركز عليه كالت وهي تاشر بطرف اصبعها .. منو هاي

ردت عليها كوثر بعدم اهتمام.. جيهان بنت عم ابويه جاينه خطار

باوعتله بنظره ما عرفت افسرها ودارت وجهها ورجعت تضحك وتسولف ويه كوثر

دخلت افيان مثل الاعصار وهي تدفع بيهن .. خاب شني ما دكللي شني سادات الباب دوخرن هاي كلها على الغده لهلدرجة ميتات جوع

ردت ايو.. شنو هالوقاحة مو عيب منو هاي انوب شنو بيتكم صاير سوك هرج صايرين هوسه مو مثل قبل هدوء شنو هالازعاج ههه

تخصرت افيان بدون نفس .. عيني ام بيتكم صاير بيت هرج ترا هذا بيت جدي قبل لا تدخلين بيه انتي

بللت شفايفها ايـــــــــو بحيره وعصبيه وباوعت الكوثر كوثر ضاجت كالت .. شبيج افيان احترمي نفسج هم نزل وهم تدبجين على السطح

افيان ردت عليها .. والله يعمري احنه مو نزل احنه اهل البيت وبعدين شدخلنه وجايات حاميات ردنه نظل بيتنه عمو كريم مقبل كال ما اخليجن وحدجن بالبيت وانتن بهالجمال اخاف عليج انتي وجيجي

حطيت ايدي على خدي من كلامها يالله فوك موقفها انوب تجذب شوكت كال هيج كريم يربي والله هاي افيان وكحه هسه غير تسكت

رفعت ايـــــــــو حاجبها وهي ترد ... هااا خايف عليجن مو واني دا اشوف ما بيجن شي يعني جذاب يعني هذا رأيي لازم تحترمنا بس مد اشوف جمال خارق بارق حتى كريم هيج يكول شنو هالجذب

كعدت فافي على الكرسي وهو تكرط بخيارة .. كيفج لا تصدكين

تعصبت ايو وخلت وطلعت بسرعه وكوثر تركض وراها وتبرر الها

لزمت افيان واني احجي وياها .. ولج انتي ليش ما تكعدين ليش ما تنلصمين جان سويتي مشكلة شكول عليج انتي ما توبين

ردت بخبث وهي تهمس بصوت ناصي خاف تسمعها ام حسن وحنان.. اريد اقهر كويثر احسها حيه وشايفه روحها دخلت كليه ترقت وظلت تباوع بطرف عينها هاي داخله كلية ظلت تشمر علينه لو داخله للبرلمان جان شسوت العوبه

نفخت بملل منها .. ولج والله موتيني افيان اكعدي راحه عيب من العالم عيب استحي شويه

ردت بعدم اهتمام.. ما استحي بيه رس من عامر ههههه

طلعت برا وعفتها شفت كوثر كاعده يم ايـــــــــو وتحجي وياها وذيج متعصبه وبعدها عافتها وهي دكولها .. اروح اكعد كريم

عافتها وراحت بدون ما تدك الباب دخلت وكوثر تبتسم على تصرف ايـــــــــو وشلون دخلت الكريم وهو نايم

حطيت ايدي على صدري عزا بس لا انوب دكوله فافي دكول عود هو مغازلنه وانوب بس لا يجي ويرزلنه ويفشلنا كدام خطيبته عزاااا العزاج فافي

.......................

سولين

مر اسبوع تقريبا حجيت وياه عن اخواتي دا اريد يجيبهن كال .. ان شاء الله

حسيت ظام عني فد موضوع عن اخواتي واتصالاته كثرانه ما اعرف شنو السبب هو اليوم موجود وصفاء مموجود حلو متناوبين عليه

كعدت مقابيله جان يدخن اركيله ويخابر وانوب شلون حلو يطلع من حلكة دخان دوائر مبين خبره بالاركيله واني الفاهيه من كل عقلي اطكطك بيهن باصبعي واغير شكلهن واتجاه مسارهن

ابتسم على تصرفي ويرجع يسويلي دوائر دخانيه واني ماخذني الحماس اطكطك بيهن

كمل اتصال كال .. اريد اسبح اكو مي حار

جاوبته بعدم اهتمام.. شمدريني قابل اني گيزر

تنهد وجر نفس.. اريد فد يوم احجي كلمة او اسالج سوال وتجاوبين عدل ماكو

عقدت حواجبي بزعل .. لعد شسوي انت اسالتك محلوه

باوعلي بنظره من فوك ليجوه وخله وراح للحمام بعد ما اخذ ملابسه والخاولي عاف الموبايل على القنفه

رحت وكفت بباب الحمام باستفزاز كتله .. شكد الرمز دا اريد انزل العاب

رد عليه .. عوفي الرمز تعالي سبحيني

بلعت ريكي من كلامة .. دروح شكبرك شكدك ما تعرف تسبح

عفته ورحت كعدت افعل ارقام واخترع رموز حتى يفتح وماكو بعدها وكف شكل ميشتغل انوب انعاد تشغيله ورجعت هماتين افعل رموز جديده

بعدها اجته اشعارات مكتوب .. السلاح صار جاهز تكدر تجي تاخذ البضاعه

ورساله ثانية مكتوب .. مصطفى بالمطار اذا تحب منخلي يسافر

رجعت رساله ثالثه مكتوب ... زهراء وزينب عادن السنه الدراسيه وحاليا بالمدرسه ال...

استغربت من الرسائل هذن منو زهراء منو زينب  بله مصطفى اعرفه زين ليش ما يردوا يسافر والسلاح شنو معقوله يتاجر بالسلاح

بس الي قلقني زهراء وزينب اخلص من جالي ودارسين انوب يجن ذن انوب طالبات بالمدرسه

ما اعرف شصار بيه حسيت بقلق فضيع واكلت شفتي اكل من التوتر خليت و وكفت ويه ما وكفت اتصل الموبايل شفته مكتوب .. سالي صديقتي

فتحت خط بسرعه كلت الووو

ردت عليه باستفزاز ... منو انتي

جاوبتها بحده .. اني سولين مرته ما عرفتيني

ردت بضحكة مستهزئة .. اي و منو سمحلج تردين على موبايل الاشتر هااا هاي شنو من شوكت والج حق تلزمين موبايله

استفزني كلامها وسرحت بيه تعصبت ورديت عليها.. وانتي شدخلج عيني ليكون رجلج واني ما ادري وبعدين حبي موبايل رجلي الزمة افتح خط اعوفه هالشي راجع الي انتي شكووو وجه البومة

جاوبت بغضب ... ادبسز اني بوومة بسيطة اذا مخليت الاشتر يربيج لج اني سالي هيج تحجين ويايه طايحة حظ زماله

رديت بقرف .. دكلي نعل وانتي منو اصلا سالي مدري جالي اسمج يجيب المغثه ظاله دايحة تفترين ويه الزلم

هي تخبلت كالت ... اني افتر ويه الزلم حيوانة ادبسززز والله اليوم لو اني لو انتي وهذا كلامج اهينج بيه والله اله اخلي الاشتر يهينج انتي تغلطين عليه وتطعنين بشرفي

جاوبتها بقرف ... خاب دولي

قفلت الموبايل عفته بمكانه ورحت لغرفتي كعدت بيها سديتها بدبة المي ارو سمعته طلع من الحمام وهو يدندن باغانية المفضله

مر تقريبا نص ساعة واني كاعده ومستمتعه دا اضفر بكصيبتي بس خفت من سالي لان غلطت عليها وغلطت عليه بس والله هي مستفزة يعني شسويله اكولها شكرا .. لا طبعا ما اكدر لازم اخذ حقي

ما حسيت اله دبة المي ارو طارت من مكانها والباب انركع بالحايط كمزت من مكاني وعفت شعري شفته دخل وملامح الغضب معتليه ملامحه

وكفت بخوف وقلق ... شكووو شبيك هجمت

كال بجمود وهو يصبر نفسه .. شحجيتي ويه سالي

جاوبته بضحكة مستهزئة .. وهسه انت هاجم والله شلون حجينه ويه ست الحسن والدلال سالي صدك جذب

تقرب مني وهو يلوي ايدي وره ظهري صرخت بصوت عالي كتله .. عووفني ايدي يمممممه

كال من بين اسنانه وبتهديد ... ولج والله متت منج شكو تردين على الموبايل شكو تردين انتي شنو ما توبين وبعدين حتى الناس الاستفاد منها نفرت مني بسبب تصرفاتج

دفعته بغضب ورهبه .. هي غلطت عليه وسبتني

صرخ بوجهي بغضب .. وشكووو تفتحين خط أساسا وبعدين ليش تكليلها ام الزلم ما تستحين انتي شلوون بيج اذبحج

صرخت بوجهه بغضب ... اي اذبحني كاتل روحك على سالي والله لو عندك ثمن ليلتها ما خليتها بنفسك

هو تخبل تعصب فتح عيونه بصدمة ودهشه ما حسيت اله وجهي التف للجهة الثانيه صرخت وما توازنت حطيت ايدي على خدي من قوة الراشدي الي اجاني

ما انطاني مجال وكفني وهو يحجي بغضب .. ثمن ليلتها موووو ادبسز

قيد مقاومتي واني اصرخ وادفع بيه وهو هجم عليه بعنف رد بخبث ... ليلة ثمن ليلتنا

نهاية البارت.. يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل 🥰

كلولي منو الغلطان اليوم الاشتر لو سولي اشو احس متشتته بينهم ومدا اكدر ابرر الهم 🤨