رواية #وكر الأشتر الفصل الثاني وستون 62 - بقلم الكاتبه سمو العراق

البارت العاشر
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔
اليوم عيد ميلاد جميلتنا الحلوه ادمونتنااللطيفه رزان
عمري كل عام وانتي بالف خير يارب ان شاء الله عمر النسر ❤️😍
razanlola

..............

الاشتر

ثم ضمها إلى قلبه و قال :
ما بها سعادتي حزينة ؟

.........................................

فتحت عيوني على اثر الوجع الي اجتاحني احس راسي ثكيل واحس بوجع فضيع باسفل ضهري

رمشت بعيوني شفته كاعد على الكرسي وملامحه هادئة ومغمض عيونه بسلام

درت وجهي عنه دا اريد استوعب اني وين آني بإي مكان شفت الغرفه بيضه وبيها سديه وشرشف ازرك ومغذيات تدل على غرفه طبية بالطوارئ

بجيت بسرعه من الوجع والالم اتذكر اخر شي اني وين جنت

اول ما أنيت فز هو مثل المرعوب وكمز من مكانه ركض عليه ولزم ايدي حضنته من دون سابق انذار حضنته ادور الامان بيه

مسح على ظهري وهو يكول بصوت مرتجف .. يعمري لا تخافين هذا اني يمج لا تخافين ان شاء الله ما بيج شي

شهكت شهكات متتاليه ورديت عليه بخوف.. انييي وين اني تهددت رادو يقتلوني

ابعد وجهي عن صدره ومسحت وجهي كله بجفوف اديه وهو يكول .. احجيلي شلونج هسه وبعدين نحجي بالموضوع

رديت عليه بحسره و وجع .. راسي يوجعني وجسمي كله يوجعني احس اريد اموت رجلي حتى رجلي توجعني

تنهد ومسح على شعري كال .. حجيت ويه الدكتوره وطمنتني عنج كالت لازم تظل ما تتحرك حتى ما نفقد الطفل

حطيت ايدي على بطني بخوف ..بيه شي ابني

لزم ايدي وهو يطمني كال .. لا لا مبي شي سبع وزلمة طالع الابو

ابتسمت من بين دموعي على كلامه كتله .. يجوز بنيه عليه

هز راسه برفض وهو يكول .. هو جنت اريد اسويلج مفاجئة وافاجئج بجنس الجنين بس المشاكل ما انطتني مجال ان شاء الله غير مره افاجئج هههه

عقدت حواجبي .. هسه شنو جنس النونو

رد عليه وهو يكول.. ولد على ابووو

بلعت ريكي وتحسست بطني ... جنت اريد بنيه واتمنى تجيني بنيه

جاوب بزعل .. والله اني همين بس شنسوي بعد الله كريم ان شاء الله على الجايات نخلف درزن بنات

رجعت سألته واني اكول .. تحب البنات ؟

رد بحب وهو يكول .. اموت عليهن واحب كل الأطفال هم احباب الله

صفنت واني اعيد الي صار وياي تقرب مني هو اكثر كال بتنهيده ... سولين شصار وياج احجيلي

باوعتله بذبول وروح ذايبه بلعت ريكي رديت عليه.. ما اعرف شنو الي صار اني طلعت اتمشه وكفت عند سرداب وبعدها حسيت بشخص لزمني وظل يهدد بيه ويحجي كلام ما اعرف شلون بس گلي احركج هنا مثل ما ماتت ررح

كطعت كلامي وما كملته لان اني اعرفه هو ينهار من ينذكر اسم اخته

رفع ايده بغضب وعصبيه وهو يكول .. كافي لا تكملين عرفته منوووو

عقدت حواجبي وجاوبته .. منووو

وكف وهو يقبض ايده بكل غضب بحيث شرايينه برزت كال .. تحسين ماكو غيره

هزيت راسي برفض.. لا ما اعتقد تحسين مسافر

رجع باوعلي وهو يكول .. بس اوكفي لحظه انتي ما تميزين صوت تحسين

رديت عليه .. لا ما اميزه لان اني بصراحة محاجيه وياه ولا سامعته هوايه وبطبعي ما احفظ الاصوات وكذلك الموقف جان مرعب ما ركزت حتى بالصوت اكثر شي ركزت عليه هو الخوف والقلق الي تلبسني بحيث حتى ظليت ما اكدر اجمع وهو ضرب راسي بالحايط من بعدها اغمى عليه ولا حسيت بشي

بلل شفايفه بحيره وهو يكول .. اي ماكو غير تحسين يهدد ويرفع موت اختي هو النذل الحقير منو يكول ما رجع من السفر منو يكول هو لحد الان مسافر

رفعت اكتافي بعدم معرفه .. ما ادري والله انت اعرف بهاي الشغلات

تغاضى عن كلامي وطلع موبايله وهو يتصل دار ضهره عني ومخلي ايده على خصره وينتظر الجواب

بعدها رد وهو يكول ... هلا سليم اني شلونك شلون صحتك والله الحمدالله اني تمام بخير بس بعد اخوك حبيت اطلب منك طلب

كمل كلامة وهو يكول .. والله بصراحة اريد منك تشوفلي اسم تحسين محيسن جواد

اريد اعرف هذا الاسم بالمطار يعني شوكت سافر وشوكت رجع من السفر لان عساس هو لحد الان بالسفر

صمت ثواني وبعدها كال .. اهااا تمام يله انتظرك اوك اوك ان شاء الله نص ساعة واتصل بيك

قفل الخط وهو يباوعلي كال .. راح اطلعج من هذا البيت لان لو تكعدين بيه كله الج لو ما تكعدين بيه

عدلت كعدتي وجاوبته باستنكار .. لا ليش اني ما اريد اطلع من هذا البيت يعني متأقلمة بيه واموري زينه ومرتاحة ما اريد اكعد بذنيج البيوت المعفنه

جاوبني .. ما اكعدج بإي بيت معفن بس اصبريلي لان تحسين وهواي سوايته معناها تهديد صريح اليه لهذا السبب اني لازم اتصرف تصرف يليق بسوالفه المعفنه فلازم ابعدج عنهم

بلعت ريكي ورديت عليه .. زين اوك وزهراء اختك وين تروح

رد عليه .. يعني وين تروح غير ويانه وبعدين هو زوجها اجه يريد يحجي وياي بس اني عفته وطلعت لان من عرفت بيج ماكو جن جنوني واجيت متخبل

ابتسمت .. هيج تحبني

دنك راسه اليه وهو يكول .. شلون ما احبج واني روحي كلها يمج

اتصل موبايله قبل لا ارد عليه كال ..ها يابه اهااا تمام لعد هنا السالفه اي اي يله تمام شكرا مقصرت سليم ان شاء الله نردها الك حبيبي تدلل

بعدها نزله رأسه لمستوى راسي وهو يكول .. رايح عندي مشوار لا تخافين عايد وكزاره لازمين الباب لو ابوج يجي ما يخلونه يدخل

لزمت ايده وهمست ... لا تروح ما احب اظل وحدي

رتب شعري وهو يكول .. كتلج بسرعه اجي والله بس لا تخافين الكل برا يمج اصدقائي ثقه واني هسه راجع

تركني وراح واني اداري خوفي ورعبي من الي صار اليه اليوم والخوف الي تلبسني  بس هو عنده شغل ما احدر امنعه

..........................

افيان

سامعين بهذا المثل الي يكول الفگر فوك الجبل وعضه الجلب

هو احنه هيج فوك الجبل وعضنه الجلب جنه بعلمر صرنه بعامر وتسواهن صدك لو كال ابو المثل لما رضا بجزه رضا بجزه وخروف

تسواهن وكفت وهي تكرط بكعكتها كالت .. اي عيني اني امجن الجديده تسواهن صدك والله اني اسواهن واسوه الدنيا كلها

هو حط ايده على جتفها وفركه بحماس كلها ... رايح اجيبلج لفات فلافل بعد عروس لازم ادللج

باوعتله بقرف. وردت عليه .. روح روح

طلع وهو وهي طلعت باكيت الجكاير وكعدت تدخن كالت ... ايييي يتسواهن صمتي صمتي وفطرتي على راس بصل

اني اباوع عليها وهمست لجيهان .. ولج هاي مبينه مشراينه ما تنحمل شلون هسه شلون ورطه وياها انوب تدخن المسعده تسواهن وهي ما تسوه شي

كالت بعصبيه..شمالجن تتبسبسن ولجن برابيك

كلت خلي انصب عليها واضحك عليها تقربت منها كلتلها بحزن وملامحي تغيرت .. خاله فدوه لا تعذبينه احنه مساكين احنه فقره لا تاخذين دور مرة الاب ويانه لا تظلمينه والله احنه ايتام

ردت عليه بسخريه وهي تنفخ بالدخان كالت .. وشني يمه شفتيني كاعده اشرب جاي ويه امي وابوي هم يتيمه حالي من حالج لا تكعدين تلطمين جنج نواحة الرداحة

عقدت حواجبي وباوعت لجيهان .. هاي مني انوب نواحة الرداحة

طفت جكارتها بطرف اصبعها وردت عليه ... صديقتي مطلگة وظيم الحال حالها تردح وتنوح بالفواتح وينطوها فلوس وانه لقبتها نواحة الرداحة

كعدت مقابيلها وتربعت .. زين وهسه شلون يعني مراح تعطفين عليه يعني حتكونين ظالمة ويانه

ردت عليه بجزع ... ظالمة !!! ظلمج البين وشكج شكتين ولج بت النعال هسه اجيت بعدني حتى ما كايله حلال كابلتيني وكعدتي جنج عجوز عرب شتردين مني هسه انه بهالوجهه البريئ وجهه وحده تظلم ؟

جيهان جاوبتها بسرعه وهي تكول .. لعفو خاله مو هيج بس هي افيان تحب تتشاقه

باوعت لجيهان وهي تكلها .. اكلج شو انتي حلوه ولا جنج بت عامر ولج خاف خاطفج اغترفي حتى هسه انيم الربد براسه منين جابج

ضحكت جيهان كالت ... لا هو ابويه بس اني طالعه لامي الله يرحمها

سحبت نفس وزفرته كالت ... اوووووف دهر صابك يعامر جا مرتك هيج حلوه وسحلت لخلفها جااا انه ام وجهه الاملح شيسوي بيه

بس شحده اكعده على البطل وانعل ابو الخلفه ايييي انه تسواهن اسوه عامر وعشره منه

حضنته بسرعه وبفررحة ... يااااااي تسواهن انتي مثل ستايلي احببج احببج اعذريني حجيت عليج قبل شويه واخذت غيبتج

دفعتني بحده وعصبيه وهي تكول .. دوخري جنج ابووج شكد لزكة ما معذوره أن شاء الله جهنم وباس المصير انتي وامثالج يا زباله

اشرت على نفسي بغضب ... انيييي زباله

ردت عليه وهي تكول ... عياره وجذابه وكل سوالف كواده لبي بيج مبينه من وجهج ولا ارتاحيت الج مو مثل ذيج فغيره ومسيچينه ( فقيره ومسكينه )

جاوبتها بزعل .. لعد مدام هيج منا وهيج انتي مرة ابوي واني وياج حرب

رجعت دخنت مره ثانيه كالت .. خاب دروحي لا اعفطلج

قرفت منها ويييع هاي منين جابها ابوي الخبله ولو هي الطيور على اشكالها تقع قابل شياخذ نانسي عجرم لو اصاله نصري

صاحت على امين وهي تكول .. تعال ولك خاله انت امييين مووو شحلاتك جنك اختك الجبيره مو مثل هاي ام لسان الجذابه

راح الها كعدت على رجلها وتهز بيه كالت .. شوف ولك انت هنا ياهو يطكك طكة ياهو يغلط عليك اغلط عليه المنطقه اريدها تشيل من وكاحتك ما تطل وادام بالمنطقه اريدنك سبع ونجر ورجال واريدك تقره وتدرس وتصير دكتور خووووش ولك

جاوبها بخوف ... هااا اي

عاطت بيه بغضب ... ولك شنييي هاااا اي ولك شني جنج فرخة مايعه كوووووول اييييييييي يمه عد عيناج اسويها حرب البسوس شوف ولك اريدك هولاكو زمانك خوووووش

هز راسه بقبول وهو خايف منها

رجعت عاطت بيه وهي تكووول ... ولكككك كول اييييي تدللين اليوم ما اخلي واحد افشخها كلها

جاوبها بخوف .. هااا اي اييي تدللين اليوم افشخهم كلهم

باوعتلي وهو تتوعد بيه كالت .. كونج ولد جان ارتاح كلبي ولج انتي فد وحده نجره جنج انييي يله ميخالف اسوي اخوج رجال بلكي يتعدل مسكين هذا الفرخ هذا صدك يتيم مو انتي ام لسانين

ابتسمت على كلامها لوتيه كل شي تعرف بس شافتني حللتني وحللت كل الشخصيات بلكي الله وتمشي عدل ويانه

.....................،

سولين

من بعد ما صرت زينه اجه هو كال .. راح نرجع للبيت مالنه حتى ناخذ اغراضنه وبعدها اني اعرف شلون اتصرف

من طلعنه جنت وياه بالسياره كتله .. شنو تحسين لسه مسافر لو شنو

جاوبني ... لا موجود بالعراق وهو الي هجم عليج بس خليني اشتغله على البارد واعرف شلون اتصرف وياه واتوبه من سواله

لزمت ايده بخوف .. شحسوي انت ؟

كرص خدي بحماس وهو يكول ... اعضضضج اوووف مال بوووس بس خلفي وشوفي شلون بالسنه مرتين تحبلين اخليج

ضربته على ايده بغضب ... اني وين احجي وانت وين تحجي شبيك احجي شحتسوي اني هم اخاف عليك خوما ابني يتيتم واني بعدني ممخلفته اذا شي خطر عليك لا تسوي شي وخلينه نعيش بعيد عنهم

جاوبني بضحكة .. لا يمعوده اني هم ما الي بالمشاكل متشوفين اني راح اطلع من البيت حتى ما تصير مشاكل هي المشاكل اصلا شتجيب غير الهم والغم

ابتسمت ... اي فدوه حباب

وصلنه للبيت اول ما دخلنه ما لكيت زهراء استغربت باوعتله .. شنو وين زهراء

رد عليه.. راحت قبلنا هي وصفاء

اول ما ساهر حس بوجودنه هو طلع متعصب وبيده ورقه كال بغضب .. انت من شوكت رافع دعوه علينه انت مو سقطتها ليش هسه اجانه تبليغ

جاوبه الاشتر ببرود وهو يكول ... تبليغ مال شنووو

ساهر بسخريه ... هاااا متعرف يعني هسه اجه المبلغ وانطاني هاي الورقه و وقعت على استلامها

سحبها الاشتر منه وهو يقراها ...السيد قاضي محكمة ( .... ) المحترم
المدعين .. اشتر ... صفاء

المدعي عليهم
ساهر / سليمه / سندس

جهة الدعوى
ان المدعي عليهم شركائي بالعقار المرقم (...) الذي له الينا من مورثونا المرحوم ( .... ) وان المدعي عليهم يشغلون العقار المرقم اعلاه  ويمنعونا من الانتفاع به ولعدم استفادتنا من بقاء العقار على الشيوع لكونه غير قابل للقسمه

عليه اطلب من المحكمة المحترمة دعوى المدعين عليهم للمرافعه بعد تبليغهم بنسخة من عريضة الدعوى والحكم لنا بازالة الشيوع للعقارالمرقم اعلاه  وبيعه وتوزيع صافي مبلغه كل من حسب حصته

رجع باوع لساهر بعدم اهتمام وهو يكول .. ايي هو البيت لازم ينباع وتحضرون بالمرافعه وهذا اخر تبليغ الكم احظروا بالمزاد وخل كل شخص ياخذ حصته

رد عليه ساهر بصياح .. ما اروح ولا امشي والبيت ما ينباع لو شيصير

مشه الاشتر بانزعاج وسحبني من ايدي وهو يكول .. هذا الشي تحله بينك وبين الحكومة اني مالي شغل

رجع دار وجهه عليه بحركة دراميه وهو يكول .. وهااا نسيت اكلك طلعت تقرير هدى وطلعت النتيجة نگتف ماكو اي اغتصاب ولا حتى محاولة اغتصاب يعني انت وبنتك حظر نفسك احتمال كبير تنسجنون بتهمه قول الزور وتشهير وادعاء كاذب

فتح عيونه مصدوم بلع ريكة بصعوبه وكعد على القنفه وحط اديه على راسه

امه جانت واكفه ما تحجي بس تريد تموت من القهر شدت على شفايفها وصاحت بصوت عالي ... الله ينتقم منك يا اشتر انت منييين طلعت ياريت انت متت مو رحيق انت جان لازم تموت احنه شلون خليناك عايش شلون هيج نغدرنه وما حسبنه حساب لهذا اليوم

باوعلها بقرف من فوك ليجوه وعافها ودخل للغرفه اخذنه كافة اغراضنه

وما نسمع بس الصريخ والعياط طلعنه بسرعه ونشوف ساهر لازم بنته هدى وبصونده سكطها تسكط وهي تصرخ وتركض منا ومنا مثل المخبله

اني تهسترت وشاغت روحي احسه يضرب بيه حيل انقهرت عليها

هجم عليه الاشتر ولزمة دفعه منها وضربه بالحايط سحب منه الصونده وهو يصرخ بيه بغضب .. انت شبيييك تخبلت انجنيت

هي ركضت وختلت وره الاشتر ولازمة بقميصه وتبجي .. فدوووه راح يموتني فدوه يمممه جسمي يمه راح اموت

ساهر .. اليوم اموتتتها اليوم اسكطها تسكط تجذب عليه تكلي اغتصبها الخايسه المعفنه ولج شلوون هيج تسوين وانت مالك شغل بيها بنتي واني حر بيها اموتها اذبحها انت لا تتدخل

دفعه الاشتر وهو يكول ... بنتك دخيله عندي ما انطيها الك وبنيه انتم ضيعتوها بسوالفكم و فضايحكم وافعالكم انتم السبب بكل شي

ساهر لزم التحفيه وركعها بالحايط وهو يكول .. ولج انتييي يالحقيره يالزماله احجي شلون هيج تبليتي عليه

ردت عليه وهي تشهك وتصرخ .. هي هي عمتي ام ماهر كالت سوي هيج حتى ازوجج مصطفى واخلي يتزوجج وادللج واعيشج احسن عيشه وانطتني فلوس وكالت لا تحجين لاي واحد وحلفت ما احجي والله هي قشمرتني

وجيهه حطت ايدها على راسها بخيبة امل وساهر تخبل اخذ مسدسه وراح هجم على اخته يريد يكتلها

وانوب ام سجاد لزمت بنتها وكتلتها

اشتر اخذني وطلع بيه بعد ما اخذنه اغراضنه كتله .. هسه يكتل اخته

رد عليه بعدم اهتمام وانتقام ... طبها مرض تستاهل

حبيت اغير الموضوع كتله .. هذا كزاره صدك ما يتحاجة اجه صفاء للمستشفى توسل بيه توسل ما خلاه يدخل عليه فد واحد خبل

انوب اني طلعت اله كتله .. خلي يدخل ترا صفاء مثل اخويه وهو اخو الاشتر ليش ما تخلي يدخل

رد عليه كال.. لا الاشتر كال محد يدخل عليها غيري واني ما اكسر كلمته

انوب ظل ميجاوبني من احجي شلون حرك كلبي حتى ما يحترمني

ضحك كال .. هههه افا لا اليوم كزاره اسويله فصل اسبوع شلون هيج ما يسمع كلامج ويستهين بيج

رديت عليه بزعل وبرطمت .. يستاهل شهر بس خطيه لا عوفه يجوز يخاف منك ولو هو مو شكل واحد يخاف هو وزنوده جنه زنود ام سعدون

ظل يضحك وبعدها وصلني لبيت جان حلو حيل وكاعده بيه زهراء وصفاء ظلوا خطيه يتحمدون اليه بالسلامة

اشتر كال .. زهراء رجلج اتصل بيه وكتله مالك عندي مره وتعال للمحكمة احظر

ردت عليه بخيبة امل.. يعني اتطلك

جاوبها ... لا مجرد تأديب وتوبيخ حتى يمشي عدل

تنهدت وهي تكول .. اني مرتاحة هنا وما اريد ارجع حتى هنا رجعت عافيتي جنت مسلوله

احتضنها وهو يكول .. هذا هو بويه ظلي يمي البيت بيتج

تركنه وراح جنت حيل خايفه عليه خايفه لا يصير  بيه شي گلبي ما متطمن اخاف افقده بعد منين الكة سند

...................................

جيهان

بعد اتصال جاسم يسال عن كريم حيل خفت وقلقت اخذت التليفون وخابرته طلع تليفونه مغلق .

زاد قلقي وخوفي عليه طول مااني مشغولة افكر بي عزلت البيت وغسلت المواعين وبالي يمه .

رجعت خابرته للمرة الالف وهم مغلق

رحت طلعت رقم  جاسم وخابرته واني متوترة وقلقة
رد عليه بسرعة كال هااا  كتله عفية جاسم شكو هو ليش كريم غالق تليفونه وانت تسأل عنه هو شكو ترى والله خفت عليه.

بقى يحجيلي عرفت عايف البيت وطالع متت من القهر ياربي ليش هيج شادين ويانا هسه بعدنه ممتزوجين وهيج من اولها مشاكل تاليهه شلون بالله اريد اعرف شنو يردون منه !

ليش الناس الحقودة كلما يشوفون اثنين يحبون بعض ومرتاحين يكومون يسوون اي شي حتى يخربون علاقتهم ويكدرون عليهم اريد اعرف شنو يحسون من يسوون هيج معقولة يرتاحون.

بنفس الوقت اعرف بكريم يحب ابوه ويحترمه ورغم هذا ماتخلى عني ولا صار ضدي شكد محظوظة بي اني.

كتله عفية جاسم هسه وينه هو كريم و وين راح عفية طمني عليه

كال هسه جاي اسأل عنه اصدقائه بس انطي صبر شويه اذا حصلت خبر عنه اخابرج.

جاوبته بتوتر ماشي بس فدوة لاتنساني

رد بنبرة سريعة لالا ماانسى

سديته منه اعصر باصابعي ورايحة جاي شوون ياربي وين راح وليش هيج يصير بي بعمره مامقصر وياهم ليش هيج يجاوزونه.

ورا تقريبا نص ساعة احسها صارت سنة عليه ، متوترة وقلقة خاف صار بي شي !!

لا يا اللهي شنوو هالافكار اني شيصير بيه بدونه الف إسم الله عليه ربي حفظه الي وخلي الي طول العمر.

شاشة التليفون ملت مني كد ماا اطل بيها وارجع اخابره بدون ملل وتخيب امالي من يطلعلي صوت الجهاز مغلق 
اتنفس بقهر وافرك وجهي.

خابرت على جاسم فصله مدري مشغول طلع زاد قلقي وخوفي 

ورا عشرة دقايق تقريبا وخابر جاسم
من الارتباك اريد اجاوب عليه جان رفضته بالغلط.

ركعت كصتي شهالثوول هذااا شبيج لخاطر الله
خطية هو يمكن عرف بيه منثولة رجع خابر
جاوبت عدل هالمرة اجاني صوته ها جيهان

كتله بلهفة هاي عرفت عنه شي جاسم عفية

جاوب اي اي حصلته بشقة صديقه بس قافل تليفوناته

كتله حباب جاسم اريد اشوفه اخذني اله فدوة

رد يله حضري نفسج اجي عليج اخذج اله حاولي تهدينه جيهان ماوصيج بعد لان هو تعبان ومهموم

رديت بسرعة ان شاءالله بس عفية لاتتاخر بسرعة راح اجهز اني

كال تمام بس علما اوصل لبيتكم.

سديته منه رحت لبست بسرعة بسرعة وكعدت انتظره
طلعت انتظره كبال الشباك وخرت البردة واباوع عالطريق ماعندي صبر بعد اريد اروح واشوفه.

اجت فافي تتمطى توهه كاعدة استغربت شافتني مبدلة
كالت وهي تصحصح وين رايحة .

تنهدت جاوبتها رايحة ويه جاسم

كالت يااا وين ؟

كبل لا ارد عليها سمعت صوت هورن السيارة جريت جنطتي وركضت باتجاه الباب وهي وراي تركض

ولج جيجي صخام خيرج شصاير صاير شي احجي
التفتت عليها كتلها راح اروح لكريم بعدين احجيلج بعدين رووحي رووحي

زمخت عليها مااحس بنفسي شدااسوي بالي يمه ماخذ كل تفكيري

انوب الباب على حظي مينفتح واسمع صوت تسواهن وراي تحجي بصوتها المبحوح بسبب التدخين
يااا ولج جويهينه وين موليه من الصبح ثكلي بت الاوادم هو يجيج لو انت ترحيله

يااا انوب عليه هااايه جريت الباب حييل وطرت للسيارة
وهي وراي ولج تعاي مصخمة رجعي شعندج من الصبح

دخلت بالسيارة كتله بدون مااسلم عليه
سوق جاسم بسرعة سوووق

كال هاي شبيها فضحتنا بالمنطقة

كتله مصيبة هااي يمعوود سوووق

حرك السيارة ومشى بيها ووصلنا للعمارة نزلت من السيارة اباوعلهه وجاسم كال يله جيهان

مشيت وراه كلبي سابق خطواتي .

وصلنا للشقة وجاسم دك الباب واني وراه
دقايق يله سمعت صوته ومبين تعبان
وهو يكول اجييت

فتح الباب اجت عينه عليه جان مهموم ونظراته تسولف همه وحزنه .

سوى مجال ودخلنه من شفته هيج بسرعة شمرت روحي عليه وحضنته حييل وهو هم اخذني لصدره وحضني
ووجهه على جتفي.

بعدهه حسينه على صوت جاسم وهو يكح
حجه ويه كريم كال أني اروح كريم افتح تليفونك يمعود لايظل بالنا عليك.

هز راسه وراح سد الباب ورا جاسم واجه يمي
لزمته من وجهه والعب بلحيته

لزم اديه واخذني كعدنه باس راسي
بجيت مايهون عليه اشوفه بهالحالة
كتله عفية ليش هيج سويت وي ابوك على مودي
فدوة خلي نخرب الخطبة ولا المشاكل ولا تبقى هيج ماتدري شكد تعبت وخفت عليك .

هو أني كلت هيج وهو كب بوجهي
صار عصبي حييل
انت شتكوولين نخربها شنو ونحقق غايتهم مووو هيج بسرعة تضعفين انت وتستسلمين واني عاندت ابوي وجيت هنا .

واكف يصيح واني فاتحة عيوني على وسعها عليه ورافعة راسي اباوعله
يحجي بحركة كلب ومقهور

خليت اديه على حلكي وزدت بجي مو لان عصب عليه
لا لان حالته صعبته عليه وكسرت كلبي سودة عليه شمسوين بي.

كمت اهدي بي كعد بصفي ورفع شعره ليفوك
لزمت ايده اتلمسها.

التاف عليه هو وكال سمعي جيهان احنه لازم نتزوج باسرع وقت افتهمتي.

كتله ببلادة يعني شووكت ؟

رد بنبرة شبه عصبية يعني مااعرف هسه اليوم باجر هالاسبوع الخميس الي يجي اهم شي باسرع وقت

سألته يعني شنو قبل العملية مالتي

كال وهو يعلي بصوتته تدريجيا  اي اي قبلها

جاوبته معترضة لا عفية كريم مو هيج اتفقنا فدوة

قاطعني وهو يلزم وجهي باثنين اديه ويتلمس بشرة خدودي مااريد اعتراض جيهان خلي نتزوج كثرت المشاكل ممرتاح الهه نتزوج ونكسر خشومهم .

بقيت عيوني بعيونه اشوف كلامه صحيح غمضت عيوني ولزمت اديه ودنكت
بس كريم اني لازم اسوي العملية

رد موو مهم عندي تسويهه متسويهه اني اريدج يمي اريد اجيبج يمي كاافي تعبت متشووفين حالي انت ولج الكل يريد يفرقنا لا تخلينهم يستغلون الفرصة هايه

رجع لزم وجهي ورفعه باتجاهه هاا جيهان شكلتي ؟

هزيت راسي بأي.

..............................

افيان

اليوم خابرت نسيبي الكفو كال اختج زينه الحمدلله ما بيها اي شي

رديت عليه .. ابشرك ابوي تزوج وحده خبله و وكحه الله يستر منها اني مثلي عشر مرات

ضحك وهو يكول .. هههه بالرفاه والبنين ان شاء الله مبروك

ابتسمت ... الله يبارك بيك عيني

كال .. يله اني راح اسد الخط عندي شغل بالسجن راح اروح اطلع مصطفى

رديت عليه .. شنو طلع براءة

اشتر .. اي الحمدلله النتيجة لصالحة وطلع براءة وان شاء الله ما ظل شي ويتخلص من ام ماهر هم  وهو خطيه ترا ما عنده شي ويه ويه هدى

سحبت نفس وزفرته بحمااااس... اوووف يوم عيد والله نخلص منها  فدوه اروحلك نسيبي هم مر علينه ترا مشتاقين

جاوبني ... ان شاء الله ان شاء الله

قفل الخط واني اتذكرت مصطفى من جان يراسلني وهو يكول .. فدوه اروحلج عبووود انتي ماكو وحده مثلج حنونه وطيبه انتي علم وانتي طيبه اني حنيه وادب

عبالك مو يتغزل بيه عبالك يكتب انشاء عن الوطن

دخل امين وهو يركض كال بلهفه ... افيان ختليني ضربت ابن بيت ابو سعدون براسه وظل يخر دم

طلعت تسواهن من غرفتها وهي تدخن كلتلها ... هااا ولك اومين شسويت من مصيبه

جاوبها بخوف ورعب .. ابن ابو سعدون دفعني وركعته بطابوكة جان دائما يكتلني بس هسه اني كتلته

هي ردحت بالنص وهي تكول ... سبع ومخيف وتخاف الزلم منه كلللللللللوش عفيه اومين عفييييه

تهطر بابنه بقووه وطلع تسواهن والله عمي طلعت صدك تسواهن

وكفت وحطت ايدها على الباب وهي تباوع الها بشقاوه ... خيييييير جايتنه انتي وابنج سابح بدمة شكلولج عنه مستشفى لو طوارىء

عاطت بيها ام سعدون وهي تكول ... ابببنكم ضرب ابني وينه اليوم اموته تموت هذا الجبان الخنيثه

عاطت بيها تسواهن وهي تكلها .. خااااااب انجبي لا اطفي الجكاره بحلكجج وبعدين شمالج تلطمين جنج نواحة الرداحة بس تنوح

صاح بيها ذيج بغضب كالت .. جااا ما تشوفين ابني دمة بطوله والله اذا صار بيه شي بهاي المنطقه ما تظلون امحيكم من الوجود

جرته تسواهن من ايدها وكعدت تتفحص راسه والجكاره بين شفايفها كالت .. ما بي شي اخذي للمستشفى كصي باص بخمسميه يخيطونه فد اربع خياطات و وكلي لفة معلاك ويرجع مثل الحصان

وبعدين شدعوه ابنج فاااهي واغم وما بي خييير صدك جذب علمي كليله من تنركع طابوكة گوم اوكف على حيلك صير زلمة حووووك ثير اخو اخيتك يالمطي

اني جنت فرحانه بمرة فاذر الجديده تسواهن وفاتحة موبايلي واصور بيها اريد اشوفها السولين وجيهان لان جيهان داحت لخطيبها ابو عمو عشتو

جنت مكشره وفاتحه حلكي اتمضحك ومصدومة وهي كفختني على راسي كالت .. طفي موبايلج يالتافهه ولج شتصورين انتي وموبايلج مكسور الف كسره جنه حظي

دخلت بعد ما تعاركت ويه ام سعدون و رزلتها وطاحتلها فشار بنص المنطقه وركعت الباب بوجهها

واني جنت فرحااااانه خرب هي هاي الجنت اريدها تسواهن وتسواني اني واخواتي الحيايه

يوم التهد على ام حسن وكويثر وتريح بالي وگلبي

..........................

صفاء

جانت دنيا اليل اواخر الشتا جان مطر حييل قووي وهوا عالي طلعنه بالسياره اني واشتر وكزاره وعايد

جان اشتر لابس نقاب بحيث طالعه بس عيونه والجماعه كذلك وجانت السياره مظلله

جنه واكفين وبس الماسحات مال السياره مشتغلات وكذلك لايت السياره يضوي والمطر يضرب السياره بقووه

تحسين جان عنده كراج واحنه جنه منتظرين شوكت يطلع هاي الخطه للاشتر يريده هو لان هذا النذل هو السبب بكل شي هو واخته

هو قتل اختي وفرقنا وما اكتفى بهذا الشي راح ورعب سولين وراد يسوي نفسه بريىء من السالفه اختفى فتره بحجة السفر

بس اكيد ما تفوت الاشتر هاي السوالف وهو عايش بين المجرمين والقتله وكلاواتهم

تحره عنه وعن كل شي يخصه وعرف ان هو ما جان بسفر جان داخل العراق ومخطط هو واخته حتى يقتلون سولين او يمكن يكون تهديد صريح ومعلن من قبلهم

حتى اشتر يفرغ الهم البيت  ويتركة وهو سوه مثل ما يردون ترك البيت واخذ سولين وطلعنه سوه

بس صدمهم بالتبليغ الجديد  وفهم هو ذيب مو مال يلعبون وياه وعرف شلون يردهم

انتظرنه تقريبا نص ساعه

طلع تحسين وهو لابس بالطو ويفرك باديه يدفيهم ويركض الدخان يطلع من شفايفه بسبب برودة الجو

جانوا وياه ثنين من حمايته يمشون وراه و واحد لازم اله الشمسيه حتى تحمي من المطر

اشر الاشتر لكزاره و عايد نزلوا بسرعه وهجوم مباغت منهم وهم يهددون الحمايه واخذوهم غفل كل واحد خله مسدسه بخاصرة واحد منهم وهم يكولون ... اششششش نزل الشمسيه ونزل سلاحك بكل هدوء ومن دون نزاع حتى ما تتاذون

هم جانوا مصدومين وسوو مثل ما رادو

ونزل الاشتر وكف كدام تحسين بسلاحة وهو يحجي بثقه كال ...لچان يهوبز هسه صار بيدي شرفت تحسين بيگ تفضل ويانه نريد نوبخك

نهاية البارت ... يتبع

كونوا انتم كونوا بخير... احبكم 💔

لا تنسوا التصويت والمشاركة .. بكم نكتمل 🥺