رواية #وكر الأشتر الفصل الحادي وستون 61 - بقلم الكاتبه سمو العراق

البارت الناسع
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

"‏لا بأس بقليل من الحزن مقابل أن تتَّخذ قرارًا صحيحًا لكي تبني عليه حياتك، أحيانًا تكون القرارات القاسية هي السبيل الوحيد لواقع أفضل وحقيقي، الوقت يعالج كل شيء ويهدم كل شيء، حتى تلك الذكريات الجميلة وأنبل العواطف تموت ويحل محلها نوع من الحكمة الباردة التي تجعل كل شيءٍ، يهدأ"

تأخرت بنشر البارت اكو وحده من البطلات مضيعة الاول والتالي😅
.........................................................

رنا

جنت واكفه وصافنه على كلامهن الي يشوفهن يصدكهن ويكول الخيال حقيقيه ام حسن المره الجبيره الزاهده العابده تنوح وتبجي وتشكي وكوثر تداري دموعها وتهدي بعمتها

من نطقت اسم جيهان وهي تكوله .. جنتك جيهان

جدي كهلان انجن وهو يكول .. وهاي دموعج وحزنج وقهرج من وره جيهان

جاوبته وهي تشهك وتمسح دموعها بشيلتها .. اي جنتك احجي وياها كلتلها يمه جهونه حبيبتي يبعد عمري اريد منج بس تحجين ويه كريم يكعد ويانه بالبيت انتي وياه ونحطكم على راسنه جدج ما يكدر على فراك ابنه

شو هاي تخبلت وردت عليه .. دروحي شكد لوكيه جنتي تتلوگين لآيات وهسه جايه عليه وغلطت عليه وطردتني ولا احترمتني

انصدمت اني وما صدكتها لان جيهان مستحيل تحجي هيج بنت خالي واعرفها فقيره وبريئة هسه لو كايله افيان جان صدكتها بس جيهان مستحيل ما اصدك

جاوبته كوثر وهي تبجي كالت .. لا مستحييل والله ما اقبل تصير مرة اخوي هاي الي تغلط على عمتي الي ربتنا مستحيل نقبل بيها تدوس عتبة بيتنا الي يتجاوز على عمتي يتجاوز علينه وهذا الشي ما نقبل بيه

نفخ جدي بضجر وغضب وهو يكول .. هاي شبيها تخبلت شلون الها جرئة وتحجي هيج على اختي والله ما عاش الي يسب اختي واكص لسانها والله يجي كريم واخلي يفسخ الخطوبه منها وخليها تروح تشوف الها واحد يلفيها

انه جنت اكول فقيره ومؤدبة تاليها بس حصلت على غايتها تفرعنت وتخبلت بس مو صوجها صوج ابني هو الي منطيها مجال ومخبلها علينه

ردت عليه كوثر وهي تكول .. ابد ما تستحي تغلط على عمتي وشايفه روحها  جانت مسويه روحها فقيره وخبلت اخويه حتى ياخذها صدك لو كالو تمسكن لحد ما تتمكن

عفتهم يحجون وجدو ما قبل على جيهان تخبل منها وكال .. راح يحجي ويه كريم حتى يفسخ الخطوبه

اني بسرعه خابرت على حارث كتله .. تعال اخذني اريد اجي

انتظرت تقريبا ربع ساعه واجه حارث كتله .. وصلني لبيت خالي بسرعه عندي موضوع ويه جيهان

رد عليه بانزعاج .. ما اتمنى اوصلج الهم بصراحة صاير حيل اكرهم وما اطيقهم وخاصه بعد ما استقرت سولين ويه الاشتر ولا عبالك جنت احبها نستني بسرعه

جريت نفس ومجاوبته .. هذا فد واحد بطران العالم وين وهو وين

وصلني عندهم نزلت الهم  دكيت الباب طلعتلي فافي متعصبه ولازمة صونده كالت .. هاااا ولج اجيتي والله جابج ولج تعالي شوفي هاي عجوز البين متعاركة ويه اختي هي وذيج الجلبه

امشي وياي خلي اروح اهد عليهن اكتلهن واجي واحمي ظهري لا وحده منهن تضربني بسجينه  لان هاي كويثر قذره وغيوره

سحلتها ودخلتها جوه هي وصوندتها كلتلها .. دسكتي جيجي وين وشبيها ويه ام حسن ؟

جاوبتني .. ام حسن البربوك اني الها ولج متعيني لاعبه باختي لعب وهاي مجفصه وكايلتلها انتي لوكيه ولو هن صدك لوكيات بس هسه جدي يتخبل لان ما يرضا على ام حسن عشتوو اخته وشيباتها بيض لو تجي اصبغهن الها

عفتها تحجي وحدها ودخلت جوه لكيت جيهان كاعده وتبجي هي ما عندها سلاح غير البجي

من شافتني وكفت وركضت بتجاهي حضنتني وبجت وهي تكول ... تعبت رنا تعبت شسوي مليت طلعت روحي اني الي متى اظل هيج الى متى

بعدتها عني ومسحت دموعها .. ليش شصار شحجن وياج وانتي غلطتي عليهن

مسحت دموعها وردت عليه .. ليش هن شنو الي ما حجنه اصلا ما خلن كلمة ما كالنها انوب يگللي اخذتي كريم منه وغربتي عن ابو وخلي يرجع النه اني صدك كلتلها انتي لوگيه

تنهد بضيق .. انتي ليش تغلطين عليها ليش ما حكمتي اعصابج مو تعرفين هن ما يصدكن يلكن حجايه عنج

ردت عليه وهي تكول .. بس اني هم تعبت ولعبت نفسي يعني الى متى المشاكل وياهن هذا هو ما يردوني خلي يفسخ الخطوبه وكل واحد يروح بحال سبيله لان فعلا طلعنه من خاطري

جاوبتها .. الله كريم نشوف شلون راح تنحل ويه الوضع

كملت كلامي وكلتلها .. اتصلي بيه وفهمي عن الوضع قبل لا يوصل اله الكلام باطل عنج برري موقفج وتغدي بيهن قبل لا يتعشن بيج

ما قبلت بس اني لحيت عليها وقنعتها تخابره وفعلا اتصلت بيه وظلت تحجي وياه وهو تفهم وضعها

...............................

سولين

جنت اني وياه كاعدين بالغرفه جان يسولف ويايه وهو يكول .. باجر يسوون الفحص الطبي بالطب الشرعي لهدى حتى يشوفون اذا اكو بصمة داخل الرحم لو لا

وكذلك ملابس مصطفى اخذناهم حتى يتم تحليل اذا اكو فعلا اغتصاب من خلال الاثار الي تكون بالملابس يعني مثل يكون السائل المنوي الي يدل ان مصطفى يكون بحالة استعداد للاغتصاب او يكون ادعاء باطل

رديت عليه .. هو ادعاء باطل شي اكيد لان اول شي مصطفى ما بيه زلغ ولا بيه شخط ولا قميصه مشكوك عيني مثلا هي مو لازم تكون بحالة دفاع عن نفسها اشو ما شفنه هاي الاثار

رد عليه .. اي وهذا الشيء حتى مذكور بالقرآن بسورة يوسف بقولة تعالى ( وَإِن كَانَ قَمِيصُهُ قُدَّ مِن دُبُرٍ فَكَذَبَتْ وَهُوَ مِنَ الصَّادِقِينَ ) وهذا هم دليل قاطع

يعني اكيد جذابه لا قميصه مشكوك ولا وجهه مشخوط بس شنو النيه من سالفتهن هاي وليش يردن يتهمنه باطل مع العلم يعني هن يحبنه وماخذته ام ماهر يعني مو معقوله بس تريد تتزوج منه اكو غايه بداخلهن

جاوبته .. والله ما اعرف الله اعلم بعد اشو هن مو أمان ولا ينحزرن

كال .. هو اني حققت وياه ومن خلال التحقيق هو مبين ممهتم للسالفه ابد بس هو ضايج شلون يسجنه ساهر وجان صاحبه بس خلي يتأدب لان مصطفى مو مؤدب

جريت نفس وزفرته .. ان شاء الله يارب يطلع الفحص الصالح اخوك ويربح القضيه

كال بنعاس .. يله حبيبتي اني راح انام شويه وكعديني حتى اطلع اروح العايد عندي شغل وياه

رفعت اصبعي بتهديد .. احلف شغلك ويه عايد مو ويه سالي ؟

ضحك وهو يكول ... ههههه سالي انفصلت هسه صار شغلي ويه عايد

رديت عليه بقهر .. والعباس جذاب لا مفصوله ولا شي اعرفك تضحك عليه

ضحك ولف راسه ونام تقريبا ثواني وشخر واني تخبلت ظليت اريد اكعد بيه بس ما كعد مات الرجال

عفته وطلعت برا شفت زهراء كاعده ومرة ساهر الجديده كالت لام سجاد .. اني حامل بعد ما اشتغل وياكم تعذروني لان حامل مو مال شغل

ردت عليها ام سجاد بغضب وهي تكول .. هو منو مقشمر عليج وكلج محبلج السلطان سليمان وكاعده بالحرملك

جاوبتها سهى بغرور وهي تكول .. اييي بالنسبه اليه ساهر هو السلطان سليمان اوك ماما

تخبلت ذيج وهجمت عليها وملختها من شعرها سحلتها سحل وكب العياط والصريخ وزهراء كعدت تفرغ بيهن هي و وجيهه

وسجاد هجم عليهن بسجينه كسرها اربع وصل هو مو يسكر ما يدري بروحه يصير قوي فهن خلن وانهزمن منه

هاي كلها والاشتر نايم ما كعد ما اعرف شبيه هذا الرجال من ينام لو يجي جدي من الگبور ما يكعد رجعت نمت بصفه حتى باجر هو يروح للمحكمة ويقررون شنو الي يسوو

الصبح كعدنه هو شفته كاعد قبلي جان مبدل ولبسه واناقته حيل حلوه فعلا يلوك اله المحقق السري جعل محد يحقق غيره

عدل رباطه وهو يكول ..الله شكد حلو من اصبح بملامح وجهج اللطيف

ضحكت كتله .. ما كعدت من كلت فد شويه اطلع تعرف ليش لان اعرفك تريد تطلع ويه سالي لهذا السبب خليتك نايم اوووي فدوه ماكو هيج حيه مثلي كيوت

ضحك وهو يكول .. ههه عادي يابه فداج يله بدلي حتى بطريقي انزلج للجامعه

رديت عليه بانزعاج ..لا ما اروح اليوم غايبه لان ما عدنا امتحان شعندي رايحة واصلا تعبانه

كال .. اوك لعد حظري نفسج اخذج يم اخواتج

هزيت راسي برفض.. لا عيب من زهراء وهماتين كالت زينب اليوم اجيكم يعني حنجتمع

باوعلي بشك وخوف كال .. اخاف عليج من ذول الانذال اخاف يستفردون بيج

ضحكت .. ههههه هو منو حيظل بالبيت اشو محد موجود بس وجيهه وجناينها ما اعتقد تسوي شي وسجاد وهدى وساهر راحوا للمحكمة من الصبح ما يجون الا وياك بعد منو يضرني واخواتك ويايه هم لا تخاف

تقرب مني وباس خدي وهو يكول .. ديري بالج على نفسج وبس تخلص قضية مصطفى محظرلج مفاجئة تجنن مثل وجهج الحلو

لزمته من ايده .. شنو المفاجئة

رفع حاجب بعدم رضا وهو يكول .. مفاجئة مفاجئة

طلع من البيت واني رحت سبحت وغسلت طلعت تريكت اني وزهراء وظلينه ننتظر زينب تجي بس تاخرت وما اجت

راحت زهراء سبحت وسبحت جهالها

جنت امشي بالبيت واعرج برجلي وزهراء اخذت جهالها ودخلت جوه توكل بيهم

طلعت للحديقه واني اتمشى بيها اثار انتباهي مثل السرداب او مثل اشكله عجيب ومحترك مبين صخام الدخان بيه وهاي اول مره اطلع وامشي بالحديقه بس هذا المكان معزول وصاير لوحده والباب مالته صغير ومزنجر

تقربت اكثر وانتابني الفضول تجاه هذا المكان وصلت عنده و وكفت عن بابه الرئيسي

مديت راسي من رازونة الباب دا اشوف شنو داخل هذا الزاغور او السرداب

بعدني دا اباوع واشوف المكان مظلم ما بيه اي اضاءه بس عاكس عليه نور الشمس وكذلك ما مبين منه شيء

حسيت بشي ورايه عطت وصرخت بصوت عالي لكن انكتمت انفاسي بس ما قيد مقاومتي وسد حلكي

همس وهو يكول .. شعندج هنا

جنت مصدومة وخايفه ارجف من الرعب والقلق الي صار بيه بحيث انكتمت أنفاسي ودموعي نزلت وتبللت اهدابي اني ما بجيت بس من كد ما خنكني حسيت الغدد الدمعيه انتفضت وظلت تنزل دموع

رصني على صدره وهو يحجي من بين اسنانه كال .. ابيتج ليلة هناا اخليج تطلعين حليب امج من خشمج

ردت ادير وجهي عليه ارفس برجلي عليه بس ما كدرت ردت اشوف منو هذا ما كدرت

ضحك بخبث وهو يكول .. على يوم انومج بهذا السرداب ادفنج وانتي عايشة يا مرة الاشتر لان انتي ورجلج حيل طغيتوا انتم مو مؤدبين انتم حقراء ويستاهل يحترك گلبه عليج يا نذله

بلعت ريكي واحاول اوخر ايده الخشنه من وجهي بس ما مدا اكدر مسح على وجهي بيده بسخافه وهو يكول .. حلوه انتي هنياله متهني بيج

رفست برجليه اكثر واحس مثل السجين نبتت بظهري للحضات ايقنت ان هو ضربني سجين نبتت بضهري

حرر حلكي ولزم راسي حييل وكتم انفاسي بالحايط وهو يكول .. هذا السرداب بيه ذكريات هواي عاقبت بيه اخت الاشتر وامة هواي بيه سوالف وكل هاي وهو ما تاب مني بس اذا كسرت كلبه بيج اكيد راح يمشي عدل

صرخت بصوت عالي واني استنجد بالاشتر ... اشتررررررر تعال تعاااال

سحبني من راسي حيييل ورجع ردمني بالحجر الموجود بالسرداب بحيث ماكو ثواني هواي واحس الدنيا كلها صارت ظلمة بعيني وفقدت وعيي بس احس بشي حار نزل على وجهي وخشمي

..........................

صفاء

رحنا اني والاشتر هناك عند مصطفى طبعا هناك انصدم ساهر ان ياخذون بنته للطب الشرعي ورفض رفض قاطع بس المحكمة اصرت لذلك انحالت للطب الشرعي

اخذوهم بسيارة الشرطة والاشتر جان متواجد مسبقا بالطب الشرعي بحكم شغله وهماتين سالي متواجده هناك

هي قبل لا ياخذونها حلفوها على القران الكريم .. ان هي تم اغتصابها وطلب منها تسولف الحادث

وهي حلفت ان تم اغتصابها باليلة نفسها اكثر من اربع مرات حتى زهكت روحها

اني جنت مصدوم شلون اغتصبها اربع مرات وهو اصلا يعني ما طول من طلع مني وگبت العيطه فعلا شي عجيب وغريب بعد بنت ساهر ما عليها عتب

كملت كلامها وهي تسرح بأدق التفاصيل شلون هددها وهاي مو اول مره يتحارش بيها وسواها كذا مره واخر شي اغتصبها تحت فرض وتهديد السلاح

زين شلون هو مصطفى حتى سلاح ما عنده هاي منين تجيب الحجي انوب ما تستحي باسني وحضني وحصرني تخلي الواحد ينحرف عن الطريق ويفكر بشغلات لا ترضي الله ههه

طلبت اشوف مصطفى شفته كتله .. ولك هاي شو طلعت رومانسي نايم ويه هديوه بكل حب وتفاصيل تجنن طلع مو اغتصاب طلعت ليلة حمره

باوعلي بقرف وهو يكول .. هي هاي شبيها حاميه صدك جذب انوب حاصرها وبوس بيها من حورها حلكها جنه جنطة امي

ضحكت كتله .. لا تخاف حالوها للطب الشرعي وراح يسوون اللازم وراح تبين اذا انت مغتصبها او لا

رد عليه بعدم قبول وهو يكول .. امده حظي اذا فعلا اغتصب هاي النعال هسه تدري بشنو افكر

جاوبته باستغراب.. بشنوو ؟

جر نفس وزفره كال ... افيان درت بالخبر امي كلتلي هاي مرة اشتر هي كايلتلها هسه تفهم غلط انوب افيان ابد مو طفله هسه شيقنعها ان اني مظلوم وراودوني عن نفسي واجو يغتصبوني

ضحكت .. هههههه والله افيان ما تقتنع انت مظلوم لو تروح هدى وتعترف الها والتقرير الطبي يصير بيدها هم ما تقتنع لان هي اكثر وحده تعرف بسوالفك وعربدتك

هز راسه باسى وهو يكول ...اوووف ترا افيان الها فضل عليه سوتني رجال محترم بعد ما جنت دايح وعفطي وابو ملاهي دخلي بس اطلع من السجن الا اخطبها

ابتسمت .. ان شاء الله يارب يتمم الك على خير بس ترا ام ماهر ما تقبل تتزوجها واصلا ما تريدها

رد عليه.. دخلي تولي هي بكيفها صح هي ربتني بس تربية سز ما مسويه فضل عليه شبعت حرام من وراها نسوان وعرك وملاهي ههههههه

ضحكت ... هههه وانت جنت مكيف على هالسوالف

جاوبني بعدم اهتمام .. شمدريني هو اني جنت طفل وهي عندها عادي اجي سكران اصاحب اديح ما تحجي عبالي هالشيء صحيح انوب صرت مدمن على هالاشياء منا لما اجت فافي خلطه غيرتني

اجه الشرطي كال .. انتهت الزيارة واخذه وراح واني ظليت منتظر الاشتر بالمركز

تقريبا ساعتين ورجع شافني رحت عنده كتله ... هااا بشر ابو الشباب ان شاء الله خير

رد عليه كال .. راح يتقدم للمحكمة ان شاء الله التقرير ونشوف بس مبدئيا ماكو شي يدل على الاغتصاب والادعاء باطل اكيد

ظلينه شويه بالمحكمة وطلعنه اول ما طلعنه اتصل موبايله بنغمته المعتادة ...فعَذَّبَها حَتَّى أَذَابَ فُؤَادَهَا وَذَوَّقَها طَعْمَ الهَوَى والتَّذَلُّلِ

جانت أختي زهراء وهي تكول .. اشتر فدوه ارجع بسرعه سولين ماكو اختفت

رد عليها بقلق وخوف وهو يكول .. شنووو شلووون وين راحت هي طلعت من البيت زين احد دخل علينه احجي بسرعه لا تخبليني

جاوبته بسرعه .. محد دخل علينه اصلا كلهم بالمحكمة وهي ما طالعه من البيت جانت بالبيت اني بس رحت سبحت اني والجهال ما لكيتها ادور عليها ردت ماكوو

شفت من بعيد اجه رجل زهراء وصل عدنا  كال للاشتر  .. بس بلا زحمةاريد اجحي وياك

رد عليه بسرعه .. مشغول مشغول بعدين تعال

جاوبها بسرعه وهو يركب سيارته وياق بسرعه جنونية .. يله هسه جاااي جاي

قفل الخط وشمر الموبايل وايده جانت ترجف كتله .. خيير شكووو

رد عليه وهو يبلع بريكة كال ...ر ر رحييق اختفت راح تمووت ماتت لااااا

جر نفس وهو يعض شفته وتنفسه صار سريع كال بخوف وقلق .. ما ادري ما ادري اني شصار بيه ربيييي صبرني دخيلك

وصلنه للبيت ببعض ثواني نزل بسرعه واخذ سلاحة بسرعه دخل يركض عليهم وبيده سلاحةة و وجهه ما يتفسر من عصبيته شاد على شفايفه وكله قهر وغضب

جانن هن كلهن واكفات وزهراء تبجي وتتصل على سولين وماكو

اول ما دخل اشتر وهو يكول ... وينها وييين وديتوها

رجعت بمخيلتي للماضي واني اعيد الذكرى المفجعة بإختي المظلومة من دخل عليهم وهو يكول ..وينها وين وديتوها

جان طفل ما يتعده عمره ل١٥ سنه

ردوا عليه بكل برود وهم يكولون .. حركت روحها انتحرت تلكاها بالمستشفى تجالع وتصرخ من الوجع راح تروح جهنيه لان قتل النفس حرام

جان منهار جان جزعان جان يرجف وما يعرف شلون يحارب وياخذ حقه صرخ بيهم وهو يتهدد والدموع تطفر من عينها مثل شلال من دم .. اختيييي اذا ماتت ما اخلي واحد بيكم عايش اختي اطلعها من عيونك اختي اذا ماتت مراح ارحمكم

صرخت بيه وجيهه وهي تكول .. وشعلينه باختك اذا هي فد وحده صلفه وكح وساقطه وما تسوي سوايتها بس العار جا اكو وحده تحرك روحها والروح عزيزه

لزمت التحفيه وشمره بقوه على الارض وهو يعيييط بيها ... انجبي يا ياقطه يا كواده انتي اصلا مو شريفه انتي الكح ... حركتوو اختي حركتوها لو بينكم وبين الجنه ذنب اختي ما راح اغفر الكم والزمن بينه طووويل طووويل يا بيت ساهررر اني وياكم والزمن طويل

جان ساهر وخاله كاعدين ويضحكون متناسين الوجع الي احنه دنحس بيه

رجعت الواقعي وهو كاعد يهدد بيهم ويكول .. والله اذا هسه سوليين ما طلعتوها هسه احركم انتم وعوايلكم كلكم بهذا البيت

ردت عليه وجيهه بخوف وهي تكول ..والله ما ندري بيها اني صايمة وجنت اصلي حتى ما طالعه من غرفتي

وجهه سلاحه عليها وهو يضحك بحقد ويكول بغضب .. ولج اني ما اعرفج تتعاونين ويه الجن والانس بس حتى تغثيني وتسوين كل شي ضدي كولي ولج ويه منوووو تعاونتي ضدي واخذتوا مرتي

حطت ايدها بخوف كدامه وهي تكول .. وروح جدك ما ادري والله ما ادري بس على كيفك بس وخر سلاحك على يثور عليه بطلقه تايهه ويموتني

رد عليها من بين اسنانه وهو يكول ... طلقه تايهه ؟ من كل عقلج اوديج الجهنم بطلقه تايهه لج ثقي واعتقدي بالقران الكريم طلقه معنونه احطها براسج ومني وافتخر بيها

رجع صرخ بيهن وهو يكول ... احجننننن

ردن كلهن بخوف من اثر تهديد السلاح وهن يكولن.. والله ما ندري ما نعرف وين راحت

ابتسم ابتسامة خبيثه و وجهه السلاح تحت رجليهن وهو يرمي باحترافية تامة  صار مطافرهن ماله والي والصريخ وحتى اختي زهراء كمزت وحضنتني وهي تبجي

اني هم خفت منه مو بس خفت وانما استغربت من افعاله وياهن بس هذا الشي اله مبرر لو لا

دخل ساهر وابنه وهو ضحك كال .. اهااا اي هسه تمام صف ويه الجماعه انت وابنك حتى ما يكولون مستگوي على النسوان يله تفضل

ساهر بخوف انخطف لونه كال .. ليش شكوو شصاير

طك ركبته بإجرام وهو يكول .. مدامتي ماكو مختفيه واني حملتكم المسؤولية كلكم يعني لهذا السبب اريد اوبخكم حتى. تعترفون ويه وديتوها

خو ما اخليكم مثل رحيق لعبتوا بيها لعب ومحد ردكم لاااا قبل جنت طفل هسه اني بالف رجال واطلعها من حلك السبع فاحجوا لا ادفنكم هنا بالبيت واكول اختفوا وانهزموا وانتم بعد بكيفكم

كعد على القنفه وهو يدخن ببرود وسلاحة بيده كال .. يله الكم خمس دقايق اذا متعترفون انتم بعد بكيفكم جهنم ترحب بكم

ساهر رد عليه بخوف وهو يكول .. ما ادري ويين والله

وجهه السلاح عليه وهو يركز بيه وملامحة وكآن تذكر شي تقريبا دقيقة وهو على هذا الوضع حرك الزناد دليل على اطلاق الرصاصه

وكفت وجيهه كدامه وفتحت اديها وهي تحمي كالت ... لاااا لااا لتكتله هو ماله شغل والله ماله شغل هي طلعت اني شفتها طلعت راحت للحديقه يجوز تخربطت يجوز وكعت والله ماله شغل ساهر

وكف وعقد حواجبه وعدل حزامة شد على شفايفه بغضب وهو يتوعد بيها كلها .. بسيطه يصير خيييير خلي الكاها وين وحسابج بعدين

تنفست براحة بعدم ما نزل سلاحة وطلع من البيت وهو يركض بسرعه واني وراه وهو يصيح .. سوليين وين انتي سوليين جاوبيييني

جانت هي مو حديقه هي مزرعه وجبيره كال .. صفاء دور مناك واني راح اروح للجانب الايسر اني ما اكدر اروح من يم السرداب كلبي يوجعني

بللت شفايفي بحيره وجاوبته ... يله خويه تمام هسه اني اروح اشوفها بلكي هناك

وحت اركض وانعثر بخطواتي هذا سرداب التعذيب تعذبت بيه اختي وحتى اني جنت اركض وابجي واحس كلبي معصور كل الذكريات التعيسه رجعت عليه احس كلبي يرجف كلبي تكطع اتذكرتها من جنت اباوعلها شلون محبوسه وتبجي رجفت رجليه واحس كلبي طفر من الحزن والقهر

جان دائما اشتر يذكرها بمنشور بالفيس  ينشر قبرها ويكتب ...
هي ليس طقوس وإنما تعذيب البشر لبعضهم ياترى كم عانت من الخوف والعذاب والجوع والعطش حتى فاضت روحه وعند الله تجتمع الخصوم

وفعلا احنه خصمنا مجتمعين بيه والنه ثار وياه بيوم القيامة

وصلت عند السرداب المظلم الي يحمل كل المآسي والآلام شفتها واكعه والدم ينزف منها و وجهه اصفر وفاتحه شفايفها واسنانها بارزه فاقده الوعيها

صرخت بصوت عالي .. سولييين خويه سوليين شجابج هنا

كعدت قريب منها وسحبتها الصدري واضرب على وجهها اريد اصحيها صحت بصوت عالي ... اشتررر اشتررر لكيت سولين تعال بسرعه

اجه عليه يركض بسرعه مثل سرعة البرق من شافها واكعه نسه السرداب ونسى كل شي ركض عليها واخذها من بين اديه وهو يحاول يصحي بيها ويحجي وياها بس جانت لا حياة لمن تنادي

واختي زهراء جانت واكفه وتبجي وحاضنه اديها لصدرها

اشتر اخذ مرته وراح بيها للمستشفى

بس اني ما رحت وياه ما كدرت اعوف اختي زهراء وجهالها لوحدهم بنص ذول الوحوش

.................................

جاسم

ابوي من بعد ما عرف جيهان غلطت على عمتي ام حسن وهو تشدد من ناحيتها وما استمع الها كال ... ماكو اي تبرير لغلطتها حتى لو ام حسن غلطت وياها بس لازم تتعلم احترام الكبير واجب ولازم تتأدب وكريم لازم ينفصل عنها لان الي تتجاوز على اهلي تتجاوز عليه وهسه بين معدنها واصلها

خالرني كريم مناك وافتهم مني الموضوع ورد عليه .. ترا هن يرحن الجيهان ويخبلن بيها يعني شتريد مثلا تستقبلهن بالاحضان اذا هن دايسات بمصارينها على العموم اجي واتفاهم ويه ابوي

وفعلا صار اليوم الي اجه بيه كريم اول يوم ما حجه وياه ابوي بحكم جاي من شغله وتعبان وما اله خلك بس ثاني يوم جانت العائلة كلها مجتمعه وهو حجه وياه كدام الكل

كله وهو يقبض على سبحته .. بويه كريم انت تعرف اني وافقت على جيهان و وافقت على زواجك منها بس بصراحة انصدمت بتصرفاتها واني ما ارضا واحد يذل اختي ويغلط عليها وهي مره جبيره وشيباتها بيض

رد عليه كريم وهو يكول ... يابه جيهان لو غلطانه اكص لسانها واعرف شلون اتصرف وياها بس انت سمعت من طرف واحد وهي دائما يسوون وياها مشاكل ما تحجي واكيد غثنها حتى حجت واستنزفت طاقتها لهذا السبب يمكن تكون غلطت بكلمة

كلمة وحده تشددتوه عليها وهي شكد تحملت كلام وشكد تحملت اذيه بس محد منكم نصفها

وكف ابوي بغضب وهو يكول ... افاااا تدافع لمرتك بعدك ما شفت خيرها من شرها يا حيف ويا وسفه عليك يعني انت ترضاها على عمتك الربتك وكبرتك تغلط عليها وما ترضا على مرتك

جر نفس وزفره وهو يكول ..يابه مو هيج بس اني ويه الحق والحق ويه مرتي اكثر من مره يسوون بيها سالفه وتسكت واكلها اسكتي بس كافي طفح الكيل ما يصير هيج يعني هسه اذا تزوجتها هم تظل هاي المشاكل ؟

رد عليه ابوي وهو يكول .. انت ما راح تتم زواجك انت راح تفسخ الخطوبه  وحالا لان مستحيل اقبل بيها جنه وهي غلطت على اختي واذا ما تطلكها لا انت ابني ولا اني ابوك تطلع من بيتي وحتى البيت لبصفي ما تكعد بيه

لحظات من الصمت وبعدها رد عليه كريم وهو يكول ... ما اطلكها

جانت صدمة للكل حتى لابوي كلها .. افاااا عادي عندك تتخله عني وعن اهلك لخاطر مره

رد عليه كريم وهو يكول .. احبها ما اكدر اكسر بخاطرها واني اعرف مو منها السبب ولا ذنبها ما اطلكها مرتي اريدها

ابوي كطع كلامه واشر للباب كله ... اطلع برااااا

اخذ سويجة وموبايله بس حسيت بحزنه وقهره وطلع برا

ركضت وراه واني احجي وياه .. كريم كريم اوكف وين رايح لا تسويها كلش ابوي شويه وتروح منه العصبيه انت بس لا تعاند ولا تسوي هيج لا تخلي يتشدد من ناحيتك

ضحك بسخريه وهو يكول... ابوووك متروس راسه غل وحقد لا احترمني ولا احترم قراراتي واني صار لازم ابتعد واكون بعيد عن الكل ودام ما يردون مرتي وما يردوني

لزمت ايده وتنهدت بحيره .. زين هسه انت وين راح تروح يمعود

رد عليه.. ااجر شقه او اكعد بفندق منا لمن الله يفرجها واشوفلي بيت بس راح اتعبك وياي شويه اريدك تجيبلي اغراضي وملابسي ومن اخابرك تجيني

نفخت بضجر.. والله يعز عليه اعوفك تروح هيج كريم كول يا الله وحاول تفهم ابوي ترا ابوي يتغير بسرعه بس تفهمه بس انت ما اعرف شبيك قافل

هز راسه  برفض وهو يكول ... لا هو من زمان وكل شويه وهددني ودام طردني من البيت بعد مستحيل ارجع للبيت لو يصير هسه بيت من ذهب اني انطرد كدام اليسوه ولما يسوه كدام حنان ربعها

تركني وراح ركب سيارته وما اعرف وين راح ظليت بقلق عليه خابرت على جيهان سألتها عنه كالت .. لا ما اجه ولا شفته ليش صاير شي

جاوبتها .. لا ماكو شي بس عبالي اجاج

قفلت الخط منها وظليت اتصل بيه بس مجاوبني ظليت بقلق عليه وين راح هذا هم ارعن حسره واحد يحاجي ولم چوالاته وانهزم

..........................

افيان

اسمع الباب تتنفتح ورا شويه واباوع طبت السلعة
عامر طب مكشر وجهه طالعات سنونه صفر باوعلي بنظرة فرحان ومتونس.

صارله فترة ماكو والحياة حلوة بدونه صراحة
انقهر مرات اكول هيج هم ينحسب ابو عليه.

صدمني من فتح الباب على عرضه وهو يكول فوتي فوتي برجلج اليمنى البيت بيتج.

فتحت عيوني على اوسعها من دخلت وراه وحدة مدري شلونها 

طلعت جيهان مصدومة وتطل وعين عليه وعين عليهم

باوعتلي المرة الي ويه ابويه وابتسمت وبينت لثتها كلها من خلال ابتسامتها
وحركت كتفها تفتح عين وتسد عين مدري شبيهه.

لابسة بشت وردي وبي جلد النمر وحاطة حمرة تلمع لونهه احمر وظل اخضر على جفون عيونهه 

اخذهه ومشى بيها  وبيده علاكة واني بقيت فاكة حلكي ممستوعبة الي صار كله وجيهان مثلي

معقوولة وصلت لهل مواصيل تجيب وحدة استغفر الله للبيت وكدام بنتك وابنك يربي بلحظتهه تمنيت سجينة وانبتها بظهره واخلص منه ومن عاره اي والله كون ارتكب بي جريمة شرف

حسيت على امين يسحبني من ايدي
باوعتله كتله هااا شتريد

كال بذهول  فافي فافي  منو هايه وشسوي ويه بابا
وخله اديه على خدوده عود مصدوم.

واني ماعرفت شنو اجاوبه كعدت الدم يغلي بشراييني
وكل شويه اطل على باب غرفتهم وهمات اسمع صوت الضحك جاي من غرفتهم انقرفت كون هسه تنكة بانزين واكلبهه من جوا باب غرفته ومااخسر عليهم بس عود شخاط واحد

استغفر الله اني منين اتلكاهه من مصطفى ابو النسوان العار الساقط لوو من عامر خرااب الدهرررر.

رحت غسلت وجهي بمي بارد راح اعجز من ورااا هالضيممم ياربي شلوون بيه هي حصلت يسووي المنكر بالبيت المايستحي

سمعت صوت الباب انفتحت رحت نشفت وجهي وظليت اطل عليه وشفته طلع من الغرفة لازمها من ايدهه وهي جانت شامرة الشال على جتافها والمكياج نص باقي نص ممسوح والكحل سايل دققت بحواجبها داكتهن بس مو عدل كون الزمها وانتفهن يطلعن بيدي يخبلن

ركعت كصتي هسه أني بيا حال دااشووف البلوى المصيبة الي جايبهه النه خراب البين شفتهم كعدوا بالكاع يكرطون كعك هي وياه

هو شافني جايه باتجاههم كال تعاي بويه افيان سلمي على امج الجديدة تسواهن اني تزوجت  

امج الجديدة !!! تسووواهن !!! هي تسوووى منووو هااايه منووو !!!

لااا مستحيييل شفتها كاعدة وتباوع عالبيت وتتبسم وامين واكف صافن وعامر يصيحله تعال باباتي سلم على امك

لا والله تخسي هايه تصير امي وتاخذ مكان امي مستتححيل

شوون عصرة انعصر گلبي عبالك شي يتأكل بي اريد ابقى واكفة على طولي وماانهار ماما اشتاقيت الج والله معقوولة هاي تاخذ مكان امي معقوولة شفتها تكرط بالكعك مثل الي مشايفة

نهاية البارت ... يتبع

كونوا انتم كونوا بخير ... احبكم 💔

نور سمو العراق

لا تنسوا التصويت والمشاركة بكم نكتمل❤️