رواية #وكر الأشتر الفصل السادس والعشرون 26 - بقلم الكاتبه سمو العراق

بارت الرابع والعشرون
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔

الصديق المزيف كالظل، يمشي ورائي عندما أكون في الشمس، ويختفي عندما أكون في الظلام.

بارت هديه

غلسوا على السحك بالبارت 🥺
............................

سولين

الصديق هو اقرب شخص بعد الاخ ومن يتغير هذا الصديق ترجع تحاسب نفسك ترجع تعيد الماضي وحساباتك شنو الي صار وليش التغيير وبعدها نتأكد ان بالحقيقه هو مجان صديق وفي ونحس بالغدر من ناحيته

بعد ما احتظنتها وبسته وضميتها الصدري جان اشتياقي الها مثل اشتياقي الاخواتي بس انصدمت اخواتي من اجن عليه يبجن ويبوسن بيه و واضح الاشتياق والحب عليهن عكس كوثر جانت ردة فعلها بارده او اصلا حسيتها انصدمت

ضحكت بفشله وباوعت للبنيه الي بصفها كلت يمكن شكلي متغير وما عرفتني كلتلها بتوتر .. اني سولين كوثر ممشتاقتلي

ابتسمت وردت بارتباك وهي تحظني .. حبيبتي سولين عمري شكد مشتاقتلج شلونج

مسحت دموعي واني اجاوبها ... الحمدلله بخير

كالت .. اي شنو منو جابج ليكون انهزمتي من زوجج مثل ذيج المره

بلعت ريكي وتعصبت بس ما بينت الها جاوبتها بضحكة متوتره .. لا لا هو جابني هو كال اخذج لبيت جدج كهلان

ردت بغضب .. ومنين يعرفنه هذا المجرم تسولف عليه رنا تكول مبين مجرم وعصابجي عفيه ما نريد علاقته اخاف يكتل اخواني

بهتت روحي من كلامها وحسيتها صوبتني بگلبي هزيت راسي بنفي .. لا الاشتر مو هيج هو مو مجرم

باوعتلي بشك كالت .. هسه عوفينا منه هاي ايـــــــــو خطيبة اخويه كريم

باوعتلها البنيه ما شاء الله حلوه ومرتبه لابسه عدسات رصاصيات ومخليه مكياج مديت ايدي سلمت عليها وهي كذلك سلمت عليه وراحت كعدت

لزمت ادين كوثر بحماس .. لج كوثر مشتاقتلج لج ونبي دوم افكر بيج شنو وين وصلتي بالدراسه

ضحكت كالت .. ونبي اني الاشوق هماتين دوم افكر بيج واسولف بيج بالزين حتى ايـــــــــو دكول انتي هوايه تسولفين بسولين هالكد تحبيها

حضنتها واني ابوسها .. عمري والله جنت متوقعه مناسيتني واكيد تخبلتي لان اني مدخلت جامعه وتزوجت

ردت بحزن .. اي متت من القهر بس خرب بيج غير عليج حظ رغم مشاكلكم والتصحيح نصفج وما نصفني بحيث معدلج بالثنانينات واني ستينات

اختفت ابتسامتي من كلامها وجاوبتها .. بس لا اني جنت اجاوب انتي ما جنتي تجاوبين ودائما من نحل الاسئلة اصحح الج الاخطاء تذكرين

ردت بعدم قبول .. اي صح عوفينا من هذا الموضوع تعالي ادخلي جوه

دخلنه سوه واني اضحك فرحانه بيهم كالت .. ادخلي الغرفتي لا تطلعين منها بين متروح ام ايـــــــــو

عقدت حواجبي باستغراب.. ليش ؟

كالت باحراج .. لا هيج ماكو شي بس ام  ايـــــــــو شويه من الطبقه الراقيه وتنقد وانتي معرف احسج ذبلانه

صفنت عليها ثواني واحس عقلي طار من كلامها شديت على شفايفي بغضب ... انعل حتى ام ايو شنو جاي اناسبها لو جاي تخطبني شدخلني بيها

ضحكت .. هههه لا ولج مو قصدي بس دا اكول يعني وجهج تعبان فاريدج ترتاحين اخاف تعبانه

جاوبتها بملل .. اي والله مالي خلك اروح اكعد بغرفتج بس اكولج اخواتي وين مو عساس عندكم

ردت عليه .. اي يرحن الصبح يجن باليل هيج جيهان طلبت من اخويه كريم

تنهدت .. اوووي فدوه العمرها جيجي شلون مشتاقتلها

كالت .. اي جيهان فقيره بس اكولج بصراحه واريدج يعني تحجين الحق افيان حيل مستهتره وطالعه عن الطريق حاولي تأديبها وتحجين وياها ترا هي كبرت مو صغيره

عقدت حواجبي باستغراب.. ليش شكو شمسويه

جاوبت .. والله لسانها شطوله ابد ممتربايه لج ترزل عمه ام حسن تعاركت ويه ايـــــــــو انوب كل شويه مشكلة

هزيت راسي بقبول ...يله ان شاء الله من تجي احجي وياها هي صح لسانها طويل بس متاذي الا الي ياذيها خلي تجي واشوف شبيها

سدت الباب وهي تضحك واني باوعت الوجهي بالمرايه والله حقها كوثر دكول لا تطلعين للمره صايره جني حيه صفره اخوووف

مخلصتها بجي ولطم صار تلث ايام كله بسبب الاشتر انوب شلون عليه سمعه بين عمامي عصابجي ومجرم هسه انوب بس لا يطلع ارهابي

نزعت الحجاب شمرته على الجربايه ونزعت النعال ونمت حتى بالصايه احس صار سنه ما نايمة هو اني من انام بس اتفزز اخاف منه اخاف يقتحم عليه الغرفه وهماتين اخاف من ساهر وتحسين والشله العفطيه

احس نفسي مو نمت احس نفسي دخلت بغيبوبه واول مره انام براحة من دون شد اعصاب

............

جيهان

بعد ما عمو وافق نروح للبيت الصبح ونجي المغرب او باليل خطيه جان هو يجيبنا ويرجعنا بس حاليا عنده دوام فجاسم هو ياخذنا ويجيبنا

من يطلع الصبح للسنتر ياخذنه للبيت ومن يعزل يرجع يتخذنه شكد حباب كون رنا تقبل بيه والله حلو وحباب ولطيف بس رنا مدري ليش متحبه

اول ما وصلنه للبيت وافيان طلعت علاكتها وجابت سطل حطت بيها كريمات توبشيرلي وكريم نستله  ومرطب وعصارات درمودين وبتنوسام وسوبر روز وكريم السنبله وكومة كريمات

كعدت وفرغتهن ولزمت خاشوكة وتخلط بيهن وعبتهن بعلب صغيره تبيع الخلطه بخمسه سفطتهن وظمتهن

كلتلها .. لج خاف تخرب وجوه النسوان غير كون مجربتها

جاوبتني بملل .. اوووي شكد تحجين وتعلقين بابا جربتها جربتها خليتها على رجليه وصارت بيضه وهم جربتها بوجهه حنينة العگربه مرة جدي و وجهها صار كزاز

عفتها ورحت واجت النسوان تحف كعدت اني احف وهي تصبغ وتحجي وياهن .. يااا غير اكو وحده  تجيني مناك تاخذ مني خلطات وبيتهم بعد عن بيتنه ساعه كاملة دكول شنو من خلطه صفت وجهي تصفي اخذت خمسه خاف اخلص

كتمت ابتسامتي شكد جذابه هي هسه خبطتها شوكت بعد اشترت منها خمس خلطات

كلتلها المره .. يعني صدك خوش خلطه

جاوبتها بحماس وهي تعض شفتها باعجاب.. تجنن جيهان تستخدم منها شوفي وجهها شلون صافي وابيض

فتحت عيوني مصدومة من كلامها عزا شكد جذابه اني شوكت خليت

جاوبنها النسوان .. ها اذا هيج انطينه خلطات

باعت بيهن عشر خلطات على خمسه حصلت تقريبا خمسين الف وحفينه وصبغنه ما شاء الله خير من الله  حصلنه تقريبا ميه وخمسين الف

جمعتهن كالت .. جيهان اخيتي تردين شي بنفسج شي اشتريلج من اروح فدوه لهالشفايف الاوربيه

ضحكت ... لا عمري ما اريد خليهن عندج

كالت بتفكير .. اكلج لازم نظم فلوسنا بمكان امن او عند شخص امين اخاف باجر عكبه يطلع عامر من السجن ويروح تعبنه على الخالي بلاش

جاوبتها بتفكير .. اي والله حرامات ظهرنا مكسور من الصبح لليل ويجي على الحاظر ياخذ الفلوس خلينا نفكر وين نخليهن

ردت عليه بحماس .. نخليهن عند نسيبنا الكفو تعرفين ليش لان هو مبين قنوع مو مال ياخذ فلوسنا واذا اخذهن تهد عليه سولين الحيه تبزعه بعيشته وتجيبهن تجيبهن وبعدين هو الوحيد الي عامر يخاف منه ومستحيل يجبره ينطي فلوسنا لذلك نسيبنا هو البنك الامين لفلوسنا شنو رايج

ابتسمت على كلامها .. تمام خوش كلام نجمع فلوس عنده

كالت وهي تحسب بيهن بعد ما جمعت البقيه .. باعي هاي ميتين الف واحنه كل فتره نجمع وننطي حتى من تكمل الفلوس نسوي بيها عمليه الج

جاوبتها بدهشه ونفي وروحي حزينه عليها لان تعبانه خطيه .. لا هذا تعبج ما اقبل عوفي العمليه هسه اني اجمعهن لوحدي

باوعتلي بقرف وعدم اهتمام.. خاب دنجبي لا تبيعين ثكل براسي اهم شي عدنا العمليه نسويها واكلي نعل

عقدت حواجبي بعصبيه ... ترا اني اختج الجبيره شكو تغلطين عليه انتي متستحين ما عندج تربيه

ردت بخبث .. تربية عامر شتترجين مني ههههه

ضحكت على كلامها بعدها بدلت الامين وانتظرنه جاسم يجي حتى ياخذنه صدك هو صار اليل واخذنه ركبنه بالسياره وهو يكول .. سولين عدنا تدرن لو لا

فتحت شفايفي بدهشه والفرحة نزلت الاعماق روحي .. صدك منو جابها سولي مشتاقتلها

كال .. اي جابها زوجها خابرتني كوثر وكالت

باوعت الافيان واني اضحك وهي ضحكت ... يمه فدوه النسيبي الكفو جايب اختي يونسها لو هيج الزلم لو بلا احبه احبببه ابو طبره العلم

ضحك عليها جاستن وبعدها وصلنه نزلنه من السياره لكينه البيت فارغ بس حنان تحوس بيه وهالايام متصاحبات حنان وافيان صايرات دهن ودبس وحده متفارك الثانيه وثنينهن كلاوجيات

جدو مو هنا راح للعمره وحنان مرتاحه منه ومتصاحبه ويه افيان لان فافي تكره ايـــــــــو و وحده تنافق للثانيه

دخلنه لكينه سولي هسه كاعده من النوم وحالتها حاله ورنا حاظنتها وتبجي وتبوس بيها وهي تبجي ويه رنا طبعا رناوي ماكو مثلها كلش طيبه وحبابه

كعدنه يمها بعد ما سلمنه عليها وحظناها جانت متغيره اكثر من قبل كوثر جانت كاعده رجل على رجل من شافتنه خلت وراحت طلعت وهي تخابر بايو

سولين جانت كاعده ورافعه شعرها كبايه ليفوك وخصل من شعرها نازله بأهمال ومبين التعب على وجهه سالتها بخوف .. سولي حبيبتي شبيج اشو متغيره

لزمت راسها وحكت شعرها بوجع كالت .. عندي شقيقه

اشرت الها افيان على رگبتها .. هاي منو عاضج

ردت بحقد .. عدنا جلب بالبيت عضني

ضحكت افيان .. ههههه نسيبي ماكو غيره

باوعتله سولي بقرف ودارت وجهها وافيان ماتت ضحك كرصتها سولين .. انتي صايره متستحين لج على شنو تضحكين

ردت بطفولة .. اوووي راح اصير خاله فدوه باعي من هسه النونو اخذه الي اني اربيه

سولين .. اي هذا هو ربحنا وبعدين لا حامل ولا شي واصلا هاي مو بحالة رومانسيه هاي كفخات من زوجي العزيز

رنا تعصبت .. يكتلج

جاوبتها سولين بعدم اهتمام.. مرات مو دائما

رنا بغضب .. يا خسيس يا نذل والله لو يدري حارث يلعب لعب

افيان طبعا صافه ويه نسيبها عنصريه كالت باستنكار.. على شنو حارث يلهب لعب وبعدين اختي واعرفها الله اخذ من طولها وعوض بلسانها زين من الرجال ومتحملها حييييه ما تنحمل

كفختها سولين على راسها .. خو انتي دومج صافه ضدي وتكرهيني

جاوبتها .. اي تعلين الگلب رجال اكسبه اتعلمي تكسبي تعالي شوفي النسوان ظالات يضحكن على الزلم وانتي مجلوبه

باوعتلي سولين بقرف كالت .. سكتيها مني

كرصتها .. لج اسكتي وعوفيها متشوفين البنيه حالتها تعبانه اسكتي

ردت بانزعاج .. اوووي اروح اكعد يم حنونه مرة جدو افضل

خلت وراحت ورنا راحت وراها كعدت يمها حجيت وياها بهدوء .. حبيبتي شبيج ليش هيج متغيره

حظنت وجهها وهي تبجي بجزع كالت .. تعبت جيهان تعبت تعبت نفسيتي والله مليت

مسحت دموعها وجاوبتها .. ليش سوالج شي اذاج بشي

بلعت ريكها والرجفه واضحة عليها كالت .. ما اعرف شنو اوصفه غريب عجيب ما اعرف عنه اي شي غامض وجان شاهد على قتل امي ترا والله محد تقبل تعيش وياه بس اني مجبوره

بستها وحجيت وياها بسياسه .. ميخالف يعمري ميخالف شسوين لعد هذا المكتوب عليج

كمزت من مكانها وهي دكول .. لج هجم عليه لو ما ربج ستر واحد خبل خبل حيييل كسر البيت تكسر الكنتور وكع بالكاع عبالك مضروبين هاون هذا مال واحد يعيش وياه

هذا مثل ابويه هم جان يفلش ويخرب هم مريض نفسي وخبل جنت اتمنى ما اتزوج واحد بيه صفات من ابويه وتالي تزوجت صديقه شكد احاول افتهم منه ماكو غامض غاااامض

حظنتها وبستها ما عندي كلام اكدر اواسيها بيه ما اعرف حتى شلون احجي سكتت شويه وهدئت من روعها

....................

صفاء

كالعاده بالمطعم الفاخر جنه كاعدين وهو منتظر سالي حتى تجي اجت من بعيد وهي تمشي جانت لابسه تشيرت ابيض هاينك وبالطو طويل اسود وبنطرون ثلجي وبوت اسود طويل وشعرها مثل الفحم مفتوح جانت انيقه وجميله بشكل مينوصف

كعدت وهي تضحك ..هلا بالشيوخ

سلمنه عليها كعدت قريب من الاشتر ودارت وجهها طلبت عصير فراوله كالت .. اي اشتر ساهر خسر شغله وتحسين مدا اكدر اسيطر عليه هو صح ياخذ رشوه بس ياخذ برا الدائرة يعني هذا واحد مراوغ دزيت عليه واحد بس قطاه بمبلغ قوي ويريد المبلغ برا الدائره بهيج شي النزاهه مراح تكدر تقتص منه لان خارج الدائرة

رد عليها الاشتر بتفكير وهو يمسح على شواربه .. زين شلون هذا واحد مرتشي ولازم الدولة تقتص منه لازم اكو فد منفذ يخسره وظيفته مثل ما خسرها ساهر مستحيل تحسين يظل بالجنسيه

جاوبته .. هو بالجنسيه يعني صعب تلكه فد حل يوكعه يعني مثلا يطلع جنسيه لواحد متوفي لو شنو

رد عليها بسرعه .. لا لا باعي تدرين شلون جندي فد واحد يصغر مواليده تزوير وخلي يجس نبض تحسين اذا يكدر يرشيه ويقبل بالرشوه هنا تكدرين تخبرين النزاهه بعدين شوفي الولد الي تجندي لازم يكون لاعب كرة قدم مو شرط دولي حتى لو لاعب شعبي او بالنوادي المحليه فهمتي يعني غيرها من النفوس

ضحكت وهي ترد عليه .. افتهمت عيني افتهمت ان شاء الله سهله اعرف واحد ثقه راح اشغله على تحسين

تنهد وهو يرد عليها .. تمام هسه خوش كلام اريده ينسجن

اشرت على عيونها .. بعيني وشسويت على مصطفى سافر لو بعده

نفخ بضجر وسحب جكاره من باكيته كلها ورخا ظهره على الكرسي.. هذا مالج شغل بيه حسابه وياي ابو الملاهي لو يموت ما اخلي يطلع حدود العراق بعد

ردت عليه بثقه .. شوفله فد تهمه بسيطه وطلعه كفاله خلي يسحبون جنسيته وجوازه وبعد ما يكدر يطلع حدود العراق بس ترا لا عبالك ملاهي العراق متروسه كح ..

انصدمت من كلمتها ومن كلامها عن مصطفى وما رضيت بس جنت ساكت

والاشتر انتفض من يمك وطفه جكارته كلها ... لا مصطفى ما اريده يتاذه اعرف شلون اادبه واطلعه مثل الشعره من العجين مستحيل اخلي مصيفي ينضر

ضحكت ... ههههه طبعا هو كولش يشبهك بس انت اضخم واكبر مبين منه

جاوبها .. اي هو اصغر مني عمره ٢٩ سنه راح يصير بس تولع بالفلوس ميخالف عمي انطي فلوس راضي بس خلي يمشي عدل

رديت عليه اني .. مصطفى بعد ما يمشي عدل مصطفى تولع بالحبوب والنسوان والملاهي وانت ما ترضا بهاي السوالف فأكيد ينهزم منك

جاوبني بتفكير ... احاول استرضي خلي اشوف شسوي

سالي شربت عصيرها وسالته .. اي شلونها زوجتك ام لسان

ابتسم بحالميه جاوبها .. راحت لبيت جدها تغير جو

باوعتلي كالت بصدمة ودهشه .. عزا بعينها شكد لسانها طويل ومتستحي دكولي روحي ام الزلم فد وحده لسانها متر

ضحك بصوت عالي على كلامها .. هو شعام عليها غير لسانها الطويل بس اكثر شي احبه بيها لسانها

سالي بعدم قبول .. اي انت تشجعها على الغلط ظاله تتدلل عليك

ابتسم .. خليها تتدلل شعندي غيرها

نفخت بضجر وهو اجاه اتصال وراح كالت .. هيج راح يخبلها وميكدر يسيطر عليها لان هي وكحه وعنيده وهو عصبي عساس يروضها بس هاي همجيه مو مال ترويض بس ما اعرف على شنو ذابح نفسه عليها

جاوبتها بحده .. سولين خوش بنيه وتستاهل الاشتر والاحسن منه

غلست عن كلامي وشالت جنطتها كالت .. يله اني حروح

بعد هي طلعت وراه اني ما شفتها ولا شفته تقريبا ربع ساعه وهو اجه سال عنها كال .. سالي وين

جاوبته .. راحت

هو هم اخذ موبايله وجكايره وطلعنه باوعلي كال .. مشتاق السولين تدري

جاوبته .. روح الها

هز راسه بنفي .. لا عوفها خليها ترتاح مني شويه تعبت خطيه

سكتت مجاوبته بس جان ببالي احجي ويه عن جيهان اخطبها بعدها ترددت لان احس نفسي ممستعد ولا حاظر لهذا الزواج خليني استقر يله افتح الموضوع

............................

رنا

رجعت البيت اهلي واني اغلي من كلام ايو وكوثر بس معقوله كريم يعني طلب جيهان للزواج وجان خجلان ان ترفضه لان هي تصيحله عمو وهو كبير عليها راد كوثر الحيوانه تجس نيضها راحت لعبت بالسالفه

انوب اجتهم سوليين شلون الوضع تخربط عندي خطيه سولين حيل تحب كوثر وتمدح بيها وشفت شلون سولين تتقرب منها وذيج تتهرب منها

عاد اني لزمت سولين وحذرتها ما تحجي شي عن علاقتها بزوجها ولا تحجي اي شي عن حارث وتلزم لسانها كدام كوثر وحتى كدام حنان

سألتني .. ليش شكو شصاير

جاوبتها .. هاي الناس مو امان ديري بالج وبس وخلي من حياة امج عبره الج وابتعدي عن هاي العالم

سكتت مجاوبتني واني قررت احجي لامي عن المواضيع الي سمعتها واخليها هي تتصرف لان بصراحة ما اكدر وحدي ويمكن كوثر تنكر واني ما عندي دليل ضدها وهم استحي من جدو كهلان وبيبي ام حسن

كعدت يم امي وحجيت وياها بالموضوع امي تخبلت كالت .. عود صدك هيج كوثر تسوي لا ما اصدك لو اسمع باذاني واشوف بعيني ما اصدك كوثر تحب سولين وتحب بنات عامر وهي مو بعازه شو مدللة وبنت خير معقوله تغار من ذن المسكينات الي تدولب بيهن الدنيا من كل صوب

رفعت اكتافي بعدم معرفه.. ما اعرف يمه هيج سمعت وترا كريم يستحي ينرفض وهو تعرفين شخصيته هادئ وحباب وما عنده هاي السوالف دزاها حتى ما ينحرج كدام الكل وترفضه جيهان بحجة ان هي تعتبره عمها عود دز كوثر انوب كوثر لعبت لعب بالسالفه وراحت جابتله ايو

كالت امي ... خوش اني اروح واحجي ويه ام حسن واشوف شبيها هاي ويه البنات وعلى شنو صايبتها غيره

دخل حارث كال بحزن .. شكو شبيجن تتبسبسن صاير شي

ردت امي وهي تضحك بتوتر .. هههه لا يمه ماكو شي بس سولين اجت البيت كهلان وتسولفلي رنا

هو فتح عيونه بدهشه وفرحه كلها بتلكئ.. سولين موجوده عند بيت جدي ليش ما تحجن ليش ساكتات

لزمته امي بخوف .. مره متزوجة شكو نحجي عوفها يحارث البنية بذمة رجال لا تصير ارعن

دفع ايد امي بغضب وهو يرد عليها .. ما اعوف سولين الا تموت وادفنها بيدي وبهيج حاله اكطع الآمل وايس مستحيل اخليها تروح من ايدي واكيد انهزمت منه متريده لهذا السبب هي اجت البيت كهلان

هزيت راسي بنفي .. لا مو هيج مو هيج يا حارث زوجها هو جابها وماشيه حياتها وياه ويحبها وتحبه

رد بعنف .. مستحيل سولين ما تحبه مستحيل تحبه وهو شهد على موت امها وامرهم غريب هو وعامر

لطمت اني على وجهها بغضب .. شلون بيه شلووون ولك حارث تريد تموتني تريد تقضي عليه هذا رجل سولين انت مو كده والله مو كده فكنه ومن سولين خلي لبنيه عايشه لا تروح تبهذلها وانوب يموتها مثل ما ماتت امها ارحم حالي يا يمه يا حارث لا تتعبني فدوه العينك يمه

باوع الامي بعدم استجابة وخله وطلع من البيت

ظلينه شويه نتصل بيه نتصل ماكو بعدها كالت .. خابري جاسم شوفي بلكي يمه

خابرت على جاستن اجاني صوته وهو يكول .. هلا بسورها ونورها هلا بالطش والرش والماي المهيل شلونج يبعد روحي

جاوبته بقرف .. حارث يمكم

رد عليه .. اي كاعد بصفي واتغزل بيج هههههه خرب شكد احبج

قفلت الخط بوجهه كلتلها .. راح لبيت جدي سم سولين هناك هسه يكعد ويسكت ابنج الخبل

كالت بحيره .. جيبي عباتي ولبسي صايتج خلي اروح اجيبه واجي لا يجي زوج سولين وتصير مصيبه

جبت عبايتها ولبست صايتي اخذنه تكسي ورحنه بسرعه وصلنه البيتهم لكيناه كاعد هو وجاستن بالصاله

اول ما دخلنه ولاكتني كوثر كالت ... اي ما شاء الله حارث لفه علينه شاف سولين اجت ظل رايح جاي شكد واحد منحط وما عنده اخلاق

رديت عليها بعصبيه .. احترمي نفسج حارث مو هيج واذا اجه شاف سولين بنت خاله واجه يشوفها عيب لو حرام

كالت بحده .. ترا هي متزوجة وهو واضح نيته شنو اكولج هسه زوجها لو يعرف ان حارث يتخشخش على مرته تتوقعين يرضا بهيج شي والله جان دفنه بارضه

احتدت ملامحي من كلامها ورفعت اصبعي بتهديد .. انتي الغيره عاميتج الظاهر من بنات خالي ولان حارث يحب سولين هيج دتتصرفين

باوعتلي من فوك ليجوه وكالت .. على شنو اغار مثلا لا هن مثلي ولا احسن مني

عافتني وراحت وهي تدرم شكد حقوده ومستهتره هاي والله جانت زينه حبابه وتستحي هسه حيل استهترت انوب شايفه روحها شوفه من دخلت جامعه ورافكت ايـــــــــو لحد الان وهي مجلوبه على امة الثقلين كبر حتى كبر

ظلينه كاعدين سولين ما طلعت نايمه كلت هاي يمكن حامل شو مخلصتها نوم من اجت لحد الان

بعدها احنه خلينه ورحنه اخذنه اخويه ورحنه

..................

جيهان

رجع عمو كريم من شغله واحنه صرنه نروح الصبح ونرجع باليل وسولين مريضه متروح ويانه مخلصتها نوم وفافي تفتر عليها انتي حامل والنونو اخذه اني اربي

وكل شويه وتعاركن سولين وفافي ابد ما يتراهمن

رجع عمو كريم نام وكوثر رجعت من الجامعه هم نامت كعدت العصر اشوفها دتتجنبنه وعبالك كاعدين على كلبها

كعدت على القنفه رجل على رجل وهي لابسه بجامة جلد النمر وتشيرت بيجي ولابسه نعال ابو الاصبع وحجل برجلها والمكياج اخر موديل احسه حيل تقلد ايو

عفتها ورحت ارش بالحديقه حيل احب الزرع والحديقه بعدها كعدت على الكرسي وآني اتامل بالاشجار واتذكر امي من جانت موجوده ويانه اني ما اعرف ليش معصور كلبي عليها احس هي بگبرها ممرتاحه ابد ممرتاحه لان دا اشوفها متعذبه صرت اصلي الها وادفع صدقه جاريه الها  بس دائما اشوفها بحلمي متعذبه

مسحت دموعي ودا اكوم شفت كوثر تخابر كعدت بوسط الظلام وما تحركت

سمعتها دكولها .. لا حيوان حقير لج يركض وره وحده متزوجة وكاعد وساكت قبل مجان يلفي ولا نشوف وجهه

اردفت بحده .. ادري بماهر يحبني ومستقتل عليه بس ما اكدر اني گلبي عند غيره وانتي تعرفين كولش زين

نفخت بضجر .. اي اخذت بنصيحتج ما اطير طير بضباب هو حشتغل على الصفحتين على ماهر وعلى هذا الثاني الحقير اشوف وين تصفى حياتي

بعدها ضحكت ... ههههههه هو اني اراسل بماهر واشتغل على حارث

انصدمت هاي شدتحجي شنو ماهر شنو حارث ايـــــــــو شنو قضيتها وشدتعلمها من سالفه هاي كوثر شبيها تخبلت

بعدها حجت .. زين اكولج شنو رايج اراسل زوجها اكوله احفظ عرضك يعني هيج اكتب رساله وهميه ابين اله ان عرضه بخطر حتى تنزاح من طريقنا لج ما ادري من اشوفها مدري شيصير بيه

حسيت اكو فد شي يمشي بالعشب بسرعه كمزت وطلعت هي انرعبت من شافتني قفلت الخط وسبحتني من ايدي كالت .. انتي شدتسوين هنا

رديت عليها بارتباك .. مدا اسوي شي جنت اشتم هوا

باوعتلي بقرف كالت .. سمعتي شي

عفتها ومشيت .. حتى لو سمعت مو مهمه عندي

دخلت جوه بسرعه دخلت من المطبخ انضربت بعمو رجعت خطوتين رفعت راسي بخجل .. العفو عمو مشفتك

رد باستنكار .. كل هالطول ومشفتيني هاي شلج بيها

ابتسمت .. والله مشفتك جان موضوع ببالي

حط ايده على الحايط وهو يركز بيه كال .. ومنو شاغل بالج

هزيت راسي بنفي .. محد بس هيج يعني ميصير افكر

جر نفس .. لا عادي فكري بس كولي شلونج مرتاحه هنا

ابتسمت .. الحمدلله مرتاحه اكيد شكرا على سؤالك

اجيت امشي اعترض طريقي كال .. اريد اسالج سؤال

بلعت ريكي بخوف وخجل .. جواب

ديسال ودخلت افيان كالت ... هلا بعم جيهان شنو انت تنبل مال نوم

دار وجهها عليها وضحك كلها .. معقوله انتي اخت جيجي اشو جيهان كوه تحجي وانتي عبالك بالعه مسجل كد ما تحجين

جرت نفس وزفرته .. شسوي يا عمو هيج الحياة تتطلب لازم واحد يداري نعمته واني لو ما هالسان جان هسه طايح حظي وادك والطم والي يعيش ويه ابن عمك عامر ينراد اله لسانين مو لسان واحد

ضحك على كلامها واتصل موبايله خله وراح واحنه دخلنه جوه كالت هي بغضب .. اكلج هذا عمج ليش حاصرج مو جنه مستهتر لو اني دا اشك

خزرتها .. عيب هالحجي ما بينا شي

عافتني وراحت واني كعدت افكر بكلام كوثر كوثر حيل متغيره ولازم واحد يصحيها شنو من خلال كلامها دا احسها تحب ثنين الاول ماهر هذا اكيد وياها بالجامعه الثاني حارث ما عرفته منو الثاني مبين ما يحبها شنو القضيه دخت معقوله حارث ابن عمتي

زين منو الي تخابر زوجها هاي ايـــــــــو داهيه شلون تعلمها حتضيع كوثر من وراها ولو شنو من وراها هي عندها عقل ولازم تفكر بيه خو ما جابرتها ايو

...................

سولين

من ابتعدت عنه هو بعد لا اجه ولا اتصل ولو على شنو يتصل على دبة المي ارو حتى موبايل مثل الاوادم ما عندي

يله مو مهم الحمدلله مرتاحه بس دا اضوج من كوثر احسها نستني ولكت صديق يسد فراغها غيري يعني علاقتها بآيات خطيبة كريم كولش قويه واستغنت عني رغم اني جنت دائما اذكرها وابد ما نسيتها وتفاجئت من برودها ناحيتي وتفاجئت من تصرفاتها

ضجت كلت خلي اروح ويه اخواتي عود هو يجي ياخذني بس شنو اخاف اروح ويطلع ابويه من السجن وابتلي بلوه ابويه حيل يكرهني لان دائما اوكف ويه امي ضده

لزمتني افيان اله احفج جنج كراطة حجار وجهج يخوف وجهه متزوجة انتي ولج والله من نسيبي الكفو اطلكج وابصق على وجهج وجهه نعال

خليتها حفت وجهي وحواجبي انوب رايحة هي وحنان للسوك مشتريه ملابس بس سود لبستني ثوب اسود مخصر وردانه تول مبطن بس خلو خلتلي شويه مكياج كالت ... اييي هسه طلع وجهج جنتي جنج عجوز مطلكة

ضحكت على كلامها صايره احبها جنها اني قبل هسه ما بيه حيل احجي راسي يوجعني

طلعت برا الغرفه كعدت بالصاله كالت  ام حسن .. لا تطلعن عدنا خطار استغربت .. منو هذا الخطار

كعدت شويه واسمع صوت نغمة الموبايل صادره من الاستقبال وهي دكول .. فعَذَّبَها حَتَّى أَذَابَ فُؤَادَهَا وَذَوَّقَها طَعْمَ الهَوَى والتَّذَلُّلِي

كمزت من مكاني ارتعبت لا يمكن انسه هاي النغمه وهاي الرنه ولا انسى كلماات هاي الاغنية هذا الاشتر معقوله الاشتر شجابه

اني صدك غبيه حتى من جابني ما سالته هو منين يعرفهم شلون عرف اخواتي عندهم وشلون اندل بيتهم هذا الاشتر لو جني

ظليت امشي واني متوتره وافرك باديه بخوف وقلق بعدها باوعتله من الباب

شفته كاعد بالاستقبال على التخم الملكي جان لابس ستره سوده وبنطرون اسود وقميص اسود وكريم كاعد مقابيله لابس تراك رصاصي ويسولفون ومندمجين ومرات يضحكون سوه

كرطت اضافري بخوف ورجعت اباوعله شكله جان محترم وهيبه وحظور طاغي على ملامحه ورغم افعاله وسوالفه وعيشته وغموه وماضيه وكل شي بس هو مهتم بنفسه ومدلل روحه ويلبس ارقى الماركات من ساعات ومن ملابس وهذا الشي حابته بيه بس اموت واعرف ليش كاعد بالمزبله رغم اول ما تزوجني جان كاعد بشقه راقيه وبعدها كعدني بنص الطهاره

من شفته ما اعرف شصار بيه كلبي رجف ومشاعري تلخبطت حجيت بهمس .. لا يغرك عمو هذا واحد غدار ومخادع متعرفه شنو

احتظنت جسمي بخوف من اتذكرت اعتدائة عليه حتى لو كان زوجي بس ما متقبلته ولا اتقبل يتقرب مني الا اذا اكشف كل المصايب ولحد الان مكسور خاطري منه ومجروحة ومكسوره حتى صايره هادئة ما احجي مو مثل قبل

خليت ورحت دخلت جوه كعدت على القنفه واجت فافي تركض تصيح .. نسيبي ابو طبرة الحلوه اجه همزين جنت محتاجته

بلعت ريكي بخوف وقلق من كلامها وبعدها اجه عمو كريم وهو يدخن كال .. عمو زوجج بالاستقبال يريدج

تنفست بخوف والرعب دب برجليه ما اعرف شصار بيه بس ما كدرت ارفض خليت ورحت لان اني محاجيه عن الي صار بيني وبينه

دخلت للاستقبال هو جان يطكطك بموبايله من شافني قفله بسرعه وشمره على القنفه وكف وفتح اديه وهو يستقبلني

وكفت بجمود من دون ما اتحرك خطوه وحده واباوعله واتنفس سريع مشه خطوات مني واحتظن خصري باسني بخدودي مجنت متفاجئة منه هو هاي سوالفه

كعد وكعدني بصفه حصرني بين جسمه وبين يدة القنفه حاصرني حصر انوب شكبرة واني طامسه لف ايده على جتفي وقربني منه

كال بصوت حنون .. شلونه الملك

بللت شفايفي بحيره ومجاوبته

نزل راسه المستوى راسي وهو يهمس .. البيت هدوء ماكو هوسه محد يحجي بس مع ذاك حتى الحياطين تبجي مشتاقتلج

ضحكت بسخريه .. اي شفت محد يشتاقلي بس الحياطين كد ما كابلتهن وكعدت

رفع راسي بيده وهو يباوعلي بحب كال .. صايره حلوه هيج بعدي عنج يسويج حلوه

هزيت راسي بقبول ... اي والله شفت شلون مرتاحه رجع حتى الدم بوجهي قابل يمك بس شد اعصاب ومشاكل

سحب شالي مني ولفاه على ايده باسني بركبتي وكفت متعصبه .. هي شنووو شكووو لحد يدخل

جاوب بخبث .. طبهم مرض وشنو يعني مرتي حلالي

كعدت وتكتفت ... روح الجالي خلي تفيدك

ضحك .. ههه لج والله تضحكين انتي جالي شنو لو اريد جالي بدون ثمن ليله اخذها بس مو بالي كتلج شغل بينه وهي هذا شغلها

جاوبته بعصبيه .. شدخلني بيها عسى ما تتزوجها وتنام وياها كدامي ما الي شغل بس خليك واقعي شويه اذا اني على ذمتك خلي الي شويه احترام مو تحرضك عليه وتجيني تركض هاجم عليه

رد عليه ... هسه عوفينه من جالي شنو مناويه ترجعين لبيتج

جاوبته بنفي ... لاااااا ما اريد

باوعلي وهو يركز بنظراته عليه هز راسه وهو يبتسم باسى على كلامي كال .. ميخالف تهونين ظلي جم يوم عند بيت جدج ولو بعدج عني مثل شايب ومضروب جلطة و ولده تخلو عنه

جاوبته بحقد وسخريه .. ان شاء الله

وكف بتهديد واني انهزمت كال .. عقوبتج بوسه نوع تي ان تي على هالكلام

صحت بيه بعد ما رفعت اصبعي بتهديد .. شوف والله اذا تقربت مني اعيط وافضحك كدام عمي كريم

جاوب بعدم اهتمام.. عادي

لزمت ايده ... لا حباب والله بعد ما اعيدها

احتضني وكال بذوبان .. وروح ابوي مشتاقلج

عقدت حواجبي ... ابوك ميت ؟

رد بحزن وبراءة .. اي يتيم اني اتبنيني

جاوبته بنفس اساوبه ..اووي سوده عليه متت قهر عليك بس ما اتبنه مجرمين

اكتفى ببتسامه كال .. يله حظري نفسج نروح

لزمت ايده بتوسل ... لا فدوه حباب خليني والله بعدني ضايجه

عقد حواجبه .. لا لا امشي البيت فارغ من دون

تخصرت بعصبيه .. عساس هو شلون بيت وفارغ بدوني لا تخاف متروس صراصير وجريذيه ميضل فارغ

جاوب ببراءة .. اي بس ناقصنه الحية مالتنه احنه من دون الحيه ما نسوه شي

جاوبته بغضب ..اذا اني حيه انت ثعبان وثعلب ماكر وهسه حباب الله يوفقك خليني بس يومين بعد الله يرحم ابوك ان شاء الله

كال وهو يخلي اديه بجيوب البنطرون .. بوسيني واخليج وكون راضيه مزعلانه عن الي صار

نفخت بضجر وعصبيه .. ما ابووووووسك ما ابوس مالي شغل

كال .. هذا عرض خاص بس الج يعني الجمعه الجايه اخذج بيت اهلج ويومين هنا ماكو هيج تخفيضات وعروض مقدمها الج

باوعتله بغضب .. واذا مقبلت

جاوب بعدم اهتمام .. عادي حظري نفسج ونروح لبيتنا

تقربت منه بسته بخده بسرعه هو مسحه كال .. شنو هاااي هاي مثل الي يشتري سلعه بفلوس مزوره لا بابا ما اريد هيج

تعصبت وعقدت حواجبي .. لعد شتريد

تقرب مني وباس طرف شفتي ابتعد بسرعه ومسح وجهي بثنين اديه كال .. اريدج راضيه ما اريد شي

نزلت عيوني بحزن كتله .. خليني اظل

رد عليه .. ظلي يبويه ظلي ترا ما اجيت اخذج بس اجيت اتطمن عليج وتطمنت صايره صاكة صايره صاكة وسمنانه والمفاتن كبرانه

عقدت حواجبي يا مفاتن

سحبني بعصبيه من ثوبي كال .. شوفي لج هذا الثوب هسه منا ترحين تنزعي شلون ادبسز هنا حاصره روحها ويمي ثوبها يدخلون بيه عشره جنها ارهابيه

ضحكت ... هههههههه لا هذا ثوب فافي هسه انزعه

كال .. اي نزعي بس عادي جيبي للبيت حلو هناك البسي من يطلع صفاء

اردف بقهر .. شكد مسكين اني كل شي ما محصل ظال بطرك السمعه عود هم متزوج مثل الاوادم العرايس يلبسن مشخل وملمع واني تلبس جادر وتفتر عليه وملثمة دكول حرامي مو عروس

ضحكت بصوت عالي... ههههههههههههه خطيه والله كسرت خاطري هم يتيم وهم مظلوم

ابتسم ... اي اضحكي اموت على اسنانج عقد لؤلؤ مو اسنان

ضربته بمزح على كتفه .. يمه لا تحسد اسناني قل اعوذ برب الناس

ضحك وطلع فلوس من جيبه كال .. هاي اخاف تحتاجين شي ترحين للسوك اشتري اي شي وها اذا تردين ترحين زياره ويه بيت جدج عادي روحي واذا ردتي شي مني اتصلي عليه من كريم عندي رقمي

جاوبته بحماس... وااالو تطورات ما عرفتك ولك انت منو

لزم ايدي ولواها كال بمزح .. كوه كوه تطلعين المجرم البداخلي خليني حنين يالمفلوكة وكافي لگافه

اخذت الفلوس منه واني اضحك كال ... يله سوي طريق خليني اطلع

سويتله طريق وطلعت وراه دا احجي وياه وما اشوف اله دخل حااارث هو باوعلي وباوع الحارث ... هذا شجابه

نهاية البارت ... يتبع

كونوا انتم كونوا بخير .. احبكم 💔

موش تنسن النجمة الزركة بالتصويت وها ترا ممقصره وياكم فديتني 😂