رواية #وكر الأشتر الفصل السابع والعشرون 27 - بقلم الكاتبه سمو العراق

بارت الخامس والعشرون
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔

امرأة مُعتادة على أسَر القلوب،
تجلسينَ متَجاهلة العيون التي فاضت بَجمالكِ، مِدركة للحٌسرات التي ملأت دواخِل الناظِرين فلا تبالينَ رغم ذلك، وكَأنكِ الشمس المتباهيِة بالضياء المنفرد لها، حِارقة لكُل ما يِقترب مَنـها "

.................................
سولين

اصعب شي الانسان من يكون بين نارين نار عاشق ولهان ذايبه روحه للمحبوبه وبين زوج غامض يصارع لانصياع المحبوبه

هيج اني جنت احس نفسي بحلبة مصارحه بين عملاقين يحاربون لاجل سراب واثنينهم اني ما احبهم

لزم ايدي الاشتر بغضب وهو يكول .. هذا شجابه هنا شعنده جاي

حسيت باهتزاز بداخلي وخوف ورعب تلبس معالمي ما حجيت ولا نطقت بحرف ما اعرف ليش خفت انوب من دون ايام الله كاشخه ومكيجة اكيد هسه يظن بيه ظن السوء والشيطان يلعب بعقله

دخل حارث وهو يمشي بخطوات متزنه وعيونه تتراقبنه بحسره وقهر استوقفه الاشتر وهو يگوله .. شعندك هنا

جاوبه حارث بهدوء عكس تيار الحزن الواضح على وجهه .. اعتقد هذا بيت جدي واني ما داخل لبيتك

حك حاجبه الاشتر وهو يجاوبه بخبث ... هاااا تمام تفضل ادخل

حارث باوعله بنظره مستفزه من فوك ليجوه وبعدها دخل جوه

اما الاشتر حجه بهدوء وجمود كال .. جيبي صايتج وتعالي بسرعه

فتحت عيوني مصدومة مرعوووبه لزمت ايده واني اتوسل بيه ... لااا ليش انت مو كلت ظلي بعد يومين ليش تجذب عليه والقران اذا على حارث ابد ما اطلعله ونبي

رد عليه بملل .. جيبي صايتج بسرعه نطلع مشوار ونرجع

حجيت بحسره .. بس اريد افهم شغله وحده اني شدخلني بحارث ليش من شفته غيرت رايك انت مو كلت ظلي هنا ليش هيج تحسسني اني فد وحده حقيره صح اني حقيره بس متوصل بيه لهاي المواصيل

رفع حاجب مستنكر كلامي .. اني جبت طاري نعال كتلج امشي وياي مشوار ونرجع

جاوبته والدمعه بعيني .. تجذب عليه مترجعني وهناك تلزمني وتكتلني شلون حارث اجه واني هنا اعرفك تكعد تحاسبني

ضحك وهو يمسح و وجهه .. ههه ولج بابا شبيج تتخيلين اشياء وقصص ما الها معنى وبعدين هو هذا شنو واسويله اهميه واغار منه كتلج نرجع والله

رديت عليه واني احلفه ... كول و روح الحسين نرجع

ابتسم ورد عليه .. وروح الحسين نرجع ارجعج ويومين واخذج بعد شتردين

رفعت اديه واتحدت اصابع السبابه مع بعض كتله ... اكطم سيف العباس ما ضجت من حارث ونرجع

ضربني على راسي بمزح .. لج ولي مني شنو هالحلفان والسوالف العندج امشي جيبي صايتج لا اخذج هيج وبسرعه لا تتاخرين

هزيت راسي بقبول وهو دخل للحديقه شفته كطع تمر واكله دخلت جوه واني اتلفت والخوف مسيطر عليه شفت حارث كاعد بالصاله وكريم يمه وحارث عيونه براسه ومتعصب

من شافني باوعلي بنظره حقد نظرة فسرتها شلون من الوحده تخون زوجها هيج جانت نظرته حتى الاشتر مو مثله ولا هيج ردة فعلة

دخلت بسرعه للغرفه لاكتني فافي كالت ... هااا الكراطة وين موليه

هزيت ايدي .. ما ادري نسيبج كال تعالي بسرعه مدري وين يريد ياخذني

جاوبت بحب .. فدوه النسيبي ابو طبره بوسيلياه العباس عليج ماكو هيج نسيب كفو

غميتها ورحت طلعت ونظرات حارث تتبعني جان شاد على شفايفه وعيونة متعصبه حييل عبالك يريد ينتقم مني او يقتلني هيج شي

عفته ورحت بس گلبي انعصر عليه هو خطيه يحبني يموت عليه وجان قبل عنده امل ان ممكن ابويه يزوجني اله جان يعترفلي بمشاعره بحبه ونظراته متفاركني جان يفرح من يشوفني بس من تزوجت الاشتر مستحيل اني اعرف مستحيل الاشتر يسمحله يتقرب مني حتى لو بنظره عابره ما تكن اي مشاعر

ما احب اكون بهيج موقف ولا اريد شخص يتاذه من ورايه والي عرفته من كوثر ان هو ما يجيهم ابد وحتى من يجي يوكف بالباب وابد ما يدخل الهم ومن اني اجيت صار يجي ونحييه عنده الامل من جديد

زين اني شلون بهاي الحاله اني بذمة رجال من سابع المستحيلات وحتى لو جنت ما احبه من سابع المستحيلات التفت الغيره ولا ديني يرضاها ولا ضميري يقبلها وياريت حارث يشوف حياته ويحاول ينساني الزواج قسمه واني مو قسمته

صاح عليه عمو كريم .. هااا عمو شنو وين رايحه

درت وجهي عليه ورديت بارتباك .. هااا اي الاشتر واكف بالباب دنروح نتونس ونجي

كال .. اي غير دكليلي اطلع وره الرجال مو عيب يطلع واني ما ادري بيه

ابتسمت بتوتر .. والله عمو هو طلع واني طلعت وراها وكال سلميلي على الولد

هو خله وطلع كله .. ها شنو ابو ابراهيم بعد وكت تعشا يمنه اليوم

رد عليه وهو يسالمة .. ممنون اريدك سالم والله متقصر بس حاب اطلع اني وسولين شويه خطيه نفسيتها تعبانه

باوعلي وابتسم كله .. اي عاد اني ما اوصيك على سولين وترا احنه منطينك جوهره اخلاق وادب وكل شي حلو بيها ومثقفه وذكيه وعصبيه شويه ههه

اشر على عيونه وجاوبه الاشتر ... بعيوني ومتحمل طباكاتها شعندي غيرها

رفعت حاجب ... لا والله واحد يرفع و واحد يكسب هسه هذا مدح ذم هم فهموني

الاشتر حط ايده على كتفي وحظني وهو يغمز الكريم كال .. لا يابه هو احنه نكدر نذمج

رفعت عيوني اله كتله .. ترا شفتك غمزتله

ضحك عمو كريم كال .. ههه لا عمو مدح مدح لا تخافين

ابتسمت على كلامهم وطلعنه اني والاشتر ركبت بسيارته وهو ظل يسولف ويه كريم ما عرفت عن شنو دار حديثم بس عجبتني العلاقه الي بينهم وعبالك واحد يعرف الخ من زمان

صعد بالصدر وهو يسوق لف السياره واتجه بطريق ما عرفت وين سالته بخفوت وقلق .. وين رايحيين

جاوبني وهو يركز بالطريق ... بعدين تعرفين

لزمت اديه بعصبيه ... لا والله هسه اعرف عود ليش بعدين اعرف شمعنى كول وييين يجوز تريد تعلسني

عض شفته بوقاحة وهو يباوعلي .. اوووف هو انتي مال علس

ضربته على ايده وهو لازم الستيرن .. دا اقصد تصكني تغتالني تعلسني مو مثل نيتك العاطله يجوز تشتغل علاس ومدري وين ماخذني

كال ببرود .. هو هذا حلگج من ابوسه اسبوع يحجي عدل ينتهي مفعول البوسه تظلين تسربتين بكيفج

اتغاضيت عن كلامه ورديت .. هسه كول وين ماخذني

باوعلي .. نروح نزور الامام الكاظم عليه السلام ونتعشى بفد مطعم ونجي شنو رايج

ابتسمت جاوبته بحنين ... الله تعرف اخر مره رحت ويه امي للزياره ومن بعدها ما رحت محد اخذني جانت امي هي الوحيده الي تاخذنه وحتى من ردت امتحن سادس اخذتني زورتني وزورت قلمي حتى اتوفق بالامتحان

رد عليه باهتمام.. الله يشافيها يارب

استغربت وباوعتله .. كول الله يرحمها شنو انت فاقد الذاكره مو جنت شاهد على قتلها على ايد النكس عامر

باوعلي صفن ثواني وبعدها طخت عنده كال .. اوه نسيت الله يرحمها ويسكنها الجنه يارب

رديت عليه .. امين ويرحم ابوك تدري اليوم يله اكتشفت ابوك ميت هاي من شوكت ميت ابوك هسه لو من زمان وشلون مات

جاوبني بتشرد .. من زمان صارله قرن الله يرحمه

اردف .. خلي اخابر صفاء اشوف وين صار

اجرى اتصال سريع وظل يحجي واني اندمجت ويه اجواء الشارع بايجابيه وافكر ليش اني من اساله فد سؤال بسرعه ينسحب ويتشرد ليش هيج يتصرف معقوله ما يريد يذكر ماضي اهله ولا يريد يذكر حتى شلون مات ابوه عجييب !!

....................

جيهان

طلعت سولين هي وزوجها وظل حارث هو عمو كريم جان جاستن هنا بس طلع

حارث جان كاعد على نار كال بعصبية .. هذا الكلب الحقير السكط شجابه عندكم وشلون تقبلون تدخلوا بيتكم هذا فد واحد عار هجم على بيتي وراد يكتلني وانتم مستقبلي برحابة صدر ولا جني ابن عمك ومن لحمكم ودمكم

جاوبه عمو كريم كله .. على كيفك حارث خطار عدنا وبعدين الرجال مغلط ويانه بشي جان مرته النه وتعرف علينه وتعرفنه عليه خوش زلمة معدل ما شفنه منه شي واذا على بيتك من هجم السبب من خالك هو لزك تهمة هروبه من بيك بعد لزلمة شدخله اذا تريد تحاسب حاسب خالك

عض اصبعه بعصبيه وهو يتوعد ... اووف يا كريم اوووف نار شاعله بصدري ما شفت شلون تهجم عليه كدام امي وكدام اختي وكل هذا واخذها

كريم ببرود.. يابه مو نصيبك الله يرزقك بغيرها ويعوضك بالاحسن

نفخ بضجر .. جنت اريدها كلش جنت اريدها وهسه وبعد رايدها وميت عليها ولك اني صار احبها اكثر من اربع سنوات جنت اكول اعجاب بس تأكدت احبها بجنون ومستعد اسوي اي شي الخاطرها

كريم .. انت تركض وره سراب يا حارث ادفن هالحب بكلبك ولا تجازف بروحك رجلها شراني واني اعرفه كلش زين لا تتقارش وياه خليك بعيد وخليك صاحب كرامة لان البنيه هم ما عندها شي وياك ولا عندك علاقه بيها وما انطتك امل

حارث بحده ..انطتني رب الامل ما رفضتني ما كالت ما احبك جانت ساكته والسكوت علامة الرضا جانت راضيه بيه ومقتنعه بس ابوها العارالكلب هو خرب كل شي وعندي امل لحد ما اموت سولين ترجعلي وهذا احساسي

كريم بدون نفس .. لا تصير ارعن كافي

وكف كال .. يله اني رايح واعتذر اخاف ضوجتكم

طلع وكريم طلع وراه دخلت جوه لكيت فافي لازمة حنان وتصبغ بشعرها دكلها سويته الج سيلفر وهذا غالي بخمسين الف لان الماده غاليه

جاوبتها حنان .. عادي عسا ما بميه بس المهم كون حلو ويعجب الي ابالي

غمزتلها فافي وهي تضحك .. هههه بس يعجبه ؟ الا يطيح صفح يجي من العمره جدو يشوف شعرج ينجلط وترحين تجددين عرس ثاني ههههه من اروح فدوه لهلوجهه

ضحكت حنان ومدت ايدها بصدرها طلعت ستين الف انطتهن الفافي فلوس الصبغ واني صايره القاصه مالتها كالت .. تعاي جيهان ضميهن يمج

اخذتهن وضميتهن وهي شويه واجت ورايه كعدت يمي اني جنت افكر كلتلها .. افيان عندي موضوع وياج

ردت عليه وهي تحسب بالفلوس كالت .. احجي يعمري احجي موضوعيش تردين اصبغ شعرج اصفر

جاوبتها .. لا لا بس اكولج البارحه سمعت كوثر تخابر بايو دكولها ماهر يحبني واضحك مدري شلون مفهمت انوب كلتلها اضحك عليه والعب على الحبلين حارث وماهر واكول لزوجها مدري شلون يعني هيج ما اعرف احس عقلي انخبص مفهمت شي

ردت عليه بعصبيه ... عساس هسه اني الفهمت غير تفتهمين عدل غبيه ولج اني منج افتح اذاني وعيوني حتى افهم السالفه هسه شلون اظل هيج الفضول كاتلني

نفخت بملل .. ما اعرف عي كالت حارث بس منو حارث ابن عمتي يعني معقوله كوثر تحب حارث ابن عمتي ما اصدك وهي تعرف بيه يحب سولين

جاوبت فافي .. ما اعتقد هي اصلا جانت تعرف بيه يحب سولي وجانت دكولها تزوجي وبعدين مو مال تحبه يجوز واحد ثاني اسمة حارث يعني ممعقوله بس ابن عمتي اسمة حارث

رفعت اكتافي بعدم معرفه.. والله ما اعرف شكولج بس هيج سمعت واخاف تضيع كوثر من هيج كلام شلون يعني تضحك على طرفين انوب يمكن واحد متزوج منهم دكولها ادز رساله الزوجها

ردت عليه.. خوش خليني اراقب كويثر اشوف شبيها هاي صايره مستهتره هي وحجلها جنها حجل جدتي بالخمسينات

ضحكت عليها و وكفت طلعت شفت عمو كريم مبدل وديلبس بساعته جانت الحلقه مزينه اصبعه بشكل انيق وحلو

باوعلي كال .. محتاجة شي اجيبلج شي وياي طالع

ابتسمت بوجهه .. لا عمو شكرا متقصر ممحتاجة شي

كال .. تدرين اني كلش فخور بيج من بعد موت اموت ما شاء الله صرتي قويه معتمده على نفسج وتشتغلين ويه اختج حتى لو متحصلين فلوس بس المهم تطلعين من جو الكابه

رديت عليه بخجل وعدلت حجابي.. الحمدلله الفضل الرب العالمين ومن ثم لاختي ما اعرف شلون اجازيها سندتني وقوتني

ضحك كال .. تدرين حتى صايره حلوه ومتغيره صايره تشعيين

ضحكت بخجل وتوتر .. شكرا عمو من ذوقك ههه

رد بتنهيده .. اي والله ياعمو ذوقي حلو حيل حلو بس شسوي ما حصلت على ذوقي

عقدت حواجبي ما فهمت كلامه ولا عرفت شنو يحجي شبيه شو خفت منه احسه مدري شبيه خاصه من خطب

اجت كوثر تمشي وحجلها يرن ولازمة موبايلها كالت .. كريم خابرت خالتو ام ايو خابرت دكول ممكن تجيهم عمو ابو ايو يريد يحجي وياك بموضوع

جاوبها بتنهيده .. تمام هسه اخابرها واشوف

اني عفتهم ورحت وهو طلع اجت ورايه كوثر ولزمتني من ايدي كالت .. جيهان حبيبتي دا اريد احجي وياج بموضوع وهذا الموضوع المصلحتج واني لو ما احبج ابد ما احجي وافتح حلكي بكلمة بس والله لان انتي غاليه عليه واختج سولي غاليه حبيت احجي

عقدت حواجبي باستغراب جاوبتها..  تسلمين حبيبتي بس شنوو الموضوع

كالت بتنهيده .. دا احسج تركضين وره سراب ومحلوه منج يعني هيج تكونين جشعه وتخربين بين اثنين هو لو يحبج جان خطبج بس هي جذبته من اول مشافها وخطبها فكعدي واستقري وبطلي سوالفج عيب انتي مو صغيره

تقربت منها واني افور من العصبية .. انتي شدتقصدين مدا افهم عليج

حدت ملامحها وحجت من بين اسنانها كالت ... كافي تركضين وره اخويه كريم عيب عليج ترا هو خاطب وحيتز

ما كملت كلمتها واني جبتها براشدي على وجهها بكل قوتي وبكل حرگة گلبي وما اشوف اله دموعي نزلت حتى ما اعرف شوكت بجيت واي كلمة اثرت بيه ونزلت دموعي كلامها حقير وقاسي

عاطت بصوت وما توازنت حطت ايدها على خدها مصدومة من ردة فعلي ظلت تباوعلي وهي تفح من عصبيتها وحقدها

رفعت اصبعي بتهديد ... اذا انتي حقيره ومنحطه وتركضين وره الزلم اني مو مثلج  ادبسز وهاي كلمتج عليها كعده وتصفية حسابات واذا بعد هيج حجيتي بالقران وروح امي اكول العمو كريم عليج واخلي يطيح حظج

عفتها ورحت واني ابجييي شلون حقيره شلون حركت گلبي تكول كافي تركضين وراه والله حتى اتجنبه حتى ما احجي وياه هو يلاطفني وهو الي يحجي ودائما يعترض طريقي

دخلت للغرفه واني اداري دموعي جمعت ملابسي وملابس امين وفافي كلتلها بصوت مخنوگ بعبرته.. امشي افيان خلينا نروح للبيت

باوعتلي مصدومة وكمزت من القنفه واجت لزمتني .. شنو شبيج منو وياج منو تحارش بيج منو حصرج

ضربتها بوجع .. منو حصرني شبيج انتي امشي ما اريد اظل هنا اذا ظليت اطك واموت

كالت بعصبيه ... لا والله ما اطلع الا دكولين منو وياج منو اذاج

احتضنت وجهي بكفوف اديه وبجيت بحسره ... افيان خلينا نروح ما اريد اظل هنا ولا تساليني شكو

راحت تركض تريد تفتح الباب وتهد عليهم طلعت وهي تتهدد كالت .. اليوم العن طاهرهم منو حجه وياج منهم

لزمتها بسرعه واني اهدي بيها .. لا ولج اسكتي لا تحجين هاي كوثر غثتني بكلمة وما اريد اظل

كالت .. اي شكالت هاي السمانيه الدلغوزه

نزلت راسي والدمعه بعيني .. دكول كافي تركضين وره كريم

ردت فافي بغضب ... يا كح .. يا نعال يا حشره خلي ادور غلطه تريح گلبي بيها هاي العوجه الهايشه يمه ماكو اروح اكتلها واجي اليوم اذا ما اكتلها اطك واموت

نزعت النعال وهجمت لزمتها واني ابجي واتوسل بيها .. حبابه فافي حبابه لا موهيج لا تضيعين حقنه ويكولون ذن مستهترات اسكتي خليها تولي ضربتها راشدي وادبتها بس خلينا نطلع بكرامتنا احسن ما نظل هنا وهاي تتعيقل فوك راسنا

تنفست بغضب وهي تدعي .. الله لا يوفقك يا عامر الكلب وحسبنا الله ونعم الوكيل عليك والله لو ما هو جان ما ظلت هاي الملطلطه تتعيقل فوك راسنا دمرنا وخله اليسوه والما يسوه يضحك علينا ويعيرنا

خلينا وطلعنه برا خلينه ام حسن خابرت على السايق واخذنه وراح للبيت طبعا للامانه والشهاده لله ام حسن ما قبلت نروح ابد بس احنه اصيرنه نروح لان بصراحه ما اكدر اظل وهاي الحقيره هيج حجت ويايه

....................

سولين

بعد ما دخلت الضريح المقدس جانت عندي رهبه كبيره واني اشوف الناس تتجول وناس تصلي وناس تدعي

رحت صليت ودعيت وصليت لامي ومن بعدها كعدت اسبح اخذتني الذاكره القبل نص ساعه تقريبا من اول ما دخلنه للكاظميه جنت لابسه صايه سوده وشال اسود وما يقبلون ادخل للامام الا لابسه عبايه حجيت وياه بهمس وذكرته بالعبايه

وكف عند بائع متجول يبيع عبايات مال صلاه اشتره الي وحده لونها ابيض وبيها ورد سمائي طوخ واشتره اليه جواريب لبست العبايه و وكفنه كدام المناره عدل العبايه عليه وهو يرتبها باهتمام وعبالك اني قطعه ثمينه كدامه جنت صافنه عليه ومحتاره بأمره وهو يرتب بالعبايه وبشكلي بكل جديه واهتمام

لزم ايدي ومشينه وكفنه يم باب التفتيش كال .. ادخلي للتفتيش ورحي توضي ومن تكملين صلاه اطلعي ساعه بثمانية ضبط تلكيني واكفلج يم المكتبه الي موجوده بالامام

جاوبته ببتسامة .. تمام راح ادعيلك

ضحك كال .. مو تدعين عليه

هزيت راسي بنفي والابتسامة على وجهي دخلت وعفته رجعت الذاكرتي واني ادعي ربي يرحم امي ويساعد اخواتي واخويه ويطيب خاطرهم ودعيتله يبعد عنه كل واحد يريد بيه السوء ويطيب خاطره ويهدي سره

طلعت اتمشى من بين جموع الزوار جان النسوان الوحد والرياجيل الوحد يفصل بينهم جدار من قماش اسود باوعت لجهه الزلم شفته من بعيد لامع من بين الزوار بملابسه السود وهو يصلي و وجهه للقبله

وكفت واني صافنه عليه وگلبي طاير من بين ضلوعي عبالك ماحو ناس عبالك بس هو الوحيد الي يصلي محد وياه ما جنت اشوف غيره

تقربت اكثر واني اباوعله وفضولي قاتل ناحيته الاشتر شنو سرك دتصلي واني الاحسك مجرم تعرف الله تعبد والايمان واضح عليك شنو اني ليش دا احس نفسي بدوامة دا اكتشف اشياء وترجع تغمض من ناحيته

باوعت لعنان السماء والدمعه بعيني همست بعد ما احتقن وجهي من مأساتي.. ياربي اذا هو اماني وسندي قربني منه وحببني بيه وحنن گلبه عليه وابعد عنه الشكوك وكل شي يعصبه مني يارب ما عندي غيرك ملجئ التجى اله وقت حاجتي

رفعت ايدي للسما واني ادعي ... ربي اسألك هدوء النفس وطمأنينة القلب أنشراح الصدر يارب اشرح صدره وطمنه وهدي نفسه

صارت الساعه بثمانيه وهو اختفى عن انظاري خليت وطلعت واني انتظره بالمكان الي كال عليه شويه وشفته من بعيد وهو جاي يمشي وبيده كلاصين بلاستك مي ابتسمت اله انطاني واحد واخذ واحد شربت كال ... احب المي اشربه منه تحسين عبالك مي من الجنه

جاوبته .. اي والله صدك واني هماتين هيج احس

بعدها خلينه وطلعنه ركبنه بالسياره جنت ميته من الجوع وذميته بداخلي كلت .. ثول جان كلت خلي اعشيج واني عيني على المطاعم اكول هسه يعشيني

مشينه مسافه بالسياره وهو كال ... نروح للكراده ل ٦٢ مطاعم هناك راقيه واكلهم طيب بصراحة مطاعم الكاظميه وسخه ولازكين بالدجاج شوي وكباب شوي ماكو شي بي حظ

جاوبته .. بكيفك الي تحبه سويه

والله صدك اخذنه للكراده دخلنه مطعم بصراحة اول مره اشوف هيج مطعم راقي وحلو ومرتب اني مداخله مطعم بحياتي بس جانت كافيتريا يم المعهد مرات نروح الها ومرات ماما من تاخذنه للسياره تدخلنه مطعم باب الحاره

بس هذا يفوق كل المطاعم حتى الناس الي كاعده بيه مبين عليهم البذخ ومبين عليهم الدلال جنت اباوع للناس مصدومة بيهم بصراحة صدك مصدومة شنو اللبس شنو الشعر شنو الاكل الي منزليه النفس وما تشتهي حتى المي يختلف مي باليمون

جنت صافنه ومفهيه عليهم واستحيت من نفسي صايتي طايره وشالي اسود همزين ما اجيت بنعالي لبست حذاء فافي هسه مشتريتها

هو همس بهدوء وعيونه بالاب كال .. كافي تباوعين على العالم خليج ويايه

درت وجهي عليه وفركت اديه بتوتر ... هاي شنو اني وين باوربا هذن اضرب من جالي واختها  شنو هاي شوف شلابسه شويه وتطلع الملابس الداخليه وذيج تشرب اركيله ظهرها كله طالع

ضحك كال .. اي عادي ناس متحرره حرية شخصيه

تعصبت .. الحرية الشخصية ، إنك تختار گهوتك بسكر أو بدون سكر .. بس دين الله  ماكو بيه  حرية شخصية  بيه "سمعنا." وأطعنا ".إستقم كما أمرت..مو مثل ما رغبت

رفع اكتافه بعدم معرفه .. هن عاجبهن هيج شنسويلهن يتجازن هن وربهن

ضحكت .. اي يجوز ذنوبهن اقل من ذنوبنه هسه تطلع ذنوبهن خفيفه هههه

رد عليه كال .. حجي اديب يكول ماكو شي اسمـه أني ذنوبي خفيفه وأني  احسـن من غيري اكو شي اسمه(وتـحسبونه  هينـاً وهوه عند الله عظيم ) كال حتى لو ذنب صغير يسلب منه خصال انسانيه

جاوبته بفشله .. اي والله صح هسه شنو شنطلب

كال .. اي انتي شنو جاي على بالج

ابتسمت ... اممممم اكلات بحريه

ضحك كال .. تدرين ليش احبج  لان طفوليه وتحبين تاكلين هواي وما تظلين معنفصه زعلانه ما اكل

طلعلي قائمة الاكلات البحريه جاوبته ... اني بالاكل عشيرتي ما اعرفها

باوعت للقائمة جان مكتوب ..روبيان ماركوس سكالوب هامور روبيان بصلصه المحار

معجبني اي شي لان بصراحه مماكله اي شي من هاي الاكلات وما احب اكل اشياء غريبا لذلك هو طلبلي على ذوقه سمج زبيدي على تمن بس جان غالي بتلاثين الف

استغربت هذا شيشتغل شو عنده هواي فلوس كتله .. منيلك فلوس

رد عليه .. مو كتلج بعد كليتي وشديت فلتر انوب خابرني الي اشتراها مني يكول والله تشتغل شغل واني من جانت يمي جانت متروسه حصو ورمل بعتها مشت عدل

ضحكت .. لا تجذب هههه كول منين

رد عليه .. اكلي وانلصمي مو شرط تعرفين المهم دلعي نفسج

صدك والله تعشينه وكملنه بعدها طلعنه جان ازدحام وكفنه يم باب ابيض كال .. تعرفين هذا الباب مال شنو

عقدت حواجبي باستغراب .. لا مال شنو

رد عليه .. بيت مال دعاره بابه ابيض هههه

جاوبته .. عزا وانت منين تعرفه شعرفك بيه ليكون تدخل بيوت دعاره

رد بعصبيه.. الطمج على حلكج

تعصبت ... اي اي الطم شكد اسلوبك تهجمي تصير زين وترجع تهجم عليه ما تكدر لازم ترجع لاسلوبك

رد عليه.. كافي دكافي شكد تحجين

سكتت وكتفت اديه زعلانه منه مشت بينه السياره وهو لزم وجهي وداره ناحيته اشرلي كال .. باعي هذا الباب الاسود هاي كنيسه هاي كنيسه للعباده وبيت من بيوت الله باعي الفرق بين الالوان الابيض بيت دعاره والاسود كنيسه للعباده

باوعت للكنيسه جان شكلها كولش حلو دزاين غريب عبالك بيوت اثريه وفعلا بابها اسود

كال .. هنا الفرق مو كل ابيض زين ولا كل اسود مو زين لا يغرج الظاهر المهم الداخل يبنيتي وكافي تشكين بيه بالباطل اني مو مثل ما تتوقعين

سكتت وعرفته هو عرف احساسي من ناحيته وعرف شنو يدور بعقلي وشنو بمخيلتي كال .. يله خليني اوصلج لبيت جدج

هزيت راسي بنفي... لا ما اريد خليني اروح وياك لبيتنا

باوعلي بدهشه وعلامات الصدمة كال .. متاكده

ابتسمت وهزيت راسي بقبول ... اي متأكدة

لزم ايدي بامتنان كال ... بالقران مال بووووسه هسه الا اخليج تفقدين الوعي

تعصبت .. هااا هيج صارت رجعني رجعني ما اريد اروح

ضحك كال .. اتشاقه شبيج اتشاقه

بعدها خلينه ورحنه دخلت للبيت بدلت ورحت للغرفه الثانيه لان ذيج كسر الكنتور فعفتها بس جبت منها دبة المي اروا ترستها وسديت بيها الباب

حسيت بيه بالحوش فتحت الباب شويه واني اتصنط عليه سمعته يكول .. كفووو كفووو عاشت ايدك اي المهم بس تاخذون جوازه وجنسيته ما اريد شي بس ذن ما اريده يسافر هناك يخلصها ويه الكح واني ما اريده يضيع

استغربت هذا عن منو يحجي وشسوه وحصل على جوازه وجنسيته انوب يريدني اثق بيه واطمئن وهو شكو سالفه عوجه يسويها

عفته ونمت بس بالي ما اعرف شبيه مشغول على اخواتي حسيت بيهن شي ولا هن عندهن موبايل ولا اني خطيه جانن فرحانات بيه بس بعد شسوي عفتهن واجيت بلكي باجر اخلي يجبهن يمي

.............................

جيجي

بعد ما رحنه تقريبا ب ١٢ باليل واندك الباب طلع امين كال .. اجه عمو كريم

دخل عمو كريم وهو متعصب كال .. شلون ترحن منو سمح الجن واصلا شلون من دون علمي اني ما كايل تنامن يمنه

جاوبته اني .. عمو لا نريد هنا ببيتنا احسن

كال .. احجي منو اذاجن منو حجه وياجن

هزيت راسي بنفي .. لا عمو محد بس احنه ما نرتاح الا ببيتنا

كال .. ديله كعدي اختج وخلينا نروح

جاوبته بنفي قاطع .. لا عمو اني ما احب اكسر كلامك بس هالمره لا والله باجر هم عدنا شغل من الصبح ما نكدر

تقرب مني خطوات واني رجعت خايفه كال .. احجي منو وياجن انتن ما تطلعن هيج من دون سبب كوثر حنان اذنج بكلمة او حجن ويه افيان

نكرت الموضوع ورديت عليه .. لا عمو صدكني محد ولو اكو جان كتلك

هز راسه ممصدك كلامي كال ..لا والله هسه اروح واطيح حظهن واحاسبهن وحده وحده منو وياجن وليش طلعتن

حجيت برجاء.. عمو فدوه محد ويانه وهم ما نريد مشاكل فدوه حباب لا تضغط عليه والله تعبانه حتى ما بيه حيل احجي

كعد على الدرج وسحب جكاره من باكيته كال .. خوش اني راح انام بالسياره حتى اخاف واحد اله نيه ياذيجن اني موجود

تقربت منه بفزع.. لا عمو شكرا ما تريد نتعبك روح لبيتك  والله ما علينه شي

رد بعصبيه .. انجبي جيهان وكافي عبالك اني غريب شنو ما تردين تتعبيني امشي روحي نامي لا ابتلي بيج

مشيت رحت دا انام يم اختي هو صاح عليه كال .. عمو حبيبي ممكن جاي راسي يوجعني

باوعتله بخجل وارتباك ابتسمت متوتره .. اي تدلل

رحت للمطبخ سويتله جاي واني اباوعله جان يشرب جكاير ويرجع ليوره خلص نص باكيت وموبايله شاشته مشتغله جبت الجاي انطيته اله اخذه من ايدي وعيونه تتاملني وسط الظلام

سحبت نفسي بسرعه وهمست .. تصبح على خير عمو

رد عليه .. اصبح على وجهج ان شاء الله

درت وجهي عليه دا استوعب كلمة وباوعتله بتساؤل رد بضحكة .. نايم يمكم شي اكيد اصبح بوجهج

ابتسمت وعفته ورحت قفلت الباب بالسركي ورجعت قفلته بالقفل مرتين حتى لو ماكو امان هو هسه الاخ ما يأمن باخو مو انوب ابن عم ابويه والله الدنيا تخوف ما بيها امان

خليت راسي على المخده والدمعه بعيني لحد الان كلام كوثر يرن براسي مثل الجرس شلون حقيره وصلفه انوب هو بات يمنه بس لا تذب تهمه عليه والله هاي خقيره كل شي يطلع منها

نمت واني ادراي دموعي وكلبي ينزف من الوجع هو مو الي ما افكر بيه يارب ابعده عن تفكيري ياربي شيله من بالي فدوووه ربي ما اريده انكسر خاطري هواي اجير خاطري ونسينياه يارب

....................

صفاء

جنت طالع يم حجي اديب اشتغل وياه اطحن بهارات وما اشوف اله مصطفى اقتحم المحل وهو يصيح ويغلط

طلعت اله وطفيت المكينه كتله بذهول .. شكووو شكو شبيك مصطفى شنو شصاير

رد عليه والغضب مكتسح ملامحه ... اخوووك الجبير اخوووك البارحه جا وصلني للموت شيريد مني كووول شيريد شلووون اني ما اخلص منه

لزمته واني اهدي بيه... اهدئ اهدئ بس خلينا نفهم شنو السالفه شبيك مدگلي

دفعني بغضب .. وخر مني لا ابتلي بيك والله اليوم لو اني لو الاشتر لو اكتله لو يكتلني لك ماكو هيج بشر ماذي وحقود شيريد مني بس لو اعرف شيريد مني

جاوبته .. والله يحبك بس انت ما تعرف مصلحتك

رد بعصبيه .. من نعال على مصلحتي يابه شدخله اشرب اسكر اسافر انام ويه النسوان ماله دخل اني حر بنفسي

نفخت بضجر .. احجي شصار

رد بقهر .. دز عليه عصابه سلبوني واني رايح للمطار اخذو مني الفيزا والجواز والجنسيه

جاوبته بتبرير .. منو يكول هو الي دزهم

فتح قميصه بغضب .. جااا منو دزهم امي لو خالتي ماكو غيره هو والعباس هو ما يريدني اسافر بس بسيطه والله اله اروح اله اهجم البيت على راسه

خله وراح واني صحت وراه .. لك اكعد واستقر لا يكتلك

عافني وراح واني خابرت على الاشتر كلت اخاف هذا يكول التحسين وساهر ويهجمون على الاشتر عاد انطيه الضوء الاخضر اتصلت اتصلت ماكو عاد عزلت المحل وخليت ورحت

................

سوليين

كعدت الصبح البيت محد بيه لا من صفاء ولا من الاشتر عزلت البيت ونظفته كلت خلي اصير معدله وادميه كافي ماخذه دور الحيه وموته الناس من الجوع خليني اطبخ فد اكله حتى يجون يتغدون ويحسون ان هم تحت ظل عائلة سعيده يسودها الآمن والامان

حجيت ويه نفسي باعي سولين بطلي دور الحيه واخذي بنصيحة فافي بلكي يصير ادمي وتعيشين حياة حلوه ولسانج كصيه عيب انتي بنيه لسان الطويل مو حلو من يحجي كلمة لا تردين شويه اكرصي روحج وانلصمي بلكي الله يستعدل ويحجيلج عن اهله عن ماضيه

شويه وانفتح الباب شفته دخل وهو يحجي وياهن يكلهن .. ادخلن ادخلن اهلا وسهلا

واني شطت للستار واخذ وظعية الاستعداد للعركة ولزمت الماسحة ما يتوب الا يجيب جالي ودارسين وتكول فافي انتي تعيلين بله هسه منو العايل

طلعت واشوف جايب اخواتي واخويه فرحت من شفتهن حيييل فرحت ركضت عليهن واني ابوسهن واحظنهن كلتلهن بفرحة .. شعجب اجيتن

كالت فافي وهي تباوع للاشتر بامتنان .. نسيبنا الكفو جابنه

باوعتله والضحكة شاركة حلكي من الطول للطول كال .. اي اخواتج راح يظلن يمنه كوم يوم وان شاء الله سهله

خله وراح للغرفه وهن كعدن حظنت امين وبسته .. عمري شكد احبك ولك هسه ارجع اعضك بس اشوف الجدر استوه لو بعده

شفت الاشتر طلع وهو يلبس بسترته ركضت وراه .. هااا عيني الله يبرالك وين رايح

سحب راسي وباس شفايفي فتحت عيوني مصدومة .. عزااا اخواتي هسه يشوفنك

كال بذوبان .. رايح افكر بيج منا لما اوصل لشغلي

ضحكت .. هههه تعرف شلون تلعب بعقلي

عض شفته .. اريد العب بعقلج وبكلبج

بعدها خله وطلع ورجعت ويه اخواتي وافيان راسها والف سيف تفتح صالون عندي وتخلي القطعه مالتها على التيل وتكتب صالون فافي للسيدات

ظلينه نضحك عليها وبعدها ما نشوف اله الباب انهجم هجوم ودخل علينه واحد ما اشوف اله طوله من الخوف ظليت اصرخ اني وجيجي وامين ارتعب اكثر منه

صاح بصوت غاضب وعصبي ... وينه الاشتر ويييينه اليوم والله احرك البيت والله حاجز ومنطي فلوس وحتى بالبنان حاجز وتالي هيج يسوي بيه

باوعت عليه وركزت هذا مصطفى وكفت وصحت بيه بعصبيه .. انت هييي شتريد ما تستحي ما تخجل شلون هيج تدخل على بيتنا ما تكول البيت بيه ناس

رد بحقاره واستفزاز .. خليت المستحه الرجل وينه والله ليوم احرك البيت

عطت بيه بعصبيه ... امشي اطلع برا عديم الرجوله بيك خير خلي رجلي يجي واحجي وياه هذا الحجي اله يترس حلكك تراب

رد بغضب .. شحده والله اني اترس حلكة تراب والله مصطفى اذا ما اخذت حقي

طلعت افيان وهي متعصبه ... خااااب هييي هيييي شكو هاجم عليه شطولك صدك لو كالو الطول طول النخله والعقل عقل الصخله

هو تعصب .. انجبي ادبسز انتي منوووو انوب منين ملفيجن الاشتر

عطت بيها افيان .. افيان مالج شغل دخلي جوه

هي تجاهلت كلامي وردت عليه... جابنه من دياحتك امشي ولي

هو كلها بقرف ... شكد منحطه ما اتجاوز عليج لان تظلين مره بس الظاهر ملفيج من الطهاره

هي ما فهمت شكال وهي عطت بيه ... احترم نفسك ولا تتجاوز لا تعرف شلون اتصرف والله يحي الاشتر واعرف شلون احجي وياه واخلي يتصرف وياك

تخصرت افيان وجابته .. مره وارجل منك على الاقل ما اهد على نسوان

هو تخبل تجاوز عليها .. شكد عايقه وساقطه

هي تخبلت واني هماتين تخبلت كتلها بصراخ  .. لا يا حقييير يا زفت امشييي اطلع برا

باوعلي من فوك ليجوه ودار وجهه وديطلع

وما اشوف اله هي شالت الطابوكة الجانت بباب المطيخ مخليتها حتى ما ينطبك الباب شالتها وشمرتها عليه من عصبيتها ومن وقع اثر كلمته عليها نومت الطابوكه براسه

هو بسرعه صرخ وحط ايده على مؤخره راسه والدم نزل على عنقه دار وجهه علينه وقلص عيونه وبعدها ما شفت الا بياض عيونه و وكع من طوله

صرخت بصوت عالي واني الطم على خدودي ... عزاا بعينج افيااان عزا العزاج ولج شسويتي

ردت بخوف وقلق وبعدها تشجعت .. طبه مرض ما شفتي شلون يفشر عليه

لطمت خدي وركضت عليه اريد اديره على الجهه الثانيه ما كدرت حطيت شالي على راسه واني امنع نزيف الدم

وافيان وكفت على راسه وحطت ايدها على جتفه وهي تهز بيه .. ولك اگعد دهر صابك گوم مو وكتتك تموت گوم

اتصل موبايله رفعته شفته كاتب ملك الموت بسرعه فتحت خط سمعته صوت الاشتر كال.. ها مصيفي متصل بيه

كتله بدموع وصريخ .. الاشتر

رد بخوف وقلق .. هااا سولين شكوو شجاب موبايل مصطفى عندج

جاوبته بقلق ورهبه .. الحك اشتر الحك تعال بسرعه فدوووه اختي فافي ضربت مصطفى براسه وخلت دمه بطوله فدوه تعال لا يموت واختي تروح بيه

نهاية البارت .. يتبع

كونوا انتم كونوا بخير.. احبكم 💔

لا تنسوا النجمة البرتوقاليه على گولتكم اني نجمتي خضره بس انتم تختلف🌚