رواية #وكر الأشتر الفصل العاشر 10 - بقلم الكاتبه سمو العراق

البارت العاشر
رواية..وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔

- تُألمِنا الأيام ونقول غداً أجمل ويأتي الغدّ لِنرى أن الأمس كان أرحم 💔˹.
................................

شكد ما احاول ابين قويه وحياتي ماشيه ومتكامله بس بالواقع اني ضعيفه وهشه وًوحيده واكبر شاهد على معاناتي هي مخدتي هي الوحيده الي تعرف بكل معاناتي وجروحي وشاهده على كل الدموع البيجيتها بعد كل انكسار

عندي حنية على نفسي وكبرياء بحيث ما ارضا بالذل حتى لو اذيت نفسي طلعت من خاطر مكسور وگلب موجوع لو اعرف تتكاتل لامة لازم اوصل لخالي ولازم يحس بمعاناتي مثل ما عانت امي

وصلت للشارع العام واني اشوفه بنفس گلبيته الجربه الجوزية وكرشه متر ليكدام ونعاله لاستيك شمئزيت منه شكد فكر من اشوفه ابد ما اتفائل بالخير وعرفت طلعتي مراح تتم على خير

كال بخبث وحقاره... هااا سولين وين رايحة من غبشة الله

جاوبته بعصبية واني احظن الجنطه لصدري .. وانت شدخلك حاشر نفسك بكل شي عيب عليك رجال شكدك شكبرك اظل جنك ام زكي بباب الحاره تستقر شبييك

عفته ومشيت جان صاح عليه بحقاره.. مهزومة من اهلج ولج ادبسز ارجعي لا اطيح حظج

درت وجهي عليه واني بقمة غضبي.. احترم نفسك ما غيرك الادبسز ما خليت الروحك احترام امشي ولي من وجهي لا الم الوادم عليك

عفته ورحت اركض وهو راح يركض عرفته راح لابويه يكوله بنتك انهزمت ركضت بسرعه بسرعه لان راح يلزموني وابويه اذا يلزمني يجرم بيه انوب مخطوبه يربي لا هم خطيبي يكتلني اكيد يلزمني هو وخطيبي ويموتوني كتل

رديت على نفسي بعصبيه .. والعباس اشتكي عليهم شنو ما الهم رداد اكول ول كتلوا امي ويردون يكتلوني واذا اضطر الامر اروح لعلي عذاب خو كومة حالات تجي وبعدين يكيف على حالتي

ما شفت نفسي الا يم السيارات يصيحن .. باب الشرجي نهضه علاوي

خليت وركبت اني اندل بيت خالي كلت انزل بالطريق بس خلي اصعد واضيع نفسي منهن

كعدت واني ارجف من الخوف واباوع للناس بالسياره خفت من الوضع وردت انزل انطيته كروه ونزلت بالطريق امشي برعب وخوف اول مره اطلع وحدي بس هم جبروني

امشي بالشارع وابجي والعالم تباوع عليه اخجل من نفسي وحنيتي على نفسي يمنعني اضعف وارفع راسي بكبرياء وأعدل مشيتي

وارجع انتكس من اتذكر القدر صار ضدي وامي ماتت بأول ايام العمر ماتت من نجحت من السادس ودا اريد احقق حلمي اني هسه صديقاتي الي جانن ويايه كلهن دخلن جامعه حوراء وكوثر بس اني الوحيده الي نجحت وتحرمت من حلمي لو امي موجوده جان سندتني وما سمحتلهم هيج يسوون بيه

ظل بالي عند اخواتي ثنينهن جيهان فقيره وتخاف وهو مجرم وافيان لسان وما ترد واخاف عليها تتاذة من وره لسانها صرت انانيه وعفتهن انهزمت بروحي العزيزه واكول بلكي اكدر اسويلهن حل واكدر اطلعهن من مستنقع ابويه القذر

حسيت بدوخه ولهسه جسمي يرجف ويرتعد من ضرب ابويه اليه لهسه احس بوجع قاتل وابجي على روحي شنو ذنبي هيج يضربني بحيث اركض من مكان المكان انهزم منه وحتى اخجل واكره اعيد هيج موقف بذاكرتي رد واتذه ولا اكدر اسولف بيه

وصلت البيت خالي شفته مقفول بقفل جبير ومكتوب عليه الدار للبيع انهبطت انسدت الدنيا بوجهي والامل الي جان عندي اختفى وين اروح شلون ارجع تورطت خالي وين انت

من حلاة روحي دكيت الباب وهو مقفول ادك بهيستريا وابجي واتوسل بيه.. افتح الباب فدوه لا تعوفني اجيت وكلي امل بيك تاخذ حقي وحق امي ويينك اطلع كلي انتظريني بالباب هسه افتحه

طلع رجال من جوارينهم كال.. شكو عمي محتاجة شي

شهكت واني الملم شتاتي.. وينهم ؟

رد عليه.. سافروا من زمان ما نعرف شنو قضيتهم والبيت انباع بعد كم يوم ينزلون بيه ناس جدد

اسودت الدنيا بعيني وحاولت اسيطر على نفسي ارتجيت على الحايط وعفت الرجال يحجي الوحده ومشيت مشيت بدون إرادة

احس نفسي كبرت كبرت الف عام وتساويت ويه خيباتي وانكساراتي وتصالحت ويه الهزيمة

حسيت نفسي مثل سفينه متحطمه لا تكدر ترجع تبحر بالبحر ولا ترجع الاصلها من جانت شجره هسه اني لا اكدر اروح ولا اكدر ارجع وتورطت

مشيت مشيت واخذت طريق طويل ما اكدر اروح العمتي لا اكدر اكسب الاشتر بهالروحه ولا ابويه الاشتر راح يكول خانتني والتجئت لحبيبها وابويه من الله يكره عمتي وابنها انوب من صارت العركة ركعه بنعال حيل تأزمت الوظعيه

كلت ما عندي بس جدي كهلان خليني اروحله على الاقل هالمكان ارحم شي حتى لو احصل كتله بس مراح يجرمون بيه مثل ما عند حارث

المشكلة تيهت الطريق اريد سياره ماكوو وبيومها هوا عالييي بحيث الصايه كل شويه وطارت وتراب احس التراب دخل بحلگي واسناني تصج من التراب وجهي احسه تطين دموع وتراب امسح وجهي احس طين يطلع منه

حيل خفت من انگلب الجو وصار رمادي احس الدنيا غيمت رغم بعدنا بأول النهار يا الله وين اروح تورطت والله تورطت ظل گلبي يوجعني من القلق والخوف

اريد اعرف اني وين ماكو بس طريق طويل وبس سيارات خط سريع انوب لا رجال لا مره لا طفل بس سيارات ياربي أسال منو اني وين اجيت اصلا

وكفت اشرت السياره وكف السايق ارتعبت منه جان سمين وضخم كال.. ها عمو محتاجة شي

جاوبته بقلق.. اني تيهت الطريق اني حاليا وين

رد عليه.. انتي هسه على سريع محمد القاسم

فتحت عيوني مصدومة ومرعوبه.. شنو هذا وين صاير عفيه اريد ارجع لباب الشرجي منين

كال .. اهووو بعد وين طريق طويل صعدي اوصلج

جاوبته برعب.. لا اروح مشي بس وصفلي

رد عليه.. براحتج بس هسه لازم تعبرين الجسر صعدي على الجسر بلكي تلگين مناك سيارات فورتات واركبي

تسكرت منه وخليت ورحت يمه لا انوب يجي ليل واني ظاله افتر من مكان لمكان شلون بيه هسه كون ارجع لبيت خالي واخلي الجيران ترجعني حتى بيت خالي تيهته كلت اركب للشورجة ومناك ارجع لبيت خالي

تعبت من المشي والجو يخوف والعالم راحت محد ظل صعدت على الجسر واني امشي والسيارات تخطف من يمي محد يوكف نزلت من الجسر واشوف سياره عاليه بيها ثنين شباب واحد لابس شفقه جنه شكل ذول الامريكان الي يلبسون هوايه سلاسل فضيه وذهبية وبصفه واحد عكس ستايله ضعيف و وجهه طويل بس يا الله مبينين مو راحه

انرعبت منهم حييل ومشيت بسرعه وهم بسيارتهم وراي وحد كد راسه من الشباك وصاح عليه.. الحلو شعنده يمشي الوحده

عفتهم مجاوبتهم وهم وراي ويفترون ويرجعون لنفس طريقي احس گلبي وكع ببطني دنكت ولزمت حجاره بيدي كلت بس يجون اضربهم

مشيت سريع وصرت على التقاطع اسال منين اركب لساحة الطيران لباب الشرجي محد يعرف لو يوصفون وصف غلط

شويه واجت دوريه مال شرطة نزل منها ملازم اول كال بصوت حاد.. اوكفي

وكفت وباوعتله بحده بعد ما عقدت حواجبي.. خير محتاج شي

ضحك كال.. خاف انتي محتاجة شي

شديت على الحجاره بقوه وجاوبته... لا شكرا ممحتاجه

خليت ومشيت خطوتين وهو صاح عليه بعصبية كال.. اوكفي لج

درت وجهي عليه واني بقمة غضبي... شنو لج شنو اشتغل عندك اني احترم نفسك مو عود ضابط وعلى جتافك نجمة تهين بالرايح والجاي

رفع حاجب مستغرب من جرائتي كال.. صار ساعه مراقبج انتي مهزومة من اهلج لو شنو قضيتج

شديت على شفايفي.. والله اني حرة نفسي مهزومة ما مهزومة انت شدخلك

اشر للشرطي كله .. اعتقلها

بلعت ريكي بخوف ورعب لا مستحيل مو مال ادخل سجن بالعباس ابويه يذبحني على القبله وما يرق اله جفن تقرب مني الشرطي واني عطت بي... وخرررر ونبي اظل اعيط واركعك بهاي الحجاره بس تتقرب مني اني لا ضايعه ولا مهزومة بس ظليت الطريق وكدا اعرف منين ارجع

رد بغرور .. تمام عود هناك بالمركز كولي هذا الحجي

جاوبته باستنكار وارجف.. لا مستحيل ما ادخل مراكز اني لو تموتني هنا ما ادخل ويمكن انت جذاب تريد تخطفني اصلا انتم الضباط مو راحة وكلهم عيونهم زايغه

رد عليه بضحكة.. واااو ما شاء الله الايام تمام دام هيج تتجاوزين وما تحترمين نفسج اليوم اعتقلج اعتقلج واخليج تعفنين بالسجن حتى تعرفين شلون تتجاوزين على الحكومة يا ادبسز

جاوبته بحده وارجف.. لا تتجاوز ولا تغلط والله بس تاخذني للمركز اكلهم غلط عليه وابليك بلوه

جاوب بضحكة مستفزه واني افور من القهر.. مو عساس انتي ما تغلطين وابد ما كلتي الضباط مو راحة وعيونهم زايغه

رديت عليه.. واني شمدريني اشتم ايدي هيج يحجون عليكم بعد اني شمدريني

كال.. دمشي للمركز وبعدين نتفاهم

كعدت والحجاره بيدي.. والله ولا اكوم وهاي كعده شنو انوب واحد يمشي بأمان الله تعال امشي للمركز شنوهالمهزله شفتني امشي ويه واحد لو شايله عبوه ناسفه

اشر للشرطي.. جيبها وراي

خله وراح مشه واني تخبلت ما قبلت اروح وظليت ابجي هو رجع عليه حط المسدس براسي كال.. تمشين لا افجر راسج

جاوبته من بين دموعي.. اي العباس عليك فجره انت متعرف شحيسون بيه

رد عليه بعصبيه.. اي انتن هاي سوالفجن تسون المصيبه وتكعدن تتبجبجن

يالله هذا شكد حقير مصر ياخذني شكد حاولت وياه ما قبل واخذني للمركز من شفت المركز ودخلوني واني انهاريت بالدموع والنحيب ودخلوني للسجن

......................

جيجي

جنه نايمين وضايجين حيل من وره ابويه لان كتل سولين عرفتها سولين محتعديها سلامات لان هي عصبيه وابد ما تقبل واحد يدوس الها على طرف حتى لو جان ابويه

بس ابد ما تسكت عن حقها جنت حيل مقهوره عليها ابويه حيل اذاها وهي ترفه ممتحمل وصغيره جانت هي وافيان وكحلت عكسي اني حبابه وفقيره اني اخاف من كل شي لان اعرف النتائج واعرف ما ااذي غير نفسي ومجربه الوجع ما اريد اتوجع اكثر لهذا السبب اني مستسلمة اكل شي

الصبح تقريبا الفجر هسه طالع الضوء ما نسمع بس الباب تفلش تفلش فزينا من نومنه مرعوبين وابويه طلع من الاستقبال يركض وهو يلبس دشداشته الجربه المزروفه من ورا

فتح الباب وهو يشوف ابو سعدون كله.. مرض حتى مرض ما اخجل ما تستحي فلست الباب من الصبح ما دكلي انت شني غراب وكاعد النه من الصبح

رد عليه ابو سعدون بحقاره.. اي حقك نايم ورجليك بالشمس بنتك سولين انهزمت لو تلحك عليها لو متلحك

ابويه باوعله مصدوم ومتفاجئة من ادعائة كله وهو يدفعه.. دكل نعل شني سولين انهزمت غيراحط راسها بالبلوعه واذبحها انت شبيك متحلم وجايني

رد عليه بخبث.. والله العظيم دور بيتك واذا لكيتها هذا شاربي ازينه

عاطت بيه افيان.. هو انت عود هم عندك شارب شاربك جنه شارب عفطي

ابو سعدون.. شوف بنتك شلون ما عندها تربيه تغلط عليه

ابوي ركض للبيت وهو يدور على سولين ويصيح.. ولج سولين ولج كح.. بحق علي اذا صدك انهزمتي الا اذبحج واشمرج وره السده وينج بت النعال بت السكط

دورنه ماكو عزا صدك سوتها وانهزمت تصخمنا وتعزينا خرب شلون ورطه ابوي انجن صار مجنون رسمي وشك الدشداشه ويلطم على صدره عبالك صار مثل الغوريلا من تلطم

وهو يصيح... بووووويه بوووويه انهبت بويه كح ..مو بنات تعديت وينك بويه كتلت المره وما ارتاحيت شكلٍ لرجلها اگلة العاهره انهزمت

اني ظليت الطم على وجهي وابجي صخام الصخمني عزا العزاني وين رحتي ولج سولين شسويتي بحالج متعرفين بي مجرم يموتج

افيان ردت بكبرياء... احسن شي سوته خلصت من ابوج الجلب

رديت عليها بقلب محروگ.. ولج انتي شتحجين انت ما تعرفين شحيصير بعدين حتصير مصايب

ردت عليه بعدم مبالاة... اوووي دروحي ظلي الطمي شكد فاهيه ومكروهه

خلت وراحت كعدت يم امين تلعب هي وياه حيرتني يا الله هذا البيت احس نص العايشين بيه مخابيل

ابويه رجع ظل يفتر ويلطم ومتوتر وهو يصيح.. بت الچلب بت السكط وين ترحين اله الحكج بايار الكح.. ساقطات ويجي واحد ويكلك لبنات رحمة لبنات قندره ما يجي من وراهن غير الهم و وجع الراس بسيطه اذا ما دفنتجن وانت عدلات هو ينلام ابو لهب مدري ابو جهل من جان يدفن البنات وهن عدلات يعرف يعرف ما يجي من وراهن بس طيحان الحظ

اخذ الموبايل وهو يرجف واتصل كال.. الو اذا ما عندك شي تكدر تجيني اي ضروري اي للبيت عفيه مو تتاخر مصيبه وطاحت على روسنا انهبنا يالاشتر انهبنا

ظل يفتر ما كعد وحط روحه بالگاع وكل شويه وصفگ اديه باسف.. تنهزمين واني امسح على ظهرج ومدللج دلال يجي خطيبها احتار شجيب بس كون ترضا ست سولين لا اخلي عصاير لا كعك لا كيك

استغفر الله يجذب الجذبه ويصدكها مدري شنو من رجال اندك الباب صاح على امين... امييين روح افتح الباب لا اشك الخلفك

خطيه امين جنه اني حيل يخاف منه وهو اصلا ضعييف بس العظام اظل بس الروح ما بي حيل رفسه راح فتح الباب ودخل الاشتر شاف ابوي كاعد على الكرسي بالحوش وحاط اديه على راسه

دخل حقه اختي تخاف منه اختي تخاف!! لا والله اختي ما تخاف لو تخاف ما انهزمت وخلتهم راس يركع براس بس هو جان مبين على وجهه القساوه والجلافه ودوم وجهه معبس وعاكد الحواجب

وكف مدام ابويه وابويه جان كاعد رفع عيونه اله سال ابويه بهدوء.. شكووو

رد عليه ابويه بحسره... سولين انهزمت

ما شفت بس ابويه طار من بين اديها شاله من ياخة دشداشته وهو يحجي وياه بهمس مرعب بحيث اني شردت للمطبخ واباوعله... لا تلعب عليه شنو انهزمت

رد عليه بخوف وارتباك.. بالقران انهزمت ما اعرف جنه نايميين وطالعه وشايفيها الجيران ابو سعدون تعرفه هو شافها نكتت لبيت عليها نكت ماكو دورت منا منا ماكو

صرخ بيه بقوه حسيت اركان لبيت اهتزت حطيت اديه على اذاني واني ابجي هاي شلون اختي تتحمله وهو ابوي العصبي ولما يخاف صار بيده دجاجه خفت حيل وارجف من البجي

رد عليه بقوه وصوت عالي شفت الشريان طگ برگبته وجهه صار نار... ليييييش انهزمت احجي شسويت الهااااا

رد عليه ابويه بخوف... والعباس كل شي ممسوي الها حتى اسال البنات مدللها دلال انت غير موصيني عليها وهي امانتك شلون ااذيها حتى حتى حتى

عاط بيه بقوه وهو يهز بيه... حتى شنوو

رد عليه وهو يبلع بريكة... حتى اخذتها للسوك اشتريت الها ملابس كلت خاف تريد تجي تشوفها حتى انزعها الاسود

شد على شفايفه بقسوه ورد عليه ببرود وهدوء عكس اعصابه المحترگة.. تعلمني بسوالفك تعلمني بيك انت شنو جذب لا تجذذذب مفهوم وكول شسويت الها

صاح علينا وهو زانگة... بويه افيان بويه جيهان تعالن سولفن شلون مددلها وهي من وحدها انهزمت

اجت افيان واني ما طلعت كلتله وهي روحها بخشمها.. والله عمو بصراحه ابن عمتي حارث يحبها وهد على ابويه وهو تخبل لزمها سكطها تسكط بصونده وهي انهزمت وصلت للموت

ابويه فتح عيونه وهو يباوع الها ورجع باوع للاشتر وهو يجذب افيان كله... ككك بي جج جذ

بعده ما كمل كلمته وهو جابه براشدي لزكة بالحايط وهو يعيط عليه... اني شكتلك مو كتلك ما تطخه شعره من شعرها ما تلزمه انت شنوووو شنووو تريد تقضي عليه

تخبل تسودن حسيته يعيد فد حادث براسه لزم ابويه وخنكه وابويه كوه يتنفس جنت ابجي بس ردته يحس بنفس الوجع الي جنه نحسه دفعه وكع على ظهره وهو يتلوه

مسح وجهه بتوتر وهو يستغفر ... استغفر الله ربي واتوب اليه استغفر الله

اتصل موبايله رفعه ونزل بذاك الغلط نزل على الترابي ...ابن الكلب ابن السكط ابن العاهره من اجيج اترس وجهك تفال امشييي ولي منييييي مو بحالك

قفل الخط ورجع على ابويه ... وين تحسها تروح

رد عليه .. ماكو مكان غير بيت عمتها اكيد حويرث النذل اخذها وقشمرها بس هي مو زعطوطه حتى تتقشمر هاي كتلها حلال ودمها مستباح هيج حق الله يكول

جاوبه بخزره وكفت ابويه عند حده... عووف حق الله ومن اخبارك تجيني صار معلوم هسه اني رايح

رد عليه .. اي اي صار معلوم واني راح اروح هم ادور بلكي الله والگاها حتى نذبحها واذا تريد ازوجك جيهان وافيان

رد عليه بجمود وهو يرفع اصبعه بتهديد .. خليهن على كلبك غير سولين ما اريد

خله وطلع وابويه تخبل رسمي وهجم على افيان وهي شردت بالحمام وقفلته وهو فلشه تفلش ما فتحته كلها.. ولج عار تنافقين عليه تشهدين ضدي اليوم ازوركج بالصونده

ردت عليه باستفزاز.. انت ما علمنا على الجذب واني معرف اجذب هيج حق الله يكول

رد عليها بغضب... حق الله مو .. اذا ما شوفتج ان الله حق اطلع سكط ابن سكط

خله وطلع وهو يسب ويغلط ويلطم بس اني گلبي نار على اختي سوده عليه والله سولين متستاهل عذبوها حبيبتي الله يحفظج وين ما جنتي

..................

رنا

كاعدين اني وامي دنسوي العشاء وامي كل شويه تطل على حارث  وتتاأفأف وتردد حسبنا الله ونعم الوكيل يا ربي الولد كاضيها كله صفنات شو اسوي له بالله هسه شلون اريحه ...

اشرت الي روحي يوم روحي عوفي اللي بايدج  وروحي يم اخوج سولفي ويا لهي شويه اني اكمل العشاء

توجهت اغسل اديه ، گتلها هسه الي تصيرين اخت عامر والله خطية اخويه ينكسر گلبه هيج

امي وهي تلف اخر كبابة بقت بايدها گالت شسووي حظي مدري حظه

غسلت اديه ونشفتهم ورحت يم حارث بالصالة
كعدت بصفه وهو صافن ويتحسر ..

گتله بحنية ممزوجة بحزن :- حارث

هو فز وكاأنه مستغرب شوكت جيت وكعدت يمه
عبالك هالصفنات اخذت دقايق من عمره وفصلته عن كل العالم الي حوله ...

باوع عليه وسألني ها صار العشه؟

رديت عليه لا والله بعد شوية هسه خلصنه لف الكبة جوعان حبيبي ؟

هز راسه لا عادي شوكت ميصير

شبيك صافن ؟ سألته

باوعلي ورد يعني متعرفين ؟

گتله تفكر بيها أكيد بس على كيفك ويه نفسك شوية اذا مقسومة الك تصير هو كل شيء بالقسمة

دار روحه بحيث صار كله مقابيلي
گال رنا اني اريدهه اريدهه بحيييث مأيس احصل عليها شعور ما كدر اوصفه الج رنا والله تعبت وباجر كلش ضروري اروح امر عليها

جاوبته لا تجازف حارث عفية مو بس انته تنضر حتى هي وخواتها خالي مو أدمي وطايح حظه يأذيك ويأذيهن وعاد هو شلون يحب أمي ويريد الحجة عليك وعليها

جرهه حسرة طويلة وگال عدل حچيج  نشوف شون راح تصفى وان شاء الله تفرج

كمت كتله اني اروح اسوي العشه ويه امي مو تروح تنام مبقى شي ونخلي

هز راسه واني رحت يم أمي للمطبخ حجيتلها عن الكلام الي حجينا بي أني وحارث

بعدها اخذت طماطة وقطعتها شرائح ثخينة وگليتهه
وامي گلت الكبة وطرشي ولوبيا مسلوكة وخبز وجاي وحضرنه الميز مال الطعام دنتعشى

شويه وجان تندك الباب بقوووة وبخبال تركنا الي بأيدنا اني وامي ووحدة ظلت تباوع للخ

سمعنا صوت الباب تنفتح يعني طلع حارث يشوف منو
وماما گالت بقلق هذا منو الي يدك الباب هيج !

استمرت الباب تندك بعنف وصوت حارث يصيح وهو واصل لنص الگراج يگول اجييت اجييت شسالفة

ركضنه اني وامي للشباك نباوع ، فتح الباب حاارث
وواحد رأسا لزمه من ملابسه وسحبه وعاط بوجهه
ووينها و لك ووينها

ووراه فات خالو عامر

ماما ظلت تلطم على وجهه وعاطت يييمه حااارث

خلت شيلتها على راسها وطلعت تركض حافية للباب
واني لحكتها ميتة خووف على اخوويه وگلبي يدك بقووة وظلت تفارغ بيهم عن حارث

شفته هذا الي لزم حارث جانت ملامحه حادة واكو طبرة بنص حاجبه وضخم وقوي كولش اعصاب اديه وشرايينه بارزه واكو اسم مكتوب بحافة جف ايده من ناحية الخنصر

من خوفي ظليت الطم على وجهي وااصيح عووفوا اخوويه عووفوا حارث شتردوون منه عووفوووه

اني اصرخ وامي تتوسل بيهم يعوفوه ....

طب خالي وصار يصيح ولك وينها وينها طلعووها طلعووها گ...د

امي حاجته لخالي بتوسل على بختك خويه جاي هاد علينه انت والغربة

عااط حاارث شكووو شبيك على منو تدوور انت ؟

رد عليه سوولين طلعها يله طلعها عندك طلعها لا افجر راسك هسه واحرك البيت على راسك وراس الخلفووك

گال حارث والله وروح ابوي وداعة أمي مو يمي مااجت مااشفتهااا ليش وين راحت شسويتوا بيها

وامي هم اكدت كلام حارث ووجهت كلامها الهم
والله مااجت ولا شفناهه الله شاهد هاي كدامك البيت فوت وفتشه بس عوف ابني وحيدي والله ماعندي غيره والله

صاااح عاامر جذاابين جذاااب طلع مسدسك ابو إبراهيم صووبه صوووبه حتى يخاف ويطلعها

عاط بيه هو هذا ابو طبره وكله... اسكتتتتتت

صااحت امي لاااااا فدوووة لعينك بغيرتك بعرررضك ترركه

عاط عاامر بلسانه الزفر وصووته المدووي المقرف
انجبي سكتي ابوووو ابراهيم ماعليك منها هيه هاي شكرية ساااس اابلا مااعليك منها كتله ابوو ابرااهيم كتله

هذا الشخص الضخم ابو حاجب مطبور والي خالو يصيحله ابو ابراهيم
ترك حارث فجأة

والتاف على خالو وكله ببنبرة كلها جبرووت
اطلع

ظل عامر يهد ويعييط للككك لاا تعووفه لااا معليك منهم لااا صووبه صووبه خلي يطلعهااا عنده ضاامها ابوو ابراهيم

عاط بيه بنبرة أمر صاارمة وهو يهد عليه
اششش اسسكت اسسسكت كتلك اطلع لا انت افجر راسك

خلى عامر يسكت  وابتعد خطوات عنه خايف  وظل يهز براسه ويدنك

وحجى الرجل المرعب بنبرة تنشف الدم
وهو يباوع لحارث من فوك ليجوه
والي جان يلتقط انفاسه بصعووبة

حارث بريء من خطيتها وجبان ميسويها
اصلا لو صدك عنده مابقى ابيته جان اخذهه وانهزم ومابقى ابيته

ظل عامر يباوع علينا بحقد وبكرره وهو ساكت
وابو ابراهيم مدري شسمه ابو حاجب مطبور من دهر صابه وثاب خالي كون
باوع بنظرة تفحص بيها البيت من بره  وطلع

وتبعه عامر وهو يمشي ويرجع يلتفت ويباوع علينا بنظرات متوعدة

بس ابتعدوا كام حارث وهجم على الباب دفعه حيل وسدااه وهو يعدل بقميصه وعاكد حواجبه ومعصب .. سولين وين راحت وليش راحت اكيد سوولها شي عرفتها متريده خليني اروح ادور عليها

ركضت امي حضنته وتشهك خايفة
ودخلنه للبيت مرعووبين ونتنفس كووة وتتوسل بيه... يمه حارث يمه عوفنه يمه شلون بيه اجو يكتلونك سوده بوجهي منو الي يمه

عاف امي وهي تنحب وتبجي وخله وراح

راسلت جاستن كتله .. الحك على حارث مدري وين راح

رد عليه بعصبيه.. انتي ما عندج غير نعال تعال جاسم روح جاسم البوي مال الخلفج اني

جاوبته بعصبيه.. دمشي روح شكد مزعج هد علينه خطيب سولين وخالي اجوا يكتلون حارث لو ما امي توسلت بيهم ناس مجرمين

كال .. هو اخوج ما يكعد هم ذاك اليوم اخذني وراح وصارت عركة شكبرها كدام ابو الاعشاب من وره سولين البنيه انخطبت عوفها بعد

صكيت على اسناني.. دمشي روح شوف حارث وين صار

رد عليه .. هسه اموت وتترملين بعد منو ياخذج والجهال تتيتم

هزيت ايدي اني وين وهذا وين رزلته وخله وكال رايح رايح لو مطرود من العشيره ولا هالعيشه

..................

سولين

من بعد ما دخلت للمركز هم رادوا عنوان اهلي واني من الخوف خرطت العافيه الرائد جان يخوف شضخمة وكرشه طاخ بالميز خلاني بسرعه اعترفت على عنوان بيتنا من دون اي مناقشه

دخلت للسجن ويه النسوان بس حسيت بذل وقهر بحيث كلش تندمت عن الي سويته ما ردت اوصل لهيج مرحلة حيل كرهت نفسي انوب شلون سمعه معفنه خريجة سجون لا هنا ولا هنا والناس ما ترحم هي الناس او ابويه ما يرحم والله يذبحني باليلة ظلمة

سلمت امري لرب العالمين ما عندي غيره واستسلمت للامر الواقع وانسابت دموعي على خدودي ابجي من اول ما اجيت لحد الان راسي احس حينفجر من الالم

ابتعدت عن كل السجينات خفت منهن حيل ولا حبيت اتقرب منهن ولا انتابني فضول تجاهه عقلي طاير من راسي ما ظل عندي عقل اصلا وبالي بس يم ابويه اذا يجي يموتني كال لا والله يكتلني مثل ما كتل امي

ظليت للفجر كاعده والخوف والبجي وكل ما ينفتح الباب مالت السجن ارتعب واطفر من مكاني عبالي اجه ابويه وراح يسلموني اله

تقريبا صارت ب١٢ الظهر وانفتح باب السجن كالت السجانه .. سولين عامر يله تعالي الرائد يريدج

اخذتني وياها اول ما دكت الباب وامرها بالدخول دخلت واني اشوف ابويه كاعد والاشتر احس رجليه صارت خيوط حسيت حيغمى عليه من الخوف ملابسي بيدي والايد الثانيه لحد الان لازمة بيها الحجاره لزمت بالسجانه واني اتوسل بيها... فدوووه لا تخليهم يكتلوني فدوه حبابه لااااا والله هذول كتلو امي

ابويه وكف وهو يتوعدلي وعيونه تنطق بغضب وحقد ويتنفس بإجرام حسيت من خلال ملامحه مستحيل يمر اليوم مرور الكرام

والاشتر جان كاعد باريحيه وما بدر منه اي ردة فعل من شافني رد على الرائد كله .. نكدر نستلمها مو

جاوبته بخووف.. سيدي فدوه لا تنطيني الهم فدوه سيدي والله ذول مجرمين ماكو هذا ابويه كتل امي وهذا شهد على جريمته واني شفته بعيوني والله شفته بعيوني والله سيدي يموتوني مثل ما ماتت امي

عقد حواجبه باستغراب وباوع عليهم يتأكد من مدى صحة كلامي وبهذا الشي افتهمت خالي ما رافع دعوه ضد ابويه

كال الرائد .. ادعائها صحيح لو شنو.

رد عليه ابويه... جذابه بالقران لا كاتل امها ولا شايفها هاي تتبله عليه شلون كاتل امها وهي اصلا من وره ابن عمتها شردت لان وهمها بحبه وعاد يتزوجها واحنه ما نريده وانهزمت اله

جاوبه .. بس هي دكول انت قاتل امها وماتت بسببك اريد اعرف مدى صحة كلامها

رد عليه الاشتر .. سيدي ممكن احجي وياك على انفراد

امر الشرطيه تطلعنه اني وابويه اول ما طلعنه وهو كفخني على راسي لطش راسي بالحايط والشرطية عاطت بيه وهي ترزله.. انت متستحي انت متخجل لازم تكتب تعهد ما تاذيها والا مراح نسلمها الك فاهم

سكت وهو يتوعد بيه ويخزر بيه واني احس ملك الموت محاصرني وابجي من كل گلبي وارجف اكيد حيسلموني الهم والله يموتوني والله محد يحميني محد الي حسبي الله ونعم الوكيل ياربي اوكفلي لا تخليني

كال وهو يتهدد.. تشتكين عليه ولج ساقطه ولج ادبسز تشتكين عليه بسيطه بسيطه صلفه وعار مثل امج اصلا اشك بيج انتي بنتي ما احلف عارات اني والبت الي تشتكي على ابوها عار على شواربه

بعدها صاحولي هو جان كاعد باريحيه بدون حتى ميباوع الوجهي وهو يباوع للحلقه بهدوء تام حيرني

الرائد كال.. اكتبوا تعهد ان متتعرضون الها واخذوها وياكم

انخبطت بطني من الخوف والرعب لا مستحيل ما اريد اروح وياهم ذول بلا ضمير والله يموتوني والله يكتلوني راح اموت مثل امي ردت احجي بس احس لساني تقيد حتى كلمة ما كدرت انطق طلعوا واني امشي وراهم جان يمشي بغرور وخطوات ثابته وابويه مثل الذليل يركض وراه

طلعنه من المركز كلت بس اشوفلي سياره اسمر روحي جواها واكتل نفسي ولا اظل وياهم والله اخاف يا ناس اخاف شلون اندارت عليه الدنيا جنت اظن اعيش مرتاحة من دون شد اعصاب وخالي يحميني منهم وتالي لعبت بروحي لعب وما اشوف نفسي الا وصلت للسجن

ما عندي حل غير اسمر نفسي على سياره واموت احسن ما يتفننون بقتلي وعذابي

ما حسيت بي غير نبت اصابعه بكتفي عبالك بسامير عطت واني اباوعله بتوسل والدموع ماليه وجهي

صعدني بالسياره وره وسد الباب بقوه حسيتها نفلشت ونلحم الحديد على الحديد من كد ما ضرب الباب حيل

صعد بالصدر وابويه بصفه ساق بسرعه من دون ما يحجي اي حرف ولا يعبر عن اي شي من خلال ملامحه بس حسيت بي مراضي عن الموضوع

ابويه جان يثرثر واني ابجي من كلامه گله.. طلگها اشتر وازوجك افيان صح صغيره ولسان بس احسن من هاي الساقطه هاي توديك وره الشمس

هو مجان يرد عليه ولا عبالك يحجي وياه ابد ورجع كمل.. شوف اموت وحده انطيك الثانيه وهاي لازم تموت على هاي سالفتها خلينه ناخذها وره السده وندفنها ونكتلها وهو منو يطلع. الها يا عار هي اصلا عار

مسح وجهه بتوتر وابد ميحجي ولا ينطق حرف

رد عليه .. ادري والله فعلا لازم تنكتل لان مثل امها هاي انهزمت على مود حارث شكيت عندهم شي هاي هم تعل كلبك مثل ما اهمها علت گلبي وكتلتها يله ارتاحيت

لزكت روحي بالكشن وارجف وابجي من كلامه ظليت اشهك بصوت عالي هو من سمع صوتي وما أعرف لإي مكان مجهول ماخذني باوعلي من جام السياره شديت على الحجاره الي بيدي وشهكت بلعت ريكي جاف ومر ورجفت

وكف السياره وملامحه كلهن جمود وهدوء اكل طرف شفته وابويه كله بفرحة... هااا انزلها نكتلها

هو شد على شفايفه وسحب مسدسه بقسوه و جهه عليه كله ... انززززل

ابويه بله ريكي بخوف واني رجليه ماتت ما صرت احس بيهن وكلبي يرجف كلي ارجف عبالك مثل سعفه بنص الهوا

كله ابويه بخوف وارتباك... اااشر اشتر

رفع ايده الثانيه والايد الثانيه بيها مسدسه كله اذا رمشت وما فتحت الباب ونزلت تفطس بسياره انزززززل

نهاية البارت .. يتبع

كونوا انتم كونوا بخير ... احبكم 💔

اعذروني على التأخير جان عدنا مجلس للرسول صلى الله عليه واله وسلم

ولا تنسون التصويت حتى ما اقصر وياكم🥺💔