رواية #وكر الأشتر الفصل التاسع 9 - بقلم الكاتبه سمو العراق

البارت التاسع
رواية.. وكر الاشتر
بقلمي.. نور سمو العراق

💔💔💔💔💔💔💔💔💔💔💔💔💔💔

اصبحت أجبر نفسي على رؤية تجسيد البؤس الذي أنا عليه.•
| ⌯

....................................

احس بشي كاعد على صدري وعقارب الساعه صارت ما تمشي بمجرد ما اعلن موافقته حسيت عظامي ذابت

وبعد ماكو امل للسبيل والنجاة من هذا المستنقع وشعور محبط ما لكيتله تفسير غير انه نخر عقلي وروحي

ولحد الان عندي امل حارث يجي وينتشلني من هالعقد الباطل جنت اباوع بالعيون والحسره بعيوني

سألني الشيخ عن موافقتي وجنت صامته وكرر عليه السؤال اكثر من مره جاوبته بارتباك وروح ذبلانة من الحزن... انييي لا هو ما اعرف شكول

ركز عليه بنظره وهو يعقد حواجبه ومنتظر مني اجابه باوعتله وسرعان ما شتت نظري

رد عليه الحجي اديب وهو يحجي بصوت جهوري.. شبيج بنيتي بيج شي

بللت شفايفي كد ما جفن وجاوبته... انييي

باوعت لابويه بشرود واحس نفسي تايهه شفت بعيونة نظره خوف وارتباك وقلق وهو ياكل ببقايا شفته وعبالك كاعد على نار اشرلي بعيونه أوافق

حطيت ايدي الترجف على شفايفي وكلت هاي فرصتي لازم ارفض مو معقوله اتزوج واحد جاي لوحده يخطب وب١٢ باليل حتى السكارى ممسوينها هاي السالفه

شجعت نفسي وحجيت... اني ما اريد اتزوج اني اريد اكمل دراسه

هو باوع المحبسه بعدم اهتمام وعدله بطرف اصبعه

رد عليه ابويه بضحكة متوتره.. اي هي بس خطوبه وتكملين جامعتج يله تتزوجين اكيد

جاوب الشيخ كال.. اي بنيتي كملي دراستج عند زوجج اذا حابه

جاوبته بحسره وجسمي كله يرجف.. ميخلوني

رد عليه الشيخ... اكتبي بالعقد من ضمن الشروط

هزيت راسي بنفي.. لا اني اصلا ما اريد اتزوج

وكف ابويه وهو يحجي بارتباك وضحكة مستفزه.. بابا سولين حبيبتي خطيه هي مرتبكة وخايفه شويه لان الخطوبه صارت مستعجله

وكفت بقهر.. لا مخايفه عادي بسس

وكف يمي وهو يكطع كلامي.. شبيج بابًا حبيبتي يله ميخالف خلينا ندخل جوه ونحجي ما تردين عادي ممجبورين قابل ابن عمج وناهي عليج

لزم ايدي وهو يجر بيه واني صامده وداخلي يغلي شديت على شفايفي بقسوه عرفته حيكتلني ويضربني ويهددني

كلهم من رخصتكم شويه بس اريد اشوف بنيتي شبيها اني ما احب اجبرها

باوعله الاشتر بنظره غرور ورخى ظهره باريحية على القنفه وما نطق بحرف

اول ما طلعنه من باب الاستقبال وهو دمغني على راسي حيل حسيت مخي طاح بحلگي وغوشت الدنيا عندي بس ما عطت ولا صرخت ومن قوة الضربه عيوني حسيت حراره بيهن ودمعن

سحبني للغرفه وخطيه اخواتي منتظراتني من شافني انرعبن جيهان اجت تركض عليه كالت.. ها حبيبتي

هو عاط بيها... وخري منها لا امدج وياها وانعل ابو الخلفجن كح..

افيان جانت واكفه بجبروت حتى ما تقربت مني خلت اصابعها بطرف اسنانها وهي تكرض بيهن وتهز برجلها بسرعه دليل على ان هي تكتم غضبها

لزمني من شعري وهو يتهدد.. بت السكط بت النعال ولج انتي شني وكاعده تتشرطين على الاشتر من نعال بفركج وفرك الخلفج ولج والله تمنيتهم ما موجودين الا ادفنج بمكانج ادبسز عاااار

فتحت عيوني بغضب وحده همست من بين اسناني... ما اريده ما ارييييده تاخذني للمحكمة واكلهم جبرني

ما حسيت غير ببوكس على بطني حتى ما كدرت اصرخ انكطع تنفسي حسيت عيوني حتطلع من راسي نزلت على نفسي وايدي على بطني واني اصارع الوجع

كعدت على ركبي اتلوه واريد بس اتنفس ماكو ركضت عليه جيهان وهي تبجي.. عوفها موتتها ما تريد تتزوج هي گوه

سحب جيهان وركعها بالحايط وهو يهمس بصوت خافت حتى محد يسمعه... انت المشوهه الثانيه هم تعلمتي الگوا... منهن

بسيطه لا توافقين وحق الله وحق الله اليوم اسويها عليجن طف كربلا اخليجن تتمنن الموت وما تلگنه

اردف بكل جديه وهو يتوعد... بس خلي يطلعون والله احركجن بنار ونفط واكلهم حادث وماتن ولا من شاف ولا من درى اصلا منو يطلع وراجن محد الجن عار محد يريدجن من غسلت عار امجن والعالم بعد حتى متباوع بوجهجن لان عار مثلها

ردت عليه افيان مثل لبوه مفترسه... والله عمي زين ابونا وتعيرنا محد النا لعد شخليت للغريب صدك ما تستحي وما تخجل وامي مو عار انت العااار

هو تخبل واني هماتين تخبلت افيان تسكت تسكت وبعدها تهجم وما تحسب حساب الكلامها ركض عليها وهو يخنكها واني ركضت  عليه متناسيه كل وجعي وهي مجان الها مكان للهروب حصرت نفسها بالزاويه صارت مثل العصفور بيده

وهو يخنك بيها ويسب ويغلط لزمته واني اتوسل بيه .. عوفها عوفها الله عليك عوفها حتى اوافق بصاحبك

رخى من قبضة ايده وعافها كال.. واذا دخلنه للاستقبال ولعبتي لعبتج

هزيت راسي .. لا والله بس عوفها موافقه

رد عليه بعصبية.. كولي وروح امي

كتمت عبرتي وشهكت.. وروح امي بس عوفها

كال يله غسلي وجهج ورتبي روحج وامشي رحت للمطبخ غسلت باوعت للمرايه شفت خشمي طاك دم وبطني احسها تكصصت من قوة الضربه

خليت وطلعت من ردنه ندخل للاستقبال حظني شمئزيت منه شكد منافق ودجال دخل وهو يضحك... هههه سولينا بنيتي تكول ابوي يفصل واني البس قنعتها وكلتلها ما تلكين احسن من الاشتر واني ما اريد اجبرج ما احب اجبر لبنيه لان هذا زواج بس هي بكيفها بعد

من يحجي اني افور اكرهه من يحجي خلي مثل ما هو ولا يتلون مثل الحيه كعدنا ورجع سالني الشيخ اخاف مجبوره جاوبته.. لا موافقه ممجبوره

بس هو حس ان اني مجبوره من كلامي بجمود واحجي واني كاتمة حزني كال... لا تخافين احجي وبعدين ليش وجهج اصفر

سكتت واني اكل بشفايفي جاوبه ابويه بحزن مصطنع.. تذكرت امها ماتت قبل كم شهر وتريد امها وياها بهاي اللحظه حقها مسكينه

صدك هنا ما تحملت رغم جنت صايره وما بجيت بس هنا ما كدرت انهارت كل حصوني وبجيت بحسره والشيخ انقهر عليه كال.. الله يرحمها ويحسن اليها ويجعل مأواها الجنه

بعدها اخذ موفقتي وكمل العقد وكف الحجي اديب وهو يبارك للاشتر حجي اديب جان حيل كصير ومدبدب شكد حبيت شكلة احسه كيوت عكس الاشتر دنك عليه من سلم عليه جنه عمود فاتحة

الحجي طلع من جيبه علبه مخملية لونها احمر وفتحها جان بيها حلقات ثنين وحده فضه و وحده ذهب الذهب الي طبعا لان الذهب ما يلبس غير الذهب

اول ما فتحها كله يله وليدي الاشتر لبس مرتك حلقتها وان شاء الله طول العمر انتم سوه

تقرب مني واخذ الحلقه من العلبه ولزم ايدي هو ما لزم ايدي واني عبالك دخلت للقطب الشمالي ارجف عصر ايدي بيده وهو يخفف من توتري ورد عليه حجي اديب ببتسامه.. مبروك بالرفاه والبنين

وانطاني الحلقه كال.. يله بويه لبسيها لرجلج

من كال رجلج طنكرت اجيت اتعارك وياه واني اريد انهزم اول مره اكون بهالقرب من رجال ومو اي رجال رجال شهد على موت امي وصديق ابويه النذل

اخذت الحلقه والعلامات الانزعاج على وجهي بدون ما الزم ايده دخلت لحلقه للنص وهو كملها ولبسها ويباوع للحلقه بثقه وهو يتمعن بيها بإعجاب حجة وهي الحجي كله.. حلوه

رد عليه.. هدية عقد قرانك حتى تكول حجي اديب ميحبني

جاوبه... افااااا شوكت كايل انت الخير والبركة حجي اديب انت تچايتي

ظليت واكفه وكل علامات البؤوس بوجهي حجيت بعشوائية.. اكدر اطلع نعست اريد انام اول مره اشوف خطوبه ب١٢ شنو سكارى لو غربان ما نطلع بس باليل

عاط بيه ابويه... سووولين

رد عليه حجي اديب بضحكة... هههه والله حقها لبنيه اني هيج وكت نايم بسابع نومة مو مال خطوبه بس اليوم سهرت من وره الاشتر صدك اكو واحد يخطب هيج وكت

رد بهدوء.. كلش اعتذر بس شسوي شغل وظروف ان شاء الله على عرس من وكت

باوعتله بسخريه.. هم عوزها تصير الزفه بالوحده باليل ههه

باوعلي بنظره حاااده بس متعبر عن شي غضب قبول معرف عفتهم وطلعت رحت لغرفة اخواتي اجت جيهان تحجي ويايه تجاهلتها وخليت لفيت راسي ونمت وكل حزن العالم بصدري وبطني موتتني من الم

معقوله صرت اله مو حره تقيدت وياه وراح اتعود على شيطانين بحياتي احس نفسي اندفنت من دون موت حعيش مثل امي واكون ويه انسان مو من اختياري احس الحلقه باصبعي مثل الحبل المشنقه نزعتها وخليتها جوه راسي مستحيل تربطني بي حلقه ولازم انفصل عنه باقرب وقت

.....................................

جيهان

مرة الايام عاديه ومن بعد خطوبة سولين وسولين منهاره اعصابها متريده مو گوه بس احنه لا ما عدنا هيج شي لازم گوه علينه نقبل شكد كرهت ابويه وحقدت عليه

اندك الباب هو ابويه موصينه لو يتفلش الباب محد منه تفتحه ظل يندك الباب بقوه صحت من وره الباب .. منو

رد عليه .. اني ابوج موجود

شمئزيت منه.. ايع ابو سعدون شكد اكرهه مسبب عندي رعب وفوبيا جاوبته... لا مموجود

باوعتله من الزرف مال الباب جان لابس گلبيه رجاليه نص ردان لونها جوزي ورگبتها سبعه رگبته جنها رگبة سلحفاة يلعب النفس جان لازم سبحه وهو يسبح وكرعته واصلة لعلباته وكرشه متقدم ليكدام مقرف بشكل تدنه على الباب وهو يهمس... جيهان انتي مو

سكتت مجاوبته كال.. شكد احبج اني لحد الان مقهور عليج لان احتركتي اذا تقبلين بيه نتزوج

رجع كمل وهو يباوع للمنطقه اخاف واحد يلمحه كال... ابوج قشمرني عبالي يزوجني ذيج اختج لتدرس تاليها انطاها الواحد جلب وخبيث وكل سالفه عوجه مسويها ولسانه زفر وبس يغلط اذا ما طلع تاجر مخدرات اتفلي بوجهي

ايفان جانت واكفه يمي وهي طلعتله فتحت الباب كلتله بصوت عالي فضحته فضيحة... تعال خلي اتفل بوجهك من هسه ما تستحي على نفسك شكبرك شكدك كرش يعيش عشيره وكاعد تتغزل باختي امشي منا لا امدك بالخيس

انذهل من كلامها ورد عليها.. عيب بابا استحي اني بكد ابوج واجيت بس اريد اكلكم تعالوا اخذوا الحصه اجت

تخصرت.. والله اذا هيج تشوف نفسك بكد ابويه شكو كاعد تتحجي ويه اختي وتعالي اتزوجج دمشي روح جماعتك شبعوا مي ورد الشايب المخرف

ديرد عليها سدت الباب بوجهه

سولين جانت بالحمام لزمتها كلتلها.. شكو تردين عليه ما خليتي يولي ينبح مثل الجلب

ردت عليه بعصبيه.. انعل والديه بالقران انوب ما ظل عليه بس وسخ رجليه العار عود عباله امنه ماتت وعامر بالشغل فرغله الجووو الخايس المعفن شايب بكد جدي ويفترن علينه شكد سخيف

طلعت جيهان من الحمام كالت .. شكو شبيجن تصيحن

ردت عليها افيان.. ابو نعلون يريد يخطب جيهان وهاي الفاهيه بس صافنه انوب يغلط على خطيبج

سولين تخبلت .. ابن الكلب هذا شيريد والله بس بعد يجي انوم الطابوگة براسه السافل

وكفت بخوف.. سولين اخاف انوب يخطبني من ابويه ويزوجني الا حتى ونبي اكتل روحي واموت

جاوبتني... خيولي ونبي اخذجن وانهزم خاف تقبلت صديقه وقبلت ابو سعدون ما اتقبله لو اعرف انطيجن كلجن شهيدات

اندك الباب مره ثانيه وهجمت سولين وافيان عبالهن ابو سعدون فتحن الباب وهن يغلطن كل وحده لسانها شطوله ... لك ابو سعدون ليوم نمدك بالخيس

اول ما فتحن الباب وطلعت مره شايله گونيه مال قوطي وتطلب حاجة كالت بحزن.. صدقه جاريه لوجهه الله يارب يحفظجن ويستر عليجن

افيان بقهر.. حجيه ترا احنه نفسج بس ساحبين بالقران ربع ما عدنا

كلتلها بحزن .. عدنا الكعك مال خطبتج سولين خلي ننظي الها

هي دفعتنا ودخلت وهي تتلفت واحنه ظلينه نعيط عبالنه تريد تخطفنا صرنه جنه ثيران كالت بخوف.. ولجن اسمتن انلصمن برابيج

رفعت افيان اصبعها بتهديد.. احترمي نفسج ولا تغلطين يا حراميه يا بواگة

ردت عليها المره.. دهر صابج كون گلي گلي لسانج هالطولة

تخصرت سولين وهي تتهدد.. منو الكلج وبعدين اذا انتي حرامية وتههدينه وتردين تبوگين ترا كل شي ما عدنا غير دشداشة ابوي مزروفه من ورا

كعدت وحطت گونية القواطي بحظنها كالت.. دنجبن وجيبن ماي اني جايه بمهمة

عاطت بيها افيان وركضت جابت سجين من المطبخ وجفجير انطته المسؤلين.. مهمه شنو انوب ليكون تردين تخطفينة وتجدين بينه الحجي ولج لا نسويها عليج مثل ويه وسكينه نذبحج وندفنج بالاستقبال

ضحكت وطلعت جكارتها تدخن كالت.. تعرفن النقيب كريم مهندس متفجرات

فز گلبي من بين ضلوعي حسيت كريم موجود كعدت ولزمت ايدها.. اي عمو كريم ابن جدو كهلان شبي

ابتسمت بوجهي ومسحت خدي بحنان كالت.. جيهان مو صح

هزيت راسي بإي

ضحكت كالت.. واخو زينب عرفتج نسمة بارده مثل ما وصفج

كعدت سولين وافيان مقابيلها كل وحده لازمة سلاحة هاي سجين وذيج جفجير كالت الها ... شكو احجيلنه شبي عمو كريم

مدت ايدها بصدرها وهي تطلع فلوس كالت.. كريم دزهن بيد ابني هو يشتغل وياه اني اسمي ام وليد كال ذن توصلهن الجيهان واخواتها
ويريد اخبارجن يبعد بيتي

عقدت حواجبها سولين.. منو يكول كلامج صحيح انطينه دليل

هزت ايدها وهي تطلع موبايلها وطلعت صور ابنها عسكري ويه عمو كريم وبطاقة انتسابه مصورتها

افيان .. لعد شكو مسويه روحج مجديه

ردت عليها بعصبيه.. يمه منج يم لسان ولج غير هو كال ابوها ما يقبل واحد يدخل الهن فكلت اسوي روحي مجديه حتى من يجي بلكي ينقهر عليه وما يحجي

لزمت ايدها وسالتها بروح ذايبه... شلونه عمو كريم

احتضنت وجهي وهي ترد عليه ببتسامة حلوة.. زين يسألني عنج وكال سلام خاص لحبيبة عمها جيهان شكد يسال عنج

احس روحي طارت من الفرحة عمري كريم حتى هو مسافر وبشغل يفكربينه يارب يطلع يحبني يارب والله احس روحي ما تكتمل الا بيه احبه عشقي وروحي

كملت بحزن .. سولفلي قصتجن وكال جيهان مريضه وتعبانه وباله عندجن خطيه احجلي اكو احد ماذيجن صار وياجن شي حتى اطمنه

سولين ما صدكت گلبتها مناحة كلتلها.. اي فدوه خاله كليلة سولين انخطبت لهذا الشهد على موت امها وتنوح وتبجي ما تريده وابوها جبرها عليه فدوه كليله خلي يخلصني منه ما اريد اتزوجة

مسحت دموع سولين وردت عليها.. خوش راح اكله وان شاء الله ما تتزوجينه وبعد احجلي شكو ماكو حتى اوصله

ظلينه نسولف الها على كل شي صار ويانه واني اريد اكلها اني احبه اريد اعترف بمشاعري اله بس ما اكدر حالتي متسمح واني هو يعطف عليه وابد ممتخيلني زوجة الها هو بس اريد يساعدنا لان هو معتبر روحة عمنا

خلت وراحت المره قبل لا يجي ابويه واني انثولت انثولت بس صافنه ومرات ابتسم من اتذكر هو ما نسانه ودز علينه ويريد اخبارنه يارب ياكريم ان شاء الله اطلع شاغله بالك وتفكر بيه مثل ما اني افكر بيك ولو هذا الشي مستحيل وصعب المنال بس اكيد على الله ما يصعب

..............................

سولين

من بعد ما اجتنه مره من يم عمو كريم ارتاحينه نسيبًا وكالعادة ابو سعدون نافق علينه وكناله مجديه ودخلت علينه انطيناها ملابس من ملابس ماما صدقه

كال.. اي وزعن ملابسها حتى ما اظل الها ذكره ويانه هاي عار ما لازم نتذكرها هيج حق الله يكول

لا شافك الله كون

بعدها كال.. اليوم يجي خطيبج عود كليله خلينا نتزوج بسرعه اني مو يومية رايح جايب كعك وجاي خلي يتزوجج وبعد لا تجون انوب حلوه هاي بس الخساير من وراكم

جاوبته بعصبيه.. گله لا يجي ترا اني سني يوجعني ومالي خلك انوب يجي نص من ليل واني منعسه

رد عليه بغضب.. اكلي نعل ادبسز سنها يوجعها هي العايقه ادري بيج كاتله روحج على حريرث ابن شكيريه الدايحة بس لو تموتين ما خليج تاخذينه انوب خوش والله تريدني اناسب العارات

جاوبته بحقد.. ما اريده هذا صاحبك ما اريده لو يظل يوم بعمري ما اريده

رد عليه .. وطبج مرض عساج لا ردتي وبعدين ردتي او لا انتي صرتي اله واريد اشوف يا كوا.. يخرب الخطبه بله وبعد بلا كلام زايد الرجال يجي باليل اطلعي اكعدي يمه ولا تضوجي وتدوسين بكلامج اعرفج كح.. مثل امج

جاوبته بحرگة گلب.. عسا حوبتي ما تتعداك بحق الحسين الشهيد والله حتى گلبي يوجعني من وراك

هو كطف عليه الطاسه مال اجت براسي ظل يصيح ويغلط ويفشر يخليني كوة استسلم اطيع أوامره كتمت عبرتي وظليت انتظر عريس الغفلة عشتو

لبست ثوب اسود عريض مالت امي ولبست الشال كالعاده نزلته على وجهي بلكي يقرف ويطلگني تقريبا بالعشره واندگ الباب

احس رجليه صارت خيوط وماتن من الخوف والتوتر دخله ابويه وهو يرحب بيه... يا هلا وسهلا زارتنا البركة بالقران من تجينه فد افرح بصراحة هو البيت اكل بيه خطار ما تزوره الملائكة

رد عليه بسخرية وكآن يعرف دروب ابوي... ههه

دخل جوه وهو ابويه طلع الكعك من البوفيه ضامة وقافلها طلع تقريبا اربعه كال .. حطيهن بماعون وسوي جاي

شكد بخيل عابت انوب راح ظم البقيه وقفل البوفيه وظم المفتاح بجيبه هن كعكات لو ظام فلوس جان شسويت حظرته وانطيته اله اخذه كلي تعالي ورايه غلست ما رحت ظليت كاعده بالمطبخ

هو شويه واجه كال .. امشي ولي كدامي بت السكط

خليت ورحت وهو راح يم اخواتي عزا يريد يخلينا وحدنا لا مستحيل ما ادخل لو اموت كلت خلي اظل واكفه بالباب منا اذا اجه ابويه ادخل بسرعه واذا ما اجة اغلس وما ادخل

هو جان يخابر سمعته يكوله بتهديد... لا تتكفله شيل نفسك من الكلافه بالقران ادگك وارجع ادكة وانت تعرفني لا خجل ولا مستحى عندي وهذا ساهر المطي اذا ما ندمته فلا اطلع الاشتر

اردف بخبث... اي اني متعافي اكلك انت مو سكران وجاي تسربت على راسي امشي ولي من وجهي وهذا ابن الساقطه شغله وياي

كمل بعدم اهتمام.. اي سكران قابل اجذب عليك مبين من صوتك سكران تعلمني بالسكارى انت وبعدين شنو يهددني ويكلي اخليهم يشهدون ضدك

دخلي بس يجيبله واحد بشرفي الا اعلگة بالتيل واعدمة ولا عباله نسيت سالفته قبل وهذا جرح حاجبي عفته هيج حتى يذكرني بالصار على العموم الزمن طويل بينه واني اعرف شلون اندمة عود يريد يورطني ابن الكح.. وانت مو عبالك ما ادري بيك انت هم سافل ابن سافل

فتحت عيوني مصدومة عزااا يفشر مثل ابويه اول ما فشر دخلت بسرعه عليه ردت احسسه ان هو ممحترم وديجمل نفسه كدامي

اول ما شافني كطع كلامه وتنهد رد عليه.. اكلك راح اكطع الخط حبيبي سلملنه على الوالده ان شاء الله خير يله مع السلامة

كعدت واني اباوعله بثقه وكان كاشفته كال.. شلونج

بلعت ريكي وجاوبته.. مو زينه

باوعلي بطرف عينه وهو يطفى الجكاره بالنفاضه كال.. منو مضوجج

جاوبته بحزن... انت

عقد حاجبه باستغراب... افا ليش

عضيت شفايفي وكملت.. ما احبك ما اريد اتزوجك يا ريت تخرب العقد

رخى ضهره على القنفه بغرور ورد عليه.. مو مهم تحبيني وهو مو لعب نعقد ونفسخ وابوج خسر هواي

وكفت بعصبيه.. هو شخسر هن كعكات

اشرلي بجكارته بحقاره... اكعدي بابا ولا تصيحين خليج محترمة

رفعت حاجب .. لا والله تحجي كله بالاحترام ما شاء الله محترم مبين

رد عليه بقسوه... غصبا ما عليج

شديت على شفايفي بعصبيه.. ما اشتغل عندك حتى تكول غصبا ما عليج مفهوم

وكف واني تراجعت من الخوف مشه خطوات بتجاهي حسيته نفس الشخص الي بالحلم خيم عليه بحيث صرت جني فاره

رفعت اصبعي بتهديد واني ارجف.. لا تتقرب مني وترا ما حجيت غير الحقيقه ما احب واحد يهيني واسكت

رد ببراءه وبرود.. منو هاينج اصلا انتي تهينين بنفسج

بلعت ريكي واني ارجف.. لا مو هيج انت اصلا

حط ايده على الحايط وهو يحاصرني.. اصلا شنو

عبست شفايفي وتنفسي ضاق من قربه.. شسوي وتخر مني حاليا

رفع عيونه بتفكير ورفع اكتافه بعدم معرفه كال..عاجبني الوضع حسيت نفسي ملاك ومن ابتعد تحتويني شياطين اليل

تقرب اكثر حطيت ايدي على صدره ابعده عني ودرت وجهي للجهه الثانيه كتله.. عوفني هي شنو حابسني بصدرك اختنكت

رد عليه بهدوء... باوعيلي

همست بصعوبه... شفتني اني وابن عمتي حارث تذكر ؟

باوعتله شد على شفايفه بقسوه وابتسم ابتسامة جانبيه حيرتني كال.. عار لو يحبج سوه المستحيل واخذج

جاوبته بحقد.. لا مو عار لان زين ابويه رفضا وما قبل بيه

قبض على فكي بكل قسوه حسيته حيتكسر وجهي بين اديه كال... اذا ذكرتي كدامي مره ثانيه اتصرف تصرف ما يعجبج

غمزلي.. وخلي يكون بعلمج انتي على ذمة رجال حرام تفكرين بغيره صار معلوم

بلعت الغصه وجاوبته.. بس اني ما احبك وما متقبلتك بحياتي ومموافقه عليك

رفع حاجب وكمل باستفزاز.. هو لعب لو واهس موافقه وما موافقه غلطة الشاطر بالف مجبرتج على الموافقه مو صح

رديت عليه بحده.. بس تعرف ابويه جبرني

رد بعدم اهتمام.. يله ميخالف هالزواج لمصلحتج قبل مصلحتي

ضحكت بسخريه.. شنو مصلحتي بله مصلحتك وعرفناها وين تلكة وحده مثلي جمال ودراسه وصغيره

رد عليه .. ما شاء الله عندج ثقه زايده بروحج انتي شايفه روحج من تدخلين عليه عوزج بس حرام ناسف وتفجرين فعلا عندج ثقه زايده بنفسج

جاوبته بعناد... والله استاهل هالثقة

باوعلي بغرور... منو يگول

جاوبته بنفس الغرور.. انجازاتي

باوعلي من فوك ليجوه... شنو انجازاتج بله زحمه

رمشت بعيوني يا الله اريدلي انجاز محققته ماكو جاوبته بفشله ما عندي غير هذا الإنجاز ... نجحت بظل اصعب الظروف ولو ظاله احقق اكثر

رد عليه بقبول.. حلووو

حطيت ايدي على صدره... يله وخررر واذا فعلا انت رجال افسخ العقد لان گلبي ملك الغيرك

رفع راسي بقوووه حسيتها انخلعت وهو يباوعلي بقسوووه باغتني ببوسه عميقه على شفايفي صدمني بيها دفعته وعطت بقوه واني امسح شفايفي
ياحقييير يا حيووان لا تتقرب مني لا تتقرررب

وجهي مليان دموع وارجف بقوه انهبطت اول مره رجال يتقرب مني اتمنيت املخ شعري الطم اصرخ ما اريده اكرهه

عفته وطلعت اركض دخلت للحمام واني اغسل بوجهي واغسل بشفايفي المقرف القذر ما اسمحله يتقرب مني والله لو يظل يوم بعمري ما اقبل بي ما اقبل ما اريده

سمعته طلع من البيت واني كعدت على ارضيه الحمام وارجف من البجي حسيته دنسني حسيت لعبت نفسي اول مره انباس هيج بوسه جريئة عبالك اغتصبني مو باسني حتى ما اكدر احط عيني بعين اخواتي احس مسويه جريمة

ما اعرف شصار بيه خلصتها تلث ايام بس ابجي ولا اكل وبس نايمة عيوني مورمات من البجي واشهك صرت جلد وعظم وعيوني نزل الحوار بيهن لخدودي مو طبيعي الحوار حتى خفت بيه مرض خبيث بلكي اموت وما اتزوجة ما احبه ما اريده من اشوفه اتذكر شلون ماتت امي

...................

رنا

اتصل موبايل حارث هو جان كاعد يباوع على التلفزيون هو عدل كعدنه وهو يفتح خط كال .. ابو هلا بكريم والله مشتاق يالبطل

بعدها خله وراح صعد الغرفته تقريبا ربع ساعه وهو نزل متخبل هاجم منهار لزمته امي وهي تحجي وياه... شكووو شكوو يمه حارث شكو

رد عليها وجهه محتقن ويرجف.. هذا اخوج الگوا.. منطي سولين لصديقه هذا الي اخذ امها للمستشفى والله والله ما اخلي واحد ياخذ سولين غيري اليوم لو اكتل لو انكتل

طلع يركض وهو هاجم على بيت خالو اني تخبلت ما عندي غير بس هالاخ مو معقوله يروح من وره خالي العار ركضنه وراه اني وامي واحنه نتوسل بيه .. فدوه حارث فدوه بس خلي نفهم الموضوع الله يخليك واذا انخطبت مو من حقك تخرب الخطوبه

من شفته منهار وما يقبل يرجع تخبلت خابرت على جاستن بسرعه فتح خط وهو يتغزل... في ادق اماكن قلبي توجدين انتي

رديت عليه بعصبيه... خاب ما تنلصم الحك حارث راح لبيت خالي يتعارك وياهم لان انخطبت سولين

جاوبني... بوووويه هاي عواقبها شفتي اذا نخطبتي الغيري هيج اسوي تكفي الشر وقبلي بيه

عطت بيه.. خاب دروح هسه عود بعدين الحك حارث

رد عليه.. تمام يالحب رايح

قفلت الخط وامي ظلت تلطم كلتلها.. لا تخافين ترا خابرت جاستن وهو راح اله اكيد ميخلي

ظليت على نار واتصل على حارث ماكو

.....

جاسم

خليت ورحت بسيارتي لبيت عامر المصيوب ما نخلص من مشاكلة الزفت وما اشوف الا حارث يتهدد وخابص الدنيا وعامر يتهدد عليه.. ما انطيها الك لو نخله تنبت براسك ولك ساقط كوا... انت شنو وانطيك بنتي زوجتها تاج راسك

هو جان يتهدد والجيران لازمينه خرب بيت عامر انفضحوا فضيحة شلون مصيبه لزمته واني احجي وياه.. صدك تحجي حارث فضحت البنيه شيكولون الناس حبيبها بعد ما انخطبت

رد عليه بحرگة گلب.. والله والله لو يظل يوم بعمري ما اخلي ياخذها ولك تعرف المن منطيها منطيها الصديقه ابو حاجب مطبور واكيد واحد تافهه مثله

جاوبه عامر باستفزاز... عسا ما انطيها للجلاب انت منو والله اذبحها وادفنها بالساگيه وما انطيها الك وبسيطه اذا ما ادبتك ما اطلع عامر زمال

دنزع حارث النعال وشمره عليه اجه بوجهه وعامر تخبل انجن شلون يضربه بالنعال استغفر الله ظل حتى يكفر ويسب نزل الدنيا كلها بالكفران شكد عار

سحبته بالگوة واخذته وهو متخبل عيونه صارت نار كال.. سولين راحت مني لك والله عايش الخاطرها اليوم ما ارجع اذا ما رجعتها الي

لزمته بغضب شترجع يمعود شترجع عوفنا منها دخيل الله عوفنا ما تشوف هذا شلون متخبل ما تشوف شلون صاير نار لا انوب تسويلنه مصيبه

رد عليه بحده... لازم اروح لهذا العار الخطبها واخرب الخطوبه لازم

سحبته من قميصه .. كااافي حارث اصحه على روحك شنو انت ما عندك ضمير هيج راح تشوهه سمعة البنيه كافي

جاوب بعناد .. بالقران الا اروح اصلا اني اعرف وين يلتقي لان من رحنا اني وجدي الشيخ واحنه نساله شلون عامر كال مرته كالو يلتقي يم حجي اديب ابو الاعشاب لازم اروح واحجي وياه

مخليته يروح بس هو اصر اله يروح ونزل من السياره واخذ تكسي وراح وهاي اني ظال اركض وراه بس المصايب من وره هاي الناس مال شنق شلون عشيرة طايح حظها ابوي لو طاردني ويه عامر ولا هالعيشه...

..........................

سولين

من بعد ما حارث هجم على ابويه بذاك الغلط وابويه انجن بعد ما اجاه نعال من حارث هو راح حارث وهو دخل علينه وهو مجنون رسمي

جنه بالغرفه واحنه نبجي ونصرخ كلت لو ما گايله لهاي المره والكريم احسن ما صارت بس المصايب

هو دخل وبيده صونده يابسه ما يتحملها حتى الحيوان هو عاط باخواتي ... اطلعن برااا

خطيه هم من الخوف بسرعه طلعن يركض حصرت نفسي بالزاويه والدموع عشره عشره همست بضعف.. والله مالي شغل

قفل الباب ورجع عليه ما احس الصونده الا نزلت على ظهري وجسمي بكل ما عنده من قوووه بحيث حسيت جسمي تكطع جنت اصرخ بصوت عالي من الوجع والالم وهو بكل قسوه يضرب عبالك واكع بيده كافر

حسيت خلايا الالم ماتت من كدر ما خدر جسمي من الوجع جنت اركض من مكان المكان وارفع اديه واتوسل بيه بس يرحم ضعفي وقلة حيلتي اتوسل بيه والزم الصونده وبوس ايده وخشمي وحلكي ينزفن دم

وهو يصيح بصوت عالي... ولج عاااار كح.. متواجده ويه حويرث ويضربني بالنعال من وراج وكدام الجيران اليوم اذا ما موتج بيدي اطلع عار ابن عار اطلع ساقط وامي مكوده بيه

وكعت جثه هامده وجسمي كله يرجف واشحط بدمي لساني تلوث بالدم واشهك وتنفسي انكطع شمر الصونده عليه وطلع وهو يصيح وشگ دشداشته ... بوووويه بووويه حويرث النذل الساقط يضربني بنعال لخاطر هاي العايقه بسيطه بسيطه

طلع من البيت واخواتي اجن عليه يركضن يبجن عليه ومن يلزمني اظل اصرخ من الوجع ظليت يومين من الوجع بس اهذي وسخنت واكعد مرعوبه باليل واخواتي تخبلن عليه وبس يبجن خطيه هم ما بيدهن شي

وره تلث ايام كعدت ويه اذان الفجر واني كوه امشي سمعت صوت الاذان وهو يصدي بأعذب الانغام نغم منسجم ويه رهبة الفجر وجماله

باوعت للسما واني كتم عبرتي بجيت بصوت عالي واني اتوسل لربي يرحمني يرحم ضعفي وقلة حيلتي

اباوع على وجهي اريد اموت داخل الموت بعيوني اصفر وجهي وشاحب ويني اني جنت مو هيج جنت متفحه حلوه صايره اخوف

ما يصير اظل هيج ما يصير اقبل بالموت هسه هيج سوه بيه باجر صديقه هم هيج يجرم بيه اني لازم اطلع منا لازم اروح واختفي

سمعته يشخر تمنيت اكتله واخلي اخواتي من ظلمه وطغيانه يارب يموووت اول مره ادعي عليه اخذه وخلصنه منه جنت احجي واشهك والدموع ماليه وجهي

فكرت لازم انقذ نفسي خليني اروح لخالي بشار اروح اشوفه ليش عاف امانة اخته اخلي هو يحميني واذا ما كدر يرفع دعوه على ابويه لان معتبر روحة غسل عار وخالي ما يريد الفضيحة فاني اسهل طريق للشكوى بعد ما سوه بيه ابويه هيج

جمعت ملابسي بجنطه بحذر ولبست نعالي وصايتي وحجابي عندي فلوس عمو كريم اخذتهن وطلعت واني اركض للشارع العام من دون ما ادير وجهي والدموع تتطافر من عيوني رايحة الخالي هو يشوفلي حل لان اذا اظل هيج اطك واموت

شفته كدامي واني انرعبت وكفت بلحظة صمت وخوف ورعب

نهاية البارت .. يتبع

كونوا انتم كونوا بخير... احبكم💔

موش تنسن التصويت اوك بنياتي🥺