#وكر الأشتر الفصل الثامن وسبعون 78 - بقلم سمو العراق

البارت ١٨
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔
عظم الله اجورنا واجوركم بوفاة الامام موسى الكاظم علية السلام
........................

صفاء

من حجت هيج سالي دخلت بحالة صدمة بصراحة لان الموضوع عائلي محد يعرف بيه واصلا اشتر متكتم عن هذا الموضوع

جاوبتها بغضب .. انتي شتحجين شنو هالكلام اصلا كلامج باطل وكلام الي حجيتي ما بيه من الحقيقه شي

ردت عليه بثقه وهي تضحك كالت .. صدك تحجي كلامي باطل؟ هههه ترا اشتر بنفسه هو الي حجه اليه الموضوع ورغم كل شي يصير بينه بس اشتر اول ما يوكع بفد مصيبه يجي يحجيلي انت ما تعرف اني شنو بالنسبه للاشتر

رفعت حاجب بسخريه.. معقوله ؟ اشتر الي ما يحجي وترا كلامج باطل والي وصلج باطل لان اخوي مستحيل يحجي شي يخص سولين والي صار بينهم مجرد سوء تفاهم بسيط واكيد يرجعون مثل قبل بس هو منطيها شويه مجال لان امها رجعت وما يريد يحرمها من امها

وبعدين ازيدج من الشعر بيت ترى هم بينهم طفل يعني ممعقوله اخوي يعوف ابنه يعيش بعيد عنه على اسباب تافهه هو بس محرد دينطيها مجال

ضحكت بسخريه وهي تكول .. انت تضحك على منو وبعدين واذا بينهم طفل ترى هي مو زعلانه هي مطلقه يعني هو رما عليها يمين الطلاق

جاوبتها .. انتي منيلج هذا الكلام لا مطلكها ولا شي كل الكلام الي وصل الج مو صحيح

سكتت بس ما رضت عليه لان هي متأكده من كلامها بس مستحيل اشتر يحجي اسراره السالي ولا يحجي اي شي يخصه الها هم مجرد بينهم عمل على حدود العمل يحجي وياها مستحيل يحجي وياها هيج موضوع

شويه واجه الاشتر كعد بهدوء وهو يدخن كال .. هااا شنو شو وجوهكم ما يكصها السيف صاير شي

جاوبته سولين بضحكة ... ههههه لا ماكو شي بالعكس كولش مستمتعين وفرحانين اصلا

عقد حواجبه وباوعلها بشك بس محجه وياها شي

بعدها كمل وهو يكول .. ولد تحسين راح ياخذوهم للطب العدلي حتى يتم فحصهم اذا كان اكو اثار مخدرات او كحول ويتم تشخيصهم اذا فعلا يعانون من الجنون او الحاله النفسيه

جاوبته بتركيز وهي تكول ... اها تمام يعني لازم نكون هناك مو صح ؟

حك طرف حاجبه المطبور ورد عليها وهو يكول .. اي طبعا لان راح تجي دوريه من السجن تجيبهم واحنه لازم نكون هناك حتى نحجي ويه الطبيب الشرعي اصلا اني مكاني هناك وشغلي هناك يعني شي طبيعي اكون متواجد وانتي تعالي من يطلبونج

سالي.. تمام حبي ان شاء الله حكون متواجده

تغاضه عن كلامها واني انصدمت منها هاي شنو شو تطورت ضلت تكول حبي ومن هاي السوالف شنو يعني من كل عقله فرغت الها الساحة وصارت تتودد اله وصارت تحجي كلام رومانسي حتى تسحبه الها خرب غيرتج سالي داهيه محد يلحكج

طلعنه من المطعم وكل واحد راح على شغله هي صاحت على الاشتر وهي تكول .. عيني ممكن توصلني بطريقك لان سيارتي مجايبتها گايم المحرك مالتها وخليتها بالتصليح

جاوبها ببرود .. تعالي

راحت وياه وهي تضحك وتسولف وياه وماخذها الحماس احس روحي طلعت وصابتني الغيره من الموقف الله شحال سولين اذا تشوفه وياها بالقران تموت لان سولين حيل تكره سالي وما تشوفها بسراط المستقيم

اذا سولفت وياه الاشتر من بعيد تتخبل مو انوب لازكة بيه وكل شويه طخت بيه لا بالقران سولين تنجلط اني اخاف اوصل الها الخبر وتليصها سولين انوب تكتل اخووي ويعدمونها هههههه

....................

جيهان

جنت دا اشتغل بالبيت انظف واطبخ طبعا كريم ابد ما يحب اكل المطاعم ولا يحب اكل شلون ما كان يريد كله طبخ بيت وطبخ زين وصحي

شلون ورطه وياه ما ادري بحيث ظهري مكسور بس يله عادي يستاهل ههه

دخلت عليه شايله الصينيه بيدي خليتها كدامه هو جان يحسب بفلوس هوايه ابتسمت عليه كتله .. هاي شنو الفلوس لا تخليهن بالبيت ابوگهن ههههههه

ضحك ورد عليه .. ههه هاي الفلوس جمعتها العمليتج ان شاء الله الاسبوع الجاي اسويلج العمليه اتفقت ويه الدكتور وبلكي على النزله الجايه استلم راتبي واديد عليهن حتى ما يكون عدنا نقص بالمبلغ

ابتسمت بخجل واحس اريد ابجي .. شكرا والله اني ما اعرف شلون اجازيك انت تعبان وبحلك الموت وجامع كل فلوسك حتى بس تفرحني وتسويلي عمليه

جر نفس وزفره كال.. وشعندي غيرج احبل اجيب ههه انتي الاصل وياريت العمليه تنجح وافرحج اهم شي عندي راحتج ترى انتي غاليه عندي اعز من روحي

تقربت منه بفرحة عارمة وبسته بخده كتله ... يله حبيبي گوم غسل حتى تتغده

شكد الفلوس بالاستيكات وخلاهن بعلاكة سوده كال .. اخذيهن خليهن عندج لان اني اروح اليوم للدوام باليل روحي لاهلج وضميهن عند خالتج تسواهن او امج ومن ترجعين للبيت رجعيهن لان خاف ينباگن

اخذتهن منه بخجل وفشله وابتسامة متوتره جاوبته .. تمام عيني ان شاء الله من ترجع انطيهم الك حخليهم عند ماما

هز راسه و وكف راح غسل واجه كعد ياكل ويسولف وياي سالته .. طبخي طيب

رد عليه بتقبل .. يعني لا بأس

رفعت حاجب .. يااا عاد جاملني كول طيب

ضحك... ههههه ما اكدر اجذب عليج بس زين والله مو طيب ولا طيب بيج مجال تتعدلين وتصيرين طباخة ماهره

ابتسمت .. ترا اني قبل مطابخة عند اهلي يعني ماما جانت هي تطبخ وتسوي كولشي ومن اختفت ماما عساس اني اطبخ بس هو بابا مجان يشتري النه مسواك شنو كدامنه نطبخة ونشتري لفات نكلي طماطة يعني ان شاء الله اتعلم على الطبخ بالمستقبل بعد ما انت تتسوگ الي

ابتسم ورد عليه.. بس نسوي العمليه واطلع سلفه من الحكومة على راتبي اشتري قطعة ارض وابني بيها بيت واسويلج حديقه ازرعلج كل شي تردينه

لزمت ايده همست بحب .. احبببك اني

كريم بهيام .. واني هايم بيج واتحرمس على قربج بس شنوو ما اريد اجبرج اريد اسويلج العمليه حتى تكونين راضيه

هزيت راسي بإي

كال .. من نكمل غدا غسلي المواعين وحظري نفسج اخذج لاهلج حتى اروح الدوامي

جاوبته .. تمام

رد عليه بحب .. وكليني

اخذ الخاشوكة و اوكل بيه

ابتسم كال .. من جنتي تصيحين اليه عموو كرهت كل العمام كرهت روحي هي مال عمو بهالزلك انوب اتخيل اتزوجج وابوسج واضمج الصدري واتذكر كلمة عمو تحطم كل احلامي

جنت احببج واخاف احجي واطلع عمو من صدك همزين طلعت عمو مزيف جان انتحرت ههههه

جاوبته .. ههههه واني جنت كولش مرتاحة بكلمة عموو لان شنو مفاصحة عن مشاعري جنت متلبده بكلمة عمو ومتغطيه بسترها جانت ساترتني هالكلمة هههه

عض شفته وهو يكول.. خاااب احبج

ابتسمت ونزلت راسي وهو وكف بعد ما حمد ربه راح غسل ورجع ينشف باديه رتب الغرفه وعلك الخاولي واني اخذت الصينيه عزلتها وغسلت المواعين

وبدلت هو هماتين بدل اني اخذ ملابسي ابدل بالحمام ما اريد يشوف جسمي ولا يشوف الحروق

كملت واجيت جمعت ملابسي بجنطه وخليت الفلوس وياهن وطلعنه اني وياه رحنه البيت اهلي

كعدت يم ماما انطيتها الفلوس كالت ... محد عدنا خليهن بالكنتور بخانتي

خليتهم بالخانه مالتها وظليت عندهم يومين اسايس بسولين الي تشيل روحها وتركعها بالكاع اخر شي رزلتها وطيحت حظها فد وحده خبله ما تصير الها جاره

.....................

افيان

طلعت للسوك تسواهن ما تخليني اروح للسوك تخاف يخطفوني خرب حظي هو منو يخطفني بس الي ما رايد روحه هو اني مال خطف ويه هالوجهه المكسب

غافلتها ورحت انهزمت والله لعبت نفسي شنهاااي كاعده مكابله سولين تلطم على رجلها وجيهان تتغزل برجلها واني عزباء لا رجل ولا هم يحزنون وتسواهن وامي مدري مطلكات مدري بعد على ذمة ابوي يعني كلهن عندهن مشاكل زوجيه جااا شعندي كاعده بنصهن اووع

اني جربت كل المشاكل بس المشاكل الزوجيه ما جربتها يله ان شاء الله يارب اجربها واكعد اتمشكل ويه رجلي حبيبي

اول ما مشيت واشوف مصطفى بوجهي وييع دا افكر برجلي طلعلي مصطفى يعني مكتوب عليه اتزوجه يله لعد شنسوي هذا النصيب

حظي مثل حظ تسواهن صامت صامت وفطرت على عامر وهسه اني اصوم اصوم وافطر على مصطفى ابو العرك ولو هو شويه تاب

باوعلي كال .. هلا بالمسعده صار زمان ما شفنه القمر

جاوبته بغرور .. ما شايف گمر اني يطلع بالنهار بعقلي مدري شصار هاي اني الگمر اطلع بالنهار وبعدين انت شعندك هنا ما تتعب انت

جاوبني .. كل يوم واوكف هنا انتظرج تجين بس انتي ماكو هاليام ما تطلعين يكولون عندج زوجة ابو نسره ضالمتج

سويت روحي اريد .. اييي ظالمتني اني سندريلا وهي مرة ابوو ربك ما عندي بنات بس يله عادي سولين وجيهان دريه ونفيسه هم يكرهني ظالمتني مرة ابوي ظليمة محد يعلم بيها غير رب العالمين تكتل بيه وافشر عليه واني من الخجل ومن فشارها وغلطها اغطي وجهي بشالي استحي متعيني على روحي تعرف اني شكد خجوله

رد عليه وهو يسايرني .. لا صدك جذب تعلميني بيج انتي رب مال خجل وفقيره متعيني عليج

نفخت بضجر .. جااا شسوي غير عامر جابها واجه هسه عوفنه منها انت شلونك احوالك امورك شنو ما تزوجت

جاوبني .. ادور على بنت الحلال وماكو

جريت نفس وزفرته .. ان شاء الله تلكه اي شكو ماكو منو مات منو عدل

رد عليه .. ماكو شي بس قبل شويه شفت اشتر ويه هاي البنيه الحلوه ام جسم الحلو نسيت اسمها اجيت احجي بس بطلت كلت خاف يرزلني

عقدت حواجبي .. يااا منو سالي ؟ شعنده وياها بس لا تزوجها بالسر على اختي يبووو بالعباس اختي تموت تنجلط

لا والله يطلعونها ببرنامج الخط الاحمر زوجة تقتل زوجها وعشيقته مع سبق الإصرار والترصد انتظرونا الخميس الساعه الثامنه مساءًا

وتطلع سولين لابسه البدله الصفره مال مجرمين وجهها يلطم وبيها طبره بخدها وتعترف بقتلهم وتمثل شلون كتلتهم عزااا لا عفيه لا توصل السولين متزوجين بالسر لان بصراحة تفضحنه ونشوفها ببرنامج الخط الاحمر

جاوبني ... هوووب هوووب شبيج انتي خبله بسرعه الفتي قصه اجراميه وبيها قتل صدك جذب هو مجرد شفتهم سوه ترا ما كتلج شفته حاضنها وبايسها لو نايم وياها

عطت بيه بغضب .. هيييي هييي استحي على روحك شلون تحجي وياي هيج كلام انت ما عندك حيا حظوري شسالفه شنو حاظنها شنو بايسها ليش تجبرني اغطي وجهي بشالي من الخجل

هز راسه باسى وهو يكول .. ولج انتي شنووو بالعباس تدرين مو سولين الي نشوفها بالخط الاحمر اني متأكد والف بالميه ان إنتي ألي راح نشوفج بالخط الاحمر والاسود هماتين

ضحكت ... ههههه اي والله ما اظمن نفسي

كال .. هسه شنوو شوكت ادز امي تجي تخطبج

جاوبته .. هاااي شنو شو مستعجل على القتل والدفن شنو مرايد روحك انت مخبل شبيك شتتزوج

ضحك وهو يكول بلهفه وحب .. هو اكو احلى من ان اموووت على ايدج ؟

جاوبته بخجل لاول مره .. لا هو ماكو بصراحة ههه مدام هيج يله دزها الجمعه ولو ما احبها بس وصيها لا تظل تتخبل علينه وتجفص بالمصارين لان اني روحي ما متحملتها

مصطفى وهو يعض شفته بذوبان .. لا وصيتها وكلتلها ما تحجي كلمة تغثج ولا تغث اهلج واصريت عليج وهي كالت لا ما احجي وحتى قررت نكعد وحدنا بس قريبه منهم

جاوبته ... تمام عود ان شاء الله تجي ونشوف شيصير واحط شروط عليكم

رد بحب وهو يكول .. شروطج أوامر ادللي

ابتسمت عليه وهو باوعلي وابتسم واشوف تسواهن اجت من بعيد كطعت عليه اللحظه الرومانسية الي اول مره اعيشها

من شفتها حليت وركضت عليه بسرعه لان بصراحة تسواهن مو ادميه اعرفها تلزمني وتكتلني كدام مصطفى وتروح هيبتي كدامه واني الي صايره جون سينا عليه

لزمتني من ايدي حييل وسحلتني واني اباوعله من بعيد واحجي بهدوء وهمس .. عيب خاله عيب لا تفضحينا

كالت بغضب .. ولج فويصه هذا منوو بربوك احجي لا اخبزج خبز بت المطي ؟

بلعت ريكي ورديت عليها .. خاله شسالفه شسفتي حاضني بايسني مندوب هذا يشتري مني خلطات ما تشوفي ياج لج جنه هلال العيد

سحلتني وهي تغلط وتفشر كالت .. لا هلج عليج العيد ان شاء الله ولج واكفه ويه الزلمة تسولفين وياه اليوم اكصبج كصب

................

سولين

جنت دا امتحن بالقاعه والجوو حار يموت وامتحانه بالطابق الخامس جان السبلت مشتغل بس هو صيف وحاره اصلا حتى واحد ميكدر يندمج بالاجوبه مالته

واني كل شويه وعدلت ورقتي الاستاذه جانت شنكة وشايفه روحها ولابسه نظارات طبيه كل شويه وعدلت نظاراتها وحجت ويه الطالب الي بصفي وكالت ... انت كافي اكعد عدل لا تدير وجهك

هو جان قسمه رياضيه بدنية واني تحليلات شيريد يغش مني ما اعرف بس هو مبين فضولي

تعبت من كد ما تلح عليه الاستاذه و كومتني من مكاني تلث مرات حتى وترتني

كملت وشمرت القلم على الدفتر وكتفت اديه وكعدت صافنه على حياتي وعلى مستقبلي الي تدمر من بعد جفا الاشتر

اخفي بين اظلال عمري حب دماني حد الألم صرت مثل قصه يسولفها الغريب عن وطنه

اني هيج صرت احس روحي غريبه ما عندي وطن رغم كلهم ويايه بس وطني زعلان مني واني اذيته واستاهل لجفا

صايره مجنونه حتى ما اركز بشي اني حتى هسه محاوبت اي شي

اتذكر من حجيت ويه افيان كلتلها .. احجي وياه كليله سولين تحبك لا تسوي هيج وياها لا تخليها مشموره بدهاليز زعلك وغضبك منها هي غلطت ومستعده تعتذر منك كدام الكل

وافقت تحجي وياه واني جنت كاعده يمها وارجف اديه كلها ترعش مجاوبها ولا رد عليها

لحت عليه بالمراسله وجاوبها ببرود قاتل ما جنه الاشتر الي جان يحبني كلها .. تفضلي افيان محتاجة شي

ردت عليه وهي تكول .. انت تعرف احنه ما عدنا موضوع غير موضوعك انت وسولين ترا والله هي متندمة وفقدت عقلها بذيج الساعه مجان قصدها هيج تكول انت تعرف شكد تمدح بيك وشكد تحبك

رد عليه بجمله وحده .. وشنو الفايده اضربك وارجع ابوسك؟ وين المنطق على العموم هذا الموضوع اني سديته من زمان وما احب اناقش بيه

باوعتلي فشلانه ومصدومة من الجواب طكطكت اسناني من القهر والحزن بلعت ريكي وعفتها ورحت عفتها تحجي وياه واصلا الموضوع عقيم عنده ابد ما يقبل يتناقش بيه ويسمع

صحيت على صوت الاستاذه وهي تكول .. كملتي ؟

مديت اليها الدفتر وطلعت بسرعه طلعت مثل وحده عايشه بدوامة دايخة بغفير عالم اني شسويت بحالي

لكل من بعد طغيانه ورفضه الي كالو عوفي بعد ما يريدج انتي غلطتي وياه عوفي حتى بعد ظلوا يكششوني منه يكولون ما يستاهل توسلاتج اصلا ما يستاهلج

بس اني ما اكدر محد شاف الاشتر بعيون سولين

جانت الجامعه مزدحمة حيل والكل يسولف ويضحك ويناقش بس بالي مو عندهم اببد

طلعت وكفت بباب الجامعه صفنت شنو ابد ما اشتاقلي شو جان يموت عليه يتخبل عليه شبيه هسه ليش هيج معقوله بس لان غلطت عليه

صعدت فورتات جنت مبدله طالعه حلوه لابسه حجاب ابيض ولابسه تشيرت بنفسجي وبيه نفس ياخة القميص بيضه وردانه اطرافه ابيض ولابسه بنطلون اسود وحذاء رياضي ابيض ومخليه شويه مكياج

رحت لمكان شغله ما رجعت لبيتنا نزلت بالطريق ورحت امشي واسال عن الطب العدلي لان مصطفى كال الفافي باجر عنده شغل بالطب العدلي

وصلت للمكان وصابني شعور غريب ومفجع من اشوف الجثث شلون تدخل وتطلع والناس تبجي وكفت على صفحه انتظره يطلع

شفت تابوت طلع مربوط على السياره واهلهم يبجون عليه شكد واحد من يشوف هيج مواقف يقشعر بدنه ويعيش حاله من الهلع والخوف والرعب

شفته طلع من المستشفى جان لابس قاط اسود وشايل جنطه سوده جبيره ويمشي ويه واحد عسكري

مشيت بسرعه بسرعه و صحت عليه .. اشتررر

بسرعه دار وجهه عليه وفتح عيونه مذهول من تواجدي بالطب العدلي

ترك الشخص الي يحجي وياه ولزمني من زندي قووي وجرني عتني حييل كال بغضب .. شجابج ولج

بلعت ريكي بصعوبه وتنهد .. اريد احجي وياك

رد عليه بعنف .. ما عندي اي حجي وياج روحي توكلي بالله

مشه خطوات ولزمت ايده بسرعه حجيت بتوسل حسيت روحي مسكينه .. فدووه فدووه بس خلينا نحجي احنه اصلا لازم نحجي انت ما يصير هيج تسوي

عقد حواجبه وهو يكتم غضبه .. سولين كل شي بينا انتهى كتلج روحي ما اريد اشوفج

لزمت ايده وحجيت بحنيه وتوسل .. بس اني اريد اشوفك والله اليوم بالامتحان حتى ما عرفت شلون اجاوب فدوه بس هالمره اسمعني

بلل شفايفه بحيره وقلة صبر مشه كدامي وهو يكول .. تعالي وراي

رحت وراه امشي بحذر واحس گلبي راح يطلع من مكانه صار هواي مملتقين ولا حاجين سوه

كعدنه بمكان عام كال .. احجي شعندج

جريت نفس حزين وحجيت ... اريد اسالك سؤال واحد بس انت من تمشي بمكان ما تذكرني ما تذكر فد موقف حلو صار بينه يعني ماكو موقف يشفعلي اذا غلطت اببد هيج اي موقف ماكوو ؟

رد عليه وهو يكول من بين اسنانه .. المواقف الحلوه تنذكر بس الموقف التعيشوالاكبر يعيش وانتي خليتي اخر موقف يعيش وياي بكل لحظه وبكل دقيقه

جنت ما اعرف شلون احجي جنت مخنوكة اريد ابجي رديت عليه كتله .. اني هانت عليه كرامتي اجيت واعتذرت ودخلت اطراف يتوسطولي عندك بس انت ابد ما همك شي مني هيج يعني اني اهوون هيج دمعي هين عندك شلون گلبك كدر ينساني شلوون انت جنت تحبني جنت مدللني تذكر كلت ما اخلي دمعج ينزل

رد عليه بس احسه يريد ياكلني متوحش حيل كال ..اي وتاليها طلعت موخوش وما اسواالي نعال من بين الزلم موووو ؟

تنفست بعمق وشفايفي ترجف وريگي جف بلعت الغصه بصعوبه .. لا مو هيج انت تاج الزلم تذكر هيج كاتبتك بموبايلي

ضحك بسخريه كال ..ههه لا اني نعال من بين الزلم

تقربت منه ولزمت ايده بقووه .. بس انيي احببك ولو تدور الدنيا كلها ما تلگة وحده تحبك مثلي

هز راسه برفض وهو يكول .. ما اريد بس واحد يحبني اريد انسان يحترمني يقدرني يحتوي وجودي افتهمتي

مو يمسح بيه الكاع كدام اليسوه ولما يسووه خليتني دخت انسطرت كرهتج وروح رحيق كرهتج ولحد الان اكرهج امووت منج

رديت عليه والدمعه بعيني .. والله جنت منهاره ما اعرف شحجي مو بوعيي الموضوع خبلني انت تعرف شكد جنت اتحسس من هذا الموضوع وشكد ماثر بيه

جاوبني وهو صاك على اسنانه ويفح بغصب .. واني جنت اريد اساعدج بكل شي امسح دمعتج واجمعج ويه امج واطلع حقها وحقج بس تاليها طلعت مو خوش طلعت زباله ههه خلف الله عليج والله

بجيت بسرعه .. انسى الصار فدووه والله ما اكدر اعيش من دونك

تقرب مني وهمس بهدوء وهو يكول ..اذا عشت بكرامة راح اكون قائد الجيش واذا انهنت وعشت بذل الجيش كله راح يكون مذلول

بللت شفايفي وگلبي يدگ ...واني جيشك عادي تذلني

ركز بعيوني ثواني ورد عليه ... انتي مو جيشي

اتصل موبايله جان محطوط على الطاوله باوعت عليه بسرعه شفته مكتوب .. سالي بس بالانكليزي

وكف وفتح خط وهو يكول .. هلا سالي تمام هسه طلعت بس صار عندي شغل جاي لا تتغدين نتغدا سووه

فتحت عيوني مصدومة مرعوبه احسه فلش گلبي

طلعت وراه احس گلبي صار بيه خفقان حتى ما اكدر اتنفس ولا اكدر ابلع ريكي گلبي يدك سرييع سرييع

اول ما طلعت شفته واكف مقابيل الطب العدلي واحو سياره سوده هي لا عسكريه ولا شكلها مدني يعني شكلها عجيب غريب جان واكف يمها واحد لازم مدني وشواربه كبار بس جان صغير بالعمر يعني مو كبير يجي نهاية العشرينات

وكف يمه اشتر وهو يسولف وياه وبعدها طلعوا من الباب ثنين ولد شباب مربوطه عيونهم بوصله سوده ولازمينهم ثنين عسكرين ومجتفيهم

اسرني الموقف شفت الانسان شلون مذلول يعني موقف الشباب هزني ردت افسر شنو ذول احس شايفتهم

رحت وكفت وراه اني بطبعي فضوليه بس هو مشافني جان مشغول ويخابر

دخلوهم بالسياره وهم يمشون بيهم رمشت بعيوني ممستوعبه الي ديصير .. بس اي عرفتهم هذول ولد تحسين

اوووف باع الانسان هو يهين نفسه بنفسه شلون جانوا قبل عربدوا واشتغلوا بالممنوعات وطغوا هم وابوهم وظلموا ناس هوايه

تاليها هيج حياتهم شلون هيج سايقينهم مثل الخرفان الي جايبها للكصاب حتى يكصبها فعلا الانسان هو يهين نفسه بيده وهو يعرف نفسه بيده

صاح عليه هذا المدني ابو شوارب وهو يكول .. هيي انتي شكوو تباوعين وخري مناااا

دار وجهه عليه اشتر وشد على شفايفه بغضب خفت حييل من نظراته وفشلت اكثر من الولد عاط بيه

رجع باوع للولد وهو يكول .. انت شبييك شكوو تصيح عليها احترم نفسك

رد عليه وهو يكول .. سيدي ميصير هيج تباوع يعني احنه بشغل قانوني هي شعندها واكفه هنا

جاوبه بجمود وهو يكول ..مالك شغل واخذهم وارجع للسجن بين ما تطلع التقارير اني اجيبهم واتعلم احترم العالم ترا مو خدم عندك

هو ركب وراح ومن طلعوا طلعت وياهم سيارتين عسكريات ونجده

تقرب مني وهو يكول بغضب .. انتي شبيج شجابج هنااا

جاوبته بغضب كتله .. اني ما اشتغل عندك ولا اشتغل عند ذاك الحقير الغلط عليه اني اجيت اطلع بس صار عندي فضول من شفت الولد ردت اعرف شبيهم

رفع حاجب وهو يكول .. وانتي ما تبطلين هاي سوالفج شوكت تعوفين الناس بحالها وتنتبهين الحالج

رفعت اصبعي بتهديد.. مالك شغل بيه ولا تتدخل بحياتي بكيفي اباوع ما اباوع شي راجعلي

هز راسه باسى وهو يكول.. متصير الج جاره تظلين سوليين

رديت عليه.. اريد افهم شغله وحده بس اني غلطت بكلمة وحده وانت عاقبتني وزعلان وانت اغلاطك كومة وجنت ابرر الك هسه عرفت انت ما تحبني ولا تريدني لان الي يحب يسامح يتغاضى ويضحي وانت هاي كلهن مسويتهن

مجاوبني سكت ولا حجه يفت الكلب فت

كلت خلي استفزه .. اي طبعا متحجي لان انت غلطان ما عندك حتى جواب

ضحك بسخريه وكال ... هه مدام انتي مقتنعه بكلامج مراح نلگة حل يله خلي اوصلج بطريقي

جاوبت بعنف ... لااااا ما راح اروح وياك ولا تنسى انت مطلكني

رد .. شكد متناقضه

رفعت حاجب .. اي فعلًا متناقضه وغبيه اصلا

لزم ايدي وجرني بعنف وهو يكول .. خليني اوصلج وبعد لا تجين هنا

سحبت ايدي منه .. وخر ما اروح وياك شنو انت منو اصلا مطلكني وبعدين المدام منتظرتك تتغده وياها عيب منها

رد ببرود وهو يكول .. عادي تنتظر شويه

جاوبته بغضب .. ما اروح ما اروح

سد السياره ويمشي بهدوء وثقه وصعد بالصدر وهو يسوق بهدوء محجيت شي جنت منتظرته يعاتبني يحجي شي بس ما حجه وجان ساكت كل الطريق

كلبي جان يرجف حتى نسيت ابني من وراه وهو هم نساه ولا سالني عنه شفته ميستاهل حبي ولا يستاهل اي تضحيه مني بجيت من دون علمه وحاولت اكتم وابلع غصتي

وصلني للبيت وكف عند باب بيتنه ونظراته ليكدام حتى ما باوع بوجهي ولا كال انزلي جريت نفس وزفرته

نزلت من السياره وكلبي بيه نار مشتعله قهرني حييل شوف شلون يتصرف وياي شلون يحجي وياي وين صار الخب والعطف والحنيه يعني كله جذب

بجيت بحسره على روحي حضنت ابني وبجيت بصدره حتى ما سال عنه

امي صاحت عليه وهي تكول .. سولين شبيج يمه والله روحي تتكطع عليج ليش هيج تسوين بروحج هذا هو ما يريدج اني

هزيت راسي برفض ومسحت دموعي .. هذا هو يمه بعد لا اريده ولا يريدني تعبت اني وصبرت وياه وهو ما يستاهل هم هيج الزلم بس يصير براسهم خير يلتجئون للغير

شهكت بحسره هسه اني اولي اني حقيره وزماله وكل شي بيه زين ابنك ليش ما تسأل عنه ليش متشوفه شكد خبيث وحقير حتى ما يشتري اله الله ينطي تسواهن تجيبله علاج وتجيبله ملابس

.....................

جيهان

ظليت عند اهلي كم يوم جنت مرتاحة الحمدلله بس تعلمت على كريم مدا اكدر اصبر من دونه واريد بس الوقت يخلص حتى يرجع للبيت

جنت كاعده دا اسبح بعد ما كملت صلاة واندك الباب طلعت فتحت الباب انصدمت شفتها كوثر الوحدها عقدت حواجبي مصدومة

باستني بسرعه وحضنتني وهي تكول .. شلونج عمري اجيت لبيتكم هناك اخذي جاسم بس ملكيتكم وهسه خليته يوصلني لهنا متت من البيت وصجت ملل مو طبيعي

ابتسمت بوجهها ودخلتها جوه بالاستقبال ظلينه نسولف اني وياها شو صايره حبابه وكل شويه وتدعيلي يصير عندي طفل لان هي تريد اصير عمه

فرحت بيها وانغسل كلبي من سوالفها كلت صارت عاقله وادميه وبطلت خبث وحقاره ظليت اضحك وياها واستجابيت الها

ماما جانت نايمه متكدر تتحرك اصلا وتسواهن ويه افيان راحن للخياطه وسولين بالغرفه الثانيه تقره وابنها وياها امين ويه ماما

كالت كوثر اريد اسلم على خاله ايار اخذتها الها سلمت عليها وظلت كاعده يمها تسولف وياها

بعدها طلعنه اني وياها كعدنه بالغرفه الثانيه نسولف كالت .. فدوه جيهان اني منتغديه بلكي اذا مسوين غدا تصبيلي

ابتسمت .. اي عمري تتدللين هسه اصبلج

رحت دا اصبلها غدا واجتي سولين .. شنو منو عدنا

جاوبتها .. كوثر لج مصدومه بيها صايره ادميه وحبابه خوش بنيه مو مثل قبل يمكن عقلت

هزت ايدها سولين وراحت معاجبها الوضع

ضحكت .. هههههههه تعالي سلمي عليها

باوعتلي بقرف وهي تكول .. لو تموت فد اكرهه الططوه الفكر بس خلت عينه علينه اني واشتر طشرتنه وطشرت شملنا خلته حتى بوجهي ميباوع

تنهدت بضيق كملت الغدا وخليت خبز ومي ورحت الها شفتها تلعثمت من شافتني وتخربطت متوتره وتضحك هواي وتسولف هواي حتى من اكلت تاكل سريع ولازمة جنطتها

بعدها كالت .. يله اني اروح تاخرت هسه ابويه يظل يحجي

لزمتها .. شبييج ظلي شكوو هسه حابري جاسم يجي ياخذج

ردت عليه .. لا لا فدوه خلي اروح

ما لحكت عليها لبست حذائها واخذت جنطتها وراحت بسرعه حتى ما لحكت اطلع وراها بالباب

ظليت كاعده شويه ما اعرف شصار بيه حسيت اكوو شي بيها

شويه واجت افيان هي وخاله تسواهن جايبات اغراض وسوالف مال خلطات اني اخذتهم خليتهم بالكنتور

ثاني يوم سولين راحت للجامعه وابنها ظل يمي خابر كريم كال .. ان شاء الله اجي اليوم حظري نفسج حتى اجي اخذج

العصر سبحت وبدلت وجمعت ملابسي كلت خلي اخذ الفلوس مالتي احطهم بالجنطه

فتحت الكنتور جنت مخليتهم جوه الملابس مال ماما دورت دورت ماكو استغربت .. عزاااا هاي وين راحن

بعدين شفت الجنطه ابتسمت وفرحت همزين لكيتهن

شلت الجنطه شوو خفيفه انهبطت مره ثانيه فتحت الجنطة وانصدمت لكيتها فارغه. ولا فلس بيها

نهاية البارت... يتبع

كونوا انتم كونوا بخير... احبكم 💔

لا تنسوا التصويت والمشاركة بكم نكتمل ❤️

ان شاء الله غدا انشر الكم بارت تعويض عن البارت السابق 😍