#وكر الأشتر الفصل الثمانون 80 - بقلم سمو العراق

البارت ٢٠
رواية وكر الاشتر
بقلمي ... نور سمو العراق

💔💔💔💔💔💔💔💔💔💔💔💔💔💔

أين يذهب الإنسان حين يأتيه الأذى من
موضع طمأنينته؟

........................

سولين

من بعد كلام سالي وغلطها عليه انصدمت من كل شي حجته ومن هجومها ومن سوالفها ومن دفاعها عن الاشتر

هو لو ما منطيها مجال ما تسوي هيج ولا تتصرف هيج بس هي فد وحده حقيره محصله منه شي لهذا السبب هيج تدافع ومستقتله عليه

اتصلت بيه اكثر من مره مجاوب بعدها جاوبني وهو يرد بثقل .. الوو تفضل

جاوبته بهجوم وعصبيه ... اني بس اريد افهم شغله وحده اريد بس افهم انت شنو من كائن حياتي وياك خربت هذا هو كل واحد راح بطريقه تجي تدفع القسط ليش عاتبه عليك انيي ليش ما تخليني انساك ليش ما تبتعد عن حياتي ليييش مو انت اختاريت هذا الطريق شكو هيج تسووي

رد عليه ببرود وهو يكول .. هااا حلو هسه انتي زعلانه وهاجمه لان دفعت القسط لحضرتج

جاوبته بغضب ... هاااي نقطه اني مو عبالك استجدي منك لو بحاجتك حتى هيج تسووي عوفني بحالي اني ادبر وضعي

جر نفس وزفره كال.. تمام هذا هو مهرج وانطيته للجامعه حتى تستفادين منه اقصد الغايب مالتج يعني ما قصدي اساعدج

رديت بانهيار .. حتى الغايب ما اريده كل شي ما ارييد منك وهاي جلبتك سالي الحيوانه كللها خلي تبطل سوالفها التعبانه وتطلع من حياتي لان بصراحة مليت وتعبت شنو هي حتى تجي تغلط عليه بحسابي

جاوبني بنفس البرود وهو يكول ... واني شدخلني بيها

نرفزني حيل خبلني رديت عليه .. والله انت السبب بكل شي انت المسؤول عن كل شي خليت اليسوه والما يسوه يتدخل بحياتنا هو اصلا منو جاب سالي غيرك منو دخلها الحياتي غيرك لك والله خليتني تندمت على ساعة السوده العرفتك بيها يوميه العن روحي الف مره لان تقبلت ما ظليت مجافيتك

تاليها تروح انت هيج تكعد تشكي مني لسالي والله شنو حتى تجي هي تاخذ حقك مني وتغلط عليه والله عيب و وسفه على الرجال الي يطلع اسرار بيته

جاوبني وهو يكول ... سوليين انتي اذا تظلين تسمعين الحجي العالم مراح يخسر غيرج راح تخسرين صحتج وحياتج ومستقبلج وكل شي اني الكلام اذا وصلني عادي ما اهتم بس انتي ما تصدكين تلكيلج كلمه حتى تهجمين بيها وتاخذيها سلاح وحتى ما تعرفين اذا الكلام باطل او حق انتي ظلي هيج طول عمرج حجايه تاخذج وحجايه توديج

رديت عليه ... اني لا مراسله ولا حاجيه هي نهار كله وياك وليل كله وياك وتجي تدخلي خاص تغلط وتسب وتكول انت تحجي عليه انت من البدايه غلطان انت السبب بكل شي نهار كله لازك بيها وتحملت منك هوايه وانت ادنى غلط مني گلبت الدنيا وما كعدتها

على العموم كلامي وياك هو مو حتى اثير عاطفتك ولا حتى اريدك ترجعلي لان النفس انسدت بعد بس دام هي صديقتك وما تكدر تكطع علاقتك بيها كللها خليها تكون بعيده عني

جاوبني .. لحد الان ما اقبل اي واحد يحجي عليج ويتجاوز عليج ..كلمة مني ما طلعت عليج لا كدام اهلي ولا كدام سالي وبعدين سالي نعاليش حتى احجيلها اسراري واحجي موضوع شخصي وياها بس كتلج انتي ظلي بهاي سوالفج

كمل كلامة وهو يكول ..ترا اني مو مثلج حتى وانتي بعيده عني ومفصوله مني ما انطي بيج ولا اقلل من احترامج لا كدام اليسوه ولا كدام الما يسوه

جاوبته .. واني جنت اقدرك واحترمك واعتز بيك وحتى انت جنت تكولي انتي عوض من الرب العالمين الله عوضني بيج ومسح عني الايام السوده

تتذكر من جنت تكول سامحت بيج ايامي صالحت بيج الزمن ؟

هسه اني طلعت ضالمتك وكارهتك وما اسوه كل شي عندك ؟ يعني بس انت عندك كرامه وعندك احساس واني ما عندي

لو اجيب ميزان واخلي اغلاطك ويه اغلاطي راح تتفوق عليه بس انت نكرت هذا الشي

نكرت اني تعبت وياك وتحملت اعيش بالزبل بنص المجرمين والقتله بنص الوحوش بس حتى انت تخلص مهمتك الجنائيه وتحقيقاتك السريه انتي اصلا ضحيت بيه وجنت ضحيه الك

اخاف انت عبالك حققت حلمي ودخلتني جامعه ترا اني هم حققت احلامك وخليت تكون من احسن شخصيات التحقيقات السريه واني غافله عن فعايلك وعن غموضك

عشت وياك على الحلوه والمره اجيت وياك لبيت جدك وبوقتها كتلك اذا انفرض علينه نعيش بغابه فاحنه اسودها جنت لبوه بظهرك جنت جيشك

بس انت ما تستاهل ومتحسفه ومتندمه خسرت صحتي ورجلي وكل شي بسببك

اخذتني لا بدله لا زفه لا عرس حتى حلم مثل البنات ما حققت بعرسي اخذتني مظلومه محرومه خطبتني ب ١٢ باليل الف موته جنت اموت كارهتك ومفروض عليه منو يقبل بهيج حاله حتى العواهر هم ما يرضون بهيج وضع

جنت اشوفك قاتل امي ردت انتقم منك شلون اعيش وياك وبعدها تقبلتك لان صرت زين ويايه وتقبلي الك هو انعكاس مني على تصرفاتك الي

وارجع واكول مو صوجك صوج ابويه الي حتى احساسنا عدمه حتى مشاعر ما خله عدنا داسنه برجله وخله اليسوه وما يسوه يهينه

شحجي وشنسى هه تذكر من اغتصبتني وجنت مريضه جنت بالموت اصارع مصارع تاليها بغباء مني سامحت كلت مغيب عن وعيه سولين لا تاذي هو هم مظلوم عاطفتي جانت مسيرتني بس طلعت غلطانه وحيل غلطانه والعن نفسي الف مره ومره

وكفت وياك ضد نفسي الف مره اعتذرتلك كدام الكل وراسلتك ورجعت اعتذرت وتنازلت على كرامتي وهنتني وكلت ميخالف ابو ابراهيم ما انسى اني اذا جان مفضل عليه

تمنيت لو مره وحده تجي تحاجيني حتى لو تعاتبني حتى لو تتجاوز عليه بس جنت اريدك تحجي

جان ساكت ويستمع الي بهدوء

بعدها كملت ... مراح ابريك الذمة لان ما اذيتك بكد ما اذيتني

جاوبني وهو يكول .. بس اني بريتج الذمة

تعصبت اكثر رديت عليه بسخريه .. واني شمسويه حتى تبريني الذمة شنو اغتصبتك؟

قفلت الخط بسرعه قبل لا يجاوبني وگلبي يتكطع الف قطعه حاولت اصبر نفسي واثبت موقفي

سكتت محجيت شي ودخلت على حسابي سويته برايفت لان جان عام وانشر براحتي وقررت بعد ما اهتم ولا اشوفه شناشر ولا اي شي

حذفت كل شي يخصه صور مراسلات كل شي كل شي بعد هذا هو اني الي عليه سويته حتى ما يجي يوم واتندم وضميري يانبني

شفت ابراهيم نايم يلعب باديه ابتسمت عليه .. اني لازم اقوي نفسي الخاطر هذا الطفل

قررت اسوي مشروع هو صح متعب بس ميخالف لازم اسوي قررت ادك قطعه بباب بيتنا وابدي بدروس تقويه للطلاب واقريهم حتى اكدر اجمع الي كم فلس خو ما اظل على امي وهي ما عندها وبعد هو اشتر طلع من حياتي اصلا ممجبور بيه

اني اعرف احف واسوي كل شغلات التجميل بس ما اريد اخذ شغل افيان واصلا النسوان متعلمات عليها

رحت كعدت يم ماما

جانت خطيه تريد تتواصل ويه اخوها تكول ما اكدر اخليه هيج زعلان هو اخوي وساعدني و وكف وياي ضد مرته ما اكدر انكر معروفه صحيح اختاريتجن بس يظل اخوي ابن امي وابوي

نطت افيان عليها وهي تكول .. والله ماما اني منج اتبره منه اليوم الدين

عفتهن ورحت طلعت اقره ما ردت اظل ويه اهلي حجيت ويه بنيه صديقتي هي اصلا اشطر وحده بالقسم كلتلها بس اريد افتهم منج عن القسم

خطيه ما قصرت ظلت تشرح اليه وتعاطفت ويايه اني ما اعرف ليش ما احب احجي بحياتي الشخصيه لكل شخص بس ما اعرف ليش جنت محتاجة احجي

ظليت اسولف وياها عن حياتي وظروفي خطيه هي مقصرت كالت .. ان شاء الله اني اساعدج وشنو تحتاجين اني موجوده

تشكرت منها ورجعت اقره كل شي فهمتني عليه

.................................

جيهان

طلعت من الحمام بعد ما سبحت جنت لابسه روب الحمام والمنشفه على راسي شفت كريم يلعب بموبايله من شافني شمر الموبايل وتقرب مني لزمني من خصري وقربني عليه

حطيت ايدي على اديه بخجل كتله بخوف وتردد ... كريم اني بس ابدل واجي

عض شفته وهو يكول.. دتعالي صبرت هواي وطولت انوب جاسم اخذ الفلوس دين الظاهر العمليه مطوله واني مكدرت ارده عيب هو خطيه هم ممقصر وياي

حطيت ايدي على ايده وبلعت ريكي ..اي عادي ميخالف خطيه هو على كولتك هم ممقصر ويانه

بلل شفايفه وتردد يحجي بعدها كال .. جيهان اني اريدج ؟

حكيت طرف حاجبي بتوتر رديت عليه.. مو انت كلت لا من تسوين عمليه

عقد حواجبه وهو يكول .. لا ما اريد بطلت غيرت رأيي يعني ما يصير هيج صار هواي من تزوجنه حتى بحظني متنامين شنهاي ترا ماكو هيج وضعيه

كتمت عبرتي .. كريم بس انت تعرف وضعي تعرف شنو البنيه واني ما اقبل هيج واتفقنه من زمان على هذا الموضوع ما اصير زوجة فعليه الك الا اذا سويت العمليه

باس شفايفي بقووه وبكل شغف وهو يكول ... لا غيرت رأيي ترا ماكو واحد هيج مثلي يمه مندي ومخلصها طماطة گلي

سحب الروب بهمجيه راد يفتحه دفعته بقوه وسحبت نفسي مرعوووبه صرخت بصوت عالي بوجهه... كرييييم شبييك وخرررر مو كتلك ما اريد هذا الموضوع ليش تلح

سحب ايدي بعضب وهو يكول .. شبييج صوووتج تخبلتي لو شنووو اتخبل من المره الصوتها عالي ما تردين لا تردين طبج حريشي بس لا تنعثلين وتبغگين جنج گواله

بلعت ريكي بتوتر وجسمي يرجف لفلت الروب عليه وهمست .. مو قصدي اصيح بوجهك بس والله يعني الموضوع اذاني انت تعرف شكد انهار من هاي السوالف

رفع اصبعه بتهديد وهو يكول .. ميحقلج تعبين صوتج ولا يحقلج تجفصين لا تصيرين مثل اختج سولين الخبله خسرت الاول والتالي وظلت تتوسل بيه وهو لابسها

فتحت عيوني مصدومة .. انت شدتحجي شنو هالكلام منيلك اكيد هاي اختك كوثر توصلك هيج كلام لعد منو قابل اشتر يكولك سولين تتوسل بيه

على العموم هو زوجها تتوسل ما تتوسل هذا مو موضوعنا وانت تعرف اني مو مثل سولين اني اختلف صح فقيره وهادئة بس ما اتجاوز ولا اطخ راس لاكبر واحد

سحب ايدي وهو يضحك كال .. ايي شبيج ليش ضجتي ؟

رديت عليه بحده .. ضجت من كلامك انتم تجفصون بالمصاريين وبس واحد يحجيله كلمة كعدتوا تحاسبون بيه عبالك حايط نصيص احنه وترا لا عبالك ما اقبل احد يحجي على اختي حتى لو غلطانه

عفته ورحت اخذت ملابس وبدلت بالحمام صفنت والله حقه الرجال هم يريد حقه تحمل هواي محد يسويها هسه لو ما لفلوس واحت جان سويت العمليه

ظليت اكل بروحي اكل محتاره شسوي وين اروح بعدها قررت وخطرت ببالي فكره قررت اتقرب من كوثر ولزك روحي بيها حتى لو اطيح ابو كرامتي بس حتى اكدر احصل على شي او حتى اسجلها او اي شي اسوي

لان بصراحة مليت منها وهي طغت وتمادت والله ماكو واحد غيرها اخذ الفلوس والله اني اعرفها هي اخذتهن محد داخل علينه وبيتنا امين هسه لو ابويه بالبيت جان كلت هو اخذهن بس هو مو هنا

طلعت بعد ما بدلت كعدت امشط شعري وهو ضاج وكعد يطكطك بموبايله اجيت كعدت يمه واني امشط بشعري

هو يحب شعري نقطة ضعفه اخذت خصله منه وحركتها على اذانه ضرب ايدي بغضب وهو يكول .. شنو مشتهيه ومستحيه تتحرشين بيه ومن اجي تكعدين تنوحين جنج بومه

ضحكت ... هههههه لا مو هيج بس لان شفتك ضجت هسه عوفنا من هذا الموضوع اريد اطلب منك طلب

رفع حاجب وهو يكول ... اي احجي شنو موضوعج انوب انام وياج بدون اضويه يعني هندس حتى ما اشوف شي

ضحكت بصوت عالي... ههههههههههههههههههههه عزاااا لا مو هيج بس يعني احس علاقتك متوتره بكوثر يعني ميصير تظلون هيج لازم انت تبادر وتقربها منك جيبها النه فد يوم

جاوبني بتنهيده وهو يكول ... والله يا جيهان هي اختي ما اريد احجي عليها ولا اذمها بس بصراحة مو ادميه حيل مو ادميه وشكد ما نحاول نسويها ادميه متصير تريد تطيح حظها بيدها

رديت عليه برجاء .. ميخالف خلينه نحاول وياها بلكي تصير زينه

رد عليه .. متصير اختي واعرفها ذيل الجلب عمره ما ينعدل واصلا متقبل تجي هنا

ابتسمت .. لا فدوه حباب اجبرها وجيبها خليها تتأقلم ويانه

رد عليه... تمام ان شاء الله اجيبها من الجامعه فد يوم

سحبني من ايدي وضمني الصدره وهو يكول .. ترا قبل شويه الي سويته اني ممسؤول عنه انتي حلوه ونظرج جذاب تجذبيني واني بصراحة ما اكدر اتحمل دلعج وجمالج وقابل بكل شي لا تتخوفين

هزيت راسي برفض وهدوء... لا ممتخوفه

رد عليه ببتسامة هادئة وهو يكول ... ادري بيج تخافين اخاف اشوف جسمج وابطل احبج وهذا ديبين الي ان انتي ما عندج ثقه بيه

نزلت راسي بتوتر .. مو هيج بالعكس اني حيل احبك واثق بيك وانت اخذتني وتعرف بوضي بس اني لان انت وعدتني هيج دا اسوي

باس خدي وهو يكول .. احببج والله ثقي بيه

.............................

صفاء

رجعنه للبيت مال بيت جدي كعدنه بيه بعد هو اشتر مخايف على شي سولين وطلعت من حياته بعد على شنو ومنو يخاف

جان كاعد على القنفه لابس بنطرون اسود وفانيله داخليه بيضه وكاعد يدخن وهو مزعوج ومتضايق اصلا هو من طلگ سولين لحد الان وهو دوم متنرفز ومتعصب

انوب كاعد بالصاله ونسوان ساهر يفترن عليه وكل شويه متعاركات وهو يدخن وشاد شفايفه بغضب

مرة ساهر الجبيره وكفت وهي تكول .. شوفي ولج انتي المشرشحه الخايسه ام الزلم بيج خير ما اخذتي ساهر

ردت عليها ذيج وهي تكول .. اني لو خايسه ما اخذني بس الظاهر انتي الخايسه لهذا السبب وهو طكج بمره ههههههه

هجمت ام سجاد على زوجته الثانيه وكب الصريخ والعياط وساهر مو هنا

وهو اشتر منا متسودن واعصابه تلفانه وهو گام عليهن اول ما شال التحفيه واركعها بالبلازما وعاط بيهن ... بناااااات الكلب لالعن ابووجن لابو الخلفجن امشن انقلعن كل وحده الغرفتهز وحق علي اذا وحده عتبت باب الاستقبال اكسر رجلها كافي لبيت الي وانتم محصورين مثل الجلاب هنااااك

تكعدون تحترمون نفسكم وتاكلون تبببن يله ما عايز دوخة واعصابي تلفانه وروحي واصله لخشمي امشن ولن اذا ما عدجن رجال يلزمجن اني هنا اطيح حظ ليحجي

طلعت وجيهه وهي تكول .. انت شدخلك انوب شلون الناس ما تتعارك ما تحجي انت صدك ما تستحي شلون تغلط على عمك

اشتر بغضب .. نعال على عمي واذا معاجبكم الباب يوسع جمل اطلعوا من البيت واني انطيكم حصتكم بس فكونه شركم

هنا خلن وراحن دخلن ام سجاد و وجيهه وزوجة ساهر الثانيه اجت يم الاشتر اني بصراحة ولا مرتاح الها شكلها مو مريح احسها مو طبيعيه

وكفت هي بيييضه حييل شفافه وعيونها صغااااار وشعرها اشكر مصبوغ فوگاه يعني شهبه بس شكلها جامد وابد ممحبوبه ومليانه بيها إغراء للامانه

كالت بعياره .. اشتر عيني اني جدا اسفه انت تعرف اني هاي مو اخلاقي بس شسوي اذا هي ذيج فد وحده لعلاعيه ومتستحي وما عندها اخلاق زايحتها ادبسز وهماتين اعتذر نيابة عنها

ما باوع بوجهه وجان كاعد على الكرسي ويدخن رد عليها بغرور .. عادي مصار شي

كعدت وحطت رجل على رجل فخذ رجلها بارز كالت .. والله مليت تندمت تزوجته هذا الحقير انوب مطي لا عنده غيره لا عنده اخلاق لا يكول وين رايحة وين جايه مخليني على حل شعري اكره هيج رجال بصراحة تندمت حيل تندمت

باوعلها بقرف وهو يكولها .. واني شكو جايه تشكيلي

عدلت صدرها وهي تكول .. لا مو انت تصيح وتحجي ترا لا عبالك راضيه والله مراضيه اتمنى اتخلص منه اليوم قبل باجر وفعلا اني مظلومة وياه شنو هو هذا اني كلها دكولي تجننين تخبلين شلون متزوجته

وكف بغضب ولبس قميصه كله .. اطلكي منو لازمج

صارت وره ضهره وهي تتدلع .. انت مطلق واني اتطلق ونتزوج ههههههههه شنو رايك ؟

دار وجهه عليها ورد بقرف .. واني ابدل الحلقوم بالثوم من كل عقلج ؟ ابدل الاصل بالزبايل

هي انصدمت وتفلست جبهتها ظلت تبلع بريكها وطبعا اشتر كلش كلش ما يحبهم ولا يحترم لا كبيرهم ولا صغيرهم يكرهم كره العمى

تركها ومشه مشيت وياه جنه نسولف عن الوضع وحتى سالته عن سولين مجاوبني اي شي يخصها كال .. هذا الموضوع خاص بينه اني وياها ما احب احجي بيه

خابرته سالي فتح خط وهو انهال عليها بالرزايل كلها ... انتي اخررررر وحده تتصلين بيه انتي بعد هذا هو انتهت وياج وحتى تم نقلج لغير مركز شغلج راح يكون غير شغلي

جان صوت الموبايل عالي ردت عليه وهي تكول .. شبيك ونبي هاي سولين اكبر كذابه عرفت شلون توكع بيني وبينك

جاوبها بغضب .. كافي بطلي سوالفج اموت واعرف انتي شنووو نيتج من هاي سوالفج شنو المغزى من ان انتي تحرظين مرتي عليه اني مسولفلج عنها ؟ شاكي الج عنها ؟ جبت طاريها يمج ؟ احجييي ليش انخرستي

ردت عليه بتوتر وهي تكول .. لل ل لااا مو هيج بس هي هجمت عليه

اشتر بكل غضب ..انتي دخلتي عليها وانتي هجمتي هي لا يمج ولا بگرباج ترا انتي هيج جاي تطلعين من نفسي لا عبالج احبببج اموت واعرف نيتج شنوو ؟ يعني مثلا احبببج اتزوجج !!! من كل عقلج اني تزوجت سولين لو هي لو محد بعد وراها حتى لو غلطت حتى لو تجاوزت حتى لو كل شي صار هي قفلت الملف بعدها محد يكدر يفتحة غيرهاااا

افتهمتي محد يكدر يفتحه غيرها لا انتي ولا الاكبر منج واذا عندج عداوه وياها وتكرهيها مو من حقج تجيبين اسمي بكل سالفه لان اني مو زعطوط حتى اكعد اشكي الج وانوح كدامج اني حياتي خاصه بيه

سالي بغضب ... وهسه انت شدعوه عليك هيج متخبل عليها هسه لو قايمه بواجبك مسويتلك فضل بيها باب وجواب بس حتى فضل ما الها وياك اصلا ممحترمتك وتجاوزت عليك كدام الكل

غمض عيونه باسى وهو يصبر نفسه ويهدي من روعه جاوبها .. تجاوزت ما تجاوزت هاي حياتنا متقوقعين بيها اني وياها لا انتي ولا حتى امي لو جانت عايشه تتدخل بيها وانتي شكو منو حتى تتدخلين ولي امري واني ما ادري

كمل كلامه وهو يكول .. واني هوووواي هواااي انطيتج اكبر من حجمج الا انتي شنو اخذ وانطي وياج لا تنسين اني الي سويتج ودخلت بهاي الشغله ليش تخليني اتندم

بلعت ريكها وردت .. تمام بعد ما اتدخل واسفه اذا سببت الك مشاكل

رفع اصبعه بتهديد وهو يحجي وياها كلها .. سولين انسيها لو تشوفيها بالشارع احسبي نفسج متعرفيها تمام لا تحطين عقلج ويه عقلها ترا البنيه البيها مكفيها انتي شنو وتكعدين ترزلين بيها شنو بنت عم الخياط الخيط بدلة العروس

جاوبته ... اسفه بعد ما اتدخل يله مع السلامة ازعجتك

قفل الخط بوجهه وهو يتنهد .. شكد حقيره وتافهه شنو هاي هم محسوبه على النسوان غضب الله عليها وعلى الخلفها ندمتني على ساعة السوده العرفتهز بيها

رديت عليه .. خلي تولي لا تهتم الها وعاشت ايدك والله خوش رزلتها وهذا الي جان لازم يصير من زمان

تنهد وسكت مجاوبني مشه واني امشي وياه واسولف اريد اطلعه من الحاله الي هو بيها بس هو جان احسه مو وياي اسولف واضحك الوحدي

استقر بمكانه عند السرداب الي وكعت عنده سولين

باوع للسرداب بجبروت وصفن ثواني حسيت بصدره يصعد وينزل وشد على ايده بكل غضب

باوعلي وهو يكول بحسره ... ما اعرف رحيق من شرحوها شنو جانت النتيجة

بلعت ريكي رديت عليه .. ليش ما تنساها انساها اشتر ما دام لحد الان تفكر بيها انت مراح ترتاح ابد

بلل شفايفه وهز راسه بنفي .. مستحيل انسى شلون انساها هاي توأمي احنه ارواح معلكة ببعض تقاسمنا كل شوي سوه حتى ظلمة الرحم تقاسمناها سوه حتى النفس تقاسمناه سوه

مسح طرف عينه وهو يكول .. تعرف اني شنو الي ماذيني ويخليني ما اكدر اتخطى رحيق ؟

جر نفس وزفره كال .. ان هي ماتت موجوعه ماتت مظلومه ماتت تعبانه من الوجع والاذيه ماتت وهي ترجف من الآلم

لحد الان اتذكرها من جانت بالمستشفى ورم جسمها وتسمم جانت تصرخ وتبجي ما تعرف منين الوجع جنت يمها كل الوقت تباوعلي بعيون كلها حزن وهي تكول .. اشتر اني راح امووت ؟

جنت اخاف من تكول هيج الزم ايدها اطمنها وارد عليها .. لااا ما تموتين انتي ما تخليني الوحدي اني اخووج نعيش سوه ونموت سوه

جانت تبجي ومقهوره وتكلي .. تحسين الكلب لا تخلي يتهنه بحياته لا تخلي يعيش من بعدي هذا دمرني

جنت منها. عليها .. اريد اعرف ليش هيج تحجي عليه وذمته من بين الكل جنت بعقل طفل ما عندي سلاح غير الدموع عليها

جنت اريدها تحجي اريد اعرف شنو سرها ليش هيج متاذيه مجروحه منهاره حتى هي تريد تموت تفضل الموت على كل شي وهي اعترفت الي وكالت هم حركوني واني اعرفها اخيتي ما تجذب ولا تعرف تجذب

غيروا افادتها بس الافاده الحقيقية عندي من لسانها سمعتها هي كالت تحسين واخته وجيهه هم السبب

وعيت وكبرت وفهمت ودخلت الجنايات وعرفت هواي امور بهاي السوالف عرفت اكو ملابسات اكو جرائم مطمطمة اتمنى بس اطلع جثتها مره ثانيه اكعد ادرس عليها

بس الي يكسر خاطري ما اريد انفجع بيها مره ثانيه ولا اريد اشوفها وهي ميته من سنين اريدها ترقد بسلام بعد ما ذابت روحها من الحزن الوجع

تدري لحد الان شنو الي عالق ببالي .. اتذكر من تحسين كال لازم يفتحون غشاء البكاره لان الحرق واصل للرحم وتحتاج تنظيف

جنت متخبل مقهور شلون هيج يحجي باختي ما جنت افهم وعيت وفهمت والي عرفته من هذا كلامه هو راد يتخلص منها لان اعتده عليها واغتصبها

فتحت عيوني مصدومة مذهول من الكلام رجعت خطوات حسيت بتكسر گلبي كلامه مثل السوط نزل عليه

بلعت ريكي جاوبته ... اغتصبها ؟ اختي رحيق ماتت مغصوبة الحق مظلومة لهلدرجة

جر نفس وزفره كال .. لو بيدي سلطه شوويه لو ما اعرف هذا السي يغضب رب العالمين جان هذا البيت جمعتهم كلهم بيه جبت جلاب تغتصبهم واحركهم وهم عدلين

بس ما اريد اغضب رب العالمين ومشتغل وياهم على البارد ولده هسه راحو اربعه ارهاب واحد منهم انحكم اعدام وهاي انتكاسه اله خلي يعرف شلون يندك بيه خليته يفقد اولاده وهم على قيد الحياة

ظل بس هو اريد احركة اريده يحترك والله اريد يحس بوجعها وقهرها واذيتها بس استغفر الله واريد حكمته الالهيه هي الي تاخذ حقها واني سامع الحوبه تبطي وما تخطي ان شاء الله ما تتخطاه حوبتها

جريت نفس ... ان شاء الله اكيد هسه ما تشوفه تبهذل عائلته سكط ويحجون بعرضه و ولده يشربون مخدرات ويهربون وتالي واحد اعدام و واحد مؤبد بعد شنو حياته

رد عليه ... الله كريم نشوف شلون نعاقبه وساهر بعد وراي هواي شغل

ضحكت .. وسولين وابراهيم شنو مو من اولوياتك ؟

باوعلي بهدوء جاوبني .. خلي اخلص من ذول واتفرغ الهم

جاوبته .. زين مصطفى راح يخطب اخت سولين شنو انت موافق

اشتر وهو ينفخ الدخان من شفايفه .. اي عادي خلي يخطبها هاي نچره واخت رجال مو مثل اختها ام جفصه

على الاقل هاي رزنه شويه وتفكر بعقل مو مثل ذيج واني متاكد مليون بالميه واح تقربني من اخوي مصطفى وتخلي يعوف امه المجرمه حتى زينب تعوفها

رديت عليه ... لعد تمام ان شاء الله خيير يارب بس حاول ترجع سولين ترا خطيه صح غلطت بس احسها ندمانه

سكت مجاوب وتركني وراح

عفته ورحت خابرت على مصطفى الي متحمس للمصيبه قصدي للخطوبه ما اعرف هذا وين جان عقله من خطب افيان وحق الرسول ما تتعاشر

..................

جيهان

خابرني كريم كال .. قنعت كوثر تجي عدنا حظري الها غدا

عاد اني ما قصرت سويت الها اشكال واللوان وكعدت افنن الها بالطبخ خليني اسايرها خليني اتقرب منها اريد احصل على رمز موبايلها او اي كلمة منها حتى اكدر اسجلها

رجعت خابرت كريم كتلها.. خليها تبات يمنا كم يوم حتى بهيج نكدر نقوي علاقتنا بيها وترجع امورنه طبيعيه وياها خطيه هي هم اختك

كال .. الله كريم ان شاء الله

جنت استغفر الله بين الثانيه واللحظة لان احس روحي حقيره ما اعرف احس دا اخدع كريم ولو هي تستاهل لان الي تمد ايدها على هيج مبلغ كل شي تسوي لازم واحد يوكفها عند حدها ويخليها تبطل تفرعن

شويه ودخلت هي وكريم شايله لدنيا على راسها مجروره على عمى عيونها معاجبها الوضع ميخالف اتحملها بس لازم ارجع الفلوس

استقبلتها بحراره ... هلا عيني يا مرحبا بيج والله هسه نور البيت اهلا وسهلا بيج تفضلي تفضلي

كعدت وهي قرفانه من الوضع جبت الاكل خليته كدامها واني اضحك .. يعنري انتي جوعانه غسلي يله بسرعه حتى تاكلين

جاوبتني.. لا ما اريد هسه اكلت بالجامعه

كلها كريم .. دروحي غسلي وتعالي اكلي ويانه على الواهس شبيج لا تكسرين بخاطرنا

راحت غسلت بجمود واجت كعدت تاكل ويانه كريم جان يسولف ويضحك حتى ياخذ منها استجابه ويخليها تتأقلم بس هي جانت مطنكره بعدين ظلت تضحك وتسولف ويه اخوها

بس اني لابستني ممعترفه بيه عادي عساها لا اعترفت هي بس خليها تظل هنا حتى اسيطر عليها كون ابوگ موبايلها بس شنو الفايده الرمز وما اعرفه

لازم اعرف الرمز لازم اراقبها قررت اكعدها يم الجام المظلل الي بالصاله واراقبها منه بس اني مو ذكيه مثل افيان جان لكفتها وطيحت حظ حظها وحفظت الرمز بسرعه

بس والله صعبه ما اعتقد اكدر احفظ الرمز ولا المحه وهي حيل حذره الحقيره

ظلت عدنا للعصر رادت تروح بس كريم ما قبل واصر تبات عدنا بس اني حسيت بيها غريبه وتصرفاتها مو منطقيه تتصل هي بس عبالك تشاور روحها حتى ما افهم شنو تحجي من الكلام شلون ورطه هاي ابد ما اكدر اسمع شنو تحجي اصلا الي تحجي وياه شلون يفهمها ما اعرف

خليتها تاخذ راحتها وانطيتها الأمان وسويت روحي لطيفه وياها هي ابد ما يجي وياها ويه اخوها تضحك ومندمجه اني حتى مترد عليه

نامت هي تعبانه من الجامعه واني ظليت احوم على موبايلها جانت مخليته يمها جنت اخاف اتقرب منها وتفز وتشوفني

كعدت قريب منها وسويت روحي دا اطكطك بموبايلي انتهبت على موبايلها يتصل باسم انكليزي ما عرفت منووو

بعدها اجه اشعار على الواتساب مكتوب .. فتحي خط لج كح... والفلوس ما انطيهم الج لو تموتين ترا مجابرج اني انتي انطيتيهم

اني انصدمت لزمت الموبايل مفجوووعه مصدومة ماكو مشفت رساله لان راحت بسرعه

كلبي ظل يرجف والله فلوووسي يابه فلوووسي ماخذهن هذا الحقير ناطيتهم اله بسرعه دمجت السالفه

شمزت موبايلها بصفها و وكفت شلووون يربي شلوون لج اخذتي تعب اخووج رحتي انطيتي لواحد ساقط مثل هذا

لج اخوج بحلك الموت والله بحلك الموت يفكك عبوات وهناك بنص الارهاب يجمهن فلس فلس ترحين تاخذيهن وتنطيهن لواحد ما يسوه فلس

هديت نفسي شويه وردتها تظل اكثر واتطمن اكثر حتى الزم بعد عليها واكيد كل شي احصله انطي لجاسم مو الكريم لان ما اريد يكولون اخذوها لبيتهم وهيج سوو بيها

وظليت الح على كريم كل مره يجيبها وتظل عنده حتى تبات بس والله گلبي موجر من سوالفها وما اريد احجي هيج اريد دليل بيدي

...................

سولين

طلعت من الجامعه رجعت للبيت خالتي تسواهن ماخذه ابني ورايحة ما ادري وين رايحه تعصبت ظليت احجي كالت ماما .. على كيفج يمه خطيه اخذته حتى تلقحه تكول موعد لقاحة وانتي مموجوده

تنهدت وكعدت ... ترا ميصير هيج ابني اخاف عليه انوب يصير عليه شي هي ليش من تشوفني اروح للجامعه تروح تتخم بيه شنو السالفه والله ممرتاحتلها هسه تخطف ابني وتروح

افيان ردت عليه .. تخطف ابنها ليكول الامير وليام زين من المره تاخذه تلقحة بس يلعي جنه ابو بريص

ضربتها بالكتاب... لا تغلطين على ابني يجنن

ردت عليه وهي تضحك .. اكلج بصراحة منتبهه عليج مو مثل قبل شكد تلحين بسالفة اشتر اشو هسه هادئة مو عوايدج شكوو ليكون نسيتي

باوعتلها بقرف .. كافي سدي الموضوع خليني ناسيه وملتهيه بضيمي

ضحكت وهي تكول .. انتي صرتي مثل زليخة مخلصتها اين انت يا يوسف وانتي تصيحين اين انت يا اشتر ههههههه

عفتها تلغي وحدها احساس ما عندها حقيره كعدت يم ماما لزمت ايدها بتوتر وارتباك .. ماما بنيه صديقتي حجت ويايه حتى اشتغل وياها بمختبر هو ابوها هماتين يشتغل هناك تقبلين اروح

ردت عليه .. اخاف اشتر ما يقبل

عقدت حواجبي باستغراب.. ليش اشدخله اصلا اني وياه مفصولين مو من حقه يتدخل بحياتي

كملت كلامي برجاء .. ماما فدوه والله مو هلكد اعرف اجاوب ولا اعرف احلل بالعملي لازم ادخل مختبرات حتى افهم وهماتين البنيه والله ثقه وكلها تحمد بيها وتمدح بيها وهي صديقتي ويايه بقسمي وممثلة القسم مالتنه يعني كل الطلاب يعرفوها وهي انقهرت عليه لان عرفت ظروفي

حبابه ماما خليني اروح وياها والله وكالت اني اجيبج وارجعج بالخط هماتين بلكي اكدر اعينكم واعين ابني

جاوبتني بتنهيده .. بكيفج يمه بس والله اني اخاف عليج ما اريد يصير وياج مثل ما صار وياي وتتعبين والناس ما ترحم انوب انتي منفصله

رديت عليها.. لا والله ماما لو اعرف بيها خطر مجان رحت بي البنيه امينه حيل

اجت خاله تسواهن جايبه ابني منشنش ومشتريتله اشكال الملابس والحفاظات والحليب اخذته منها بلهفه وحظنته بسته بشفايفه وصدره اشتاق اله من اروح المكان وارجع متلهفه عليه يباوعلي وعيونه ترمش شكد حلووو يجنن هو هذا العوض من رب العالمين

اخذته ورحت سألتها منين هاي الملابس كالت .. اخوي جحيم دزلي واني جبتهن

تشكرت منها وبستها خطيه تجبر بخاطري هاي المره رحمه من رب العالمين واخوانها ممقصرين وياها

مر يوم كامل ثاني يوم اني مرحت للجامعه ظليت عندي ابني خابرتني صديقتي رانيا سولفت وياها كالت .. تعالي اليوم للمختبر خلينه نسولف شويه وهماتين اشوفج المختبر وتتعرفين على بابا

حجيت ويه ماما كالت روحي بس جانت شبه مقتنعه مو كولش مقتنعه

بدلت وانتظرتها تجي تاخذني وكفت الها على الشارع وهي اجت اخذتني وراحت بسيارتها جانت من دون حجاب بس قمة بالأدب والاخلاق وسوالفها حلوه متفهمه مو همجيه مثلي

جانت تفهمني وتكول لا تسوين هيج لا تحجين هيج صيري عاقله انتي هسه ام ..ابنج بحاجتج عوفي هاي السالفه جانت حبابه ويايه وتنصحني صرت اخذ بحجيها

دخلتني للمختبر مالتهم جان مختبر وابوها انسان مثقف ومنطقه راقيه صار يعلمني وهي هماتين تعلمني كال .. ظلي هنا تعلمي ويه رانيا وهمات انطيج اتعابج حتى لو ممستفاد منج

ضحكت كتله .. ههه لا عمو اني ما اريد اخسركم بالعكس المهم بس استفاد خبره بهذا المجال لا اكثر ولا اقل

رد عليه .. لا بابا ان شاء الله احنه سند الج سولفتلي عنج رانيا واعرف ظروفج وان شاء الله ما نقصر

ابتسمت .. فدوه الكلبك عموو الله يرزقك ان شاء الله

كعدت اسوي بالجهاز بعدها اثار إنتباهي تعامل الرجال ويه بنته شلون يتعامل وياها بلطف وحنيه شلون يحجي وياها ويضحك ويعلمها جنت مبتسمه تلقائيًا على مشهدهم بذهني

بعدها أختفت ابتسامتي فجأة بحيث روحي انصهرت فجأة ليش ابووي مو هيج ليش ما حسيت بابويه رجال

ليش ما حسيت بيه اب ليش هيج سوه بينه خلانه وحدتنا مفترسه تاكل وجوهه لا احساس ولا مشاعر ومتهجمات عدم حتى احساسنا

ليش صرنه عدوانيات وتعبت نفسيتها وصارت بالحضيض ليش كل هذا والسؤال الاهم ليش عامر ابووونه ؟

دمر كل شي بينه باع اخوي طفل لابو سعدون خلاه يتحرش بيه لحد الان اخوي يخاف يطلع بالشارع يكره الناس الكبار بالعمر يكره الزلم لان انتهكوا طفولته وبراءته

وهذا الشي خله عندي عبره للمستقبل مستحيل اخلي ابني طفل يشتغل وتستغله الناس تستغل طفولته وتستغل براءته الناس وحوش ما ترحم للبعض طبعا

صرت اتعجب واوصي كل ام لا تخلين ابنج وهو طفل يشتغل لا تخلين بنتج طفله تروح للمحل تشتري اخذت عبره من حياتي للي صار باخواني من تحرش الصار لجهان من طفولتها لاخويه امين وانتهاك برائته

وارجع واكول لو عدنا اب بيه خير بيه حظ مصار بينه الي صار هو الي قدمنا طعم سهل للكل صياد فاسد

انتهبت على رانيا وهي تحجي ويايه كالت .. مو كتلج انسي ليش تبجين

باوعتلها مصدومة مديت اصبعي على عيوني صدك ابجي شوكت بجيت ما ادري مسحت دموعي بسرعه وجاوبتا .. لا والله ما ابجي عليه جنت ابجي على مواضيع قديمه انسي هههه

ضحكت بحزن كالت .. يله تعالي خلينه نحلل تحليل النسبه

اجيت وياها بس استوقفني صوت وهو يكول .. السلام عليكم

باوعتله بسرعه وعلى وجهي ابتسامه عقد حواجبه وهيئته ترهب عقد حواجبه بمعنى .. منو انتي ؟

نهاية البارت ... يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل❤️

البارت طويل التحجي اكص لسانها مفهوووم 😎