#وكر الأشتر الفصل الرابع وثمانون 84 - بقلم سمو العراق

بارت ٢٤
رواية .. وكر الاشتر
بقلمي ... نور سمو العراق

💔💔💔💔💔💔💔💔💔💔💔💔💔

‏لا شيء يمرّ في حياتك عبث ، حتى تعثراتك الصغيرة كانت لأجل أن تعرف شيئًا ما ، لأجل أن تعي ، لأجل أن يتّسع أفقك ، وتزيد حكمتك..💙💭

.......................

تفتر بينه الدنيا وشكد ما كانت قوة الألم فلازم واحد يختار الرضا ويكون قابل بقضاء الله وقدره وشكد ما ينظلم لازم يسامح ينسى يحسن الظن يغفر ويتجاهل

والتجاهل احسن صفة حتى الانسان تكون اموره طبيعيه ويحسس المقابل بمدى قيمته عنده

سولين

دخلت بحالة رعب وهلع واني اشوف اشتر واكف بباب الكوفي وشاد أعصابه ايقنت ان هو جان مراقبني ومراقب كل تحركاتي بحيث مصار هواي من كعدت ويه علي حتى هو اقتحم المكان واجه بكل وقاحة وگابلني همست بيني وبين نفسي وبصوت خافت .. اشتر

جان علي يحجي وياي واني ذهني شارد وارجف من وجهه الاشتر الي ما يبشر بخير اني اكدر اواجهه اكدر احجي وياه بس ما احب الفضايح ما احب الكلام يصير كدام العالم كلها واني اشتغل جديده

وكفت وكتله .. دكتور علي اني اترخص منك هسه اجي رايحة للحمام

باوعلي بإعجاب كال .. تمام

شفته هجم من نص الكوفي لزمته بنص الكوفي من خصره وسحبته همست .. شتريد تسوي

ما اشوف الا علي دار وجهه علينه ومن شافه استغرب و وكف بذهول

بلعت ريكي واني احجي .. شجابك هنا انت شتريد

باوعلي بغضب وهو يكول .. شعندج كاعده

جاوبته بحده... اطلع خلينا نتفاهم

اجه علي وكف يمنه وهو يكول .. اهلا وسهلا استاذ اشتر تشرفت بمعرفتك مجنت اعرفك من قبل بس الحمدلله هسه عرفتك

ضحك بسخريه ودار وجهه بغرور لزم ايدي وهو يكول ... امشي وياي

لزمة علي وهو يكول .. وين تمشي وياك

اشتر باوعله بغرور وهو يكول .. والله هذا الشي ما يخصك

علي ... سولين تشتغل عندي موظفه عندي يعني تخصني

اشتر .. اعتبرها بطلت

تنفست بغضب كتله .. اشتر روح بعدين نتفاهم

عصر ايدي حيل وهو يكول ...لاااا هسه اريد احجي وياج تعالي

تنفست بغضب ودكتور علي كال .. اذا محابه ترحين وياه احجي مستحيل اخلي ياخذج غصبا عنج

اجه صاحب الكوفي وهو يكول .. بس بلا زحمة ما نريد ضجة داخل الكوفي تكدرون تطلعون برا تتفاهمون

طلعت اني اول وحده وهو ورايه هو ودكتور علي لزم ايدي كال .. يله مع السلامة

اعترض طريقه دكتور علي وهو يكول بغضب .. انت على اي اساس تاخذها وهي ما تريد تروح وياك وبعدين هي هنا موظفه مو حلوه منك تجي لمكان عملها وتحل مشاكلك يا مثقف

باوعله من فوك ليجوه كله .. تمام

باوعلي كال .. يله امشي

اني جنت افور ناااار تسعر بداخلي بس مجنت اكدر احجي اخاف احجي وتعلك بينهم واطلع اني بالوجهه الاسود

سحبت ايدي من اشتر ورديت عليه... من ارجع من البيت تعال ونحجي اني وياك اذا عندك موضوع ويايه

رجع لزم ايدي بعناد وهو يكول .. لا هسسه

حطيت ايدي على راسي وجريت نفس .. شبيك اشتر مو دا احجي وياك بعدين متفاهم اني ما اريد اخسر شغلي بسببك

علي تشجع و وكف بوجهه الاشتر كله بغضب .. ما تريد تروح وياك انت مو من حقك تجبرها وانت طليقها

اشتر زنعر بوجهه وعاط بيه بكل غضب ... انت مالك شغل لا تتدخل انت شنو وتتدخل ولي امرها واني ما ادري وبعدين كتلك اذا على الشغل فهي بطلت

باوعتله بغضب .. مو من حققك

باوعلي وابتسم كال .. لا من حقييي

دكتور علي فتح موبايله وهو يكول .. اني هسه اخابر الشرطة وهي تعرف شلون تتصرف وياك

ضحك وهو يكول .. تمام اذا اجو خابرني حتى استقبلهم

سحبني من ايدي حييل وعلي هجم صرت كدامة وحجيت بهدوء.. دكتور علي اتمنى تحترم رأيي واني هسه شويه واجي ان شاء الله بس اشوف شنو المشكلة واتفاهم بخصوص هذا الشي واجيك

أحترم رأيي وقدرني احسن من اشتر وكال .. تمام براحتج

صعدت وياه بالسياره واني محملة عليه وافح من غضبي وعصبيتي وعيوني تنطق بكل غضب وهو حس بيه اليوم اهجم هجوم كاسح

ساق بسرعه وما نطق بحرف واحد حجيت وياه بغضب كتله ... انت ليش هيج تسوي بس اريد اعرف يعني اني شسويتلك شنو الي سويته حتى تجازيني هييج مستخسر بيه اشتغل اصرف على نفسي وعلى ابني ما اكون بحاجتك

باوعلي بطرف عينه من دون ما يدور وجهه عليه كال .. شعنده كاعد وياج شيريد

جاوبته من بين اسناني وبحده .. اعتقد هذا الشي خاص بيه اني واعتقد انت كلت انتي ما الج وجود بحياتي وما تعنين الي شي وما اريدج تتذكرك لو اذكرك

رد عليه ببرود وهو يكول .. اتذكر

ضرب على رجلي .. انت وين ماخذني احجي واني حتى ما يحق اليه اركب بسيارتك ولا انت يحقلك تكعد يمي وتحجي وياي اصلا وانت رجال غريب عني

جاوب .. مو غريب اني ابو ابراهيم ابنا

كمل كلامه وهو يكول .. الغريب هو هذا لجنتي كاعده وياه بالكوفي وتثردين سوالف وياه

جاوبته .. هذا مديري اشتغل عنده تعرف شنو اشتغل عنده

رد بغضب وهو يكول .. يخسى تشتغلين عنده انتي ما تشتغلين عند احد انتي الناس تشتغل عندج

جاوبته والدمعه بطرف عيني ... ما اريد ما اريد خليني على كد حالي وفرحانه برزقي ما اريد افخفخ واطير للسما عوفني خليني براحتي

رد بخبث.. واني ما ادور راحتج

جاوبته .. اي تريد تنتقم مني تريد تهيني وتذلني على كلمة طلعت مني بالغلط واعتذرت عنها الف مره ومره شسوي حتى ترضا شسوي ادري بيك ما تدور راحتي ادري بيك تبغضني وتكرهني وتموت اذا شفتني مرتاحة

شفت الطريق شفتها صورة سوادي منوره المكان انقبض كلبي من هذا المكان ذابت روحي شكد ذكريات هنا شكد سوالف صارت هنا اتكهربت هنا خفت انرعبت عشت اشياء تخوف

بلعت ريكي والحسره والحيره بداخلي نزل من السياره وفتح الباب كال .. انزلي احجي وياج

لزمت بالكشن وجاوبته .. ما انزل ولا اجي وياك لو اموت كتلك انت رجال غريب انت مو زوجي ولا تحل عليه انت

سحبني من ايدي حيل وهو يكول .. عوووفي الحلال والحرام هسه وتعالي وياي

لزكت اكثر بالكشن جاوبته .. ما اجي والله ما اجي

مد راسه من باي السياره وهو يكول .. مو اجي اشيلج اودخلج للبيت غصبا عنج

جاوبته بغضب .. ما تستحي انت شايلني وتفتر بيه كدام العالم

رد عليه ببرود وهو يكول .. محد موجود بس سوادي الله يرحمة وهو ثقه وشريف ما يباوع

كلبت عيوني بملل واني كتم بداخلي هوووايه من الامور كتفت اديه وكعدت بعناد وما مشيت وياه

سحب أيدي حييل وجرني للبيت واني اصيح واتذكر واحجي بس بدون تجاوز وغلط تعلمت بعد ما اغلط عليه

دخلني بنص البيت صابني الذهول والبرود من شفت البيت هذا التيل رمز من رموز حياتي هاي دبة مي الارو الي من كل عقلي جنت احتمي بيها واحسبها الملاذ الي والانقاذ الاول والاخير وتالي هو من اغتصبني طيرني اني والدبه انوب يدور نسبه هه

......................

صفاء

خابرت على مصطفى كتله ... هااا ولك شنو بشر امك شلونها وجدتك وجيهه وخالك شلونهم

جاوبني .. شلونهم هم مطبوخين طبخ بعد شلونهم على العموم اني راح اروح الهم تمشي وياي ؟

جاوبته .. على شنو امشي عرفه ولفه وياهم هو خالك و وجيهه اكدر انيى سوالفها اكدر انيى السوته بيه شلون جانت بالشتا تصعدني فوك وبالصيف تحبسني بالسرداب

ضحك وهو يكول .. دمشي ولك وياي شلون لكيتلك هناك ممرضه تطك بالكاع وصغيره تعال وياي بلكي تجنكل وياها ونفرح بيكم

جاوبته .. ولك انت صدك ما تستحي جدتك بين الحياة والموت وانت مكابل الممرضات والله لو تدري بيك افيان لا تشكك بالنص

رد عليه باستنكار ... لا شريف ونزيهه والله ما عندي سوالف خايسه واخلاقي زي الفل بس اني جاي ادورلك عروس تعال وياي والله اضوج اكعد وحدي بالمستشفى على الاقل شويه نتونس اني وياك وناخذ غيبه وكذلك ادولك مره

ضحكت .. ههه انت ما عندك احساس لو شنو يعني ناس تريد تموت وانت كاعد تدور حلوات

جاوبني بسخريه .. اكلك انت شبيك يعني هو الي يريد يموت اني الزمه لو احطه بشيشه وبعدين افيان كلتلي وانطتني احكام سماويه يعني الي يريد يموت توكع ورقتة من السما وهذا يومة ما نعترض على امر رب العالمين صدك جذب يعني شلون ولك تريد اغضب ربي لا والف لاااا

ضحكت .. ههههه يله جايك جايك

وفعلا رحت عليه لكيته كاشخ اخر كشخه من شافني كال .. اي همزين اجيت تعال اخذلي صورة كلها حركات وبركات حتى انشرها اخلي افيان تتخبل اخليها تراسلني وهي الممنونه

جاوبته ... ليش زعلانه المسعده

رد ببرود .. لا مو زعلانه بس لابستني هي هاي وينها وين الحب من امداها

ضحكت ... هههههه والله لو تسمعك

اخذتله كم لقطه ورحنه للمستشفى اول ما دخلنه لكينه ساهر وجهه اسود ولحيته طالعه كلها وسخ و وجيهه واختها الاخت اختي زهراء واكفات جنج الارملة السوداء

سالتهم .. هااا شنو شلونهم

جاوب ساهر .. شلونهم امي حالتها خطره وخالي تحسين يصيح ويستريح من الالم وبقت يم الله

صاح الدكتور على ساهر راح وياه وام ماهر جانت تولول على راسنه .. ميتحملون الالم اووي سوده عليه منو يتحمل الم الحرق يارب خفف عنهم

اني صفنت وشردت بذهني لايام زمان من جانت اختي محروقه وجانت شامريها لوحدها بالمستشفى الله ينطي حجي اديب جان يجي ويوكف وياها يصبرها ويقره قران على راسها ويدفع كل مبلغ انصرف عليها بالمستشفى

ابتعدت عنهم وكعدت الوحدي ورجعت بذاكرتي لايام المصايب والالم

جنت طفل واكف ويه اشتر ولازم ايده وابجي على بجيها جان الدكتور يداويها ويكشط اللحم المتحرق وهي جانت تصرخ وتصيح .. ولج يمممه تعاي ولج يممه راح اموووت ما اكدر اتحمل اااااه ياربي موتني ما اكدر اتحمل الوجع

جان صوتها صوت بالسما وصوت بالارض ترجف تبجي تصرخ تتوسل بالدكتور وهي تكوله .. فدووه دكتور فدوه انطيني ابره خليهم ينطوني علاج بس يسكن الوجع بس يهدء جسمي ما اكدر اتحمل انطوني شي بارد يبرد عليه حسوو بيه احجي وياكم بس حسو بيه انتم محد يحس بيه جسمي كلبي يوجعني عقلي طار من الوجع

جان حجي اديب واكف بباب الغرفه ويبجي عليها يضغب مو يبجي اجه الدكتور الثاني مهم وهو يكول بسرعه .. وين ابوها البنيه تسممت كلياتها وتحاليلها ما تبشر بخير

جاوبه حجي اديب وهو يكفكف دموعه .. وين ابوها ؟ هو ابوها لو هنا هي هذا حالها هيج تكون بهالتعاسه يتيمة البنيه لا ام ولا ابووو

الدكتور بحسره وغضب .. البنيه انطت شهاده بحرقها من قبل تحسين و وجيهه ليش غيرتها ليش ؟

ردت عليه المنرضه وهي تكول .. دكتور لان بصراحة هم بينهم مشاكل والبنيه هي حاركة روحها فالهذا السبب هي اتهمتهم بحرقها

عاط الاشتر بالممرضه وهو يكول ... لا مو هييج مو هيج اختي هم حركوها اختي ما تنتحر تعرف ربها كلش زين والله راح يتعاقبون راح ينذلوون بس اختي يصير بيها شي اعرف شلون اتصرف وياهم

الدكتور كال .. العاملات من دخلوها للحمام نظفوا الجرح هي شهدت نفس الشهاده وكالو ان هي احتركت من قبل تحسين و وجيهه يعني مرتين تعيد السالفه بس ليش هي من يجون الشرطه تبدل اقوالها ؟

اشتر بحقد .. لان تتهددد لان اكو من يهددها هم نفسهم يهددوها اختي هذا المها و وجعها كل بسببهم الله ينتقم منهم وحقها ما يضيع

الدكتور .. اطلعوا ولحد يدخل عليها هي صح منتهيه بس ما نريد الصحه تاخذ اجراءات بحقنه بسبب الناس التدخل عليها

طلعنه من المستشفى اني رجعت للبيت حتى اجيب ملابس اغراض الها وحجي اديب واشتر وكفولي بالسياره بالباب

دخلت واشوف وجيهه وبناتها وابنها واخواها وعائلته محتفلين بعيد ميلاد ساهر ويركصون

باوعولي وهم يكولون .. هااا ماتت اختك

مجاوبت روحي طفرت من جسمي واشتعلت عندي نار الانتقام حقراء جبناء اختي بنص الموت هم يحتفلون ويركصون وما هامهم اي شي حتى الي يربيله جلب هم ينقهر عليه وهم هيج طغوا ولا اهتموا الها ولا اهتموا الجرحها ومشاعرها فعلا هم الي حركوها

رجعت شفت اشتر وجهه صاير نار ومثل المنعس لان هو صار من احتركت اختي لحد الان وهو ابد ما شاف النوم بعينه ولا اكل بس المي يشربه ما يكدر يشوفها هيج موجوعه وهو ينام وياكل وهو وياها تقاسموا ظلمة الرحم سوه وعاشوا بنفس البطن سوه واحد داره الثاني وارواحهم جانت معلقه ببعض

كال بروح ذايبه .. شفتهم

جريت نفس وزفرته.. شفتهم جانوا محتفلين بعيد ميلاد ساهر

عقد حواجبه وتنهد كال .. الله كريم

بعدها ماتت اختي بعد صراع من الالم والوجع وكسر الخواطر هواي سنين مشت وراحت وتحسين ما اخذ جزاءة هو واخته على الرغم من ان اشتر كسر رجله وصوبه وكذلك مره حرك بيتهم وذب ولده سجن وفلسهم بس جنه منتظرين العدالة الالهيه الي هي اكبر اهانة لكل ظالم واكبر جائزة لكل مظلوم

رجعت الهم كالت ام ماهر .. امي راح تموت الوجع هسه كون ينطوها شي يسكن الوجع جان ارتاح كلبي

جاوبها مصطفى بعدم اهتمام .. خليهم يضربوها ابره تنهي حياتها بدل هالوجع وهاي حتكون الها رصاصة رحمة تخلصها من كل شي

تعصبت ام ماهر وهي تعيط بيه .. انت صدك تحجي تريد المره تموت ولك انت صدك ما عندك لا ذمة ولا ضمير

ضحك .. جااا شسووي

سحبته .. ولك انت شبيك ما تشوفهم شلون منهارين

باوعلي وهو يبتسم .. هاااا تريد اراعي مشاعرهم لان حزينين على وجيهه جا ما راعوا مشاعرنه من احتركت اختي مو جانوا محتفلين بعيد ميلاد ساهر لك جنت طفل واتذكر جنت كاعد بنصهم ومحتفل وياهم شوف الحقاره شووف جابريني على الكعده بعد على شنو اراعي مشاعرهم كما تدين تدان وهذا الجنو وهذا الحصدو

سكتت مجاوبته فعلا المواقف الظل بس اني كلبي رجيج اتعاطف وياهم عكس اخوتي

.........

سولين

جان كاعد ويدخن واني واكفه يمه مثل الصنم بس بداخلي نار

حجيت بهجوم ...يعني شلون اظل هيج ترا عيب عليك هاي مو حاله

نفخ الدخان من بين شفايفه وهو يكول ..احجيلي شيريد منج

جاوبته بانتقام ..يريد يخطبني انعجب بيه

وكف بهجوم وداس على. جكارته كال ..ما رايد روحه وحق الله

رفعت حاجب..وليش ما رايد روحة اشو انت لا ارحمك ولا اخلي رحمة الله تجيك انت الي تريده
بالضبط شنوو

مشه خطوات باتجاهي بلعت ريكي ورجعت خطوات خايفه منه كتله واني اثبت نفسي شبيييك

تقرب مني وهو يكول ... شنو ناويه تتزوجين

رديت عليه ... وليش لا حلال عليك وحرام عليه

حط ايده كدام وجهي وهو يكول .. اوكفي لحظه شنو الحلال عليه شنو قابل حللت غيرج شنو خليت غيرج بحظني

كتمت عبرتي واختنك صوتي كتله .. بس اريد اعرف شغله وحده انت ليش هيج تسوي بيه ليش مستخدم ويايه ترغيب وترهيب انت ما تريدني ليش متخليني اعيش هاي مرتين تجي وتحرجني كدام العالم

واكو حركة نذله سويتها وحت اشتكيت عليه بالمجلس البلدي حتى يسجنوني لان ما مكملة بكالوريوس ترا عيب هذا التصرف كل هذا حقد وغل بس حتى تذلني واكون بحاجتك

هز راسه برفض كال ... لاااا مو هيج مستحيل اخليج بحاجتي بس هذا هو واخته ناثبين عليج تعرفين شنو ناصبين عليج يردون يحققون غاياتهم بيج بس انتي متفهمين وتظلين طول عمرج متفهمين

جاوبته .. اي هو هذا انت بس مال رزايل بس تعرف تهيني وترزل بيه حتى ما تفهمني مثل العالم

رد عليه وهو يكول .. افهمج هذا ما يخلف هو صح خوش ولد بس ميخلف وعباله من راح يتزوجج اخلي ابني يعيش وياه والله اهجم العالم على راسه ولا اخلي يتقرب منكم لا انتي ولا ابنيي مفهووم

دفعته بثنين اديه بغضب .. وانت منو كلك اني وافقت منو كلك اني رصيت بيه منو كلك اني اقبل واحد يربي ابني غيرك لو غيري منو كلك اشتت ابني على رجال منووووو ؟

انت اصلا لازم تخلي ايدك ورجلك بمي بارد ترتاح لان اني لبوووه مو نعجه مستحيل اخلي واحد يتصدق على ابني اني يا اما اكون او لا اكوون كافي اشتر مصختها ويايه هواي واني ساكته عوفني بحالي

جاوب بجمود وهو يكول .. اتركي الشغل هنا واني اعينج عند بنيه صديقتي تنطيج ضعف الي ينطي الج علي وكذلك تداومين تلث ايام بالاسبوع

هزيت راسي برفض... لا عيني شكرا ما اتعين عند صاحباتك كتلك من زمان خليني بعيده عن صاحباتك لان كلهن ادبسزيات وطايحات حظ من سالي وشيل ايدك اصلا اني ما اريد مشاكل

سحبني من خصري بقسوه عطت بصوت... ااااه شبيك انت وخر انت متعرف الحرام

عض شفته وهو يكول .. لج انتي شنو من مله صاحباتي شنووو لج هاي زميلتي اخت صديقي ما عندي شي وياها وحتى سالي جانت زميلة شغل وراحت بحال سبيلها

رفعت حاجب.. اهااا هيج اني هماتين علي زميل شغل ماكو داعي تغار منه وتروح تدور وراه تسويله سي في كامل لان مجرد صديق مثل صديقاتك

عاط بوجهي بغضب وعيونه جدجت ناااار ... هذا راسم عليج يريد ياخذ عائلتي كلها مو طامع بس بيج طابع بكل العائله انتي وابني هيج حقاره اني ما شفت يريد يبني سعادته على تعاستي يريدني اخسر كل شي

جاوبته بعصبيه .. ليش تخسر كل شي اصلا انتي الي خسرت روحك كل شي جنت مثل الجلب اركض وراك وادور رضاك وصلتني لحالة من الجنون دمرتني خليتني حتى دراسه مثل العالم ما اعرف ادرس القسم كله ناجح واني الوحيده الي محمله بسبب شنووو

بسببك انت اتوسل ودمعي عليك يهوون ابببد ولا اهتميت الي ولا كسرت خاطرك ولا رف شاربك الي حنت اتمنى تحجي وياي تعاتبني تشوف رسايلي وترد عليه بس جنت اتمنى منك كلمة حتى لو عاب حتى لو رزاله وانت لابسني

طكت روحي وصلت للجنون بسببك حالة نفسيه صارت بيه الحمدلله هسه وكفت على رجليه وصرت اشتغلت حاولت انساك ودا انسى هسه تجي تمول اخذو عائلتي مني هسه عائلتك صارت عزيزه

صاح بوجهي بغضب وهو يكول ... كاااافي

تخصرت ... هاااا كافي اي طبعا ما يعجبك كلامي لازم تسد حلكي مو من حقي احجي مو من حقي ادافع عن نفسي

خمط وجهي كله بجف ايده وهو شاد على شفايفه ما حسيت غير بشفايفه احتظنت شفايفي وهو يعرف شلون يسكتني رجع لاستليبه القديمة وعقوباته الي جانت اقصاها بوسه يخليني بيها احلف والزم التوبه بعد ما اعيدها ولا احجي حرف

حسيت انضربت بوكس وبطوي تشنجت جنت ارمش بعيوني شكد غريب عني رجعت بذاكرتي لاشتري الي احبببه اخر شي من تعلقت بيه جنت اتمنى كل شويه اكون عنده ابوسه احضنه اشمه

ابتعد عني وهو يكول ... اعرف شلون اسكتج جنت احبببج !

ضحكت بسخريه .. اي كولة محمد القدومي جنت تحبني بطريقه جنونيه مره تزرع غابه خضرا بداخلي ومره تحرگها

باوعت بارجاء البيت كتله .. هنااا شفتك خطفت ساهر هنا سمعتك تحجي ويه ابويه بخصوص امي هنا اتكهربت وهنا صارلي حادث هنا جبرتني وهنا هجم عليه سوادي هنا دوحي دك الباب وخلسني وانت ما جنت تدري عني

رد عليه وهو يكول .. ادري عن كل شي ودارس كل شي وكل واحد اذاج تعاقب واخذ جزاءه

وكف وهو يكول هنا اجن اخواتج وانتي فرحتي بيهن وهنا لبستي فستانج جان عرس كريم وطلعتي بيه كوين وهنا تعاركتي ويه اخويه صفاء وطردتي وهنا سويتيلي ريوك وكعدتي تفننين بيه ورغم القرف بس شجعتج وكتلج عاشت ايدج منال لعالم ما تلحكج

ضحكت... ههههه ما شاء الله تتذكر كل شي

رد عليه وهو يكول .. اييي كل شي اتذكر اتذكر دموعج حزنج انينج ضحكتج جنت احببج

بلعت ريكي هاي ثاني مره يكولها جنت احبج يعني بطل يحبني جنت ماضي وانتهيت من المستقبل احس هاي كلمته مرت عليه من دون رحمة

حجيت بجمود .. ممكن ترجعني للبيت لان اني كولش ضجت وهماتين تعبت ومناك ابراهيم تاخرت عليه

كال .. تمام بس بطلي من علي وكتلج وين ما تردين تشتغلين اشتغل

جاوبته بحركة ... بس اريد اعرف ليييش ليييش ترا والله تصرفاتك ما الها داعي عيني انت شدخلك بيه انت مو مطلكني لو ناري تدور حرام ويايه

وهاااا هسه من بستني ياربي اني ما دخلني الذنب بس عليه لان هو جبرني اني ما الي شغل والله

جاوبني .. لا انتي بديتي زينتج اليه يعني انتي ام الذنب الاول هسه ما علينه بعدين نتصافه على هالذنب فكيني من علي لا اخلي ذنبه بركبتي واوبخة

جاوبته بتهرب .. تمام بطلت

رد عليه وهو يرفع اصبعه كال .. اني اثق بيج يعني لا تنزعين ثقتي وترحين تداومين باجر

جاوبته .. حتى لو اريد اداوم اكيد فصلني بسبب افعالك وبعدين على شنو تغار

رد عليه وهو يكول بغرور ... اغار شنوو ؟ مصدكة روحج اني ما اريده يبني سعادته على حساب عائلتي

شلت الجنطه بغضب ... اهاا تمام يله لعد وصلني اريد اروح مناك ابني

طلعنه سوه ركبت وياه بالطريق دنوصل لبيت اهلي اتصل موبايله بنغمة جديده الي تكول...لا تسالني كيف بغار لو كانو عقلاتي كبار
كيف بقدر اتحمل كيف حبك فيي والع نار

فتحت حلكي وعيوني طلعت مترييين ... عزااااا مغير نغمة موبايله لااااا مدا اصدك هاي شنووو اخاف احلم

فركت عيوني واباوعله فتح خط وهو يكول بملل... جاي يله باي

بلعت ريكي .. انت مغير نغمة موبايلك لو اني احلم

رد عليه وهو يسوق .. اي شكو بيها

رفعت حاجب .. وعليمن تغار

جاوبني .. ميخصج

عضيت شفايفي صرت تنين بس اطلع دخان من خشمي اوذاني من كد الغضب

نزلت من السياره بعد ما وصلني وركعت الباب حيل فلشت السياره هو مد راسه من الشباك وهو يكول ... فدوووه الج

ابتسمت شكد ما اگب نار يبردني

دخلت جوه لكيت جيهان كاعده وتبجي موعد عمليتها وخايفه حيل ومخلصتها بجي

كعدت يم امي ظليت افرج برجليها واسويلها مساج لان الدكتور هيج كال النه. واسولف وياها عن موقف اليوم الصار وهي فهمتني شنو اسوي

................

جيهان...

اليوم موعد عمليتي واني روحي ترجف خايفه اخاف اموت وبعد ما اشوفهم لو ما تنجح العمليه خايفه من البنج وسوالف البنج ختمت القران من كد ما دعيت وصليت وقريت ايات قرآنيه

لابسة البدلة الزركة مالة العمليات وكاعدة انتظر التحاليل تطلع حتى يهيئوني للعملية

حيل خايفة اول مرة راح اخضع لعملية جنت كاعدة ومخليه اديه بحضني واعصر بأصابعي وصافنة بالفراغ

وبالي افكر شلون راح اتبنج واغيب عن الوعي
و شون المشارط والشفرات راح تخترق جسمي

حوطت اكتافي افيان وتهمسلي وهي تدلعني
هااا جيجي مستعدة حتى تطلعين النه بشكلج الجديد مو ؟ واااي تصير انجلينا جولي تاليها تركعين كريم دفره تكليله بعد ما اريدك يالشايب العايب ابن كهلان اريد واحد بالباكيت ما مستعمل

باوعتلها والدمع عصا بعيني وخليت راسي على كتفها وهزيت راسي وهي تحاول جاهدة حتى تمتص خوفي وتضحك بيه بس اني وين خايفه ومرعوبه

تسواهن يمنا مدت راسها وكالت خايبةة لا تخافين هسه تطبين للعمليات وتطلعين جنج وردة ويظل كريم ابو صماخ يلوب عليج

وكالت فافي اي وكل وحدة حية تنمرت عليج وكالت عنج مشوهة تنلطم على عينه وتنلصم وبعد تلبسين كله مشلتح ومشخل تطلعين ملاعيب العيد كلهن

ابتسمت نص ابتسامة بس برجفة تنهدت وغمضت كعدوا يواسوني ويهدئوني بس اني هالرجفة مراضية اتخطاهه

حسيت محتاجته اي والله كلش رايدته بهالوقت وسرحت بتفكيري ونسيت العملية وظليت افكر بي وبأيامنا سوىٰ

باوعت الهم اجاملهم بابتسامة وهم يحاجوني ويهدأون بيه كلت لأفيان شكلهه التحاليل متأخرة اريد اروح للحمام

كالت اروح وياج؟ تحتاجيني؟ اسويلج بروفا هناك

هزيت راسي بلالآ بس انطيني تليفونيى اخذته من بين اديها وباوعتليى بنظرة انو هي افتهمت اني المن ماخذته

هو ميعرف اليوم عمليتي ماعنده علم بالموعد بس اني هنا ضعفت واحتاجيته ونكرت كل مشاعري الي حقدت عليه وكرهته بلحظة احاسيس مزيفة

خليت ايدي على الموبايل وفتحت البصمة وطلعت الرقم مالته واتصلت اجاني صوته يحجي بلهفة وينطق اسمي بكل وله
جيهااان

حاجيته والغصة متوسدة بنص بلعومي ها كريم

كال بقلق شبيج جيهان انت دتبجين؟ شبي صوتج

جريت نفس وجاوبته والعبرة لسه خانگتنيى
لا ماابجيى بس عمليتي بعد بعد

كال اي ايى
بنبرة بيها يستعجلني حتى احجي

جاوبته مترددة بعد ساعتين من هسه

رد متهجم شنووو تحجين صدك انت لو كوة تردين تحركين دمي

جاوبته ابجي والله
ومكدرت اكمل باقي كلامي...

كال بعصبية تردين تخبليني جيهاان!!! ليش هييج لييش يعني لهلدرجة ما الي اهميه عندج رايحة تسوين عمليه من دون متحجين
وظل يتنفس بعصبيةة واحس بي من يتنفس

كال انت ليش دتسووين هيج بالله ليش لج تدرين اني وين هسه تدرررين!!!!

شهكت ماكدرت اكتم شهكتيى

كال بسرعة جااي اني جااي هسه جاي
غلق الخط واني خليت الفون وغسلت وجهي وطلعت

صرت امشي على كيف اسحب برجليه سحب وامشي وصوته وهو معصب باذني كعدت

انطيت الفون لافيان اخذته مني وتباوع عليه
خليت اديه على وجهي فركت وجهي
ووخرتهم بسرعة سألتها طلعت التحاليل

كالت بعد ماطلعت

تنفست الصعداء، كون ميطلعن هسه بلكي يجي يالله بلكي يلحك اشوفه قبل ماافوت للعملية...

توترت حيييل واعصر باصابعي احس حكسرهن وافيان كل شوي تهدي بيه وتسواهن تجيب اكل وهو ميصير اكل ممنوع قبل العملية

وهي تخلي اللفة وراها وتنطيني وتغمزلي
هااج اخذي لايشوفج الدكتور ماعليج اكلي خو ما تموتين روحج من الجوع

وافيان تاخذ اللفة منهه وتاكلهه تكله ... جيبي خلينه نتسمم خاف تموت بعد منكدر ناكل نظل ندك ونلطم هههه

ضربتها تسواهن وهي تكول .. انتي ما تعرفين تواسين مثل الوادم شهالخبال

وطلعت التحاليل واني عيني باتجاه المدخل اكول هسه يدخل عليه

ودخلنا عالطبيب شاف التحاليل كلها سليمة وتسمح لي اسوي العملية

مشيت بيأس باتجاه غرفة العمليات وحاصرة البجية كوة ماريد ابجي....

خلوني عالسدية واجه طبيب التخدير خلالي كانوله بيدي
غمضت عيوني اريد ابجي

هو كال شسمج بابا؟

جاوبته جيهان

كال ماشاءالله اسمج حلو؟ متزوجة موو؟

جاوبته نعم..

رد زوجج وياج لو لا

هزيت راسي وهو على السدية وغمضت عيوني بقووة

واسمع صوته ترس اذني وكلبي بحيث اللتفت بقووة عالمدخل

سمعته يكول دكتور بس ربع ساعة

صوته ماعرف شسوا بيه وسيطرت على رجفة گلبي

وبعدها دخل عليه ببدلته العسكرية وطوله الفارع وهييبته ونظراته المليانه قلق جان مرتب ونازك وانيق

اجه يمي وطلع الطبيب ابو التخدير بلحظتها
ظل يباوع عليه بحزن واني لابسة البدلة الزركة مال عمليات وشادين راسي

اول ما لزم ايدي وكعد يميى ايده اللخ على راسي والثانية لازم بيها ايدي

ابهامه علىى جبيني ويباوع عليه نظراته على كل وجهي

شهكت باس ايدي وراسي وكال لتخافين جيهانيى
وابتسم
ابتسامته طمنتني ودفتني وجبرت نفسي ابتسم اله

همست خايفة

رد لتخافين حبيبتي انت قوية و بطلة انت
هسه تسوين العملية وتكومين بالسلامة وترجع ابتسامتج الحلوة على وجهج وثقتج بنفس اقوة بعد ليش الخوف

بلعت الغصة كتله راح تبقى تنتظرني الى ان اطلع مو؟

جاوب وهو يهز راسه اي طبعا مستحيل اتحرك من مكاني اذا ما اطمن عليج واخذج بيدي للبيت ترتاحين

مسح دمعة وكعت من عيني ورجع باس ايدي
وظل يحجي ويايه طول الربع ساعة الي ترخص بيها من الدكتور واجل عمليتي

كلامه جان يسترسل لاسماعي ويهديني مثل تهويدة قبل النوم مثل تأثير المهدأ صوته حنين ودافي وابتسامته علاج

كال هسه انت مستعدة موو جيهان رمشت بعيوني وهمست ايى

كام على حيله
كال اخليج هسه اني ونلتقي ورا العملية اريدج بطلة ومتخافين مثل مااتفقنا

ابتسمت دليل على قبولي

طلع يتلفتليى واختفى ورا الستارة

وفات ابو التخدير وبنجني وبعدها ماحسيت بشي...

................

صفاء

كل ما يدزون على اشتر تريده وجيهه واخوها هو ما يجي يوصل لباب المستشفى بس يتردد ويرجع وهاي ثالث مره يسويها بس اخر مره صار ضغط عليه جبير ودزوا عليه حجي اديب لذلك هو استسلم

وراح دخل الهم الغرفهم ظل تقريبا ويه كل واحد نص ساعه وطلع بس ما عرفت شنو الي دار بينهم وشنو الكلام الي صار وهو سامحهم وبراهم الذمة لو لا

طلع من الغرفه وجهه ابد ما يبشر بخير عرفت عاد الماضي وتراكمت عليه الاحداث وايقنت هو ما سامحهم ولا راح يسامحهم ولا يبريهم الذمة وحق رحيق ما ضاع ان شاء الله

طلع للحديقه وهو واكف يدخن لابس قميصه الأسود وبنطرون اسود ويدخن بشراهه

صاح على مصطفى كله... مصطفى تعال

اجه مصطفى مستغرب كله ... هاااا

تنهد وبعدها حجه بجديه ... انت تريد تخطب افيان

مصطفى .. اي طبعا اريد اخطبها لعد شلون غير احبها عساس باجر خطوبتنا بس لان ذول احتركوا اجلتها

اشتر .. شوف عايد صديقي حاجاني عليها ويريد يخطبها انت بكيفك يا اما باجر تروح تخطبها نخليها بس عقد وبعدين نسوي الحفله يا اما ازوجها العايد

مصطفى بخبال ... جااا وذول الي يجالعون يردون يموتون شنو عادي يعني

اشتر جر نفس وزفره .. عادي شدخلك بيهم هاي حياتك ما توكف عليهم ولا تضيع البنيه مو ايدك وترا هي تكيف على عليد رجال ونعم منه شاطر وذكي ومو مستهتر

جاوبه مصطفى باندفاع .. لا هذا هو باجر نعقد ان شاء الله بس اتفق وياها

ضحك وهو يكول .. متفق لا تخاف ان شاء الله نرد الصاع صاعين

نهاية البارت .. يتبع

كونوا انتم كونوا بخير .. احبكم 💔

لا تنسوا التصويت والمشاركة بكم نكتمل

ان شاء الله ما ظل الا القليل على النهاية 💔