#وكر الأشتر الفصل السادس وثمانون 86 - بقلم سمو العراق

بنات عساس اليوم البارت الاخير لكن بطلاتي عندهم عرس كالو نكملج البارت بس للاسف ظروفهم حالتهم بينهم وبيني بس لكثرة الاعذار رتبت هذا البارت وخليت احداث البارت الاخير الى شعار اخر

التمس المعذره

💔💔💔💔💔💔💔💔
آه يا ذات الفستان الاحمر سحركِ سيدتى، لا ينكر من ينكر هذا يتكبر آتيك شوقاً آنستي لكني أتعثر.

...................

سولين

من بعد ما تمت الخطوبه اني جنت كاشخه كل قوتي جنت لابسه فستان احمر اريد اخبله لان هو يحب اللون الاحمر ومخليه مكياج هادئ ومشسوره شعري

لبست حجابي غطيت شعري وطلعت دا احجي ويه خاله تسواهن وعيني على الغرفه الي ديعقدون بيها كلتلها .. شنووو مخلص العقد اشو اتاخروا

جاوبتني بتسواهن .. انطيهم مجال هسه يطلع الاشتر وتشبعين منه شوف شنيي بله نعوف العقد على النص والله شنو حظره جنابج تردين تشوفين رجيلج مشتاقتله

هزيت راسي برفض ... لا مو هيج انتي شدتحجين يمعوده بس يعني هيج اسال اكول يعني اتاخروا لا اكثر ولا اقل

فرفرت شفايفها ما عاجبها الوضع كالت .. هسه لو يتاخر سنه بس خلي نخلص من هالطركاعه ولج اجيت الزمها بالصالون وانعنع ضلوعها لسانها شطووله ولا جنها عروس عرس عليها البين ان شاء الله

ضحكت ... هههه لا خاله فدوه لا تدعين عليها ترا فافي اختي صح خبله بس احبها

هزت ايدها ... حبها برص كوون ولج هاي خبالات عامر كلهن براسها عامر ومفشوكة خبالها فاق عامر واجداد عامر

طلع الشيخ ومصطفى واشتر من الغرفه اني جنت اباوع عليهم او بالاحرى صافنه على اشتر هو بسرعه باوعلي شتا نظري واني اصيح .. يله يله خلي افيان تكعد سوو مجال

مشه من يمي وطلع وافيان كعدت هي ومصطفى فرحانه لازمة ايده عبالك حينهزم وهو هماتين ما مصدك لازمها وتسواهن تهوس الهم بوسها ولا تخاف من امها وهو ممصدك كل شويه وطكها ببوسه

جنت فرحانه الهم واباوعلهم ومبتسمه هسه لو اني زوجة اشتر بعدني جان هسه افيان مرة حماي هههههه

شويه واجت خالتي تسواهن كالت .. اكلج روحي للغرفه ابراهيم يبجي لوحده

طكيتها ركضه واني احجي عليها ... يااا خاله على بختج صدك جذب شلون تعوفينه الوحده غير تجيبي

كالت .. خاب دروحي ظلت بس المزعطه ما ربيتها بهذا البيت

رحت بسرعه جان ما اسمع صوت استغربت يمكن سكت لوحده دخلت للغرفه وانصدمت شفت اشتر واكف جنه عمود فاتحة حتى بخطوبة اخو لابس اسود يلطم ليل ونهار اسود غراب خو ما غراب

انصدمت من شفته وتراجعت باوعلي وقلص عيونه بلعت ريكي كتله بتوتر .. اممم ههذا هو كالت خاله تسواهن ابراهيم كعد

باوع لابراهيم بغرور ورجع باوعلي كال .. اي بس رجع نام

رفعت حاجب ... اها تمام اني طالعه

اول ما درت وجهي سحب ايدي وجرني عطت بصوت خافت .. هاي شبيك شتريد

سحبني واحتظني كال .. حنين حتى على اخطائج

بلعت ريكي همست .. اعتذرت اكثر من مره بس ما شفت منك استجابه ما شفت حنيتك على اخطائي بالعكس قسيت

جر نفس وزفره كال.. اييي قسيت وقسيت بس ما كدرت اقسى اكثر جنت احبج بس هسه اموووت عليج

ممصدك انتي صرتي ام ابراهيم ام ابني روحي وعقلي مكتفي بيج وبابني كل الي مروا بحياتي لا شي انتي كل شي انتي الروح والنفس وكل الاماني حبيتج من كل گلبي حبيتج اكثر من كل شي

حبي الج مثل البذره زرعته وكبرته صار شجره جبيره حاولت اقلعها وابطل اهتم بيها بس ما كدرت اسوي هيج لان انتي تعبي انتي روحي انتي اهم من شغلي اهم من الجنائيات واهم من كل حياتي

٣٤سنه ما شفت الدنيا الا بيج ما عشكت مره غيرج غلطتي! سامحتج وبختج ايي! بس تظل اعز ناسي تظلين تنافسين رحيق بالمحبه انتي توأمي انتي عوضتيني عن كل سنين التعب

بجيت بصوت مسموع ... احبك انييي عشت من بعدك يتيمة صرت متسوله اجدي الكلمة منك ضعفت وضعفتني كسرتني ونزلت دمعتي ما جنت حنين على اخطائي جنت قاسي

خسرت كل شي بسببك صحتي وروحي وعقلي ودراستي هملت نفسي هملت طفلي صحيت على نفسي بعدها حاولت اعين نفسي

انت ما خليتني انوب حتى دزيت عليه ناس من المجلس البلدي حتى يعتقلوني جنت حيل خبيث وياي

ضحك وهو يكول .. هههههه انتي من كل عقلج مصدكة هم من المجلس البلدي لج بابا لا من المجلس البلدي ولا شي هم اصدقائي اني طلعتهم مناك هيج يسوون

فتحت عيوني مصدومة.. انت عود ليش هيج تسوي

رد عليه وهو يكول .. لان اعرف نية علي واخته شنو يردونج حتى تسدين الثغره الي بحياتهم واني مستحيل ارضا بهذا الشي جنت اريد ترجعين الي جنت حتى مختبرج محظره الج منتظر بس تتخرجين صح مخلي موظفين بيه بس هو الج باسمج خاص بيج مهرج

استغربت ... هاي شنو اشو اني مهري كل شويه شكل ساعه القسط مهري ساعه المختبر شنو السالفه

ضحك وهو يكول .. شكو شي اقدمة الج وترفضي احسبه الج مهر حتى ما تكدرين ترفضينه

تقرب مني اكثر واحتضن خصري وهو يتحسسه استنشق عطري كال .. تدرين شكد احبج ؟

نزلت اديه من خصري وحجيت بغضب .. انت شدتحجي يمعود اشو تحظن وتشمشم شسالفه ترا اني وياك منفصلين

رد عليه وهو يكول ... طلاق باطل

رفعت حاجب ... لا والله لا باطل ولا شي حجي يفيدك انت طلكتني ورحت وعايفني صارلك شكد ابني طلعله اسنان وانت بعدك اصلا حسجله بالمدرسه

ضحك وهو يكول .. وهسه شنو شتردين ارجعج

شتت نظري ... ما ادري

باس خدي وهو يكول عض شفته... ارجعج صايره تخبلين هن عود ليش الي يتطلكن يصيرن يذبحن

تذكرين من جنتي يمي تلبسين سترتي وحذائي تطلعين جنج وحده طالعه من التويثه وحجابج منزلته على عيونج ومغطيه حلكج جنج وحده رايحلها شهيد عزيز على كلبها

ضحكت... ههههه جنت ما احبك ما اريد اسويلك اغراء

عض شفته وهو يتفحص لبسي .. وهسه تحبيني ومسويتلي اغراء

ابتسمت ... لااااا مو هيج ممسويتلك اني غير هو خطوبة اختي اكيد كاشخة

كال .. خليني ارجعج دام الشيخ موجود شفت الاحمر وطاح الحطب

ضحكت .. ههه لا يابه لا شنو ترجعني ما ارجع اني ترا اريد اجدد بعدين خطابتي كثرت اريد عرس جديد

عض شفته وهو يكول.. نعرس من جديد

إتصل موبايله بسرعه بنغمتة الجديده قفل الخط ورجع اتصل الموبايل مره ثانيه فتح خط وهو يكول .. ها زينب ليش ما اجيتي للخطوبه

بعدها تغيرت ملامحة وطلع بسرعه وهو يركض صاح بصوت عالي .. كزاره عايد تعالو بسرعه

حجه ويه العالم وهو يكول .. مشكورين يابه ما قصرتوا يله خلونه نروح

صار يطلع بالعالم وهو متعصب ويحجي ويه حجي اديب جنت اباوعله من الشباك حجي اديب اخذ العالم وطلع بيهم

وهو وكف بنص الحوش ويحجي بعصبيه كلهم .. هذا الجبان راح يجي هنا امنوا المكان لا تخلونه يرمي طلقه واذا اضطر الامراركعه جيله برجله وخلصنه منه مفهوم وعود بعدين احلها الك

كزاره .. تتدلل احطها بكصته

ضربه اشتر بغضب وهو يكول .. لا تتهور كتلك برجله اكسره لا تموته ما نريد نخرب شغل على رواحنه

خفت حيل ورحت يم امي كالت تسواهن بغضب .. هذا المطي سويهر شلون مصطفى خطب افيان دزته اخته وهاد بسلاحة هو وابنه ولجن لحد تطلع الغم هم جيلته تصيب والحجاره الي ما تعجبك تفشخك

امي ظلت تبجي وتدعي الله يكفينه الشر والله يخلصنه من هاي المصيبه

الولد كلها برا واني روحي ذابت وخفت حيل ظليت ادعي حاولت احجي وياه يحل الامور بهدوء بس هو عاط بيه وكال ادخلللي ولا تطلعييين ابد ديري بالج تطلعين تمام

ظليت كاعده سدينه الشبابيك كريم وجدي الشيخ وحارث ما قبلوا يرحون كالو ... لا شلون نروح البنات بناتنا وهذا واحد من بيوتنا من حلوه نعوف اهلنه واذا دك بيتنا هاي عليها فصل ونحگة واذا هو اخو اخيته خلي يرمي طلقه ونعرف شنسوي بيه

شويه وما نسمع الا صوت الطلق والرصاص مثل المطر صار الصريخ وعمتي ام حارث تخبلت شلون هيج وابنها برا اصرت الا تطلع

لزمتها رنا وهي تبجي وتتوسل بيها.. يمه لا تطلعين لا تجيج رصاصه

ظلت تلطم وهي تكول ... يمممه يمه ابني حاااارث وحيدي راح يكتلووووا يمه وين انطي وجهي

عاطت برنا وهي تكول .. وخري من وجهي وخري خليني اشووف ابني خلي اجيبه احطه بحضني لا يموووت

طلعت بسرعه واحنه لازميها مقبلت وجنه نصرخ ما اعرف شنو الي طلعها قدرها لو حظها لو نصيبها

اول ما طلعت وظلت واكفه يبست بمكانها بس ما جان بيها شي ولا حتى عاطت بس وكفت مثل المصدومة ركضنه عليها بعد ما خف صوت الرصاص

لزمتها رنا وتصرخ ... يمه يمع شبيج احجي يمه فدوه احجي

تنفست بصعوبه وتدفق الدم من بطنها صرخت رنا بصوت عالي وتلطم واحنه ظلينه نصرخ صارت مجزره مو خطوبه وكله بسبب عمة اشتر الحقيره

اجه حارث يركض على امه والولد كلهم يركضون شالوها وطلعوا بيها للمستشفى راحت وياهم رنا وجاسم وتسواهن واني

بس هي يبست وصارت كوه تحجي لسانها ثكل وحارث يبجي على امه ويبوس بيدها ويحضنها

اخذوها بالطوارى للعمليات واجو اخذوا اقوالنه رنا جانت منهاره على امها وفعلا كلنا جنه منهارين لان عمتي ما تستاهل هيج يصير بيه من احسن العمات حنينه وطيبه وكلها غيره وفخر حرامات عمتي اخت ابووي والله حرامات

انتظرنه لحد اليل وبعدين كالو تقريبا استقرت حالتها بس هي لحد الان الرصاصه ما طلعوها من بطنها لان دتمشي وممستقره

قررنا ننقلها لمستشفى خاص ودكتور خاص حتى يكدر يسيطر على حالتها لان هاي مو وظعيه لحد هسه وهم الرصاصه ممطلعيها وهذا الشي زاد الخوف بداخلنه ورعبنه اكثر

.......................

صفاء

صارت المصيبه مال ام حارث لان هذا الغبي ساهر ظل يرمي عشوائي ومحد جايب سلاحة بس اشتر وكزاره احنه محد جايب سلاح

مصطفى ولا هامة الوضع كل شويه وراح تطمن على افيان شكد ططوات هو وياها جا ماتت العالم من وراهم حتى خطبتهم بيها اكشن مو مثل العالم خبال فوك هالخبال

كزاره ما قصر ضرب ساهر بيده لان ساهر العار جاي بسياره وراكب بيها ورمه وهو ببطن السياره كزاره ما قصر ضربه بيده وكسرها اله

انهزم واشتر رفع عليه دعوه بس هو ما اعرف وين صار ومصطفى راح تعارك ويه امه ولم جوالاته واجه كعد يمنه كال .. بعد ما اريدها ما دام هيج سوت بخطوبتي وما فرحت الي لو تموت ما ارجع الها وراح اسحب كل املاكي لان اني مسجل باسم رجلها وكل الورث الي مو الها هي تاخذ شي قليل

اخذناه ويانه للمستشفى رحنه لام حارث هي وضعها مستقر بس لحد الان مطالعه الرصاصه

اشتر وكف ويه حارث وكفة اخووو وكله شنو تحتاج اني بخدمتك من الالف للمية مليون

تشكر منه حارث وهو يكول بحزن .. ما اريد شي اريد بس امي تصير زينه

اشتر ... ان شاء الله يارب تصير زينه وتشوفك عريس واني ازفك بيدي وتدلل عليه

حارث لزم ايد اشتر وهو يتشكر منه ... مشكور خويه ما تقصر الحمدلله على كل حال

طلعنه من المستشفى والتقينه بشيخ كهلان وعرفنه هو وعشيرته رايح وداك بيت ساهر ومكتوب عليه مطلوب عشائريا

جاوبه اشتر وهو يكول ... زين تسوي وان شاء الله هو بالسجن بس يلزموا ينسجن لان اسمه بالدعوه ويفصل وغصبا عن شاربه

شيخ كهلان...اي اكيد حق ام حارث ما يروح هدر

طلعنه من المستشفى بسرعه رحنه كعدنه بالكهوه منتظرين عايد بعدين خابرنه عليه كال .. اني طالع ويه سالي وخطيبها نشرب اركيله بالجزيره

هزيت ايدي ... طاح حضك يا عايد انوب شلون لكاله ونيس سالي وخطيبها الكرن

جان يضحك وهو يكول ... لو تشوف شلون تدخن سالي وخطيبها يصور بيها الا تموت من الضحك ولك مخبلته ساحلته سحل وهو ظال فاك حلكة عليها ومسويته مطي روح جيبلي اكل روح عمر الاركيله

ظل يضحك اشتر وقفل الخط عفنه عايد كاعد ومتونس ويه سالي وخطيبها

...............

سولين

رحت العمتي ام حارث بعد ما خلص الدوام احبها عمتي والله ماكو وحده مثلها

شويه تحسنت حالتها كعدت يمها لزمت ايدي وهي تكول .. سولين لا تنسن ابوجن حتى لو هو ظالم بس يظل ابوجن

اني اتمنى وحده منجن تروح تسأل عليه تشوفه شحاله مو هيج مشمور بالسجن محد بحاله رغم كل شي بس يظل ابوجن وبلكي الله استعدل ومشه عدل بلكي

جاوبتها .. ان شاء الله عمه نروح والله احنه ما جنه نكره بس هو زرع الحقد والغل بداخلنه دمرنه وسوداويه الحياة رسمها بعيونه شكد جنه نتمنى نعيش بسلام نعيش ما خايفين منه بس هو مجان النه اب جان النه عدو كرهنه حتى برواحنه وضعف شخصيتنه ودمرنه

هزت راسها بقبول وهي تكول.. ادري بيه وادري بكل سوالفه بس يا عمه ميخالف خلينا نبري ذمتنا امام الله وحتى ضميرنا يرتاح

تحمدت الها بالسلامة وطلعت منها وقررت اروح لابويه وفكرت بكلام عمتي هواي اذا هو مو زين ويانه احنه نصير احسن منه

مر يومين وقررنا نروح للسجن اني وتسواهن وفعلا رحنه

كاعدة بصالة الانتظار اني وتسواهن تحسرت اي والله جريتها حسرة احسها طالعة من روحي

بهاللحظة تمنيت حياتنا غير تمنيت احنه عائلة لغير اب اب محترم مثل العالم يحبنا ويبذل كل جهده حتى يحمينه ويأمن على حياتنا

اب مو مجرد اب لا وانما صديق وقريب النا يحتوينا يوكف ويانا ويصحح اخطاءنا

بس احنه ابونا الله يسامحه واكف ضدنا بكل شي حتى هذا النفس يعتبره هوايه علينا

كعدت اعصر ذاكرتي اريد اذكرله شي حلو ماكو كل ذكرياته سوده ومصخمه

وعيت من صفنتي على صوت تسواهن
عدلت كعدتي وحاجيت نفسي يله هسه هو انسجن واخذ جزاءه واكيد هسه متندم وهسه جايين نزوره اني وتسواهن بالسجن

كالت يله فوتي عيني صار وكت الزيارة

سألتها وانت ماتفوتين وياي!

جرت نفس من جكارتها وطفتها لان وصلت لاخرها
وكالت لع اوي خليني كاعدة هنا وي جكارتي حبيبتي سلوتي مالي نفس اشوف چهرة ابوج الزفره خاف انتي مانبج ضميرج عليه انه ضميري عطلان مثل ضمير افيان

خليتها ومشيت شفتها ورثت جكارة ثانية وفتت والله بس تسواهن تفتهم مرافقة الجكارة ونس الهه احسن من هواي بشر

فتت جوه وقابلته من ورا القضبان الي هو محبوس بيها

سلمت عليه مترددة شلونك يابه شخبارك

كال ها جاي تتشمتين بيه موو چلبة؟ اعرفجن كح على امجن اي رجعت الجن هسه اكيد صارت الكوا .. بفلس

تفاجئت وخجلت حييل لا يسمعه احد والله توقعت افوت عليه يشوفني يتلهف عليه واشوف الندم والحسرة بعيونه

اشو استقبلني غير استقبال صدك لو كالوا ذيل الجلب عمره مينعدل

اصلا الجلب هم احسن منه عالاقل وفي وميأذي أطفاله

بس شترجى من عامر حاولت اضغط على نفسي وابين اهتمامي بي مهما يكون ابويه واني من دمه ولحمه

كال والله انت كلجن كححح واكيد من وراي فد نووب سقطتن

اني بس اباوعله واتحسر

كال شعندج جايه

جاوىته بقهر جايه اشوفك يابه حتى لو انت ظالم بس احنه مو مثلك

كال متاكدة ماجاي لصحبانج هنا بالسجن شوف ويا يا ضابط مكبله موو اعرفجن اني امجن منوو ولج بس اطلع وحك الله الا اشرب من دمجن واولهن امجن ضام الهه ضميمة وناذر نذر بس اطلع منا ما افصل راسها عن جسمها مااطلع عويمر المطلكة بيج خير ما تطلكتي

اشمئزيت منه حييل

كتله اجيتك وتوقعتك ندمان وكلت اشوفك شمحتاج ممحتاج تسمعني هيج كلام شنوو من بشر انت شنووو صدك انت ابد ما تتبدل

ظل يعيط بصوووت عالي امشي وولج كح... ساقطة جاي تتشمت الادب سز بس والله اطلع واندمجن كلجن والله

كتله يابه اسمعني

كال موو ابووج اني لاتكولين ياابه رووحي سألي امج منو ابوج منين جابتج

طلعت بسررعة اركض ودموعي صارت تنزل متصيرله جارة ا بد انسان حاقد الحقد والبغض والكره متغلغل بدمه حاقد على الكل حتى على بزريته الي من دمه ولححمه

وصلت لعند تسواهن شفته كاعدة وبعدها تدخن وتنفث الدخان من حلكها باستمتاع

هي شافتني وكامت كالت هاا شفتي العار شلونه
ماجاوبت على سؤالها كتله يله امشي نروح...

مشت وهي تكول هذا عويمر نعال ما تصيرله كل جاره اي بيه سمعج كلام يغث سطره العباس كووون كوا ما تصيرله كل جاره كون اجيب اخوي جحيم الا يكعده على البطل

طلعت واني ندمانه لان اجيته اتصل بيه اشتر اول ما فتحت الخط بجيت سولفت اله عن الي صار وهو وبخني ما قبل اروح اله كال هو هذا شنو وترحيله وبعدين شلون تدخلين مراكز من دون علمي

بلعت ريكي وحجيت بخوف .. يتوعد بينه يكول هيج اسوي وهيج

رد عليه ببرود وهو يكول ... لا تخافين ما يسوي شي اصلا محكوم مؤبد ما يطلع الا يطلع الشيب من شيب الخلفه

من كال هيج ارتاحيت نسبيًا الحمدلله بلكي الله ما يطلع ونخلص منه للابد لام كلامه ابد ما يطمن بخير

...........

جيهان..

بعد ما تحسنت عمليتي وصرت زينه الحمدلله وبعد ما خلصت خطوبة افيان قررت ارجع البيتي

وفعلا رجعت الحمدلله رجعنه بالبيت الي يم بيت جدو كهلان والحمدلله امورنه صارت طبيعيه هم صاروا يحبوني

جنه كاعدين بالبيت طلع كريم كال راح اجيب عشى من برا واجيب نواقص للبيت واجي

قبل ميطلع غمزلي وكمل كلامه كال تراح احنا عرسان الليلة وابتسم

اني بطني لوتنيى خجلت حييل شوون ياربي خجلانه..

وهو حس بيه انطاني بوسه بالهوا وراح...

كمت اني عدلت الشقة ورتبتها بس ماكدر اكعد بقيت بس افتر مثل الدوامة عبالك ماكدر استقر

صفنت وافكر بحياتي وين جانت ووين صارت
الحياة صعبة ويرادلها صبر مو لازم تكون كلها ايام حلوة وسعادة

لان هي دنيا فانية الراحة بالاخرى وبس والله يجازينا على كل تعبنا والمنا بالاخرى...

تعبتني المشاكل واخيرا اجه الفرج، من شفت كوثر بالمستشفى لمن زارتني لهسه اني افكر
شفتها مكسورة وذليلة

هي اذتني بدون سبب بدون مااذيها اني وماردت يصير بيها الي صار وبنفس الوقت تعبتني بمشاكلها وجان لازم توكف عند حدها وكافي تاذيني هم اريد اعيش اني لدرجة هي بعيدة عني وتسويلي مشاكل وضيجة خلك

رحت للغرفة باوعت لنفسي بالمراية فتحت شعري ورجعت رفعته

لابسه فستان بي ورود زيتوني وبيجي والخلفية مالته كلها سودة

بس خطية كريم كال احنه عرسان الليلة ملازم ابقى بهالفستان وفعلا قررت اغيره

فتحت الكنتور ودورت على شي ابيض البسه عندي بس سيت العرس الأبيض واشو محبيت البسه

فكرت مو ضروري البس ابيض
طلعتلي فستان رصاصي وبي ورود حمر لف وقصير وردن طويلة ودلع من كدام ومن فتحة الظهر هم دلع حضرته وفتت للحمام وبعدها طلعت جففت شعري وخليت مكياج خفيف

وكفت كدام المراية الصراحة طلعت مغرية يعني الصراحة الله يساعد كريم

سمعت صوت الباب انفتحت اشو صدك هو تاخر ومخليني انتظر من ساعتين يله همزين فرصة حتى ارتب الشقة وهمات ارتب نفسي

دخل بيده علاليك ومن شافني ظل يصوفر

دنكت وغطيت اديه بوجهي شكد صارلنا سوى واخجل منه

وبعدها رحت دااخذ العلاليك منه هو دنك وباسنيى بركبتي ميلت روحي

مديت ايدي اريد اخذهم هو سحبهم مني وباسني قريب من شفتيى ووراها باس شفتي بوسة جريئة كلش

طخيت بي خليت راسي على صدره اضم روحي منه
وحجيت بدلع وخجل
كريم

كال روووحه لكريم

ابتسمت بوجهه اخذت العلاليك ورحت للمطبخ

اجه هو ورايه واني واكفة عالطاولة مالة الطعام لزمني من ورا من اكتافي ودارني عليه

خليت اديه على صدره العب بدكم قميصه وهو يشم بشعري ويبوسني بخدي وعلى راسي ومحوط خصري باديه كلما ابتعد يسحبني ويقربني منه اكثر

وحسيت بي مراح يسيطر على نفسه شالني بسرعة وللغرفة........

جنت متشبثة بي بقوة مو خايفة اوكع بس مااعرف خجلانة وافكر شلون راح تتم دخلتنا
خايفة اتأذى مثل كل أنثى تخاف بليلتها الاولى

حتى ظليت ارجف وهو حس بيه لان جسمي ملاصق لجسمه جان...

همس يم اذني باثارة لتخافين مااذيج ومستحيل اذيج

عيني بعينه جانت وهزيت راسي بإي

وغمضت عيوني حسيته ينزلني على السرير لشويه وانفاسه تلفح كل بشرتي الظاهرة من الفستان حسيته يقربني اله جلبت ايدي بملابسه وخر ايدي وباسها حييل
وزاد من قربه الي... ....... حتى حسيت نفسي اني وهو واحد...

بعدها... جنت مغمضة عيوني حيل وجسمي كله متصلب
همس باذني الله يحفظج اليح
...................

صفاء

جنه كاعدين اني ومصطفى واشتر وزينب وزهراء مجتمعين مسوين سهره نلعب دومنه

جان يوم حلو متونسين بيه نضحك ومصطفى كل شويه وغس بالدومنه واشتر كل شويه وطرده وهو يضحك ويرجع يحلف بعد ما يغش

صفنت شلون حلو هذا الموقف واخيرا اجتمعنه سوه واخيرا التم شملنه ورجع ويانه مصطفى مصطفى اكثر واحد جان مستعصي والحمدلله بعد موقف امه هو كرهها ورجع ويانه

هم بهذلوا روحهم بيدهم والعداله الالهيه اخذت حقها الحمدلله يارب احلى شي بهاي اللحظه هي ضحكة اخويه الاشتر احسه يضحك من كل كلبه وهو جامعنه تحت جناحة

ومصطفى ضحكته الرنانه تدل على سعادته ويانه وكل شويه وتحارش بزهراء وضربها وهي تشكي منه للاشتر والاشتر لزمه وكتله بالشقه الخاطرها

اتصلت موبايله فتح خط وهو لحد الان يضحك بعدها عقد حواجبه وهو يكول ... انا لله وانا اليه راجعون