#وكر الأشتر الفصل السابع وثمانون 87 - بقلم سمو العراق

البارت الاخير جزء اول 💔
رواية .. وكر الاشتر
بقلمي .. نور سمو العراق

غدا باذن الله اخر محطات الرواية💔🥺

النصيحة الأولى والأخيرة كُن قَوياً مكتفياً ومُستغنياً.

وقل للظالمين صبراً أن الله موجود

💔💔💔💔💔💔💔💔💔💔💔💔💔

صفاء

صار عندي فضول اعرف منو الي مات منو الي كال عنه انا لله وانا اليه راجعون

قفل الخط وهو يتنهد بهدوء باوعلنه كله مصطفى وهو بيده الدومنه .. هااا بشر منو مات

ضحك بسخريه وهو يكول.. هه هو الموت بيه بشاره شبيك انت

مصطفى بعدم اهتمام.. اي منو مات خاني التعببر

اشتر .. وجيهه

فتحت عيوني بدهشه كردة فعل عن الموضوع همست ... انا لله وانا اليه راجعون

شكد ما الانسان يطغى ويتكبر على رب العالمين ويصيبه الغرور وتاليها يرجع لربه مذلول مكسور مخذول حتى من اعماله

شكد طغت وظلمت وتكبر ونست وجود رب العالمين تاليها هاي اخرتها وهاي نهايتها بالدنيا مثل ما عذبت اختي ماتت ابشع من موتتها تعذبت ايام وايام وماتت وابنها مهزوم ضاكت اللوعه والحسره وراح تندفن الوحدها حتى ابنها مو وياها

مصطفى .... لاااااااا مو خوش خبر الى رحمة الله هم السابقون ونحن اللاحقون همزين خطبت جان اكلت تبن

كمل كلامة وهو يكول .. هم نروح للفاتحة لو نغلس

اشتر اخذ الدومنه منها وسدها رد عليه وهو يكول ... غلس حبيبي غلس خوما تريد تروح للنجف دفان وتتلثم تاخذ دور ساهر وانوب تسوي حادث وترمل افيان

مصطفى... بوووويه لا كل شي ولا افيان صدك جذب شكو شهالواگة قابل اني دفان عندها زلم غيري ويدفنون وبعدين احنه بينه ثار شكو نابص بالنص

ظلينه كاعدين احنه لا نريدهم ولا نريد علاقتهم واشتر يحاول يبتعد عنهم بكل صوره

بس هو كلبه ما انطاه اتصل على كزاره وهو يكول .. كزاره خابر على الدفان يسويلنه گبر وجيهه ماتت وشوف سيارات بالطب العدلي تطلع جنازه ادفن فلوس السياره وفلوس الدفنع وان شاء الله اني انطيك فلوسك

كمل كلامه وهو يكول .. مشكور يابه الله وياك ما تقصر اكيد

رجع كعد وهو يدخن مجان لاي واحد منه ردة فعل محد حزن وبجه عليها ولا كسرت خاطرنه حالها حال اي شخص مات لان هي ما خلت طيب ولا زرعت محبه بداخلنه لهذا السبب هي ماتت وحيده تدفنها الناس الغربه هي لو زارعه طيب جان هسه احنه اول الواكفين الها

اشتر وكف وهو يكول .. وجيهه ماتت وراحت الدار حقها حسابها ويه ربها ما مبرية الذمة اليوم الدين على كل شي سوته وياي و ويه اختي الله اخذ حقنه بالدنيا وعذاب الاخره عسير

هسه اني اريد اكلكم اذا واحد منكم حاب يروح للفاتحة ويقوم بالواجب ويقدم العزاء اني ما الزمه ولا امنعه من شي كل واحد هو حر نفسه وما اضغط عليه

بس بالنسبه اليه اني ماخذ عهد على نفسي اني لا اوكف على جنايزهم ولا هم يوكفون على جنازتي والحقد والغل مالي گلبي عليهم وكل يوم اجدد عهد الذكرى وكل يوم يكبر انتقامي

جاوبته ... اني بالنسبه اليه ما اروح لجنازتها اني لحد الان اتذكر سوالفها اتذكر القهر والهضم والظيم اتذكر شلون تحبسني شلون تضربني تعيني كدام الكل تطردني من الاكل وتوكلني فضايلها هي وبناتها هواي شغلات مزروعه بگلبي من غير موت اختي هي حركت اختي بيدها شلون عندي ذمة وضمير و اروح لجنازتها حتى امي بقبرها ما ترضا عليه

مصطفى سحب نفس وهو يكول .. واني مستحيل اروح صحيت على نفسي واصلا من زمان اكرههم وحاقد عليهم ولقهر شربته وتجرعته يتموني من امي سبوها كدامي طعنوا بعرضها وعرض اختي شتتونا وبهذلونه جنت متماشي وياهم صرت طماع مثلهم تطبعتهم باطباعهم والحمدلله واخيرا الله فرجها عني

اني لو ما فافي خلطه ركعتني بطابوكة جااا لحد الان كاعد بالملهى اطك اصبعتين واركص واشرب منكر هههههه

اشتر ... هه همزين من صحيت على نفسك الفخر لنسيبتي

باوع لزهراء وزينب وهو يكول ... وانتن اذا حابات اخلي واحد من الولد يوصلجن

هزن راسهن برفض وهن يكولن ... لا خويه الي ما ترضا عنه انت احنه وياك ما نوي شي من دونك مدام انت ما راضي عنهم احنه وياك ما راضين عنهم

ابتسم بحزن وهو يكول .. الحمدلله الي لم شملنا وزهق الباطل ونصر الحق حتى لو طالت المده وحتى لو مشت السنين بس محد يكدر على عظمة الله ورب العالمين يمهل ولا يهمل والله موجود وبالمرصاد الحمدلله

ظلينه كاعدين للاسف بعد الذكريات التعيسه الي صابتنه وغيمت علينه اسودت الدنيا بعينه وانگلب النشاط لهم وغم وحسره وحيره

اشتر ابتسم وهو يكول .. شرايكم نروح هسه للامام الكاظم عليه السلام نزور ونصلي ندخل مطعم ونجي

مصطفى .. اييي خلي اخابر افيان تروح ويانه اريد ازور وياها حتى شنو الله يبارك بينه وبعلاقتنه

اشتر .. ههه لا ولك اكعد بعدها مخطوبه هاي سوالفك بطلها بعدين اطلعوا انت وياها

ضاج مصطفى كال .. جااا ما اروح خلي اروح الها مشتاق الها وهم عندي شغلات عندها اروح اجيبهن وعدنا دروس اخلاقيه عن سوء التربيه ههههه

ضحك اشتر رد عليه ... لا تروح ولا تكشي هسه اخابرها وخليها تروح ويانه

البنات فرحن ... اي همزين الله عليك خليها تونسنه وهم خابر سولين تجي

جاوبهن ... لا سولين اعرفها ما تجي هسه عوفنه من سولين خلن بس افيان تجي

المهم حظرنه نفسنه وخابرنه افيان خلطه وعاد ما صدكت هي اول الراكبين رحنه سيارتين سيارة اشتر وسياره مصطفى ما عصرنا روحنه مثل الليمون

.............،.،،

افيان

خابرني صافي اني غيرت اسم حسابي كاتبته مخطوبه لا تكلمني وسولين كل شويه وعاركتني تكول .. غيري اسم الحساب وييع هسه هي شدخلها شكد مليقه ومتستحي تتدخل بخصوصية الاخرين

اتصل بيه صافي وعزمني اروح ويه عيالي للزياره اووي فدوه من هسه يحبوني يموتون عليه لان شنو فقيره وطيبه وعلى نيتي الحمدلله ولسان ما عندي

كلت لماما كالت .. دام ويه نسيبج وكلكم روحي شكو بيها

فرحت وطكيتها ركضه بسرعه لبست وبدلت حظرت عباتي وسولين تباوع عليه كاتلها القهر والظيم هسه تنكلب السياره بينه خمسه امووواه

جنت البس بحذائي واغني صافي يا جكليته حامض حلو باكيته وصافي كا كعد راحة اخذله خوووش تفاحة

سولين عاطت بيه وهي تكول ... كافي شكد تلغين كافي اوووع ممصدكة رايحة للزياره

ضحكت .. هههه اوووي شبيج عيني لا يطكلج عرج

كملت ركص .. ياهل القوط انزعوا القوط صفاوي لبس قاطه

عضيت شفتي واني اكووول .. شنيييي يجتل بالقران يذبح اي صدك انزعوا القوووط ما يلوك لغيره

تسواهن هزت ايدها وطفت جكارته بالحايط وهي تكول .. احم عساس ماخذه الامير وليام هو كله مصيفي ابو العرك

تخصرت واني ارد عليها .. ديله عيني ليكول انتي ماخذه السلطان سليمان وتعيرين بيه هو انتي ماخذه عامر ابو الكعك

غمتني وهي تكول ... خايبه امداج امده ابو الكعك وياج صدك لو كالو ابو حبه يعير ابو كرعة شلون ثنين

دكولي هورن طكيتها ركضه وتسواهن تصيح عليه..جيبيلنه لوزينه وياج حتى نصدك انتي صدك رايحة للزياره لان اعرفج زيارتج ممقبوله يا ام حميره

جاوبتها ... خووش خوش شكد تحجين كاتلها القهر لان زوجي يحبني وهي زوجها بالسجن

رحت وياهم جان اشتر ماخذهم كلهم اخواته واخو صفاء واني بس اني وصافي مع الاسف لو جايبين تسواهن لو ماما جان تونسن ويانه خطيه سولين بس سولين ما تجي لان اشتر موجود عساس تستحي

اخذنه الطريق كله مشغل اغاني ظليت احجي عليه ولك جدتك ميته ورايحين نزور شويه احساس الخاطر الكائنات

رد عليه وهو يكول ... هااا اي والله هم صدك نسيت شكد عيب خلي اشغل قران انا لله وانا اليه راجعون خرب يومج فافي نسيتيني حتى حزني شكد حقيره

باوعلي وهو يكول .. اكلج شنو شو لا حظن لا بوسه لا مؤاساة ترى جدتي ماتت اليوم عاد بالصدك بالجذب بوسه من الشفه عازيني بيها

رفعت حاجب .. اذا انت هيج وكاتل روحك وحزين على جدتك روح الها اوكف بفاتحتها مو جبتني الطريق كله تدك وتركص

تعصب وهو يكول .. ولعباس نسيت ولعباس يعني شسوي انتي تنسين المطي يعني جمال ونزاكة وعطرج يفوووح هسه اذا ما ميته جدتي جان هسه اني وياج ندك ونركص هااا مو صدك

ضحكت .. هههههههه اي بالقران جان هسه اني وياك ثنينه نهز على نفس الايقاع يله ان شاء الله غير مره من نطلع للجزيره لمكان ترفيهي خوما رايحين نزور ونتمركص حتى الله ما يرضاها

جاوبني .. اتفق

وصلنه للامام نزلنه جنه كلنه سوه جنت فرحانه بيهم واول مره البس عبايه مصطفى لازم ايدي ونمشي سوه دخلنه للسوك اشترينه شغلات وانوب رحنه زرنه وصلينه اني واخواته وطلعنه لكيناهم منتظرينه اشتر اخذنه لمطعم بالاعظميه

جان يوم حيل حلو تمتعت بيه وتونسنه جنه نسولف ونضحك كال اشتر .. شلونه ابراهيم ام ابراهيم شلونها

جاوبته .. ابراهيم يبوس ايدك وام ابراهيم لاهيه بدراستها وبعدها تشتغل بالمختبر انت تعرف

عض شفته وهو يكول..اي ادري الله يوفقها ان شاء الله

لزمت ايده زهراء وهي تتوسل بيه كالت .. فدوه رجعها والله حبابه هي وحنينه صح عصبيه بس ماكو مثلها كلبها طيب

حك ركبته وهو يكول ... الله كريم ان شاء الله خير

سكتت اني مجاوبته بس ياريت يرجعها لان هي صارت مثل زليخة من تسمع اسمه تنهار هسه حاليا منهاره شلون ما اخذناها ويانه

بعدها حجيت كتلها .. هي جانت بصراحة هوايه تحجي بالاشتر ورادت يرجعها بس الحمدلله هسه هي استقر وضعها وما صارت تحجي ظلت شويه تتناسه واحنه هذا الي نريده نريد تستقر وتوكف على رجليها لان الحياة ما توكف على احد

باوعلي ما راضي بكلامي بلل شفايفه بحيره وهو يكول .. لا هي مرتي اني ما استغني عنها هي ام ابراهيم وتعرف بنفسها شكد احبها ان شاء الله ارجعها ونوكف اني وياها سوه ماكو داعي توكف الوحدها وبظهرها سند

ابتسمت ... اي الحمدلله راح ترجع بس شلون يربي نعيش اني وياها سوه وهي وكحه شلون اتحملها واني فقيره اكيد تاكلني وتشربني يله ميخالف مرة الجبير حتى لو اسايسها بلكي تمشي عدل

....................

ـــــــــــ

جيهان..

دااخلي الملابس بالغسالة اشو لعبت نفسي من العطر الي بملابس كريم

اجيت اتقيء كمت بسررعة ورحت للمغسلة حاولت اتقيء ماكدرت

حركت ايدي كدام وجهي اهفي على خشمي اريد ابعد هالريحة لزكت وكل شويه اشتمها

رحت للغرفة هو جان متمدد وبيده الفون
كتله كريم شنو هالعطر هذا محلوو كلش

عدل كعدته يباوعلي باستغراب
يا عطر هذا جيهان

جاوبته واني امشي باتجاهه وكعدت بصفه
كتله مدري هذا العطر الي انت مشتري جديد

قربني اله وباسني بركبتي كال والله ممشتري عطر جديد
مكتفي بعطرج اصلا

ابتسمت بس فعلا لعبانة نفسي باوعتله جان يضحك
فكرت يمكن حامل ابتسمت أكتر

كال شبيج
اخذت اديه خليتهم على بطني
جاوبته مو ردت طفل باسرع وقت انت

كمز من مكانه صدك تحجين

سحبته كتله شمدريني، على كيفك بس كل الاعراض تدل انو اني حامل

باس راسي حيل كال متحجين شمنتظرة
باجر ان شاءلله اوديج تحللين ونتاكد

كتله اي بس دخيلك بعد لتخلي من هذا العطر بعد

سحب تيشيرته وخلاه على خشمه كال ليش شبي محلو؟

جاوبته يلعب النفس اصلا

رجع شمه مرة ثانية كال بس ترى والله طيب مجنتي تتحسين منه من قبل

ضحكت كتله والله مو اني هاي يمكن ابنك مدري بنتك يتدلع من هسه

قربني اله اكثر وباس بطني تدغدغت ظليت اضحك وابعده عني واحاجي كررريم لاا عفية تدغدت

كال والله كون تركض الايام الاشهر والكاه بصفي كاعد والعب وياه

كتله بالشقة اووي وانت شيهمك هو حيطلع روحي علما يطلع

وكمت للغسالة بس حيل فرحانة راح يصير عندي طفل ويملي عليه حياتي

يوم ثاني اخذني حللت وفعلا طلعت حامل
ورا مطلعنا من المختبر وتاكد الحمل رحنا احتفلنا وبعدها رحت لاهلي وبشرتهم

سولين تكول يله جيبي عروسة لابراهيم واني اضحك بس شويه نفسي تلعب

ووشويه شويه زادت حالتي سوء صرت ما اطيق البيت وكريم ابد مقصر ويايه ياخذني ونطلع نتعشى برا بس اغلب الاكل كرهته حتى المي تلعب نفسي منه كوة اشربه

وبهيج صار عندي رمل وكريم يخترعلي اشياء حتى اجرع المي يخلي بي هيل لو مي ورد لو مي وليمون بس لحتى اشربه...

.................

سولين

ثاني يوم كعدت ضايجة مو لان ما اخذوني وياهم للزياره بس لان ما عزموني اوووع شصار عليهم

رحت للمستشفى اني وخاله تسواهن شفت عمتي الحمدلله متحسنه شويه لكيت يمها حارث وجاسم ورنا كالو اليوم عمليتها الثانيه حتى يطلعون الرصاصه من بطنها لحد الان ممطلعيها حتى اني اتخبلت شنو معقوله اكو هيج كلام صدك جذب ظاله الرصاصه بجسمها على ساعه تتسمم وتموت

ظلينه كاعدين تقريبا نص ساعة وبعدها دخلوها للعمليات بهاي الاثناء اجه اشتر من شفته تخربطت اموري واحوالي

كعدت لعيد عنه وهو جان يحجي ويه حارث وييي متصادق هو وحارث شلون كلاوجي هسه يقنعه ما يتزوجي بعد احسن

طلعوا عمتي من العمليات اتطمنه عنها كالوا استقر وضعها الحمدلله وطلعوا الرصاصه بس مقبلوا واحد يدخل عليها

اني تاخرت على المهتبر وكل شويه تتصل رانيا استاذنت من خاله تسواهن وطلعت دا اعبر وهو كسر عليه بسيارته

حطيت ايدي على السياره وعطت وهو لزم بريك ياربي جني مو رجال مو قبل شويه جان جوه شوكت طلع

عطت بيه بغضب .. هاي شبيك اجيت تتدعمني واني بتك رجل

طلع راسه من الجام وهو يكول ... اعتذر ما شفتج تعالي اركبي

تقربت منه وجاوبته .. على اي اساس اركب وياك

رد عليه وهو يكول .. عندي مو ضوع وياج اركبي

تخصرت .. لا والله تريد تقشمرني لا ما اصعد اعتذر منك او ليش اعتذر على شنو اعتذر ما اصعد لو تنكلب الدنيا

كال بهدوء وبرود .. كيفج لا تصعدين ضيعتي عليج موضوع يسوه نص عمرج

ظليت واكفه متعصبه .. انت رجال غريب على اي اساس اصعد وياك واحجي وياك شنو فالتوه لهالدرجة اني منحطه وحقيره وعندي عادي اسولف ويه الزلم

رد بملل وهو يكول .. عادي اعتبريني زميل شغل او اعتبريني المحامي مالتكم لان جلست امج بعد باجر

رفعت حاجب.. اهاا تمام ان شاء الله نجي شكرا ما قصرت اخويه الغالي

جاوبني وهو يكول ... راح اردج بنيتي تصيرين مريتي ومدامتي بعد ماكو داعي لاخويه اني مو اخوج ليكون اني ابن عامر وما ادري بروحي

جاوبته بمراوغة ... يجوز ما اقبل ارجع

عض شفته وهو يكول .. لا تقبلين ترجعين ليش ما تقبلين تلكين احسن مني مال وجمال وصيت وين تلكين هيج رجال ومدللج وحاطج بحضني وشابعج بوس حتى من تغلطين ابوسج اعاقبج ببوسه وين اكو واحد مثلي هيج يعاقب مرته

خجلت من كلامه وشتت نظري ... باااااي

صاح عليه بعد ما مشيت خطوات كال .. علي راح يشيلوا هو ومختبره لان طلع دارس طب بيطري مو بشري وهااا ما عنده شهادة بايلوجي

رفعت حاجب ودرت وجهي عليه ادري بيه يكذب عليه يموت اذا ما بطلت من علي بس والله ما ابطل الا اذا رجعنا

عفته ورحت ركبت فورتات ورجعت للمختبر دخلت لكيت دكتور علي ديحلل بالدم سلمت عليه رد عليه وبعدها كمل شغله

حسين بيه من رفضت الموضوع لحد الان هو يتهرب مني ومو مثل قبل مهتملي

بس اني والله ما اكدر اضحك عليه لان بصراحة لحد الان گلبي الجلب متعلق بالاشتر وما اكدر انساه شسوي مو بيدي متربع بعقلي

...................

جيهان....

الايام الي بعدها حسيت بكوثر تريد تحجي عيونها كلها حجي متروسة

استغليت الفرصة وكعدت وياها لوحدنا
باوعتلي كالت تدرين جيهان اني بعد ما اكدر احس اريد انفجر

لزمت ايدهه وسألتها ليش خيرج شكوو اني داشوف بعيونج هواي حجي احجي بلكي ترتاحين والج الامان

كالت باستهزاء الامان؟ يا امان متكوليلي؟ اني فقدت الامان حتى من نفسي خايفة حتى من نفسي اريد اذي روحي اتمنى انتحر واخلص عيشتيش هايه

جاوبته بحنية ونبرة مطمئنة لج لتكولين هيج هو شكو ترا محد منه ميغلط وروحج عزيزة عليج لاتفكرين تأذين نفسج تخسرين الدنيا والاخرة

كالت اني خسرانة كلشي شوفي جيهان تعرفين منو رسلج رسالة وكتبلج بيها امج عايشة

سألتها بصدمة منوو! ؟

ضحكت بألم ممزوجة بسخرية اني جيهان اني

انصدمت كتلها هاي انت؟؟

كالت وبعد تدرين شسوويت؟؟

هزيت راسي برفض واني ممستعدة اسمع صدمة ثانية
كالت والرسالة الي دزتها سولين لحارث موصلتها

بداخلي اكول عليها شكد لئيمة بس هي جانت تحجي ندمانة ماردت اعاتبها او اضوجها ردت اعرف بعد شمسويه

صح هالشي فات وراح بس فضول اريد تنفك كل الشيفرات الي مالكينالها حل

كتلها ميخالف الي صار صار سولين ممقسومة لحارث بس انت ليش سويتي هيج

جاوبت وهي تبجي جنت احبه ردت سولين تتزوجين حتى يبقى بس الي

تنهدت اني وهي كملت كالت تدرين جيهان اني جان كل شي عندي بس ماعندي حظجن

سألتها بتعجب حظنا!!!

اي جيهان انتن لا ام لا اب وكلها تحبجن جنتي مشوهه وكريم كاتل روحة عليج ميشووف غيرج وعاف ايو لخاطرج رغم هي حلوه والف واحد يتمناها شفتي شلون عندج حظ

وسولين يتعاركون عليها واني لا محد يشوف محد يعبرني
ولا كأنوا موجودة اريد اعرف ليش شنو الي عندجن وما عندي عجييب!!

جانت تحجي بحركة جانت مو طبيعية

اخفيت ابتسامتي المستهزءة فعلا شر البلية مايضحك تركت كل الايجابيات بحياتها وكل السلبيات الي بحياتنا وحسدتنا على شنو!!!

جاوبتها واني الزم ايدها احنه نحبج وما بيوم اذيناج واذا على قسمتج تجي بالوقت االمناسب بعدج صغيرة وحلوة واذا على حارث يمكن تتزوجي ومترتاحين وياه انت فكري بيها ماكو شي الله يبعده عنج الا اذا بي اصلاح الج

كالت بشكل مو طبيعي، ابد وتهز براسها مادري جيهان ماادري بس اني ممرتاحة احس شي خانگني لازمني من بلعومي شي يكتم على نفسي يعصر گلبي. يكولي ذن حقيرات يغارن منج يكرهنج يردن يصيرن احسن منج

كتلها توكلي على الله وتقربي منه صلي صلاتج بوقتها واقري قىرآن وخاصة سورة البقرة حترتاحين هوايه صدكيني.

كالت المهم اني كتلج على الي سويته بلكي ارتاح لان من صدك دااتعذب وانت ظلت يمج تسامحيني لا بكيفج بعد ظلت يمج وهااا ترى اني خليت ايو بطريق كريم وزوجتهم وهو كلي يحبج بس ما وصلتلج و وصلت كلام مناقض

كتلها شي فات وراح اكيد اسامحج او حتى ميهمني ابد كل الفات خليته ورايه احنه هسه ببداية طريق جديد ونكول القادم افضل ان شاءلله وانت هم حاولي ويه نفسج حبي روحج من اعماقج راح تشوفين هواي اشياء تختلف اذا حبيتي نفسج راح تسوين اشياء تحبين ترجع الج بيوم

هزت راسها وراحت دخلت بس موطبيعية ابد مية مرة بالدقيقة تختلف...

طلع كريم للحديقة واجه يمي مبتسم
كال هااا غيرتي جوو شويه

ابتسمت اي شوويه

كال شبيج حبي

جاوبته واني اباوع بعيونه ماكو هيج

اني جنت افكر باعترافات كوثر شون كدرت تسوي كل هذا

كال يمتى عااد موو اريد اخلي عطر صار شكد محرووم

جاوبته بضحكة يمعود لتستعجل لا انووب يطلع قبل موعده ونحتار بي

كال لا يمعودة خلي يستوي زين

ضحكنا لشويه طلعت حنان تصرررخ
لحكووو كرريم الحك كوثر انتحرت

ركض كريم واني وراه طبينه شلفناهه مكصصه الاوردة الي باديها

كريم خله اديه على راسه ووعااط لااا كووثر ليش كوووثر ليش

وهي شهكت بجي وايدهه بوري مال دم ومفتووح

اخذهه وطار بيها للمستشفى وراحت وياها ام حسن
بقيت يم حنان اني واتصلت بي كال سوولها اللازم
بس كال لازم تراجع طبيب نفسي صحتها النفسية مو تمام

لليل جابوها اديه مشدودة ومتحجي وجدو كهلان ضايج حييل وظهره محني والكل ضايج عليها

دخلوها بالغرفة ووصاهم كريم ميتركوها لوحدها ابد

وبعدها هو ظل بنفسه ياخذها لطبيب نفسي

وفعلا الحقد والغيرة والحسد والبغض والكره بلا سبب كلها اعراض لامراض نفسية لازم الواحد ينتبه الها كولش زين ويتجنبها الغيرة تولد العداوة والمشاكل بين العائلة الوحدة
لازم الانسان يقنع بلي عنده وينتظر ويصبر على رزقه وقسمته شوكت ميجن نعمة من الله وكلشي الله يقسمه النه بي خير النه وكلشي يبعده عنه هو شر ومو صالح ....

....................

سولين

خابرونه اليوم الجلسة مالت ماما اليوم يكون موعد الحكم لو لصالح ماما لو الحكم لو يكون مغاير

شكد حاول علاء امنيه ان يطلع براءة وشكد شغل واسطات ودفع فلوس بس لا ما ضبطت وياه ابد وطاح حظه بالزايد

ان شاء الله يارب الحكم الصالح ماما لان هو عين محامي شاطر وكلاوجي يطب منا ويطلع منا بس مو على الاشتر ولا على محامينه وناسه التشتغل وياه

دخلنه اني وماما وخاله تسواهن شفت هناك سالي اول ما دخلت صارت بوجهي جنها غراب لابسه تنورة قصيره مدري شلون مدخلتها بروحها وستريج شفاف اسود ولابسه تشيرت ابيض وفوكاه ستره سوده وفاتحة الشعر والكعب العالي والذهب لاعبه لعب لابسه الحلقه

باوعتلي بقرف وهي تكول .. هلاو

جاوبتها بدون نفس .. هلا

كبر حتى كلر شكو تسلم ليكون مطبقه السلام لله عفتها ورحت دخلت جوه اني وماما وخاله بغرفة الانتظار

رجعت دخلت ويه شايله اوراق وظلت تحجي ويه المحامي وكل شويه باوعتلي ملابسها الداخليه مبينه شكد مكروهه

شويه واجت كعدت يمي حطت رجل على رجل كالت .. شلونج

جاوبتها .. زينه

كالت بغرور .. شنو لحد الان زعلانه مرجعج

رفعت حاجب .. ليش شنو ما تدرين

ضحكت بسخريه وهي تكول .. صار مثل ما تردين خربتي علاقتنا وصار فتره ممتواصله وياه حتى بخطوبتي من حبيبي مباركلي

رديت عليها بغرور ... يله اني اباوكلج ان شاء الله الف مبروك منج المال ومنه العيال

صفنت بوجهي احسها تريد تركعني براشدي درت وجهي منها

كالت .. خطيبي يموت عليه يكول بكنوز الدنيا ما ابدلج انت رحمة نزلت عليه من السما تدرين شكد خطبني خمس مرات على عدد السنين الي حبينا بعض بيها

جاوبتها بدهشه .. شنووو حابته صارلج خمس سنوات

هزت راسها بقبول... ايييي خمس سنوات خطبني شكد ورفضوا أهلي والحمد لله بعدها صارت القسمه كولش فرحانه مدا اصدك انوسي صار من نصيبي

عقدت حواجبي .. انوسي منو

ضحكت ... ههههه هو اسمه انس بس من حبي اله اسمي انوسي

ابتسمت .. يعمري ان شاء الله ربي يسعدكم الف مبروك

شويه واجه الاشتر كل ما يجي احس تصير خبصه بروحي ما اعرف شبيه احس بضجة وربكة احس حصن تزاكط بگلبي ياربي شسوي هالشعور يفضحني يوترني

من شافته سالي خلت رجل على رجل هي وتنورتها هو محجه وياها ولا سلم عليها وفعلا طلع ما يحجي وياها الحمدلله ارتاحيت نسبيًا هههه

سلم على ماما وخاله وسلم عليه كال ..يله بدت الجلسه تعالوا ادخلو القاضي ان شاء الله اليوم يعلن الحكم

رحنه دخلنه صاح عليه الاشتر وهو يكول .. مجان اكو داعي تجين لو جايه بس امج وتسواهن احسن

هزيت راسي برفض... لا ما اكدر اعوف ماما الوحدها اني اريد يتعاقب كدام عيوني اريده بنهان وينذل انت ما تعرف حجم المعاناة الي جنت احس بيه ما تعرف حجم العار الي لبسنياه هذا المجرم هذا كل شي بسببه صار

حتى زواجي منك صار بسببه هو الحرمان القهر كسرة ظهر امي اعدامها كدام عيوني هو السبب بيه

جر نفس وزفره كال.. كلهن حقج واني وياج بس مال زواجي صار بسببه هاي النقطه تخليني اوكف عندها واطلب من القاضي يخفف حكم عليه

صفنت بوجهه وضحكت بسخريه.. والاستفاده شنووو فوك المر والعذاب ضيعتني وتخليت عني بسبب غلطه مني

على العموم هذا مو موضوع نحجي بيه بوقت المحاكمه ان شاء الله نحجي غير مره

هز راسه بقبول بعدها كال .. ليش عفتي ابراهيم لو ظاله عنده ومهتمه بامومتج مو احسن من شلاع الگلب

جاوبته .. لا مو احسن اني اريد اكون ويه ماما وابراهيم اني البارحة عندي اوف ظليت عنده وكذلك الصبح و وصيت عليه اخواتي جيهان عدنا والحمدلله مبيه شي

اشرلي .. روحي كعدي راح تبدي الجلسه

كعدت يم ماما بثبات واباوع للمحكمه كلبي عصرني جنت حيل مقهوره على ماما لان علاجها صعب وكذلك يحتاج وقت من غير حالتها النفسيه الحمدلله هي دتتحسن بس مو مثل قبل اكيد حيل تغيرت

بدت الجلسه ودخلو هو والمتهمين الي وياه جانوا لابسين اصفر وعيونهم مربوطه واديهم مكلبشه شالوا الغطا من عيونهم وظلوا يستجوبون بيهم ويحجون وياهم

ماما جانت على طول الجلسه على فرد دمعه عيونها تصب تتذكر كل الماضي جنت لازمة ايدها واهدي بيها وابجي وياها

وتسواهن كل شويه وكالت الها .. خيه ام امين على بختج صدك جذب مسحي دموعج وحقج راجعلج والله ينعصر كلبي عليج من اشوفج تبجين

كملت كلامها وهي تكول وحق علي من كون القاضي ما ينصفج وياخذ حقج اخلي جحيم يكعده هو وعلاء على البطل يلعن والدي والديه يشكهم ويشك الخلفهم

ابتسمت امي من بين دموعها ولزمت ايد تسواهن وهي تكول ... ادري بيج خيه ما تقصرين فدوه الكلبج كلج حنيه وطيبه وبنت اصل

هزت راسها تسواهن مراضيه عن الوضع .. اي خيه احنه بنات اصول وطحنه بيد عويمر ظالم النفس ابو الكعك عديم الاصول والاخلاق

وبعد المفاوضات والكلام والادله الجنائيه والشهود القاضي قرر يكول الحكم ونطق الحكم وهو يكول .. حكمت المحكمة حضوريا على المتهم علاء جياش سعودي بالحكم لمدة ١٥ سنه

ماما باوعتلي بفرحة والدموع متجمعه بعيونها حضنتها واني ابجي ... عمرييي ماما ان شاء الله يعفن ويموت بالسجن الف الحمدلله والشكر الف الحمدلله شكرا يارب شكرا الحمدلله ياربي

بعد ما حكموهم ١٥ سنه هم جانوا يسبون ويغلطون ما عاجبهم الوضع طلعوهم بعد ما ربطوا عيونهم اشت. جان واكف يحجي ويه الضابط

من طلعنه بارك الامي على الحكم وباركلي

بعدها سحبني وهو يكول .. تعالي ولج خلي احجي وياج

ابتسمت .. قبل لا تحجي اي شي اني كولش اشكرك لان انت ساعدت ماما وخليت العدالة تاخذ حقها ما اعرف اني شلون اجازيك

جر نفس وزفره كال .. بعدين وتفاهم على هذا الموضوع

نزلت راسي باسف .. اي حقك لا ان شاء الله بس نرتب امورنه فلوسك ندزها الك باقرب وقت واتعابك وارباحك

رفع حاجب .. شكد ما تستحين سدي حلكج هذا الي اذا ما نباس ما يمشي عدل

عقدت حواجبي.. هاي شنو ليش هيج تحجي عليه هاي فوكاها يعني فوك ما ابين الك ان احنه مدا ناكل حقك

رد عليه .. عمي اكلوا وتهنوا بيه وبعدين هذا الي خسرته على قضية امج ترا من مهرج

جاوبته ... الله واكببببببببببببببر ما طلع مهر طلع انتقام لعد شكد حاطلي مهر مليار تاخذ منه وما يخلص

اشتر .. هسه انتي شلج شغل المهم عندج مهر بجيبي اسحب منه وانقص المهر

رديت .. ادري مهر البنك المركزي والله لو تسلمني المهر جان هسه اني مليارديرا امشي وباوع للناس بغرور

ضحك كال .. اي ان شاء الله ان شاء الله انطي الج كله

سكتت كال .. اكلج انتي شلون ترحين لعامر بالسجن ولج منو سمحلج اصلا

جاوبته .. شسوي غير ابوي كلت رضا الله من رضا الوالدين خلي اروح اشوفه بلكي صار ادمي رحت نفس الحطه لكيته انوب يتوعد ويهدد ويفشر اصلا قبل احسن لا هسه بالظيم عوزه بس يلزم اله مسدس ويخرطنه

انوب خفت من حجه هيج بصراحة وما اظم عليك اخاف يطلع ويهجم علينه

ضحك كال .. هو يعرب مخدرات ويهرب بانزين وقاتل مع سبق الاصرار والترصد ترا هي بس البانزين والمخدرات تهمتها اربعه ارهاب دخلي يولي ما يطلع شيطلعه

جريت نفس وزفرته.. بلكي الله لان كلامه خوفني

هز راسه برفض .. لا تخافين بويه اني يمج

ابتسمت .. شكرا

تقرب مني وهو يكول ... تقبلين نتزوج

شتت نظري بخجل .. ما اعرف خلي اخذ رأي امي

ضحك .. امج تحبني توافق

ابتسمت .. ما ادري اسال ابني هو ولي امري

عض شفته وهو يكول .. اشمره بالزباله اذا موافق

عدلت حجابي وكلبي ديطير من مكانه اجت سالي وكفت تباوعلنه ومشت زعلانه معاجبها الوضع عبالك خاينيها باع الصلافه باااع ولج مو انخطبتي ماخذه رجلج واني ما ادري نعال عليج

عفته ورحت يم ماما وبعدها اخذه تكسي وطلعنه لان هو عنده شغل لحد الان مكدر يوصلنه بس اجر النه تكسي يوصلنه

..................

صفاء

قررنا نسوي الحنه بعد اسبوع بعد ما طولت الخطوبه شهر ونص تقريبا يعني خلينه اربعين وجيهه طلعت يله

طبعا لحد الان تحسين بالمستشفى حالته تتحسن وبعدها تسوء وتشوهه جسمه و وجهه يخوووف صاير كولة مصطفى لو يموت احسن لان حالته بالحظيظ

وساهر همين لحد الان ما القوا القبض عليه ما ادري وين وله وين اختفى عاف نسوانه ثنينهن وانهزم ذيج من شافته صار فكر تطلكت غيابي وعافته

وام سجاد حفي ولبخي الوجهه ودكي تاتو وراحت تعينت بشركة أهليه ورفعت دعوه على ساهر تريد تخلعه

كولة فافي نسوان برابيك ما تصير الهن جاره شافنه فلس ومطلوب وعليه دعاوي خلن وانهزمن وتطلكن وعافنه يدك براسه لوحده مثل الصخل

جنه بالبيت واجت من نص الشارع فرقه بصراويه يدكون ويطبلون باغنية بالميدان يحمدان العالم كلها طلعت عليهم طلعنه احنه اثاري طلعوا اصدقاء مصطفى من جان يشرب المنكر ومتسوفل ويه عباد الله

ظلوا بالنص ساعه واكفين بالباب يدكون ويركصون ويغنون والعالم فرحانه كلها طالعه يصورون بيهم واشتر واكف بملل مستقبلهم شويه ويكتل مصطفى على هالدكة بس بعد هو عفطي هذول ربعه شنسوي

راحت هاي الفرقه وظلينه كاعدين اشتر ما حجه وياه باليل شو نفس الوضع اجت فرقه ثانيه يغنون هوسات واهازيج وهم دك وركص اخذولهم ساعه وراحوا

صبحنه الصبح نفس الحاله هم اجتنه فرقه مال سمران وياهم مطرب صاعد نازل ومصطفى فرحان ويضحك

لزمة اشتر وهو يكول ... ادري ولك انت جاي تعرس لو مسويلي برنامج ذفويس كل شويه واجتنه فرقه يغنون ويركصون

ضحك وهو يكول ... هههههههه ذول جماعتي هاي فرق يطلعون بفلوس بس هم من كد ما يحبوني يجون ببلاش وان شاء الله بالحنه اسويها خاصه للولد بقاعه دك وركص للصبح وعربده عريس وربعه يزفونه

هز ايده اشتر مقابل على كلامه

شويه واتصل موبايلي فتحت خط بسرعه جانت تسواهن كالت بصوت خايف ويرجف ... الحكوله الحكوووو سولين وافيان وامين طلعن للسوك وصاير انفجار وماكووو نتصل وماكو

نهاية البارت ... يتبع

كونوا انتم كونوا بخير .. احبكم💔

لا تنسوا التصويت والمشاركة بكم نكتمل