رواية وقت النفاس الفصل الثاني 2 - بقلم جمال الحفني

هتصدقوني لو قولتلكوا إن فيه واحده منكم كل ما تخرج من أوضتها للصالة بتشوف كيان أسود ضهم قاعد الكنبة، هيئته هيئة بشر لكن كله أسود في أسود، مش هتصدقوني! طيب.

يبقى لازم تصدقوا القصص اللي كتبوها المتابعين والأصدقاء في التعليقات وحصلت معاهم خلال فترة النفاس، الفترة اللي بقت لغز محير ملوش تفسير.

وعلى رأي أنيس منصور لما قال إن العالم دا عبارة عن جزئين، جزء منه عارفينه وعارفين قوانينه، وجزء تاني عجيب ملوش قوانين ولا تفسير.

آه بالمناسبة، التعليقات اللي تحت دي جبتهالكوا زي ما مكتوبة عندي، لا زودت حرف ولا قللت حرف وأتمنى أصحابها لو شافوها يأكدوا الكلام دا عشان فيه ناس ببعتلي رسايل وبتقولي تعليقات إن كل الكلام دا هجص في هجص ومش حقيقي

اسيبكوا مع القصص..

-------

انا كانت ٣ ولاده لي وقعدت عند امي اسبوعين بعد الولاد علشان ولادي صغيرين وبولد قيصري ومش هقدر اعمل حاجه ولا اتحرك اخدم ولادي وكان زوجي مسافر واول ليله لابني في شقتي وهو عنده اسبوعين كان يوم عادي خالص ونيمت اخواته وهو معايا علي سريري في اوضه واحده علشان كنا في الشتا زي الايام دي وخايفه يبردو وكده ونمت وطفيت النور وقفلت باب الاوضه عادي خالص زي اي يوم لكن قبل الفجر بنص ساعه لقيت حد بيصحيني من النوم بعصبيه بصيت اشوف مين لقيت واحده ست كبيره في السن بتقولي قومي بسرعه هيأذوا ابنك قومي الحقيه وكانت لابسه اسود ومش باين منها ملامح وبعدها علطول لقيت خيال كبير جدا واقف مابين السرير والدولاب وبيزوم ولما قومت وسميت الله زعق جامد واختفي معرفش انا قومت ازاي من مكاني فتحت النور واتصلت ببابا وقعدت اعيط واحكيله اللي حصل قعد يهدي فيه ويقولي اذكار اقرأها وقالي افتح صوره البقره ومطفهاش خالص واخد ابني في حضني ومطفيش النور تاني وفعلا عملت كده ومعرفتش ارجع انام وبابا كان معايا مفصلش الفون واول ما النهار طلع والدنيا نورت نمت علطول زي القتيله بس فضلت كل يوم مطفيش النوم وعملت ورد اذكار ليا وتحصين للبيت كله وولادي والحمد لله بقي في اعدادي دلوقتي ربنا يحفظه هو وأخواته يارب

بس مش بنسي ابدا اليوم ده وعلطول في ذاكرتي

-----

مش عايزه احكيها قدام حد ومش عايزه اسمي يظهر 😂 مامتي حكت لنا قصه شبها حصلت معاها اخويا الكبير كان حلو جدا وجماله رهيب وامي ولدته طبيبعي المهم انها قالت وهي قاعده لوحدها واحده شبها ظهرتلها وقالتلها خبيه من الناس المهم امي قالت يمكن بيتهيالي وكانت لسه يادوب عده اسبوع من الولاده وراحت ف نفس اليوم كان عندها فرح لبست وعملت ميكب ولبسته ظهرتلها تاني وقالتلها اتلمي يا سميرة اتلمي بقي بعصبيه ونزلت زمان ماشالله يولدو من هنا ويقوموا 😂 راحت الفرح وهيصت ورجعت بتقول اول ما نمت ف السرير وظهرتلي تاني وقالتلي مش قولتلك تتلمي انتي اللي عملتي كده وبتقول النور طفي وهي ف السرير وكانّها مشلوله ومش عارفه تنطق وبابا جنبها وهي مش قادره حتي تحرك اي حاجه ف جسمها لاحد الصبح كده وبعدها راحت لوحده رقيتها وبقت كويسه واانا ف نفس البيت ده كنت لبسه حاجه اسمها تحصينه مكتوب عليها قران هي حرام بس عموما مكنتش اعرف وكأنو قالو مادخلش بيها الحمام نسيت ودخلت لم نمت حلمت بيها شفتها بجد شبه ماما الاختلاف بسيط وزعقلتي وقالتلي دي تاني مره تدخلي بيها ال ٣ هتتاذي اقلعيها

________

حصل معايا كنت لسه برضو والده من شهر نص كده او شهرين اليوم دا جوزي كان اتاخر في الشغل وانا دخلت بابني الاوضه نيمته وانا نمت من التعب المهم قلقت وحسيت بحاجه ف الأوضه صحيت و ببص جمبي لاقيت جوزي جه من الشغل وكان نايم جمبي ع السرير وكنت نايمه ف النص المهم غمضت تاني وكملت نوم وإذا فجاه بعد كام دقيقه بايد حد بكامل قوته نزلت ع بطني وبجد الخبطه وجعتني واتنفضت من ع السرير نفضه جامده لدرجه ان السرير اتهز والله انت فكرت جوزي اللي ضربني ببص عليه لاقيته نايم واستغربت جدا الخبطه دي مين بجد لحد النهارده مش مصدقه اليوم دا وحكيت لجوزي تاني يوم فكرته هو اللي عمل فيا مقلب قالي كنت نايم وهضربك ليه وانتي نايمه

_________

انت عارف انا كنت لسه ولده بقالي مثلا ١٢يوم كنت ببقي نايمه مره وحده احس اني متكتفه افتح عيني وافضل اصوت علشان جوزي يسمعني مثلا ولا كاني بطلع صوت اصلا واحس كان حد قاعد علي صدري وبطني واحاول اقرا ايه الكرسي جسمي يبدا يفك وافوق بس بقوم اقعد علي السرير وقلبي يفضل يدق بطريقه كانه هيتخلع كن مكانه فضلت كده فتره بتاع شهر بس الكلام دا كان بيحصلي كل مثلا اسبوع او اكتر لدرجه كنت بشغل قران علي الفون وانام وكانت بحس اني خايفه من كتر المواقف دي وحصلتلي برضو قبل ما اولد بشهر كده والحوار كان تعابني مع اني بصلي الحمدلله بس اختفي خالص بيحصلي علي المدي البعيد كده كل كذا شهر ممكن مره واوقات كنت مابين الصحيان والنوم كده برضو ولسه مروحتش ف النوم واحس اني كان جسمي بينمل وكاني هتكتف كنت الحق واقرا قران جسمي يفك علي طول مالحقش والحمدلله بقالي داخله ف اكتر من سنه ونص محصليش كده بس عاوزه الاقي تفسير للحاجه دي وسببها؟؟؟

-----

انا حصلي موقف بعد ولادة ابني وانا في فترة النفاس كنا باليل واختي معايا كنا نحكي بعدها سكتنا وكنا راح نام فجأة لقيت نفسي كأني في مكان خالي وانا في وسط زوبعة حاسة بريح قوي ومطر وانا في وسطها كاني طايرة معاه وبديت اتسحب معاها حتى لقيت اختي بتصحيني وتقولي قومي انت اتخنقتي وانت نايمة وكنتي تقولي كلام غريب وفمك صار مايل على جنب قرتلي قران والحمد لله مرت على خير لكن للحين ماعرفت شو هذا الي حصل

------

حصل معايه بعد ماولاده هطعلي طول بيليل كنت اشوف وحده شايله ابن زي ابني بالظبط بليل علشباك او الباب وكنت ديما بتخانق مع اي حد فضلت كدا كتير لحد الحمدلله مبقت اشوف حاجه انا ولاده بعد 13 سنه ولما حكايت قالو دا قرينك وقرين ابنك

------

حصل موقف لواحده قريبتى فى النفاس كانت لسه والده وزعلانه وقاعده فالاوضه بتعيط بتبص قدامها على طرف السرير لقت نفسها قاعده قدامها وبتبصلها

-------

حصلي مواقف كتير اوى ومختلفه معلش هطول عليكم

اول حاجة كنت والدة بقالي اسبوع وقاعدة ع السرير ف بيت بابا وبتكلم مع جوزى ف الاوضه التانيه ضلمه ومفتوحه سمعت صوت حد بيعمل بيس جامدة انا بس الى سمعتها وانا وجوزى بس الي كنا موجودين

موقف تانى بغير لابني في بيتى وكنت ملبساه شراب وشوقت الشراب وهو بيتقلع وكنت فايقه

بعد مغيرتله والحاجه جنبي فردة من الشراب اختفت حرفيا ودورت ف كل ركن وقولت هتظهر

ظهرت تانى يوم لما غيرت لابني المرة الخامسه ف البنطلون بتاعه عرفت أن في حاجة غلط لانى لما بغيرله اجباري بقلعه كل بنطلون لوحده

مرة تانيه كنت هلبسه تيشرت طلعته بإيدى حطيته ع السرير لفيت بقفل الدرج اختفي تماما ملقتوش غير تانى يوم بليل تحت البطانيه وانا كنت حطاه ف وشي عادى

دا غير الاحلام طبعا فظيعه

حلمت انى شايله ابني وكان وشه عجوز جدااا ومليان تجاعيد واضحه ونظرته غريبه

ولما كنت ف بيت بابا حلمت بأمى كان شكلها اعوذ بالله وشعرها غريب وعينيها حمرة ورقبها معوجه وبتبصلي بأستفزاز رهيب وكنت نايمه ع جمبي اليمين صحيت لقيت ماما داخله عليا بنفس نكشه الشعر الش شوفتها

وغيره كتير بقي 😂😂😂

-------

الكلام ده حقيقي جدا ان الست الوالده متتسابش لوحدها ابدا

مره والدتي بعد ما ولدت اول مولود كانت جدتي ملازماها دايما بغرفتها بس اضطرت تسيبها وتقوم تعمل اكل فوالدتي راحت ثواني في النوم وصحيت لاقيت بنتين جنب السرير في منتهي الجمال لابسين اجمل لبس

هي خافت وجريت علي باب الشقه وندهت علي جدتي فبيقولوا لازم يتحط تحت المخده سكينه لحماية الام والمولود

--------

فعلا والله في مره كنت نايمه وكان حاجه مسكتني من رجلي وقعدتت متكتفه ومكنتش قادره اقوم اشيل الولا وهوا بعيط ده حصلي بعد السابع بي يومين

------

كانت جدتي الله يرحمها دايما تحذرنا ان الست اللي لسة والدة و البيبي لازم يتحصنو بشكل مستمر و القرآن ميفارقهومش عشان سبحان الله بيكونو اكثر عرضة من اي حد للأذى ده .. و البنت دي ربنا بعتلها إنقاذ من عنده بجد .. تسلم ايدك و استمر ربنا معاك 👏🏻👏🏻👏🏻👏🏻👏🏻

--------

حقيقي الكلام ده بعد ولادتى عشت اسوء ايام حياتي خنقه وهلاوس وكوابيس الحمدلله عدت على خير

------

كنت بشوف خيالات سوده بتروح وتيجي قدامي كتيررر بس مكنتش بهتم تقريبا ده من آثار البنج والتخدير

-----

لسه والده قريب اليومين دول وحصل معايا موقفين واحد تنبيه والتاني مرعب بس محكتش لحد لان محدش هيصدقني

-----