ولا زلت في حبل الغرام اتجوّد!. الفصل الخامس عشر 15 - بقلم الرنيد

.

.....
صقر: جواد!.
جواد تنهد وناظره: سـّم
صقر صد بوجهه وقال بتردد:  يعني ابوك عادي يقتل بكل برود؟
جواد سكت ولا عرف وش يقول..
صقر: جواد لا تفهمني غلط بس يعني شلون كذا كل هالشي يصير ولا للشرطه خبر. يعني هذي جرايم قتل!
جواد زفر وهو ضايق خلقه: صـقر!  ... من التسعينات  جدي الشيخ فارع وقع مواثيق وعهود مع السلطات بأنه مايتم اي تخريب او امساس بأمن الدوله من قبل القبايل... بالمقابل السلطات والحكومه ما تدخل الحضاره المعماريه وغيره على هالديار ويتركونها مثل ما أهلها يبون... من بعدها اجتمعت كل القبايل الي حولنا وداخله في العقد  لجدي الشيخ فارع والي معروف ان قبيلتنا هي القويه بينهم فكانوا تحت رايته هو الي يديرهم ومن بعدها ابوي الشيخ جراح تولى هالشي... وأي شي يصير في ذي القبايل مامن حد يطلع الهرج لحكومه او لشرطه نحل الخلافات ما بيننا والي يقوله الشيخ جراح الكل يرضى فيه!..
سكت صقر وهو يفكر في كلام جواد فيه شي ناقص...المنطـق!!  مو منطقي الي يصير أبداً!
تنهد جواد وقال: ادري بالي تفكر فيه!  .. ترى انا مثلك ماني مستوعب الي يصير ولا ني راضين فيه مير يمين بالله اني قاعد احاول أصلح من ذا الحال مير وش اسوي كل ما جت بتزين معي شطح ابوي بشي وخلاني افقد عقلي واخرب كل شي!
صقر عقد حواجبه: شلون!؟  يعني شلون يشطح بشي ليه هو وش مسوي بعد !؟؟
جواد مسح وجهه وهو متضايق ومتردد في الكلام ما يدري كيف يشرح كيف يوصف حاله!  :  الي احرق بيت مزنه!
صقر فتح عيونه بخوف وقال بتساؤل وهو يتمنى يسمع إجابه عكس الي في باله:  منهو؟؟
جواد زفر: ابوي!
سكت بصدمه وهو مايدري وش يقول فعلاً الوضع غير منطقييي أبداً!!!...

صقر بهم: جواد والله عقدت الأمور يعني شلون بتاخذ البنت ذي الحين
جواد: اي بنت
صقر: يارجال وش بلاك الحرمه الي بتعرس عليها!
جواد: اييه.. مدري والله العظيم مالي فيها خاطر.
صقر: زين علم ابوك كنسل الموضوع!
جواد: تستهبل!.. تحسب الوضع عادي والله ان يصير وجهي في التراب بين القبايل البنت لي من صغرها تبيني الحين ارفضها ماهي من سلومنا!!!  ... وانا رجال قّد كلمتي الكلمه صارت كلمة رجال ونهجنا لـهم وصارت حليلتي!  ..
صقر بنرفزه: أجل وشلون بتاخذ ذي دام المراجل ذابحتك؟!! ..... بكره بتاخذ الثانيه ومن بعدها الثالثه ثم الرابعه زين!! ملاك وين مكانها؟؟  لو فرضنا وصار ووافق ابوك تاخذها شلون بتاخذها يابو مراجل انت!؟؟

جواد تأفف وناظر الديره: علمني وش السواه؟
صقر استند مثله على الجدار:  مدري والله اني تايه مثلـك!... تدري وش؟
جواد ناظره...
صقر:  ترى يمكن انها مجرد نزوه يا رجال ذي مهبوله شلون بتحس فيك شلون بتعلمها احساسك! شعـورك!. شلون بتعبر لها!. علمني؟.
جواد وهو يتذكر سكونها بين يديه تنهد:  والله العظيم انها تحس فيني تدري بالي في قلبي! 
صقر: جواد لا تستهبل!.. انا مثلك دكتور وادري بمثل ذي الحاله ترى ماتدري بشي!.
جواد تنهد بضيق: ورب البيت انها تدري تحس بالي في خاطري  .. ترجف يا صقر اذا لمست يدها!  ... فيها حياء البنت حتى لو انها مهبوله تحس بحبي لها!
صقر تأفف:  تدري وش تزوج يا رجال خذ ذي الحرمه وصدقني بتنسى ذي الملاك وبتنسى طوايفها والله انك بتذكر كلامي وبتقول صادق يا صقر...
جواد ناظره بنرفزه :  تدري وش!...  والله لو اتزوج كل يوم حرمه ان مايجي مثلها احد في قلبي!

راح جواد عنه وهو يرجع يجلس وصقر للحين واقف ومبتسم على خفيف قال بصوت مرتفع :  أجل الله يعينك على ما بلاك!
حمد عقد حواجبـه: وش بلاك!
جواد انسدح وغمض عيونه: يستهبل لا تسمع له
صر حمد على اسنانه وهو متنرفز من جواد الي يخبي عنه!  ...

تقـدم صقر وجلس عندهم وناظر جواد بأبتسامه: انا اعلمك يا حمد
فتح جواد عيونه:  وجع وش الي تعلمه!
حمد مد يده وقفل فم جواد: اهرج وش بتعلمن؟
صقر ضحك وناظر جواد بخبث: أعلم
كان جواد يناظره بتهديد!!
حمد لف وجه جواد: اهرج وش بتعلمن اروج؟
صقر ضحك: هذا جواد طايح.. اااااخ
صرخ من رجل جواد الي صارت ببطنه...
ضحك راكان:  اماااا متعلم كرتيه الرجال ههههههههه
جواد وقف بسرعه وتل صقر من ضهره: تعال تعال وش علموك انت تعال؟؟
ضحك صقر: والله ماكنت بقول شي انت الي تفضح عمرك!..

حمد وقف وقال: يالله يالربع تصبحون على خير.
صقر: بدري اقعد
حمد ناظر جواد:  تأخر الوقت...
مشى عنهم وطلع..
وصقر ضحك: من جده اخوك يزعل!؟
جواد ابتسم وراح يلحق حمد طلع من السطح وركض له: ورع!  أصبر بعلمك
حمد وقف وكان بنص الدرج التفت له: وش تبي؟
جواد ابتسم: انت الي وش نوحك؟
حمد تنهد: مابي شي بنهج انيّم صاحين من صباح الله خير وتعبانين!  ..
جواد مد يده لكتف حمد:  لا بالله ان بك شي وانك بتعلمن الحين...
حمد: انت وش نوحك ما تفقه الهرج قلت لك مافيني شي!
جواد ابتسم بخبث: يا ليل الي يغار ولا يتكلم ترى ادري اني اخوك مير لي الحق اهرج مع غيرك
حمد كشر: يييع يالثقه الشينه! ييع
جواد ضحك بقوه: امزح امزح.. الحين ترى والله مامن شي كنت اهرج مع صقر بخصوص ماضوع بعلمك فيه مير ما حبيت اعلمك عند العيال مابي احد يعرفه!
حمد تعدل: الي هو؟
جواد: الكاميرات!..وصيت صقر يجيب كاميرات مراقبه وبزرعهم بالديره بدون علم احد انت بتساعدني في هالشي وخلال يومين بالكثير بنعرف منهو الي مسبب كل هالخراب!
حمد هز راسه: ابشر بي متى تبيه!
جواد: بنخليه لباكر الليل إن شآء الله!
حمد: إن شآء الله
جواد ابتسم: تصبح على خير يا خوي الغيور.
كشر حمد: اقول طِس قبل امصع وجهك  الله لا يعوق بشر!
ضحك جواد بصخب ودفه وراح راجع للسطح للعيال...
وحمد نزل وهو مبتسم وصل عند السيب الي يدخل على غرف حريمه الثنتين!  تنهد وهو ضايق من يدخل له الحين كلهم يلوعون كبده بالمشاكل وكل وحده تدبل كبده وش صار اليوم وش قالن حريم اخوانه وش لبست فلانه وش سوت فلانه!  ... هو مايبي كل ذا... يبي لامن دخل يشوف له حرمه تستقبله بالأبتسامه تستقبله بالكلمه الحلوه تسولف معه.. يحبها!. وده يجرب هالشعور!  شعور انه يحب زوجته ويكون متلهف لشوفتها!  مير وين كل هذا وييين مافي شي   اسمه حب كل هم الشيخ انهم يتزوجون ويخلفون وهذا اهم شي عنده!  لين تعودوا تقريباً على هالشي او يهربون من حريمهم مثل ماهو حاله!..
تنهد وفتح وحده من الغرف ودخل فزت حرمته جمانه:  هلا يا شيخ حمد هلا
حمد ببرود: ارجعي نامي..
جمانه انسدحت بتكشيره:  شيخ انت ضايق مني؟  لك يومين مب جاي غرفتي! 
حمد شال الثوب ورماه واخذ المنشفه:  ما فيني شي ولا تبدين الهرج الفِقيه! 
جمانه صدت بزعل وغمضت عيونها
دخل حمد للحمام اكرمكم الله ياخذ له دش سريع قبل ينام!...

"تذكير بعيال الشيخ"

فاهد 35 سنه  متزوج 4 حريم ((مهره... و الريم.. والجازي... والعنود)) ولد الشيخه فهده....
عساف34سنه متزوج حرمتين  ((جواهر... وسلوى)) ولد الشيخه فهده....
رياض 32سنه متزوج حرمتين  (( الجود.. ورغده...)) ولد الشيخه فهده...
نمر31سنه متزوج 3حريم ((حسناء...وعبله... وسعاد))ولد الشيخه غرور 
سناد 30 ((مروى... وهيلة))  عيال الشيخه فهده
وعناد 30 ((نويــر... واصايل))______

حمد 29سنه متزوج  حرمتين ((جمانه... ونور))   ولد الشيخه غرور
جـــــــواد 28 سنـــه...محيرين  له 4بنات ولد الشيخه غرور
ســالم 25 سنه  محيرين له 4بنات ولد الشيخة غرور
عــزام20سنه محيرين له 3بنات ولد الشيخه غرور
يوسف 17سنه  ولد مشاعل..
هادي  15سنه  ولد مشاعل  ..
انسان اسمه بوادي وهو بوادي اخر   يحب الضحك والمزاح وهذا الي معصب للشيخ جراح منه

___

فتح الباب بهدوء ودخل...
رفعت راسها له وشافته واقف على الباب ويناظرها بذات النظرات الي كلها لمعه غريبه ما تشوفها الا هي... صدت بوجهها ويوم حست فيه يقرب منها رفعت اللحاف وتغطت كلها وانسدحت وهي تداري دموعها الي تنزل كل ما تذكرت ولادتها الموحشه ووجع جسدها! 
حست بيده على كتفها نزلت دموعها وهي متقرفه حتى من لمساته..  ضمت اللحاف عليها اكثر وهي تحاول تشده على جسدها ما يقدر يشوفها!  ...
حست بانفاسه قريب من اذنها غمضت عيونها بقوه.. حست بجسدها ينشد له وهو يطوقها ويضمها وهي للحين باللحاف همس لها بأسف:  ورب منى وعرفه ما قصدت لك الأذيه! 

العنود زادت دموعها وهي تتذكر شلون داهمها الوجع شلون كانت تحس بسكرات الموت!!!  شلون كان بينها وبين الموت شعره وحده وبقدرة الله رجعت للحياه بأعجوبه او قد يكون تهيئ لها!
فاهد ضمها اكثر وبنفس الهمس:  عنود  اعتذر منك والي
خلقك ما كنت ابيك تتأذين ما كان ودي يصير الي صار..
العنود فتحت عيونها وقالت بحقد وصوتها واضح فيه البكاء:  وخر عني والله العظيم ان اندمك يا فاهد!... والله ان اطلع كل الي بقلبي لأبوي... والله ان ارد لك الصاع صاعين يا فاهد والبادي اظلم في جميع المبادي!  ..
ارتخت يده من عليها ابتعدت عنه ووخرت اللحاف وناظرته بكره:  انا قلت لك من قبل يا فاهد قلت لك من قبل! خلني اولد الي ببطني ووقتها والله ان ماعاد تشوفني!  ووالوقت صار يا فاهد صار!
فاهد عقد حواجبه وجلس وهو يناظرها بحده
العنود ابتسمت بسخريه:  اقدر اقول لك من الحين تهنى بولدك وربيه زين خله يطلع مثلك!...  عشان ربي ينزل العذاب عليكم جميع!  يا ديرة البلا!
فاهد مارد عليها وهو يناظرها بصمت..
العنود ميلت راسها وقالت بغصه وهي تناظره:   جاني ابوي وقال انتي شيخه بنت شيخ ما بزوجك الا شيخ! يصونك ويقدرك!  مايليق فيك الا شيخ مابي ازوجك لأحد من عيال عمك ماهم كفو ياخذون العنود بنت هزاع!!!.. جاني وهو مسفهل وقال طلبك الشيخ فاهد شيخ الشيوخ ورجال عن مليون رجال... رجال يليق اسمه بأسمك!!!... "نزلت دموعها"  قلت جاك نصيبك يا العنود بتاخذين شيخ الشيوخ!!  هه!!  وبعدها؟؟  خذيت شيخ الشيوخ وش جاني منه؟؟ عشت شهرين يا فاهد فقط شهرين وانا احس اني اسعد انسانه كنت اتلهف متى يصير الليل وتدخل البيت يا فاهد وارتمي بحضنك!! كنت اكره المجلس يا فاهد عشانه ياخذك مني! كنت احسب الساعات متى يصير الليل وتجيني يا فاهد!!!....ويوم يصير دور حريمك الثانين كنت اموت من شوقي لك واغار عليك مابيك تكون لاحد غيري اتخيل شلون وحده ثانيه بتنام بحضنك!! لين قلت لي بذيك الليله وحلفت لي ان ما غيري ينام بحضنك ههه كنت اسعد انسانه وقتها حسيت فعلاً اني فارقه عنهم لأني الشيخه العنود!  "كملت ودموعها تنزل اكثر"   حبيتك!  والله العظيم حبيتك من كل قلبي  يا فاهد كنت اشوفك فارق فااارق عن الجميع اشوفك فاهد غير عن الي اشوفه كنت تحس بدلالي واني بنت ما فيني ذرة قسوه وان قلبي رهيف كنت تحب هالشي وتقابلني مثله لين شفتك مختلف عن العالم كنت اقول كل الناس تخطي الا فاهد كل الناس فيهم حقد وغل الا فاهد  بس وش جاني منك.. خيبت كل الهقوه يا فاهد ظهرت لي بأبشع صوره يا فاهد قتلت انسان بريئ يا فاهد وذبحت معه كل ذرة حب موجوده لك في قلبي! 

سكتت وهي تبكي وتناظره ونزلت يدها الي كانت تحركها من انفعالها شافت نظراته لها وهو للحين ساكت!

كملت بغصه:  كنت ما انام الا وانا في حضنك وعلى همساتك لي ونظرات الحب في عيونك.. صرت ما انام الا على الضرب والإهانه!  ... كنت امشي في كل مكان في الديره ونطلع لكل مكان انا وياك الحين صرت محبوسه بين اربع جدران من سته شهور يا فاهد! 
تغيرت حيييل وهالتغير وهالقسوه سوت مني عنود ثانيه عنود قاسيه مثل قساوتك عنود تكرهك اضعاف ما حبتك بيوم!   ... وخل هالشي ببالك يا فاهد والي خلقك وخلقني والي سواني وسواك ورب منى وعرفه اني بذوقك المر يا فاهد! 
وقف وهو مو قادر يتحمل كلامها اكثر طلع بسرعه وصفق الباب وطلع وهو يمشي بخطوات سريعه يحس انه يختنق يختننق!!

اعتلى بكاها وانسدحت على السرير وهي تحس بالوجع يداهمها...
تغطت باللحاف وهي تبكي ماتحس بأي ذرة امومه تجاه الولد الي ما تدري كيف شكله حتى ماتبي تشوفه ولا تبي تسئل عنه ما تبي حتى تعرف هو بخير ولا لا تبي بس تنحاش من هنا وتوصل لأبوها وخلاص الي يصير يصير بكره بتنهج لأبوها بتعلمه كل الي صار معها وان ما قدرت توصل لأبوها بتنحاش من الديره كلها!  ...

_______

" الصباح"

صحى من النوم  وتثاوب وناظر السقف بنعاس مد يده لجواله الي ازعجـه رفعه كان المنبه يصحيه على الساعه 6 تنهد ووقف توه ينسدح بعد صلاة الفجر ما كان ناوي ينام بس كان بينسدح! 
وقف وهو يتمغط ناظر نفسه كان نايم بالثوب تأفف بنعاس وراح للمرايه ناظر نفسه وجهه معفوس بعد النوم وحواجبه معقوده قلب عيونه وراح اخذ منشفته ودخل الحمام غسل وجهه ونشفه وطلع اخذ العطر وتعطر ومشط شعره ناظر الثوب كانت متعرفط كشر ما ينفع يطلع فيه شاله ورماه وراح اخذ له ثوب ثاني لبسه وتذكر بسرعه وراح للثوب الاول طلع الدميه منه وابتسـم لها وقال: صباح الخير يا وجه السعد!
دخلها جيبه وراح اخذ جواله وطلع من الغرفه ابتسم وهو يتذكر  جواد الصغيرون توجه له وهو يبي يشوفه وصل عند الغرفه وفتحها ودخل وابتسم بحب كبير:  يااااا قلبي على هالصغير ياقلبي قلبااه  ..
وصل عنده وناظره وهو نايم والمغذيات موصلـه فيه ابتسم بحنان واخذ الجهاز وبدأ يعدله ويشيك عليه ويتطمن على وضعه... ابتسم بحب ورفع جواله وهو يصوره  ناظر الصور في الجوال وأبتسم ودخله جيبه سمع الباب ينفتح رفع راسه واتفاجأ من شكل فاهد وعيونه الحمر واضح انه مانام: فاهد!
تقدم فاهد وهو ساكت ناظر الولد وقال بهدوء: كيف حاله الحين!؟
جواد بأستغراب: بخير مير انت وش بلاك!؟
فاهد وواضح عليه الهم: ما فيني شي...  انتبه عليه يا جواد هذا اغلا من كل عيالي!
جواد اومئ: ابشر
فاهد بلع ريقه وقال: اقدر اضمه!؟
جواد هز راسه بالنفي: ما يصير الحين
تنهد وقال بحزن:  ايه مايصير ما يصير كل الي احبهم ما يصير!
جواد مسكه بخوف: فاهد انت بخير
فاهد وخر يده عنه: بخير بخير ما علي خلاف.
جواد بلع ريقه: يا خوي فيك شي؟ تبي شي توجس شي؟ علمني؟ 
فاهد هز رأسه بالنفي: ما فيني شي انا طالع برا الديره!
جواد بصدمه: وين بتنهج!؟
فاهد شد على يده: مدري!
جواد سحبه وجلسه في زاويه الغرفه  : الا بالله ان فيك شي علمني يا خوي علمني وش فيك
سند راسه على الجدار وغمض عيونه:  بطلع من الديره لجل تاخذ راحتها وتعلم ابوها بالي تبيه!  خلها تاخذ حقها مني لين متى وانا اخبيها واداري حبها مابين الرمش والعين وما زادها الا ضيم وحزن!
خلها تروح يا جواد خلها تسوي الي براسها خلها تشفي غليلها خلها تنتقم مني! 

جواد بلع ريقه: فاهد انت وش تقول؟
فاهد بغضب ضرب الجدار بيده:  هي تبي تعلم الشيخ هزاع خلها تعلمه
فز جواد الي تفاجأ من حركته: فاهد اهدى
فاهد بعصبيه:  تعبت ياا جواد تعبت!!!
جواد: ترى ما عليها ملامه
فاهد: ادري ادري مير هي الي وصلتنا لهالحال هي يا جواد هي..
جواد عض شفته بحزن: فاهد!  انت حاول تصلح الأمور شف الي بخاطرها نفذ الي تبيه كفر عن ذنبك صوم شهرين يا خوي ادفع دية المقتول ترى كل هذا ذنوبك يا فاهد دم الرجال برقبتك للحين!
فاهد بصراخ:  ليييه ابوي ما يصوم ليه ابوي ما يدفع الديـه ليه ابوي ما يتعذب مثل ما انا اتعذب
جواد بعصبيه: ابوي مهوب قدوه لنا يا فاهد!!! 
فاهد سكت وناظره
جواد بقهر: ابوي ماهوب قدوه!  انت طول عمرك تشوف ابوي قدوتك وانه المثل الأعلى لك والقدوه الحسنه!  شف حالك وين وصل يا فاهد شف حالك!
ترى مب يعني ابوي قاتل انت تصير مثله خلك متفرد بشخصيتك برأيك شفنا كلنا ما ذبحنا احد يا فاهد كلنا ماشين بطريقنا الا انت تتبع اثر طريق ابوي!  .

غمض عيونه وهو يحس بضعف كبير يستحله
جواد بحزن لحاله جلس عنده وشد على كتفه:  أسند نفسك يا خوي رح لها علمها انك بتصوم بتتوب علمها انك تبيها وشاريها وان طلبت الطلاق عطها يا فاهد لين تهداء نفسها ثم عود وخذها! 
فاهد هز راسه: مقدر يا جواد مقدر اطلقها!
جواد تنهد: فاهد انتبه انتبه يا خوي ترى والله ان علمت الشيخ هزاع ان تصير حرب مالها آخر..
خليها تاخذ ابسط حق لها والي هو الطلاق طلقها وثم عوّد خذها الحين صار بينكم ولد يا فاهد هي بتتعلق فيه وبتقعد عشانه!
فاهد بسخريه: هههههه تقعد عشانه!!!... هي تنتظر متى توضعه لجل تنحاش يا جواد..
جواد غمض عيونه بضيق: اجل وش اقول كل ماقلت لك شي جيتني بشي ثاني!
فاهد سكت وهو يفكر
جواد:  الله يهدي سرك يا خوي والله مدري وش اقول لك بعد!
فاهد بعد صمت قال بهدوء:  انا ادري وش اسوي!
جواد ناظره: وشو!
فاهد بتحدي: والي خلقها انها لي وبترضى بهالشي غصب عنها ومالها مفر مني.
تأفف جواد وشد على راسه
وفاهد وقف:  انا طالع

ما امداه يرفع راسه الا وفاهد طلع تنهد: الله يفكنا شرك انت وابوي الله يفكنا شركم! 

___
"غيداء"

كانت واقفه بتردد عند باب غرفة العنود والفضول ذابحها تبي تدخل تلفتت واخذت نفس عميق ورسمت على وجهها ابتسامه خفيفه ودقت الباب بأدب!

عدلت جلستها واستغربت من يدق الباب  فز قلبها يمكن امها او ابوها قالت بلهفه: ادخل!
فتحت الباب ودخلت بأبتسامه : السلام عليكم
عقدت حواجبها: وعليكم السلام
غيداء باحراج: احم عادي ادخل؟
العنود ناظرتها ثم قالت : اي اي حياك ادخلي
تقدمت غيداء وجلست بخجل على حافة  السرير: اول شي الحمد لله على سلامتك..
العنود بأبتسامه خفيفه: الله يسلمك.
غيداء وهي متوتره: احم انا شسمه اخت صقر تعرفينه؟
هزت راسها بالرفض
غيداء: اا شسمه ذا.. جواد.. اخوي خويه!  اتمنى فهمتي!.
العنود: اها اي فهمت حياك!
غيداء ابتسمت بخجل: الله يحييك
العنود كانت تناظرها تبي تعرف هي وش تبي
غيداء ابتلشت: ااا الا وينه النونو!
العنود كشرت وبهمس: مدري
غيداء حست انها بدت توصل للي تبي: احم ليه ما تدرين!
العنود ناظرتها: يمكن انه عندهم
غيداء سكتت وهي تفكر كيف تدخل في الموضوع تبي تتعرف عليها:  اا اعذريني جيتك كذا بس صراحه حبيتك من يوم قعدنا في الصاله وشفتك ويوم سمعت انك ولدتي قلت خل اسلم عليك وابارك لك.
العنود ابتسمت بخفه: تسلمين حبيبتي  .. بس شلون عرفتي مكان غرفتي؟
اختبصت غيداء ولا عرفت وش تقول:  ااا هذي شسمها ذيك الي تمشي بسرعه!
العنود ضحكت بخفه: سماهر!
غيداء ابتسمت : ايه  عليـك نور هي دلتني!
العنود هزت راسها
فركت يديها وهي تفكر شلون تدخل في الموضوع:  الا سمعت انك الرابعه ما شاء الله
العنود اومئت
غيداء هزت راسها:  ما شاء الله  ....  "كانت تفرك يدها وودها لو تفتح سالفه وتطلع الكلام منها بس واضح العنود مالها نيه قالت بفضول "  ااا شسمه وسمعت انك هنا من سته شهور!
رفعت راسها بصدمه: من قال لك
غيداء توترت: هاه... اا سمعتهم.
العنود: سمعتي مين؟؟
غيداء فركت يدها ورفعت شعرها بتوتر: يعني مدري
العنود قربت منها وقالت: انتي وش اسمك
غيداء:اسمي غيداء
هزت راسها: غيداء  واضح انك حبوبه يا غيداء! 

ابتسمت:  ايه والله اعجبك!  ..
العنود قربت ومسكت يدها برجاء:  غيداء اطلب منك طلب!؟
غيداء بحماس: ابشري ايه.
العنود جتها البكيه: انا هنا من سته شهور مسجونه!
غيداء حست بخوف وحزن: ليه
العنود نزلت دموعها: قصه طويله بـ...

فزوا بخوف من الباب الي انفتح ودخل فاهد: العنـ... سكت وهو يشوف الي جالسه عندها وقفت غيداء بخوف: احم انا طالعه
فاهد بحده: من انتي؟
هبط بطنها بخوف من نبرته : انا؟؟
فاهد بحده: ايه انتي؟  من انتي!! وش تسوين هنا
غيداء برجفه: انا ا... انا.. شسمه....
فاهد بعصبيه: اهرجي!!!
غمضت بتوتر
العنود بحده: ذي ضيفه يا شيخ فاهد اخت صقر خوي الشيخ  جواد وتقول انها جايه تتطمن علي وتبارك لي المولود خوفت البنت يا فاهد!
سكت فاهد وصد بوجهه: السموحه يا بنت الأجواد.. السموحه...
غيداء ناظرت العنود بخوف وطلعت بسرعه وهي مقهوره وخايفه... سكرت الباب خلفها ومشت عنهم...

التفت فاهد بحده للعنود: علامها لابسه هالون!  ماتدري ان البيت كل شوي يدخل شيخ!
العنود صدت بوجهها: والله من سلوم العرب الشيوخ ما يدخلون وفيه ضيوف مير شكلك نسيت يا الشيخ.
فاهد رفع حاجب:  انا طالع يا العنود مير قلت اشوف وضعك قبل انهج!
العنود ناظرته: تنهج وين؟ 
فاهد ابتسم بتحدي: انهج للشيخ هزاع   وانتظر شلون بتوصلين له العلم !
العنود صرت على اسنانها وصدت وهو معصبه!
فاهد بأستفزاز: اييه صحيح تذكرت ولد عمك فرراس المسكين!
ناظرته العنود بحده: وش سويت فيه!
فاهد ابتسم: ولا شي مير قطعت يده الي حرقت البيت
شهقت العنود بخوف: فاااااااهد!!!
ضحك بصخب وقال: هو مب قطع قطع  ما صار لي اقطعها المبارزه كانت بشروط  " وبحده" مير إن ما قطعتها اليوم اقطعها باتسر يا العنود! 

كشرت بوجهه: جعل جسدك للقطع قل امين يا فاهد
فاهد جاء بيتكلم سمع الباب ينفتح التفت بحده وشاف أم العنود مبتسمه وفي يدها صحن الفطور: شيخ فاهد انت هنا اعتذر ما كنت ادري
فاهد ابتسم: لا ماعليك يا عمه
تقدمت ام العنود بأبتسامه: صباح الخير ياميمتي شلونك اليوم عساك تحسنتي!
العنود ناظرت فاهد بحقد: اي ابشرك بخير الحمد لله لدرجه اقدر اركض لين برا الديره!! 
فاهد رفع حاجب
ام العنود: هههه بسم الله عليك لا تعطبين عمرك.
جلست عندها وقالت: يلا اجل سمي بالله وكلي لك هاللقمه خليك تشدين عضمك وتقومين على ولدك وترضعينه!
العنود ناظرت فاهد بكره وتحدي: مابيه يمه
ام العنود:  ليه يمه افطري شوفي غيرنا لك الاكل ماهوب سمن!
فاهد شد على يده بعصبيه وفهم إن العنود تقصد انها ماتبي  الولد!
العنود بتحدي وعينها على فاهد: اقصد اني ماابـ...
فاهد بمقاطعه وبحده : تقصد انها ماتبي تاكل بالطيب
الظاهر تبي انا اوكلها!
ام العنود ابتسمت بخجل: اجل تعال وكلها خل ترد لها الروح شف وجهها كيف أصفر! 
فاهد بتحدي: ابشري ماطلبتي
العنود صرت على اسنانها: لا يمه خليك عندي ابي اسولف معك كل شي صار معي وانتو بعيد عني!
ابتسمت ام العنود: لا حقين يمه على السوالف افطري الحين مع رجلك وانا بروح اشوف الولد نفسي ناطفه عليه من البارح!
فاهد: مير لا تقربون منه يقول جواد مايصير!
ام العنود: ابشر
العنود صرت على اسنانها بقهر وقالت: يمه ابيك بموضوع مهم! 
فاهد بحده: مافيه شي الا بعد ما تاكلين يا العنود!
العنود بحده: ماني ماكله يا فاهد! 
ام العنود انحرجت وطلعت من الغرفه والعنود صرخت بقهر: يـــــــــمه!!
فاهد راح للباب بسرعه وقفله ورجع للعنود وهو معصب سحبها بعصبيه: وش ناويه عليه انتي!!
العنود: اموتك بيدي
فاهد بعصبيه سحب الأكل ودخله فمها بالقوه غصت وصارت تكح بقوه اخذ المويه وهو يشربها لين بلعت واخذ اللقمه الثانيه واكلها غصب عنها لين حس فيها ترتخي ابتسم على جنب وسحبها لصدره وهو يمسح على راسها لين غفت ابتسم وهو يتذكر الي سواه قبل يجي! .

_مهره يااا مهره!
مهره بأستعجال: سـّم يا شيخ!
فاهد بهمس قربها له ومد لها علبه صغيره: انهجي سوي للعنود الفطور وخلي هذا فيه!
شهقت بخوف: بتذبحها يا شيخ!!!
فاهد بعصبيه: اسكتي اذبح وش انهبلتي؟؟  خذي هذا وخليه باكلها ومالك شغل!
مهره بلعت ريقها واخذت العلبه وراحت للمطبخ وهي متوتره!

ابتسم بخفه وهو يشوفها نايمه:  نامي يا عيني لين يروحون اهلك والله ان ما يصير الي ببالك يا العنود انك لي لين تموتين!..

___
"غيداء".
كانت جالسه في الصاله وتاكل في اظافرها بقهر  وهي وتتذكر ان العنود كانت بتعلمها لكنه دخل: الله يا خذك كانت بتقول لي كل شي!
هديل بأستغراب: بنت علامك منهي الي تقول لك وش فيك!.
غيداء: ولا شي!
آمال: انتي وين تختفين وين كنتي قبل شوي
غيداء: ماكنت بمكان هذا انا عندكم! 
آمال: لا يا شيخه!!!
غيداء تأففت وانقذتها الشيخه فهده الي قالت: يلا حياكم اقلطوا على الفطور!  .
وقفوا الحريم ووقفت غيداء بسرعه وهي تجلس على السفره هاربه من اسئلة البنات بدت تاكل وهي تفكر كيف بتروح للعنود تسئلها ناظرت ام العنود يوم تعلمهم عن فاهد وانه هو الي اجبر العنود تاكل قلبت عيونها وفي داخلها  ' الخبيث الله يستر وش يسوي فيها الحين'.....

كانت هديل تناظرها بشك وتحس ان في شي ورى غيداء و متوكده بعده...

____________

جالسين في المجلـس يفطرون كل الرجال ومعهم رجال من الديره يفطرون مع الشيخ وكانوا يسولفون عن زواج الشيخ جواد الي ما بقى له الا يومين! 
وصقر يناظر جواد الي يفطر وهو ساكت ولا تكلم بشي.

كان الشيخ هزاع يضحك ويسولف مع فاهد وفراس يده مربوطه وعليها شاش ابيض ويناظره بحقد وكره وهو ملاحظ نظرات فراس له ومع ذلك يضغطه ويسولف عن ولده مع الشيخ هزاع وكأنه يقهر فراس!! 
وقف جواد وقال: الحمد لله...
الشيخ جراح رفع راسه: كمل فطورك يا معرسنا!
ابتسم جواد مجامله وقال: كثر خيرك يا شيخ جراح مير والله اني شبعت بنهج اشوف أهل الديره وش ناقصهم! 
ابتسم الشيخ جراح وأومئ
وقف صقر وقال: خذني معك أجل
جواد اومئ وطلعوا الأثنين...
جواد بهمس: وش تبي ناشب لي بنهج اشوفها!
صقر ضحك: ماعليك بغطي عليك! 
جواد اومئ
صقر عقد حواجبه: وراه جيبك دايم منتفخ!!؟ 
ضحك جواد وطلع الدميه ومدها. لصقر!
صقر ضحك: منها؟
جواد تنهد: الله الله
صقر: الله يهديك بس الله يهديك
اخذها جواد ورجعها لجيبه: وياك..
صق وهم يطلعون من الحوش: وش رايك نروح لمسفر ودي ازوره!
جواد: زين أجل بنروح له قبل!
صقر ناظر الديره وهو مبتسم وراح مع جواد لجهة بيت ابو مسفر.....

جواد تنهد: والله اني احترم هالمسفر احترام بالذات بعد ما طلع ملاك من النار!..
ابتسم صقر: اي والله انك صادق انه رجال كفو!
جواد:  ودي اجازيـه مير مدري وش اهديه!
صقر: انا اقول خلك لا تجازيه ولا شي بتثير حولك الشبهات! 

جواد اومئ وهو يكمل طريقه....
فزوا بخوف الأثنين على صراخ التفت جواد بخوف: وش هالصوت!
صقر وهو مرتاع: مدري جاي من آخر الديره!
ركـض جواد بسرعه وهو بيروح لمصدر الصوت وصل وكانوا رجال الشيخ جايين وهم يصارخون قال بخوف: علااااامكم!!!  وش صاااير؟؟
واحد منهم وهو يلهث: يااااشيخ المخزن الشمالي انحرق يا شيخ كل معونه الزواج فيه يا شيخ احنا في وجهك الشيخ جراح بيذبحنا!!! 

جواد بصدمه: وش تقول انت!!!!  شلون انحرق متى صار كذا!.
الرجال: الحين يا شيخ الحين والمشكله يا شيخ المخزن الثاني كله غاز يا شيخ بينفجر اذا ما لحقنا

فتح عيونه بصدمه وصقر صرخ: حنا عندنا طفايات بسياراتنا!!!
جواد بأستعجال: اروووج  يا صقر اروووج تكفى
بتنفجر الديره بالي فيها! 

رفع ثوبه وعضه وصار يركض بكل سرعته للسيارات فتحها وطلع طفايات الحريق ووزعها وهم ركضوا بسرعه للمخزن  والرجال كلهم طلعوا من المجلس على الصراخ وكلهم عرفوا بالي صار وطلع الشيخ جراح وهي واصله  معه ويصارخ بكل صوته بتهديد...

كانوا عيال الشيخ كلهم يركضون للحريق يطفونه والناس تصارخ عليهم يعودون لا ينفجر المخزن الثاني ولكن كانت الفزعه عندهم مغطيه اي خوف عندهم كل واحد رافع ثوبه وعاصب على راسه ويطفي من جهه  والشيخ جراح واقف بحيره وهو بينفجر في أي لحظه

جواد بصراخ:  يااا حــــــــمد طف الجهه الثانيه ارووووج
ركض حمد وصرخ:  النار طلعت النار بتوصل لمخزن الغاز
فتح عيونه بصدمه وركض بسرعه
صرخوا كلهم: جـــــــــــــــــــــــــــــــواد

كان يركض بكل سرعته يحاول يوصل قبل النار للمخزن  ويطفيها من بدايتها وكلهم في ترقب وجلس الشيخ جراح على الأرض وهو يغمض عيونه وحيله منهد وينتظر انفجار المخزن

وقف حمد بصدمه وهو يشوف جواد يسابق النار صرخ:  اخوووو من طاع الله....طفوها  يا رجال!!!
ركض بعد اخوه وهم كل واحد وقف بمكان وبدأ يطفي النار من جهه وقف جواد على باب المخزن وهو يشوف النار تاكل كل شي ومقبله وواضح ان احد تارك قطرات بنزين لين باب المخزن!!!  ..
بدأ يطفيها قبل توصل وهو يتشهد!  .

وحمد يطفيها من الوسط...
وبعد عناء  طفت النار كامله وجواد طاح على الأرض وهو يرجـــــــــف  زفر براحه: الحمد لله...

الحين طفت وقف وناظر حواليه بعصبيه وهو يحاول يدور اي أثر!! 
وصل الشيخ جراح والي معه وهم يتوزعون ناس راحت للجبل وبعض الرجال توزعوا في الديره يدورون أثر للي احرق المخزن!..
وناوي يفجر الديره كامل..
جواد بعصبيه: من هو ابي اعرف منهو!!! 
فاهد بعصبيه: والله ان اذبـحه بيدي! 
حمد: انا بنهج الجبل متوكد انه راح منه!

جواد: وانا معك!
راح جواد ومعه حمد وهم يتوعدون ويدورون اي اثر

صقر التفت لأعمامه الي يحللون الموضوع وكل واحد يحاول يبحث عن اثر بس مافيه أي اثر!!! 

الشيخ جراح بحده:  عودوا يا ضيوف الرحمن عودوا الشيوخ بيطلعون الفاعل.
جد صقر: هذا ماعد به عقل يبي يفجر الديره!؟
الشيخ جراح بحده: والله ان يعض اصابع الندم والله!  ...
الشيخ هزاع وهو يناظر المخزن المتفحم مسك ذراع الشيخ جراح: خلنا نعوّد خلنا نعوّد!
الشيخ جراح: والله انها طالت طااالت يا شيخ هزاع!
فراس ابتسم بشماته وفي نفسه شمتااان فيهم اي بالله شمتان وبالذات في فاهد!  ...
______..

"غيداء" 
جالسه بملل في الصاله ودها تطلع بعد ما سمعت الصراخ تبي تشوف وش صاير ناظرت الكل منشغل وينتظرون دخول سماهر تعلمهم وش صار وقفت بسرعه وهي تستغل انشغالهم وركضت بسرعه رايحه للعنود  وبعد مده وصلت عند الباب فتحته بسرعه ودخلت: عنود... عنود بنت!!
تقدمت بأستغراب وجلست عندها: يا برودة دمك نايمه!!... عنود اصحي علميني وش صار؟  بنت اصحي قبل احد يجي فهميني وش كنتي تبين تقولين لي!؟.. العنود؟؟
اوف علامها ذي " بدت تهزها على الخفيف" عنود بنت!!

وقفت واخذت المويه وبدت تمسح على وجهها على الخفيف لكن ما من مجيب تنهدت بحزن:  الله يا خذك وش سويت فيها؟
تنهدت وجلست بأحباط وهي تناظرها مدت يدها تتحسس نبضها كان منتضم: اووف ياربي وش سوا هالسفاح فيها؟
تنهدت وهي تسند ذقنها على يديها وتفكر وش تسوي عضت شفتها بتفكير وفزت بسرعه وشهقت وهي خطرت لها فكره ركضت بكل سرعتها راجعه للغرفه الي قاعدين فيها وصلت بسرعه وفتحت الباب ودخلت وهي تروح للشنط بسرعه وتفتحهم بكل استعجال طلعت كل الميكب اخذت الأسفنجه تبع الميك آب  ونكشت الأغراض تدور على ولاعه؟  مير ماشافت شي طلعت تركض بسرعه من الغرفه وفي يدها الأسفنجه الصغيره...
راحت للصاله شافت سماهر واقفه وتشرح لهم الي صار ما اهتمت وركضت للمطبخ بدون ما ينتبه لها احد بدت تدور على ولاعه لين شافت وحده ابتسمت بفرحه واخذتها وطلعت تركض راجعه لغرفة العنود!  ...

بدت تمشي بين الأسياب بكل سرعتها وهي تحاول توصل قبل يجي فاهد او أي احد وصلت اخيراً ودخلت للغرفه تنهدت براحه واخذت المفتاح بسرعه من على الباب ودخلت وهي تطلع الولاعه وبدت تحمي المفتاح  ابتسمت بفخر لنفسها وتركت الفتاح على الأسفنجه لين انطبع عليها بدت تنفخ عليه يبرد ورجعته على الباب ناظرت الأسفنجه  ابتسمت وهي تشوفه انحفر عليها: هذي الخطوه الأولى تمت اجل باقي الخطوه الثانيه وهي اوصل لصاحب مفاتيح يقص لي واحد...
طلعت تركض من الغرفه وهي تفكر كيف توصل!؟

دخلت الغرفه وطلعت شنطتها ودخلت فيها الأسفنجه بجنب لابتوبها وشواحنها واغراضها سكرتها وابتسمت: استودعتك الله!
.....
طلعت من الغرفه ونزلت للصاله وهي تجلس معهم وهي تسمع سوالفهم عن الحريق الي صار وسمعت منهم ان هالحريق يتكرر من اربع سنوات!! 
ابتسمت بحماس وبهمس:  يااااربي يا هالديره ديرة احلامي كلها اكشن في اكشن
صارت تسمع لهم بكل اهتمام وهي مركزه على ابسط التفاصيل!  ....
________...

نزل من الجبل وهو معصب الجبل  كله مافيه اي أثر! 
جواد: حمد!  مكان الكهف ذاك ما رحنا له!
حمد بخوف: اعوذ بالله من الشيطان الرجيم بسم الله الرحمن الرحيم الله لا قاله نروح له!
جواد بعصبيه: يمكن انه هناك!
حمد بخوف: جواد لا تستهبل ما من حد  يروح هناك؟!
جواد شد على يده بقهر وهو يكمل طريقه راجع للديره وهو يفكر وش السوات الحين!.

حمد شاف فاهد واخوانه الباقين يجتمعون وكلهم ما شافوا اثر!!
جواد بقهر: شلون؟؟؟
فاهد بعصبيه: والله ان يندم والله!

اجتمعوا رجال الديره كلهم وهم يخططون مع الشيوخ وما استسلموا بدوا يبحثون مره ثانيه عن الفاعل!  ...
وكلهم توزعوا على الديره كاملة يبحثوا عن اي اثر يدلهم على الفاعل!  ...

______
"غيداء"
وقفت بحماس وهي تقول:  ااا.. انا بروح انام شوي احس ان بطني توجعني.
ركضت قبل تسمع منهم رد ودخلت الغرفه وركضت للدريشه فتحتها وهي تناظر للحوش ابتسمت بخقه وهي تشوف عيال الشيخ يدخلون كلهم للحوش وصقر بينهم: بسم الله وش ذا الزين كله  وخّر يا صقر من بينهم الله يهداك كنك حبة الهيل بين الرز!  ..

شافت هادي يدخل: ووع جاكم شين الحلايا!  ابو اذاني كبار "غطت فمها"  اوبسي بسم الله اسكتي لا يسمعك هو وأذانيه كنها لادار!.

شافت ملامحهم كلهم معصبين: اوف اوف معصبين!
قفلت الدريشه لـــــكن لحظه!! فتحتها بسرعه وشهقت وهي تشوف شخص ملثم فوق بيت من بيوت الديره ويصب بنزين!!!!!!   صرخت برعب واخذت عبايتها وطلعت تركض وهي تصرخ...
فزوا كل الحريم: وش فيييه!!
طلعت من عندهم بسرعه وهي تصرخ وصارت في الحوش صرخت: صققرررررر جووووواددد...
طلعوا بخوف كلهم: وش فيـــــــه!؟؟
غيداء تأشر وهي تناقز: شفتتته شفتتته بيحرق بيت الحين شفتته!!! 

فتح عيونه بصدمه: منهــــــو؟؟
غيداء وهي ترجف: واحد متلثم فوق سطح بيت وقاعد يصب بنزين على البيت!  ...

ركضوا كلهم وهم يبون يمسكونه وغيداء تصارخ بحماس وتعلمهم وين شافته وهي تركض وراهم!!! 
ركض جواد بكل سرعته وهو ناوي عليه!  نط من على واحد من الجدران المهتريه وراح للجهه الثانيه والباقين توزعوا كلهم يحيطون بالبيوت وهم ناوين عليـــه...
لف هادي وشافها تركض وراهم صرخ: وين رايحه انتي؟؟  عودي للبيت!
غيداء: مالك شغل وخر!
هادي بعصبيه: قلت عودي يا بنت قبل العن خيرك ماحنا رايحين نلعب!
غيداء بعصبيه: تراني الي شفته وخر مالك شغل!
هادي بعصبيه: والله ان اضربك ان ما تركتي عنك الفرعنه ورجعتي للبيت!
غيداء تخصرت: كانك رجال مد يدك! 
هادي بعصبيه مسكها من عبايتها بيرجعها سمعوا صراخ: اقضبــــــــــــه يا هااادي!!!!
رفع راسه وشهق من الي تخطاهم وهو يركض بكل سرعه مثل لمح البصر!!!!  ومتلثم وما يبان منه شي
صرخت غيداء: شفــــــــــت يالملعون شفت هرب!!! 
فاهد بعصبيه دف هادي لين طاح على الأرض وهم يركضون خلف الي يركض بكل سرعه طالع من الديره واهل الديره من الصدمه واقفين يراقبون!!! 

وقف هادي وبعصبيه ضربها على راسها وركض وراهم وغيداء صرخت بعصبيه:  الله ياخذك إن شاء يقتلك!!! 

جلست على دكة واحد من البيوت  وهي تناظر أهل الديره الي أخيراً استوعبوا وصاروا يركضون خلف الشيوخ وصقر وراكان الي يلاحقون الهارب! الي مايدرون وين راح من مفترق الديره اختفى!   ...

عضت يدها وهي معصبه من هادي الحيوان! 
وقفت  وتلفتت وشهقت وهي تشوف الرجال المتلثم على واحد من البيوت مره ثانيه!! صرخت بكل صوتها برعب: هــــــــــــــــذا هوووووووو! 

وماهي الا ثواني واشتعلت النار مرة ثانيــــه!  ...

ركضت بكل سرعتها بتشوف وينه!  ولكن من كثر النار ما عاد شافته أبداً وكأنه ملخ وذاب.!!

وصلوا الشيوخ ووقفوا وهم مصدومين وهم يشوفون النار تاكل بيوت الشيخ جراح الجدد!!! 

صرخ جواد بكل صوته: مــــــــلاك ومزنه في البيت!!!!

ركضوا كلهم وهم ياخذون بعض الطفايات ويحاولون يدخلون لبيت مزنه! 
وجواد يصارخ بكل صوته يبيهم يساعودنه وجن جنونه وهو يسمع صراخ مزنه وملاك!!! 

صقر وهو يطفي النار انتبه لأخته الي واقفه بصدمه وعبايتها مفتوحه وشعرها طالع قال بخوف عليها: غيداء وخرررري عن الناررر!!!  

هادي انتبه لها وركض بسرعه سحبها وهو يوخرها عن النار ورجع يساعدهم يطفون النار
ركض جواد وقلبه شوي ويوقف على ملاك خايف يصيبها شي!... تملكته رجفه  قويه: صقررر طف الباب خل ادخل!! 
صقر بصراخ عشان يسمعه: البيوت الثانيه فيها احد!؟
جواد: لااا ما فيها احد بس هذاا

كلهم كانوا حول بيت مزنه يطفونه ودخل جواد وهو يناديهم بصراخ وخوف: مـــــــــلاااااك.... ملااااااك..
كان الحوش اسود دخل للبيت بسرعه وهو يدف الباب بقوه ودخل  لوحده من الغرف وقال بلهفه: ملااااك!! 
رفعت راسها وهي تبكي بخوف فتحت يدينها بخوف وهي مو قادره توقف...
ركض لها بسرعه وسحبها لحضنه وهو يضمها بكل قوته..
دخل حمد وعيال الشيخ كلهم وقف بصدمه وهو يشوف جواد!!!!!! 
بلع ريقه وقال بحده: جوواد!؟؟
ابتعد عنها بسرعه ووقف: وين مزنه!
دخلوا للمجلس الصغير وكانت طايحه على الأرض ركضوا لها وهم يطلعونها بمساعدة صقر الي يشوف وضعها وملاك تبكي بخوف: يمه مزنه!
راح لها جواد وجلس عندها وهو يمسح على وجهها ويناظرها يتمطن انها بخير  ولا صا بها شيي
خاف عليها من ريحة البنزين الي معبيه المكان سحبها معه وهو يضمها لصدره ويبوس راسها بخوف: الحمد لله الحمدلله خفت عليك خفت يا بنت قلبي خفت!
ملاك كانت ترجف وتبكي بشكل يوجع القلب من الخوف والرعب الي صار.!
طلعها من البيت وشاف حمد واقف على الباب وعيونها كلها شرار سحب جواد من يده بسرعه وقال: وخر عن البــــــــــنت!!! 
التفت لها بعصبيه: وانتي روحي للحريم!
جواد بعصبيه دفه: لا تصارخ عليها البنت خايفه
حمد بعصبيه: وانت وش دخلك يا جواد؟؟؟؟ 
ملاك طاحت على الأرض وهي تغطي اذانها وتصرخ بخوف وتبكي.
جواد بغيض دف حمد وقال بعصبيه:  لا تتدخل في البنت يا حمـد..
نزل لمستواها وسحبها من يدها ويغطيها بشماغه ويسحبها معه رايح لبيتهم والحريم خذوا مزنه للطبيب والعيال يطفون النار الباقيه!  وحمد عروقه صارت بارزه من العصبيه وهو يطفي النار معهم وعينه على جواد الي يجر ملاك خلفه بفستانها الأسود وشماغه على راسها وتمشي معاه بخطوات ثقيله!  وغير متزنه! 

اختفوا من امامه ودخلوا للحوش على طلعة الشيخ جراح والي معه صرخ: يا سووواد وجيهكم ما قضبتووه!!! 
جواد خلاها ورا ضهره وقال بعصبيه:  مدري وين راح والله ان موته على يدي والله!!!
الشيخ جراح انتبه للي خلفه: وش صااااير!؟؟
جواد وهو يتنفس بسرعه والعصبيه واصله عنده اخرها ويحس بضلوعه تنحرق:  احررقوا كل بيوتك يا شيخ وبيت مزنه من ضمنهم!!
الشيخ جراح بصدمه:  كل البيوووت!!؟؟
جواد هز راسه وسحب ملاك ومشى عنهم وهو معصب وقلبه شوي ويوقف للحين يتخيل لو انه تأخر عنها شوي كان انحرقت! 
دخل من باب البيت وهو ينادي عليهم يتغطون!  وفي يده ملاك الي طاح الشماغ من عليها على باب البيت ودخل وهي تناظر كل الحريم الواقفات..
صرخت غرور بأستنكار: جــــــــــواد!!!!
جواد ناظرها وشكله يخوف من العصبيه وثوبه كله رماد: هذي ملاك امانه عندكم اقسم بمن احل القسم لو يصيبها شي منكم ان تندمون كلكم... ادخلي ياملاك!!.

بكت بخوف من نظراتهم ورجعت وراه وهي تمسك يده بخوف!

غيداء صارت تبكي معها!
جواد رفع راسه وانتبه على غيداء:  اخت صقر!!.
رفعت راسها وهزت راسها: غيداء!
جواد: غيداء خذي ملاك عندك لين نشوف وش صار لجدتها خليها عندك!
غيداء هزت راسها وقربت.
وملاك صرخت بخوف وضمت جواد من وراه وهي تبكي:  ابييي يمه مزنه ابيييها!!
تسارعت نبضات قلبه والتفت لها وهو يوخر يدها من حوله: يمه مزنه بخير بخير لا تخافين ادخلي عندهم لين اجيبها لك..
ملاك كانت تبكي بأنهيار ومتشبثه فيه: ابيييي امييي مزنه اببيييها
جواد بحده: ملااااك  ناظريني!!!
ملاك كانت في حالة خوف لا طبيعيه وتضرب وجهها وتنادي مزنه طاحت على الأرض وغيداء وقفت بخوف وهي تبكي وكلهم يناظرونها بصمت!
جواد غمض عيونه وهو يشوف وضعها نزل لمستواها وفي لحظه رفعها وشالها بين يديه وهو يدخل للبيت وهي بين يديه ويصعد الدرج وهي بين يديه تبكي وتصارخ تبي مزنه!  غرور لحقت وراهم وهي بتنفجر من العصبيه..
وهي تشوف جواد يوصل غرفته ويفتحها ويدخل ملاك ويتركها على السرير وهي تصارخ وترافس وتصرخ بكل صوتها تنادي مزنه ثبتها على السرير بيديه وهو يناديها تناظره لكنها تضرب راسها على السرير وتنادي مزنه وعروق نحرها صاروا واضحين كثر ما تصرخ ووجهها احمر: ملااااك ناظــــــريني!!!
غرور بعصبيه: طلعهااا ياااجواد طلعهااا
جواد بعصبيه: اطلعي يمممه من الغرفه..
ملاك تحاول توخره عنها وهي في حاله هستيريه من الصراخ ووجهها بدأ ينخنق:  يــــــــــــمه مـــــــــزنه..يممممــــــــه
جواد بصراخ: ناااظريني ياااا ملااكك مززنه بخير ناظريني!!!

ملاك بدت ترفع راسها وتضربه على السرير لين صار شعرها مغطي وجهها وهي تنادي مزنه! 
غرور وهي واقفه على الباب: طلعهاااا يا جواد طلع ذي المهبووله من البيت طلعها!!!!
جواد التفت لها بنظرات حااده وهو يحاول يقاوم حركة ملاك! 
غرور بعصبيه:  طلعها عساها للموت وش دخلك ببنت الهنــــــوف!!!؟؟؟
وقف خلف بعصبيه وصرخ: قلـــــــــت اطلعي من الغرفه يمه اطـــــــــلعي..
غرور بعصبيه وهي تشوف ملاك توقف بتطلع من الغرفه راحت لها وسحبتها من شعرها: اطلـــــــعي الله يا خذ روحك مثل ما اخذ روح امك وابوك..
جواد فتح عيونه وهو يشوف امه وش تسوي راح لها بسرعه ودفها عن ملاك بقوه لين ارتدت على وراها وسحبها من يدها وصرخ بعصبيه وهو يطلعها من الغرفه: حـــــــــــرام عليك يمه ماعد بقلبك رحمه؟؟؟؟؟
غرور بعصبيه: اقسم بالله ان ما طلعتها يا جواد لأذبـ.

صفق الباب بقوه وقفله ولف لملاك الي تبكي على الأرض متجاهل الصفق الي على الباب..
راح لملاك وهو يسحبها لحضنه ويضمها بقوه يهديها ويهمس بأذنها: اهدي يا روح جواد اهدي يا عيون جواد اهدي والله ما يمسك ضر وانا معك اهدي اهدي يابعد ناسي وهلي اهدي.. بسم الله عليك اهدي
كان يشدها له يقيد حركتها ويهمس بأذنها لجل تهدئ  ... لين حس فيها تسكن بين يديه وراسها على كتفه وهو ضام لها ومحاوطها ويسمي عليها ويهمس لها بكلمات تهديها!  ....
: اهدي لا تخافين ناظريني كل شي بخير مافيه صوت أبداً مافيه حريق مافيه خوف ناظريني في جواد ناظريني...
ثبت وجهها قدام وجهه وهو يقول بحده: مافي الا جواد مافيه حريق ما فيه شي يخوف..
كانت عيونها عليه بتيه وهي ترتجف بخوف نزل نظره ليدها شبك كفه بكفها البارده ومسح على وجهها بيده الثانيه وقال بأبتسامه وهو يحاول يسيطر على انفعالها: افا افا ليه خايفه وانا عندك انا البطل جواد!  .. وأي شرير يبي يقرب مننا انا بذبحه والله ما يمس منك شعره...
كان يشوف نظراتها! تناظره بضياع!  .. بلع ريقه وقال وهو يحاول بقدر المستطاع انه ينسيها الرعب الي عاشته! ابتسم وقال   : ملاكــــي!  ... بنت قلبي!  ناظري هذي غرفتي!  "قرب منها وهمس"  غرفتي انا وياك! 
"ابتسم بحنان"  بنخليها كلها العاب هناك ناظري وهنا وهناك عند السرير!  ... ونكون نلعب انا وانتي وهناك ناظري بخليه كله حلاوى لي ولك بتعطيني ولا بتصيرين طماعه؟
اهتزت شفتها وعرف انها بتبكي
ميل راسه وقال برجفه: ملاك!  تكفين!؟ 
حس فيها ترتمي بحضنه وتبكي بنحيب!
شد عليها وهو يحس بنار في صدره يحس مشاعره كلها تهيضت وضلوعه ذابت بين يديها!  ...
يحس ان الأكسجين اختفى من حولهم ولا عد يحس بشي ولا يسمع اي صوت غير صوت ضربات قلبه الي تدق بسرعه جنونيه يحس فيها تشد عليه وتبكي وتدفن وجهها بنحره وتبكي يحس بدموعها تبلل نحره...
تكهرب كل جسده وهو يغمض عيونه وهو يتمنى في هذي اللحظه الزمن يتوقف يتمنى هاللحظه ما تنتهي يتمنى ان الي يصير الحين ما ينتهي!!  ..

يسمع تمتمتها مير مايفقه هي وش تقول مايدري وش تتمتم فيه شهقاتها تشرح الخوف الي في قلبها والرعب الي عاشته!  ..
وخرها عنه وهو يبي يناظر وجهها ابتعدت عنه وهي تنزل راسها وشهقاتها تحاول تكتمها بلع ريقه اكثر من مره وهو يحس بشي في صدره يتحرك!  شعور غريييب غريب يحرق جوفه!  يشوف وجهها!  .. ودموعها على خدودها  رموشها صارت ملتصقه بسبب الدموع!  رفع راسها بيده وهو يناظر وجهها زين بيتأكد ان هذا وجهها!!  قال ببحه:  ملاك!  .. وش سويتي فيني؟

سحبها لحضنه وهو يستنشق شعرها بلهفه بحب كبيير وعميق غزا قلبه واستحله....
:  والله ماتكونين لغيري! 

سمع الباب يندق بقوه وصوت حمد يصرخ بعصبيه: جووواد افتـــــــح الباب!
ابتعد عنها وحملها بين يديه وتوجه للسرير وهو يتركها عليه ويغطيها وهي دفنت وجهها بالمخده وتبكي بصمت غطاها زين وراح للباب وفتحه وشاف حمد بوجهه وهو معصب وسحبه من ياقته وطلعه برا الغرفه: ليييه  جااايبها هنا ياجووواد؟؟
جواد وخر يد حمد وهو للحين مقيد تحت شعوره بقربها وقال بهدوء:  لا حد يفتح خلوها ترتاح
حمد بعصبيه: جواد لا تستهبل!!! طلعها لجدتها!
جواد ناظره ببرود ونظرات غريبه..
حمد ناظره بتساؤل وخوف
جواد تنهد وراح عنه وابتعد عن الباب وحمد ناظره وهو واقف بصدمه من تجاهله له!  
طلع من السيب كامل ونزل للصاله وحمد نزل وراه وهو يسرع بخطواته... سمعه يقول ببرود:  ان شفت وحده منكم مقربه صوب باب غرفتي كسرت رجولها!
طلع ببرود من البيت وحمد يناظره بحده.. وطلع وراه
وهو معصب...
لفت بسرعه وهي ترجف ويدها على صدرها وبهمس: بسم الله هديل وش فيك؟
رفعت راسها وناظرت ضهره وهو يطلع من البيت دقات قلبها متسارعه!  توترت وجلست على الكنب وهي توخر النقاب عن وجهها..
آمال انتبهت لها: بسم الله هديل وش فيك؟
هديل هزت راسها بالرفض: مافيني شي مدري انخنقت من النقاب!
آمال مدت لها المويه وهي تناظر الشيخه فهده معصبه وتتوعد في ملاك! 

ام صقر بتوتر: بنات روحوا للغرفه.
ام العنود جت عندهم وبهمس: لا تواخذينا يا خيه مير مشاكل هالديره ما تخلص
ام صقر بأحراج: والله اننا منحرجين من جيتنا لكم بذي المشاكل..
ام العنود بهدوء: معليه قصصهم طويله وانا اختك خل نروح للغرفه نرتاح وبعلمكم بسالفة البنت ذي!.
غيداء طلعت معهم بسرعه وهي تبي تعرف السالفه اما فهده وغرور كانوا معصبات ومشاعل اكثر وهم يفكرون.. في ملاك!

______...

"في المجلس" 
الكل ساكن وساكت من بعد الفوضى الي صارت وثيابهم صارت معبيه رماد واشكالهم مبهذلـه!  وحالتهم يرثى لها  كلهم!  ...
الشيخ جراح بهدوء: علامها مزنه!؟
عزام: يقول الطبيب كانت بتنخنق مير الحمد لله لحقوا عليها
الشيخ جراح: وش حالها الحين؟
عزام: بخير يا شيخ
جواد وهو يهز رجله وبحده وهو يشوف برود الشيخ : غريبه هذي المره الثانيه الي ينحرق بيت مزنه بالذات!؟
الشيخ جراح بعصبيه من تلميحات جواد :  من يبي يحرق مزنه؟؟ ليه منهي لجل يحرقونها!!
جواد صد بوجهه: مدري!
الشيخ جراح شد على عصاه وقال:  من اليوم مزنه وبنتها بيقعدون  في بيتي في بيت الشيخ جراح!
رفع راسه وتسارعت نبضات قلبه وحس بسعاده غريبه تسكن جوفه!  ..
لا شعورياً ابتسـم وحمد انتبه عليه وشد على يده وهو مستنكر وضع جواد وماهو جايزن له أبداً! 

ابتسم صقر بخفه وهو يشوف جواد كيف مبتسم ومنزل راسه همس: والله زانت لك يا جواد بتصير قدام عيونك على طول...
جواد كان يحرك الخاتم الي بيده وهو مبتسم ومتناسي كـــــــــل شي صار وكل الي يصير وما يفكر الا في ان ملاك بتنام في نفس البيت الي هو ينام فيه...
الله وش كثر الحب يبهذل الحال.... وش الوضع الي هم فيه ووش الوضع الي يفكر فيه! 
وقف وهو يقول: بيض الله وجهك يا شيخ جراح كذا ابن ابوه الي يقرب منهم!
الشيخ جراح بعصبيه مكتومه: ماحد يبي مزنه هم يبون كل شي يخص الشيخ من بيوت ومخازن...
جواد اومئ وهو مو حوله طلع من المجلس وصار يمشي في حوش البيت وطلع منه وصار يمشي في الديره وهو يتذكر انها الحين في فراشه نايمه!  وقبل شوي في حضنه!  صار يمشي في الشارع وعلى وجهه ابتسامه هادئه حالمه... حس بأحد يمشي بجنبه رفع راسه وضحك بخفه وهو يشوف صقر مبتسم ويمشي معه بصمت...

جواد بهدوء: تدري وش مشكلتي يا صقر؟ 

أطمح وأبالغ وأرسم أحلام وأطير..
ما للأماني حد على حد علمي
دايم طموحي .. غير لأني أنا غير
ويارب تعطيني على قد حلمي .

صقر ابتسم بحب اخوي: الله يعطيك على قد حلمك يا اخوي...
ابتسم وهو يرفع راسه للسماء وبهمس: كل الي صار اليوم خيره! 

_انتهاء
_رأيكم؟

تقدرون تقولوا من هنا نبدأ الحماس الصدق!