ولا زلت في حبل الغرام اتجوّد!. الفصل الحادي عشر 11 - بقلم الرنيد

مافيه طاري يمر القلب ما جابك
كل الطواري تمـر وأنت سيدها

على الظهر
كان مسفر واقف على باب دكانته بيقفلها وينهج يصلي حس بشي يرتمي عند رجوله رفع راسه واستغرب وعرفها على طول بنت ابو صلاح
ود بحده: هالكلام مب عندي احترم نفسك ولا والي خلقك لودي الورقه للشيخ وهو يربيك.!
مسفر بصدمه: علامك يا بنت!
ود بقهر: واحد بلا تربيه فعلاً
مسفر فتح عيونه على الأخر: اعقبي وش الهرج!!
ود بعصبيه: جعلها للكسر رجلي ان دخلت هالدكان مرةً ثانيه
لفت عنه وراحت تمشي بخطوات سريعه معصبه
نزل للكيس وهو مصدوم من كلامها كل هالكلام عشان رجع لها فستانها!؟ : بالطقاق الي يطقك انتي وابوك افعل خير تلاقي شر...

رفع الكيس ودخل لداخل فتح الكيس وطلع الفستان وفتح عيونه بصدمه وهو يشوف فستان ملاك معه غمض عيونه: الله ياخذك ياراجح
نفض الفستان وعلقه وطلع الفستان الثانيه وعلقه هو بعد ورمى الكيس وطلع من الدكان وقفله وتوجه للمسجد وهو مستنكر ردة فعلها ليه تسوي كذا وش سوا لها غير انه رجع لها فستانها يمكن انها انزعجت عشان جاب فستان ثاني معه
تنهد وهو يدخل للمسجد يصلي الظهر وكان المسجد قليل الحاضرين فيه لأن اغلبيه اهل الديره مع الشيخ جراح من ضمن الجاهه!.

بدأ يصلي الظهر مع الموجودين ...

وماهي الا دقايق وسمعوا صراخ الحريم مالي الديره
وهم يصيحون ويستنجدون بالرجال الموجودين

: الحقووووو عليـــــــــــنا الحـقوووووو

طلعوا الرجال مسرعين قاطعين للصلاة والخوف ماليهم وشهقوا وهم يشوفون النار معبية الديره
امتلت قلوبهم رعب وبسرعه ركضوا مهرولين يجيبون المويه والي يطفي النار والي يركض يطلع الحريم الي في البيت قبل ينحرقون وكل هذا صار بلمح البصر ماحد يعرف من الي احرق ومن الفاعل
صرخ مسفر بخوف وهو يشوف بيت مزنه ينحرق: مــــــــــــلااااااااااااك خالــــــــــتي مزنه تعالوا ساعدوني نطلعهم من البيت...

ركضوا الرجال وهم ينقسمون ثلاث اقسام الي يطفي النار والي ركض لبيت الشيخ قبل احد يحرقه والي ركض مع مسفر يطلعون مزنه وبنتها

وصلوا للبيت وكانت النار تاكل الباب والجدران وما يقدرون يدخلون صرخ مسفر: خااااله مزنه تسمعيني يااااخاله.!!!
سمع صراخ جاي من وراه التفت وشاف مزنه تركض وهي تبكي بأعلى صوتها: بنيــــــــتي في البيت لحالها بنيتي في البيت
بدت تضرب وجهها بنحيب ومسفر جمد الدم بعروقه من الخوف وصرخ: شلوون في البيت لحالها شلووون

مزنه تضرب وجهها: الشيخ جراح ارسل علي سماهر انهج اساعد الحريم الصباح ورحت وتركت ملاك هنا مير مدري انه بيصيبها شي اااااه يا بنتيتي وووواه يا بري حالي عليك يا ملاك ااااخ ياربي بنتي انحرقت في البيت اااااخ ياربي
مسفر بدت دموعه تنزل وهو يصرخ: سااعدوني ندخل لها!!!

بدو الرجال يطفون النار لكن بدون فايده صرخ مسفر بقهر وعجز وسحب وحده من البطانيات الي يطفون فيها النار لفها عليه ودخل بين النار وهم يصرخون عليه: ولـــــــــد لا تتهور مســــــــــفر

دخل بين النار وهو يصارخ باسم ملاك: ملااااك انتي هنا ملااك!
...
سمع صوت مكتوم من داخل البيت وكان بعيد عن النار شوي دخل بسرعه وهو يحس بحروق في رجوله دخل وشهق وهو يشوفها مرميه على الأرض وتأن بوجع وفي يديها حروق خفيفه ورجولها ركض لها بسرعه وسحبها لحضنه وهو يحس انهم ينخنقون بسبب النار الي كل مالها تقرب: ملاك ملاك ناظريني ملاك
رفعت راسها وهي تناظره بدون وعي ودموعها تنزل وقلبها يوجعها حيل من الكتمه الي تحس فيها بسبب النار
مسفر ضمها لصدره وهو يلف عليها البطانيه: تعالي معي بطلعك من الدريشه قبل توصل لها النار

ملاك ما كانت بوعيها وعيونها زايغه مو قادره تثبتها نزلت دموعه وقال بخوف: بنت ناظريني ملاك ناظريني!.
بدأ يضرب وجهها يصحيها لكن بدون فايده شاف النار دخلت للمكان الي هم فيه صرخ بوجع بسبب فواهه النار الي توجع حمل ملاك على كتفه وصرخ: تعالوا للدريشه تسمعوني!!؟؟
ماكان في رد من احد صرخ بوجع من النار الي بدت تقرب اكثر ركض بسرعه للدريشه وكسرها حاول يصعد وينط منها بس كانت بعيده ما يقدر وبدون تردد رمى ملاك منها بعيد عن النار وصارت النار قريبه منه بلع ريقه بخوف وهو يغمض عيونه ويحس ان اجله قرب وللأسف حرق بالنار!!! ..

_________

وصلوا لديرة ابو غلا ووقفت السيارات على مدخل الديره وابتسموا وهم يسمعون الرجال يشلون بصوت واحد ترحيب فيهم وفي قدومهم لهم...
: يا مرحبا ترحيبة البدو بسهيل
وعداد ما برقه يسابق ساحبه

اصطفوا الشيخ جراح وقبيلته مقابل القبيله الي أمامهم وقال جواد بصوت مرتفع: يبقيكم الله ياقبيله وافيه...
فيها من الخير كل خيري

شلوها بصوت واحد: يبقيكم الله يا قبيله وافيه.. فيها من الخير كل خيري..

قبيلة ابو غلا تقدم واحد من الرجال وقال: شيخٍ كفو وعيال شيخ ٍ وافيين... وقبيلة ما بها اية قصور...

قالوا كلهم بصوت واحد وهم يحنوها: شيخٍ كفو وعيال شيخٍ وافيين.... وقبيلة ما بها اية قصور

جواد ابتسم وتقدم ربعه: من طيبكم يا طيبين الساس
... بيضان وجه ومابكم دساس.

قبيلته بصوت واحد: من طيبكم يا طيبين الساس... بيضان وجه وما بكم دساس.

تقدم كبير قبيلة ابو غلا وقال: حياكم الله يا شيخ جراح من ملفاك لمقفاك انت والرجال النشاما..

تقدم الشيخ جراح وقال بصوت مرتفع: الله يبقيكم بيض الله وجيهكم ياررجاااال...

كبير القبيله تكلم:
يا هلا ويا مس معجونة بالمسك والبخور... هلا بالضيف من ملفاك لملقاك.
حياكم الله اقلطوا حياكم الله اذبح ياولد واجب الشيخ وجاهته...
الشيخ جراح: بيض الله وجيهكم ...

تقدم الشيخ جراح هو والي معه داخلين لبيت كبير القبيله..
وهم يسلمون على بعضهم ويرحبون وريحة القهوه ماليه المكان...

كبير القبيله قال: يا ولدي صب القهوة لضيوف الرحمن ولاقين الخير...

الشيخ جراح: الله يكثر خيركم بيض الله وجيهكم...
كبير القبيله: هلا باللي حل بمضاربنا يا زين الكرامة، الله محيّي شواربكم.. يا هلا بالضيف.
الله يقدرنا نقوم بواجبكم.
الشيخ جراح: بيض الله وجهك ابيض وجه..
كبير القبيله : يا هلا وارحب بضيوفنا ولاد الأكابر.
قدومكم علينا مثل حبات المطر وقطر الندى ملفاكم علينا..
الشيخ جراح: الله يسلم حالك ابيض وجه ...

تبسم جواد بخفه وهو يشوف الأستقبال الكبير لهم...

_______

مسفر اخذ نفس عميق وهو يصرخ: يا عيال انا هنا احد يساعدني اطلع...
صرخ بوجع من النار الي لسعت رجله حاول يصعد من الدريشه ولكن ماقدر ناظر ملاك مرميه على الأرض بلا حركه قوى نفسه ونقز وبحركه كانت كمعجزه لمسفر قدر انه ينط من الدريشه على اخر لحظه وارتطم على الأرض بقوه صرخ بوجع من رجوله الي انحرقت وصار فيها حروق
انتبهوا الرجال على الصراخ وركضوا لهم بفرحه وهم يساعدونه يوقف ومزنه جت وهي تبكي ومنهاره سحبت ملاك بصعوبه بمساعده رحمه الي كانت منهاره على ولدها خوف ورعب
بدوا الرجال يطفون البيت وبعد صعوبه قدروا يلحقوا عليه ولكن كان متضرر بشكل كبير جداً وصار اسود متفحم اثر الحريق...

نقول مسفر لبيت الطبيب الي بسرعه بدأ يداوي الحروق وكذلك ملاك الي كانت الحروق فيها خفيفه مو مثل مسفر بالغه كان صراخ مسفر المتألم مالي المكان وهو يحس رجوله يسكنهم الم مو طبيعي...

بدأو الرجال يطفون النار من البيوت القريبه من بيت مزنه وكأن الي احرق متقصد بيت مزنه!!!!

وكذلك كانوا مشددين الحراسه على بيت الشيخ وهم خايفين احد يجي يحرق بيت الشيخ!...

واهل الشيخ عرفوا بالي صار وكلهم في خوف لاحد يجي يحرق بيتهم! ...

_______

مر الوقت بسرعه وصار بعد العصر

كانوا واقفين يودعون قبيلة ابو غلا وجواد واقف بجنب الشيخ جراح بأبتسامه خفيفه وودعوهم وصعدوا للسيارات بعد ما نزلوا كل الي جابوه معهم من معونه وجهاز العروسه ...
كان الشيخ جراح مع جواد وفاهد وهم يحركون التفت لجواد بأبتسامه: بالمبارك عليك ياشيخ جواد
جواد ابتسم بهدوء : الله يبارك بعمرك يا شيخ جراح
فاهد بهدوء: الحين الشيوخ متى بيجونا
الشيخ جراح بهدوء وهو يطالع السيارات الي بعدهم من المرايه: بيبدون من باكر يجون...
فاهد اومئ: حياهم الله..

كانوا ساكتين الا من بعض الكلمات حول الزواج لين وصلوا للديره ودخلت سيارة جواد اول وحده وعلى طول جت عينه على بيت مزنه لكن فتح عيونه بصدمه ووقف السيارة فجأه وهو يشوفه اسود ومنحرك
التفت له الشيخ جراح بعصبيه: وجع علامك توقف كذا؟
جواد فتح الباب بسرعه وعيونه على البيت بصدمه وركض وهو يشوف الرجال يجتمعون حوله يعلمونه الي صار
واحد منهم: ومن بعدها دخل مسفر وطلع بنت مزنه مير والله انهم انحرقوا الأثنين
جواد كان يرجف بصدمه مو مستوعب الي انقال والي يشوفه التفت بحده لأبوه الي تقدم وقال: وش صاير هنا
جواد صر على اسنانه وهو يناظر ابوه بحده وعيون اتهام كلها شد على يده والعصبيه واضحه عليه
فهم الشيخ جراح نظرات جواد وعصب منه: جواد تعال البيت بنتكلم
جواد هز راسه بعصبيه وهو يبي يتكلم فعلاً يبي يتكلم...

كان يمشي بخطوات واضح العصبيه فيها
وهو يفكر بالحال الي وصل له ابوه اي دنائه وأي حقاره وصل لها يحرق مهبوله في البيت لحالها وهي لا حول لها ولا قوه كان الغضب معميه والخوف ماكل قلبه عليها وصل للمجلس قبل الشيخ دخل وهو يشد على شعره بعصبيه و و ده لو يذبح الحين احد ولأول مره يحس بعصبيه بهذا القدر لأول مره يحس ان وده يذبح الي وكله ابوه يحرق البيت اليوم فعلاً يحس ان وده يذبح احد صرخ بعصبيه على دخله الشيخ جراح الي صفق الباب بقوه وقال: وش نوحك تتهايق علي!!؟؟
جواد بصراخ: انت شلون تسوي كذا شلون تحرق بيتهم انت ماعد في قلبك رحمه ولا شفقه حتى على حالها انها مجنونه انت اي قسوه وصلت لها اي مرحله وصلت لها انت جلمود يبه انت ظاااالم اي قسوه تملكت قلبك حرام عليك يا شيخ حرررااام عليك
الشيخ جراح رفع يده وضربه كف بعصبيه: اعقب يااا جواد اعقب وقص يقص لسانك وش هالكلام
جواد بعصبيه قلب الطاوله وصرخ: هذااا الصدق هذا الصدق

وقف قريب من وجه ابوه ورفع اصبعه لأول مره في حياة الشيخ جراح احد يوقف هالوقفه ويهدد جواد بجنون وهو رافع اصبعه: اقسم بمن احل القسم يا شيخ جراح اقسم بمن احل القسم لو تتضرر منها شعره بسبتك والله العظيم لأانسا انك ابوي
الشيخ جراح صرخ بصدمه:جـــــــــــــــــــواد!!!!
جواد وهو يرتجف بعصبيه: ورب البيت الحرام واحد منكم يفكر يضرها مجرد تفكير لتشوفون جواد ثاني وأول من يعاديك هو انا...

مشى عنه بسرعه وخطوات تملاها العصبيه فتح الباب وطلع من الجلس وصفق الباب بقوه وطلع للحوش تارك الشيخ جراح واقف بصدمه من الكلام الي تلقاه من ولده جواد!!!!!!
فاهد بحده مسك جواد: وش الي سمعته
جواد بعصبيه دفه: طس من وجهي انت الثاني سكوتي طال يا فاهد وصمتي شكى وغصب عني صبري حكى بوقف ضدكم يا فاهد ان تجرئتوا تأذون ذي المسكينه الي لا حول لها ولا قوه في تفكيركم ووساخت افعالكم...
فاهد بصدمه: جواد!
جواد ناظرهم بحده وطلع من الحوش كله وهو معصب والشياطين راكبته..

الشيخ جراح بعصبيه: فاهـــــــــــد!!
فاهد دخل بسرعه: سم يا شيخ
الشيخ جراح بعصبيه: هالملعون تجيبونه الحين للمخزن وتربيه من جديد
فاهد: يا شيخ بنشمت العالم فينا القبايل جايه لزواجه لا تسوي كذا والله ان تصير فضيحه لنا بين العربان

الشيخ جراح بعصبيه: انا يهددني يهددني
فاهد بحده: خله علي والله ان اربيه مير خلها لبعد الزواج والله ان يندم
الشيخ جراح وهو ينتفض بعصبيه: وشف من الملعون الثاني الي احرق بيت مزنه
فاهد اومئ: ابشر لا تفكر بشي انت
الشيخ جراح بصراخ: وشلون ما افكر بشي وشلووون وولدي واقف بوجهي يهددني
فاهد بقهر وعصبيه: خله علي والله ان يندم يا شيخ
الشيخ جراح شد على يده بعصبيه وتوعد : والله اربيك يا جواد والله ان تندم والله ان تعض اصابعك ندم

فاهد زفر وهو يناظر اخوانه الي دخلوا وهم متوترين من الوضع..

طلع بخطوات عصبيه وهو يتلفت على الناس قال بعصبيه واضحه: وينه مسفر ومزنه
صويلح: يا شيخ جواد هم ببيت الطبيب
جواد بعصبيه: وبيت الطبيب فينه
صويلح بخوف: تعال يا شيخ انا ادلك
جواد مشى وراه وهو معصب والكل يناظره وهو يمشى ومن حده خطواته كان الغبار يطلع من تحت رجوله وصل على باب بيت الطبيب وصفق الباب بقوه طلع الطبيب وهو متوتر: سم يا شيخ علامك تدق كذا
جواد بحده: مزنه وينها؟
الطبيب: داخل
جواد بعصبيه صرخ: يااا مزنه الفلس مزززنه

طلعت مزنه وهي ترجف : سم يا شيخ
جواد بعصبيه ضرب الجدار: وين كنتي عنها يوم انحرق البيت
شهقت مزنه بخوف: كنت ببيتكم يا شيخ ازهب مع الشيخات للزواج
جواد بعصبيه: شلون تتركينها لحالها انتي انهبلتي ولا ماعد بك عقل انتي اي ام وين المسؤليه الي عندك؟؟ فهميني شلون تتركينها لحالها.!!
مزنه بكت: والله مدري ان البيت بينحرق والله
جواد بسخريه حاده: ماحد يدري وش الي بيصير لكن بنت بمثل وضع ملاك ما تنترك لحالها في البيت اقسم بمن احل القسم يامزنه لندمك ان سمعت انك تركتيها لحالها مره ثانيه ولا شفتك مهملتها ورب البيت لخليك تندمين...
مزنه كانت منصدمه والكل منصدم من كلامه وش دخله من هذا كله وش هالأهتمام!!.
جواد بحده: وينها فيه الحين
الطبيب بتوتر: يا شيخ ما فيها الا العافيه جروح بسيطه ما تأثر الضرر في مسفر
جواد بعصبيه: قلت وينها فيه؟!!
الطبيب اشر لداخل
تقدم جواد ودفه ودخل وهو يناديها والكل منصدم من تغير الشيخ جواد المفاجأ...
جواد بحده: ملااك..
سمع صوتها من الغرفه توجه بأستعجال للغرفه فتح الباب ودخل كانت منسدحه وأول ما شافته جلست وبكت وكأنها تشكي له وجعها بالبكاء
توجه لها بسرعه وقلبه يوجعه عليها جلس على الأرض بجنبها: وش يوجعك يا عيني وش يوجعك يابنت قلبي
ملاك وهي تبكي وتأشر على رجولها: مره توجعني

بدون وعي منه سحبها لحضنه وهو يضمها وقال برجفه: الحمد لله على سلامتك الحمد لله الي سلمك الحمد لله.

ابتعد عنها بسرعه وقال: علميني وش صار بالضبط
ملاك بخوف: مدري مدري
جواد يطمنها: علميني ياعيني علميني وش حصل شلون جت النار
ملاك ضمت نفسها بخوف وهي تبكي
جواد صر على اسنانه وقال: ملاك تكلمي الشيخ جراح الي احرق البيت؟!
ملاك هزت راسها بلا برعب
جواد بقهر: منهو اجل
ملاك بكت: مدري مدري
جواد رفع راسها وقال: ناظريني شوفي وجهي لا تخافين ماحد بيضرك علميني من الي احرق البيت انا معك ماحد بيضرك والله اني معك تكلمي
ملاك مسكت يده بخوف: لا تتركني بيحرقوني لاتتركني..

جواد شد على يدها: منهم علميني
ملاك بخوف: رجال ضربني ودخلني للبيت وصب مويه واحرقها
جواد غمض عيونه: قصدك بنزين؟
ملاك ضمت نفسها وهي تبكي
جواد بغيض وتوعد: اوصفي لي شكله كيف وجهه
ملاك كانت ترجف وتبكي وما ردت
جواد بقهرر: ملاك تكلمي علميني
ملاك بخوف: مدري مدري
دخلت مزنه وهي ترجف: لا تخوفها يا شيخ انا اسئلها
جواد بصراخ: انتي اقطعي حسك لا اسمعه..
مزنه غمضت عيونه من صراخه بخوف
وهو وقف بعصبيه وطلع من الغرفه وراسه بينفجر من الصداع الي داهمه من العصبيه وهو يتوعد في الي احرق البيت ان يوريه!..

طلع من البيت وهو يسئل اهل الديره وكل واحد يقول ما شاف كانوا في المسجد وصار كل شي بسرعه...
شد على يده وهو متوكد ان الشيخ جراح ورا الموضوع لأنه امس توعد ان يحرقها هي وابوها....
توجه لبيت مزنه دخل وهو يشوف الحوش متفحم والبيبان اخذ نفس عميق وهو يفكر في حل يطلع الفاعل..
رفع جواله ودق على صقر الي رد بسرعه: هلا جواد
جواد بجمود: صقر احتاج عشرين كاميرا مراقبه واجهزتها جبها معك بكره...
صقر عقد حواجبه: عسى ماشر عودوا يحرقون مخازنكم؟
جواد بعصبيه: احرقوا بيت مزنه وبنتها فيه
صقر بأستغراب: من مزنه
جواد غمض عيونه: الي بنتها مجنونه
صقر شهق بتفاجأ: اسئلك بالله ليه؟؟
جواد بقهر: انا بشرح لك يوم تجي مير الحين ابي الي قلت لك عليه
صقر بقلق: زين ابشر بس طمني وش صار عليها؟
جواد تنهد: الحمد لله مافيها شي صعب بس حروق بسيطه
صقر: زين ابشر بكره ان شآء الله اجيك
جواد زفر بضيق وهو يضغط على عيونه: مشكور يا صقر
صقر: ولا يهمك نعين ونعاون
جواد: بيض الله وجهك
صقر: وجهك ابيض...
جواد: استودعناك الله
صقر: في امان الله

سكر منه ونزل جواله وهو يدخل للبيت يشوفه كان فعلاً متضرر بشكل شبه كلي!
تنهد والرجفه متملكته وهو يحمد الله الي سلمها من بين كل هذا شاف بعض العابها مرميه في زاويه ونصهم منحرق توجه لهم ونزل لمستواهم وهو يرفع الي مافيهم شي وينفضهم وهو يتأملهم باس وحده منهم وقال بهمس: والله ما يمسك ضرر وانا حي انتي لي يا ملاك ومسؤليتي من ذي اللحظه وقف وهو يمشي طالع من البيت وفي يده دميتين ومشى متوجه لبيت الشيخ واهل الديره عينهم عليه وبدت الهمسات عليه تطلع بسبب اهتمامه الزايد في ملاك ومنهم من شاف الوضع شهامه فقط لا غير....
دخل حوش البيت وهو يشوف اخوانه واقفين وواضح فيه موضوع مهم بينهم ناظرهم بحده ودخل للبيت وعلى طول توجه غرفته متجاهل نداء امه له وهي خايفه عليه بعد ما عرفت من سماهر انه مسوي فوضى في اهل الديره لجل ملاك!!!

دخل غرفته وقفل الباب عليه وتوجه للتجوري دخل الدُما فيه وقفله وطلع من الغرفه ونزل بخطوات سريعه وهو شاد على يده وفي باله شي ومصمم يسويه..
طلع للحوش وتوجه للمجلس دخل بدون سلام ولا كلام وقال وهو يشوف رجال الديره عند الشيخ وواضح انهم علموه عن الي سواه شد على يده وهو يشوف نظرات ابوه الحاده له قال ببرود: كثر الله خيرك يا شيخ علمت مزنه انك قلت يجون يسكنون هنا لين يتجدد بيتهم.
اهل الديره ابتسموا وهم يشكرون الشيخ الي عينه ثابته على جواد بحده وتوعد ونظرات جواد مماثله له وهو منقهر منه بسبب فعلته!
فاهد عصب من حركة جواد الي واضح بالصريح انه يتحدى الشيخ جراح وقف وقال بحده: الشيخ جراح ما قال يجون يسكنون هنا
كلهم ناظروه وجواد صر على اسنانه
فاهد رفع حاجب: الشيخ قال يأشرون على اي بيت في الديره وينفرش لهم ويتزين لين المغرب وهذا كرم من الشيخ جراح بيض الله وجهك يا شيخ جراح ما تقصر
الشيخ جراح رفع راسه وناظر جواد بحده: وجهك ابيض يا شيخ فاهد...
جواد شد على يده: اجل انا بكمل بياض الوجه يا شيخ واطلع اختار لهم بيت من الي توك تبنيها حول بيتنا
فاهد ناظره بحده
وجواد ناظرهم بتحدي وطلع من المجلس والرجال يمدحون الشيخ جراح ويشكرونه: بيض الله وجهك يا شيخ جراح طول عمرك كريم واب للكل الله يبيض وجهك..
الشيخ جراح ويده على ذقنه بعصبيه وتوعد: مزنه حرمه مسكينه والي احرق بيتها بنطلعه اليوم قبل بكره

فاهد كان معصب من حركات جواد وتصرفاته الولدانيه ...
طلع جواد الي مسكه حمد على طول وقال: جواد ناوي على عمرك انت
جواد نفض يده: وخر يدك لو فيك خير ما تركتوه يتمادى لين هنا بسبب حبه للهنوف.
حمد برجاء: جواد طلبتك ياخوي الشيخ جراح يتوعد فيك..
جواد بقهر: خله يسوي الي يبي والله العظيم ما اسكت لها يبي يحرق مخلوقه لا حول لها ولا قوه
حمد بعصبيه: وش عرفك انه الشيخ جراح يااجواد
جواد بعصبيه اكثر: البارح كان يتوعد يحرقها يا حمد البارح
حمد بصدمه: وش تهرج انت وش تقول
جواد: الي سمعته حالف انه بيحرقها
طلع فاهد من المجلس وسمع كلامه: وليه يحرقها
جواد التفت له بسخريه: لجل الهنوف!! يقول انها تشبهها وتذكره بالي سوته فيه الهنوف وانه بيذبحها ويحرقها هي وقبر خلف!

فاهد بحده: جواد انت مستوعب الي تقوله!
جواد بعصبيه: ايه مستوعب البارح لحقته لين قبر الهنوف كان يتوعد في المسكينه ذي ويحلف انه بيحرقها...
حمد: خلونا ننهج لقبر خلف اذا كان منحرق وقتها الشيخ جراح هو السبب
فاهد بحده وتوعد: ان ما كان منحرق صدقني يا جواد ان اكسر لك ضلوعك ورفعتك لأصبعك بوجه ابوي والله ان تندم عليها
جواد مارد عليه وهو يناظره بحده
طلع فاهد بعصبيه من بيت الشيخ وحمد بعده هو وجواد وطلعوا متوجهين لقبر خلف يشوفون اذا منحرق ولا لا!!

كانوا يمشون وخلف يشرح لهم الي صار البارح ويعلمهم
وفاهد كان مصدقه لكن مو متوقع ان ابوه توصل فيه يحرق ملاك!!

طلعوا من الديره اخيراً وتقدمهم جواد وهو يمشي بخطوات سريعه يبي يوصل ويقطع الشك باليقين وصل أخيرا عند القبر ووقف وعلى وجهه صدمه وهو يشوف مجموعه زربه عليه واضح انها انحرقت قال بعصبيه: تأكدت يا فاهد
فاهد صر على اسنانه ومسح وجهه وهو يهمس: وين بتوصل يا شيخ جراح وين بتوصل!!
جواد بحده: حب الهنوف للحين معميه ويخليه يحقد حتى على الي بالقبر!! مايكفيه ذبحه والحين جاي يحرق قبره!
حمد شد على كتف جواد: جواد ابوي غلط مير تكفى لا تعاديه
جواد صرخ بقهر: لا تعاديه لا تعاديه انا ماني معاديه هذا ابووووي لكن لينن متى واحنا ساكتين له على خطاه يا حمد فهمني لين يذبحنا واحد واحد!!
فاهد بضيق: جواد الي عاشه الشيخ جراح مو سهل مير انت لا تتدخل في الموضوع خله علي انا اتصرف
جواد بقرف : لا تتصرف ولا ني تارك الموضوع لك ما انت نسخه منه يا فاهد ساجن بنت الشيخ هزاع ومعذبها لأنك تحبها!!! اي حب يا فاهد الي تتكلمون عنه انت وياه..... انتو متجردين من الأنسانيه!

فاهد شد على يده بعصبيه وهو ماسك نفسه لا ينقض على جواد وحمد يحاول يهدي الوضع بينهم ...
لين انسحب جواد وهو يمشي عنهم راجع للديره وهو يبي ياخذ لهم واحد من البيوت الي تو الشيخ بانيها ويكونون قريب من نظره اي شي يصير يكون قريب لهم مابيسمح لأبوه يأذي ملاك ولا يضرها!!! ....
لو يكلفه الي يكلفه وهذا وعد قطعه على نفسه!

_______

صقر

صقر: ها يبه وش رايك
ابو صقر ابتسم: ابد موافقين ما عندنا مانع ومنها نتعرف على الجماعه ذول
صقر بأبتسامه: والله يا ان جدي بيرتاح عندهم
ضحك ابو صقر: انا بدق على عمانك وجدك واعلمهم

صقر: اجل وانا بطلع اخذ كم غرض يبيهم جواد مني
ابو صقر: زين اطلع

ابتسم صقر وطلع من عند ابوه..

في حوش بيت ابو صقر
كانت واقفه عند الورد وتسقيهم اكثر شي تحبه في بيت عمها ابو صقر هو الورد كل ما تجي عندهم لازم تهتم بالورد وتصورهم.. سمعت صوته وراها: هديل؟
التفتت له بأبتسامه: هلا صقرر
صقر قرب يسلم عليها: من متى وانتي عندنا
هديل ضحكت: جيت قبل شوي قلت اشوف بنوتاتي قبل
ضحك صقر: زين يا اختي الجميله شوفي بنوتاتك انا طالع تبين شي معي.
هديل: وين طالع؟
صقر: بكره بنسافر لديرة خويي الي علمتكم عنه
هديل: ليه وش عندكم
صقر: زواجه وترى يمكن حتى انتو تجون لان ابوي بيدق على ابوك الحين وباقي عماني
هديل: طيب
صقر بحماس: بتشوفين الي علمتك عنها
ضحكت هديل: المهبوله؟
صقر: الله الله
هديل اومئت: زين اجل انا بدخل للبنات الحين جب لنا قهوه معك
صقر: من عيوني
هديل ابتسمت: تسلم عيونك
طلع صقر من البيت وهديل دخلت وهي مبتسمه صقر اخوها من الرضاعه هي الحين بعمر27 حنونه حنونه لأبعد درجه ممكن الواحد يتخيلها ماصار لها نصيب للحين برغم جمالها ورقتها
دخلت للبيت: السلام عليكم
صرخوا خوات صقر بفرحه: وعليكم السلام هلا هلا هلا
آمال: اخيرا جيتي عندنا وربي اشتقنا لك
هديل: حبيبتي حتى انا والله اشتقت لكم
غيداء: لنا كثير منك
هديل ضحكت: صادقه من قبل امس
غيداء ضحكت وجلست معها: حياك الله امي توها طلعت قبل شوي لجارتنا
هديل ابتسمت: زين

آمال /العمر 20 سنه مخطوبه لولد عمها راكان....
غيداء / العمر 15 سنه بنت مطفوقه ولا همها من الدنيا احد غير بطنها ومسلسلاتها الي مستحيل من سابع المستحيلات تتأخر عنهم دقيقه.... مو متحجبه...

______
كن العيون من النظر عقبك ايتام
وكنّي ماريت الا انت من يوم ريتك

وكنك معي وانا فقدتك من أعوام
مع الخيال ألقاك .. كنّي لقيتك

الشيخ جراح...
كان جالس في غرفته بعد ما طلع من المجلس وهو يفكر في الموقف الي صار اليوم معه ومع جواد حس بضيق كبير يجتاحه من اتهام جواد له ووقفته في وجهه
سرح في تفكيره ويده على جبينه وهو يفكر قال بهمس: كله منك يالهنوف كله منك ابتليت بحبك والظاهر انه ملاحقني لأخر عمري ....

________

جواد دخل لواحد من البيوت وابتسم: هذا زين

صرخ: يا عماااار عمااار
دخل عمار: سم يا شيخ
جواد ببرود: ساعتين بالكثير اشوفه جاهز مأثث
عمار هز رأسه: ابشر يا شيخ..
طلع من البيت وهو يتوجه لبيت الطبيب دخل له وشافه جالس مع مسفر الي رجوله ملفوفه: السلام عليكم
الطبيب ومسفر: وعليكم السلام حياك يا شيخ
جواد جلس وقال بهدوء: الحمد لله على سلامتك يا مسفر وبيض الله وجهك على موقفك

مسفر: الله يسلمك ما سويت شي يا شيخ هذا واجبي

جواد: شلونك الحين وش توجس
مسفر بتعب: رجولي الله يعزك توجعني
جواد بضيق: بجيب لك مرهم استخدمه زين لرجولك وبيض الله وجهك مرة ثانيه على موقفك
مسفر: وجهك ابيض يا شيخ جواد... ما عرفتوا منهو الفاعل؟
جواد مسح وجهه: للحين ندوره بس بنلقاه
مسفر بضيق: طالت يا شيخ طالت وشمخت كل مره يحرقون شي مير ذي المره تمادوا يا شيخ واحرقوا بيت المسكينه وش دخلها؟!
جواد بحده: بتصرف يا مسفر صدقني بتصرف
مسفر هز راسه: الله يطول بعمرك يا شيخ جواد
جواد: وينها مزنه الحين
الطبيب: مزنه وبنتها عند الحريم
جواد بهدوء: نادها لي ولا عليك امر
الطبيب وقف: ابشر
طلع من الغرفه وجواد تنهد وناظر مسفر: وش كان حالها يوم دخلت لها؟
مسفر بحزن: شوي وتموت من الكتمه من النار ورجولها فيها حرق بسيط شكلها كانت تبي تطلع مير ما قدرت
جواد مسح وجهه وهو ضايقه فيه الوسيعه دخلت مزنه: سم يا شيخ!
جواد ناظرها بهدوء: بعد المغرب بجيك انتي وبنتك لبيتكم الجديد
مزنه بأستغراب: بيت وش يا شيخ؟
جواد: بيت لك انتي وملاك عوض عن البيت الي انحرق لين نجدده لكم.
مزنه بكت بفرحه: بيض الله وجهك يا شيخ جواد الله يبيض وجهك يا شيخ!.
جواد ببرود: انتبهي على البنت لا يصيبها شي مرة ثانيه.
مزنه هزت رأسها بفرحه ودموعها تنزل ومسفر يراقب الوضع بهدوء!

دخلت وهي تستند على الجدار قالت بأبتسامه: جواد!
رفعوا روسهم لها في نفس اللحظه جواد ومسفر
لكن نظراتها كانت لجواد وابتسامتها لجواد ابتسم لها غصب عنه ووقف: ليه واقفه ارجعي انسدحي
ملاك بأبتسامه: لا بقول لك شي
جواد عقد حواجبه: وشو؟
ملاك بدموع: الفستان انحرق!
جواد تنهد: معليك بغيره لك ولا يهمك
ملاك ببكاء: بس انا ابيه هو مره حلو مابي غيره
جواد بحنان: لا تبكين بطلع برا الديره ادور لك مثله لا تبكين ولا تزعلين والحين بتروحين لبيتكم الجديد وبتنبسطين فيه وتلعبين.
ملاك رفعت راسها: بيتنا؟
جواد ابتسم لها: اي بيتكم
مزنه بفرحه: الشيخ جواد جهز لنا بيت يا ملاك
ملاك بفرحه: والله
جواد ابتسم وهز راسه
ملاك جلست على الأرض بفرحه وهي مبسوطه...
جواد تحنحن: احم اجل انا بطلع الحين وانتي يا مزنه خذي ملاك قسم الحريم لين اجي اخذكم
مسفر كان ساكت وهو يفكر اي فستان تقصده ملاك معقول الفستان الي اخذه جواد عطاه لملاك!!!
شاف مزنه تطلع هي وملاك من الغرفه وجواد نزل لمستواه وربت على كتفه: اخر الأوجاع يا مسفر والله انك تستاهل اكراميه
مسفر ابتسم بضيق: ماسويت شي هذا واجبي
جواد وقف: انا طالع الحين وعلاجك بيوصل الحين ولا تخاف الحروق سطحيه
مسفر اومئ:مشكور يا شيخ
تبسم له وطلع من البيت وهو رايح يشرف على ترتيب البيت بنفسه!....

_________
" فاهد "
كان يفكر في جية الشيخ هزاع واهله واكيد بيشوفون العنود وهو خايف تقول شي او يصير شي مير يتذكر الي صار البارح وكلامها وحس براحه شوي لكنه متوجس منها وخايف ومستحيل يوثق فيها هو متأكد انها تخطط لشي جديد لكن بيسايرها لين يشوف وين تبي توصل المهم عنده الحين انه يجنبها ملاقاة ابوها الشيخ هزاع....

.
.
.

انتهاء

_رأيكم؟

"بكره بارتين إن شاء الله و اطول من كذا "