رواية ورود شائكة الفصل الثامن عشر 18 - بقلم همس ليل

صعب من تعوف كلشي وراك...
وبعد ماجنت وسط اهلك واحبابك...
تصبح غريب وحدك وبنص غربة ...
همس ليل
خالي بعد ما حاول يفتح موضوع...
دخل لغرفته...نص ساعة ودكت ماما علية
من شفت مكالمتها عرفته هو خابرها وحجالها
فتحت خط عليها..
_هلو ماما شلونج
_هلو هجورة شلونج امي
_الحمد لله
_خوما بعدج.هابطة من الي صار
_لا ماكو شي...ظل بالي يمج لان شفتج بعد ماخابرتي
_حاولت احجز واجيج وخالج ماقبل كال لازم انزل اني احلها...
لو تدرين ماما كل ما اتخيل الي ممكن جان يصير
لوما اخابر احمد ويجيج
_اي مثل ابطال الافلام اجى باللحظة الحاسمة
ضحكت بس سمعت صوت امي اجى حاد وعصبي
_هاجر....بطلي هذا الاسلوب...
الولد هواي وكفلنا...
هاي بدل ما تتشكرين منه
_هسة شكلنا...
_شوفي ماما...خالج خابرني وحجالي على الاتفاق وية احمد
_يا اتفاق شو ماكال شي
_شلون ما كالج ...كال كلت لهاجر وهسة يجي احمد ويتفقون
_اي كال على الزواج...بس موعلى  اتفاق بينهم
_نفس الشي...ماما الولد خوش ولد...
لا تفوتيه...وضعج حاليا صعب...
وخالد ما راح يعوفج بحالج
_وليش من ازوج احمد راح يعوفني
_معليج احمد يكوفله...
_والله ماما ولا متقبلة الفكرة...
نسيتوا من السبب بموت نور
_امي البيوت اسرار...
ماتعرفين شبيها...
ولا تعيدين وتزيدين...
ما تريدينه...انطيه بنته...
وخلي نحير بيج وبأبنج...
جريت نفس...هو ليش شغلتي بس نور
وخالد العار شلون بيه...حجيتها وية نفسي
من شافتني امي سكتت...لان صوتها
_هاجر حبيبتي ...ماراح تتندمين ان شاء الله
توكلي على الله
_الله كريم ماما...
سديت الموبايل...واني اكول غير اعرف شروطه
يجوز تعجيزية...

بالليل اندكت الباب....رحت لغرفتي بين ما خالي فتح الباب...
لبست بنطرون وقميص...وخليت شال على راسي
باوعت لنفسي بالمراية...صدك راح اتسويها
هاجر...
صوت خالي يصيحلي قطع افكاري...
طلعت عليه..
_الولد ينتظر...خلي الجهال يمي وروحي شوفي
جانت نور بحجلتها...وعمر كاعد يلعب بسياراته
وكفت اباب الصالة مترددة امد ايدي اري افتحها
وارجعها...

بعددين فتحتها وعفت الباب مفتوح
جان كاعد على القنفة عكس الباب...
التفت يلا شفته
_السلام عليكم
_وعليكم السلام
كعدت مقابيله...
ردت اشكره...بس ماطلعت الحجاية من حلكي
بقيت انتظر يحجي هو....

_ام عمر...اصور خالج كالج
_اي...بس ليش
_شنو ليش
_نور ترة مصارلها ثمن اشهر...
هيج گلبك ينطيك تنسى وتبدي حياة جديدة
جنت ما اباوع على وجه...
نظري جان على ايديه....ماردت اباوعله عين بعين
شفت ايديه وحدة ضغطت على الثانية...
شوية يلا جاوبني
_هاي سنة الحياة...
محد يموت ورة احد...
واني اريد اربي بنتي بحظني...
_وليش اني
_لان نور متعلقة بيج...وشفتج حنينة عليها عبالك امها واكثر...
واكو سبب ثاني بس احتفظ بيه لنفسي

_ليش ما تكوله
_باعي هاجر...الشي الي اريد اكوله اكوله
ومادام كتلج احتفظ بيه لنفسي...
خلاص بعد لا تسألين تعلمي على هالشي ...
اشتغلت رحمة الله....حجيت وية نفسي
سكت شوية...
_عندي كم نقطة اريدج هم تخليها ابالج
_لا تكولي وظيفيتي...
باوع علية بغضب
_تكدرين تنطيني مجال احجي...
ما احب احد يقاطعني...
مو على اساس فد شخصية...هم بگلبي حجيتها
جر نفس....هذا لبسج ممنوع....
باوع لبسي...
ما تسوين اي شي بدون علمي...
طولة لسان واتحطين راسج براسي ممنوع...
اي اتصال بطليقج ممنوع الا عن طريقي
اهلي وخاصة امي تحترميها وتعرفين شقصد
قاطعته...
_اكدر اتنفس لو الا اكولك...
صفن علية...شنو قصدج
_خوب كولي موتي وفضها..
وكفت تعذرني ...مو اني الي تلغي شخصيتي
_وين الغاء الشخصية اذا سمعتي كلام رجلج
_من تتحكم بلبسي الغاء لرغبتي
من تريد ما احجي الا بأمرك الغاء لرأيي
من تريد اتقبل اهلك حتى لو داسوا علية
اهانة لي
_كافي ...كافي...هو مو الغي شخصيتج
انتي اصلا عقلج ملغي من الاساس
_تفضل يريد يجاوز ولازم اسكتله
اتحب اخذلك تحية هم
وكف ...لا ..احجي تسعة بالشهر اذا توقعت راح تفهمين  قصدي وتستعدلين...
_اني عدلة ومابية شي غلط
_انتي اساسا كلج اغلاط
_شجابك علية لعد
_حظي المصخم ...
وعلي لو بيدي امرج الا اخليج دربج ماتندلينه
_ الحمد لله ماسلطك على غيرك...
_لج شنو هاللسان لخاطر ربج...
صوتنا بدى يرتفع دخل خالي
مصعب...هاي شكو ...
خيرك ابو نور شصار
_اسال بنت اختك...دافهمها الوضع...
بس مخها اثخن منه ماكو...
هاجر...والمفروض هسة عادي اسكت ما اجاوب
وانتة تغلط علية...
_هاجر...صاح خالي...
سكتت واحنة جنة واكفين  واحد مقابل الثاني...
يفصلنا مسافة كم متر.
بس احس عيونه تريد تطلع...

احمد_عوفها ماينفع الحجي وياهة...
التفت على خالي...سويت الي علية...
حضرلي نور باجر اجي اخذها...
من سمعت هيج ارتخت اعصابي...
_ونور شعليها بالموضوع...
باوع علية...بنتي واريدها
_شنو تلوي ذراعي بيها
_الوي ذراعج...
التفت على خالي...بلة شحاجيها
مصعب...عوفها ابني...صار تعال باجر واخذ بنتك
بقيت على صفنتي وخالي يوصل احمد للباب ويرجعلي
_شحجينا اليوم...
_شلون اتكله نحضرلك نور
_لج خالوا بنته...تفهمين شنو بنته...
لا بالقانون ولا بالعشاير تكدرين تمنعيه
_منو يداريها من ياخذها
_مشكلته مالنا شغل
_شلون مالنا شغل...هاي بنت نور...
على الاقل لخاطرها...
جر نفس....خالوا منو الاولى اهتم بيها انتي لو هية
الطفلة اول وتالي تربى عند ابوها...
خلي الكى حل لوضعج ولوضع ابنج
_عمر شبيه
_والله ياخالوا شكولج...انتي ضيعتي فرصة
تأمنين على ابنج بحظنج...
_شنو يعني
_ليش خالد بعد الصار راح يعوفج بحالج...
كعدت بمكاني...
ادري حجيه صح...
_اشتكي عليه...
_يامحاكم بهالوكت.....
هسة لغة العشيرة ماشية...
عافني وطلع...
رحت سويت عشة واني افكر بوضعي...
عشيت الجهال واني اباوع لضحكة نور...
الام مو بس الي تخلف...الام الي تربي
واني نور صارت قطعة من گلبي...
احبها بكد ما احب عمر...
خلص خالي عشى...
_عود لا تنسين حضري اغراض نور...
راح اروح لبيت خالي...
قفلت وراه وحجايته ادك بگلبي
خليتهم كدامي بالهول يلعبون وعيني مانزلت من على نور...
من شفتهم نعسوا...كمت نومتهم...
ورجعت اريد اغسل المواعين...
دك تلفوني...باوعت رقم غريب...
كلت خاف خالي نسى تلفونه...
اول ما فتحت خط وكلت الو...
جاني اكثر صوت اكرهه...

_شمشتغل خالج ويوميا جايب صاحبج عليج
_انجب ياعار...تاج راسك
_خوش لعد هسة اراويج من تاج الراس...
واريد اشوف عشيرتج تقبل لو المحاكم
بعده يريد يحجي سديت التلفون واني ارجف
سديت بردت المطبخ...وقفلت الباب
معقولة ديراقبني...
احس الموضوع صار تحدي اكثر من اي شي اخر

ظليت انتظر لحد ما اجى خالي...
بس فتحتله الباب حجيتله...
كعد على ميز الطعام بالمطبخ...
_شفتي خالوا...هاي من كتلكم محد يعوفجن بحالجن
_صار سنين وحدنا
_من اطلكتي غصب توقعت راح مايسكت ...
_هسة شلون خالوا...
طبعا خالي من النوع الي مايحب المشاكل...
كدامج حل من اثنين...تزوجين احمد وابنج ونور بحظنج
لو تنطين نور لابوها...وعمر لابوه...
ونحاول نحصلج فيزة ونطلع برة
_شلون اعوف جهالي
_اختاري اقل الشرين...
عافني وكام يقفل البوب...
رحت لغرفتي وللصبح اني اباوع على الجهال
ماعندي غير حل لو اتنازل عنكم واشوف حياتي
لو الغي حياتي وابقى لخاطركم...
من تبجي نور وارفعها حتى ارضعها ممة
اظل اباوع بوجهها...شلون اعوفج ماما حبيبتي

غفيت الفجر....من كعدت جان يوم جمعة...
سويت ريوك لخالي...
جانوا الجهال بعدهم ما كاعدين...
_خالوا حضرتي اغراض نور...
جريت نفس...
_لا خالوا...خلص اني موافقة...
خلي يجي احمد نتفاهم
شفت خالي فرح...
_عين العقل خالوا...
_البيت شلون
_راح يأجرلج بشارع اهله
_لا اقصد هذا ...
_والله خالوا كتله تعالوا اكعدوا بيها
ما قبل...
انتي اخذي من الاغراض الي تفيدج...
واقفلي...
اذا كدرت احصل اقامة لامج ولبيبتج...
نعرضه للبيع...واخذلج مشتمل باسمج
والباقي يشترون بيه همة شقة هناك
واذا لا ...هم نبيعه واشتروا مشتملين
واحد بصف الثاني واحد لج واحد لامج وبيبتج

جنت ادري بامي ماتقبل تبقى هناك...
هية بس سنة علاج بيبتي واتوقع ترجع
دافكر بهالحجي من سمعت صوت نور كعدت
رحت عليها شلتها من كريكوتها...
لخاطركم ماما كلشي اتحمل...

للظهر اجى احمد....طبعا خابره خالي الصبح بعد ما اتفقنا...
وهم صاحني...بس قبل ما ادخل حجى وياي
_خالوا ما اوصيج...
حاولي تتفاهمين وياه...
لا تنسين وضعج...
هزيت راسي ب اي
ومن طبيت سلمت...وهم كاعد عكس الباب
كعدت مقابيله...

بقى ساكت اصور منتظر مني اني ابدي
شكد كرهته بذيج الساعة...
واني جنت احاول ادوس على نفسي واحاجيه
بس الكلمات لطشت ابلعومي ماتقبل تطلع

_وين لسانج....اكلته البزونة
باوعت عليه بحقد...
واجت حجاية على طارف لساني بس بلعتها
_بعد عندك أوامر
_طلبات مو أوامر...
وافقتي على السابق
هزيت راسي ب اي
_اريد اسمع منج
_موافقة...
_عندج شي انتي
ردت اسأله عن طبيعة زواجنا بس استحيت
_لا
_بقى عندي شي واحد...
سكت وعدل كعدته...
_تعرفين اني.. رجع سكت لحظة...والمرحومة
شلون جان وضعنا...
فمو من السهولة اجيب احد.بمكانها...
والوضع هو ديفرض علينا هالزواج...
سكت...
_اعرف...وين تريد توصل
_اريد افهمج...اني اريد زواج كامل
بس اريد وقت حتى اتقبل زوجة بمكانهة

حسيت مي بارد نزل على گلبي...
كتله منو سمعك وية نفسي طبعا
_براحتك
كلتها ورنة الفرح واضحة بصوتي
_بس هذا الوضع وقتي...
يعني مو تأخذي راس مال
_اعرف
_مادام اتفقنا صيحي خالج حتى اتفق وياه
طلعت صحت لخالي...
ودخلت لغرفتي...
وكفت مقابل المراية وحجيت وية نفسي

_خلص هاجر...اتحملي فترة لحد ماترجع امج
بعدها الامور تختلف...

الي صار بعده جان سريع...
لان خالي اجى كم يوم وراد نخلص امورنا بسرعة
حتى يكدر يرجع هم علمود بيبتي بالمستشفى
وهم شغله...
بنفس اليوم الي اتفقنا...احمد جاب عمه غير ابو كرار
وخاله واخوانذه اثنين مزوجين واحد اكبر منه واحد اصغر..
وخالوا جاب ولد خاله اثنين...
وقروا الفاتحة...وجان جايب سيد وياه...
واخته ام كرار...وصاحوني حتى نعقد من ورة الباب
من وكفت كالت ام كرار لا تجاوبين راسا
تلث مرات وضجت جاوبت...
اريد اخلص من هاي الشكليات...
ام كرار...رادت تهلهل...لزمت ايدها
_رجاء ام كرار...
_اعذريني حبيبة ماقصدت
تبسمت بوجهها...
احمد الي عرفت عنده بعد اخت اكبر من ام كرار
ماخذة ابن عمها اخو كرار الي خطبني
ومن ما اجت امه عرفت ماموافقة
ماجان يهمني هالشي...
لان ولا حبيتها...
من طلعوا...
اجى خالي باس كصتي
_الف مبروك خالوا...
ربي يسعدج...

الصبح تفاجات بجية احمد...
فتت يمه وسلمت...
من كعدت خالي عافنا وطلع
راسا دخل بالموضوع...
_خالج لازم يسافر نهاية الاسبوع
وماكدر اعوفكم وحدكم تباتون
حاولي ترتبين وضعج حتى نحول للمشتمل
_لا وين اكدر اكمل باسبوع
البيت يراد اعزله...
قاطعني...هاي مو مشكلة نجي كل جمعة اني وياج نرتب ونعزل الاغراض
المهم ماتباتون وحدكم...
ردت اساله عن شغلة خالد...بعدين سكتت
_تكدرين اليوم نطلع نشتري اغراض للمطبخ
وباقي الاشياء
_جيب الي يريحك...
ادوات المطبخ لا تشتري عندي هواي
بس عندي طلب
_كولي
_اريد اجيب غرفتي اكو مجال
صفن علية....
_اي المشتمل بيه غرفتين نوم
جهزيها اكمل المشتمل واجي اشيلها
اي شي تحتاجين خابريني...

باقي الاسبوع التهيت افرغ غرفتي
ردت اخذها لان ماردت اطلب سرير لابني
وغرفتي بيها سرير نفر واحد لي سرير لابني
وكريكوت نور...وكنتور...
وخالي التهى يحجز ويكمل شغلاته
واني من المطبخ اخذت سيت جدورة ومواعين وخواشيك...
ردت اخذ شي متعودة عليه...
مجرد شغلة نفسية مو اكثر...
خليتها بكارتونات ...
والملابس اخذت فقط الشتوي...
كلت من يجي الصيف عود اجي اخذها...
هو ماخابر بعد...

تلث ايام وخابر كال جايب سيارة ونجار
من دك الجرس...
خالوا طلع يفتح الباب...ومن دخله
سلم...وبعدين حاجاني
_شوفيني غرفتج حتى يفتحها النجار
صعدته فوك...
من دخلنا للغرفة...
_هذا السرير وهذا..والكنتور
_وهذا السرير
باوعت على سرير نور...وجريت حسرة
_لا هذا مال نور
راسا غير الموضوع
_نزلي جوة وادخلي بالغرفة حتى يجون العمال...
بقوا تقريبا ساعة ونص...
يلا خلصوا...
لكيتها فرصة...رتبت ملابس امي بالكنتور ...
وشلت البطانيات بجنط بقيت بس الي نستعملها
وعزلت اغلب اغراض الغرفة...
دخل خالي
_راحو....خالوا عقد المحكمة انتو كملوا بعدين
لان لازم تحاليل وتغيير جنسية يراد اسبوع واكثر

_هيج واثق بيه
_لو غير احمد ما اسويها لو اموت...
بس ادري بيه مايأكل حقج
هزيت راسي...
طبعا بعد العقد امي خابرتني فرحانة
وباركتلي...
جمعت ذهبي وذهب ماما وبيبتي بصندوق
وخليته بجنطتي الي اشيلها...
وباقي الجنط دزيتهة وياه.
ماجان ابد عندي فضول اشوف المشتمل
ولا اكو مخابرة بينا....
خلص الاسبوع هو يرتب المشتمل
ويأثثه...
واني احاول افرغ الثلاجة والمجمدة ونظفتهن...
انطيت شكو اكل بيها...
ماعدا الكبب الي ماما سوتهن قبل ماتروح
كلت تنفعني لان ماعرف اسوي...
نهاية الاسبوع ويوم جمعة بالتحديد
اجى احمد اخذ خالي للمطار...
وقبلها...خالي شبكني
_دير بالج على نفسج...
واسمعي كلام رجلج...
واي شي تحتاجين خابريني...
طلع مبلغ بالدولار...
ادري ماعندج راتب...
هاي خليها تحت ايدج خاف تحتاجين
احمد مايقصر وياج...
بس اعرف نفسيتج
_هاي هواي خالوا
_فدوة لج...
بوس الجهال وطلع من سمع جرس الباب
_هذا احمد...ماوصيج خالوا بعد
من طلع قفلت الباب...
ورجعت قفلت الابواب مال الغرف الفوك...وطلعت بالسطح اتفقدته...
ورجعت قفلته....
ونزلت افتر بالبيت...اتاكد من السخان...واقفل ابواب المناور....
رتبت غرفتي بيبتي موقتا لحد ما ارجع اغطيهن..
عزلت المطبخ...
كعدوا الجهال ريكتهم وبدلت ملابسهم...
جنت اتمنى الوكت ايطول ويتأخر احمد يلا يجي

بس ماكو مفر ...فزيت علة صوت الجرس
عبالك دك لموتي...
طلعت فتحته
_شلونج ام عمر
_الحمد لله...سافر خالي
_دخل للمطار اكيد طيارته تتأخر
_تفضل
دخل وراي للمطبخ
_عندج شي اصعده بالسيارة
_بس ذني الجنط
اخذهن وصعدهن...ورجع علية
شفته تاكد من كل الابواب...
_بعد اكو شي
_لا
اخذ نور مني..وطلع كدامي..
اني ظليت افتر بالبيت...
احس الحسرة الي بكلبي شكبرها
ياريت تنزل دمعة وتريحني...
سمعت صوته يصيح
_ام عمر
جريت نفس وطلعت للطرمة...شفته شايل
نور وينتظرنا...
قفلت باب المطبخ...وعمر مجلب بية
وطلعت صعدت عمر ليورة...
وكعدت لكدام وخله نور بحظني...
ورجع قفل الباب الخارجي مال البيت.
وصعد ساق...السيارة تمشي واني عيني على البيت
شفت ام علي جيرانة ابابها...
رفعت ايدي سلمت عليها...
واذكرت خالي...راح وصاهم على البيت
وسألته علية وعلى امي...
من رجع كال خالوا لازم احمد يجيب كم سيارة
بالزفة
_يازفة خالوا صدك تحجي
_غير تعرف الناس ازوجتي
_طز بالناس حشاك...
ليش عافوني بحالي...
ماريد اي شي...
اطلع منة عادي...
بعد سنة مادار على نور
سكت ومالح بالموضوع...
انتبهت على احمد من حجى
_المشتمل صغير....
هذا الي كدرت احصله بشارع اهلي
_ليش الا بنفس الشارع
_اني عندي دوام الصبح والعصر ..
خو مال تبقون وحدكم...
على الاقل اخواني قريبين...
الي اعرفه...هو مدرس رياضيات
_مو دوامك الصبح...العصر شنو
_اشتغل بمكتب محاسبة
سكتت...كلشي ماعرف عنه...

وصلنا....نزل فتح باب الخارجي...
ورجع فتح بابنا واخذ نور بين مانزلت ونزلت عمر...
جان اكو بابين...واحد يمكن للصالة
فتح الثاني...من دخلنا طلع ممر يودي للغرفة مفتوحة
مثل الهول الداخلي...
بس مسويها مطبخ...
اخذي نور خلي اجيب الجنط...
المطبخ مخلي بيه سنك وبنفس الوقت كاونتر...
وثلاجة وطباخ وميز طعام...
دخل واني اتفرج...
_تعاي شوفي الغرف..
جانت بالنهاية...الظاهر جانت غرفة جبيرة...
وقاسميها غرفتين...
وحدة صغيرة...مخلي بيها غرفتي الي دزيتها
ويدوب مكفية...
خلى الجنط بالكاع...
_تعاي شوفي الغرفة الثانية...
رحت جانت اكبر...وبيها غرفة نوم حديثة
الظاهر مشتريها جديد...
_بقت الصالة...
رجعنا لمقدمة البيت...
جانت الصالة مخلي بيها تخم بسيط بس مرتب
_منو مرتب البيت
_ام كرار...حتى اغراض المطبخ فرغتهن
بعد انتي غيري الي يعجبج
_راح اجيب غدة اكيد تعبانة ...
هزت راسي
من طلع ...خليت نور بالحجلة...
ورحت للمطبخ فتحت العلاليك الي جبتهن
وخليت الكبب بالفريز
وعمر ظلي يجر بية يريد العابه
هم طلعتهن له...
دخلت لغرفتي ..وفتحت الجنط وكمت ارتب بالملابس...
هو كال يريد فترة...يعني لازم ابقى هنا...
وبداخلي اكول يارب اطول الفترة ...

ساعة ورجع جايب دجاج شوي على تمن...
_تتغدى هسة...
_لا بعد وكت راح اسبح
طب يسبح...واني سويت شوربة لنور...
باب الحمام يفتح بالمطبخ...
من طلع التفت لارديا...
ورجعت درت وجهي من شفته طالع بطرك المنشفة
حول خصره...
بس حسيت نفسي لعبت...
راح بدل بين ما اكلت نور....
وصبيت الغدة...صحت عليه
_ابو نور...
ماجاوب
عمر ماما صيح عمو
راح ورجع...
_ماما يصلي عمو
انتظرته...من خلص...اجى كعد على الميز
_تعاي اتغدي
_هسة بس اغسل لنور...
غسلت لها وخليتها بالحجلة...
وكعدت عمر يمي وكعدت...
_نور ما تاكل
_اكلتها شوربة...بعدها ما تاكل هذا الاكل
من دناكل
_ما شفتج صليتي
_صليت من جنة بالبيت الظهر...
والعصر بعده ما أذن
_ها....راح انام شوية واطلع للمكتب تحتاجين شي
_لا
كام غسل ودخل لغرفته...
واني هم لملمت المواعين وغسلتها واخذت الجهال...
ودخلت نيمتهم ونمت...
كعدت على صوت الموبايل...
بعيني النومة...جريته وراسا فتحت خط
عبالي امي...
بس اجاني صوت يرعد
_هاي وين رحتي...
وشنو ازوجتي
_انتة شعليك...
قاطعني...يعني طلع صدك صاحبج...
اني اعلمج اذا مابجيتج دم...
اصبري وشوفي
سديته واني ارجف...