رواية ورود شائكة الفصل التاسع عشر 19 - بقلم همس ليل

يسعد مساؤكم...طبعا من اخلص البارت وانزله من وكت ...احس براحة كأنما مسوية انجاز 😁

فقط هي المواقف من تظهر معدن الانسان...
فبعضهم يصيبنا بالاحباط..
والبعض الاخر يجعلنا نفخر بمعرفتهم...
همس ليل

من سمعت صوت خالد...
كل وضعي اتخربط...زين اكول لاحمد لو لا
بقيت افتر بالبيت وبالي مو يم اي شي
رغم جنت ناوية اتعرف شوية على اماكن الشغلات
قررت اكول لاحمد على المكالمتين...
طلعت كبة كليت وياهة زلاطة وبتيتة..
نور جان عدها شوربة من الظهر...
لليل يلا اجى احمد...
سلم ودخل غير ملابسه وغسل...
اني صبيت العشى وانتظرته
من اجى كعد على الميز...
_وين الجهال
_عشيتهم وناموا
_بعد وكت
_الساعة بالتسعة بالنسبة لهم متاخر خاصة شتى احنة
سكت ما حجى...وبدى يأكل...
_اليوم دك تلفوني...
وجان خالد...
راسا رفع راسه
_احنة شتفقنا ...مو كلنا ماكو اتصال وياه
_وشمدريني راح يكون هو
_ليش ماتعرفين رقمه
_لا طبعا...اني غيرت رقمي بعد الطلاك
وكل مرة يدخلي من رقم شكل
_وليش ترفعين الموبايل اذا رقم غريب
_عادي وين المشكلة...اكدر احضره
_يعني تدريني طليقج ممكن يدخلج من اي رقم
لا ترفعيه وفضيها
رفع صوته...
_هذا امر جديد...جاوبته بحدة
_بلشنا...
شراد خالد افندي
_يهدد...ويغلط
_على كده...مايعرف اذا خليته أبالي اقريه التوبة
_اني كتلك مو دكول ما حجيتي
_لا عوزج ماتحجين...
باوعت عليه...
_اريد اعرف انتو شمصورين رب العالمين منطيكم ميزة مفضلكم
_منو تقصدين
_الزلم
_الرجال قوامون على الناس
عاف الاكل وكام قبل ما اجاوب...
لويت حلكي....
خليت المواعين على السنك...
ودخلت لغرفتي....
ثاني يوم سمعت طكطكته بالمطبخ..
بس ما كمت بقيت نايمة...
وكعدت على كيفي...
عود كمت ريكت الجهال وسويت غدة
من اجى الساعة بالوحدة...
طب سلم وغسل ...
كمت من يدخل الحمام اروح للغرفة لحد ما يخلص
دنك على نور شالها ولاعبها...
وحجى وية عمر...اني جنت اثرم زلاطة
_خلصان الغدة
_لا بعد
_راح انام شوية بين مايخلص
من كعد صبيتله...اكل شوية وكام
طلع لشغله...
مر اسبوع.على هذا الوضع...
الصبح يطلع للدوام يرجع ينام شوية بين مايكمل الغدة ...
ياكل شوية ويطلع للمكتب...
بس بالعشى ياكل اكثر
جانت اكو هدنة مخفية بينا
نهاية الاسبوع...الجمعة كعدت لكيته طالع
ومن رجع دخل لغرفته وطلع صاحني
_هاجر...هاجر
اني جنت بغرفتي طلعت على صوته...
كلت ياستار...
شفته شايل بيده تي شيردات وقمصان
'رفعهن بوجهي
_شنو ذني
_هدومي الي صار اسبوع نفس مكانهن
_لعد وين يرحن
_لا داهريني...
غير تغسليهن
_ماجايب غسالة ...
وماعرف اغسل بيدي
_وملابس الجهال
_ذني صغار مكدور عليهن
_ماكدرتي اتكولين اريد غسالة
_وشمدريني عندك ملابس وسخة
_تريدين اجلطيني...
لعد شنو وظيفتج...
مادورين ملابس رجلج
_اصور وظيفتي مو خدمت حضرتك
اتقدم ناحيتي خطوة واني رجعت ليورة
_استغفر الله ربي...
لج شنو من مرة انتي...
لا ريوك اتكومين مثل النسوان تسويلي...
اكول ميخالف سهرانة وية الطفلة
غدة ارجع الكاه بعده ما كامل...
وياريت ينأكل...
مواعين اكعد الصبح مكومة على السنك
ادري جنتي عند اهلج اكل وخدة
_اذا تريد وحدة تخدمك...
ليش اجيت علية...
_لج بابا الي تسوي لبيتها يعني تخدم
_والله اذا تتحاسب بهالطريقة يعني خدمة
ضرب ايديه على جانبه
_وايكولك طول بالك...
شمر ملابسه على الميز
_شوفي يابنت الناس...
اذا ماكعدتلج گلب ما اطلع ابن ابوية
عافني ودخل للغرفة...
واني مديت لساني له بحركة طفولية
وهم طبيت لغرفتي ادردم...
والله يالله اكعد اسويله ريوك...
بدل وطلع وحتى على الغدةما اجى....
العصر...سمعت صوته..
_ام عمر...سوي طريق ابو سامر وياي...
دخلت لغرفتي...
سمعت صوت رجال وياه...
وحجي.. واحد يكل للثاني...لا مو هنا خليها هنا
الي افتهمت جايب شي...
فتح باب الغرفة..
_البسي شي وتعاي سلمي...
اني جنت لابسة تراك...دنيا شتى
لبست عباية اسلامية وطلعت ...
_السلام عليكم
جاوبني الرجال...هلا باختي شلونج
على الخير زواجكم...
تعذرينة ما اجينة نبارك...
بس  مخليكم تستقرون شوية
هاجر...اهلا وسهلا بيكم...
احمد...سويلنا جاي
ابو سامر...لا خوية غير وكت
وصله للباب ورجع علية
_منو هذا
_ليش ماتعرفيه
_مين اعرفه
_اخوية ابو سامر...
صفنت عليه ولا يشبهه...
كرار جان عبالك اخوه...
بس هذا كصير وناعم وابيض...
عكس احمد تماما
_شو ما يشبهك
_يشبه خوالي...
اني اشبه عمامي
_اي اصلا كرار يشبهك اكثر عبالك اخوك
خزرني من جبت طاري كرار....
_تعاي شوفي الغسالة...
اقتربت على الغسالة الي جانت وراه
_هاي شنو
_شنو شبيها
_شو عادية...ماعرفلها
_تتعلمين...
منة التشغيل...ومن التجفيف
طبعا هية مايرادلها شي..بس اني احب اغثه
_والشطف
_بيدج
_خاف ماتقبل
ماحسيت الا لزم زندي
_اني مو كلت انتبهي لالفاضج
_اوي على كيفك...
شكلنا سبينا العنب الاسود
نفض ايدي...
_وعلي الكرار...غير الكص مايفيد لسانج
دخل للغرفة ...
اني بلشت اسوي عشى...وبنفس الوقت شغلت الغسالة...
طبعا ما اشطف بيدي اخلييه بالمنشفة وافتح عليهن المي...
طلع مبدل...
_لا تحسبين حسابي على العشى...
طالع وية اصدقائي..
خلصت الهدوم وشريتها...
وعشيت الجهال...وخابرت ماما ظليت احجي وياهة
وماحسيت الا على صوت...
طلعت من الغرفة...
دورت بالبيت ...ماكو شي...
شعلت ضوة الطرمة...هم ماكو شي...
بس اني متأكدة سمعت صوت ...
النوب ماكدرت ارجع انام...
بقيت لحد ما سمعت صوت الباب يفتح...
عرفت احمد اجى...نمت
ثاني يوم جان سبت...
كعدت من الصبح...لكيت احمد بعده ما طالع...
سويت ريوك...ودزيت عمر يكعده
طلع غسل واجى يمنا
_اليوم نروح لبيتنا
_يابيت
_بيت اهلي اقصد
نروح نعزله...بقيت كلشي مثل ماهو
_خلص حضري نفسج لان العصر عندي دوام
اخذنا ورحنا للبيت...
اول مادخلت حسيت روحي رجعتلي
بس من فتحنا الباب مال المطبخ اجت ريحة ماطيبة
والبيت جان حيل بارد
_هاي شلون البرد مو زين على نور
_اوديهم يم ام كرار
_خاف عيب
_لا مادكول شي
انطيته ملابس نور ومميتها...
واخذ نور وعمر وراح...
واني فتحت شباييك الهول...
رحت للصالة...فتحت الشبابيك...
ونفضت التخم...وجبت جراجف غطيت القنفات...
شغلت المكنسة وكنست الزولية..
من خلصت...سديت الشبابيك...
وطلعت من الصالة...
بس وصلت لغرفة بيبتي سمعت صوت طبة..
رجعت فتحت باب الصالة ماكو شي...
سديت الباب وطلعت...
بس ارتبكت...ورحت راسا لباب المطبخ
اتاكد مسوية السرقي...
لمحت ايد انمدت تريد تفتح سرقي الباب الخارجي...
صحت منو...
راسا نسحبت اليد...
وجريت سجينة طويلة...وبقيت اراقب الباب...
جنت اخاف ابتعد عن المطبخ...
شوية شفت ايد نمددت مرة ثانية...
ختلت ورة باب المطبخ...
ومن انفتح الباب...جانت الخطوات عبالك ادك بگلبي
وصل لباب المطبخ...
راد يفتحه مانفتح...
كام يدكه...باوعت على كيفي من الجامة شفته احمد
فتحت الباب وبعد السجينة بيدي
_هاي شبيج شو مصفر وجهج
جريت نفس ورفعت ايدي اريد أشر على الباب الخارجي واني احجي
_هوب...شبيج اشو النوب سجينة
باوعت عليها نسيت اني شايلتها...
ذبيتها على السنك...
هو جرني من ايدي وكعدني على الكرسي
وراح جاب كلاص مي...
_هاج.اشربي واحجيلي شصار
شربت شوية وخليت الكلاص على الميز كدامي
هو كعد مقابيلي
_سمعت طبة...دخلت للصالة اشوف شكو
مالكيت شي...
بس من اجيت للمطبخ شفت ايد نمدت يفتح السرقي
صحت منو راسا انسحبت اليد
_هاي شنو...متأكدة
_اي
_خاف حرامي...
بس ماشاف السيارة من وكفت
_يجوز عباله ماكو احد
_البيت لازم نتابعه...
هسة اوصي ولد عرف بنفس الشارع عينهم عليه

ماجاوبت بس جان ابالي الطبة الي صارت بالمشتمل
_كومي خلي نكمل حتى نروح للجهال
صدك ساعدني غلفنا تخم الهول
ولميت البطانيات بجنطها وضميتها...
والمطبخ معزلته اصلا...سدينا الشبابيك
_عندج شي بعد
_لا ماعندي...
خلي يخلص شهر الثاني واجيب وحدة تغسل الزوالي واضمها
_يلا امشي
قفل البوب...وصعدنا بالسيارة
جان يسوق واني بالي يم الصار...
_هاجر...
التفت عليه
_ماجاوبتيني...وين بالج
_ عن شنو
_خوما عدكم فلوس بالبيت او ذهب
_لا مانبقي...
ماكتله الذهب عندي بالبيت...
ولا كتله عن الفلوس الي نطانياها خالي..
وصلنا لبيت اخته
_انزلي
_جيب الجهال وخلي نروح
_لا عازمتنا على الغدة...
خلينا ناكل شي مثل العالم
باوعت عليه....
_معاجبك اكلي جيب جاهز
_وليش انتي شسوين ...
اباوع لطولج
_والله اني مو طباخة الخلفك
جنت مادة ايدي افتح الباب..
ماحسيت الا جر ايدي الي من جهته
وضغط عليها بحيث صحت
_اياج ثم اياج اسمعج تتجاوزين على اهلي
اهلي خط احمر ...سمعتي...
ماجاوبته رغم ايدي حيل أذتني
رجع ضغط حيل...سمعتي
_اي
هد ايدي وظليت افرك بيها من الالم
نزل وهو عصبي...
ان بقيت لحظات لحد ما هديت يلا نزلت وراه
طلع رجل اخته فتح الباب...
رحب بينا وباركلنا...
وتلكتنا ام كرار اخته هم رحبت...
ماطولنا بس اتغدينا واغلب الوكت اني ساكتة يحجون عن اشخاص ومواقف ماعرفها
ورجعنا للبيت سكتة...
اني راسا اخذت الجهال ودخلت لغرفتي
بدلتلهم وبدلت ونمت لان تعبت...
بس جنت حيل مقهورة منه...
كعدت لكيته رايح لشغله...
نظفت المشتمل وسويت عشى...
وعشيت الجهال ولميت الملابس صفطتها
يعني روتين يومي...
من اجى...سلم وغسل ودخل بدل...
هو مرات يلبس دشداشة لو تراكسود
طلع من غرفته...
_هاي ملابسك صفطتها
_ليش مادخلتيها...
باوعت عليه....الغرفة من جينة لسة مادخلتها
عبالك مكان محرم علية...
ماردت افهمه هالشي...
_ما اندل وين تخليها
_افتحي الكنتور وتعرفين
والقمصان اضربيهة اوتي
_ما اعرف
جان هستوة كاعد على الكرسي
_اريد افهم شتعرفين...
ما تضربين ملابسج اوتي
_لا جانت نور تضربهن
سكت ما كمل...
اني صح جنت مزوجة بس مسؤوليات الزوج مو هلكد تعلمت عليها...
هية فترة شهرين وبعدها خلصتها يم اهلي..
وهالشهرين خالد جان يودي ملابسه للوندري
مايحب احد يضربهن اوتي...
_هاي الكبة والبورك منو يسويها اذا ماتعرفين تطبخين
_ماما
_ومن تخلص شلون
_عود اوصي وحدة تسويلي
ذب الخاشوكة من ايده وباوع علية
_شوفي هاجر...اني وضعي مايسمح للاكل الجاهز
لو الطبخ خارج البيت...
صح عندي شغلتين...بس اريد اكون بيت لنا
خوما نبقى ايجار...
حاولي تتعلمين ....
_اني ماعرف اطبخ ولا احبه...
وداحاول مثل ماتشوف ...
ومن تخلص اجازتي واداوم بعد مالحك
_من تخلص اجازتج الله كريم...
كمل عشى وكام ...
_عندي تصحيح اوراق تحتاجين شي
_لا
طب لغرفته...
باوعت ملابسه عافهن...
اني هم عفتهن ودخلت لغرفتي...
خابرت ماما حجيت وياهة ...
ونمت...كعدت الصبح الملابس مثل ماهي...
كلت خلي ارتبهن بالكنتور قبل مايكعدون الجهال
فتحت باب الغرفة...
الجرباية هوسة....بس باقي الغرفة مرتبة
كلشي بمكانه...اذكرت نور من تحجي ادكول
كلش مرتب ويحب الترتيب...
فتحت الكنتور...صدك ملابسه مصفطة عدل...
والباقي معلك بشكل مرتب...
ضحكت لو يشوف هوسة كنتوري شيكول...
علكت القمصان....ورتبت البقية...
اجاني فضول اشوف الجزء الثاني من الكنتور...
فتحت البوب الثانية...
جانت فارغة مابيها اي شي...
معقولة عايفها لي...
سديتها على السريع...
واني احاول ابعد فكرة جيتي للغرفة عن بالي...
عدلت الجرباية بسرعة...
وطلعت ركض من الغرفة...
سويت غدة بين ماكعدوا الجهال...
جان اليوم شمس حلوة طلعتهم بالطرمة...
جانت حيل صغيرة يمكن تبعد عن الباب مترين او شوية اكثر
فرشتلهم بالكاع...وطلعت ريوكهم وكلتهم...
وخليت الالعاب...
ودخلت اودي صينية الاكل...
المطبخ يصير بالنص مثل ما كلت بين غرف النوم والصالة...
يعني ما اشوف الطرمة...
خليت الصينية على السنك واخذت بطل مي...
ردت اطلع دك تلفوني...
رحت عليه بالغرفة شلته شفته رقم غريب...
سويتله رفض...
طلعت للطرمة...باوعت باب البرة مفتوح وعمر ماكو...
ركضت للباب باوعت بالشارع ماكو احد
صحت عمر...عمر ...
ماكو....ياربي وين راح...نزلت بدون حجاب
وبالتراك بنص الشارع بدون وعي...
اباوع منة...منة...ماكو...
دخلت ركض النوب للبيت...كلت بلكت
دخل للبيت يدور علية...
فتشت البيت كل مكان واني اصيح عمر هم ماكو
رجعت على السريع لبست عباية جتف وشال...
وطلعت مثل المخبلة ادور بالشارع...
جان سنطة وماكو احد...
سمعت صوت نور تبجي...
رجعت عليها...شلتها واني ادعي
ركضت على تلفوني...
دكيت على احمد...
اول مافتح خط صحت
_احمد الحكني عمر ماكو
_شنو ماكو...وين راح الطفل
_ما ادري عفية تعال...
ابني ماكو
_جاي ..جاي
ظليت اروح وارجع افتر بالبيت وافرك بيدي وادعي
ربي...
حسيت اخذوا روحي مني...
گلبي يدك سريع ...
لحد ما اجى احمد عبالك سنة مو ربع ساعة
تلكيته من الباب واني ارجف
_عفية احمد ابني ...ماعرف وين راح
خليت ايدي على صدره...
هو لزمني من جتفي
_على كيفج بس فهميني...
خاف خاتل بمكان
هزيت راسي...لا ..لا...دورت كل المشتمل
_قابل وين يروح وانتوا داخل البيت
_جانوا بالطرمة
_شطلعهم
_طلعتهم بالشمس...بس دخلت اودي الصينية
والله ما تاخرت...
طلعت لكيت الباب مفتوح...
_شفتي بالشارع...
_اي ودورت هم ماكو...وين يروح كله اربع سنوات
شيندل...
هنا دموعي كام اصب...
رفع ايديه ومسحهن...
_لا تخافين ..ان شاء الله نرجعه سالم
_عفية شلون....منو اخذه...
معقولة خالد
_كلشي يصير
جرني للمطبخ كعدني على كرسي...
ونطاني كلاص مي...
شربته شوية عبالك جنت بصحراء...
احس بلاعيمي طبكت..
هو طلع بموبايله ودك رقم...
سلم على واحد...واني مركزة وياه
كاله رايدك بشغلة...
اي اني اجيك هسة...
_هاجر راح اطلع
كمزت من مكاني...وين طالع وعمر
_غير رايح علموده...
سدي الباب واقفليها...
طلع واني روحي تلوب...
بجت نور...رحت سويتلها ممة...
رضعتها وعيوني مغوشة من البجي
نيمتها....وطلعت افتر...
بعدين جريت تلفوني...
اريد ادك على خالد...
شفت اخر مكالمة...اذكرت
دكيت على الرقم...طلع خارج الخدمة...
اني ما حافظة رقم خالد...
دكيت على ام فهد...
لول مافتحت خط
_هلا بام عمر
_اريد رقم خالد
_خيرج خيتي
_ام فهد عفية دزيلياه هسة
سديته...شوية واجتني رسالة برقمه
دكيت عليه...
راسا رفعه...
_وين عمر
_هيج بدون سلام
_كتلك وين عمر
_يمج...هذا الي اعرفه
_خالد...لا تستغبي...عمر وينه
_استغبي...اشكرج...
شبي عمر...
_ادري انتة اخذته
وينه...
سوو نفسه عصبي
_وين ضيعتي الولد...
غير اكلب الدنيا على راسج اذا صار بي شي
_ماكو غيرك اخذه
_وشمدريني مو صاحبج سواله شي
حتى يخلص منه...
خلي الكى الولد...تحلمين بعد.اتشوفيه
سد التلفون بوجهي...
ياربي...معقولة صدك مو هو اخذه...
لعد وين راح ابني...
ما جنت اكدر اكعد بمكان واحد...افتر بالبيت
ساعة للطرمة...ساعة ارجع للمطبخ
النوب ارجع للغرفة اطلع ملابسه اشمهن وابجي
گلبي نار...الله لا يراويها لحد
سمعت صوت الباب..ركضت عليه...
شفته احمد
_ها شسويت...
_للعصر نشوف
_شنو للعصر نشوف...
_هاجر....كتلج يمي الشغلة اصبري شوية
_شصبر...كل عقلك...هذا ابني
ماتحس النار الي بگلبي...
ضربت على صدري...
راح اموت تعرف شنو...ابني
لزم ايدي...
_اعرف والله...بس مادام صار اكثر من ساعتين
ومحد خابر...
اكيد ابوه اخذه..
_يكول مو اني
باوع علية بغضب
_شمدريج
_خابرته...
لزمني من زندي...
_منو كلج تسوين هيج
_شنو منو كلي...
لعد ابقى كاعدة صافنة وماعرف ابني وين
_استغفر الله
خفف لزمته...
_يابنت الحلال...عوفيني اني اشتغل
كتلج عند ابوه اني متأكد
_يعني عبالك عند ابوه سالم
هو اني اخاف عليه من هذا القذر اكثر من اي شخص ثاني
_ليش قابل مو ابنه...اكو اب ياذي ابنه
جان واكف مقابيلي
_اي اكو...اذا مريض ونكس يأذي
_مافهمت
بهاللحظة...دك تلفوني...
جان على الميز قريب منة...
راسا رفعه احمد...
_منو هذا
باوعت للرقم
_خالد
فتحه احمد....
وشفته انتظر شوية يلا جاوب...
  فتح عيونه على وسعهن وهو يستمعله...

خفت كلش...خاف صار شي
_شوف كل كلمة كلتها ارجعها بحلكك واشوفك
شجابت الامهات ياعار
سد التلفون...
_شبيه شكال...
باوع علية بعصبية...
_اياج ترفعين تلفون عليه....
شمر التلفون على الميز ...
دخل للغرفة...لحكت وراه...
نزع سترته وبدى يفتح بقميصه
_شكالك
التفت علية...
_انتي اعرف جنت شمزوجة
_هسة اني بياحال
عفته ورحت لغرفتي...
كعدت على الجرباية ولميت رجلية لصدري
وشبكتهن بيدية...واني ادعي...
سمعت صوت باب الحمام انفتح وانسد...
عرفته دخل يسبح...
كمت من مكاني وطلعت تي شيرت عمر...
شبكته لصدري...اووووف ياماما...سويت كل هذا حتى تبقى بحظني...
معقولة تالي تروح مني...
يارب اسألك بحق نبيك تحفظلي ابني من كل سوء
يمكن اني مقصرة تجاهك...
بس عمري ماسألتك ولا طلبت شي
طول عمري حامدة وشاكرة...
احفظلي وليدي...
دموعي كامت تجري...
والله ما رايدة شي من هالدنيا...
فدوة لاسمك يارب...
شميت تي شيرته واني اشهك...
حسيت واحد خلى ايده على جتفي...
جان ظهري للباب واكفة مقابل الكنتور
_هاجر...كولي ياالله...
او ادري مو يم ابوه جان كلبت الدنيا.
بس ادري كل زين يمه...

_مو كتلك سمعت طبة بالبيت
_اي ابيت اهلج مو هنا
_لا هنا هم قبل يومين
_ليش ما كلتي
_نسيت
_راح اطلع
انداريت عليه...
_وين رايح
_ماخذين ناس واريحين على اخوه الجبير
يكولون خوش رجال
_اي صح
_كولي يالله
طلع وبقيت على نار ...افتر
لحد ما اجى المغرب....وسمعت صوت الباب
طلعت اركض...
_ها بشر...طلع يمه...
شكال ...احجي عفية...
طب واني وراه امشي
_احجي احمد
كعد على الميز
_يكول مو عندي
_انتة مو كلت متاكد عنده
_اي...بس دينكر...
يكول اكدر اخذه بالمحكمة...
ليش اخطفه...
_يعني معقولة...لعد وين راح ابني
كعدت بالكاع واتجيت على الحايط
وحظنت نفسي واني ادوي
وين راح عمر...وين راح ابني
كمبص مقابيلي احمد
_هاجر...اذا مخطوف كتلج لازم يريدون فدية
_ويجوز مايريدون...
عصابة مال اعضاء...
اشرت بيدي ...يجوز
_لا...هذا واحد مراقب البيت...
واول مافتي استغل الفرصة واخذه..
باعي...
سكت ودنك...
عدلت نفس ...
_شنو كول
_اني ادري شنو سبب طلاكج...
المرحومة حجتلي...
اريد اتاكد منج...
باوعت عليه....وبلحظتها مستعدة افضحه كدام كل العالم...
_شاذ...خالد شاذ
_ليش ما كلتي لاهلج...
جان بعد ماكدر يحجي ...
_لخاطر عمر...ما اريده يتعير بأبوه
شنو ذنبه...
مد ايده ولزم خدي ...
_محد راح يعرف بينا الشغلة...
بس حتى اكدر الوي ذراعه
_عسى ماتموته بس رجعلي ابني
باس كصتي...
_يرجع...
عافني وطلع...
من رجع بالليل...جان جايب علاليك...
ما حسيت شوكت طلع وشوكت رجع على كعدتي بالكاع...
حتى من كعدت نور...
كمت جبتها يمي ونطيته بسكت بيدها...
ورجعت لنفس كعدتي...
احس كل احاسيسي ميتة
_هاي شنو هاجر...
خلى العلاليك على الميز...
بس اسمع صوتهن من يفتحن...
رجع لزمني من زندي وكومني...
كعدني مقابيله على الميز...
_انتي ما اكلتي شي من الصبح
اكولي لكمة
باوعت عليه واحسه شكد بطران...
_لا تباوعين هيج...
اذا ما اكلتي ترة حتى ما ارجع عمر
عبالك كالي الكلمة السحرية
عدلت كعدتي...
_صدك احمد راح ترجعه...
_وداعت اغلى ماعندي...
بس انطيني وكت
_احلف
_مو حلفت...وادعت اغلى شي..
_بداعت نور
_وداعتها
_شفت شكد عزيز الضنى
_لا مو نور ...
باوعت عليه
شفته يباوع عليها
_لعد منو
جر حسرة
_امها...