رواية ورود شائكة الفصل الثالث والعشرون 23 - بقلم همس ليل

يسعد صباحكم...الواتباد لعب بية جولة من البارحة واليوم...
لل١٢ بالليل اكتب وما كتبت غير نص البارت الي جنت كاتبته وانمسح...
وتسلسل الاحداث ضاع من بالي...
النوب اريد انشر قفل كمت انسخ الكتابة وانزل بغير بارت وهم ماينشر 😔...

ساعة الغضب تعمينة عن رؤيا الحقيقة
وتظهر اسوء مافينا....
وعندما نهدئ تأتي ساعة الندم...
والتي احيانا لاتقدم شي ولا ينفع اي اعتذار معها...
همس ليل
صادف نهاية اسبوع كعدنا الصبح جان علي قبل يوم كمل الاربعين....
غسلتله وكلت لاحمد جيبله دشداشة
كال لا امي جايبتله
غسلت للجهال من الصبح لان الدنيا صيف وبدلت لهم
وبقيتهم يم احمد بين ما ابدل...
لبست جبة من الجابهن احمد
وهو لبس دشداشة بيضة بس طلعت حلوة عليه
من طلعت
_هاي شلون طالعة...سمنان الحلو
وغمزلي...
ضحكت...
_بس لا اتكول بدلي الجبة...
_لا عمي ما اكول امشي
طلعنا اني شايلة علاوي وهو شايل نور وكايد عمر
_مانروح بالسيارة...قريب البيت
_براحتك..
سد الباب الخارجي...ورحنا نتمشى...
تفاجأت بيت اهله بعد ست ابيوت عنا بس
ماحاجيته من وصلنا لهم...
شفت هوسة ...الظاهر عازمين على الطهور
طبيت تلكتني ام كرار بوستني واخذت علاوي وطببتني من باب المطبخ..
جان بيها ام سامر واني ملتقية بيها
وام حسين ...اول مرة اشوفها كامت سلمت علية
واختهم الجبيرة ام طه...
سلمت عليها ظلت كاعدة وجاوبت من ورة خشمها
جرتني ام كرار من يمها..
وهية تشاورني معليج بيها...
دخلت للهول من فتت من باب الصالة سمعت صوت امه...
_فوكها جايبه اتكود بيه.....
ابن الخانم..
التفت على ام كرار الي حسيتهة ضاجت من سمعت امها..
رادت تحاجيني بس ماسمعتلها ردت اسمع احمد شيجاوبها ..
احمد...يمة شسالفة شعليه الطفل...
هية مو تتربي بنتي
_معلية بهالحجي...ردت اطهر ابنك بحظني
شكو جايبها
_شلون ما جيبها غير امه
_اني كتلك من ازوجتها طول ما اني عايشة لا اطببها ابيتي
عاد لهنا وطكت روحي فتحت الباب ودخلت
_هو منو رايد يطب بيتج
اني اجيت لخاطر رجلي ترة
باوعت علية وهية كاعدة بمكانها وعوجت حلكها
_رجلها...ام ارجولة
ما انتبهت منو موجود من حجيت...
بس من كالت هاي الحجاية التفت شفت
زلم كاعدين عرفتهم اخوان احمد
ورجل ام كرار هم...
حزت بنفسي حجايتها...
بس احمد سبقني وحجى بعصبية
_يمة شنو هالحجي...مو عيب
_اي يبعد امك تعال انتة علمني العيب
احمد...استغفر الله...شلون يعني
_هو العيب الي تاخذ رجال من ورة اهله
ماخليتها اتكمل
_صدك مو صوجج ...صوجي اني الي اجيت على ناس ماتستاهل...
اخذت ابني من حظن ام كرار...
وطلعت على السريع...
بدون مالتفت لاحد...
وصلت للبيت الهث من العصبية والقهر والركض...
مديت ايدي وفتحت السرقي...
ومن وصلت لباب الممر اذكرت المفاتيح
يم احمد...
بقيت واكفة اغلي...
اندكت الباب من فتحته
شفت ام كرار شايلة نور وكايدة عمر...
_خيتي لا تزعلين هية هاي امي...
_شنو هيج سهل تجرح بالناس
_لا مو هيج...بس لسانها مو لها
جانت تحجي وهية اطب للطرمة...
مدت ايدها بالمفاتيح...
عرفت احمد دزهن بيدها
_تحتاجين شي قبل ما اروح
_لا ...تسلمين...
طلعت بعد مانزلت نور بالكاع
وهاي راسا راحت تتمشى بالطرمة وعمر يلحك وراها يريد يوكفها
فتحت الباب ودخلت
_عمر جيب اختك
دخلت خليت علي بكريكوته...
ودخلت الجهال لغرفته...
نزعت جبتي وشمرتها على الجرباية
جنت باقية البنطلون والفانيلا من سمعت
الباب ينفتح...عرفته احمد..
جريت نفس اريد اهدي نفسي...
دخل للغرفة وسد.الباب
_شدخلج للصالة
_يعني هنا المشكلة دخلتي للصالة
مو حجي امك
_اني كتلج اني جاوب ليش دخلتي
_شجاوب عيني... اشو بعد شوية اطلعني جايبني من الملاهي
صاح بية قبل ما اكمل
_انجبي وسد حلكج
_اي الي يحجي الحق ينجب والي يطاول
ينحط على الرأس
رفع اصبعه علية
_انتي جبتي الحجي لنفسج...
المفروض جان تعوفيني اني اخذ حقج اذا عندج حق
_اذا عندي حق
يعني كل هذا وماعندي حق
والحق وية امك...
شلون تقيسون الموضوع...
_ضيعتي حقج من دخلتي واطاولتي
من كال هيج اني طكت روحي...
هو جان واكف قريب على الباب...
واني مسافة عنه يم الكنتور بس واحد مواجهة الثاني
_طبعا اتكول هيج...لان امك مقدسة محد لازم يمسها
رب الي جانت السبب بكتل مرتك وانتة ولا يمك
بخطوتين صار يمي ولزمني حيل من زندي
_كم مرة اكولج لا طولين لسانج
ولا تحجين بشي ماتعرفيه
رغم جان يضغط على لحم زندي بس ولا حسيت بألم
جان القهر الي بداخلي اكبر
_اني هسة عرفت نور ليش ماجانت تشكيلك لو تحجي على سوالف امك...
شتحجي وماكو رجال يردلها
بعدني ما كملت حسيت بحرارة ايده من ضربت خدي
تفاجات منه وظليت صافنة بوجهه...
مامصدكة الي سواه...عمري ما احد مد ايده علية
رجع لزمني من زندي
_رجال غصب عليج وعلى الخلفوج...
انتي الظاهر مو مال حشيمة...
دفعني وطلع...
كلش حسيت بذلة...
جان احساسي بلحظتها يخنك...
جمدت الدمعة بعيني وما نزلت وبقيت بمكاني اباوع للباب الي طلع منه...
كمت على السريع وجريت جنطتي...
لميت ملابسي بيها...
ورحت لغرفة الجهال راسا اجى عمر علية
_ماما شبيه بابا وياج
صفنت عليه عمر صار عمر ست سنوان يفتهم يعني
_مابي شي حبيبي...
نزلت شبكته....
جانو الجهال بعدهم مبدلين...
لميت كم قطعة لهم فوك ملابسي بالجنطة...
وشلت علاوي...
_ماما عمر كود اختك...
طلعت وعفت باب الممر مفتوح...
وصلت لباب ومن اريد افتحه بقيت واكفة بمكاني
وين رايحة اني وجهالي...
باوعت على الجهال...عمر يباوعلي بنظرة متسائلة
وين رايحين....
ليش انطيها مجال تسوي الي تريده...
استغفرت ربي ورجعت للبيت...
بطريقي خليت الجنطة بالمطبخ لان جانت ثكيلة..
ودخلت الجهال للغرفة...
رجعت علاوي بمكانه...
بدلت لهم...ورحت طلعت اكل من الثلاجة غديتهم
وبقيت يمهم بالغرفة ...كاعدة على الجرباية
ثانية رجلية ومخلية راسي عليهن صفح اباوع عليهم
وهم يلعبون...
اكو فد قهر بداخلي اريد اطلعه ماعرف شلون
هو هم بعد مارجع...
شفت الجهال نعسوا...
كمت نيمتهم ورضعت علاوي ونيمته...
باوعت الساعة فوك الاثنتين الظهر...
مددت بجربايتي ونمت...
ماعرف بيش الساعة بس حسيت اكو احد فتح باب الغرفة...
ورجع سده...
عرفته احمد...
للعصر من كعدت لكيته طالع للمكتب...
بقيت يومين ماطلع من غرفة الجهال الا من هو يروح للمكتب الصبح...اطلع اسوي غدة وانظف
وارجع للغرفة وكذلك العصر...
بس صوته من يحاجي نور او عمر اسمعه
مرات اصفن ليش ما رحت لبيت اهلي...
بس منو هناك عندي...
من اتصل بامي ما حجيتلها الصار...
ثالث يوم الظهر من رجع جنت هستوني منيمة الجهال...
من فتح باب الغرف...
تفاجأت بيه...رفعت راسي باوعت عليه
ورجعت نظري على علي الي جان بحظني يرضع
اجى يمي....
_خلص رضاعة
ماجاوبته
_من احجي وياج جاوبيني...
هم مارفعت راسي..
_شنو ما مالي عينج
شلت علي وخليته بكريكوته
وخرت عنه هو جان واكف يم الجرباية...
ودنكت على الملابس جانت بالكاع اريد اشيلها
جرني من ايدي
_من احجي وياج جاوبيني لا تتجاوزيني
_شراح اتسوي اذا ما حاجيتك
رفع اصبعه يهزه بوجهي
_وعلي الكرار راح اراويج وجه ماشايفته مني
_شفت كل الوجوه...
بعدني ما مكملة قاطعني
_دير بالج تتجاوزين
_شسوي...تضرب...
هد ايدي وحجى بعصبية
_تعرفين...انتي وخالتج نفس الصنف
الي يشوفوكم مثل الورد يعجبه منظركم ويتمنى بس يشم عطركم...
بس من يمد ايده ما ينوله بس جكة الشوك
من كال هيج حيل نقهرت
مديت ايدي بدون وعي كمت اضرب على صدره
_حرام عليك...حرام فوك كل الي سوته لخاطرك
اجيب طاريها هيج وهية ميتة...
لك شنو من بشر انتو...
حتى الميت ماخلص منكم...
جان كامش ايدي يحاول يبعدني...
واخر شي دفعني بس جنت مامتوازنة وكعت وصارت وكعتي على الجرباية...
اجى دنك علية يريد يكومني...
دفعت ايده...
_مع الاسف حسبتك اهل وسند لي...
باوع علية بنظرة غريبة وعافني وطلع...
بذيج اللحظة حيل حقدت عليه لان حجى على نور

هالمرة ما وكفت افكر لميت كم حاجة وبدلت وبقيت انتظر الجهال يكعدون وهو هم يطلع...
واول ما طلع اخذت جنطتي وكعدت الجهال
بدون حتى ما ابدل ملابسهم ....
اخذتهم وطلعت قفلت الباب مال الممر...
التفت على عمر...
_ماما الزم اختك
جنت شايلة علي بايد والجنطة بايد ثانية
وكل شوي اوكف
انزل الجنطة واعدل شيلة علي ....
لحد ماوصلت للشارع واجرت تاكسي...
وصلنا للبيت اهلي...وابو التأكسي خطية
نزل ينزل الجنطة والجهال وياي...
حاولت افتح الباب الخارجي جان صعبة بيد وحدة
_عمر ماما اكعد شوية هنا
_ماما وسخة الكاع
_ميخالف بس افتح الباب...
كعد يم الباب وخليت بحظنه اخوه...
وحصرت نور بيني وبين الباب اخاف تطفر بنص الشارع
النوب الباب كوة يلا انفتح...دخلت نور وشلت علي من حضن عمر....
دخلت واجر بالجنطة...فتحت باب المطبخ..
من فتت اتفاجات بكمية التراب الموجودة...
من جبت لسة ما اجيت انظف صار شهرين
دخلت الجهال للهول...
جريت نفس...هاي شراح ينظفها...
والجو حار هم....
صحت لعمر...خليت له كوشة بالكاع..
كعدته وخليت اخوه بحظنه
_جلب بيه زين ماما...
ولنور انطيت خواشيك بسلة بس غسلتهن
وكعدته تلعب بيهن...
ورحت لغرفة ماما...جريت الجرجف المغطية بيه الجرباية....
وطلعت واحد جديد فرشته...
وشغلت السبلت لان جانت كهرباء وطنية
جبت سطل وبيه مي ومسحت اخشاب الغرفة على السريع...والكاع هم...
وكل شوي اطلع اشوف الجهال...
من خلصت غسلت ايدي ودخلت الجهال وكعدت واني احس بالتعب والعطش...
رضعت علي وخليته على الجرباية واخذت نور ورحت للمطبخ...
شغلت الثلاجة...هية فارغة شعشي الجهال...
ظليت حايرة اخذهم واطلع لو شلون
فزيت على جرس الباب...
صحت من باب المطبخ منو
_اني خالتج ام علي
طلعت فتحت لها الباب
بوستني
ام علي_شلونج خالة شخبارج
_الحمد لله ...شلونج انتي خالة
_نسأل عليج...اختفيتي كلت اكيد جابت
_اي الحمد لله...جبت علاوي
_يا صلوات...يتربى بعزكم يمة
_تفضلي خالة جوة
_لا يمة...سمعت صوت بالبيت ظل بالي اجيت اشوف منو...
خوما محتاجة شي...
_اي والله خالة بلكت ادزيلي واحد من الجهال اريده يجبلي غراض من المحل
_اني اجيبلج كولي شتريدين
_دقيقة...
دخلت اجيب الدزدان...
من طلعت شفتها تحاجي نور اتكوله شسمج
_اسمها نور
_هاي بنت خالتج الله يرحمها
_اي
_الله ينطيج يمة مثل مداريها يتيمة
انقهرت من حجايتها لان كالت يتيمة
بس ماجاوبتها..
_خالة اريد سيت مي وصمون وبيض
مديت ايدي انطيها الفلوس
_موعيب شنو هاي يمة
_لا فدوة خالة اول وتالي جان طلعت اني ودفعت
اخذتهن...
وبين ماحاولت انظف المطبخ على السريع
هل كدامي مو كلشي...
جابت الاغراض
_بعد تريدين شي
_سلامتج رحم الله والديج...
همزين جانت جايبة مي بارد...
خليت البقية بالثلاجة...
طكيت بيض للجهال...وسويتلهم جاي وياه
همزين الشكر والجاي والزيت مبقية منهن بالبيت
عشيت الجهال...هستوهم خلصوا طفت الكهرباء
خط المولد امي ماقبلت نكطعه كالت بقي بس تلث امبيرات احتياط
شغل بس ماتكفي شي...واصلا المبردات يرادلها تنظيف...
بقيت حايرة شلون راح انيم الجهال بالليل...
بقينا على البنكة للعشرة بالليل يلا اجت الوطنية
نيمتهم وسديت باب الغرفة...
ردت انظف الهول بس شفت مابية حيل...
كلت خلي انام قبل ماتطفى الكهرباء...
وديت الصينية للمطبخ...هستوني خليتهة على السنك سمعت صوت الباب ينفتح...
فزيت باوعت من الجامة...شفته احمد
اذكرت هو عنده نسخة من المفاتيح انطيتياه
حتى يجي يجيك البيت ...
حاول يفتح باب المطبخ بس جنت مسرقيته
دكه...
بقيت ثواني اهدي بنفسي يلا فتحته...
واول مافات ...
جانت عيونه حمرة من العصبية
_شبيج انتي مخبلة
باوعت عليه شجاوبه
_شلون طلعتي الجهال وشجابج وحدج هنا
_اجيت عادي
_ليش عفتي البيت
_المكان الي مابي حفظ كرامتي ما اريده
_استغفر الله...
هو منو داسلج على طرف...
وان يكن وصار بينا شي تعوفين البيت
مو بقيتي ذيج الايام شجد هسة
جان واكف مقابيلي ويحجي بعصبية وحدة
ماجاوبته
_وين الجهال جيبيهم وامشي
_ما اروح
_كتلج اجنبي الشر وجيبي الجهال وامشي
_واني كلت ما اجي
مد يده ايريد يجرني بعدين تراجع وجر الصينية الي على السنك هية وغراضها وشمرها على الحايط
من الصوت رفعت ايدي وسديت اذاني
_انتي يرادلج صبر ايوب...
واني بديت افقد صبري وياج...
جيبي الجهال وابقي هنا اذا تريدين
_بالغرفة الجهال اخذهم
فات على السريع..
اجى شايل نور وطلع بيها...
ورجع شال عمر...
من ردت احجي...رفع اصبعه لحلكه
_اش ولا كلمة...
ورجع على علي هم جابه وطلعه...
تأخر برة...صفنت معقولة راح يأخذهم...
بس شوية ورجع دخل للغرفة سمعته يطفي بالدكم مال كهرباء...
من رجع شمر علية الشال والعباية مال الجتف
_البسي واطلعي للسيارة بدون صوت اذا رايدة نفسج
بوقتها ماعرف ليش خفت...
حسيته واصل مرحلة من العصبية...
ماعاندت لبست العباية وخليت الشال على راسي
وجان دزداني والموبايل على الكاونتر اخذتهم ورحت
للسيارة...
شفته مخلي علي بالكرسي الي بالمقدمة ومتجيله بالكوشة...
رفعته وكعدت وخليته بحظني....
باوعت للموبايل كومة مكالمات فائتة...
فتحته كلها احمد...نسيت اني مخليته صامت علمود مايكعد علي...
التفت على صوت الباب ينسد...باوعت عليه
ومن التفت انداريت...
صعد للسيارة وهو يستغفر الله...
لحد ماوصلنا المشتمل هو ماحجى...
بس نزل فتح الباب...ودخل جوة فتح باب المطبخ
اني نزلت وراسا دخلت لغرفة الجهال...
خليت علي بمكانه ونزعت عبايتي وشالي...
هو جاب عمر ونور واحد ورة الثاني
عمر من خلاه بفراشه كعد
_نام بابا نام الله بلاكم بام خبلة
عافني وطلع....
بقيت بعدها اسبوع ما احجي وياه...
واصلا من يجي ادخل للغرفة ومن يطلع للمكتب اطلع اكمل شغلي....

يوم اندكت الباب الصبح...من طلعت وصحت منو
عرفتهة ام كرار
فتحتلها الباب ورحبت بيها...
ومثل كل مرة ماقبلت الا نكعد بالمطبخ...
سويت كهوة وهية تحجي عن جهالها ورجلها
خليت الفنجان كدامها وكعدت واني اصيح
على نور اتبطل تكمز...
ام كرار...هاجر ...ما اريد ادخل بينكم...
بس اعرف الوضع بينج وبين احمد مو شي
من يوم رحتوا لبيت اهلي
_منو كلج احمد
_لا احمد ما يحجي شي...
بس من يجينة اشوفه ضايج...
ولحيت عليه كال ماتتحاجون وبس

سكتت ماجاوبته بقيت اباوع لفنجاني
ام كرار...ليش تخلين موقف الاخرين يأثر على حياتكم
هاجر....يا اخرين...هاي امج الي تعتبر خط احمر محد يقترب منه حتى لو غلطت بحق غيرها
_المفروض تخليه هو ياخذ حقج
_نفس حجايته بس ماشفته حجى شي
_لا حجى بس انتي ما نطيتي مجال...
ولا تنسين هاي ام...يعني ربت وكبرت
مو المفروض يردها بطريقة مامحترمة
رفعت فنجاني اريد اشرب الكهوة
_اعتبريني اختج مو حماتج..
مثل مافتحت گلبي لج افتحي گلبج
واحجيلي ..
دنكت افكر بحجايتها صدك محتاجة احد اشكيله
_اني اكثر ما انقهرت من حجى على نور
_احمد حجى على نور....متأكدة خاف مفتهمة الموضوع غلط
ليش ما تكعدين وية رجلج واسألي عن كلشي
وتفتهمين منه احسن...
باوعت عليها...
هزت راسها ...هاجر خيتي بين الرجل والمرة كلشي يصير....
ما ضيعين الاول والتالي علمود موقف...
لا تنسى لصاحبك الحلو كله وتذكر المر بس
ظل حجايتها تفر براسي من راحت...
وكفت كدام المراية...صدك نسيتي كل وكفاته
وياج وية اهلج...
جاوبت نفسي ما نسيت بس صعبة علية يرفع ايده ويضربني
رجع صوت انتي جاوزتي عليه...
امه جاوزت ما خذتي حقج منها رجعتي عليه
دخت شنو الصح وشنو الخطأ...
زين نور شدخلها وانتقدها....
بيومها الظهر مارجع وللعصر وهم ماكو...
قلقت كلش...بس كلت اكيد مر على اهله
المغرب اندكت الباب...طلعت اشوف منو

_اني ابو سامر خوية
_لحظة...
رجعت خليت الشال على راسي ولبست عباية على جتفي وطلعت
_السلام عليكم...شلونج خوية ام علي
_وعليكم السلام...تفضل ابو سامر
_لا خوية مو مال كعدة بس ردت غيارات لاحمد
_ليش خير هو وين
_ماكو شي لا تخافين...ابو علي مسوي حادثة
شهكت...اسم الله...وينه هسة وشلونه
_بالمستشفى ...مابيه شي رجله مكسورة وشوية رضوض
_الله عليك...خاف بيه شي
_لا سامح الله لو بي شي اظل واكف كدامج هسة
_اروح وياك
_لا خوية وين ترحين المستشفى كلها زلم...
وبعدين جهالج وين تبقيهم....
انطيني غيارات له
دخلت اجيبله ملابس..
جنت اخليهن بالجنطة ودموعي ادير....
اتخيله متمدد بالمستشفى...
طلعت الجنطة لاخوه واني امسح دموعي
رجعت كعدت على الكرسي بالمطبخ
حسيت شكد نذلة اني....
نسيت من جنت حامل شلون جان يجيبلي الاكل ليمي
لو من اتقيء يوكف فوك راسي....
لو يرجع تعبان ياخذ الجهال من يمي لان يشوفني مالي خلك....
اربع اشهر وحام وزواع ماحسسني ماعندي احد
ومن جبت بعد اكثر داراني...
واني غاب اليوم كله ما خابرت...
كرامتي ماسمحت لي اشيل تلفون حتى ما اتنازل
رغم شكد جنت قلقة عليه...
كمت شلت الموبايل دكيت عليه يطلع مغلق
رجعت  دكيت على ام كرار ماعندي بس رقمها
من رفعته راسا جاوبتني
_لا تخافين مابي شي...هسة خابرت ابو كرار يمه بالمستشفى...
_الله عليج مابي شي...
_والله العظيم بخير هو بس كسر برجله ورضوض
_وهاي مابي شي
_خيتي انكول الحمد لله والشكر سيارته حيل متأذية
_ردت اروح للمستشفى ماقبل ابو سامر
_غير يكلب الدنيا على راسنا رجلج...
المستشفى انملت زلم عمام وخوال شيوديج
_لعد شلون ما اشوفه
_باجر يطلعوه بس يخلصون الفحوصات
بليلتها ماجاني نوم....يمكن كل الي نمته ساعة متقطعة
بس صبح الصبح رجعت دكيت عليع مغلق...
بقيت انتظر ام كرار تخابرني...
وافتر بالبيت اريد الهي نفسي ...
ما اعرف شلون ريكت الجهال...
اخر شي ما تحملت دكيت عليها...
كالت راح يطلعوه هسة...
رحت لغرفته غيرت الفرشة وعدلت الغرفة
صار فترة ما داخلتها...
وانتظر انتظر بس ماكو حس ولا نفس
دكيت على ام كرار جاوبتني تمتمت
_شبيج ام كرار...
الله عليج احمد بي شي
حسيت گلبي راح يوكف لحد ماجاوبت
_والله مابي شي...
بس
_بس شنو احجي
_هنا اجى ابيت اهلي
_ها
ماكدرت احجي شي
_لعد جاية اريد اشوفه
سديت تلفوني وعلى السريع لبست عباية جتف وشال...
وشلت علي وجريت الجهال وراي...
جنت بس اريد اطمن عليه...
جان اكو هواي سيارات...
من شفتهن وكع گلبي ...
خاف اكو شي ...
من وصلت لهم جانت ام كرار تنتظرني بالباب...
فوتتني من باب المطبخ...
اكو نسوان ما انتبهت منو موجود...
بالي بس اشوفه
ام كرار...بس خلي يطلعون من يمه...
اجت ام سامر وام حسين سلموا علية
واني باقية واكفة بمكاني...
وعمر ونور خاتلين بصفي...
شفت زلم طلعوا من باب غرفة مقابل المطبخ...
وقبل محد يحجي رحت على السريع للغرفة...
من فتت راسا رفع نظره احمد متفاجأ من سمع صوتي...
وجان اكو شخص واكف على صفح...
_شلونك احمد حمد لله على سلامتك
دنكت بست راسه
هو التفت على الشخص الي انسحب بهدوء
رجع باوع علية
_شجابج
بقيت اباوع عليه متفاجأة ....